ନନ୍ଦିଘୋଷ ବ୍ୟୁରୋ: ମଙ୍ଗଳବାର ଦେଢ଼ଘଣ୍ଟା ପାଇଁ ମେଟାର ସର୍ଭର ଡାଉନ ରହିଥିଲା । ଯେଉଁ କାରଣରୁ ଫେସବୁକ ଏବଂ ଇନଷ୍ଟାଗ୍ରାମ ଖୋଲି ନଥିଲା । ୟୁଜର୍ସମାନେ ଯାହାକୁ ନେଇ ଚିନ୍ତାରେ ପଡ଼ିଯାଇଥିଲେ । ତେବେ ମାତ୍ର କେଇ ଘଣ୍ଟାର ସର୍ଭର ଡାଉନରୁ ହଜାର ହଜାର କୋଟିର କ୍ଷତି । ଆର୍ଥିକ ସ୍ତରରେ ବଡ଼ କ୍ଷତି ସହିଛି ଜୁକରବର୍ଗଙ୍କ କଂପାନୀ ମେଟା । ମେଟା ଅଧୀନରେ ରହିଛି ଫେସବୁକ୍, ଇନଷ୍ଟାଗ୍ରାମ୍ ଓ ହ୍ବାଟ୍ସଆପ୍ । ମାର୍ଚ୍ଚ ୫ରେ ସବୁ ଆପ୍ ଡାଉନ୍ ହେବା ପରେ କଂପାନୀ ସହିଛି କ୍ଷତି । ଫେସବୁକ୍ ଫ୍ରି ଆପ୍ଲିକେସନ୍ ହୋଇଥିବାରୁ ବିଜ୍ଞାପନ ଏହାର ମୁଖ୍ୟ ଆୟ । ଭାରତ ସମେତ ସାରା ବିଶ୍ବରେ ବୁଧବାର ସନ୍ଧ୍ୟାରେ ଡାଉନ୍ ରହିଥିଲା ସର୍ଭର । ମେଟା ୩ ବିଲିୟନ୍ ଡଲାରର କ୍ଷତି ସହିଥିବା ବିଭିନ୍ନ ଗ୍ଲୋବାଲ୍ ରିପୋର୍ଟରେ ପ୍ରକାଶ ପାଇଛି । ମେଟା ସେୟାରରେ ମଧ୍ୟ ୧.୬ ପ୍ରତିଶତର ହ୍ରାସ ପରିଲକ୍ଷିତ ହୋଇଛି । ୨୦୨୧ରେ ସମାନ ଢଙ୍ଗରେ ଫେସବୁକ୍ ୭ ଘଣ୍ଟା କାମ କରିନଥିଲା ।
ଭିଜିଲାନ୍ସ ଜାଲରେ ଗଞ୍ଜାମ ଜଗନ୍ନାଥପ୍ରସାଦ ଆରଆଇ
ଭଞ୍ଜନଗର : ଭିଜିଲାନ୍ସ ଜାଲରେ ଗଞ୍ଜାମ ଜଗନ୍ନାଥପ୍ରସାଦ ଆରଆଇ । ପାଞ୍ଚ ହଜାର ଟଙ୍କା ଲାଞ୍ଚ ନେଉଥିବା ବେଳେ ପ୍ରମୋଦ କୁମାର ବେହେରାଙ୍କୁ ଧରିଛି ଭିଜିଲାନ୍ସ ଟିମ । ସେ ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ତହସିଲରେ ଭାବେ କାର୍ଯ୍ୟରତ ଥିଲେ । ଲାଞ୍ଚ କାରବାରରେ ଆରଆଇଙ୍କୁ ସହଯୋଗ କରୁଥିଲେ ସ୍ଥାନୀୟ ବ୍ୟକ୍ତି ବିଦ୍ୟାଧର ପ୍ରଧାନ । ଜଣେ ବ୍ୟକ୍ତି ଜମି ଡିମାରକେସନ ପାଇଁ ବିଦ୍ୟାଧରଙ୍କୁ ୫୦୦୦ ଟଙ୍କା ଲାଞ୍ଚ ଦେଇଥିଲେ । ବିଦ୍ୟାଧର ସେହି ଟଙ୍କାକୁ ନେଇ ଆରଆଇଙ୍କୁ ଦେଇଥିଲେ । ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଟିମ ଆରଆଇଙ୍କ ସହ ବିଦ୍ୟାଧରଙ୍କୁ କାବୁ କରିଥିଲା। ରଙ୍ଗବୋଳା ୫୦୦୦ ଟଙ୍କାକୁ ଜବତ କରିବା ସହ ପ୍ରମୋଦ ଓ ବିଦ୍ୟାଧରଙ୍କୁ ଅଧିକ ପଚରାଉଚରା କରିବା ପାଇଁ ବ୍ରହ୍ମପୁର କାର୍ଯ୍ୟାଳୟକୁ ନେଇଛି ।
