ବାଲେଶ୍ବର: ଜୁଆ ଆଡ୍ଡାରେ ରେଡ୍ କରିବାକୁ ଯାଇଥିବା ବେଳେ ମହିଳା ଥାନା ଅଧିକାରୀଙ୍କୁ ନିର୍ଯାତନା। ମାଡ଼ ମାରିବା ସହ ଥାନା ଅଧିକାରିଙ୍କୁ ତାଲା ପକାଇଦେଲେ ଜୁଆଡି। ବାଲେଶ୍ବର ଜିଲ୍ଲା ଭୋଗରାଇର ତାଳସାରୀ ସାମୁଦ୍ରିକ ଥାନା ଅଞ୍ଚଳରେ ଘଟିଛି ଏଭଳି ଘଟଣା। ସୂଚନା ଅନୁସାରେ, ଭୋଗରାଇର ଉଦୟପୁର ଗାଁ ମଧ୍ଯ ଦେଇ ପାଟ୍ରୋଲିଂ କରୁଥିଲେ ଥାନା ଅଧିକାରୀ। ଉଦୟପୁର ଗାଁର ଜଣେ ବ୍ଯକ୍ତିଙ୍କ ଦୋକାନ ବନ୍ଦ କରିବାକୁ କହିବାରୁ ଅଚାନକ କିଛି ବ୍ୟକ୍ତି ତାଙ୍କୁ ଜବରଦସ୍ତ ଦୋକାନ ଘରେ ପୂରାଇ ଦେଇଥିଲେ । ଥାନାର ଗାଡି ଚାଳକ ଏହାକୁ ବିରୋଧ କରିବାରୁ ତାଙ୍କୁ ମାରି ଲହୁ ଲୁହାଣ କରିଥିଲେ ଜୁଆଡ୍ଡି। ଏପରିକି ଗାଡିରେ ଥିବା ପୋଲିସ କର୍ମଚାରୀଙ୍କୁ ମଧ୍ୟ ମାଡ ମରାଯାଇଥିବା ଅଭିଯୋଗ ହୋଇଛି। ଖବର ପାଇ ଭୋଗରାଇ ପୋଲିସ ଓ ଚନ୍ଦନେଶ୍ବର ଫାଣ୍ଡି ପୋଲିସ ପହଞ୍ଚି ଥାନା ଅଧିକାରିଣୀଙ୍କୁ ଉଦ୍ଧାର କରି ଘଟଣାର ତଦନ୍ତ ଜାରି ରଖିଛି। ଘଟଣାରେ ୧୧ ଜଣଙ୍କୁ ଉଠାଇ ନେଇଛି ପୋଲିସ।
ନିର୍ବାଚନରେ ବ୍ୟାପକ ହେରଫେର ହୋଇଥିବା ଅଭିଯୋଗ ଆଣିଲେ ଇମ୍ରାନ ଖାନ
ଇସଲାମାବାଦ: ପାକିସ୍ତାନ ସାଧାରଣ ନିର୍ବାଚନରେ ବ୍ଯାପକ ହେରଫେର ଅଭିଯୋଗ ଆଣିଲେ ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ତେହରିକ ଏ ଇନସାଫ ପାର୍ଟି ମୁଖ୍ୟ ଇମ୍ରାନ ଖାନ। ଅନିୟମିତତାର ବିଚାର ବିଭାଗୀୟ ତଦନ୍ତ ଦାବି କରିଛନ୍ତି ଇମ୍ରାନ ଖାନ। ପାକିସ୍ତାନରେ ୧୮୦ରୁ ଅଧିକ ଆସନ ଜିତିବା ଦାବି କରିଛନ୍ତି ଇମ୍ରାନ। ତେବେ ହାରିବାକୁ ଥିବା ପ୍ରାର୍ଥୀ ହେରଫେର କରି ନିର୍ବାଚନ ଫଳାଫଳ ବଦଳାଇଛନ୍ତି।
ନିକଟରେ ରାୱଲପିଣ୍ଡି କମିଶନର ଲିଆକତ ଅଲୀ ଏହି ଅଭିଯୋଗ ଆଣି ନିଜ ପଦରୁ ଇସ୍ତଫା ଦେଇଛନ୍ତି। ଦେଶର ସର୍ବୋଚ୍ଚ ପଦରେ ଥିବା ବିଚାରପତି ମଧ୍ଯ ଏହି ହେରଫେରରେ ସାମିଲ ଥିବା ସେ ଅଭିଯୋଗ କରିଛନ୍ତି। ରାୱଲପିଣ୍ଡିରେ ୧୩ ପ୍ରାର୍ଥୀଙ୍କୁ ହେରଫେର କରି ବିଜୟ ଘୋଷଣା କରାଯାଇଥିବା ସେ କହିଥିଲେ। ଲିଆକତ ଅଲୀଙ୍କ ଇସ୍ତଫା ପରେ ଅନିୟମିତତା ବିବାଦ ଜୋର ଧରିଛି। ବିବାଦକୁ ନେଇ ଦେଶବ୍ଯାପୀ ଆନ୍ଦୋଳନ ଆରମ୍ଭ କରଛନ୍ତି ପାକିସ୍ତାନ ତେହରିକ ଏ ଇନସାଫ ପାର୍ଟିର ନେତା ଓ ସମର୍ଥକ। ନିର୍ବାଚନ ଅନିୟମିତତାରେ ପାକିସ୍ତାନର