ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା ବେଲଗୁଣ୍ଠା ନିକଟରେ ବସ୍ ଦୁର୍ଘଟଣା । ବାଣତୁମ୍ଭ ଗ୍ରାମ ନିକଟରେ ଭାରସାମ୍ୟ ହରାଇ ଗଛକୁ ପିଟିଲା OSRTC ବସ୍ l ଡ୍ରାଇଭରଙ୍କ ସମେତ ୧୦ ଯାତ୍ରୀ ସାମାନ୍ୟ ଆହତ ହୋଇଛନ୍ତି l ଆହତଙ୍କୁ ଚିକିତ୍ସା ପାଇଁ ଆମ୍ବୁଲାନ୍ସ ଓ ଅଗ୍ନିଶମ ବିଭାଗ ଦ୍ୱାରା ଭଞ୍ଜନଗର ମେଡିକାଲରେ ଭର୍ତ୍ତି କରାଯାଇଛି l ବସଟି ଭୁବନେଶ୍ୱରରୁ ଭଞ୍ଜନଗର ଦେଇ ବାଲିଗୁଡା ଆସୁଥିବା ବେଳେ ବାଣତୁମ୍ଭ ଠାରେ ଘଟିଛି ଦୁର୍ଘଟଣା l ଘଟଣାସ୍ଥଳରେ ଭଞ୍ଜନଗର ପୋଲିସ ପହଞ୍ଚି ତଦନ୍ତ ଚଳାଇଛି l.
କଂଗ୍ରେସ ନେତାଙ୍କୁ ତାରାଙ୍କ ଅନୁରୋଧ, ଦିଲ୍ଲୀ ଯିବା ଛାଡ଼
ଭୁବନେଶ୍ବର: ରାଜ୍ୟ କଂଗ୍ରେସର ହେବ ଢାଞ୍ଚାଗତ ପରିବର୍ତ୍ତନ । ଦଳରେ ରହିବ ନାହିଁ ଗୋଷ୍ଠୀ ବିବାଦ କି ଭାଗ ଭାଗ ହେବାକୁ ଦିଆଯିବ ନାହିଁ । ୨୦୨୯ରେ କଂଗ୍ରେସ ଓଡିଶାରେ ନମ୍ବର ଓ୍ବାନ ଦଳ ଭାବେ ଛିଡ଼ା କରିବାକୁ ଏବେ ଠାରୁ ରଣନୀତି ପ୍ରସ୍ତୁତ ହୋଇଛି । ତେଣୁ କଂଗ୍ରେସ ନେତାମାନେ ଦିଲ୍ଲୀ ଯିବା ବନ୍ଦ କରି ସଂଗଠନ ସଜାଡ଼ିବାକୁ ହାତଯୋଡି ଅନୁରୋଧ କରିଛନ୍ତି ବିଧାୟକ ତାରା ପ୍ରସାଦ ବାହିନୀପତି । ଗଣମାଧ୍ୟମ ଆଗରେ ତାରା ତାଙ୍କ ମନ କଥା କହିବା ପରେ ରାଜ୍ୟ କଂଗ୍ରେସ ରାଜନୀତିରେ ଜୋରଦାର ଚର୍ଚ୍ଚା ଆରମ୍ଭ ହୋଇଛି ।
୨୦୨୪ ନିର୍ବାଚନ ଫଳାଫଳ ସଙ୍କେତ ଦେଇଛି ୨୦୨୯ରେ କଂଗ୍ରେସ ରାଜ୍ୟରେ ଏକ ନମ୍ବର ଦଳ ହେବ । ତେଣୁ କଂଗ୍ରେସ ନେତାମାନେ ଏକାଠି ହୋଇ କାମ କରିବାକୁ ହାତ ଯୋଡ଼ି ଅନୁରୋଧ କରିଛନ୍ତି ବରିଷ୍ଠ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି । କଂଗ୍ରେସର ୧୪ ଜଣ ବିଧାୟକ ଏଥର ବିଧାନସଭାକୁ ନିର୍ବାଚିତ ହୋଇଯାଇଛନ୍ତି । ସମସ୍ତେ ଏକ ହୋଇ ଓଡ଼ିଶାର ଦୁର୍ନୀତି, ଭଷ୍ଟ୍ରାଚାର ବିରୋଧରେ ଦୃଢ ସ୍ବର ଉଠାଇବା ସହ ଲୋକଙ୍କ ସମସ୍ୟା ଦୂର କରିବାକୁ ପ୍ରସ୍ତୁତ ରହିବାକୁ ବିଧାୟକମାନଙ୍କୁ କହିଛନ୍ତି । ବିଧାନସଭାରେ ଦଳ ପକ୍ଷରୁ ତାଙ୍କୁ ବିଧାୟକ ଦଳ ନେତା କରାଯାଉ କି ନଯାଉ ତାଙ୍କ ଶାଣିତ ସ୍ବର ବିଧାନସଭାରେ ପ୍ରକମ୍ପିତ ହେବ । ନିକଟରେ ବିଧାୟକ ତାରା କିଛି ବିଧାୟକଙ୍କ ସହ ଦିଲ୍ଲୀ ଯାଇ ଦଳର ବରିଷ୍ଠ ନେତୃବୃନ୍ଦଙ୍କ ସହ ଆଲୋଚନା କରିଛନ୍ତି । ଏହାସହ କାହିଁକି ୨୦୨୪ରେ ଦଳର ନୈରାଶ୍ୟଜନକ ପରାଜୟ ହୋଇଛି ତାହାର କାରଣ ନେଇ ମଧ୍ୟ ହାଇକମାଣ୍ଡଙ୍କୁ ଅବଗତ କରିଛନ୍ତି ।
୨୦୨୪ରେ କଂଗ୍ରେସର ଆସନ ସଂଖ୍ୟା ବୃଦ୍ଧି ହୋଇଥିଲେ ମଧ୍ୟ ଦଳର ଭୋଟ ହାର କମିଛି । ୨୦୧୯ ନିର୍ବାଚନ ପରେ କଂଗ୍ରେସର ଲଗାତର ଭାବେ ଭୋଟ ପ୍ରତିଶତ ହାର କମିବା ସହ ତୃଣମୂଳସ୍ତରେ କଂଗ୍ରେସ ସଂଗଠନ ଦୁର୍ବଳ ହେବାରେ ଲାଗିଛି । ତେଣୁ ଦଳର ବରିଷ୍ଠ ନେତାମାନେ ଏକାଠି ହୋଇ କାମ କରିବାକୁ ଆହ୍ବାନ ଦେଇଛନ୍ତି ବରିଷ୍ଠ କଂଗ୍ରେସ ନେତା ଜୟଦେବ ଜେନା । ଜଣକ ପରେ ଜଣେ ନେତା ସଂଗଠନକୁ ନେଇ ମୁହଁ ଖୋଲିବା ରାଜ୍ୟ କଂଗ୍ରେସ ରାଜନୀତିରେ ହଲଚଲ ସୃଷ୍ଟି କରିଛି ।
