ଇସଲାମାବାଦ: ଆଜି ପାକିସ୍ତାନ ରାଷ୍ଟ୍ରପତି ନିର୍ବାଚନ। ରାଷ୍ଟ୍ରପତି ନିର୍ବାଚନ ସକାଶେ ନ୍ଯାସନାଲ ଆସେମ୍ବ୍ଲିରେ ଉଭୟ ଗୃହର ମିଳିତ ଅଧିବେଶନ ଲାଗି ସମନ ଜାରି କରିଥିଲେ ନବନିର୍ବାଚିତ ବାଚସ୍ପତି ଆୟାଜ ସାଦିକ। ପୂର୍ବତନ ରାଷ୍ଟ୍ରପତି ଅସିଫ ଅଲ୍ଲୀ ଜର୍ଦ୍ଦାରୀ ପ୍ରାୟ ୧୧ ବର୍ଷ ପରେ ପୁଣି ଥରେ ନୂଆ ରାଷ୍ଟ୍ରପତି ହେବା ଆଶା ଉଜ୍ବଳ ରହିଛି। ଅସିଫ ଅଲ୍ଲୀ ଜର୍ଦ୍ଦାରୀଙ୍କ ବିରୋଧରେ ପ୍ରାର୍ଥୀ ଅଛନ୍ତି ପାଖତୁନ ନେତା ମହମ୍ମଦ ଖାଁ ଆଚାକଜାଇ। ଜର୍ଦ୍ଦାରୀଙ୍କୁ ସମର୍ଥନ କରୁଛନ୍ତି ପାକିସ୍ତାନ ମୁସଲିମ ଲିଗ- ନୱାଜ ଓ ପାକିସ୍ତାନ ପିପୁଲସ ପାର୍ଟି। ଯଦି ଜର୍ଦ୍ଦାରୀ ବିଜୟୀ ହୁଅନ୍ତି ତେବେ ସେ ହେବ ଦ୍ବିତୀୟ ଥର ଲାଗି ରାଷ୍ଟ୍ରପତି। ୨୦୦୮ରୁ ୨୦୧୩ ଯାଏ ଅସିଫ ଥିଲେ ରାଷ୍ଟ୍ରପତି। ସେପଟେ ୭୫ ବର୍ଷ ବୟସ୍କ ଆଚାକଜାଇ ବାଲୁଚସ୍ତାନର ହୋଇଥିବାବେଳେ ସେ ପାଖତୁନଖାୱା ମିଲ୍ଲୀ ଆୱାମି ପାର୍ଟିର ନେତା ଅଛନ୍ତି । ସଂସଦରେ ଆଚାକଜାଇଙ୍କୁ ସମର୍ଥନ କରୁଛନ୍ତି ସୁନ୍ନି ଇତେହାଦ କାଉନସିଲ ।
ଆଜି ବିଭିନ୍ନ ବିଭାଗରେ ନିଯୁକ୍ତ ହେବେ ୧୨ ଶହ ୯୪ ଜଣ ଅଧିକାରୀ
ଭୁବନେଶ୍ବର: ଆଜି ବିଭିନ୍ନ ବିଭାଗରେ ନିଯୁକ୍ତ ହେବେ ୧୨ ଶହ ୯୪ ଜଣ ଅଧିକାରୀ । ନବ ନିଯୁକ୍ତ କର୍ମଚାରୀଙ୍କୁ ଦିଗଦର୍ଶନ ଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।ବିଦ୍ୟାଳୟ ଓ ଗଣଶିକ୍ଷା ବିଭାଗ, ଅର୍ଥ ବିଭାଗ, ଗ୍ରାମ୍ୟ ଉନ୍ନୟନ ବିଭାଗ, କ୍ରୀଡ଼ା ଓ ଯୁବସେବା ବିଭାଗ, ଇସ୍ପାତ ଓ ଖଣି ବିଭାଗ, ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ, ଉଚ୍ଚ ଶିକ୍ଷା ବିଭାଗ, ଗୃହ ବିଭାଗରେ ୧୨ ଶହ ୯୪ ଜଣଙ୍କୁ ନିଯୁକ୍ତି ପ୍ରଦାନ କରାଯିବ । ମୁଖ୍ୟମନ୍ତ୍ରୀ କାର୍ଯ୍ୟକ୍ରମରେ ଯୋଗଦେଇ ନବନିଯୁକ୍ତ ଅଧିକାରୀଙ୍କୁ ଦିଗଦର୍ଶନ ଦେବେ । ଏହି ଅବସରରେ ଲୋକସେବା ଭବନ ସମ୍ମିଳନୀ କକ୍ଷ ଏବଂ ରବୀନ୍ଦ୍ର ମଣ୍ଡପରେ ଆୟୋଜିତ ନିଯୁକ୍ତି ପର୍ବରେ ନିଯୁକ୍ତି ପତ୍ର ପ୍ରଦାନ କରାଯିବ ।
ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧୀନରେ ୭୨୫ ଜଣ କନିଷ୍ଠ ସହାୟକ, ଅର୍ଥ ବିଭାଗରେ ୧୭୭ ଜଣ ସ୍ଥାନୀୟ ପାଣ୍ଠି ସମୀକ୍ଷକ, ୯୬ ଜଣ ସହକାରୀ ବାଣିଜ୍ୟ କର ଏବଂ ଦ୍ରବ୍ୟ ଓ ସେବା କର ଅଧିକାରୀ, ୭ଜଣ ଉପଖଣ୍ଡ ଆର୍ଥିକ ସେବା ଓ ସଞ୍ଚୟ ଅଧିକାର ନିଯୁକ୍ତି ପାଇବାକୁ ଯାଉଛନ୍ତି । ଅର୍ଥ ବିଭାଗରେ ମୋଟ୍ ୨୮୦ ଜଣ ନୂତନ ଭାବେ ନିଯୁକ୍ତି ପାଇବେ । ଗ୍ରାମ୍ୟ ଉନ୍ନୟନ ବିଭାଗରେ ୧୧୬ ଜଣ କନିଷ୍ଠ ସହାୟକ, ୫ଜଣ କନିଷ୍ଠ କିରାଣୀ ଏବଂ ୮ଜଣ କନିଷ୍ଠ ଷ୍ଟେନୋଗ୍ରାଫର ନିଯୁକ୍ତି ପାଇବେ । ଗ୍ରାମ୍ୟ ଉନ୍ନୟନ ବିଭାଗରେ ମୋଟ୍ ୧୨୯ ଜଣ ନୂତନ ଭାବେ ନିଯୁକ୍ତି ପାଇବେ ।
