ନନ୍ଦିଘୋଷ ବ୍ୟୁରୋ: ପୂର୍ବରୁ କହୁଥିଲ ସେ ହେଉଛନ୍ତି କେଳେଙ୍କାରୀ, ପୁଣି ଏବେ ସେ କେମିତି ହେଲେ ପ୍ରିୟ ତୁମରି । ବିଜେପିରେ ନିମାପଡ଼ା ବିଧାୟକ ସମୀର ଦାଶ ଯୋଗଦେବା ପରେ ଏବେ ସବୁଠି ଏଭଳି ଚର୍ଚ୍ଚା ଆରମ୍ଭ ହୋଇଛି । କହି ରଖୁଛୁ କି, ପୁରୀ ଜିଲ୍ଲା ଗୋପ୍ ବ୍ଲକ ୧୧ ନମ୍ବର ଜୋନ ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ମୃତ୍ଯୁ ପୂର୍ବରୁ ସାମ୍ନାକୁ ଆସିଥିଲା ଏକ ମୋବାଇଲ ଅଡିଓ। ଏହି ଅଡିଓ ସମ୍ପର୍କରେ ପ୍ରେସ୍ମିଟ୍ରେ ସୂଚନା ଦେଇଥିଲେ ବିଜେପି ନେତ୍ରୀ ପ୍ରଭାତୀ ପରିଡ଼ା। ସେ କହିଥିଲେ, ଆତ୍ମହତ୍ୟା ପୂର୍ବରୁ ଧର୍ମେନ୍ଦ୍ର ସାହୁ ଫୋନ୍ରେ ଅକ୍ଷୟ ନାମକ ବ୍ୟକ୍ତିଙ୍କ ସହ କଥା ହୋଇଥିଲେ। ଆତ୍ମହତ୍ୟା କରିବେ ବୋଲି କହିଥିଲେ ଧର୍ମେନ୍ଦ୍ର ସାହୁ। ସମୀର ଦାଶଙ୍କ ଯୋଗୁଁ ସେ ଆତ୍ମହତ୍ୟା କରିବାକୁ ଯାଉଛନ୍ତି ବୋଲି ମଧ୍ୟ ବନ୍ଧୁ ଅକ୍ଷୟଙ୍କୁ ଧର୍ମେନ୍ଦ୍ର ଜଣାଇଥିଲେ। ଯାହା କି ଅଡିଓ କ୍ଲିପ୍ରୁ ସ୍ପଷ୍ଟ ବାରି ହୋଇପଡୁଥିଲା। ସମୀର ଦାଶ ଇସ୍ତଫା ଦେବାକୁ ଦାବି କରିଥିଲେ ବିଜେପି ନେତ୍ରୀ ପ୍ରଭାତୀ ପରିଡ଼ା। ଘଟଣାକୁ ନେଇ ବିଜେପି ଅହୋରାତ୍ର ଧାରଣା କରିବ ବୋଲି ମଧ୍ୟ କହିଥିଲା । କିନ୍ତୁ ଆଜି ବିଜେପି କିଭଳିଭାବେ ଜଣେ କେଳେଙ୍କାରୀ ନେତାଙ୍କୁ କୋଳାଇ ନେଲେ ତାକୁ ନେଇ ଆରମ୍ଭ ହୋଇଛି ରାଜେନୖତିକ ଚର୍ଚ୍ଚା ।
କେନ୍ଦୁଝରରେ ମୁଖ୍ୟମନ୍ତ୍ରୀଙ୍କ ପ୍ରଚାର
ନନ୍ଦିଘୋଷ ବ୍ୟୁରୋ: କେନ୍ଦୁଝର ଜିଲ୍ଲାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମାରାଥନ ପ୍ରଚାର । କେନ୍ଦୁଝର ଗୋପୀନାଥପୁରରେ ନବୀନଙ୍କ ପ୍ରଚାର । ମୁଖ୍ୟମନ୍ତ୍ରୀଙ୍କ ସାଧାରଣ ସଭାରେ ହଜାର ହଜାର ସମର୍ଥକ ଯୋଗଦାନ । ମୁଖ୍ୟମନ୍ତ୍ରୀଙ୍କୁ ଭବ୍ୟ ସ୍ବାଗତ କରାଯାଇଛି । ମୁଖ୍ୟମନ୍ତ୍ରୀଙ୍କ ସହ ରହିଛନ୍ତି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ଯୋଡ଼ି ଶଙ୍ଖରେ ଭୋଟ୍ ଦେବାକୁ ମୁଖ୍ୟମନ୍ତ୍ରୀଙ୍କ ଅପିଲ୍ ।
କେଳେଙ୍କାରୀ ନେତାଙ୍କୁ କୋଳାଇଲା ବିଜେପି
ଭୁବନେଶ୍ବର: ଯେତେସବୁ କେଳେଙ୍କାରୀ, ସବୁ ଗୋଟିଏ ଦଳରେ କୋଳାକୋଳି । ଯେଉଁ ସମୀର ଦାଶଙ୍କୁ ହତ୍ୟା ଅଭିଯୁକ୍ତ କହି ଦିନେ ବିଜେପି ହଲ୍ଲାବୋଲ କରୁଥିଲା, ଯାହାଙ୍କ କେଳେଙ୍କାରୀର ଚିଠା ଧରି ତୁମ୍ବିତୋଫାନ କରୁଥିଲା ଆଜି ସେହି ସମୀର ଦାଶକୁ ଜୋଇଁପୁଅ ଭଳି ଦଳକୁ ବାଟବରଣୀ କରି ନେଇଛି ଭାରତୀୟ ଜନତା ପାର୍ଟି । ସମୀର ବିଜେପିରେ ମିଶିବା ପରେ ରାଜ୍ୟବାସୀଙ୍କ ମନରେ ଗୋଟିଏ ପ୍ରଶ୍ନ, ବିଜେପିର ନୀତିନୈତିକତା ଅଛି ତ ? କାରଣ ୬ ମାସ ତଳେ ଜଣେ ହତ୍ୟା ଅଭିଯୁକ୍ତ ବୋଲି ଯେଉଁ ସମୀର ଦାଶଙ୍କ ବିରୋଧରେ ବିଜେପି ଅଭିଯୋଗ ଆଣୁଥିଲା ଆଜି ସିଏ କେମିତି ନିର୍ମଳ ଓ ଗେହ୍ଲାପୁଅ ହୋଇଗଲେ ? ସେଦିନ ହତ୍ୟାକାରୀ ବୋଲି କହି ଗାଳି ଦେଉଥିଲେ କିନ୍ତୁ ଆଜି କେମିତି ଆଦରି ନେଲେ ? ଗୋପ ବ୍ଲକ ୧୧ନମ୍ବର ଜୋନର ଜିଲ୍ଲାପରିଷଦ ସଭ୍ୟ ଧର୍ମେନ୍ଦ୍ର ସାହୁ ଆତ୍ମହତ୍ୟା ମାମଲାରେ ସମୀରଙ୍କ ହାତ ଥିବା ଅଭିଯୋଗ ହେଉଥିଲା । ତାଙ୍କ ମୃତ୍ୟୁ ପାଇଁ ସମୀର ଦାଶ ଦାୟୀ ବୋଲି ଅଙ୍ଗୁଳି ଉଠିଥିଲା ।
ସମୀର ମୃତ ଧର୍ମେନ୍ଦ୍ରଙ୍କ ସ୍ତ୍ରୀଙ୍କୁ ବ୍ଲାକମେଲ କରୁଥିବା ନେଇ ସାଂଘାତିକ ଅଭିଯୋଗ ବି ଆସିଥିଲା । ସେତେବେଳେ ରାଜ୍ୟ ବିଜେପିର ତୁଙ୍ଗ ନେତାମାନେ ସମୀରଙ୍କ ବିରୋଧରେ ହଲ୍ଲାବୋଲ କରିଥିଲେ । ମାଳମାଳ ଭାଇରାଲ ଅଡିଓ ଓ ଫଟୋ ଧରି ପୋଲ୍ ଖୋଲିଥିଲେ । ସମୀରଙ୍କ ବିବାଦୀୟ ଚରିତ୍ର ଓ କାର୍ଯ୍ୟକଳାପକୁ ପ୍ରଶ୍ରୟ ଦେଇନଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମନ୍ତ୍ରିମଣ୍ଡଳ ସଂପ୍ରସାରଣ ସମୟରେ ସମୀରଙ୍କୁ ନବୀନ ବାଦ୍ ଦେବା ସହ ପରବର୍ତ୍ତୀ ସମୟରେ ବିଜେଡି ଟିକେଟ ବି ଦେଇନଥିଲା । ହେଲେ ବିଜେଡି ରିଜେକ୍ଟ କରିଥିବା ବିବାଦୀୟ ସମୀରଙ୍କୁ ଆଜି କୋଳେଇ ନେଇଛି ବିଜେପି । ପୁଣିଥରେ ଭାରତୀୟ ଜନତା ପାର୍ଟି ପ୍ରମାଣିତ କରିଛି, ସବୁ ଗୁଣ୍ଡା, ବଦମାସ ଓ କେଳେଙ୍କାରୀ ବ୍ୟକ୍ତିଙ୍କ ପାଇଁ ସେ ହିଁ ଆଶ୍ରୟସ୍ଥଳୀ । ପୂର୍ବରୁ ବିଜେଡିରୁ ବହିଷ୍କୃତ ଜନବିରୋଧୀ ପ୍ରଦୀପ ପାଣିଗ୍ରାହୀ ଓ ଗୁଣ୍ଡା ପ୍ରଶାନ୍ତ ଜଗଦ୍ଦେବଙ୍କୁ ବି ଦଳକୁ ନେଇ ବିଜେପି ନିଜ ହୀନ ରାଜନୀତିର ପରିଚୟ ଦେଇସାରିଛି । ଆଉ ଏବେ ସେହି ତାଲିକାରେ ଯୋଡି ହୋଇଛନ୍ତି ସମୀର ଦାଶ ।