ନିର୍ବାଚନ କମିଶନ ଏବଂ ସୁପ୍ରିମକୋର୍ଟ ପ୍ରଧାନ ବିଚାରପତି ମଧ୍ଯ ସାମିଲ ଥିବା ଅଭିଯୋଗ କରିଛନ୍ତି ଇମ୍ରାନ ଖାନ। ପାକିସ୍ତାନ ମୁଖ୍ୟ ନିର୍ବାଚନ କମିଶନର ଏବଂ ପ୍ରଧାନ ବିଚାରପତିଙ୍କ ଇସ୍ତଫା ଦାବି କରିଛନ୍ତି ଇମ୍ରାନ ଖାନ। ସେପଟେ ଲିଆକତଙ୍କ ଅଭିଯୋଗକୁ ନେଇ ତଦନ୍ତ କମିଟି ଗଠନ କରିଛି ପାକିସ୍ତାନ ନିର୍ବାଚନ କମିଶନ। ପାକିସ୍ତାନରେ ସାଧାରଣ ନିର୍ବାଚନ ପରେ ସରକାର ଗଠନ ନେଇ ଅଚଳାବସ୍ଥା ଜାରି ରହିଛି।
ବରଯାତ୍ରୀ ଗାଡ଼ି ଓଲଟି ୨ ମୃତ
ଜୟପୁର: ବରଯାତ୍ରୀ ଗାଡ଼ି ଓଲଟି ୨ ଜଣଙ୍କ ମୃତ୍ୟୁ ହୋଇଥିବାବେଳେ ୧୨ଜଣ ଗୁରୁତର ହୋଇଛନ୍ତି । ଜୟପୁର ବୋରିଗୁମ୍ମା ନିକଟ କାଳିଆଗୁଡ଼ା ନିକଟରେ ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ବୋରିଗୁମ୍ମା ଥାନା ୨୬ନମ୍ବର ଜାତୀୟ ରାଜପଥ ଚାଲାନ ଗୁଡା ଏବଂ କମରା ମଝିରେ ଥିବା ଭାରତ ମାଳା ଓଭର ବ୍ରିଜକୁ ବାରଯାତ୍ରୀ ଗାଡିଟି ଧକ୍ସା ଦେଇ ଓଲଟି ପଡିଥିଲା।ଖବର ପାଇ ବୋରିଗୁମ୍ମା ପୋଲିସ ଏବଂ ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ଗାଡି ଭିତରୁ ସମସ୍ତ ଯାତ୍ରୀଙ୍କୁ ଉଦ୍ଧାର କରିଛନ୍ତି।ଗାଡିରେ ଥିବା ବର ସମେତ ୧୨ଜଣକୁ ଆମ୍ବୁଲାନ୍ସ ଯୋଗେ ବୋରିଗୁମ୍ମା ମେଡ଼ିକାଲ ରେ ଭର୍ତ୍ତି କରାଯାଇଥିବା ଜଣା ପଡ଼ିଛି। ବୋରିଗୁମ୍ମା ପୋଲିସ ଘଟଣାର ତଦନ୍ତ ଆରମ୍ଭ କରିଛି। ବରଯାତ୍ରୀ ଟାଟା ସଵାରୀ ଗାଡିଟି ନାରାୟଣ ପାଟଣାଠାରୁ ଉମରକୋଟ ଯାଉଥିବା ବେଳେ ଏହି ଦୁର୍ଘଟଣା ଘଟିଛି।
ଆଶାୟୀଙ୍କ ଲମ୍ବା ତାଲିକା, ସବୁ ଦଳରେ ଟିକେଟ୍ ଚିନ୍ତା
ଭୁବନେଶ୍ବର: ନିର୍ବାଚନ ପାଇଁ ଉଷ୍ମ ହେଲାଣି ରାଜ୍ୟ ରାଜନୀତି । ନିର୍ବାଚନ ଆୟୋଗଙ୍କ ସମୀକ୍ଷା ପରେ ସବୁ ଦଳରେ ଜୋରଦାର ପ୍ରସ୍ତୁତି ଆରମ୍ଭ ହୋଇଛି । ଚାଲିଛି ଟିକେଟ କସରତ୍ । ବିଜେଡି ପୁଣି କ୍ଷମତାକୁ ଆସିବ ବୋଲି ବିଭିନ୍ନ ଜାତୀୟ ଗଣମାଧ୍ଯମର ସର୍ଭେ ରିପୋର୍ଟ ଆସିବା ପରେ ବିରୋଧୀ ଚିନ୍ତାରେ ପଡ଼ିଛନ୍ତି । ଆଗୁଆ ଟିକେଟ ବଣ୍ଟନ ପାଇଁ ପ୍ରସ୍ତୁତି କରୁଥିବା କଂଗ୍ରେସକୁ ଦଳଡି଼ିଆଁ ଭୟ ଘାରିଛି। ବିଜେପିରେ ଲାଗିରହିଛି ପ୍ରାର୍ଥୀ ଦ୍ଵନ୍ଦ୍ବ । ଯାହାକୁ ନେଇ ରାଜ୍ୟ ରାଜନୀତି ସରଗରମ ହୋଇଛି ।