ଉତ୍ତରପ୍ରଦେଶ ରାୟବରେଲିରୁ ନିର୍ବାଚନୀ ଡେବ୍ୟୁ କରିବେ ପ୍ରିୟଙ୍କା ଗାନ୍ଧି
ନୂଆଦିଲ୍ଲୀ : ଉତ୍ତରପ୍ରଦେଶ ରାୟବରେଲିରୁ ନିର୍ବାଚନୀ ଡେବ୍ୟୁ କରିବେ ପ୍ରିୟଙ୍କା ଗାନ୍ଧି। ପ୍ରଥମ ଥର ଲାଗି ରାୟବରେଲିରୁ ସାଧାରଣ ନିର୍ବାଚନ ଲଢିବେ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧି ଭଦ୍ରା। ସେହିପରି କେରଳର ୱାୟନାଡରୁ ଲଢିବେ କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧି। ତେବେ ଅମେଥି ଆସନରୁ ମଧ୍ଯ ସେ ପୁଣି ଲଢିବା ନେଇ ମିଳୁଛି ସୂଚନା ।
ରାୟବରେଲିରୁ ଲଢିବେ କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧି ଭଦ୍ରା। ଏହି ଆସନରୁ ଲଗାତର ୫ ଥର ସାଂସଦ ଭାବେ ନିର୍ବାଚିତ ହୋଇଛନ୍ତି କଂଗ୍ରେସ ସୁପ୍ରିମୋ ସୋନିଆ ଗାନ୍ଧି। ଉତ୍ତରପ୍ରଦେଶରୁ ଗତଥର କେବଳ ସୋନିଆ ଗାନ୍ଧି କଂଗ୍ରେସ ସାଂସଦ ଭାବେ ନିର୍ବାଚିତ ହୋଇଥିଲେ। ୨୦୧୯ରେ ଅମେଥିରୁ ସାଂସଦ ଭାବେ ନିର୍ବାଚିତ ହୋଇଥିଲେ ବିଜେପି ନେତ୍ରୀ ସ୍ମୃତି ଇରାନୀ।
ଓଡ଼ିଶା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ୨ଟି ବୁଝାମଣା ପତ୍ର ସ୍ୱାକ୍ଷର
ଭୁବନେଶ୍ୱର : ଓଡ଼ିଶା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ୨ଟି ବୁଝାମଣା ପତ୍ର ସ୍ୱାକ୍ଷର। ଅମୃତା ବିଶ୍ଵ ବିଦ୍ୟାପୀଠମ୍ ,କେରଳ ସହିତ ଭୂସ୍ଖଳନ ବିପର୍ଯ୍ୟୟ ପରିଚାଳନା ସଂପର୍କିତ ବୁଝାମଣା ପତ୍ର ସ୍ୱାକ୍ଷର ହୋଇଛି । ବ୍ୟାଙ୍କ ସ୍ଥିତ “ରାଇମସ” ଅନୁଷ୍ଠାନର ସହିତ ବହୁମୁଖୀ ପ୍ରଭାବ ଆଧାରିତ ବିପର୍ଯ୍ୟୟ ପୂର୍ବାନୁମାନ ସଂପର୍କରେ ଏମଓୟୁ ସ୍ୱାକ୍ଷରିତ ହୋଇଛି ।