ହାରିବା ଜାଣି ରାଗରେ ରକ୍ତ ଚାଉଳ ଚୋବାଉଛି ବିଜେପି : ବିଜେଡି
ଭୁବନେଶ୍ବର: ନିର୍ବାଚନରେ ନିଜର ଶୋଚନୀୟ ପରାଜୟ ଜାଣି ସାରିଲାଣି ବିଜେପି। ଏଥିପାଇଁ ବିଜେପି ରାଗରେ ରକ୍ତ ଚାଉଳ ଚୋବାଉଛି । ଶୁକ୍ରବାର ବରଗଡ଼ ଜିଲ୍ଲା ସୋହେଲା ଥାନା ଅଞ୍ଚଳରେ ବିଜେପି କର୍ମୀଙ୍କ ଗୁଣ୍ଡାଗର୍ଦ୍ଦି ଏହା ପ୍ରମାଣିତ କରିଛି । ଏନେଇ ଭଟଲି ନିର୍ବାଚନମଣ୍ଡଳିର ବିଜେପି ବିଧାୟକ ପ୍ରାର୍ଥୀ ଈରାଶିଷ ଆଚାର୍ଯ୍ଯ ଓ ତାଙ୍କ ସମର୍ଥକଙ୍କ ବିରୋଧରେ ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ଫେରାଦ ହୋଇଛି ବିଜେଡି । ର୍ପୂବରୁ ମଧ୍ୟ ଈରାଶିଷଙ୍କ ଅପରାଧିକ କାର୍ଯ୍ୟକଳାପ ବିଷୟରେ ଓଡ଼ିଶାବାସୀ ଜାଣିଛନ୍ତି ।
ଶୁକ୍ରବାର ଏହାର ପୁନରାବୃତ୍ତି କରିଛନ୍ତି ଈରାଶିଷ । ନେଗିମୁଣ୍ଡାର ବିଜେଡି କର୍ମୀ ସାନନ୍ଦ ସାହୁଙ୍କୁ ବନ୍ଧୁକ ଦେଖାଇ ଅପହରଣ କରିନେଇଥିଲେ ଈରାଶିଷଙ୍କ ୫ ଜଣ ସମର୍ଥକ । ସାନନ୍ଦଙ୍କ ପୁଅ ସୋହେଲା ଥାନାରେ ଏତଲା ଦେବା ପରେ ପୋଲିସ ସାନନ୍ଦଙ୍କୁ ଅମ୍ବାଭୋନା ଅଞ୍ଚଳର ଏକ ଜଙ୍ଗଲରୁ ଉଦ୍ଧାର କରିଥିଲା । ଅପହରଣକାରୀମାନେ ଭଟଲିର ବିଜେପି ବିଧାୟକ ପ୍ରାର୍ଥୀ ଈରାଶିଷ ଆଚାର୍ଯ୍ଯଙ୍କ ସମର୍ଥକ ବୋଲି ସାନନ୍ଦ ସାହୁ କହିଛନ୍ତି ।
ଗାଁରେ ବିଜେଡି ଅଫିସ ଖୋଲିବାରୁ ତାଙ୍କୁ ଅପହରଣ କରିବା ସହିତ ମାଡ଼ ମାରି ହତ୍ଯା ଧମକ ଦେଇଥିବା ଅଭିଯୋଗ କରିଛନ୍ତି ସାନନ୍ଦ। ସେ ନିଜ ଜୀବନ ପ୍ରତି ବିପଦ ଥିବା ଆଶଙ୍କା କରିଛନ୍ତି । ଏହି ଘଟଣାରେ ଈରାଶିଷ ଏବଂ ତାଙ୍କ ସମର୍ଥକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ରାଜ୍ଯ ମୁଖ୍ଯ ନିର୍ବାଚନ ଅଧିକାରୀଙ୍କୁ ସାକ୍ଷାତ କରି ବିଜେଡି ଦାବି କରିଛି ।
କିର୍ଗିସ୍ତାନରେ କାହିଁକି ଭାରତୀୟ ମେଡିକାଲ ଛାତ୍ରଙ୍କ ସହ ହେଉଛି ମାରପିଟ୍ ?