ଚବିଶ ନିର୍ବାଚନ ଫଳାଫଳ ଆସିବା ପରେ କଂଗ୍ରେସ ରାଜନୀତିରେ ସରଗରମ ହେବାରେ ଲାଗିଛି । ୨୦୨୯ ପାଇଁ ଯେ କଂଗ୍ରେସ ରୋଡମ୍ଯାପ ପ୍ରସ୍ତୁତ କରୁଛି ତାହା ଜଳଜଳ ହୋଇ ଦିଶୁଛି । ତାର ସଂକେତ ହେଲା ପ୍ରଚାର କମିଟି ଅଧ୍ୟକ୍ଷ ପଦରୁ ଭକ୍ତ ଦାସଙ୍କ ଇସ୍ତଫା ଓ ବହୁ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ।
ରାଜ୍ୟରେ ବିଜେପି ସରକାର ଗଠନକୁ ୪୮ଘଣ୍ଟା ବିତିଲାଣି, ଏଯାଏଁ ମନ୍ତ୍ରୀଙ୍କୁ ମିଳିନି ବିଭାଗ
ନନ୍ଦିଘୋଷ ବ୍ୟୁରୋ: ରାଜ୍ୟରେ ବିଜେପି ସରକାର ଗଠନକୁ ୪୮ଘଣ୍ଟା ବିତିଲାଣି। ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ, କ୍ୟାବିନେଟ ଓ ସ୍ବାଧୀନ ରାଷ୍ଟ୍ରମନ୍ତ୍ରୀ ଶପଥ ନେଇସାରିଲେଣି। ପ୍ରଥମ ମନ୍ତ୍ରିପରିଷଦ ବୈଠକ ବସି ଗୁରୁତ୍ବପୂର୍ଣ୍ଣ ନିଷ୍ପତି ନିଆଗଲାଣି। ମୁଖ୍ୟମନ୍ତ୍ରୀ ଅନେକ କାର୍ଯ୍ୟକ୍ରମରେ ଯୋଗଦେବା ସହ ବରିଷ୍ଠ ଅଧିକାରୀଙ୍କ ସହ ସମୀକ୍ଷା ବୈଠକ ବି କଲେଣି । ହେଲେ ଏବେ ସୁଦ୍ଧା ମନ୍ତ୍ରୀମାନଙ୍କ ମଧ୍ୟରେ ବିଭାଗ ବଣ୍ଟନ ହୋଇପାରୁନାହିଁ। କାହାକୁ କେଉଁ ବିଭାଗ ମିଳିବ, ତାକୁ ନେଇ ରାଜ୍ୟବାସୀଙ୍କ ଉତ୍କଣ୍ଠା ବଢିଚାଲୁଥିବା ବେଳେ ବିଭାଗ ବଣ୍ଟନକୁ ନେଇ ହୋଇପାରୁନାହିଁ ସହମତି । ସେପଟେ ମୁଖ୍ଯମନ୍ତ୍ରୀ କହିଛନ୍ତି, ସଠିକ୍ ସମୟରେ ସଠିକ ପଦକ୍ଷେପ ନିଆଯିବ ।
ରାଜ୍ୟରେ ପ୍ରଥମ ବିଜେପି ସରକାର ଗଠନକୁ ନେଇ ଉତ୍ସାହିତ ବିଜେପି ଶିବିର। ଦୁଇ ଉପମୁଖ୍ୟମନ୍ତ୍ରୀ, ୮ କ୍ୟାବିନେଟ, ୫ ରାଷ୍ଟମନ୍ତ୍ରୀ ଭବ୍ୟ ସମାରୋହରେ ଶପଥ ନେଇଛନ୍ତି। ଶପଥ ନେବାର ୪୮ଘଣ୍ଟା ପରେ ବି ମନ୍ତ୍ରୀମାନଙ୍କୁ ମିଳିପାରିନି ବିଭାଗ। ବିଭାଗ ବଣ୍ଟନରେ କାହିଁକି ହେଉଛି ବିଳମ୍ବ, ତାକୁ ନେଇ ଚାଲିଛି ଚର୍ଚ୍ଚା ଆଲୋଚନା। ନୂଆ ସରକାର ଗଠନ ପରେ ମନ୍ତ୍ରୀ ପରିଷଦ ବୈଠକରେ ଗୁରୁତ୍ବପୂର୍ଣ୍ଣ ନିଷ୍ପତି ନିଆଯାଇଛି।
ବିଭିନ୍ନ ସରକାରୀ କାର୍ଯ୍ୟକ୍ରମରେ ଯୋଗ ଦେଉଛନ୍ତି ମୁଖ୍ୟମନ୍ତ୍ରୀ। ବରିଷ୍ଠ ଅଧିକାରୀଙ୍କ ସହ ସମୀକ୍ଷା ବୈଠକ ବି କଲେଣି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ହେଲେ ମନ୍ତ୍ରୀମାନଙ୍କ ବିଭାଗ ଅଡ଼ୁଆ ତୁଟୁନାହିଁ। ମହିଳା ଶିଶୁ ବିକାଶ ଓ ମିଶନ ଶକ୍ତି ବିଭାଗ ପାଇଁ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଇଚ୍ଚ୍ଛୁକ ଥିବା ଜଣାପଡ଼ିଥିବା ବେଳେ ସେ ବି ଅପେକ୍ଷା କରିଛନ୍ତି ବିଭାଗ ପାଇଁ। ରାଜ୍ୟିାସୀଙ୍କୁ ରଜ ଶୁଭେଚ୍ଛା ଜଣାଇଥିବା ବେଳେ ବିଭାଗ ନେଇ ମୁହଁ ଖୋଲିନାହାନ୍ତି।