କ୍ରୀଡା ବିଭାଗରେ କ୍ରୀଡ଼ା କ୍ଷେତ୍ରରେ ଶ୍ରେଷ୍ଠ ପ୍ରଦର୍ଶନ ପାଇଁ ୧୬୦ ଜଣ କୃତୀ କ୍ରୀଡ଼ାବିତଙ୍କୁ ନିଯୁକ୍ତି ଦିଆଯିବ । ଇସ୍ପାତ ଓ ଖଣି ବିଭାଗ, ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ, ଉଚ୍ଚ ଶିକ୍ଷା ବିଭାଗ, ବିଦ୍ୟାଳୟ ଓ ଗଣଶିକ୍ଷା ବିଭାଗ ଓ ଗୃହ ବିଭାଗର ବିଭିନ୍ନ ପଦବୀରେ ନିଯୁକ୍ତି ପାଇବେ । ଏହି ଦିଗଦର୍ଶନ କାର୍ଯ୍ୟକ୍ରମରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ପ୍ରୀତିରଞ୍ଜନ ଘଡେଇ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସୁଦାମ ମାର୍ଣ୍ଡି, ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ, ଅର୍ଥ ବିଭାଗ ପ୍ରମୁଖ ସଚିବ ବିଶାଲ କୁମାର ଦେବ, ବିଦ୍ୟାଳୟ ଓ ଗଣଶିକ୍ଷା ଶାସନ ସଚିବ ଅଶ୍ଵତୀ ଏସ୍ ଉପସ୍ଥିତ ରହିବେ।
ଆଜି କଳିଙ୍ଗ ଇଣ୍ଡୋର ଆଥଲେଟିକ ଷ୍ଟାଡିୟମର ଉଦଘାଟନ କରିବେ ମୁଖ୍ଯମନ୍ତ୍ରୀ
ଭୁବନେଶ୍ବର: ଆଜି କଳିଙ୍ଗ ଇଣ୍ଡୋର ଆଥଲେଟିକ ଷ୍ଟାଡିୟମର ଉଦଘାଟନ କରିବେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ଭୁବନେଶ୍ବର କଳିଙ୍ଗ ଷ୍ଟାଡିୟମରେ ନିର୍ମାଣ ହୋଇଛି ଦକ୍ଷିଣ ଏସିଆର ପ୍ରଥମ ଇନଡୋର ଆଥଲେଟିକ୍ ଷ୍ଟାଡିୟମ । ଇନଡୋର ଆଥଲେଟିକ୍ ଷ୍ଟାଡିୟମ ସହ ଇଣ୍ଡୋର ଡାଇଭିଂ ସେଣ୍ଟରର ଭିତ୍ତି ପ୍ରସ୍ତର ସ୍ଥାପନ କରିବେ ନବୀନ । ବିଶ୍ବକ୍ରୀଡ଼ାର ସବୁଠାରୁ ବଡ଼ ଇଭେଣ୍ଟ ଅଲିମ୍ପିକ୍ସ ପାଇଁ ପ୍ରସ୍ତୁତ ହେଉଛି ଓଡ଼ିଶା । ୨୦୩୬ ଅଲିମ୍ପିକ୍ସ ପାଇଁ ଭାରତ ଦାବିଦାର ଥିବା ବେଳେ ଓଡ଼ିଶା ହେବ ବଡ଼ ଭାଗୀଦାର । ଏଥିପାଇଁ ଭୁବନେଶ୍ବର କଳିଙ୍ଗ ଷ୍ଟାଡିୟମରେ ନିର୍ମାଣ ହୋଇଛି ଦକ୍ଷିଣ ଏସିଆର ପ୍ରଥମ ଇନଡୋର ଆଥଲେଟିକ୍ ଷ୍ଟାଡିୟମ ।
ଆଜି ଏହାକୁ ଉଦଘାଟନ କରିବେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ଯେଉଁଠି ଜାତୀୟ ଓ ଅନ୍ତର୍ଜାତୀୟ ସ୍ତରର ହେବ ଟୁର୍ଣ୍ଣାମେଣ୍ଟ । ଆଥଲେଟିକର ବିକାଶ ଆହୁରି ତ୍ବରାନ୍ବିତ ହେବା ସହ ଖେଳାଳିମାନେ ବର୍ଷ ତମାମ ଅଭ୍ୟାସ କରିବାର ସୁଯୋଗ ପାଇବେ । ଏଥିପାଇଁ କଳିଙ୍ଗ ଷ୍ଟାଡିୟମରେ ଅନ୍ତର୍ଜାତୀୟ ସ୍ତରର ଭିତ୍ତିଭୂମି ପ୍ରସ୍ତୁତ କରାଯାଇଛି । ଅତ୍ୟାଧୁନିକ ଜିମ୍ନାଷ୍ଟିକ ହଲ୍, ହାଇପରଫରମାନ୍ସ ସେଣ୍ଟର, ସ୍ପୋର୍ଟ୍ସ କ୍ଲାଇମିଂ ଓ୍ବାଲ୍, ବ୍ୟାଡମିଣ୍ଟନ ଓ ହକି ଉତ୍କର୍ଷ କେନ୍ଦ୍ର, ଫିପା ମାନର ଫୁଟବଲ ଷ୍ଟାଡିୟମ, ସିନ୍ଥେଟିକ ଟ୍ରାକ୍, ବିଜୁ ପଟ୍ଟନାୟକ ଭାରୋତ୍ତୋଳନ କେନ୍ଦ୍ର ଓ ସନ୍ତରଣାଗାର ଆଦି କ୍ରୀଡ଼ାକ୍ଷେତ୍ରକୁ ସମୃଦ୍ଧ କରିବା ସହ ବିଶ୍ବର ଦୃଷ୍ଟି ଆକର୍ଷଣ କରିଛି । ବିଭିନ୍ନ ଅନ୍ତର୍ଜାତୀୟ ଓ ବିଶ୍ବସ୍ତରୀୟ ପ୍ରତିଯୋଗିତା ଆୟୋଜନ କରି ଦକ୍ଷତା ପ୍ରତିପାଦନ କରିଛି ଓଡ଼ିଶା । ଏବେ ଏହି ତାଲିକାରେ ଯୋଡ଼ିହୋଇଛି ୧୨୦ କୋଟି ଟଙ୍କାରେ ନିର୍ମିତ ଇନଡୋର ଆଥଲେଟିକ୍ ଷ୍ଟାଡିୟମ । ଖେଳାଳିଙ୍କ ବିକାଶ କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିବା ସହ ଜାତୀୟ ତଥା ଅନ୍ତର୍ଜାତୀୟ ଆଥଲେଟିକ୍ ଇଭେଣ୍ଟ ବିନା ବାଧାରେ ଆୟୋଜନ ହୋଇପାରିବ ବୋଲି ଅଲିମ୍ପିଆନ ଓ କ୍ରୀଡ଼ା ସମୀକ୍ଷକ କହିଛନ୍ତି ।