ବୁଝାମଣାପତ୍ରଗୁଡ଼ିକ ସରକାରଙ୍କ ‘ମିଶନ ଜିରୋ କାଜୁଆଲିଟି’ ଏବଂ ‘ପ୍ରତ୍ୟେକ ଜୀବନ ମୂଲ୍ୟବାନ’ ଉଦ୍ୟମକୁ ସଫଳ କରାଇବା ଦିଗରେ ସହାୟକ ହେବ । ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ଓ ଅତିରିକ୍ତ ମୁଖ୍ୟ ଶାସନ ସଚିବ ତଥା ଓସଡମାର ପରିଚାଳନା ନିର୍ଦ୍ଦେଶକ ସତ୍ୟବ୍ରତ ସାହୁଙ୍କ ଉପସ୍ଥିତିରେ ଏହି ବୁଝାମଣା ପତ୍ର ସ୍ୱାକ୍ଷରିତ ହୋଇଛି ।
ଚୁକ୍ତିନାମାକୁ ଓସଡମାର କାର୍ଯ୍ୟନିର୍ବାହୀ ନିର୍ଦ୍ଦେଶକ ସୁସ୍ମିତା ବେହେରା ଏବଂ ଅମୃତା ବିଶ୍ଵ ବିଦ୍ୟାପୀଠମ୍ ର ନିର୍ଦ୍ଦେଶକ ଡଃ. ମନିଷା ବିନୋଦିନୀ ରମେଶ ସ୍ୱାକ୍ଷର କରିଛନ୍ତି । ସେହିପରି ରାଇମସ୍ ଅନୁଷ୍ଠାନ ସହିତ ସ୍ୱାକ୍ଷରିତ ବୁଝାମଣା ପତ୍ରରେ ଓଏସଡିଏମଏର କାର୍ଯ୍ୟନିର୍ବାହୀ ନିର୍ଦ୍ଦେଶକ ସୁସ୍ମିତା ବେହେରା ଏବଂ ରାଇମସ୍ ପକ୍ଷରୁ ବରିଷ୍ଠ ଉପଦେଷ୍ଟା ଡଃ. କେ. ଜେ. ରମେଶ ବୁଝାମଣା ପତ୍ରରେ ସ୍ୱାକ୍ଷର କରିଛନ୍ତି ।
ଭୁବନେଶ୍ୱର ଗୋଠପାଟଣାଠାରେ ନିର୍ମାଣ ହେବ ପ୍ରଥମ ଆଦିବାସୀ ଭବନ
ଭୁବନେଶ୍ୱର : ଗୋଠପାଟଣାଠାରେ ନିର୍ମାଣ ହେବ ପ୍ରଥମ ଆଦିବାସୀ ଭବନ । ଏଥିପାଇଁ ଶିଳାନ୍ଯାସ କରିଛନ୍ତି ମୁଖ୍ଯମନ୍ତ୍ରୀ ନବୀନ । ଆଦିବାସୀ ଭବନ ନିର୍ମାଣ ପାଇଁ ଖର୍ଚ୍ଚ ହେବ ୧୦୦ କୋଟି ଟଙ୍କା । ଏହି ଅବସରରେ ମୁଖ୍ୟମନ୍ତ୍ରୀ ସମସ୍ତଙ୍କୁ ଶୁଭେଚ୍ଛା ଜଣାଇ କହିଛନ୍ତି ଏହି ଭବନ ଆଦିବାସୀ କଳା, ସଂସ୍କୃତି ଓ ବିକାଶର ବିଚାରବିମର୍ଶ, ବୈଠକ, ସମ୍ମିଳନୀ ଓ ପ୍ରଦର୍ଶନ ପାଇଁ ଏକ ବହୁମୁଖୀ କେନ୍ଦ୍ର ଭାବେ ପରିଗଣିତ ହେବ ।
ରାଜ୍ୟର ଆଦିବାସୀ ଲୋକଙ୍କ ଉଦ୍ଦେଶ୍ୟରେ ସମର୍ପିତ ଏହି ଭବନ ନବୀନ ଓଡ଼ିଶା ସଶକ୍ତ ଓଡ଼ିଶାର ପରିକଳ୍ପନାକୁ ସାକାର କରିବା ଦିଗରେ ସହାୟକ ହେବ । ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗ ଅନୁଯାୟୀ, ଏହି ପ୍ରସ୍ତାବିତ ଭବନର ଆବଶ୍ୟକତା ବିଷୟରେ ବିଭିନ୍ନ ଜନଜାତି ଗୋଷ୍ଠୀ ପକ୍ଷରୁ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ଏହା କାର୍ଯ୍ୟକ୍ଷମ ହେଲେ ଆଦିମ ଜନଜାତି ସମେତ ୬୪ଟି ଅନୁସୂଚିତ ଜନଜାତି ବର୍ଗର ଆଦିବାସୀ ଲୋକ ଉପକୃତ ହେବେ। ସ୍ବତନ୍ତ୍ର ଉନ୍ନୟନ ପରିଷଦ ପାଇଁ ରାଜ୍ୟସ୍ତରୀୟ ପ୍ରଶାସନର ଏକ ପ୍ରକଳ୍ପ ଭାବରେ ବିକଶିତ ହେବାକୁ ଥିବା ଏହି ବହୁମୁଖୀ ସୁବିଧା କେନ୍ଦ୍ର ଆଦିବାସୀଙ୍କ ଆବଶ୍ୟକତାକୁ ପୂରଣ କରିବାରେ ମଧ୍ୟ ସହାୟକ ହେବ ।