ବିଜେପିର ବରିଷ୍ଠ ନେତା କନକ ବର୍ଦ୍ଧନ ସିଂହଦେଓ ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ବେଳେ ଓଜନିଆ ବିଭାଗ ଅପେକ୍ଷାରେ ଅଛନ୍ତି। କ୍ୟାବିନେଟରେ ସ୍ଥାନ ପାଇଥିବା ଭେଟେରାନ ନେତା ସୁରେଶ ପୂଜାରୀ ବି ଗୁରୁତ୍ବପୂର୍ଣ୍ଣ ବିଭାଗ ନଜରରେ। କେବଳ କନକ ବର୍ଦ୍ଧନଙ୍କୁ ଛାଡ଼ିଲେ ନୂଆ ମନ୍ତ୍ରୀମଣ୍ଡଳରେ କାହାର ମନ୍ତ୍ରୀତ୍ବର ଅଭିଜ୍ଞତା ନାହିଁ। ତେଣୁ କାହାର କେଉଁ ବିଭାଗରେ ଦକ୍ଷତା ରହିଛି, ତାହା ଜାଣିବାକୁ ସମୟ ଲାଗୁଛି। ଅପରପକ୍ଷରେ ବିଜେପିର କାମ କରୁଥିବା ବିଭିନ୍ନ ଗୋଷ୍ଠୀ ମଧ୍ୟ ନିଜ ଲୋକଙ୍କୁ ଭଲ ବିଭାଗ ଦେବା ପାଇଁ ଚାପ ପ୍ରୟାଗ କରୁଥିବା ଆଲାଚନା ହେଉଛି।
ପୃଥ୍ବୀରାଜ ହରିଚନ୍ଦନ, କୃଷ୍ଣଚନ୍ଦ୍ର ମହାପାତ୍ର, ମୁକେଶ ମହାଲିଙ୍ଗ, ରବି ନାରାୟଣ ନାଏକ, ନିତ୍ୟାନନ୍ଦ ଗଣ୍ଡ, ବିଭୂତି ଯେନା, କୃଷ୍ଣଚନ୍ଦ୍ର ପାତ୍ରଙ୍କ ଭଳି ୮ କ୍ୟାବିନେଟ ମନ୍ତ୍ରୀଙ୍କ ମଧ୍ୟରୁ କାହାକୁ ଅର୍ଥ, ରାଜସ୍ବ, ଜଳସେଚନ, କୃଷି ଭଳି ବିଭାଗ ମିଳିବ ତା ଉପରେ ବି ନଜର ରହିଛି। ସେହିପରି ୫ରାଷ୍ଟ୍ରମନ୍ତ୍ରୀ ସ୍ବାଧୀନ ମନ୍ତ୍ରୀ ଭାବେ ଶପଥ ନେଇଥିବା ସମ୍ପଦ ସ୍ବାଇଁ, ସୂର୍ଯ୍ୟବଂଶୀ ସୁରଜ, ଗୋକୁଳାନନ୍ଦ ମଲ୍ଲିକ, ପ୍ରଦୀପ ବଳ ସାମନ୍ତ, ଗଣେଶ ରାମ ସିଂହ ଖୁଣ୍ଟିଆଙ୍କ ମଧ୍ୟରୁ ଶିଳ୍ପ, ଶକ୍ତି, କ୍ରୀଡ଼ା ଯୁବ ବ୍ୟାପାର, ଖାଦ୍ୟ ଯୋଗାଣ ବିଭାଗ କାହା ଭାଗ୍ୟରେ ରହିଛି, ତାକୁ ନେଇ ସମସ୍ତେ ସନ୍ଦୀହାନ।
ମନ୍ତ୍ରୀମାନଙ୍କୁ ବିଭାଗ ବଣ୍ଟନ ମୁଖ୍ୟମନ୍ତ୍ରୀଙ୍କ ସମ୍ପୂର୍ଣ୍ଣ ଇଚ୍ଛାଧୀନ ବ୍ୟାପାର। ହେଲେ ଏହା ବିଳମ୍ବ ହେଉଥିବାରୁ ମୁଖ୍ୟମନ୍ତ୍ରୀ ନିଜ ଇଚ୍ଛାରେ ଦାୟିତ୍ବ ଦେଉଛନ୍ତି ନା ଦଳର ଭିନ୍ନ ଭିନ୍ନ ଲବିକୁ ଗୁରୁତ୍ବ ଦେଉଛନ୍ତି ନା କେନ୍ଦ୍ରୀୟ ହାଇକମାଣ୍ଡଙ୍କ ଉପରେ ନିର୍ଭର କରୁଛନ୍ତି, ତାହା ଉପରେ ରାଜ୍ୟବାସୀଙ୍କ ନଜର ରହିଛି।
ରାତି ପାହିଲେ ବଜାର ଦେଖାଉଛି ନାଲି ଆଖି, ଖାଉଟି ମୁଣ୍ଡରେ ଚଡ଼କ
ନନ୍ଦିଘୋଷ ବ୍ୟୁରୋ: ଖାଉଟି ମୁଣ୍ଡରେ ଚଡ଼କ । ବାଧୁଛି ଦରଦାମ ବୃଦ୍ଧି । ତୁରନ୍ତ କିଛି ନ କଲେ ଲୋକଙ୍କ ଅବସ୍ଥା ବେହାଲ ହୋଇଯିବ । ଦରଦାମ ବୃଦ୍ଧିରେ ଲଗାମ କଷିବାକୁ ଅଣ୍ଟା ଭିଡିଲା ରାଜ୍ୟ ବ୍ୟବସାୟୀ ମହାସଂଘ । ଦର ନିୟନ୍ତ୍ରଣ ପାଇଁ ତୁରନ୍ତ ରାଜ୍ୟର ନୂଆ ସରକାର ତୁରନ୍ତ ମହାସଂଘ ସହ ଆଲୋଚନା କରନ୍ତୁ ବୋଲି ନିବେଦନ କରିଛନ୍ତି ବ୍ୟବସାୟୀ ମହାସଂଘର ମହାସଚିବ । ସେପଟେ ବ୍ୟବସାୟୀ ମହାସଂଘର ନିବେଦନକୁ ସ୍ବାଗତ କରିଛନ୍ତି ବିରୋଧୀ ।
