ଭୁବନେଶ୍ବର: ୨୦୨୪ ନିର୍ବାଚନ ପାଇଁ ମାନସମନ୍ଥନ ଆରମ୍ଭ କରିଛି କଂଗ୍ରେସ । କଂଗ୍ରେସ ଭବନରେ ପିସିସି ସଭାପତିଙ୍କ ଅଧ୍ୟକ୍ଷତାରେ ବଡ଼ ବୈଠକ ଅନୁଷ୍ଠିତ ହୋଇଛି । ଚୂଡାନ୍ତ ପ୍ରାର୍ଥୀ ତାଲିକା ଓ ଜିଲ୍ଲା ସଭାପତିଙ୍କ ସହିତ ଜରୁରୀ କାଳୀନ ବୈଠକ କରାଯାଇଛି । ଯଦିଓ ଦଳ CECକୁ ସବୁ କଂଗ୍ରେସ ଆଶାୟୀ ପ୍ରାର୍ଥୀଙ୍କ ତାଲିକା ପଠାଇ ଦେଇଛି ତାପୂର୍ବରୁ ଯୋଗ୍ୟ ଓ ଜିତିବା ପ୍ରାର୍ଥୀଙ୍କ ଉପରେ ଚାଲିଛି ଆଲୋଚନା । ପିସିସି ସଭାପତି ଶରତ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା ଏହି ବୈଠକରେ ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ, ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ ଓ ପ୍ରଗମନ ଇନ ଚାର୍ଜ ପ୍ରବୀଣ ପାଠକ ମିଳିତ ଯୋଗଦେଇଥିଲେ । ଆଗକୁ ଦଳ କେଉଁଠି ପ୍ରାର୍ଥୀ ବଦଳାଇବ ଓ କେଉଁ ସ୍ଥାନରେ କଂଗ୍ରେସ ଅଛି ମଜବୁତ୍ ସେ ନେଇ ଆଲୋଚନା ହୋଇଛି ।
ଏନଡିଏ ମେଣ୍ଟରେ ଏମଏନଏସ୍ ମୁଖ୍ୟ ରାଜ ଠାକରେ ମିଶିବା ନେଇ ଚର୍ଚ୍ଚା
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ରରେ ବଡ଼ ହଲଚଲ। ପରିବାର ମଧ୍ଯରେ ହେବ ଲଢେଇ। ଏନଡିଏ ମେଣ୍ଟରେ ଏମଏନଏସ୍ ମୁଖ୍ୟ ରାଜ ଠାକରେ ମିଶିବା ନେଇ ଚର୍ଚ୍ଚା ଜୋର ଧରିଛି। ଦିଲ୍ଲୀରେ ଅମିତ ଶାହଙ୍କୁ ଭେଟିବାକୁ ପହଞ୍ଚିଛନ୍ତି ରାଜ ଠାକରେ। ସିଟ୍ ଭାଗବଣ୍ଟାକୁ ନେଇ ଆଲୋଚନା ହେବା ସମ୍ଭାବନା ରହିଛି। ତେବେ ଏନଡିଏରେ ମିଶିବା ନେଇ ବିଧିବଦ୍ଧ ଘୋଷଣା ବାକି ରହିଛି। MNS ସହ ବିଜେପିର ମେଣ୍ଟ ପରେ ସମୀକରଣକୁ ନେଇ ଆଲୋଚନା ଚାଲିଛି। ଦିନେରୁ ଦୁଇ ଦିନ ମଧ୍ୟରେ ସିନ୍ଧେ ପକ୍ଷ ଶିବସେନା ପ୍ରାର୍ଥୀ ତାଲିକା ଜାରି କରିପାରେ। ସେପଟେ ବିହାରରେ ମଧ୍ୟ ପରିବାର ରାଜନୀତି ଚର୍ଚ୍ଚା ଲାଗି ରହିଛି। ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଏଲଜେପି ନେତା ପଶୁପତି ପାରସ। ଆସନ ବଣ୍ଟନରେ ଅବହେଳା ନେଇ ଦଳ ଅନ୍ୟାୟର ସମ୍ମୁଖୀନ ହୋଇଛି ବୋଲି କହିଛନ୍ତି ପଶୁପତି ପାରସ। ବିହାରରେ ଆସନ ଭାଗବଣ୍ଟା ନେଇ ଗତ ଗତକାଲି ଏନଡିଏର ଆସନ ଘୋଷଣା ହୋଇଥିଲା।