ନନ୍ଦିଘୋଷ ବ୍ୟୁରୋ: କିର୍ଗିସ୍ତାନରେ ବିଦେଶୀ ଛାତ୍ରଛାତୀଙ୍କ ଉପରେ କରାଯାଉଛି ଆକ୍ରମଣ । ଭାରତ, ପାକିସ୍ତାନ ଏବଂ ବାଲାଂଦେଶର ଛାତ୍ରଛାତ୍ରୀଙ୍କ ଉପରେ ଆକ୍ରମଣ କରାଯାଉଛି । ମେଡିକାଲ ଛାତ୍ରଛାତ୍ରୀଙ୍କୁ ଆକ୍ରମଣ ହେଉଥିବାବେଳେ ସ୍ଥାନୀୟ ଛାତ୍ରଛାତ୍ରୀ ଏବଂ ଲୋକେ ବାରମ୍ବାର ହଷ୍ଟଲରେ ଆକ୍ରମଣ କରୁଛନ୍ତି । ସେପଟେ ୪ ଜଣ ପାକିସ୍ତାନୀ ଛାତ୍ରଙ୍କ ମୃତ୍ୟୁ ହୋଇଥିବା କୁହାଯାଉଛି । କିର୍ଗିସ୍ତାନର ରାଜଧାନୀ ବିସକେକରେ ଏବେ ସାଙ୍ଘାତିକ ସ୍ଥିତି ଉପୁଜିଛି । ପୋଲିସ ଉପସ୍ଥିତିରେ ମଧ୍ୟ ଆକ୍ରମଣ କରାଯାଉଛି ।
ତେବେ କହି ରଖୁଛୁ କି, ଇଜିପ୍ଟର ଛାତ୍ରୀମାନଙ୍କୁ ନିର୍ଯାତନା ଦିଆଯାଇଥିଲା । ମେ ୧୩ ତାରିଖରେ ଏହି ଘଟଣା ଘଟିଥିବାବେଳେ ଇଜିପ୍ଟର ଛାତ୍ରମାନେ ସ୍ଥାନୀୟ ଛାତ୍ରଙ୍କ ସହ ଝଗଡ଼ା କରିଥିଲେ । ଏହାପରେ ଉଗ୍ରରୂପ ନେଇଥିବାବେଳେ ବିଦେଶୀ ଛାତ୍ରଙ୍କ ଉପରେ ଆକ୍ରମଣ କରିଥିଲେ କିର୍ଗିସ୍ତାନର ଲୋକେ ଏବଂ ଛାତ୍ର । ତେବେ ୪ ଜଣ ପାକିସ୍ତାନୀ ଛାତ୍ରଙ୍କ ମୃତ୍ୟୁ ହୋଇଥିବା ଖବର ମିଳିଥିବାବେଳେ ଭାରତୀୟ ଛାତ୍ରମାନେ ହଷ୍ଟେଲରେ ରହିବାକୁ ବୈଦେଶିକ ମନ୍ତ୍ରୀ ସୂଚନା ଦେଇଛନ୍ତି ।
୮ ହଜାର ଟଙ୍କା ପାଇଁ ନର୍ସରୀ ଛାତ୍ରଙ୍କ ହତ୍ୟା,ପ୍ରିନସପାଲ ଗିରଫ
ନନ୍ଦିଘୋଷ ବ୍ୟୁରୋ: ବିହାର ପାଟନାର ୪ ବର୍ଷର ନାବାଳକ ଆୟୂଷ ହତ୍ୟା ଘଟଣାରେ ସ୍କୁଲ ପ୍ରିନ୍ସପାଲ ଏବଂ ତାଙ୍କ ପୁଅକୁ ଗିରଫ କରିଛି ପୋଲିସ । ଆୟୂଷଙ୍କ ଚାଚା ଦିଘା ଥାନାରେ ଏକ ମାମଲା ଦାୟକ କରିଥିଲେ କି, ତାଙ୍କର ସ୍କୁଲ ଫି ୮ହଜାର ୪୦୦ ଟଙ୍କା ବାକି ରହିଥିଲା । ଯେଉଁ କାରଣରୁ ସେମାନେ ଏଭଳି ହତ୍ୟା କରିଛନ୍ତି ବୋଲି ସାଙ୍ଘାତିକ ଅଭିଯୋଗ କରିଥିଲେ । ଏହି ଆଧାରରେ ପୋଲିସ ଗିରଫ କରିଥିବା ଜଣାପଡ଼ିଛି । ତେବେ ଆୟୂଷଙ୍କ ଚାଚା କହିଛନ୍ତି କି, ଆମେ ପ୍ରିନ୍ସପାଲଙ୍କୁ କହିଥିଲୁ କି, ଖୁବଶୀଘ୍ର ଟଙ୍କା ଦେଇଦେବୁ । ମାତ୍ର ସେମାନେ ଷଡ଼ଯନ୍ତ୍ର କରି ହତ୍ୟା କରିଛନ୍ତି । ମୃତକଙ୍କ ପରିବାର ଲୋକଙ୍କ ଅଭିଯୋଗ କ୍ରମେ ୩ ଜଣଙ୍କ ନାମରେ ମାମଲା ରୁଜୁ ହୋଇଥିଲା । ବୀଣା ଝା, ଧନରାଜ ଝା ଏବଂ ମନୀଷଙ୍କ ନାମରେ ମାମଲା ରୁଜୁ ହୋଇଥିଲା । ପୋଲିସ ବୀଣା ଏବଂ ଧନରାଜଙ୍କୁ ଗିରଫ କରିଥିବାବେଳେ ମନୀଷ ଫେରାର ଅଛି ।
ପୋଲିସର ପଚରାଉଚରା ବେଳେ ପ୍ରିନ୍ସପାଲ ଏବଂ ତାଙ୍କ ପୁଅ ସତ ମାନିଛନ୍ତି । ସେ କହିଛନ୍ତି କି, ଆୟୂଷ ଖେଳୁଥିବାବେଳେ ସ୍ଲାଇଡରରୁ ଖସି ପଡ଼ିଥିଲା । ତାଙ୍କ ମୁଣ୍ଡରେ ଶକ୍ତ ଆଘାତ ଲାଗିଥିବା ସହ ପ୍ରବଳ ରକ୍ତସ୍ରାବ ହୋଇଥିଲା । ଆମେ ଭୟଭୀତ ହୋଇ ତାଙ୍କୁ ଫୋପାଡ଼ି ଦେଇଥିଲୁ । ତେବେ କହି ରଖୁଛୁ କି, ଆୟୂଷ ପ୍ରତିଦିନ ସକାଳ ୭ଟାରୁ ଘରୁ ଯାଉଥିବାବେଳେ ୩ଟାରେ ଫେରୁଥିଲେ । ମାତ୍ର ସେହିଦିନ ନଫେରିବାକୁ ପରିବାର ଲୋକେ ସ୍କୁଲରେ ପହଞ୍ଚି ପଚରା ଉଚରା କରିଥିଲେ । ଏବଂ ସିସିଟିଭି ଚେକ କରିଥିଲେ । ମାତ୍ର ୧୦ ମିନିଟର ଭିଡିଓ ଡିଲେଟ ହୋଇଥିବାବେଳେ ଏହାକୁ ନେଇ ସେମାନଙ୍କର ସନ୍ଦେହ ହୋଇଥିଲା । ତେବେ ପ୍ରିନ୍ସପାଲଙ୍କୁ ପ୍ରଶ୍ନ କରାଯାଇଥିବାବେଳେ ସେ ଏହାକୁ ମାନିନଥିଲେ । ପରେ ପୋଲିସ ଘଟଣାର ତଦନ୍ତ କରି ସତ ବାହାର କରିଛି ।
ବାଙ୍ଗାଲୋରରୁ କୋଚି ଯାଉଥିବା ବିମାନ କଲା ଜରୁରୀ ଅବତରଣ
ନନ୍ଦିଘୋଷ ବ୍ୟୁରୋ: ବାଙ୍ଗାଲୋରରୁ କୋଚି ଅଭିମୁଖେ ଯାଉଥିବା ଏକ ବିମାନରେ ଗୋଟିଏ ଇଞ୍ଜିନରେ ନିଆଁ ଦେଖିବାକୁ ମିଳିଥିଲା । ଫଳରେ ବିମାନଟି ବାଙ୍ଗାଲୋରରେ ଜରୁରୀକାଳିନ ଅବତରଣ କରିଥିଲା । ତେବେ ଏହି ବିମାନରେ ୧୩୭ ଜଣ ଯାତ୍ରୀ ରହିଥିଲେ । ସମସ୍ତେ ସୁରକ୍ଷିତ ଉଦ୍ଧାର ହୋଇଥିଲେ । ପ୍ରଥମେ ନିଆଁକୁ ଲିଭାଯାଇଥିଲା । ତେବେ କେଉଁ କାରଣରୁ ନିଆଁ ଲାଗିଲା ତାହା ଜଣାପଡ଼ିନାହିଁ । ଏୟାର ଇଣ୍ଡିଆ ଏକ୍ସପ୍ରେସ ମୁଖପାତ୍ର କହିଛନ୍ତି ଯେ ବିମାନ ଉଡ଼ିବା ମାତ୍ରେ ସଠିକ୍ ଇଞ୍ଜିନରୁ ନିଆଁ ବାହାରୁଥିବା ଦେଖାଯାଇଥିଲା। ଏହା ଦେଖି ତୁରନ୍ତ ନିଷ୍ପତ୍ତି ନିଆଗଲା ଯେ ବିମାନଟି ପୁଣି ଅବତରଣ କରିବାକୁ ପଡିବ ଏବଂ ସତର୍କତାମୂଳକ ପଦକ୍ଷେପ ଭାବରେ ବେଙ୍ଗାଲୁରୁ ବିମାନବନ୍ଦରରେ ଅବତରଣ ହୋଇଥିଲା। ଏଥିସହିତ ଗ୍ରାଉଣ୍ଡ ସର୍ଭିସ ମଧ୍ୟ ଅଗ୍ନିକାଣ୍ଡ ସମ୍ପର୍କରେ ସୂଚନା ଦେଇଥିଲା, ଯେଉଁଥିପାଇଁ ସମସ୍ତଙ୍କୁ ନିରାପଦରେ ସ୍ଥାନାନ୍ତର କରାଯାଇଥିଲା।
ଅନୀଲ କପୁରଙ୍କ ଏହି ୪ ଫିଲ୍ମର ଆସିବ ପାର୍ଟ ୨
ନନ୍ଦିଘୋଷ ବ୍ୟୁରୋ: ଦୀର୍ଘ ୪ ଦଶନ୍ଧି ଧରି ବଲିଉଡରେ ରାଜ କରୁଥିବା ଅଭିନେତା ଅନୀଲ କପୁରଙ୍କ ଫ୍ୟାନ ଫଲୋର୍ସ ମଧ୍ୟ ଢ଼େର ଅଧିକ ରହିଛନ୍ତି । ୧୦୦ରୁ ଅଧିକ ବଲିଉଡ ଫିଲ୍ମରେ ଅଭିନୟ କରିସାରିଛନ୍ତି ଅନୀଲ କପୁର । ତେବେ ତାଙ୍କର ବହୁ ଫିଲ୍ମ ବକ୍ସ ଅଫିସରେ ହିଟ୍ ସାବ୍ୟସ୍ତ ହୋଇଥିବାବେଳେ ଦର୍ଶକଙ୍କ ଅନୁରୋଧ କ୍ରମେ ୪ଟି ଫିଲ୍ମର ପାର୍ଟ ୨ ଆସିବାକୁ ଯାଉଛି । ତେବେ ଏକ ଫିଲ୍ମ ମଧ୍ୟ ରିଲିଜ୍ ଅପେକ୍ଷାରେ ରହିଛି । ତେବେ ପ୍ରଶଂସକଙ୍କ ପାଇଁ ଦୁଃଖର ବିଷୟ କି ଅନୀଲ କପୁର ଅଭିନୟ କରିଥିବା ଦୁଇଟି ଫିଲ୍ମର ପାର୍ଟ ୨ରେ ସେ ନଜର ଆସିନାହାନ୍ତି ।
ଓ୍ବେଲକମରେ ଅନୀଲ କପୁରଙ୍କ ଅଭିନୀତ ଏହି ଫିଲ୍ମ ପ୍ରଶଂସକଙ୍କ ମହଲରେ ବେଶ ଆଦୃତ ହୋଇଥିଲା । ତେବେ ଓ୍ବେଲକମ ୩ ଡିସେମ୍ବର ୨୦ରେ ଣିଲିଜ ହେବାକୁ ଥିବାବେଳେ ଏଥିରେ ଅନୀଲ କପୁର ନଜର ଆସିନାହାନ୍ତି । ତେବେ ଏହି ଫିଲ୍ମରେ ଅକ୍ଷୟ କୁମାର, ରବିନା ଟଣ୍ଡନ, ସଞ୍ଜୟ ଦତ୍ତ, ଜ୍ୟାକଲିନ ଏବଂ ଦିଶା ପଟାନୀଙ୍କ ଭଳି କଳକାରମାନେ ନଜର ଆସିବେ ।