ନିର୍ବାଚନ ପାଇଁ ପ୍ରସ୍ତୁତି । ସବୁ ଦଳରେ ଟିକେଟ୍ ଚିନ୍ତା । ଆଶାୟୀଙ୍କ ଲମ୍ବା ତାଲିକା । ହାତକୁ ଭୟ ଦଳଡ଼ିଆଁ। ବିଜେପିରେ ପ୍ରାର୍ଥୀ ଦ୍ଵନ୍ଦ୍ବ। ବିଜେଡିରେ ନାହିଁ କୌଣସି ସମସ୍ଯା। ନିର୍ବାଚନ ପାଇଁ ଖୁବଶୀଘ୍ର ତାରିଖ ଘୋଷଣା ହେବ । ରାଜ୍ୟର ତିନି ପ୍ରମୁଖ ରାଜନୈତିକ ଦଳ ଜୋରଦାର ପ୍ରସ୍ତୁତି କରୁଛନ୍ତି । ୨୦୨୪ ନିର୍ବାଚନରେ ଓଡ଼ିଶାରେ ପୁଣି ନବୀନ ଓ ପୁଣି ବିଜେଡି ବୋଲି ବିଭିନ୍ନ ଜାତୀୟ ଗଣମାଧ୍ୟମର ସର୍ଭେ ରିପୋର୍ଟ ଆସିଛି। ଏହାପରେ ସବୁ ରାଜନୈତିକ ଦଳଙ୍କୁ ଘାରିଛି ପ୍ରlର୍ଥୀ ଚୟନ ଚିନ୍ତା । ବିଜେଡି କହିଛି, ଦଳ ସବୁବେଳେ ନିର୍ବାଚନ ପାଇଁ ପ୍ରସ୍ତୁତ ଅଛି। ଟିକେଟ ବଣ୍ଟନ ଚିନ୍ତା ଅପେକ୍ଷା, ଅଧିକରୁ ଅଧିକ ଜନସେବା ଉପରେ ନେତା ଓ କର୍ମୀ ଫୋକସ ଦେଇଛନ୍ତି । ରାଜ୍ୟ ସରକାରଙ୍କ ବିଭିନ୍ନ ଜନକଲ୍ୟାଣ ଯୋଜନାର ସୁଫଳ ସମସ୍ତଙ୍କ ପାଖରେ ପହଞ୍ଚାଇବା ଉପରେ ବିଜେଡି ଗୁରୁତ୍ବ ଦେଇଛି ।
ସେପଟେ କଂଗ୍ରେସରୁ ଜଣକ ପରେ ଜଣେ ନେତା ଦଳ ଛାଡୁଛନ୍ତି । ଏହାରି ଭିତରେ ଆଜି ଜିଲ୍ଲା ସଭାପତିମାନଙ୍କ ସହ ଟିକେଟ୍ କସରତ କରିଛି କଂଗ୍ରେସ । ଆସନ୍ତାକାଲି ନିର୍ବାଚନ କମିଟି ବୈଠକ ବସିବ । ସେପଟେ ବିଜେପିରେ ପ୍ରlର୍ଥୀ ଦ୍ଵନ୍ଦ୍ବ ଲାଗି ରହିଛି । ରାଜନୈତିକ ସମୀକ୍ଷକଙ୍କ ଯୁକ୍ତି ହେଉଛି, ବିଜେଡି ଭଲ ସ୍ଥିତିରେ ଅଛି । ନିର୍ବାଚନ ପ୍ରସ୍ତୁତିରେ ବହୁ ଆଗରେ ଅଛି ବିଜେଡି ।
ଦରଦାମ ବୃଦ୍ଧି ଯୋଗୁ କମିଲାଣି ଲୋକଙ୍କ କ୍ରୟ ଶକ୍ତି
ଭୁବନେଶ୍ବର: ଦରଦାମ ବୃଦ୍ଧି ଯୋଗୁ କମିଲାଣି ଲୋକଙ୍କ କ୍ରୟ ଶକ୍ତି। ଚଳିତବର୍ଷ ଏହାର ପ୍ରଭାବ ସିଧାସଳଖ ବଜାର ଉପରେ ପଡ଼ିବାକୁ ଯାଉଛି । ପ୍ରଭାବିତ ହେବାକୁ ଯାଉଛି FMCG ଉତ୍ପାଦନର ବିକ୍ରିବଟା । ଖାଦ୍ୟ ଦର ମହଙ୍ଗା ନେଇ ଖୋଦ ରିଜର୍ଭ ବ୍ୟାଙ୍କ ଉଦବେଗ ପ୍ରକାଶ କରୁଥିଲେ ବି ବେଫିକର କେନ୍ଦ୍ର ସରକାର। ଏପରି ଧାରା ଜାରି ରହିଲେ ଦେଶର ଅଭିବୃଦ୍ଧି କମିବା ସହ ବେକାରୀ ଆହୁରି ବଢିବ ବୋଲି ଆଶଙ୍କା ପ୍ରକାଶ ପାଇଛି।
ବିଗିଡ଼ିଲାଣି ବଜାର ସ୍ଥିତି । ମହଙ୍ଗା ମାଡ଼ରେ ଘାଇଲା ଲୋକେ । କମିଲାଣି ଲୋକଙ୍କ କ୍ରୟ ଶକ୍ତି। ଅନ୍ତରାଷ୍ଟ୍ରୀୟ ବଜାର ସମୀକ୍ଷାର ଏ ରିପୋର୍ଟ। ଚଳିତବର୍ଷ ତେଲ, ସାବୁନ, ଖାଦ୍ୟ ସାମଗ୍ରୀ ପରି ଏଫ୍ଏମ୍ସିଜି ଉତ୍ପାଦ କିଣିବାକୁ ଲୋକଙ୍କ ପାଖରେ ଅର୍ଥର ଅଭାବ ଘଟିବ। ଗତବର୍ଷ ଏଫଏମ୍ସିଜି ଉତ୍ପାଦନ ବିକ୍ରିବଟା ମୋଟ କାରବାରର ୯.