ଶିବରାତ୍ରିରେ ସମସ୍ତଙ୍କ ମଙ୍ଗଳ କାମନା କଲେ ମୁଖ୍ୟମନ୍ତ୍ରୀ
ଭୁବନେଶ୍ବର: ପବିତ୍ର ଶିବରାତ୍ରି ଅବସରରେ ସମସ୍ତଙ୍କ କଲ୍ଯାଣ କାମନା କରିଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ସେ କହିଛନ୍ତି, ପବିତ୍ର ମହାଶିବରାତ୍ରି ଅବସରରେ ପ୍ରଭୁ ଲିଙ୍ଗରାଜଙ୍କ ମନ୍ଦିର ପରିସର ଭବ୍ଯ ହୋଇଉଠିଛି । ଅସଂଖ୍ୟ ଶ୍ରଦ୍ଧାଳୁଙ୍କ ଭକ୍ତି ଅନନ୍ଯ ଆଧ୍ଯାତ୍ମିକ ପରିବେଶ ସୃଷ୍ଟି କରିଛି । ପ୍ରଭୁ ଲିଙ୍ଗରାଜ ସମସ୍ତଙ୍କ କଲ୍ଯାଣ କରନ୍ତୁ ।
ସେହିପରି 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ପ୍ରଭୁ ଶ୍ରୀଲିଙ୍ଗରାଜଙ୍କ ଅପୂର୍ବ ଶୋଭାରାଜିକୁ ପୋଷ୍ଟ କରିଛନ୍ତି ନିଜ ଇନଷ୍ଟାଗ୍ରାମରେ । ପତ୍ନୀ ସୁଜାତା ରାଉତ କାର୍ତ୍ତିକେୟନ ସହ ଲିଙ୍ଗରାଜ ମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିବା ସହ ଆଶୀର୍ବାଦ ନେଇଛନ୍ତି ।
ନିର୍ଦ୍ଧାରିତ ସମୟରେ ଉଠିଲା ଲିଙ୍ଗରାଜଙ୍କ ମହାଦୀପ
ଭୁବନେଶ୍ବର: ମହାପ୍ରଭୁ ଲିଙ୍ଗରାଜଙ୍କ ମହାଦୀପ ଉଠିଛି । ନିର୍ଦ୍ଧାରିତ ସମୟରେ ଉଠିଲା ମହାଦୀପ । ରାତି ୧୦ଟା ୧୫ ମିନିଟ ସମୟରେ ଉଠିଲା ମହାଦୀପ । ମହାଦୀପ ମନ୍ଦିର ପରିକ୍ରମା କରିବା ପରେ ଚୂଡ଼ାକୁ ଉଠାଇଥିଲେ ସେବାୟତ । ଓମ୍ ନମଃ ଶିବାୟ ଧ୍ବନୀରେ ଗୁଞ୍ଜରିତ ହେଲା ଭୁବନେଶ୍ବର ଏକାମ୍ର କ୍ଷେତ୍ର ।
ଲକ୍ଷାଧିକ ଶ୍ରଦ୍ଧାଳୁଙ୍କ ମେଳରେ ବାବା ପାଳିଲେ ଜାଗର ଯାତ୍ରା । ମହାଦୀପକୁ ଦେଖିବାକୁ ଶ୍ରଦ୍ଧାଳୁଙ୍କ ମଧ୍ଯରେ ଉତ୍ସାହ ପ୍ରକାଶ ପାଇଥିଲା । ନୀତିକାନ୍ତିକୁ ଅତି ଶୃଙ୍ଖଳିତ ଭାବେ ସମାପନ କରିଛନ୍ତି ସେବାୟତ । ନୀତିକାନ୍ତି ସମାପନ ପରେ ରାତି ୧୦ଟାରେ ମନ୍ଦିରରୁ ବାହାରିଥିଲା ମହାଦୀପ । ପୋଲିସ ସୁରକ୍ଷା ବଳୟରେ ମହାଦୀପକୁ ମନ୍ଦିର ପରିକ୍ରମା କରାଇଥିଲେ ସେବାୟତ । ମନ୍ଦିର ପରିସରରେ ଲକ୍ଷାଧିକ ଶ୍ରଦ୍ଧାଳୁ ମହାଦୀପକୁ ଦର୍ଶନ କରିବା ସହ ସେଲଫି ନେଉଥିବା ଦେଖିବାକୁ ମିଳିଥିଲା । ମହାଦୀପ ବାହାରିବା କ୍ଷଣି ଶ୍ରଦ୍ଧାଳୁଙ୍କ ମଧ୍ୟରେ ଦେଖା ଦେଇଥିଲା ଉନ୍ମାଦନା ।
ଘଣ୍ଟଘଣ୍ଟା ଓ ଡମ୍ବରୁ ଶବ୍ଦରେ ପ୍ରକମ୍ପିତ ହୋଇଥିଲା ଶ୍ରୀଲିଙ୍ଗରାଜ ପରିସର । ଅନେକ ସେବାୟତ ହାତରେ ଡମ୍ବରୁ ଧରି ମହାଦୀପ ଆଗେ ଆଗେ ଯାଇଥିଲେ । ମହାଦୀପ ମନ୍ଦିର ପରିକ୍ରମା କରିବା ପରେ ସେବାୟତ ଚୂଡ଼ାକୁ ଏହାକୁ ନେଇଥିଲେ । ୩ ଜଣ ସେବାୟତ ମନ୍ଦିର ଚୂଡ଼ାରେ ମହାଦୀପ ସ୍ଥାପନା କରିବା ସହ ଚୂଡା଼ ପରିକ୍ରମା କରିଥିଲେ । ଲକ୍ଷ ଲକ୍ଷ ଶ୍ରଦ୍ଧାଳୁ ଶ୍ରୀଲିଙ୍ଗରାଜ ମନ୍ଦିର ପରିସରରେ ଜାଗର ଜାଳି ଉପାସନା କରିଥିଲେ । ମନ୍ଦିର ପରିସରରେ ହନୁମାନ ବେଶରେ ଶ୍ରଦ୍ଧାଳୁଙ୍କ ପ୍ରମୁଖ ଆକର୍ଷଣ ସାଜିଥିଲେ ଲିଙ୍ଗରାଜଙ୍କ ଭକ୍ତ । ମହାପ୍ରଭୁଙ୍କ ଦର୍ଶନ ପାଇଁ ଏକାମ୍ର କ୍ଷେତ୍ରରେ ପହଞ୍ଚିଥିଲେ 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ । ସେବାୟତ ଓ ପ୍ରଶାସନ 5T ଅଧ୍ଯକ୍ଷଙ୍କୁ ମନ୍ଦିର ଭିତରକୁ ପାଛୋଟି ନେଇଥିଲେ । ମନ୍ଦିର ଗର୍ଭ ଗୃହରେ ବାବା ଲିଙ୍ଗରାଜଙ୍କୁ ଦର୍ଶନ କରି ଆଶିଷ ନେଇଥିଲେ 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ । ତାଙ୍କ ସହ ପତ୍ନୀ ସୁଜାତା ରାଉତ କାର୍ତ୍ତିକେୟନ ବି କରିଥିଲେ ପ୍ରଭୁଙ୍କ ଦର୍ଶନ।