ଏଥିରେ ଚିରାଗ ପାସୱାନଙ୍କ ଏଲଜେପିକୁ ୫ ଆସନ ମିଳିଛି। ଏହାକୁ ନେଇ ଅସନ୍ତୁଷ୍ଟ ଥିଲେ ଦାଦା ପଶୁପତି ସୋରେନ। ପଶୁପତି ପାରସଙ୍କ ଦଳକୁ ଗୋଟିଏ ବି ସିଟ୍ ଦେଇନି ଏନଡିଏ। ଆସନ ନମିଳିଲେ ସେ ମନ୍ତ୍ରୀପଦ ଛାଡିବେ ବୋଲି ଘୋଷଣା କରିଥିଲେ। ଆଉ ଘୋଷଣା ମୁତାବକ ସେ ମନ୍ତ୍ରୀପଦରୁ ଇସ୍ତଫା ଦେଇଛନ୍ତି। ସେପଟେ ବିଜେପିରେ ସାମିଲ ହେଲେ ଜେଏମଏମ ନେତା ସୀତା ସୋରନ। ଆଜି ଜେଏମଏମରୁ ଇସ୍ତଫା ଦେଇ ସେ ଆଜି ହିଁ ବିଜେପିରେ ଯୋଗ ଦେଇଛନ୍ତି। ଝାରଖଣ୍ଡ ମୁକ୍ତି ମୋର୍ଚ୍ଚାରେ ଅସନ୍ତୁଷ୍ଟ ହୋଇ ଦଳ ଛାଡିଥିବା କହିଛନ୍ତି ସୀତା ସୋରେନ। ଦଳ ଛାଡିବା ସହ ପରିବାର ସହ ସମ୍ପର୍କ ଛିନ୍ନ କରିଛନ୍ତି ସୀତା ସୋରେନ। ଝାରଖଣ୍ଡ ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଭାଉଜ ହେଉଛନ୍ତି ସୀତା ସୋରେନ। ଦଳରେ ଅବହେଳା ପ୍ରଦର୍ଶନ କରାଯାଉଥିବା ନେଇ ସେ ଅଭିଯୋଗ କରି ଆସୁଥିଲେ। ସ୍ଵାମୀ ଦୁର୍ଗା ସୋରେନଙ୍କ ମୃତ୍ଯୁ ପରେ ତାଙ୍କ ବିରୋଧରେ ଷଡ଼ଯନ୍ତ୍ର କରାଯାଇଥିବା ସେ କହିଛନ୍ତି। ଇସ୍ତଫା ଦେବା ଛଡା ତାଙ୍କ ପାଖରେ କୌଣସି ବିକଳ୍ପ ନଥିଲା ବୋଲି କହିଛନ୍ତି ସୀତା ସୋରେନ।
ଓଡିଶା ମୁହାଁ ବାହାର ରାଜ୍ୟର ବାଘ
ନନ୍ଦିଘୋଷ ବ୍ୟୁରୋ: ଓଡିଶା ମୁହାଁ ବାହାର ରାଜ୍ୟର ବାଘ। କର୍ଣ୍ଣାଟକ, ମହାରାଷ୍ଟ୍ର ପରେ ଏବେ ମଧ୍ୟପ୍ରଦେଶର ବାଘ ଓଡ଼ିଶାରେ ଦେଖାଯିବା ଏକ ଶୁଭ ଲକ୍ଷଣ। ଓଡ଼ିଶାରେ ବାଘ ସଂଖ୍ୟା ବୃଦ୍ଧି ପାଉଥିବା କଥା ରାଜ୍ୟର ନିଜସ୍ୱ ବାଘ ଗଣନାରୁ ସ୍ପଷ୍ଟ ହୋଇଛି। ଏବେ ଅନ୍ୟ ରାଜ୍ୟର ବାଘ ଓଡ଼ିଶାରେ ବିଚରଣ ଘଟଣାକୁ ବନବିଭାଗ ସକାରାତ୍ମକ ଭାବେ ନେଇଛି। ଏଥିଲାଗି ବାଘଙ୍କ ଖାଦ୍ୟ ପାଇଁ ହରୀଣ, ସମ୍ବର, ବାରହା ଭଳି ଜୀବଙ୍କୁ ଜଙ୍ଗଲରେ ସୁରକ୍ଷିତ ରଖିବାକୁ ବନ ବିଭାଗ କଡା ପଦକ୍ଷେପ ନେଉଛି। ଶିମିଳିପାଳ ବ୍ୟାଘ୍ର ଅଭୟାରଣ୍ୟରେ କଡ଼ା ସୁରକ୍ଷା ଯୋଗୁଁ ବାଘ ଶିକାରୀ ଏବେ କୁଳଡିହା ଜଙ୍ଗଲରେ ମାତିଛନ୍ତି। ଗତକାଲି ଶିକାରୀ ଓ ବନ କର୍ମଚାରୀଙ୍କ ମଧ୍ୟରେ ଗୁଳି ବିନିମୟ ପରେ ଏବେ ବନ ବିଭାଗ ପକ୍ଷରୁ କୁଳଡିହାରେ କମ୍ବିଂ ଅପରେସନ ଆରମ୍ଭ ହୋଇଛି।
କୁଲଡିହା ଅଭୟାରଣ୍ୟରେ ଶିକାରୀ-ବନ କର୍ମଚାରୀ ମୁହାଁମୁହିଁ। ଦୁଇ ଶିକାରୀଙ୍କୁ ଗିରଫ କରିଛି ବନବିଭାଗ। ଶିକାରୀ ଆକ୍ରମଣରେ ୨ କର୍ମଚାରୀ ଆହତ ହୋଇଛନ୍ତି। ଉଭୟ କର୍ମଚାରୀଙ୍କୁ କଟକ ଏସସିବିରେ ଭର୍ତି କରାଯାଇଛି। ଅନ୍ୟ ଶିକାରୀଙ୍କୁ ଧରିବାକୁ ବନବିଭାଗର ଚାଲିଛି କମ୍ବିଂ। ରାଜ୍ୟ ପୋଲିସ, ପୂର୍ବତନ ସୈନିକଙ୍କୁ ନେଇ ସ୍ୱତନ୍ତ୍ର ସ୍କ୍ୱାଡ୍ କରିବେ ତନାଘନା। ଶିମିଳିପାଳ ଭଳି କୁଲଡିହା ଜଙ୍ଗଲକୁ ଶିକାରୀମୁକ୍ତ କରିବାକୁ ପ୍ରୟାସ। ଘଟଣାସ୍ଥଳରେ ଉଚ୍ଚସ୍ତରୀୟ ଟିମ ପହଞ୍ଚି ତନାଘନା ଚଳାଇଛନ୍ତି। ବର୍ଷାଋତୁ ଆସିବା ଯାଏଁ ଶିକାରୀଙ୍କ ଗତିବିଧି ବୃଦ୍ଧି ସମ୍ଭାବନା ରହିଛି। ଏମାନଙ୍କୁ ସାବାଡ଼ କରିବାକୁ ବନବିଭାଗ କଡା ଆଭିମୁଖ୍ୟ ଗ୍ରହଣ କରିବ ବୋଲି ପିସିସିଏଫ କହିଥିବାବେଳେ ବିଶେଷଜ୍ଞ ଏହାକୁ ସ୍ୱାଗତ କରିଛନ୍ତି।
ରାଜ୍ୟରେ ବାଘ ସଂଖ୍ୟା ବଢିବା ସହିତ ଅନ୍ୟ ରାଜ୍ୟର ବାଘ ଓଡିଶା ମୁହାଁ ହେଉଛନ୍ତି। କର୍ଣ୍ଣାଟକ, ମହାରାଷ୍ଟ୍ର ପରେ ମଧ୍ୟପ୍ରଦେଶ ସଞ୍ଜୟ-ଡୁବ୍ରି ଅଭୟାରଣ୍ୟରୁ ଗୋଟିଏ ବାଘ ସୁନ୍ଦରଗଡର ବଣାଇ ଜଙ୍ଗଲରେ ଦେଖିବାକୁ ମିଳିଛି। ନିଜର ସ୍ୱତନ୍ତ୍ର ଅଞ୍ଚଳ ପାଇଁ ମଧ୍ୟପ୍ରଦେଶ ବାଘ ଏତେଗୁଡ଼େ ବାଟ ଅତିକ୍ରମ କରି ଓଡିଶା ଆସିଥିବା କଥା ଏନଟିସିଏ ଏବଂ ରାଜ୍ୟ ବନ ବିଭାଗ କହିଛି। ଓଡିଶା ଜଙ୍ଗଲରେ ବାଘ ଶିକାରୀଙ୍କ ଉପରେ ନଜର ସହ ଜଙ୍ଗଲ ସୁରକ୍ଷା ପାଇଁ ବନ କର୍ମଚାରୀଙ୍କୁ ବନ୍ଧୁକ ଚଳାଇବା ଅନୁମତି ମିଳିଛି। ଏହାକୁ ବିଶେଷଜ୍ଞ ସ୍ୱାଗତ କରିଥିବା ବେଳେ ବାଘର ଚିହ୍ନଟ ପ୍ରକ୍ରିୟାକୁ ନେଇ ଭିନ୍ନ ମତ ରଖିଛନ୍ତି ବ୍ୟାଘ୍ର ବିଶେଷଜ୍ଞ।
ରାଜ୍ୟର ନିଜସ୍ୱ ବାଘ ଗଣନା ରିପୋର୍ଟରେ ଓଡ଼ିଶାରେ ବାଘ ସଂଖ୍ୟା ୩୦ ଥିବାବେଳେ ୮ଟି ବାଘଛୁଆ ଥିବା ଜଣାପଡିଛି। ମେ ମାସରୁ ରାଜ୍ୟର ନିଜସ୍ୱ କଲରାପତରିଆ ବାଘ ଗଣନା କରାଯିବ। ଏଭଳି ସ୍ଥିତିରେ ବ୍ୟାଘ୍ର ଅଭୟାରଣ୍ୟର ସୁରକ୍ଷା ସହିତ ଶିକାରୀଙ୍କୁ ଧରପଗଡ଼ ଅଭିଯାନ ପାଇଁ ବନ ବିଭାଗର ସ୍ୱତନ୍ତ୍ର ଯୋଜନା ସ୍ୱାଗତଯୋଗ୍ୟ।
ଶ୍ରୀମନ୍ଦିରରେ ପାଳିତ ହେଲା ଫାଲଗୁନ ଶୁକ୍ଳ ଦଶମୀ, ୪ ଦିନ ଧରି ପାଳିତ ହେବ ଦୋଳ ଉତ୍ସବ
ପୁରୀ: ମଙ୍ଗଳବାର ଫାଲଗୁନ ଶୁକ୍ଳ ଦଶମୀ ବା ଫଗୁ ଦଶମୀ । ଏହି ଅବସରରେ ଶ୍ରୀମନ୍ଦିରରେ ଶ୍ରୀଜୀଉଙ୍କ ଅନୁଷ୍ଠିତ ହୋଇଛି ସ୍ୱତନ୍ତ୍ର ନୀତିକାନ୍ତି । ଆଜିଠାରୁ ଦୋଳୋତ୍ସବର ପ୍ରାରମ୍ଭ ହୋଇଥିବା ବେଳେ ଦୋଳପୂର୍ଣ୍ଣିମା ପର୍ଯ୍ୟନ୍ତ ଶ୍ରୀକ୍ଷେତ୍ରରେ ପାଳିତ ହେବ ଉତ୍ସବ । ଆସନ୍ତାକାଲି ଠାରୁ ଶ୍ରୀଜୀଉମାନଙ୍କର ୪ ଦିନ ଧରି ଅନୁଷ୍ଠିତ ହେବ ସ୍ୱତନ୍ତ୍ର ଚାଚେରୀ ବେଶ । ମହାପ୍ରଭୁଙ୍କୁ ଦର୍ଶନ ପାଇଁ ପ୍ରବଳ ଭିଡ ଦେଖିବାକୁ ମିଳିଛି।