୩ ପ୍ରତିଶତ ଥିଲା । ଏଥରକ ୪.୫ ପ୍ରତିଶତରୁ ୬.୫ ପ୍ରତିଶତରେ ସୀମିତ ରହିବ। ଦେଶରେ ଖାଦ୍ୟ ସାମଗ୍ରୀ ଦର ମହଙ୍ଗା ରହୁଥିବା ସହ ଦରଦାମ କମୁନି ବୋଲି ରିଜର୍ଭ ବ୍ୟାଙ୍କ ଏକାଧିକ ଥର କହିଲାଣି। ହେଲେ ସବୁ ଠିକ୍ ଅଛି ବୋଲି କେନ୍ଦ୍ର ଡିଣ୍ଡିମ ପିଟୁଛି । ନିଯୁକ୍ତି ସଂକୁଚିତ ହେଉଥିବାରୁ ବେକାରୀ ବଢୁଛି। ବଜାରଦର ଯେଉଁ ହାରରେ ବଢ଼ୁଛି ଲୋକଙ୍କ ରୋଜଗାର ସେଇ ହାରରେ ବଢ଼ୁନାହିଁ । ଚାକିରିଆଙ୍କ ଦରମା ବି ମୁଦ୍ରାସ୍ଫୀତି ମୁକାବିଲା କଲାଭଳି ବଢୁନାହିଁ । ଏଫ୍ଏମ୍ସିଜି ଉତ୍ପାଦର ବିକ୍ରି ହ୍ରାସ ଘଟିଲେ ବଡ଼ ବଡ଼ କର୍ପୋରେଟ୍ ଗୋଦାମରେ ଆବଶ୍ୟକ ତୁଳନାରେ ଉତ୍ପାଦ ବିକ୍ରି ନ ହୋଇ ପଡ଼ି ରହିବ । ଉତ୍ପାଦନ ବାଧାପ୍ରାପ୍ତ ସହ କୃଷି ଉତ୍ପାଦ କଞ୍ଚାମାଲ ବିକ୍ରି ହେବନି । ଯାହା ଫଳରେ ଚାଷୀ ବି କ୍ଷତି ସହିବେ।
ଦେଶର ସ୍ଥୁଳ ଅର୍ଥନୀତି କେବେଠୁ ବିଗିଡିଲାଣି। ଅଭିବୃଦ୍ଧି ହାର ଧାର୍ଯ୍ୟ ଲକ୍ଷ୍ୟ ପୂରା କରିପାରୁନି। ଅତ୍ୟାବଶ୍ୟକ ସାମଗ୍ରୀ ଉପରେ ଜିଏସ୍ଟି ଯୋଗୁ ଲୋକମାନେ ଅଧିକ ଟିକସ ଗଣୁଛନ୍ତି । ପେଟ୍ରୋଲ ଓ ଡିଜେଲକୁ ଜିଏସ୍ଟି ଅନ୍ତର୍ଭୁକ୍ତ କରୁନାହାନ୍ତି କେନ୍ଦ୍ର ସରକାର। ଅଶୋଧିତ ତୈଳ ଦର କମ ଯୋଗୁ ଲକ୍ଷାଧିକ କୋଟି ଟଙ୍କା ତୈଳ ବିପଣନ କମ୍ପାନୀ ଲାଭ କରିଆସୁଛନ୍ତି। ହେଲେ ପେଟ୍ରୋଲ ଓ ଡିଜେଲ ଦର ହ୍ରାସ କରି ଲୋକଙ୍କୁ ଏହାର ଲାଭ ଦେଉନାହାନ୍ତି କେନ୍ଦ୍ର ସରକାରଙ୍କ ସହ ତୈଳ କମ୍ପାନୀ। ରୋଜଗାର ସଂକୁଚିତ ହେଉଥିବାରୁ ଲୋକଙ୍କ କ୍ରୟ ଶକ୍ତି କମି କମି ଯାଉଛି । ଏହା ଦେଶର ଆର୍ଥିକ ସ୍ଥିତିକୁ ଆହୁରି ବିଗାଡିବା ଆକଳନ କରିଛନ୍ତି ଅର୍ଥନୀତି ସମୀକ୍ଷକ।
ଏଫ୍ଏମ୍ସିଜି ଉତ୍ପାଦର ବିକ୍ରିବଟା କେବଳ ସହରାଞ୍ଚଳରେ ପ୍ରଭାବିତ ହୋଇନି । ୨୦୨୩-୨୪ ଆର୍ଥିକ ବର୍ଷର ତୃତୀୟ ତ୍ରୟମାସିକରେ ମହଙ୍ଗା ଯୋଗୁ ଗ୍ରାମାଞ୍ଚଳରେ ବି ଲୋକେ ଅତ୍ୟାବଶ୍ୟକ ସାମଗ୍ରୀ କିଣି ପାରିନାହାନ୍ତି। ବଜାରର ଏପରି ସ୍ଥିତି ଏବେ ସମସ୍ତଙ୍କ ପାଇଁ ପାଲଟିଛି ଚିନ୍ତାର କାରଣ ।
ଯାଜପୁର ରୋଡ୍ ଉପ-କାରାଗାରରୁ ଜଣେ ବିଚାରାଧୀନ କଏଦୀ ଫେରାର