ଭାରତରେ ନିର୍ବାଚନ ପର୍ବ: ଅନୁଭୂତି ସାଉଁଟିବାକୁ ଜମିଲାଣି ବିଦେଶୀଙ୍କ ଭିଡ଼
ନୂଆଦିଲ୍ଲୀ: ଆଉ ମାତ୍ର କିଛି ଦିନ ପରେ ସାରା ଦେଶରେ ୨୦୨୪ ସାଧାରଣ ନିର୍ବାଚନ । ଡାକବାଜି ଯନ୍ତ୍ର, ଲିଫ୍ଲେଟ୍, ପୋଷ୍ଟରରେ ଚାଲିବ ଯୁଦ୍ଧ। ଗଣତନ୍ତ୍ରର ମହାପର୍ବକୁ ଶାନ୍ତିଶୃଙ୍ଖଳା ସହ କରାଇବାକୁ ନିର୍ବାଚନ କମିଶନଙ୍କ ପକ୍ଷରୁ ସମସ୍ତ ପ୍ରସ୍ତୁତି ଚୂଡାନ୍ତ । ଭାରତର ନିର୍ବାଚନ ପର୍ବ ଏବେ ପର୍ଯ୍ୟଟନର ନୂଆ ସମ୍ଭାର ଖୋଲିଛି । ବିଦେଶୀ ପର୍ଯ୍ୟଟକ ଓ ଗଣମାଧ୍ୟମ ନିର୍ବାଚନ ପର୍ବର ଅନୁଭୂତି ସାଉଁଟିବାକୁ ତୟାର । ଅନ୍ଯପଟେ ପ୍ରଥମଥର ପାଇଁ ମତଦାତା ଲିଷ୍ଟରେ ନାମ ଚଢିଥିବା ଯୁବ ଭୋଟରଙ୍କ ଭିତରେ ଭରିଛି ଉତ୍ସାହ ।
ମାଇକ୍ ସାଉଣ୍ଡ, ମୋଟର ରାଲି, ମାଳମାଳ ପ୍ରଚାର ଗାଡ଼ି, ଷ୍ଟାର ପ୍ରଚାରକଙ୍କ ରଡ଼ି । ପ୍ରତିଶ୍ରୁତି, ଆକ୍ଷେପ, ପ୍ରତି ଆକ୍ଷେପ । ଶାସକ-ବିରୋଧୀଙ୍କ ନାରାରେ କମ୍ପିବ ଗଳି, ମହଲା ଓ ସହର । ଆଉ କିଛି ଦିନ ପରେ ଦେଶରେ ଅନୁଷ୍ଠିତ ହେବ ୨୦୨୪ ସାଧାରଣ ନିର୍ବାଚନ । ଭାରତୀୟ ଗଣତନ୍ତ୍ରର ମହାପର୍ବ ଆଣିବ ପର୍ଯ୍ୟଟନର ନୂଆ ସମ୍ଭାର ନିର୍ବାଚନୀ ପର୍ଯ୍ୟଟନ । ଯାହାକୁ ଅନାଇ ରହିଛି ସାରା ବିଶ୍ବ । ବିବିଧତା ଭିତରେ ଏକତା । ଇଭିଏମ୍-ଭିଭିପାଟରେ ନିଜ ମତାଧିକାର ସାବ୍ଯସ୍ତ କରିନ୍ତି ମତାଦାତା । ଚଳିତବର୍ଷ ପ୍ରଥମକରି ମତଦାନ କରିବାକୁ ଥିବା ଯୁବ ଭୋଟରଙ୍କ ଭିତରେ ସେଥିପାଇଁ ଉତ୍ସାହ ଜୋରଦାର । ଏହି ମହାନ୍ ପର୍ବକୁ ଦେଖିବାକୁ ଛୁଟି ଆସନ୍ତି ବିଦେଶୀ ପର୍ଯ୍ୟଟକ । ୨୦୧୨ରେ ନିର୍ବାଚନୀ ପର୍ଯ୍ୟଟନ ପ୍ରଥମ କରି ଗୁଜୁରାଟରେ ଆରମ୍ଭ ହୋଇଥିଲା । ୨୦୧୪ରେ ସାଧାରଣ ନିର୍ବାଚନ ଦେଖିବାକୁ ଜାପାନ, ୟୁନାଇଟେଡ୍ ଆରବ ଏମିରେଟ୍ସ୍, ଆମେରିକା ଓ ୟୁରୋପରୁ ୧୮୦୦ ପର୍ଯ୍ୟଟକ ଗୁଜୁରାଟ ଆସିଥିଲେ । ୨୦୧୯ ନିର୍ବାଚନର ଅନୁଭୂତି ସାଉଁଟିବାକୁ ଭାରତକୁ ଆସିଥିଲେ ପ୍ରାୟ ୫୦ ହଜାର ବିଦେଶୀ ପର୍ଯ୍ୟଟକ, ଗଣମାଧ୍ୟମ ପ୍ରତିନିଧି ।
ନିର୍ବାଚନ ସମୟରେ ଶାସକ ଦଳ ଓ ବିରୋଧୀଙ୍କ ଭିତରେ ଆକ୍ଷେପ ଓ ପ୍ରତିଆକ୍ଷେପ ଜୋର ଧରେ । ଆଗରୁ ନିର୍ବାଚନ ସମୟରେ ନେତାଙ୍କ ପ୍ରତିଶ୍ରୁତି ମିଳୁଥିଲା । ଓଡ଼ିଶାରେ ଏହା ଅତୀତ ହୋଇଛି । ଯେବେଠୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ଶାସନ ଭାର ହାତକୁ ନେଇଛନ୍ତି ସେବେଠୁ ନିର୍ବାଚନ ପ୍ରତିଶ୍ରୁତି ମୁତାବକ ଲୋକଙ୍କୁ ଗୁଡ୍ ଗଭର୍ଣ୍ଣାନ୍ସ ଦେଇ ଆସିଛନ୍ତି । ନିର୍ବାଚନ ସମୟରେ ଅନ୍ୟ ରାଜ୍ୟରେ ହିଂସାତ୍ମକ ଘଟଣା ସାମନାକୁ ଆସିଥାଏ । କିନ୍ତୁ ଓଡ଼ିଶାରେ ଶାନ୍ତିଶୃଙ୍ଖଳା ସହ ନିର୍ବାଚନ ପରିଚାଳନା