ଶ୍ରୀଜିଉଙ୍କ ଫଗୁ ଦଶମୀ । ଶ୍ରୀମନ୍ଦିରରେ ପାଳିତ ହେଲା ଫାଲଗୁନ ଶୁକ୍ଳ ଦଶମୀ। ୪ ଦିନ ଧରି ପାଳିତ ହେବ ଦୋଳ ଉତ୍ସବ । ଚଳିତ ବର୍ଷ ଅଧିକ ଏକ ଦିନ ମଳ ପଡ଼ୁଥିବାରୁ ମହାପ୍ରଭୁଙ୍କର ୪ ଦିନଧରି ଅନୁଷ୍ଠିତ ହେବ ସ୍ୱତନ୍ତ୍ର ଚାଚେରୀ ବେଶ । ମଧ୍ୟାହ୍ନ ଧୂପ ନୀତି ଶେଷ ହେବା ପରେ ୩ ବାଡ଼ରେ ତିନି ଠାକୁରଙ୍କର ମଇଲମ କରାଯାଇ ନାଲି ଲୁଗା ଲାଗି ହୋଇଥିବା ବେଳେ ସର୍ବାଙ୍ଗ ହୋଇ ଚାଚେରୀ ବେଶ କରାଯିବ । ଏହି ଚାଚେରୀ ବେଶ ପରେ ଚାଚେରୀ ଭୋଗ ହୋଇ ଅନ୍ୟାନ୍ୟ ନୀତି ଶେଷହେବା ପରେ ଆଜ୍ଞାମାଳ ପାଇ ଶ୍ରୀଦୋଳଗୋବିନ୍ଦ, ଶ୍ରୀଦେବୀ ଏବଂ ଭୂଦେବୀ ମହାଜନ ସେବକମାନଙ୍କ ଦ୍ବାରା ଜୟବିଜୟ ଦ୍ଵାର ଲଣ୍ଡାବର୍ତ୍ତକୁ ଆସିବେ । ପରେ ମୁଦିରସ୍ତ ସେବକ ଫଗୁ ଚନ୍ଦନ ମୁଣି ପ୍ରସାଦ ଲାଗି କରିବା ସହ ବନ୍ଦାପନା ଓ ଆଲଟ ଚାମର ସେବା ଅନୁଷ୍ଠିତ ହେବ। ଶ୍ରୀମନ୍ଦିରରେ ଏହି ବିଶେଷ ନୀତି ସହ ଶ୍ରୀକ୍ଷେତ୍ରରେ ଆରମ୍ଭ ହୁଏ ଦୋଳଉତ୍ସବ।
ହିନ୍ଦୁ ରୀତିନୀତି ଓ ଉତ୍କଳୀୟ ପରମ୍ପରାରେ ଦୋଳଉତ୍ସଭ ସମୟରେ ପୁରପଲ୍ଲୀ ହୋଇଥାଏ ଉତ୍ସବ ମୁଖର । ଫଗୁ ଦଶମୀ ଠାରୁ ଆରମ୍ଭ ହୋଇଥାଏ ପାରମ୍ପରିକ ଅବିରରେ ରଙ୍ଗ ଖେଳ। ଶ୍ରୀଜଗନ୍ନାଥ ମନ୍ଦିରରେ ଏହି ସମୟରେ ମହାବାହୁଙ୍କ ସ୍ବତନ୍ତ୍ର ଦର୍ଶନ ପାଇଁ ସମସ୍ତ ବ୍ଯବସ୍ଥା କରାଯାଇଛି । ଦର୍ଶନ ସହ ଭକ୍ତି ଅର୍ଘ୍ୟ ପ୍ରଦାନ କରିବାକୁ ଦୂରଦୂରାନ୍ତରୁ ଛୁଟି ଆସନ୍ତି ଭକ୍ତ।
ସମ୍ବଲପୁର ସହରରେ ଚିନ୍ତା ବଢାଇଲାଣି ଟ୍ରାଫିକ ସମସ୍ୟା
ସମ୍ବଲପୁର: ସମ୍ବଲପୁର ସହରରେ ଚିନ୍ତା ବଢାଇଲାଣି ଟ୍ରାଫିକ ସମସ୍ୟା। ସକାଳ ୯ ଟା ହୋଇଗଲେ ବିଭିନ୍ନ ଛକ ମାନଙ୍କରେ ଦେଖିବାକୁ ମିଳୁଛି ନାହିନଥିବା ଭିଡ। ବିଶେଷ କରି ସହର ଦେଇ ଯାଇଥିବା ମୁମ୍ବାଇ କୋଲକାତା ଜାତୀୟ ରାଜପଥ ଯୋଗୁ ପ୍ରାୟ ପ୍ରତ୍ୟକ ଦିନ ଗୁର୍ଘଟଣା ଘଟୁଛି। ଯାହାକୁ ନେଇ ଅସନ୍ତୋଷ ପ୍ରକାଶ କାରିଛନ୍ତି ସହରବାସୀ।
ମରଣଯନ୍ତା ପାଲଟିଛି ଜାତୀୟ ରାଜପଥ । କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ଯାଉଛି ଜୀବନ। ସମ୍ବଲପୁର ସହର ଦେଇ ଯାଇଥିବା ମୁମ୍ବାଇ କୋଲକତା ଜାତୀୟ ରାଜପଥ ୬ରେ ପ୍ରତିଦିନ ଘଟୁଛି ଦୁର୍ଘଟଣା । କେତେବେଳେ ଟ୍ରକ ଧକ୍କାଦେଇ ବାଇକକୁ ଘୋଷାଡି ନେଉଛି ତ ଆଉ କେତେବେଳେ ଦୁର୍ଘଟଣାରେ ଅଟୋ ଭାଙ୍ଗି ଚୁରମାର ହେଉଛି । NHAI କତୃପକ୍ଷ କିନ୍ତୁ ସବୁ ଦେଖି ପଦକ୍ଷେପ ନନେଇ ଚୁପ୍ ବସିଥିବା କହିଛନ୍ତି ସହରବାସୀ । ସେପଟେ ବାରମ୍ବାର ଦୁର୍ଘଟଣା ଘଟୁଥିଲେ ବି ଟ୍ରାଫିକ ବ୍ୟବସ୍ଥାକୁ ସଜାଡି ପାରୁନି ସମ୍ବଲପୁର ପୋଲିସ ।
ଟିକେ ଭଲଭାବେ ନଜର ପକାନ୍ତୁ ଏହି ଟ୍ରାଫିକ ଭିଡ ଉପରେ । ଏହା ହେଉଛି ସହରର ବ୍ୟସ୍ତ ବହୁଳ ଅଇଁଠାପାଲି ଛକ ଏବଂ ବରେଇପାଲି ଛକ । ଯେଉଁଠି ରାସ୍ତା ପାର ହେବାକୁ ହେଲେ ଘଣ୍ଟାଘଣ୍ଟା ଅପେକ୍ଷା କରିବାକୁ ପଡୁଛି । ସାମାନ୍ଯ ଅସାବଧାନତା ହେଲେ କେଉଁ ମୁହୁତ୍ତରେ ଜୀବନ ଚାଲିଯାଇପାରେ । ଭିଡ ଛକ ମାନଙ୍କରେ ଜଣେ କିମ୍ବା ଦୁଇଜଣ ଟ୍ରାଫିକ ପୋଲିସ ରହୁଛନ୍ତି, ଯାହାଫଳରେ ଭିଡକୁ ନିୟନ୍ତ୍ରଣ ହୋଇ ପାରୁନଥିବା ଲୋକେ ଅଭିଯୋଗ କରିଛନ୍ତି । ତୁରନ୍ତ ଏଥିପ୍ରତି ଦୃଷ୍ଟିଦେବାକୁ ଉଠିଛି ଦାବି ।
ପୁଣି ଶୁଣିବାକୁ ମିଳିବ ସିଦ୍ଧୁଙ୍କ ଦମଦାର ଡାଇଲଗ ଭରା କ୍ରିକେଟ୍ କମେଣ୍ଟ୍ରି
ନୂଆଦିଲ୍ଲୀ: ହୋମ ଗ୍ରାଉଣ୍ଡକୁ ଫେରିଲେ ସିଦ୍ଧୁ। ପୁଣି କ୍ରିକେଟ ଜଗତକୁ କମବ୍ଯାକ୍ କଲେ ନବଜୋତ ସିଦ୍ଧୁ। ଟିଭିରେ ପୁଣି ସିଦ୍ଧୁଙ୍କ ଶୁଣିବାକୁ ମିଳିବ ଡାଇଲଗ ଭରା କ୍ରିକେଟ କମେଣ୍ଟ୍ରି। ଇଣ୍ଡିଆନ ପ୍ରିମିୟର ଲିଗର ହିନ୍ଦୀ କମେଣ୍ଟ୍ରିକୁ ଫେରିଛନ୍ତି ନବଜୋତ ସିଦ୍ଧୁ।
ଚଳିତ ସିଜିନର ଆଇପିଏଲରେ ହିନ୍ଦୀ କମେଣ୍ଟ୍ରିରେ ସିଦ୍ଧୁଙ୍କ ଦମଦାର ଲାଇଭ କମେଣ୍ଟ୍ରି ଶୁଣିବାକୁ ମିଳିବ। ପାଖାପାଖି ୧୦ ବର୍ଷ ପରେ କମେଣ୍ଟ୍ରିକୁ ଫେରିଛନ୍ତି ସିଦ୍ଧୁ। ତେବେ ରାଜନୀତିରେ ରହିବେ ନା ନାହିଁ ଏନେଇ କୌଣସି ସୂଚନା ଦେଇନାହାନ୍ତି ନବଜୋତ ସିଂ ସିଦ୍ଧୁ। କ୍ରିକେଟକୁ ଫାଷ୍ଟ ଲଭ୍ ବୋଲି କହିଛନ୍ତି ନବଜୋତ ସିଂ ସିଦ୍ଧୁ।ମାଛ ପାଇଁ ପାଣି ଯେପରି ମୋ ପାଇଁ ସେଭଳି କ୍ରିକେଟ ବୋଲି କହିଛନ୍ତି ସିଦ୍ଧୁ।
୧୯୯୯ରୁ ୨୦୧୪ ପର୍ଯ୍ୟନ୍ତ କ୍ରିକେଟ କମେଣ୍ଟ୍ରି କରି ଆସୁଥିଲେ ସିଦ୍ଧୁ। ସିଦ୍ଧୁଙ୍କ ଏହି କମେଣ୍ଟ୍ରି ଲାଗି ପାଖାପାଖି ଦିନକୁ ୨୫ ଲକ୍ଷ ଟଙ୍କା ପାଉଣା ମିଳିବ। ତେବେ ଟଙ୍କା ତାଙ୍କ ପାଇଁ ସେତେ ଗୁରୁତ୍ଵପୂର୍ଣ୍ଣ ନାହିଁ ବୋଲି ପ୍ରକାଶ କରିଛନ୍ତି ସିଦ୍ଧୁ।
ଗାଁରୁ ବ୍ଲକ ଓ ବ୍ଲକକୁ ସହର ଯୋଡୁଛି ଲକ୍ଷ୍ମୀ ବସ ଓ ମୋ ବସ୍
ଭୁବନେଶ୍ବର: ସମଗ୍ର ରାଜ୍ୟରେ ଗମନାଗମନ କ୍ଷେତ୍ରରେ ଆସିଛି ଐତିହାସିକ ପରିବର୍ତ୍ତନ । ପ୍ରତି ଗ୍ରାମକୁ ଲକ୍ଷ୍ମୀ ବସ ପହଞ୍ଚିବା ପରେ ଯାତାୟାତ ହୋଇଛି ସୁଗମ । କୋରାପୁଟ ଜିଲ୍ଲାର ବିଭିନ୍ନ ସହରରେ ଅତ୍ଯାଧୁନିକ ବସଷ୍ଟାଣ୍ଡ ନିର୍ମାଣ ହୋଇଛି । ଏବଂ ସେହି କ୍ରମରେ ଦକ୍ଷିଣ ଓଡିଶାର ଦ୍ବିତୀୟ ବଡ ସହର ଜୟପୁର ଠାରେ ମୋ ବସଷ୍ଠାଣ୍ଡ ନିର୍ଣାଣ ହୋଇଛି । ମୁଖ୍ୟମନ୍ତ୍ରୀ ଲୋକାର୍ପଣ କରିବା ପରେ ଉପକୃତ ହେଉଛନ୍ତି ଯାତ୍ରୀ ।