ନାୟକ: ୨୦୦୧ରେ ରିଲିଜ ହୋଇଥିବା ଏହି ଫିଲ୍ମ ବେଶ ହିଟ୍ ହୋଇଥିଲା । ରାଜେନୖତିକ କାହାଣୀ ଉପରେ ଆଧାରିତ ଏହି ଫିଲ୍ମଟି ଆଜି ମଧ୍ୟ ଦର୍ଶକଙ୍କ ମଧ୍ୟରେ ବେଶ ଉତ୍କଣ୍ଠା ଭରି ଦେଇଛି । ପ୍ରଯୋଜନା ପକ୍ଷରୁ କୁହାଯାଇଛି କି, ପୁରୁଣା କଳାକାରଙ୍କୁ ନେଇ ଏହି ଫିଲ୍ମ ନିର୍ମାଣ ହେବାକୁ ଯାଉଛି । ଏଣୁ ଏହି ଫିଲ୍ମରେ ଅନୀଲ କପୁର ନଜର ଆସିବେ ।
ନୋ ଏଣ୍ଟ୍ରି: ନୋ ଏଣ୍ଟ୍ରି ଫିଲ୍ମ ଦର୍ଶକଙ୍କ ମନ ଜିଣିଥିଲା । ଅନୀଲ କପୁର ଏବଂ ସଲମାନ ଖାନ ଏହି ଫିଲ୍ମରେ ଦମଦାର ଅଭିନୟ କରିଥିବାବେଳେ ଏହା ଦ୍ବିତୀୟ ଭାଗ ଆସିବାକୁ ଯାଉଛି । ବନ୍ନି କପୁର ଦ୍ବିତୀୟ ଭାଗ ଆଣୁଥିବାବେଳେ ଏଥିରେ ବରୁଣ ଧାଓ୍ବନ ଏବଂ ଅର୍ଜୁନ କପୁର ନଜର ଆସିବେ ।
ମିଷ୍ଟର ଇଣ୍ଡିଆ: ଅନୀଲ କପୁରଙ୍କ ହିଟ୍ ଫିଲ୍ମ ମଧ୍ୟରେ ମିଷ୍ଟର ଇଣ୍ଡିଆ ସବୁବେଳେ ଚର୍ଚ୍ଚାରେ ରହିଥାଏ । ତେବେ ଏହାର ପାର୍ଟ ୨ ଆସିବାକୁ ରହିଛି । ପ୍ରଯୋଜକ ବନ୍ନି କପୁର କିଛିଦିନ ପୂର୍ବରୁ କହିଥିଲେ କି, ଏକ ବିଦେଶୀ କମ୍ପାନୀ ସହ କଥା ହୋଇଛି କି, ମିଷ୍ଟର ଇଣ୍ଡିଆ ଫିଲ୍ମ ଆସିବ । ତେବେ ସେ ଆସନ୍ତା ବର୍ଷ ୨ ବର୍ଷ ମଧ୍ୟରେ ଏହାର ଅପଡେଟ୍ ଦେବେ ।
ଯଦି ନରେନ୍ଦ୍ର ମୋଦୀଙ୍କ ସହ ରାହୁଲ ଗାନ୍ଧୀଙ୍କ ବିତର୍କ ହୁଏ ତାହେଲେ ରାହୁଲ ପଚାରିବେ ଏହି ୬ ପ୍ରଶ୍ନ
ନନ୍ଦିଘୋଷ ବ୍ୟୁରୋ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଡିବେଟ କରିବା ପାଇଁ ପ୍ରସ୍ତୁ ଅଛନ୍ତି କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧୀ । ସେ କହିଛନ୍ତି କି, ଯେକୌଣସି ସମୟରେ ଡିବେଟ କଲେ ମୁଁ ସମୟ ବାହାର କରି ଆସିବି । ସୋସିଆଲ ମିଡିଆ ସାଇଟରେ ରାହୁଲ ଗାନ୍ଧୀ ଟ୍ବିଟ୍ କରି ଡିବେଟ କରିବା ପାଇଁ ଏକ ପୋଷ୍ଟ କରିଥିଲେ । ଯାହାକୁ ନେଇ ରାଜେନୖତିକ ଚର୍ଚ୍ଚା ମଧ୍ୟ ଜୋର ଧରିଛି । ତେବେ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଚାରିବା ପାଇଁ ୬ଟି ପ୍ରଶ୍ନ ରଖିଥିବା କୁହାଯାଉଛି । ତେବେ ଏହି ୬ ପ୍ରଶ୍ନ ହେଉଛି..
୧- ଆପଣଙ୍କର ଆଦାନୀଙ୍କ ସହ କଣ ସମ୍ପର୍କ?
୨- ଇଲେକ୍ସନ ବଣ୍ଡ ନାମରେ ଆପଣ କାହିଁକି ’ଦାନ ବ୍ୟବସାୟ’ ଚଳାଉଛନ୍ତି?
୩- ଆପଣ କୃଷକମାନଙ୍କ ବିରୋଧରେ କଳା ନିୟମ କାହିଁକି ଆଣିଲେ?
୪- ଯେତେବେଳେ ଲୋକମାନେ କରୋନାରେ ମରୁଥିଲେ, ଥାଳି ବଜାଇବାକୁ କାହିଁକି କହିଲ?
୫- ଆପଣ ସି ଜିନପିଙ୍ଗ ଝୁଲାରେ ଝୁଲାଉଛନ୍ତି, କିନ୍ତୁ ତାଙ୍କ ସେନା କିଭଳି ଭାରତର ଜମିରେ କବଜା କଲେ?
୬- ଆପଣ ଅଗ୍ନିବୀର ଯୋଜନା କାହିଁକି କଲେ?
ନିର୍ବାଚନ ପୂର୍ବରୁ ୨ଟି ଆତଙ୍କବାଦୀ ଆକ୍ରମଣ
ନନ୍ଦିଘୋଷ ବ୍ୟୁରୋ: ଜାମ୍ମୁ କାଶ୍ମୀରରେ ଆତଙ୍କବାଦୀଙ୍କ ଆକ୍ରମଣ। ସୋମବାର ଭୋଟ ହେବାକୁ ଥିବାବେଳେ ହୋଇଛି ଆତଙ୍କୀ ହମଲା। ଦୁଇ ଦୁଇଟି ଆତଙ୍କୀ ହମଲା ଖବରକୁ ଆସିଛି। ସୋପିଆଁର ହୀରପୋରା ଅଂଚଳରେ ଜଣେ ବିଜେପି ନେତାଙ୍କୁ ଗୁଳି କରି ହତ୍ଯା କରିଛନ୍ତି ଆତଙ୍କୀ। ବିଜେପି ନେତା ତଥା ପୂର୍ବତନ ସରପଞ୍ଚ ଅହମ୍ମଦଙ୍କୁ ଗୁଳି ମାଡ଼ କରିଥିଲେ ଆତଙ୍କୀ। ଗୁରୁତର ଅବସ୍ଥାରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା। ତେବେ ମେଡିକାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ଯୁ ହୋଇଛି। ସେପଟେ ଅନନ୍ତନାଗ ପହଲଗାମରେ ଘଟିଥିଲା ଆଉ ଏକ ଆତଙ୍କୀ ହମଲା। ଏକ ଟୁରିଷ୍ଟ ଦମ୍ପତି ଉପରେ ଗୁଳି ବର୍ଷାଇଥିଲେ ଆତଙ୍କୀ। ଗୁଳିମାଡ଼ରେ ରାଜସ୍ଥାନ ଜୟପୁରର ଏକ ପର୍ଯ୍ୟଟକ ଦମ୍ପତ୍ତି ଗୁରୁତର ହୋଇପଡ଼଼ିଥିଲେ। ଉଭୟଙ୍କୁ ମେଡିକାଲରେ ଭର୍ତ୍ତି କରାଯାଇଛି।ଉଭୟଙ୍କ ଅବସ୍ଥା ସଂକଟାପନ୍ନ ରହିଛି। ଆତଙ୍କୀ ହମଲାର ସୂଚନା ପରେ ଅପରେସନକୁ ଜୋରଦାର କରିଛି ପୋଲିସ ଓ ସେନା। ଗୁଳିକାଣ୍ଡ ପରେ ଅଂଚଳରେ ଘେରାବନ୍ଦୀ କରିଛି ପୋଲିସ। ସେନା ପକ୍ଷରୁ ସର୍ଚ୍ଚ ଅପରେସନ ଜାରି ରହିଚି। ଆତଙ୍କୀ ହମଲାକୁ ନେଇ ଚିନ୍ତା ପ୍ରକଟ କରିଛନ୍ତି ବିଭିନ୍ନ ଦଳର ନେତା। ଆସନ୍ତାକାଲି ଭୋଟ ହେବାକୁ ଥିବାବେଳେ ସୁରକ୍ଷାକୁ ଆହୁରି କଡ଼ାକଡ଼ି କରାଯାଇଛି।