ହୋଇଆସୁଛି । ଓଡ଼ିଶାରେ ନିର୍ବାଚନ ପ୍ରକ୍ରିୟା ଦେଖିବାକୁ ଛୁଟି ଆସନ୍ତି ବିଦେଶୀ ପର୍ଯ୍ୟଟକଙ୍କ ସମେତ ସ୍କୁଲ ଓ ବିଶ୍ବବିଦ୍ୟାଳୟ ସ୍ତରର ଛାତ୍ରଛାତ୍ରୀ । ନିର୍ବାଚନ ଆଚରଣ ବିଧି ଅବଧିରେ ଦେଖିବାକୁ ମିଳେନି କୌଣସି ନୂଆ ଯୋଜନା କି ପ୍ରତିଶ୍ରୁତି । ଏହି ସମୟରେ ଜନପ୍ରତିନିଧି ବ୍ୟବସ୍ଥା ବଦଳରେ ସୁପ୍ରିମ୍ ଭୂମିକାରେ ଥାଏ କାର୍ଯ୍ୟପାଳିକା । ଯାହାକି ବିଶ୍ବରେ ବିରଳ ।
କଂଗ୍ରେସକୁ ଟିକେଟ ଟେନସନ, ଦିଲ୍ଲୀରେ ସ୍କ୍ରିନଂ କମିଟି ବୈଠକରେ ହେବ କସରତ
ଭୁବନେଶ୍ବର: ଓଡ଼ିଶାରେ ନୁହେଁ, ଦିଲ୍ଲୀରେ ଟିକେଟ ନେଇ ପୁଣି କସରତ ଆରମ୍ଭ କରିବ କଂଗ୍ରେସ । ଆସନ୍ତାକାଲି ଦିଲ୍ଲୀରେ ସ୍କ୍ରିନଂ କମିଟି ବୈଠକରେ କଂଗ୍ରେସ ଟିକେଟ ଆଶାୟୀଙ୍କ ଆବେଦନ ଉପରେ ହେବ ଆଲୋଚନା । ସୂଚନା ଦେଲେ ପିସିସି ସଭାପତି ଶରତ ପଟ୍ଟନାୟକ । ଟିକେଟ ପାଇଁ କରାଯାଇଥିବା ପ୍ରଗମନ ଆପରେ କଂଗ୍ରେସର ବିଧାୟକ ଓ ସାଂସଦ ପ୍ରାର୍ଥୀ ହେବାକୁ ଆବେଦନ କରିଥିବା ଆଶାୟୀଙ୍କ ଚୂଡ଼ାନ୍ତ ନାଁ ଦିଲ୍ଲୀରେ ଫାଇନାଲ କରାଯାଇ ହାଇକମାଣ୍ଡକୁ ଦିଆଯିବ । ଅନ୍ୟପଟେ ବରିଷ୍ଠ ବିଧାୟକ ସୁରେଶ ରାଉତରାୟ କହୁଛନ୍ତି କଂଗ୍ରେସରେ ୪ଟି ଥାକରେ ଟିକେଟ ଆଲୋଚନl ହୁଏ, ଟିକେଟ ଘୋଷଣା ଏତେ ସହଜ ନୁହେଁ l
୨୪ ବର୍ଷ ଧରି କ୍ଷମତା ବାହାରେ ରାଜ୍ୟ କଂଗ୍ରେସ । ପ୍ରତି ନିର୍ବାଚନରେ ଦଳର ଭୋଟ ହାର ବି କମି କମି ଚାଲିଛି । ତୃଣମୂଳସ୍ତରରେ କଂଗ୍ରେସ ସଂଗଠନ ବି ଦୁର୍ବଳ । ହେଲେ ନେତା ହେବାକୁ କିନ୍ତୁ ଆଶାୟୀଙ୍କ ଲମ୍ବା ଲିଷ୍ଟ । ଯାହା କଂଗ୍ରେସର ଆଗୁଆ ଟିକେଟ କସରତରେ କେଁ ପୂରାଇଛି । ପ୍ରଦେଶ ନିର୍ବାଚନ କମିଟି ବୈଠକରେ ଆଶାୟୀ ଅଙ୍କ ଛିଣ୍ଡି ନଥିବାରୁ ଶନିବାର ଦିଲ୍ଲୀରେ ବସିବ ସ୍କ୍ରିନଂ କମିଟି ବୈଠକ । ଉଭୟ ବିଧାନସଭା ଓ ଲୋକସଭା ପାଇଁ ପ୍ରତି ନିର୍ବାଚନୀ ମଣ୍ଡଳୀରୁ କେଉଁ ପ୍ରାର୍ଥୀଙ୍କ ନାଁ ଚୂଡ଼ାନ୍ତ କରାଯିବ ତାହା ସ୍କ୍ରିନଂ କମିଟି ସ୍ଥିର କରିବ । ପ୍ରଗମନ ଆପରେ ବିଧାୟକ ପାଇଁ ୩ ହଜାର ଓ ସାଂସଦ ପାଇଁ ୭୦୦ ଆଶାୟୀ ଆବେଦନ କରିଛନ୍ତି । ଏହାସହ ବ୍ଲକ ଓ ଜିଲ୍ଲା ସଭାପତିଙ୍କ ଜରିଆରେ ଅନେକ ପ୍ରାର୍ଥୀ ଆବେଦନ କରିଥିବାରୁ ଏହା ଉପରେ ବିଚାର କରାଯିବ ବୋଲି ଶରତ କହିଛନ୍ତି ।
ପ୍ରଥମ ପର୍ଯ୍ୟାୟରେ କଂଗ୍ରେସ ୭୦ ଟିକେଟ ଆଗୁଆ ବାଣ୍ଟିବାକୁ ଯୋଜନା କରିଥିଲେ ମଧ୍ୟ ଏହାକୁ ନେଇ ଦଳ ଭିତରେ ଛକାପଞ୍ଝା ଲାଗି ରହିଛି । ପିଇସି ପରେ ସ୍କ୍ରିନଂ କମିଟିକୁ ପ୍ରାର୍ଥୀଙ୍କ ତାଲିକା ପଠାଯିବ । ଏହାପରେ ସିଇସିକୁ ଚୂଡ଼ାନ୍ତ ତାଲିକା ପଠାଯିବ ବୋଲି ପିସିସି ସଭାପତି କହିଛନ୍ତି । ବରିଷ୍ଠ ବିଧାୟକ ସୁରେଶ ରାଉତରାୟ କହିଛନ୍ତି ଯେ, କଂଗ୍ରେସରେ ଟିକେଟ ଘୋଷଣା ଚାରି ଥାକରେ ହେବ । ତେଣୁ ଆଗୁଆ ଟିକେଟ ବାଣ୍ଟିବା ସହଜ ନୁହେଁ ।
କଂଗ୍ରେସ ଅନ୍ଦର ମହଲର ସୂଚନା ଅନୁସାରେ, ନିର୍ବାଚିତ ବିଧାୟକ, ସାଂସଦ ଓ ୨୦୧୯ରେ ଦ୍ବିତୀୟ ସ୍ଥାନରେ ଥିବା ନେତାକୁ ପୁଣିଥରେ ଟିକେଟ ଦେବାକୁ ଦଳ ଭିତରେ ଆପାତତଃ ସ୍ଥିର କରାଯାଇଛି ।