ରାତି ପାହିଲେ ବଜାର ଦେଖାଉଛି ନାଲି ଆଖି । ରଜ ମଉଜକୁ ଫିକା କରିଛି ଦରଦାମ ବୃଦ୍ଧି । ଆଳୁ ୩୦, ପିଆଜ ୪୦ ପାର୍ । ୫୦ ତଳେ ନାହିଁ କୌଣସି ପନିପରିବା । ହୁ ହୁ ହୋଇ ବଢୁଛି ଚାଉଳ ଦର । ଡାଲି, ତେଲ ଅଟାରେ ବ୍ରେକ୍ ଲାଗୁନି । ଅବସ୍ଥା ଦେଖି ଅଣ୍ଟା ଭିଡ଼ିଲା ରାଜ୍ୟ ବ୍ୟବସାୟୀ ମହାସଂଘ । ସରକାରଙ୍କୁ ସିଧା ଅନୁରୋଧ । ଦରଦାମ ନିୟନ୍ତ୍ରଣ ପାଇଁ ରାଜ୍ୟ ସରକାର ତୁରନ୍ତ ବ୍ୟବସାୟୀ ମହାସଂଘ ସହ ଆଲୋଚନା କରନ୍ତୁ । ନ ହେଲେ ରାଜ୍ୟରେ ସ୍ଥିତି ଅଣାୟତ୍ତ ହେବ । ଏମିତି ଅବସ୍ଥା ହେଲାଣି ପାଇକରୀ ଦର ଯଦି ୧ ଟଙ୍କା ବଢୁଛି ସେଇ ସାମଗ୍ରୀ ଉପରେ ଖଚୁରା ବଜାରରେ ୫ରୁ ୧୦ ଟଙ୍କା ବୃଦ୍ଧିର ଶିକାର ହେଉଛନ୍ତି ଖାଉଟି । ଖାଉଟି ମୁଣ୍ଡରେ ଚଡ଼କ । ଲୋକେ କଣ କରିବେ ଜାଣି ପାରୁନାହାନ୍ତି । କାରଣ ରାତି ପାହିଲେ ବଜାର ଦର ହୁ ହୁ ହୋଇ ବଢିଚାଲିଛି ।
ରାଜ୍ୟ ବ୍ୟବସାୟୀ ମହାସଂଘ ଯେଉଁ ନିବେଦନ କରିଛି ତାକୁ ସ୍ବାଗତ କରିଛନ୍ତି ବିରୋଧୀ । ଓଡ଼ିଶା କୃଷି ପ୍ରଧାନ ରାଜ୍ୟ । ଖରାଦିନେ ଅମଳ କମ୍ ହେଉଥିବାରୁ ରାଜ୍ୟରେ କୃଷି ଉତ୍ପାଦନ କମ୍ ହୋଇଥାଏ । କିନ୍ତୁ ଏବର୍ଷ ଯେପରି ସବୁ ଖାଦ୍ୟ ସାମଗ୍ରୀ ଦର ବଢୁଛି ତାହା ଆଗରୁ କେବେ ଦେଖାଯାଇ ନଥିଲା । ଏବେ ରାଜ୍ୟରେ ଡବଲ୍ ଇଞ୍ଜିନ୍ ସରକାର । ଉଭୟ କେନ୍ଦ୍ର ଓ ରାଜ୍ୟ ସରକାର ଦରଦାମ ନିୟନ୍ତ୍ରଣ ପାଇଁ ଆଗେଇ ଆସିବାକୁ ସବୁ ମହଲରୁ ଦାବି ହେଉଛି ।
ଭାରତ ସରକାରଙ୍କ ପରିସଂଖ୍ୟାନ ବିଭାଗ କହୁଛି ଖାଉଟି ସୂଚକାଙ୍କ ଗତ ମାସରେ କମି ୪.୭୫ ପ୍ରତିଶତ ହୋଇଛି । ହେଲେ ବଜାର ସ୍ଥିତି କହୁଛି ଓଲଟା । ସୂଚକାଙ୍କର ଗଣିତରେ ସାଧାରଣ ଖାଉଟିର ପେଟ ପୂରିବନି । ସବୁ ବର୍ଗର ଖାଉଟିଙ୍କୁ ସୁହାଇଲାଭଳି ଖୁଚୁରା ବଜାରରେ କିପରି ସୁଲଭ ଦରରେ ଜିନିଷ ପତ୍ର ମିଳିବ ତାକୁ ଦେଖିବା ସରକାରଙ୍କ ଦାୟିତ୍ବ ।
ଜୁଲାଇ ପହିଲାରୁ ଦେଶର ଦଣ୍ଡବିଧାନ ବ୍ଯବସ୍ଥାରେ ଆମୂଳଚୂଳ ପରିବର୍ତ୍ତନ
ନୂଆଦିଲ୍ଲୀ: ଏବେ ହେବ ନ୍ଯାୟ । ଲାଗୁ ହେବ ଭାରତୀୟ ନ୍ଯାୟ ସଂହିତା, ଭାରତୀୟ ନାଗରିକ ସୁରକ୍ଷା ସଂହିତା । ହଟିବ ୧୫୦ ବର୍ଷର ବ୍ରିଟିଶ ଅମଳର ଆଇପିସି ଓ ସିଆରପିସି । ତଦନ୍ତରେ ବ୍ଯବହାର ହେବ ଟେକ୍ନୋଲଜି, ମାନବାଧିକାରର ସୁରକ୍ଷାକୁ ଦିଆଯିବ ଗୁରୁତ୍ବ । ନୂଆ କ୍ରିମିନାଲ ଲ’ କାର୍ଯ୍ଯକାରୀ ନେଇ ସବୁ ରାଜ୍ଯର ଡିଜିପି, ଗୃହ ସଚିବ, ମୁଖ୍ଯ ଶାସନ ସଚିବଙ୍କ ସହିତ କେନ୍ଦ୍ର ଗୃହ ସଚିବଙ୍କ ଆଲୋଚନା । ରାଜ୍ଯର ପୋଲିସ ଅଧିକାରୀଙ୍କୁ ମଧ୍ଯ ଦିଆଯାଇଛି ଟ୍ରେନିଂ । ଜୁଲାଇରୁ ନୂଆ ଧାରାରେ ରୁଜୁ ହେବ ମାମଲା ।
ଜୁଲାଇ ପହିଲାରୁ ଦେଶର ଦଣ୍ଡବିଧାନ ବ୍ଯବସ୍ଥାରେ ଆମୂଳଚୂଳ ପରିବର୍ତ୍ତନ । ଆଉ ରହିବ ନାହିଁ ୧୫୦ ବର୍ଷର ବ୍ରିଟିଶ ନିୟମ । ଉଠିଯିବ ଆଇପିସି, ସିଆରପିସି ଓ ଏଭିଡେନ୍ସ ଆକ୍ଟ । ଇଣ୍ଡିଆନ୍ ପେନାଲ୍ କୋଡ୍ ବଦଳରେ ଆସିବ ଭାରତୀୟ ନ୍ୟାୟ ସଂହିତା । କୋଡ୍ ଅଫ୍ କ୍ରିମିନାଲ୍ ପ୍ରୋସିଜିଓର ବଦଳରେ ଲାଗୁ ହେବ ‘ଭାରତୀୟ ନାଗରିକ ସୁରକ୍ଷା ସଂହିତା’ । ସେହିପରି ଇଣ୍ଡିଆନ୍ ଏଭିଡେନ୍ସ୍ ଆକ୍ଟ ପରିବର୍ତ୍ତେ କାର୍ଯ୍ଯକାରୀ ହେବ ‘ଭାରତୀୟ ସାକ୍ଷ୍ୟ ଅଧିନିୟମ’ । ପୂର୍ବରୁ ୫୧୧ଟି ସେକ୍ସନ୍ ଥିବା ବେଳେ ଏବେ ୩୫୮ଟି ସେକ୍ସନ୍ ରହିବ ଓ ୧୭୫ଟି ସେକସନ୍ ସଂଶୋଧନ କରାଯିବ । ଜୁଲାଇରୁ ନୂଆ ଧାରାରେ ରୁଜୁ ହେବ ମାମଲା ।