ଯାଜପୁର: ଯାଜପୁର ରୋଡ଼ ଉପ-କାରାଗାରରୁ ଜଣେ ବିଚାରାଧୀନ କଏଦୀ ଫେରାର । ମେଡ଼ିକାଲକୁ ସ୍ବାସ୍ଥ୍ୟ ପରୀକ୍ଷା କରିବାକୁ ଯାଇ ଅଧା ରାସ୍ତାରୁ ଫେରାର ହୋଇଯାଇଥିବା କୋରାଇ ଥାନାରେ ଅଭିଯୋଗ କରିଛନ୍ତି ଜେଲ୍ କତୃପକ୍ଷ। ଫେରାର କଏଦୀଙ୍କ ନାମ ରାଣା ପ୍ରତାପ ସିଂ। ତାଙ୍କ ଘର ପାଣିକୋଇଲି ଥାନା ଜହ୍ନା ଗ୍ରାମରେ । ସେ ଗତ କିଛିଦିନ ତଳେ ଏକ ଦୁଷ୍କର୍ମ ଓ ଯୁବତୀଙ୍କ ନଗ୍ନ ଫଟୋ ଭାଇରାଲ ମାମଲାରେ ପାଣିକୋଇଲି ପୋଲିସ ଦ୍ୱାରା ଗିରଫ ହୋଇ କୋର୍ଟ ଚାଲାଣ ହୋଇଥିଲେ । ତେବେ ସେ ଅସୁସ୍ଥ ହେବାରୁ ତାଙ୍କ ସ୍ବାସ୍ଥ୍ୟ ପରୀକ୍ଷା ପାଇଁ ଯାଜପୁର ରୋଡ଼ ଉପ-କାରାଗାରରୁ ଯାଜପୁର ରୋଡ଼ ମେଡ଼ିକାଲକୁ ନିଆଯାଇଥିଲା । ସେଠାରେ ତାଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇ ଫେରିବା ସମୟରେ ମେଡିସିନ କିଣିବା ବେଳେ ସେଠାରୁ ସେ ଫେରାର ହୋଇଯାଇଛନ୍ତି । କୋରାଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ଘଟଣାରେ ସମ୍ପୃକ୍ତି ଥିବା ଅଭିଯୋଗରେ ଜଣକୁ ଅଟକ ରଖିଛି ପୋଲିସ ।
ଭୁବନେଶ୍ବର ସାପିଗେନ ବାୟୋଲୋଜିକ୍ସ ଭାକ୍ସିନ ପ୍ଲାଣ୍ଟ ପରିଦର୍ଶନ କଲେ 5T ଅଧ୍ଯକ୍ଷ
ନନ୍ଦିଘୋଷ ବ୍ୟୁରୋ: ଓଡ଼ିଶାରୁ ସାରା ବିଶ୍ବକୁ ଯୋଗାଣ ହେବ ଭ୍ଯାକସିନ୍ । ବିଶ୍ୱ ଜନସଂଖ୍ୟାର ୧୦ ଗୁଣ ଟିକା ଓଡ଼ିଶାରୁ ପ୍ରସ୍ତୁତ ହେବ । ଭୁବନେଶ୍ବର ଅନ୍ଧାରୁଆ ବାୟୋଟେକ୍ ପାର୍କସ୍ଥିତ ସାପିଜେନ୍ ବାୟୋଲଜିକ୍ସ ଟିକା ଉତ୍ପାଦନ ପ୍ଲାଣ୍ଟ ପରିଦର୍ଶନ କରିଛନ୍ତି 5T ଅଧ୍ଯକ୍ଷ କାର୍ତ୍ତିକ ପାଣ୍ଡିଆନ । ଏହି ପ୍ଲାଣ୍ଟର ଦୈନିକ ୨ ଦଶମିକ ୪ କୋଟି ବିଭିନ୍ନ ପ୍ରକାରର ଟିକା ଉତ୍ପାଦନକ୍ଷମତା ରହିଛି । ପ୍ଲାଣ୍ଟ କାର୍ଯ୍ୟକ୍ଷମ ହେବାର ଅନ୍ତିମ ପର୍ଯ୍ୟାୟରେ ପହଞ୍ଚିଛି । ଏହି ଟିକା ଉତ୍ପାଦନ ପ୍ଲାଣ୍ଟ ଦେଶର ସର୍ବବୃହତ୍ ଟିକା ଉତ୍ପାଦନ ପ୍ଲାଣ୍ଟ ଭାବେ ପରିଗଣିତ ହେବ । 5T ଅଧ୍ଯକ୍ଷ ପ୍ଲାଣ୍ଟର ସମସ୍ତ ୟୁନିଟ୍ ପରିଦର୍ଶନ କରିବା ସହିତ ମ୍ୟାନେଜ୍ମେଣ୍ଟ ଏବଂ କର୍ମଚାରୀମାନଙ୍କ ସହ ଆଲୋଚନା କରିଥିଲେ । ଆଗାମୀ ୩ ମାସ ମଧ୍ୟରେ କାର୍ଯ୍ୟକ୍ଷମ କରିବା ପାଇଁ ସଂପୃକ୍ତ ସରକାରୀ ବିଭାଗ ଗୁଡ଼ିକ ସମସ୍ତ ପ୍ରକାର ସହଯୋଗ ଯୋଗାଇବା ପାଇଁ ସେ ନିର୍ଦ୍ଦେଶ ଦେଇଥିଲେ ।