ରାଜସ୍ବ ସଂଗ୍ରହରେ ଓଡ଼ିଶାର ରେକର୍ଡ, ଫେବୃୟାରୀ ସୁଦ୍ଧା ସାମଗ୍ରିକ ଭାବେ ୨୩ ପ୍ରତିଶତ ବୃଦ୍ଧି
ଭୁବନେଶ୍ବର: ବଢୁଛି ସରକାରଙ୍କ ରାଜସ୍ୱ । ଗତବର୍ଷ ଅପେକ୍ଷା ଏଥର ଫେବୃଆରୀ ମାସ ସୁଦ୍ଧା ସାମଗ୍ରିକ ଭାବେ ୨୩ ପ୍ରତିଶତ ବୃଦ୍ଧି ପାଇଛି ରାଜସ୍ବ । ଅନ୍ତର୍ଜାତୀୟ ସ୍ତରରେ ଖଣି କାରବାରରେ ମାନ୍ଦାବସ୍ଥା ସତ୍ତ୍ୱେ ଗତବର୍ଷ ଅପେକ୍ଷା ଖଣି ରାଜସ୍ବରେ ପ୍ରାୟ ୧୫ ପ୍ରତିଶତ ବୃଦ୍ଧି ହୋଇଛି । ଜମିଜମା ରାଜସ୍ବରେ ସର୍ବାଧିକ ବୃଦ୍ଧି ଘଟିଛି । ଗତବର୍ଷ ଅପେକ୍ଷା ଏଥର ୭୨ ପ୍ରତିଶତ ବଢିଛି । ନିଜସ୍ୱ ଟିକସ ଓ ଅଣ ଟିକସ ଉତ୍ସରୁ ମଧ୍ୟ ରାଜସ୍ୱ ସଂଗ୍ରହ ବୃଦ୍ଧି ହେବା ରାଜ୍ୟର ଆର୍ଥିକ ସ୍ଥିତିକୁ ସୁଦୃଢ଼ କରିଛି । ରାଜସ୍ୱ ବଳକା ରାଜ୍ୟ ଭାବେ ପରିଚିତ ଓଡିଶା ଆର୍ଥିକ ପରିଚାଳନାରେ ମଧ୍ୟ ସାରା ଦେଶ ପାଇଁ ମଡେଲ ସାଜିଛି ।
ଗତବର୍ଷ ୭୮,୮୩୪.୪୮ କୋଟି ଟଙ୍କା ସଂଗ୍ରହ ହୋଇଥିବା ବେଳେ ଫେବୃଆରୀ ୨୦୨୪ ଶେଷ ପର୍ଯ୍ୟନ୍ତ ରାଜ୍ୟ ସରକାର ୯୪,୦୦୩.୧୫ କୋଟି ଟଙ୍କା ସଂଗ୍ରହ କରିଛନ୍ତି । ରାଜ୍ୟର ନିଜସ୍ୱ ଟିକସ ରାଜସ୍ୱ ସଂଗ୍ରହ ମଧ୍ୟ ୧୮.୬୬ ପ୍ରତିଶତ ଅଭିବୃଦ୍ଧି ରେକର୍ଡ କରିଛି । ଗତମାସ ଶେଷ ପର୍ଯ୍ୟନ୍ତ ମୋଟ ନିଜସ୍ୱ ଟିକସ ରାଜସ୍ୱ ସଂଗ୍ରହ ୪୭,୮୮୪.୩୬ କୋଟି ଟଙ୍କା ହୋଇଥିବାବେଳେ ଗତବର୍ଷ ୪୦,୩୫୫.୮୫ କୋଟି ଟଙ୍କା ସଂଗ୍ରହ କରିଛି । ଏପ୍ରିଲ୍ ୨୦୨୩ରୁ ଫେବୃଆରୀ ୨୦୨୪ ମଧ୍ୟରେ ରାଜ୍ୟରେ ଜିଏସଟି ଜମି ରାଜସ୍ୱ, ଯାନବାହନ ଟ୍ୟାକ୍ସ ଏବଂ ବିଦ୍ୟୁତ୍ ଶୁଳ୍କ ସଂଗ୍ରହରେ ବୃଦ୍ଧି ହେତୁ ନିଜସ୍ୱ ଟିକସ ରାଜସ୍ୱ ସଂଗ୍ରହରେ ଅଭିବୃଦ୍ଧି ଘଟିଛି ।
ଫେବୃଆରୀ ୨୦୨୪ ପର୍ଯ୍ୟନ୍ତ ଜମି ରାଜସ୍ୱ ୭୨.୨୦ ପ୍ରତିଶତ ବୃଦ୍ଧି ପାଇଥିବା ବେଳେ ବିକ୍ରୟ କର ୨୦.୭୧ ପ୍ରତିଶତ ବୃଦ୍ଧି ପାଇଛି । ଖଣି ରାଜସ୍ୱ ବୃଦ୍ଧି ହେତୁ ରାଜ୍ୟର ଅଣ-ଟିକସ ରାଜସ୍ୱ ସଂଗ୍ରହରେ ୧୯. ୮୬ ପ୍ରତିଶତ ଅଭିବୃଦ୍ଧି ପଞ୍ଜିକୃତ ହୋଇଛି । ଫେବୃଆରୀ ଶେଷ ପର୍ଯ୍ୟନ୍ତ ମୋଟ ଅଣ-ଟିକସ ରାଜସ୍ୱ ସଂଗ୍ରହ ୪୬,୧୧୮.୭୯ କୋଟି ଟଙ୍କା ଥିବାବେଳେ ଗତବର୍ଷ ଏହା ୩୮,୪୭୮.୬୨ କୋଟି ଟଙ୍କା ଥିଲା । ପ୍ରତିକୂଳ ବଜାର ସତ୍ତ୍ୱେ ଖଣି ରାଜସ୍ୱ ସଂଗ୍ରହରେ ୧୫.୨୫ ପ୍ରତିଶତ ଅଭିବୃଦ୍ଧି ଘଟିଛି । ଗତବର୍ଷ ୩୩,୯୩୬.୬୬ କୋଟି ଟଙ୍କା ସଂଗ୍ରହ ତୁଳନାରେ ଚଳିତବର୍ଷ ଖଣିରୁ ରାଜ୍ୟ ୩୯,୧୧୧.୯୯ କୋଟି ଟଙ୍କା ସଂଗ୍ରହ ହୋଇଛି । ଫେବୃଆରୀ ୨୦୨୪ ଶେଷ ପର୍ଯ୍ୟନ୍ତ ସେୟାର ଟ୍ୟାକ୍ସ ହେଉଛି ୪୬,୭୯୩.୮୬ କୋଟି ଟଙ୍କା । ଯାହା ପୂର୍ବ ବର୍ଷର ସମାନ ଅବଧିରେ ୨୭.୮୯ ପ୍ରତିଶତ ଅଭିବୃଦ୍ଧି ରେକର୍ଡ କରିଛି । ଫେବୃଆରୀ ପର୍ଯ୍ୟନ୍ତ ସମସ୍ତ ଉତ୍ସରୁ ମୋଟ ରାଜସ୍ୱ ରସିଦ ୧ ଲକ୍ଷ ୫୯ ହଜାର ୮୨୧ କୋଟି ଥିବା ବେଳେ ଗତବର୍ଷ ୧ ଲକ୍ଷ ୨୯ ହଜାର ୪୯୦ କୋଟି ଟଙ୍କା ଥିଲା, ଯାହା ୨୩. ୪୨ ପ୍ରତିଶତ ଅଧିକ ।
୩୩ ପ୍ରତିଶତ ଆସନରେ ମହିଳା ପ୍ରାର୍ଥୀ ଦେବ ବିଜେଡି
ଭୁବନେଶ୍ବର: ଗତଥର ଭଳି ଆସନ୍ତା ଲୋକସଭା ନିର୍ବାଚନରେ ବିଜେଡି ୩୩ ପ୍ରତିଶତ ଆସନରେ ମହିଳା ପ୍ରାର୍ଥୀ ଦେବ। ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏହି ନିଷ୍ପତ୍ତି ନେଇଛନ୍ତି । ଏନେଇ ସୂଚନା ଦେଇଛନ୍ତି 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ । ଆଜି ବିଜେଡି ପକ୍ଷରୁ ଆନ୍ତର୍ଜାତିକ ମହିଳା ଦିବସ ପାଳନ କାର୍ଯ୍ଯକ୍ରମରେ ଉଦବୋଧନ ଦେଇ କହିଛନ୍ତି, ମହିଳା ସଶକ୍ତିକରଣରେ ମହିଳାଙ୍କୁ ନିଷ୍ପତ୍ତି ନେବାର କ୍ଷମତା ଦେବା ଉପରେ ସେ ଗୁରୁତ୍ବ ଦେଇଛନ୍ତି ।
୨୦୧୯ ଲୋକସଭା ନିର୍ବାଚନରେ ନବୀନ ପଟ୍ଟନାୟକ ୩୩ ପ୍ରତିଶତ ମହିଳାଙ୍କୁ ଲୋକସଭା ପ୍ରାର୍ଥୀ କରିଥିଲେ । ଉଭୟ ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ ପାଇଁ ନବୀନ ଉଦ୍ୟମ କରିଆସୁଛନ୍ତି । ବିଜୁ ଜନତା ଦଳ ମହିଳାଙ୍କ ସମ୍ମାନ, ସମାନତା ଓ ସଶକ୍ତିକରଣ ପାଇଁ ସମର୍ପିତ । ଆଜି ଏହି ଶୀର୍ଷକରେ ଶଙ୍ଖ ଭବନରେ ବିଜେଡି ପକ୍ଷରୁ ଆୟୋଜିତ ଆନ୍ତର୍ଜାତିକ ମହିଳା ଦିବସ କାର୍ଯ୍ୟକ୍ରମରେ 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ ଉଦବୋଧନ ଦେଇଥିଲେ । ବିଜୁ ଜନତା ଦଳ ଏକ ରାଜନୈତିକ ଦଳ ନୁହେଁ, ଏକ ସାମାଜିକ ଆନ୍ଦୋଳନ । ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ମହିଳା ସଂରକ୍ଷଣ ୫୦ ପ୍ରତିଶତକୁ ମୁଖ୍ୟମନ୍ତ୍ରୀ ବୃଦ୍ଧି କରିଥିଲେ । ସେହିପରି ଜିଲ୍ଲା ପରିଷଦରେ ମୁଖ୍ୟମନ୍ତ୍ରୀ ୭୦ ପ୍ରତିଶତ ମହିଳାଙ୍କୁ ସଭାନେତ୍ରୀ କରିଛନ୍ତି ବୋଲି ସେ କହିଛନ୍ତି ।
ରାଜ୍ଯରେ ବିନା ସୁଧରେ ମିଶନ ଶକ୍ତି ମାଆମାନଙ୍କ ଋଣ ପରିମାଣ ୧୦ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି । ୯୫ ପ୍ରତିଶତ ମହିଳା ୧୫ ହଜାର କୋଟି ଟଙ୍କା ଋଣ ନେଇ ଉଦ୍ୟୋଗୀ ହେଲେଣି । ଆଗାମୀ ଦିନରେ ଋଣର ପରିମାଣ ୨୦ ହଜାର କୋଟିରେ ପହଞ୍ଚିବ । ମାଆମାନେ ପାସପୋର୍ଟ ଅଫିସରେ ଲମ୍ବା ଲାଇନ ଲଗାଉଛନ୍ତି । ୮୦୦ରୁ ଅଧିକ ମିଶନ ଶକ୍ତି ମହିଳାଙ୍କୁ ଉଦ୍ୟୋଗୀ କରି ଦୁବାଇ ଓ ସିଙ୍ଗାପୁରରେ ବ୍ୟବସାୟ କରିବାକୁ ପଠାଇଲେଣି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ଦେଇଥିବା ଦାୟିତ୍ବକୁ ସ୍ବଚ୍ଛ ଓ ସଠିକ୍ ଭାବେ ନିର୍ବାହ କରିବାକୁ ଆହ୍ବାନ ଦେଇଛନ୍ତି 5T ଅଧ୍ଯକ୍ଷ । ସଶକ୍ତ ଓ ନୂତନ ଓଡ଼ିଶା ଗଠନ ପାଇଁ ନିର୍ବାଚିତ ମହିଳାମାନଙ୍କୁ ନିଷ୍ପତ୍ତି ନେବାର କ୍ଷମତା ଉପରେ ଗୁରୁତ୍ବ ଦେଇଛନ୍ତି 5T ଅଧ୍ୟକ୍ଷ ।