ଓଡ଼ିଶାର ବିଭିନ୍ନ ପ୍ରାନ୍ତରୁ ଆସୁଥିବା ଆଦିବାସୀ ସମ୍ପ୍ରଦାୟର ସଦସ୍ୟମାନଙ୍କ ପାଇଁ ସୁବିଧାରେ ରହିବାର ବ୍ୟବସ୍ଥା କରିବ ଆଦିବାସୀ ଭବନ । ଏଥି ସହିତ ଅନୁସୂଚିତ ଜନଜାତି ସମୁଦାୟ ପ୍ରାୟତଃ ଭିନ୍ନ ଭିନ୍ନ ସାଂସ୍କୃତିକ ପ୍ରଥା, ଖାଦ୍ୟ ପସନ୍ଦ ଏବଂ ସାମାଜିକ ମାନଦଣ୍ଡ ବଜାୟ ରଖନ୍ତି । ଏହି ଭବନ ସେମାନଙ୍କ ପାଇଁ ଅନୁକୂଳ ପରିବେଶ ସୃଷ୍ଟି କରିବା ସହିତ ସେମାନଙ୍କ ସାଂସ୍କୃତିକ ସମ୍ବେଦନଶୀଳତାକୁ ମଧ୍ୟ ସମ୍ମାନ ଦେବ। ସେମାନଙ୍କ ପାଇଁ ଏକ ଆନନ୍ଦଦାୟକ ରହିବା ସୁବିଧା ମଧ୍ୟ ଉପଲବ୍ଧ କରିବ। ଆଦିବାସୀ ଭବନ’ରେ ରହିବାର ସୁବିଧା ସହ ସମ୍ମିଳନୀ କକ୍ଷ, କୋରାପୁଟ କଫି କାଫେ ଏବଂ ଆଦିଶାର ଦ୍ବିତୀୟ ଆଉଟଲେଟ୍ ମଧ୍ୟ ରହିବ। ସ୍ୱାସ୍ଥ୍ୟ ସେବା ସୁବିଧା, ଶିକ୍ଷାନୁଷ୍ଠାନ, ସରକାରୀ କାର୍ଯ୍ୟାଳୟ ଓ ଅନ୍ୟାନ୍ୟ ସୁବିଧା ସମ୍ପର୍କରେ ସୂଚନା ଓ ସହାୟତା ମିଳିପାରିବ। ଆଦିବାସୀମାନଙ୍କ କଳାକୃତି ଏବଂ ପାରମ୍ପରିକ ବସ୍ତ୍ର ଉଭୟ ପ୍ରଦର୍ଶନ ଏବଂ ବିକ୍ରୟ ପାଇଁ ସୁଯୋଗ ରହିବ।
ନବୀନ ପଟ୍ଟନାୟକ ସରକାରଙ୍କ ଇତିହାସ : ଗୋଟିଏ ଦିନରେ ଲୋକଙ୍କ ସମସ୍ୟାର ହେଲା ସମାଧାନ
ଭୁବନେଶ୍ୱର : ନବୀନ ପଟ୍ଟନାୟକ ସରକାରଙ୍କ ଇତିହାସ। ଗୋଟିଏ ଦିନରେ ଲୋକଙ୍କ ସମସ୍ୟାର ହେଲା ସମାଧାନ। ମୁଖ୍ଯମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ଫାଇଭ ଟି ଓ ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଭିଡିଓ କନଫରେନ୍ସିଂ ଜରିଆରେ ଅନୁଗୁଳ ଜିଲ୍ଲାର କିଶୋର ନଗର ଅନ୍ତର୍ଗତ ବଡପଡିଆ ଓ ଛେଣ୍ଡିପଦାର ବରସାହି ଫିଲ୍ଡରେ ଉପସ୍ଥିତ ଥିବା ଲୋକଙ୍କ ସହ କରିଥିଲେ ଆଲୋଚନା।