ଆଇପିସି, ସିଆରପିସି, ଏଭିଡେନ୍ସ ଆକ୍ଟକୁ ହଟାଇବାକୁ କେନ୍ଦ୍ର ସରକାର ୨୦୨୩ ଡିସେମ୍ବରରେ ସଂଶୋଧନ ପ୍ରସ୍ତାବ ଆଣିଥିଲେ । ଡିସେମ୍ବରରେ ସଂସଦରେ ସଂଶୋଧନ ହେବା ପରେ ଫେବୃଆରିରେ ବାହାରିଥିଲା ନୋଟିଫିକେସନ । କୁହାଯାଉଛି, ଆଗରୁ ଅପରାଧକୁ ଗୁରୁତ୍ବ ଦିଆଯାଉଥିବା ବେଳେ ଏବେ ଫୋକସରେ ରହିବ ନ୍ୟାୟ । ନୂଆ ନିୟମ କାର୍ଯ୍ଯକାରୀ କରିବା ପାଇଁ କେନ୍ଦ୍ର ଗୃହ ସଚିବ ଏକ ବୈଠକ କରିଥିଲେ । ଯେଉଁଥିରେ ଯୋଗ ଦେଇଥିଲେ ମୁଖ୍ଯ ଶାସନ ସଚିବ, ଡିଜି ଓ ଗୃହ ସଚିବ । କେନ୍ଦ୍ର ଗୃହ ମନ୍ତ୍ରାଳୟ ତରଫରୁ ପୋଲିସ ଅଫିସରଙ୍କୁ ଦିଆଯାଇଛି ଟ୍ରେନିଂ। ନୂଆ ନିୟମ କାର୍ଯ୍ଯକାରୀ କରିବାକୁ ଅତିରିକ୍ତ ଡିଜି କ୍ରାଇମଙ୍କ ଅଧ୍ଯକ୍ଷତାରେ ଏକ କମିଟି କରାଯାଇଥିବା ବେଳେ ଗୃହ ବିଭାଗ ଆଡିସିନାଲ ଚିଫ୍ ସେକ୍ରେଟାରୀଙ୍କ ଏକ ଷ୍ଟିଅରିଂ କମିଟି କରାଯାଇଛି ।
ନୂଆ ଆଇନରେ ମାନବାଧିକାର ସୁରକ୍ଷା, ତଦନ୍ତରେ ଟେକ୍ନୋଲଜିର ବ୍ଯବହାରକୁ ଦିଆଯାଇଛି ଗୁରୁତ୍ବ । ଜୁଲାଇ ୧ ମଧ୍ୟରେ ଯେତିକି କେସ ରୁଜୁ ହୋଇଥିବ ତାହା ପୁରୁଣା ସିଆରପିସିରେ ବିଚାର କରାଯିବ । ତା’ପରର ମାମଲା ଭାରତୀୟ ନ୍ୟାୟ ସଂହିତା ଅନୁସାରେ ହେବ ।
ପ୍ରେମିକା କଥାରେ ପଡ଼ି ହତ୍ୟା କଲେ କନ୍ନଡ଼ ସୁପରଷ୍ଟାର
ନନ୍ଦିଘୋଷ ବ୍ୟୁରୋ: ଗାର୍ଲଫ୍ରେଣ୍ଡ କଥାରେ ପଡ଼ି ଜଘନ୍ୟ ମର୍ଡର। ଅଭିଯୁକ୍ତ ପୁଣି ଏମିତି ସେମିତି ସାଧାରଣ ଲୋକ ନୁହନ୍ତି, କନ୍ନଡ଼ ଫିଲ୍ମ ଇଣ୍ଡଷ୍ଟ୍ରିର ସୁପରଷ୍ଟାର୍ ଦର୍ଶନ ଥୁଗୁଦୀପା । ପୁରା ଘଟଣାର ପର୍ଦ୍ଦାଫାସ ହେବା ପରେ ଦର୍ଶନ, ତାଙ୍କ ଗାର୍ଲଫ୍ରେଣ୍ଡ ପବିତ୍ରା ଗୌଡ଼ା ଓ ଅନ୍ୟ ୧୧ ଜଣଙ୍କୁ ଗିରଫ କରିଛି ପୋଲିସ । ମୃତକ ହେଲେ ରେଣୁକା ସ୍ବାମୀ। ଦର୍ଶନ ତାଙ୍କୁ ମର୍ଡର କରିବା ପରେ ଏକ ନାଳରେ ଫିଙ୍ଗି ଦେଇଥିଲେ। ରେଣୁକାଙ୍କ ଡେଡ୍ ବଡିର ଅଧା ଖାଇ ଦେଇଥିଲେ ବୁଲା କୁକୁର। ଜଣେ ଫୁଡ୍ ଡେଲିଭରି ବୟ ଏହା ଦେଖି ପୋଲିସକୁ ଜଣାଇବା ପରେ ତନାଘନା ହୋଇଥିଲା।
ସାମାନ୍ୟ ଏକ ସୋସିଆଲ ମିଡିଆ ପୋଷ୍ଟ ପାଇଁ ଗାର୍ଲଫ୍ରେଣ୍ଡ କଥାରେ ପଡ଼ି ମର୍ଡର କରିବାକୁ ପଛାଇ ନାହାନ୍ତି କନ୍ନଡ ଇଣ୍ଡଷ୍ଟ୍ରିର ଷ୍ଟାର୍ ଦର୍ଶନ। ମୃତକଙ୍କ ନାଁ ହେଲା ରେଣୁକା ସ୍ବାମୀ। ସେ କୁଆଡ଼େ ଦର୍ଶନଙ୍କ ଗାର୍ଲଫ୍ରେଣ୍ଡ ପବିତ୍ରାଙ୍କ ସୋସିଆଲ ମିଡିଆ ପୋଷ୍ଟରେ କିଛି ବିବାଦୀୟ କମେଣ୍ଟ କରିଥିଲେ। ଏଥିରେ ପବିତ୍ରା ଏତେ ଉତକ୍ଷିପ୍ତ ହୋଇ ପଡ଼ିଥିଲେ ଯେ, ରେଣୁକାଙ୍କୁ ଭଲ କରି ପାନେ ଦେବାକୁ ବୟଫ୍ରେଣ୍ଡ ଦର୍ଶନଙ୍କୁ କହିଥିଲେ। ଏହା ପରେ ରଚା ହୋଇଥିଲା ଷଡ଼ଯନ୍ତ୍ର। ରେଣୁକା ସ୍ବାମୀଙ୍କ ଘର ଚିତ୍ରଦୁର୍ଗା ଜିଲ୍ଲାରେ। ନିଜର ଫ୍ଯାନ କ୍ଲବଙ୍କ ଜରିଆରେ ରେଣୁକାଙ୍କ ସଂପର୍କରେ ସବୁ ତଥ୍ୟ ସଂଗ୍ରହ କରିଥିଲେ ଦର୍ଶନ ।
ଜଣେ ଟ୍ୟାକ୍ସି ଡ୍ରାଇଭର- ଯିଏ କି ଦର୍ଶନଙ୍କ ବଡ଼ ଫ୍ଯାନ- ତାଙ୍କ ଜରିଆରେ ଚିତାଦୁର୍ଗାରୁ ରେଣୁକା ସ୍ବାମୀଙ୍କୁ ବେଙ୍ଗଳୁରୁ ଅଣାଯାଇଥିଲା ଗତ ୮ ତାରିଖରେ। ବେଙ୍ଗଲୁରୁର ଦର୍ଶନ, ତାଙ୍କ ଗର୍ଲଫ୍ରେଣ୍ଡ ପବିତ୍ରା ଓ ଅନ୍ଯ ସହଯୋଗୀ ରେଣୁକାଙ୍କୁ ନିସ୍ତୁକ ମାଡ଼ ମାରିଥିଲେ। ବାରମ୍ବାର କଚାଡ଼ିବାରୁ ଦେହର ଅନେକ ହାଡ଼ ଭାଙ୍ଗି ଯାଇଥିଲା । ପିଟି ପିଟି ରେଣୁକାଙ୍କୁ ମାରି ଦେଇଥିଲେ ଦର୍ଶନ ଓ ତାଙ୍କ ସହଯୋଗୀ ଏବଂ ଡ୍ରେନରେ ଡେଡ ବଡିକୁ ଫିଙ୍ଗି ଦେଇଥିଲେ। ଘରକୁ ଫେରିବା ପରେ ସେହି ଟ୍ଯାକ୍ସି ଡ୍ରାଇଭର ଏହି ଘଟଣା ସଂପର୍କରେ ନିଜ ସାଙ୍ଗମାନଙ୍କୁ କହିଥିଲା।
ଆତ୍ମସମର୍ପଣ କରିବାକୁ ସେମାନେ ଦେଇଥିଲେ ପରାମର୍ଶ । ପୋଲିସ ପାଖରେ ସେହି ଡ୍ରାଇଭର ଆତ୍ମସମର୍ପଣ କରି ସବୁ କଥା କହିବା ପରେ ପୁରା ଘଟଣାର ପର୍ଦ୍ଦାଫାସ ହୋଇଛି। ଦର୍ଶନଙ୍କ ପରି ଲୋକପ୍ରିୟ ଫିଲ୍ମ ଷ୍ଟାର ଏପରି କରିଥିବେ, କେହି ବିଶ୍ଵାସ କରିପାରୁ ନାହାନ୍ତି। ପୁରା କର୍ଣ୍ଣାଟକରେ ଏହି ମର୍ଡର ଚାଞ୍ଚଲ୍ଯ ଖେଳାଇ ଦେଇଛି ।
ନିଟ୍ ବିବାଦ: ହାଇକୋର୍ଟ ପଡି ରହିଥିବା ମାମଲା ସ୍ଥାନାନ୍ତର କରିବାକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ
ନୂଆଦିଲ୍ଲୀ: ନିଟ୍ ବିବାଦକୁ ନେଇ ହୋଇଥିବା ମାମଲା ଉପରେ ସୁପ୍ରିମକୋର୍ଟଙ୍କ ବଡ଼ ତିଷ୍ପତ୍ତି । ବିଭିନ୍ନ ହାଇକୋର୍ଟରେ ପଡିରହିଥିବା ମାମଲାଗୁଡିକୁ ସୁପ୍ରିମକୋର୍ଟକୁ ସ୍ଥାନାନ୍ତର କରିବା ଲାଗି ସୁପ୍ରିମଙ୍କ ନିର୍ଦ୍ଦେଶ । ନ୍ଯାସନାଲ ଟେଷ୍ଟିଂ ଏଜେନ୍ସି ବା ଏନଟିଏର ଆବେଦନ ପ୍ରସଙ୍ଗରେ ବିଭିନ୍ନ ଘରୋଇ ପକ୍ଷଙ୍କୁ ନୋଟିସ ଜାରି କରିଛନ୍ତି ସର୍ବୋଚ୍ଚ ଅଦାଲତ ।
ଆଇନଗତ ବିବାଦଗୁଡ଼ିକୁ ଷ୍ଟ୍ରିମଲାଇନ କରିବା ଲାଗି ଏହି ଆବେଦନ ହୋଇଥିଲା । ନିଟ-ୟୁଜି ବିବାଦର ସମାଧାନ ଦିଗରେ ପଦକ୍ଷେପ ନେବା ଲାଗି ସମସ୍ତ ଆବେଦନଗୁଡିକୁ ବିଚାରକୁ ନେବା ଲାଗି ପଦକ୍ଷେପ ନିଆଯାଇଛି । ମାମଲାର ଶୁଣାଣି କରୁଛନ୍ତି ଜଷ୍ଟିସ ବିକ୍ରମ ନାଥ ଓ ଜଷ୍ଟିସ ସନ୍ଦୀପ ମେହଟ୍ଟାଙ୍କୁ ନେଇ ଗଠିତ ଖଣ୍ଡପୀଠ । ଆସନ୍ତା ଜୁଲାଇ ୮ରେ ହେବ ମାମଲାର ପରବର୍ତ୍ତୀ ଶୁଣାଣି ।