ଯୋଗାଯୋଗ ସାଜିଛି ବିକାଶର ଆଧାର । ଗାଁରୁ ବ୍ଲକ ଓ ବ୍ଲକକୁ ସହର ଯୋଡୁଛି ଲକ୍ଷ୍ମୀ ବସ ଓ ମୋ ବସ୍ । ରାଜ୍ଯ ସରକାରଙ୍କ ଏହି ଐତିହାସିକ ପଦକ୍ଷେପ ଯୋଗୁଁ ଉପକୃତ ହେଉଛନ୍ତି ଯାତ୍ରୀ । ଜନସାଧାରଣଙ୍କ ସୁବିଧା ପାଇଁ ଗତ ୧୩ ତାରିଖରେ ଜୟପୁର ଓ ବିଭିନ୍ନ ଜିଲ୍ଲାରେ ୨୦ ଟି ନବନିର୍ମିତ ବସଷ୍ଟାଣ୍ଡର ଲୋକାର୍ପଣ କରିଛନ୍ତି ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ୧୨ କୋଟି ଟଙ୍କା ବ୍ଯୟରେ ଜୟପୁରରେ ନିର୍ମାଣ ହୋଇଛି ବସ ଟର୍ମିନାଲ । ଏହାଦ୍ବାରା ପଡୋଶୀ ଆନ୍ଧ୍ରପ୍ରଦେଶ ଓ ଛତିଶଗଡ଼ ସହ ରାଜ୍ଯର ବିଭିନ୍ନ ଜିଲ୍ଲାକୁ ବସ ଯାତ୍ରା ସୁଗମ ହୋଇଛି ।
ଜୟପୁରରେ ଏକ ନୂତନ ବସଷ୍ଟାଣ୍ଡ ପାଇଁ ୧୨ କୋଟି ଟଙ୍କା ମଞ୍ଜୁର କରିଥିଲେ । 5T ଉପକ୍ରମରେ ନିର୍ମାଣ ହୋଇଛି ବସ୍ ଟର୍ମିନାଲ । ବସ ବେ, ରହଣୀ, ପାନୀୟଜଳ ଠାରୁ ଆରମ୍ଭ କରି ଅନେକ ସୁବିଧା ଏଠାରେ ଉପଲବ୍ଧ ରହିଛି । ଫଳରେ ଆରାମଦାୟକ ଯାତ୍ରାର ସୁଖ ପାଉଛନ୍ତି ଯାତ୍ରୀ । ଦୀର୍ଘଦିନର ଆଶା ପୂରଣ ହୋଇଥିବାରୁ ମୁଖ୍ଯମନ୍ତ୍ରୀଙ୍କୁ ଧନ୍ଯବାଦ ଜଣାଇଛନ୍ତି ଯାତ୍ରୀ ଓ ଅଞ୍ଚଳବାସୀ ।
ଚିନ୍ତା ବଢାଇଲାଣି ବାୟୁ ପ୍ରଦୂଷଣ, ବାୟୁମଣ୍ଡଳରେ ଉଡ଼ୁଛି ବିଷାକ୍ତ ପିଏମ୍ ୨.୫
ନନ୍ଦିଘୋଷ ବ୍ୟୁରୋ: ଚିନ୍ତା ବଢାଇଲାଣି ବାୟୁ ପ୍ରଦୂଷଣ । ବାୟୁ ପ୍ରଦୂଷଣରେ ଭାରତ ବିଶ୍ବରେ ତୃତୀୟ । ପୁଣି ଥରେ ପ୍ରଦୂଷିତ ତାଲିକାର ଶୀର୍ଷରେ ଦିଲ୍ଲୀ ସହର । ପ୍ରଦୂଷଣ ଯୋଗୁ ଭାରତରେ ବାର୍ଷିକ ୨୩ ଲକ୍ଷ ଜୀବନ ଯାଉଥିବାବେଳେ ୧୬ ଲକ୍ଷଙ୍କର ଜୀବନ କେବଳ ବାୟୁ ପ୍ରଦୂଷଣ ଯୋଗୁ ଯାଉଛି । ୨୦୩୦ ପର୍ଯ୍ୟନ୍ତ ଜାତିସଂଘ ଦ୍ବାରା ପ୍ରଣୀତ ପରିସଂସ୍ଥା ପୁନରୁଦ୍ଧାର ଦଶନ୍ଧି ଚାଲିଥିଲେ ବି ସଚେତନ ଅଭାବରୁ ପିଲା, ଯୁବ ଓ ବୟସ୍କଙ୍କର ଜୀବନ ଯାଉଛି । ବାୟୁ ପ୍ରଦୂଷଣ ହ୍ରାସ ପାଇଁ ସହରାଞ୍ଚଳରେ ବରଗଛ, କରଞ୍ଜ, ପଣସ ସମେତ ସହରୀ ବନାଞ୍ଚଳ ସୃଷ୍ଟି ଉପରେ ଗୁରୁତ୍ବ ଦେଇଛନ୍ତି ବିଶେଷଜ୍ଞ।