ସେହିପରି ସମ୍ବଲପୁରର ଜାମଦରପଲ୍ଲୀ ଫିଲ୍ଡ ଓ ରେଙ୍ଗାଳି ହାଇସ୍କୁଲ ଫିଲ୍ଡ ଏବଂ ହୀରାକୁଦସ୍ଥିତ ସୁବାସ ମଇଦାନରେ ଉପସ୍ଥିତ ଲୋକଙ୍କ ସହ ଆଲୋଚନା କରିଥିଲେ। ଅଭିଯୋଗର ଶୁଣାଣି କରି ଗୋଟିଏ ଦିନରେ ସ୍ଥାନୀୟ ଲୋକଙ୍କ ଆବଶ୍ଯକତାକୁ ପୂରଣ କରିବା ଲାଗି ସମସ୍ତ ପ୍ରକଳ୍ପକୁ ମଞ୍ଜୁର କରାଯାଇଥିଲା। ଅନୁଗୁଳ ଜିଲ୍ଲାର ୨୮୩ଟି ପ୍ରକଳ୍ପ ଲାଗି ୧୦ କୋଟି ୪୭ଲକ୍ଷ ଟଙ୍କା ଏବଂ ସମ୍ବଲପୁର ଜିଲ୍ଲାର ୪୦୮ଟି ପ୍ରକଳ୍ପ ଲାଗି ୧୨ କୋଟି ୫୯ ଲ୍କ୍ଷ ଟଙ୍କା ମଞ୍ଜୁର କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏପରିକି ପ୍ରକଳ୍ପ ନେଇ ଅନୁରୋଧ କରିଥିବା ଲୋକଙ୍କ ମୋବାଇଲକୁ ବି ମଞ୍ଚୁରୀ ସଂକ୍ରାନ୍ତ ନିର୍ଦ୍ଦେଶନାମା ପଠାଇଦିଆଯାଇଥିଲା।
5T ଅଧ୍ୟକ୍ଷ ପାଣ୍ଡିଆନ କହିଥିଲେ- ଗତବର୍ଷ ଜୁଲାଇରେ ସେ ଅନୁଗୁଳ ଓ ସମ୍ବଲପୁର ଜିଲ୍ଲା ଗସ୍ତ କରିଥିବାବେଳେ ମିଳିଥିବା ଅନୁରୋଧ ଅନୁସାରେ ଦୁଇ ଜିଲ୍ଲାରେ ୮୮୭ କୋଟି ଟଙ୍କାର ପ୍ରକଳ୍ପ କାର୍ଯ୍ୟକାରୀ କରାଯାଇଛି। ଏହା ସହ ସାମାଜିକ ନିରାପତ୍ତା ପେନସନ, ମମତା ଯୋଜନା, ମିଶନ ଶକ୍ତି ଲାଗି ମୁଖ୍ୟମନ୍ତ୍ରୀ ବୃଦ୍ଧି କରିଥିବା ବିଭିନ୍ନ ସହାୟତା ସୀମା ସମ୍ପର୍କରେ ବି ଅବଗତ କରାଇଥିଲେ ଫାଇଭ-ଟି ଅଧ୍ୟକ୍ଷ।
ବିକାଶକୁ ସ୍ବୀକୃତି, ନୂଆ ଓଡ଼ିଶା ଓ ସଶକ୍ତ ଓଡ଼ିଶା ଗଠନ ପାଇଁ ଜାରି ରହିଛି ନିରନ୍ତର ପ୍ରୟାସ
ଭୁବନେଶ୍ୱର : ଓଡିଶାର ବିକାଶ ଧାରାକୁ ପୁଣି ମିଳିଲା ସ୍ବୀକୃତି। ନିରନ୍ତର ବିକାଶ ଧାରା ପାଇଁ ଉତ୍ପାଦନଭିତ୍ତିକ ଶିଳ୍ପର ପ୍ରଥମ ପସନ୍ଦ ହୋଇଛି ଓଡିଶା ।.. .. ଏକ ନୂଆ ଓ ସଶକ୍ତ ଓଡିଶା ଗଠନ ପାଇଁ ଜାରି ରହିଥିବା ବିକାଶ ଧାରା ପାଇଁ ଓଡିଶା ପାଇଛି ନୂଆ ପରିଚୟ । ବିକାଶ ଓ ରୂପାନ୍ତରଣ ଏବେ ରାଜ୍ୟର ଗରିମା ବୃଦ୍ଧି କରିଛି । ସ୍କୁଲ ଠାରୁ ଆରମ୍ଭ କରି ଐତିହ୍ୟ ପ୍ରକଳ୍ପର ରୂପାନ୍ତରଣ ହେଉ କି ସ୍ବାସ୍ଥ୍ୟ ଭିତ୍ତିଭୂମିର ସୁଦୃଢୀକରଣ ଠାରୁ ଶିଳ୍ପାୟନ । ସବୁଠି ବିକାଶର ନୂଆ ଧାରା ଆରମ୍ଭ ହୋଇଛି । ଯାହାଦ୍ବାରା ରାଜ୍ୟର ଗରିବଗୁରୁବାଙ୍କ ସାମାଜିକ ଓ ଆର୍ଥିକ ସ୍ଥିତିରେ ଉନ୍ନତି ଆସିବା ସହ ଯୁବାବର୍ଗ ପାଇଁ ନିଯୁକ୍ତିର ପର୍ଯ୍ୟାପ୍ତ ସୁଯୋଗ ସୃଷ୍ଟି ହୋଇଛି । କେବଳ ରାଜ୍ୟ ସ୍ବାର୍ଥ ପାଇଁ କାମ କରୁଥିବା ନବୀନ ପଟ୍ଟନାୟକଙ୍କୁ ସେଇଥିପାଇଁ ଓଡିଶାବାସୀ କ୍ରମାଗତ ଭାବେ ମୁଖ୍ୟମନ୍ତ୍ରୀ ଭାବେ ନିର୍ବାଚିତ କରିଆସୁଛନ୍ତି ।
ରାଜ୍ୟ ସରକାର କେବଳ ଯୋଜନା ପ୍ରସ୍ତୁତ କରୁନାହାଁନ୍ତି ବରଂ ସେସବୁ ଯୋଜନାକୁ ନିଷ୍ଠା ଓ ସ୍ବଚ୍ଛତାର ସହ କାର୍ଯ୍ୟକାରୀ କରୁଛନ୍ତି । ଦେଶର ବିକାଶ ଧାରାରେ ଓଡିଶାର ଯୋଗଦାନ ମଧ୍ୟ ମହତ୍ବପୂର୍ଣ୍ଣ । ରାଜ୍ୟର ଏହି ବିକାଶ ଧାରାକୁ ନେଇ ଅନେକ ସମୟରେ ବିରୋଧୀ ପ୍ରଶ୍ନ ଉଠାଇଥାନ୍ତି । କିନ୍ତୁ ବିକାଶ ବିରୋଧୀଙ୍କୁ କେବେ ବି ରାଜ୍ୟବାସୀ ଗ୍ରହଣ କରିନାହାଁନ୍ତି ।
ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନାଙ୍କ ଘରବାହୁଡ଼ା
ନୂଆଦିଲ୍ଲୀ : ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନାଙ୍କ ଘରବାହୁଡ଼ା। କଂଗ୍ରେସକୁ ପୁଣି ଫେରିଛନ୍ତି ଶ୍ରୀକାନ୍ତ। ଦିଲ୍ଲୀରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ହୋଇଛି ମିଶ୍ରଣ ପର୍ବ। ୨୦୧୯ରେ ତାଙ୍କୁ କେତେକ କାରଣରୁ କଂଗ୍ରେସରୁ ବହିଷ୍କାର କରାଯାଇଥିଲା। କଂଗ୍ରେସର ମୁଖ୍ୟ କାର୍ଯ୍ୟାଳୟରେ ଓଡ଼ିଶା କଂଗ୍ରେସ ପ୍ରଭାରୀ ଅଜୟ କୁମାର ଓ କଂଗ୍ରେସ ନେତା ବିନୀତ ପୁନିଆ ଉପସ୍ଥିତି ରେ ସେ କଂଗ୍ରେସରେ ସାମିଲ ହୋଇଥିଲେ।
ମେଣ୍ଟ ସମ୍ଭାବନାକୁ ନେଇ ବିଜେଡି ପ୍ରତିକ୍ରିୟା, ରାଜ୍ୟ ସ୍ୱାର୍ଥ ପାଇଁ ଯାହା ଆବଶ୍ୟକ ତାହା କରାଯିବ
ଭୁବନେଶ୍ୱର : ବିଜେପି ଓ ବିଜେଡି ମଧ୍ୟରେ ଆଗାମୀ ସାଧାରଣ ନିର୍ବାଚନରେ ମେଣ୍ଟ ହୋଇପାରେ । ଏଭଳି ଚର୍ଚ୍ଚାକୁ ବଳ ଦେଇଥିଲା ବୁଧବାର ଦିନ ଭୁବନେଶ୍ୱର ଓ ନୂଆଦିଲ୍ଲୀରେ ଦୁଇ ଦଳଙ୍କର ହାଇଲେଭଲ ମିଟିଂ । ଅପରାହ୍ନରେ ଭୁବନେଶ୍ୱରରେ ବିଜେଡିର ବରିଷ୍ଠ ନେତୃତ୍ୱ ନବୀନ ନିବାସର ଏକାଠି ହୋଇଥିଲେ । ଅନ୍ୟପକ୍ଷରେ ନୂଆଦିଲ୍ଲୀରେ ରାଜ୍ୟ ବିଜେପିର ନେତା କେନ୍ଦ୍ରୀୟ ନେତୃତ୍ୱ ସହିତ ସଂଧ୍ୟାରେ ବୈଠକ କରିଥିଲେ । ନବୀନ ନିବାସରେ ବିଜେଡିର ଗୁରୁତ୍ବପୂର୍ଣ୍ଣ ବୈଠକ ପରେ ଏକ ପ୍ରେସ ବିଜ୍ଞପ୍ତି ମାଧ୍ଯମରେ ଦଳର ଆଭିମୁଖ୍ଯ ନେଇ ସୂଚନା ଦେଇଛନ୍ତି ବିଜେଡି ସାଧାରଣ ସଂପାଦକ ତଥା ସାଂସଦ ମାନସ ମଙ୍ଗରାଜ । ୨୦୩୬ ଓଡିଶାକୁ ୧୦୦ ବର୍ଷ ପୂର୍ତ୍ତି ପାଇଁ ମୁଖ୍ଯମନ୍ତ୍ରୀ ଯେଉଁ ଲକ୍ଷ୍ଯ ଧାର୍ଯ୍ୟ କରିଛନ୍ତି ତାହାକୁ ହାସଲ କରିବା ପାଇଁ ବୃହତ୍ତର ସ୍ବାର୍ଥ ଦୃଷ୍ଟିରୁ ଯେଉଁ ନିଷ୍ପତ୍ତି ଆବଶ୍ଯକ ସେହି ନିଷ୍ପତ୍ତି ବିଜେଡି ନେବ ବୋଲି ବିଜ୍ଞପ୍ତିରେ କୁହାଯାଇଛି ।
ଏହାରି ଭିତରେ ସଂଧ୍ୟା ବେଳେ ବିଜେଡି ତରଫରୁ ଆସିଥିଲା ପ୍ରତିକ୍ରିୟା । ନବୀନ ନିବାସରୁ ବୈଠକରୁ ବାହାରି ବରିଷ୍ଠ ବିଜେଡି ନେତା ଅରୁଣ ସାହୁ କହିଥିଲେ ଯେ, ରାଜ୍ଯ ସ୍ବାର୍ଥ ଅନୁସାରେ ନିଷ୍ପତ୍ତି ନିଆଯିବ । ଠିକ ସମୟରେ ଠିକ ନିଷ୍ପତ୍ତି ନିଆଯିବ । ସେହିପରି ବିଜେଡିର ବରିଷ୍ଠ ଉପସଭାପତି ଦେବୀ ମିଶ୍ର କହିଛନ୍ତି, ବୈଠକରେ ଆଗାମୀ ସାଧାରଣ ନିର୍ବାଚନ ଏବଂ ବିଭିନ୍ନ ଦିଗ ନେଇ ଆଲୋଚନା ହୋଇଛି । ଓଡ଼ିଶା ଆଜି ସଫଳତା ପାଇ ଚାଲିଛି । ରାଜ୍ଯକୁ ଉଚ୍ଚତର ସୋପାନକୁ ନେବା ପାଇଁ ପ୍ରୟାସ ଜାରି ରହିଛି । ୧୨ ବର୍ଷ ପରେ ଶହେ ବର୍ଷ ପୂରଣ କରୁଛି ସ୍ବତନ୍ତ୍ର ଓଡ଼ିଶା ଭାବେ । ଏଥିପାଇଁ ଯେଉଁ ମାଇଲଷ୍ଟୋନ ମୁଖ୍ଯମନ୍ତ୍ରୀ ଧାର୍ଯ୍ଯ କରିଛନ୍ତି ସେଥିପାଇଁ ଯାହା ଆବଶ୍ଯକ ପଡ଼ିବ ଦଳ ସେ ନିଷ୍ପତ୍ତି ନେବ ବୋଲି କହିଛନ୍ତି ଦେବୀ ମିଶ୍ର ।
ବୈଠକରେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ, ଫାଇଭ-ଟି ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ, ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର, ମନ୍ତ୍ରୀ ଟୁକୁନି ସାହୁ, ଅଶୋକ ଚନ୍ଦ୍ର ପଣ୍ଡା, ବିଜେଡି ସାଧାରଣ ସଂପାଦକ ସଞ୍ଜୟ ଦାଶ ବର୍ମା, ସାଂସଦ ମାନସ ମଙ୍ଗରାଜ, ମନ୍ତ୍ରୀ ପ୍ରଦୀପ ଅମାତ, ପ୍ରୀତିରଞ୍ଜନ ଘଡେ଼ଇ, ପ୍ରତାପ ଦେବ, ଉଷା ଦେବୀ, ବିକ୍ରମ ଆରୁଖ, ଜଗନ୍ନାଥ ସାରକା, ପ୍ରଫୁଲ ମଲ୍ଲିକ, ଅତୁନ ସବ୍ୟସାଚି ନାୟକ, ବରିଷ୍ଠ ଉପସଭାପତି ଦେବୀ ମିଶ୍ର, ବିଧାୟକ ଅରୁଣ ସାହୁ, ପ୍ରଣବ ବଳବନ୍ତରାୟ, ସୁଶାନ୍ତ ରାଉତ ପ୍ରମୁଖ ଉପସ୍ଥିତ ଥିଲେ ।
ଅନ୍ୟପକ୍ଷରେ ନୂଆଦିଲ୍ଲୀରେ ମେଣ୍ଟ ସମ୍ଭାବନା ଉପରକେ ପ୍ରତିକ୍ରିୟା ରଖି ବିଜେପିର ବରିଷ୍ଠ ନେତା ଜୁଏଲ ଓରାମ କହିଥିଲେ ଯେ, ବୈଠକରେ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଥିଲା । ମେଣ୍ଟ ହେବ କି ନାହିଁ ତାହା କେନ୍ଦ୍ରୀୟ ନେତୃତ୍ୱ ନିଷ୍ପତି ନେବ । ବୈଠକରେ ସବୁ ଲୋକସଭା ଆସନ ଓ ବିଧାନସଭା ଆସନ ନେଇ ଆଲୋଚନା ହୋଇଥିଲା ବୋଲି ସେ କହିଥିଲେ । ତେବେ ମେଣ୍ଟକୁ ନେଇ ସେ ସିଧାସଳଖ କୌଣସି ପ୍ରତିକ୍ରିୟା ଦେଇନଥିଲେ ।
ମେଣ୍ଟ ହେବ କି ନାହିଁ, କାହାକୁ ଟିକେଟ ମିଳିବ ସବୁ ନିଷ୍ପତ୍ତି କେନ୍ଦ୍ର ନେବ: ଜୁଏଲ ଓରାମ
ନୂଆଦିଲ୍ଲୀ : ଦିଲ୍ଲୀରେ ଓଡ଼ିଶା ବିଜେପିର କୋର୍ କମିଟି ବୈଠକ ଶେଷ ହୋଇଛି। ବୈଠକ ସମ୍ପର୍କରେ ସାଂସଦ ଜୁଏଲ ଓରାମ ଦେଇଛନ୍ତି ସୂଚନା । ସେ କହିଛନ୍ତି, ବୈଠକରେ ସମସ୍ତ ସିଟ ଉପରେ ଆଲୋଚନା ହୋଇଛି । ରାଜନୈତିକ ସ୍ଥିତି ଉପରେ ଆଲୋଚନା ହୋଇଛି ।ମେଣ୍ଟ ଉପରେ ନିର୍ଦ୍ଦିଷ୍ଟ ଆଲୋଚନା ହୋଇନାହିଁ। ତେବେ ମେଣ୍ଟ ସମ୍ପର୍କରେ ଶେଷ ନିଷ୍ପତ୍ତି ଶୀର୍ଷ ନେତୃତ୍ୱ ନେବେ । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଅଧ୍ୟକ୍ଷତାରେ ବସିଥିଲା ଏହି ବୈଠକ।
କୋର୍ କମିଟିରେ ଥିବା ୧୮ ଜଣ ସଦସ୍ଯ ବୈଠକରେ ସାମିଲ ହୋଇଥିଲେ। ବୈଠକରେ ଗୃହମନ୍ତ୍ରୀ ଅମିତ ଶାହ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ବିନୀ ବୈଷ୍ଣବ ଉପସ୍ଥିତ ଥିବାବେଳେ ଓଡ଼ିଶା ବିଜେପି ସଭାପତି ମନମୋହନ ସାମଲ ଉପସ୍ଥିତ ଥିଲେ । ଏହା ସହ ପ୍ରଭାରୀ ବିଜୟପାଲ ସିଂହ ତୋମର ବି ଉପସ୍ଥିତ ଥିଲେ।