ଭାରତ ବାୟୋଟେକ୍ ପାର୍କର ଡ. କ୍ରୀଷ୍ଣା ଏଲାଙ୍କ ତତ୍ତ୍ୱାବଧାନରେ ଏହି ପ୍ଲାଣ୍ଟ ୧୫୦୦ କୋଟି ଟଙ୍କା ପୁଂଜିନିବେଶରେ ସ୍ଥାପନ କରାଯାଉଛି । ଏହି ଅତ୍ୟାଧୁନିକ ପ୍ଲାଣ୍ଟ ଜରିଆରେ ପ୍ରାୟ ୧୫୦୦ ପ୍ରତ୍ୟକ୍ଷ ନିଯୁକ୍ତି ସୃଷ୍ଟି ହେବ ଏବଂ ଏଥିରେ ଓଡ଼ିଶା ଲୋକଙ୍କୁ ସର୍ବାଧିକ ନିଯୁକ୍ତି ମିଳିବ । ଏହି ପ୍ଲାଣ୍ଟ କଲେରା, ମାଲେରିଆ ପରି ରୋଗ ପାଇଁ ୧୫ରୁ ଅଧିକ ପ୍ରକାର ଟିକା ପ୍ରସ୍ତୁତ କରିବା ପାଇଁ ଲକ୍ଷ୍ୟ ରଖିଛି । ଭୁବନେଶ୍ୱରରୁ ପ୍ରସ୍ତୁତ ଏହି ଟିକାଗୁଡ଼ିକ ବିଶ୍ୱର ବିଭିନ୍ନ ସ୍ଥାନକୁ ରପ୍ତାନି କରାଯିବ ଏବଂ ଏହା ଦ୍ୱାରା ବାୟୋଟେକନୋଲୋଜି କ୍ଷେତ୍ରରେ ଓଡ଼ିଶାର ସୁନାମ ବୃଦ୍ଧି ହେବ । ଏହି ପ୍ରକଳ୍ପଟି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତି ଜୀବନ ମୂଲ୍ୟବାନ ନୀତି ଆଧାରରେ ସ୍ଥାପନ ହେଉଛି ।
ଏଠାରୁ ପ୍ରସ୍ତୁତ ଟିକା ସମଗ୍ର ବିଶ୍ୱରେ ଲକ୍ଷ ଲକ୍ଷ ଲୋକଙ୍କ ଜୀବନକୁ ସୁରକ୍ଷା ଯୋଗାଇଦେବ । ସରକାରୀ ସ୍ତରରେ ସମସ୍ତ ସହଯୋଗ ଯୋଗାଇଦେବାର ପ୍ରତିଶୃତି ଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିକଟରେ ବାୟୋଟେକ୍ନୋଲୋଜି ନୀତି କ୍ୟାବିନେଟ୍ରେ ଅନୁମୋଦନ କରିଛନ୍ତି ବୋଲି ସୂଚନା ଦେଇଥିଲେ ଫାଇଭ-ଟି ଅଧ୍ଯକ୍ଷ । ଏଭଳି ଏକ ବୃହତ୍ ଟିକା ପ୍ରସ୍ତୁତକାରୀ ପ୍ଲାଣ୍ଟ ସ୍ଥାପନ ହେବା ଦ୍ୱାରା ଅନ୍ୟାନ୍ୟ ବାୟୋଟେକ୍ନୋଲୋଜି ସଂପର୍କିତ ଉତ୍ପାଦ ପ୍ରସ୍ତୁତକାରୀ କମ୍ପାନି ଓଡ଼ିଶାର ବାୟୋଟେକ୍ ପାର୍କ ପ୍ରତି ଆକୃଷ୍ଟ ହେବେ ଏବଂ ଏହା ଦ୍ୱାରା ଓଡ଼ିଶାରେ ପୁଂଜିନିବେଶର ସମ୍ଭାବନା ବୃଦ୍ଧି ସହ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ଫାଇଭ-ଟି ଅଧ୍ଯକ୍ଷ ଦୃଢ଼ୋକ୍ତି ପ୍ରକାଶ କରିଛନ୍ତି ।
ବ୍ରିସବେନ୍ରେ ନୂତନ ମନ୍ଦିର ନିର୍ମାଣ ନିମନ୍ତେ ଗୁରୁଜୀଙ୍କ ଦ୍ୱାରା ଭୂମିମିୂଜା
ନନ୍ଦିଘୋଷ ବ୍ୟୁରୋ : ବିଶ୍ୱ ସାଇ ଆନ୍ଦୋଳନର ମହାନ୍ କର୍ଣ୍ଣଧାର ଗୁରୁଜୀ ଡ. ଚନ୍ଦ୍ରଭାନୁ ଶତପଥୀଙ୍କ କରକମଳରେ ଅଷ୍ଟ୍ରେଲିଆରବ୍ରିସବେନ ସହରଠାରେ ଶିରିଡ଼ି ସାଇବାବାଙ୍କ ନୂତନ ମନ୍ଦିର ନିର୍ମାଣ ନିମନ୍ତେ ଭୂମିପୂଜା ଉତ୍ସବ ସମ୍ପନ୍ନ ହୋଇଯାଇଛି । ବ୍ରିସବେନ ସାଇବାବା ସଂସ୍ଥାନର ଟ୍ରଷ୍ଟିମାନେ ଗୁରୁଜୀଙ୍କୁ ପାରମ୍ପରିକ ରୀତିରେ ସ୍ୱାଗତ କରି ପାଛୋଟି ନେବାପରେ ଗୁରୁଜୀ ସଂସ୍ଥାନ ପକ୍ଷରୁ ଅଧିକୃତ ଜମିକୁ ବୁଲି ଦେଖିଥିଲେ ଏବଂ ମନ୍ଦିର ନିର୍ମାଣ ଆଦି ସମ୍ପକରେ ମାର୍ଗଦର୍ଶନ କରିଥିଲେ । ଏହାପରେ ଗୁରୁଜୀ ଗୋଟିଏ ନିମ୍ବ ଗଛ ଲଗାଇଥିଲେ । ଏହି ଅବସରରେ ହୋମଯଜ୍ଞାଦି ଓ ଭଜନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏଥିରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡର ପ୍ରାୟ ଅଢ଼େଇ ଶହରୁ ଊର୍ଦ୍ଧ୍ୱ ଭକ୍ତ ଯୋଗଦେଇଥିଲେ । ଭାରତରୁ ମଧ୍ୟ କେତେକ ଭକ୍ତ ସାମିଲ ହୋଇଥିଲେ ।
ଉପସ୍ଥିତ ଭକ୍ତମାନଙ୍କୁ ଉଦ୍ବୋଧନ ଦେଇ ଗୁରୁଜୀ କହିଲେ ଯେ ଗୁରୁ ପୂଜା ଭାବ ପୂଜା ଅଟେ । କୌଣସି କାମନା ନରଖି ସେବା କରିବା ହେଉଛି ଶ୍ରେଷ୍ଠ କର୍ମ । ନିଜର ଦୃଷ୍ଟିକୋଣକୁ ଅନ୍ୟଉପରେ ଲଦିଦେବା ଠିକ୍ ନୁହେଁ । ପରିବାରର ମୁରବୀମାନେ ପିଲାମାନଙ୍କର ଦାୟିତ୍ୱ ନେଇ ସେମାନଙ୍କୁ ଉଚିତ ଶିକ୍ଷା ଦେବା ଆବଶ୍ୟକ । ସରଳତା, ବିନ୍ରମତା ଓ ସାଧୁତା ଆମର ଭୂଷଣ ହେଉ । ଗୁରୁଜୀ ପୁଣି କହିଲେ ଯେ ଶିରିଡ଼ି ସାଇବାବାଙ୍କ ଚମତ୍କାରିତା ଯୋଗୁ ନୁହେଁ, ତାଙ୍କର ଅପାର ଦୟା ଓ ମାନବିକତା ଭଳି ଗୁଣରେ ସେ ପ୍ରଭାବିତ ହୋଇଥିଲେ । ପରେ ସଂସ୍ଥାନର ଟ୍ରଷ୍ଟିମାନଙ୍କ ସହ ଏକ ବୈଠକରେ ଗୁରୁଜୀ ସେମାନଙ୍କର ବିଭିନ୍ନ ଶଙ୍କା ଓ ସନ୍ଦେହର ମୋଚନ କରି ସେମାନଙ୍କୁ ଆବଶ୍ୟକ ମାର୍ଗଦର୍ଶନ କରିଥିଲେ ଓ ଆଦେଶ ଦେଇଥିଲେ ।
ମହାଯୋଗୀଙ୍କ ମହାନ ମୂର୍ତ୍ତି
ଭଦ୍ରକ: ଓଡ଼ିଶାରେ ପ୍ରଥମ ଥର ପାଇଁ ୩୫ ଫୁଟ ଫାଇବରରେ ନିର୍ମିତ ଶିବଙ୍କ ଧ୍ୟାନମଗ୍ନ ମୂର୍ତ୍ତି ନିର୍ମାଣ ଶେଷ ପର୍ଯ୍ୟାୟରେ । ଜାଗର ଯାତ୍ରା ଅବସରରେ ଭଦ୍ରକର ଆରଡ଼ି ପୀଠରେ ପ୍ରତିଷ୍ଠା କରାଯିବ ମହାଦେବଙ୍କ ଏହି ବିଶାଳ ମୂର୍ତ୍ତି । ଏହାକୁ ନିର୍ମାଣ କରୁଛନ୍ତି କଟକ କାଠଗଡା ସାହିର ବିଶିଷ୍ଟ ଭାସ୍କର୍ଯ୍ୟ ଶିଳ୍ପୀ ଲକ୍ଷ୍ମୀଧର ରଣା ।
ମହାଯୋଗୀଙ୍କ ମହାନ ମୂର୍ତ୍ତି । ଧ୍ଯାନମଗ୍ନ ମହାଦେବ । କଟକ କାଠଗଡ଼ା ସାହିରେ ନିର୍ମାଣ ହେଉଛି ଶିବଙ୍କ ଏହି ବିଶାଳ ମୂର୍ତ୍ତି । ଯାହାର ଉଚ୍ଚତା ରହିଛି ୩୫ ଫୁଟ । ଜାଗର ଯାତ୍ରା ଅବସରରେ ଏହି ବିଶାଳ ଫାଇବର ମୂର୍ତ୍ତି ଆରଡି ମନ୍ଦିରରେ ପ୍ରତିଷ୍ଠା କରାଯିବ । ଓଡ଼ିଶାରେ ପ୍ରଥମ ଥର ପାଇଁ ଏତେ ବଡ଼ ବିଶାଳ ମୂର୍ତ୍ତି ନିର୍ମାଣ କରୁଛନ୍ତି କଟକ କାଠଗଡା ସାହିର ବିଶିଷ୍ଟ ଭାସ୍କର୍ଯ୍ୟଶିଳ୍ପୀ ଲକ୍ଷ୍ମୀଧର ମହାରଣା । ୫ ମାସ ହେଲା ୫୦ ରୁ ଉର୍ଦ୍ଧ୍ବ କାରିଗରଙ୍କୁ ନେଇ ନିର୍ମାଣ କରୁଛନ୍ତି ମୂର୍ତ୍ତି । ମୂର୍ତ୍ତି ସହ ତ୍ରିଶୂଳ, ଚନ୍ଦ୍ର, ବାଘ ଛାଲ, ଅର୍ଦ୍ଧ ଚନ୍ଦ୍ର, ରୁଦ୍ରାକ୍ଷ, ମସ୍ତକରେ ଦେବୀ ଗଙ୍ଗାଙ୍କ କାର୍ଯ୍ୟ ସମ୍ପନ୍ନ ହୋଇଛି। ୯୦ପ୍ରତିଶତ ପ୍ରତିଶତ କାମ ସରିଥିବାବେଳେ ଡାଇସ୍ ଖୋଲା ଯାଇ ଆରଡ଼ିକୁ ନେବା ପାଇଁ ଉଦ୍ଯମ ଆରମ୍ଭ ହୋଇଛି ।
ଏବେ ସାରା ରାଜ୍ୟରେ 5T ଅଧୀନରେରେ ବିଭିନ୍ନ ମନ୍ଦିରର ରୂପାନ୍ତରଣ କାମ ଜାରି ରହିଛି । ଆରଡ଼ି ପୀଠରେ ରୂପାନ୍ତରଣରେ ସ୍ଥାନ ପାଇବ ଏହି ମୂର୍ତ୍ତି । ଭୁବନେଶ୍ୱର ର ଏକ ସଂସ୍ଥା ଏହାର ଦାୟିତ୍ବ ନେଇଛି । FRPରେ ତିଆରି ଫାଇବର, ହାଡନର, କୋବଲଟ, ମ୍ୟାଟ, ରିଜିନ, ପିଗମେଣ୍ଟ, ମାର୍ବଲ ଡଷ୍ଟ ଆଦିରେ ତିଆରି ହୋଇଛି ମୂର୍ତ୍ତି । ଆଗାମୀ ୪୦ବର୍ଷ ପର୍ଯ୍ୟନ୍ତ ପବନ, ବାତ୍ୟା, ବର୍ଷାରେ ଏହାର କୌଣସି କ୍ଷତି ହେବନାହିଁ । ଏକ ବିଶାଳ ଲୁହା ଷ୍ଟ୍ରକଚରରେ ଏହା ସୁରକ୍ଷିତ ଭାବେ ରହିବ । ମୂର୍ତି ଯେଉଁ ସ୍ଥାନରେ ସ୍ଥାପନ କରାଯିବ ତାର ଚତୁପାର୍ଶ୍ବକୁ ମଧ୍ୟ ସୌନ୍ଦର୍ଯ୍ୟ କରଣ କରାଯିବ ।
ବଢିଲା ଜନଜାତି ଛାତ୍ରୀ ନିବାସ ମାଟ୍ରନ ମାନଙ୍କ ପାରିଶ୍ରମିକ
ଭୁବନେଶ୍ବର: ବଢିଲା ଜନଜାତି ଛାତ୍ରୀ ନିବାସ ମାଟ୍ରନମାନଙ୍କ ପାରିଶ୍ରମିକ । ପାରିଶ୍ରମିକକୁ ୧୫ ହଜାର ଟଙ୍କାକୁ ବୃଦ୍ଧି କଲେ ରାଜ୍ଯ ସରକାର । ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ ସଂଖ୍ୟା ଲଘୁ ତଥା ପଛୁଆ ବର୍ଗ କଲ୍ୟାଣ ବିଭାଗ ଦ୍ଵାରା ପରିଚାଳିତ ଛାତ୍ରୀ ନିବାସ ଗୁଡ଼ିକରେ କର୍ଯ୍ୟରତ ମହିଳା ମାଟ୍ରନମାନଙ୍କର ମାସିକ ପାରିଶ୍ରମିକ ୧୦ ହଜାରରୁ ୧୫ ହଜାରକୁ ବୃଦ୍ଧି କରାଯାଇଛି । ଏତଦବ୍ୟତୀତ, ଯଦି କୌଣସି କାର୍ଯ୍ୟରତ ମହିଳା ମାଟ୍ରନଙ୍କ ମୃତ୍ୟୁ ହୁଏ ତେବେ ତାଙ୍କ ନିକଟତମ ସମ୍ପର୍କୀୟଙ୍କୁ ଏକକାଳୀନ ଦୁଇ ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ପ୍ରଦାନ କରାଯିବ । ସେହିପରି ୬୦ ବର୍ଷରେ କାର୍ଯ୍ୟ ନିବୃତ୍ତ ହେବା ସମୟରେ ସେମାନଙ୍କୁ ଏକ କାଳୀନ ଏକ ଲକ୍ଷ ଟଙ୍କା ସହାୟତା ରାଶି ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା । ଏଥି ପାଇଁ ରାଜ୍ୟସରକାର ସରକାରଙ୍କର ବାର୍ଷିକ ୧୫ କୋଟିରୁ ଅଧିକ ଟଙ୍କା ଖର୍ଚ୍ଚ କରିବେ।