ସେପଟେ ଗତ ମେ’ ୫ରେ ଲସ୍ ଅଫ ଟାଇମ କାରଣରୁ ୧୫୬୩ ପରୀକ୍ଷାର୍ଥୀଙ୍କୁ ଦିଆଯାଇଥିବା ଗ୍ରେସ ମାର୍କ ସମ୍ପର୍କିତ ୩ଟି ପିଟିସନକୁ ହାଇକୋର୍ଟରୁ ସୁପ୍ରିମକୋର୍ଟକୁ ସ୍ଥାନାନ୍ତର ଲାଗି ଚାହିଁଛି ଏନଟିଏ । ଗତକାଲି ମାମଲାର ଶୁଣାଣି ବେଳେ ୧୫୬୩ ଛାତ୍ରଛାତ୍ରୀଙ୍କୁ ଦିଆଯାଇଥିବା ଗ୍ରେସମାର୍କ ପ୍ରତ୍ଯାହାର କରିନିଆଯାଇଛି ବୋଲି ସୁପ୍ରିମକୋର୍ଟ ନିକଟରେ କହିଥିଲେ ଏନଟିଓ ଓ କେନ୍ଦ୍ର ସରକାର । ଗତ ମେ’ ୫ ତାରିଖରେ ଦେଶର ୪,୭୫୦ କେନ୍ଦ୍ରରେ ନିଟ୍ ପରୀକ୍ଷା ହୋଇଥିଲା । ୨୪ ଲକ୍ଷ ପରୀକ୍ଷାର୍ଥୀ ପରୀକ୍ଷା ଦେଇଥିଲେ । ପରୀକ୍ଷାରେ ଅନିୟମିତତା ହୋଇଥିବା ଅଭିଯୋଗ କରି ଦେଶର ବିଭିନ୍ନ ଭାଗରେ ପ୍ରତିବାଦ ଆନ୍ଦୋଳନ ଦେଖିବାକୁ ମିଳିଥିଲା । ୭୨୦ ମାର୍କରୁ ୬୭ ପରୀକ୍ଷାର୍ଥୀ ୭୨୦ ରଖିଥିବାକୁ ନେଇ ବିବାଦ ବଢିଥିଲା ।
ସେନାରେ ସାମିଲ ହେଲା ସ୍ବଦେଶୀ ଜ୍ଞାନକୌଶଳରେ ନିର୍ମିତ ଡ୍ରୋନ ନାଗାସ୍ତ୍ର-୧
ନୂଆଦିଲ୍ଲୀ: ବଢ଼ିଲା ଭାରତୀୟ ସେନାର ବଳ । ସେନାକୁ ମିଳିଲା ସ୍ବଦେଶୀ ଜ୍ଞାନକୌଶଳରେ ନିର୍ମିତ ଆତ୍ମଘାତୀ ଡ୍ରୋନ ନାଗାସ୍ତ୍ର-୧ । ନାଗାସ୍ତ୍ର ଶତ୍ରୁ ପକ୍ଷଙ୍କ ଇଲାକାରେ ପ୍ରବେଶ କରି ଦମନଲୀଳା ଚଳାଇବାକୁ ସକ୍ଷମ । ଯେ କୌଣସି ପରିସ୍ଥିତିରେ ଆତଙ୍କବାଦୀଙ୍କ ଆଡ୍ଡା ନିକଟରେ ପହଞ୍ଚି ଏହାକୁ ଧ୍ବଂସ କରିବାକୁ ସକ୍ଷମ ଭାରତର ଏହି ମାରଣାସ୍ତ୍ର ।
ନାଗାସ୍ତ୍ର ରାଡାରକୁ ଚକମା ଦେବାକୁ ସକ୍ଷମ । ରାଡାର ନଜରକୁ ନଆସି ଏହା ସହଜରେ ଶତ୍ରୁକକ୍ଷଙ୍କ ଶିବିର ଉପରେ ଆତ୍ମଘାତି ଆକ୍ରମଣ କରି ତାକୁ ଧ୍ବାଂସ କରିପାରିବ । ଏଥିରୁ କମ ଶବ୍ଦ ବାହାରୁଥିବାରୁ ଶତ୍ରୁର ଘରେ ପଶି ହମଲା କରିବାକୁ ମଧ୍ୟ ସହଜ ହେବ ।
ଏହାର ଦୁଇଟି ଭ୍ଯାରିଆଣ୍ଟ ରହିଛି । ଦୁଇଟି ଯାକ ଭ୍ଯାରିଆଣ୍ଟ ୬୦ରୁ ୯୦ ମିନିଟ ପର୍ଯ୍ୟନ୍ତ ଉଡିବାର କ୍ଷମତା ରଖିଛି । ଏହା ୧୫ କିଲୋମିଟର ରେଞ୍ଜ ଭିତରେ କାର୍ଯ୍ୟ କରିବା ସହ ୪ ହଜାର ୫ଶହ ମିଟର ଉପରେ ଉଡିପାରିବ । ଏକ କିଲୋରୁ ୪ କିଲୋ ପର୍ଯ୍ୟନ୍ତ ଅସ୍ତଶସ୍ତ୍ର ବହନ କରିପାରିବାର କ୍ଷମତା ରଖିଛି ନାଗାସ୍ତ୍ର-୧ । ହମଲା ସମୟରେ ଏହା ରିଅଲ ଟାଇମ ଭିଡିଓ ମଧ୍ଯ ପ୍ରସ୍ତୁତ କରିପାରିବ ।
ପ୍ରଥମ ବ୍ଯାଚରେ ସେନାକୁ ୧୨୦ଟି ନାଗାସ୍ତ୍ର ଡ୍ରୋନ ହସ୍ତାନ୍ତର କରାଯାଇଛି । ନାଗାସ୍ତ୍ର ବଙ୍କର, ଯୁଦ୍ଧପୋଷ୍ଟ, ଯୁଦ୍ଧାସ୍ତ୍ର ଡିପୋକୁ ଏୟାର ଷ୍ଟ୍ରାଇକ କରି ଧ୍ବଂସ କରିବାର କ୍ଷମତା ରଖିଛି । ଏହି ଡ୍ରୋନକୁ ଇକୋନୋମିକ୍ସ ଏକ୍ସପ୍ଲୋସିଭ ଓ ଜେଡ ମୋସନ ଅଟୋନୋମସ ସିଷ୍ଟମସ କମ୍ପାନୀ ନିର୍ମାଣ କରିଛନ୍ତି । ସେନାକୁ ୪୫୦ଟି ନାଗାସ୍ତ୍ର-୧ ପ୍ରଦାନ କରାଯିବ । ଏହାକୁ ଚୀନ ସୀମା ନିକଟ ଲଦାଖରେ ପରୀକ୍ଷଣ କରାଯାଇ ସଫଳତା ହାସଲ କରାଯାଇଛି । ଏହା ଭବିଷ୍ଯତରେ ସର୍ଜିକାଲର ଷ୍ଟ୍ରାଇକର ଏକ ଭଲ ବିକଳ୍ପ ହେବାକୁ ଯାଉଛି । ଏହି ଡ୍ରୋନ ଯୋଗୁଁ ସର୍ଜିକାଲ ଷ୍ଟ୍ରାଇକରେ ଆଉ ଫାଇଟର ଜେଟର ଆବଶ୍ଯକତା ପଡିବନି ।
ଆସନ୍ତା ଜୁଲାଇ ପହିଲାରୁ ଦେଶରେ ଲାଗୁ ହେବ ନୂଆ ଆଇନ
ନନ୍ଦିଘୋଷ ବ୍ୟୁରୋ: ଜୁଲାଇ ୧, ୨୦୨୪ରୁ ସାରା ଦେଶରେ ଲାଗୁ ହେବ ନୂଆ ଆଇନ । ୧୮୬୦ ମସିହାରୁ ଚାଲିଥିବା ବ୍ରିଟିଶ ନିୟମ ଖୁବଶୀଘ୍ର ଉଠିଯିବ। ଏ ନେଇ କେନ୍ଦ୍ର ଗୃହମନ୍ତ୍ରାଳୟ ସହିତ ଆଲୋଚନା କଲେ ପୋଲିସ ଡିଜିପି ଅରୁଣ ଷଡଙ୍ଗୀ । ନୂଆ ଆଇନର କାର୍ଯ୍ୟକାରିତା ଉପରେ ବୈଠକରେ ଆଲୋଚନା ହୋଇଛି। ସବୁ ରାଜ୍ୟର ଡିଜିପି ଭର୍ଚୁଆଲ ଦ୍ୱାରା ବୈଠକରେ ସାମିଲ ହୋଇଥିଲେ। ଫେବୃଆରୀ ମାସରେ ଏ ନେଇ ବିଜ୍ଞପ୍ତି ଜାରି ହୋଇଥିଲା। ଦେଶରୁ ହଟିବ ସିଆରପିସି, ଆଇପିସି ଓ ଏଭିଡ଼େନ୍ସ ଆକ୍ଟ। ଇଣ୍ଡିଆନ୍ ପେନାଲ୍ କୋଡ୍’ ପରିବର୍ତ୍ତେ ଆସିବ ଭାରତୀୟ ନ୍ୟାୟ ସଂହିତା।
କୋଡ୍ ଅଫ୍ କ୍ରିମିନାଲ୍ ପ୍ରୋସିଜିଓର ପରିବର୍ତ୍ତେ ଆସିବ ଭାରତୀୟ ନାଗରିକ ସୁରକ୍ଷା ସଂହିତା। ଇଣ୍ଡିଆନ୍ ଏଭିଡେନ୍ସ୍ ଆକ୍ଟ ପରିବର୍ତ୍ତେ ଆସିବ ଭାରତୀୟ ସାକ୍ଷ୍ୟ ଆଇନ। ଏଥିରେ ପୂର୍ବରୁ ୫୧୧ଟି ଧାରା ଥିଲା। ଏବେ ୩୫୮ଟି ଧାରା ରହିବ। ୧୭୫ଟି ଧାରା ସଂଶୋଧନ କରାଯିବ। ପ୍ରାୟ ଦେଢ଼ ଶହ ବର୍ଷ ଧରି ଇଂରେଜ ଅମଳର ପୋଲିସ ଆଇନ ଏବେ ବି ଜାରି ରହିଛି। ଏହି ନୂଆ ନିୟମକୁ କାର୍ଯ୍ୟକାରୀ କରିବା ପାଇଁ ଯାହା ପ୍ରାବଧାନ ରହିଛି ସେ ନେଇ ବରିଷ୍ଠ ଆଇପିଏସ ମାନଙ୍କ ସହ ଆଲୋଚନା କରିଛନ୍ତି ଡିଜିପି। ଏ ନେଇ ନ୍ୟାସନ୍ୟାଲ କ୍ରାଇମ ରେକର୍ଡ ବ୍ୟୁରୋ ଓ ଷ୍ଟେଟ କ୍ରାଇମ ରେକର୍ଡ ବ୍ୟୁରୋ ସହ ମିଳିତ ଆଲୋଚନା ଚାଲିଛି। କ୍ରାଇମବ୍ରାଞ୍ଚ ଆଡିସିନାଲ ଡିଜି ଅରୁଣ ବୋଥ୍ରାଙ୍କ ଅଧ୍ୟକ୍ଷତାରେ ଏକ କମିଟି ଗଠନ ହୋଇଛି ।
ଆଡିସିନାଲ ଚିଫ ସେକ୍ରେଟାରୀଙ୍କ ନେତୃତ୍ୱରେ ଏକ ଷ୍ଟିଅରିଂ କମିଟି ଗଠନ ହୋଇଛି। କେନ୍ଦ୍ରର ଗୃହ ସଚିବ ଏ ନେଇ ସମସ୍ତ ରାଜ୍ୟର ମୁଖ୍ୟ ଶାସନ ସଚିବ, ଗୃହ ସଚିବ, ଡିଜିପି ଭିସିରେ ରହି କାର୍ଯ୍ୟକାରିତା ଦିଗରେ ଅଧିକ ଆଲୋଚନା କରିଛନ୍ତି। ଏ ନେଇ ପୋଲିସ ଅଧିକାରୀ ମାନଙ୍କୁ ତାଲିମ ମଧ୍ୟ ଦିଆଯାଇଛି। ଜୁଲାଇ ୧ ମଧ୍ୟରେ ଯେତିକି କେସ ରୁଜୁ ହୋଇଥିବ ତାହା ପୁରୁଣା ସିଆରପିସି ଅଧିନରେ ଶୁଣାଣି କରାଯିବ।ଏହାପରେ ଭାରତୀୟ ନ୍ୟାୟ ସଂହିତା ମୁତାବକ ବିଚାର କରାଯିବ ବୋଲି ସୂଚନା ଦେଇଛନ୍ତି ଡିଜିପି ଅରୁଣ ଷଡଙ୍ଗୀ।
ବାଣ ନଷ୍ଟ କଲାବେଳେ ବିସ୍ଫୋରଣ ଘଟି ଜଣେ ପୋଲିସ କର୍ମଚାରୀଙ୍କ ମୃତ୍ଯୁ
କଟକ : ରଜରେ କଟକରେ ବଡ଼ ଅଘଟଣ। ବାଣ ନଷ୍ଟ କରିବାବେଳେ ବିସ୍ଫୋରଣ ଘଟିଛି। ଏଥରେ ଜଣେ ପୋଲିସ କର୍ମଚାରୀଙ୍କ ମୃତ୍ଯୁ ଘଟିଛି। ମୃତ କର୍ମଚାରୀ ପ୍ରଦୀପ କୁମାର ମଲ୍ଲିକ କଟକରେ ହାବିଲଦାର ଭାବେ କାର୍ଯ୍ୟରତ ଥିଲେ। ତାଙ୍କ ଘର କଟକ ପୀର ବଜାର ଅଞ୍ଚଳ ରେ। କଟକ ସଦର ଏଡିସିପିଙ୍କ ପକ୍ଷରୁ ଏହି ସୂଚନା ଦିଆଯାଇଛି। ଗୋପାଳପୁର ସୁଭଦ୍ରାପୁର ଘାଟରେ ଚାଲିଥିଲା ବାଣ ନିଷ୍କ୍ରିୟ କାର୍ଯ୍ୟ। କମିଶନରେଟ ପୋଲିସ ପକ୍ଷରୁ ବାଣ ନଷ୍ଟ କରାଯାଉଥିବାବେଳେ ବିସ୍ଫୋରଣ ଘଟିଥିଲା ।