ନିଃଶ୍ବାସ ପ୍ରଶ୍ବାସରେ ଯାଉଛି ବିଷ । ବାୟୁମଣ୍ଡଳରେ ଉଡ଼ୁଛି ବିଷାକ୍ତ ପିଏମ୍ ୨.୫ । ଅକାଳରେ ଜୀବନ ନେଉଛି ବାୟୁ ପ୍ରଦୂଷଣ । ବିଶ୍ବର ତୃତୀୟ ପ୍ରଦୂଷିତ ଦେଶ ପାଲଟିଛି ଭାରତ । ପୁଣି ଥରେ ରାଜଧାନୀ ଦିଲ୍ଲୀ ଅଧିକ ପ୍ରଦୂଷିତ । ଏପରି ରିପୋର୍ଟ କରିଛି ସୁଇଜରଲ୍ୟାଣ୍ଡ ସଂସ୍ଥା IQ AIR । ବାୟୁ ପ୍ରଦୂଷଣର ପ୍ରଭାବ ସହରାଞ୍ଚଳ ଅପେକ୍ଷା ବେଶୀ ଭୋଗୁଛନ୍ତି ସହରାଞ୍ଚଳ ଲୋକେ । ଘରେ ବ୍ୟବହାର ହେଉଥିବା ଏୟାରକଣ୍ଡିସନ୍, ଜୈବ ଇନ୍ଧନ ଦ୍ବାରା ଚାଳିତ ଗାଡ଼ି, ଧୂଳି ଧାରଣ କରିପାରୁନଥିବା ରାସ୍ତା ଯୋଗୁ ଉତ୍କଟ ହେଲାଣି ବାୟୁ ପ୍ରଦୂଷଣ । ଭାରତର ୬୬ ପ୍ରତିଶତ ସହର ବାର୍ଷିକ ୩୫ ମାଇକ୍ରୋଗ୍ରାମ୍ ପିଏମ୍ରୁ ଅଧିକ ବିଷାକ୍ତ ଗ୍ୟାସ ବାୟୁମଣ୍ଡଳକୁ ଛାଡ଼ୁଛନ୍ତି । ଭୁବନେଶ୍ବର ମଧ୍ୟ ଏଥିରେ ସାମିଲ ।
ଏହି ମାତ୍ରା ହ୍ରାସ କରିବାକୁ ଜାତିସଂଘ ୨୦୨୧ରୁ ୨୦୩୦ ପର୍ଯ୍ୟନ୍ତ ସହରୀ ବନାଞ୍ଚଳ ସୃଷ୍ଟି ଉପରେ ଗୁରୁତ୍ବ ଦେଇଛନ୍ତି । ଏଥିପାଇଁ ଚାଲିଛି ପରିସଂସ୍ଥା ପୁନରୁଦ୍ଧାର ଦଶନ୍ଧି । ହେଲେ ଲୋକଙ୍କ ସଚେତନତା ଓ ନିୟମ ଉଲ୍ଲଂଘନକାରୀଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଅଭାବରୁ ପ୍ରଦୂଷଣ ବଢିଚାଲିଛି । କେବଳ ମିଟିଂ, ଇଟିଂ, ଶୋଭାଯାତ୍ରାରେ ସୀମିତ ରହିଛି ପରିବେଶ ସୁଧାର କାର୍ଯ୍ୟକ୍ରମ । ସବୁଜ ଗୃହ ପ୍ରଭାବ ସହିତ ଜୈବ ଇନ୍ଧନ ଦ୍ବାରା ଚାଳିତ ଗାଡ଼ିରୁ କାର୍ବନ୍ ମନୋକ୍ସାଇଡ୍ ନିର୍ଗତ ହେଉଛି । କାର୍ବନମନୋକ୍ସାଇଡ ହିମୋଗ୍ଲୋବିନ୍ ସହିତ ମିଶି ଶରୀରରେ କାର୍ବୋକ୍ସିହିମୋଗ୍ଲୋବିନ୍ ତିଆରି କରୁଛି । ଫଳରେ ଶରୀରକୁ ଅମ୍ଲଜାନ କମ ପଡ଼ିବା ସହିତ ସବୁ ଅଂଶକୁ ସଞ୍ଚାଳିତ ରକ୍ତର ଶୋଧନ ହୋଇପାରୁନି। ଫଳରେ ଏବେ ଯକ୍ଷ୍ମା, ଶ୍ବାସ ଓ ହୃହରୋଗ ରୋଗୀଙ୍କ ସଂଖ୍ୟା ଅଧିକ ହେବାରେ ଲାଗିଛି । ମହିଳାଙ୍କ ଅପେକ୍ଷା ପୁରୁଷ ଅଧିକ ସଂଖ୍ୟାରେ ଆକ୍ରାନ୍ତ ହେଉଛନ୍ତି ।
ବିଶ୍ବ ସ୍ବାସ୍ଥ୍ୟ ସଂଗଠନର ରିପୋର୍ଟ ଅନୁଯାୟୀ ଭାରତରେ ପ୍ରତିବର୍ଷ ପ୍ରଦୂଷଣ ଯୋଗୁ ୨୩ ଲକ୍ଷ ଲୋକଙ୍କର ଅକାଳରେ ଜୀବନ ଯାଉଛି । ସେଥିରୁ ୧୬ ଲକ୍ଷ ଲୋକ ବାୟୁ ପ୍ରଦୂଷଣ ଯୋଗୁ ମୃତ୍ୟୁ ମୁଖରେ ପଡ଼ୁଛନ୍ତି । ଏବେ କୋଭିଡ ପରେ ବାୟୁ ପ୍ରଦୂଷଣ ମାତ୍ରା ବଢୁଥିବାରୁ ଅଧିକାଂଶ ଲୋକଙ୍କ ଛାତି ରୋଗ ଦେଖାଦେଉଛି । ଏପରିକି କର୍କଟ, ଉଚ୍ଚ ରକ୍ତଚାପ ଓ ମଧୁମେହ ରୋଗୀଙ୍କ ସଂଖ୍ୟା ବି ବଢ଼ିଚାଲିଛି । ପରିବେଶ ସୁରକ୍ଷା ନେଇ ଅନେକ ନୀତି ନିୟମ ଥିଲେ ବି ଠିକ୍ ଭାବେ ପାଳନ ହେଉନି । ଏନଫୋର୍ସ୍ମେଣ୍ଟ୍ ଏଜେନ୍ସିଙ୍କ ଖାମଖିଆଲି ମନୋଭାବ ଯୋଗୁ ଲୋକେ ଏ ନେଇ ସଚେତନ ହେଉନାହାନ୍ତି । ସହରାଞ୍ଚଳ ବନୀକରଣ ସୃଷ୍ଟି କରିବାରେ ଓଡ଼ିଶା ସରକାର କିଛିଟା ଆଗେଇଛନ୍ତି । କିନ୍ତୁ ଯେଉଁ ପରିମାଣରେ ଶିଳ୍ପାୟନ ଓ ପ୍ରଦୂଷଣ ବଢଛି ସେତିକି ଅନୁପାତରେ ବଢୁନି ସହରାଞ୍ଚଳ ସବୁଜ ବଳୟ ।