ମହିଳା ସଶକ୍ତିକରଣ ଆରମ୍ଭ କରିଥିଲେ ପୂର୍ବତନ ମୁଖ୍ୟମନ୍ତ୍ରୀ ପ୍ରବାଦ ପୁରୁଷ ବିଜୁ ପଟ୍ଟନାୟକ । ଏହାକୁ ଆହୁରି ଆଗକୁ ନେଇ ମହିଳା ସଶକ୍ତିକରଣର ରୋଲ ମଡେଲ ସାଜିଛନ୍ତି ତାଙ୍କ ସୁପୁତ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମାତୃତ୍ବକାଳୀନ ଛୁଟି ସମସ୍ତଙ୍କ ଲାଗି ଲାଗୁ ହୋଇଛି । କାର୍ଯ୍ୟକାରୀ ହେଉଛି ମମତା ଯୋଜନା । ଏହି ଯୋଜନାରେ ପୂର୍ବରୁ ଗର୍ଭବତୀ ମହିଳା ୫ ହଜାର ଟଙ୍କା ପାଉଥିଲେ । ଏବେ ୧୦ ହଜାର ଟଙ୍କା ବ୍ଯବସ୍ଥା ହୋଇଛି । ଏହାର ଦେଢ଼ ବର୍ଷ ପରେ ତତ୍କାଳୀନ କେନ୍ଦ୍ର ସରକାର ଇନ୍ଦିରା ଗାନ୍ଧୀଙ୍କ ନାଁରେ ଏପରି ଏକ ଯୋଜନା ଆରମ୍ଭ କରିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯୋଜନାକୁ ଅନ୍ୟ ରାଜ୍ୟ ଓ କେନ୍ଦ୍ର ଅନୁକରଣ କରୁଛନ୍ତି ।
ଭାରତ-ଇଂଲଣ୍ଡ ୫ମ ଟେଷ୍ଟ: ରୋହିତ- ଶୁବମନଙ୍କ ଶତକ, ଦ୍ବିତୀୟ ଦିନରେ ଭାରତ ୪୭୩/୮
ଧର୍ମଶାଳା: ଧର୍ମଶାଳା ସ୍ଥିତ ହିମାଚଳ ପ୍ରଦେଶ କ୍ରିକେଟ ଆସୋସିଏସନ ଷ୍ଟାଡିୟମରେ ଚାଲିଛି ଭାରତ ଓ ଇଂଲଣ୍ଡ ମଧ୍ୟରେ ୫ମ ତଥା ଅନ୍ତିମ ଟେଷ୍ଟ ମ୍ୟାଚ୍ । ପ୍ରଥମ ଦିନ ଭାରତୀୟ ବୋଲରଙ୍କ ଦବଦବା ଦେଖିବାକୁ ମିଳିଥିବା ବେଳେ ଦ୍ବିତୀୟ ଦିନରେ ଭାରତୀୟ ବ୍ୟାଟ୍ସମ୍ୟାନଙ୍କ ଜଲଓ୍ବା ଦେଖିବାକୁ ମିଳିଛି । ଦ୍ବିତୀୟ ଦିନ ଶେଷ ସୁଦ୍ଧା ଭାରତ ୮ ଓ୍ବିକେଟ ହରାଇ ୪୭୩ ରନ୍ କରିଛି । ଅଧିନୟକ ରୋହିତ ଶର୍ମା ଏବଂ ଯୁବ ବ୍ୟାଟର ଶୁବମନ ଗିଲ୍ ଶତକୀୟ ପାରି ଖେଳିଛନ୍ତି । ଏହାଦ୍ବାରା ଭାରତ ପ୍ରଥମ ପାଳିରେ ୨୫୫ ରନର ଅଗ୍ରଣୀ ହାସଲ କରିଛି ।
ରୋହିତ ଏବଂ ଶୁବମନ ଦ୍ବିତୀୟ ୱିକେଟ୍ ପାଇଁ ୧୭୧ ରନର ଭାଗିଦାରୀ କରିଛନ୍ତି । ରୋହିତ ୧୩ଟି ଚୌକା ଓ ୩ଟି ଛକା ବଳରେ ୧୦୩ ରନ୍ ଓ ଗିଲ୍ ୧୨ଟି ଚୌକା ଓ ୫ଟି ଛକା ସହାୟତାରେ ୧୧୦ ରନ୍ କରିଛନ୍ତି । ସେହିପରି ଯୁବ ବ୍ଯାଟ୍ସମ୍ଯାନ ଦେବଦତ୍ତ ପଡିକଲ ଓ ସର୍ଫରାଜ ଖାନ୍ ବ୍ୟକ୍ତିଗତ ଭାବେ ଅର୍ଦ୍ଧଶତକ ହାସଲ କରିଛନ୍ତି । ଦେବଦତ୍ତ ୧୦ଟି ଚୌକା ଓ ଗୋଟିଏ ଛକା ସହାୟତାରେ ୬୫ ରନ୍ ଓ ସର୍ଫରାଜ ୮ଟି ଚୌକା ଓ ଗୋଟିଏ ଛକା ମାଧ୍ୟମରେ ୫୬ ରନ୍ ସଂଗ୍ରହ କରିଥିଲେ । ଅଲରାଉଣ୍ଡର ରବୀନ୍ଦ୍ର ଜାଡେଜା ଓ ଧ୍ରୁବ ଜୁରେଲ ୧୫ ରନ ଲେଖାଏଁ ସଂଗ୍ରହ କରିଥିବା ବେଳେ ରବୀଚନ୍ଦ୍ରନ ଅଶ୍ବିନ ଖାତା ଖୋଲିପାରି ନଥିଲେ ।
ପ୍ରଥମ ଦିନରେ ଜଶସ୍ବୀ ଜୟଶ୍ବାଲ ରେକର୍ଡ କରିଥିଲେ । ପ୍ରଥମ ଭାରତୀୟ ଭାବେ ସେ ଇଂଲଣ୍ଡ ବିରୋଧରେ ସର୍ବାଧିକ ରନ୍ ସଂଗ୍ରହ କରିଛନ୍ତି । ପଞ୍ଚମ ଟେଷ୍ଟରେ ୫୭ ରନ ସଂଗ୍ରହ ସହ ପୂରା ଟେଷ୍ଟ ସିରିଜରେ ୬୫୬ ରନ ସଂଗ୍ରହ କରି ବିରାଟ କୋହଲିଙ୍କ ରେକର୍ଡ ଭାଙ୍ଗିଛନ୍ତି । ଦ୍ବିତୀୟ ଦିନ ଖେଳ ଶେଷ ସୁଦ୍ଧା ୨୭ ରନ କରି କୁଲଦୀପ ଯାଦବ ଓ ୧୯ ରନ କରି ଯଶପ୍ରୀତ ବୁମରା ଅପରାଜିତ ଅଛନ୍ତି ।
ଇଂଲଣ୍ଡ ଟସ୍ ଜିଣି ଗୁରୁବାର ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା । ଆରମ୍ଭରୁ ଭଲ ପ୍ରଦର୍ଶନ କରିଥିଲେ ସୁଦ୍ଧା ଭାରତୀୟ ସ୍ପିନରଙ୍କ ଘାତକ ବୋଲିଂ ଯୋଗୁଁ ୫୭.୪ ଓଭରରେ ୨୧୮ ରନ୍ କରି ଇଂଲଣ୍ଡ ଅଲ୍ଆଉଟ୍ ହୋଇଯାଇଥିଲା । ଭାରତ ପ୍ରଥମ ଦିନରେ ଗୋଟିଏ ୱିକେଟ୍ ହରାଇ ୧୩୫ ରନ୍ ସଂଗ୍ରହ କରିଥିଲା । ଏଥିରେ ପ୍ରାରମ୍ଭିକ ବ୍ୟାଟର ଯଶସ୍ବୀ ଜୟସ୍ବାଲ ୫ଟି ଚୌକା ଓ ୩ଟି ଛକା ବଳରେ ୫୭ ରନ୍ ସଂଗ୍ରହ କରିଥିଲେ ।