ବାୟୁ ପ୍ରଦୂଷଣ ଏବେ ବଡ଼ ଚାଲେଞ୍ଜ୍ । ସହରାଞ୍ଚଳରେ ପ୍ରଦୂଷଣ ମାତ୍ରା ଅଧିକ ହେବାରୁ ଛୋଟ ପିଲା ମାନସିକ ରୋଗର ଶିକାର ହେଉଛନ୍ତି । ଏଥିପାଇଁ ସରକାର, ସାଧାରଣ ଲୋକେ ଯଦି ଏବେଠୁ କାୟ ମନୋବାକ୍ୟରେ ପରିବେଶ ସନ୍ତୁଳନ ନେଇ ସଚେତନ ନ ହୁଅନ୍ତି ତାହେଲେ ସ୍ଥିତି ଆଗକୁ ଏପରି ହେବ ଯେ, ଧନ, କୋଠାବାଡ଼ି ସବୁ ଥିବା ହେଲେ ତାକୁ ଉପଭୋଗ କରିବାକୁ ଆୟୁଷ ନଥିବ ।
ସାଉଥ୍ ଫିଲ୍ମ ଅଭିନେତ୍ରୀ ଅରୁନ୍ଧତୀ ନାୟାର ଗୁରୁତର
କୋଭାଲାମ: ତାମିଲ ଏବଂ ମାଲାୟାଲମ୍ ଚଳଚ୍ଚିତ୍ର ଅଭିନେତ୍ରୀ ଅରୁନ୍ଧତୀ ନାୟାର ଏବେ ଭେଣ୍ଟିଲେଟରରେ । ଏନେଇ ସୂଚନା ଦେଇଛନ୍ତି ତାଙ୍କ ଭଉଣୀ । ଅରୁନ୍ଧତୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ନେଇ ମଧ୍ୟ ପ୍ରକାଶ କରିଛନ୍ତି।
ସୂଚନା ଅନୁଯାୟୀ, ଅରୁନ୍ଧତୀ କେରଳର କୋଭାଲାମ ବାଇପାସରେ ଯାଉଥିବା ବେଳେ ସଡ଼କ ଦୁର୍ଘଟଣାର ସମ୍ମୁଖୀନ ହେବା ପରେ ଭେଣ୍ଟିଲେଟରରେ ଚିକିତ୍ସାଧୀନ ରହିଛନ୍ତି। ତାଙ୍କ ଦୁର୍ଘଟଣା ସମ୍ପର୍କରେ ଅନେକ ରିପୋର୍ଟ ପ୍ରକାଶ ହେବା ପରେପରେ ତାଙ୍କ ଭଉଣୀ ଆରତୀ ଏହି ଖବରକୁ ସ୍ପଷ୍ଟ କରିଛନ୍ତି। ଆରତୀ ତାଙ୍କ ଇନଷ୍ଟାଗ୍ରାମ ଆକାଉଣ୍ଟରେ ଦୁର୍ଘଟଣା ସମ୍ପର୍କରେ ଏକ ବିବୃତ୍ତି ଜାରି କରି ପ୍ରଶଂସକମାନଙ୍କୁ ତାଙ୍କ ସୁସ୍ଥତା ପାଇଁ ପ୍ରାର୍ଥନା କରିବାକୁ ଅନୁରୋଧ କରିଛନ୍ତି।
ଆରତୀଙ୍କ ଏହି ପୋଷ୍ଟ ଉପରେ ସୋସିଆଲ୍ ମିଡ଼ିଆରେ ଫ୍ୟାନ୍ସ କମେଣ୍ଟ କରିବା ଆରମ୍ଭ କରିଦେଇଛନ୍ତି । ଜଣେ ୟୁଜର୍ସ ଲେଖିଛନ୍ତି ଯେ ଭଗବାନ ତାଙ୍କୁ ଶୀଘ୍ର ସୁସ୍ଥ କରିଦିଅନ୍ତୁ। ସେହିପରି ଅନ୍ୟ ଜଣେ ୟୁଜର୍ସ ଲେଖିଛନ୍ତି, ଏହା ଅତ୍ୟନ୍ତ ଦୁଃଖଦ ଖବର। ଭଗବାନ ତାଙ୍କୁ ଶୀଘ୍ର ସୁସ୍ଥ କରନ୍ତୁ।
ପ୍ରଖ୍ୟାତ ମଲାୟଲମ ସାହିତ୍ୟିକ ପ୍ରଭା ବର୍ମାଙ୍କୁ ସମ୍ମାନଜନକ ସରସ୍ବତୀ ସମ୍ମାନ
ନନ୍ଦିଘୋଷ ବ୍ୟୁରୋ: ପ୍ରଖ୍ୟାତ ମଲାୟଲମ ସାହିତ୍ୟିକ ପ୍ରଭା ବର୍ମାଙ୍କୁ ସମ୍ମାନଜନକ ସରସ୍ବତୀ ସମ୍ମାନ । କାବ୍ୟକୃତି ‘ରୌଦ୍ର ସାତ୍ବିକମ୍’ ନିମନ୍ତେ ପ୍ରଭା ବର୍ମାଙ୍କୁ ୨୦୨୩ ବର୍ଷ ନିମନ୍ତେ ସରସ୍ବତୀ ସମ୍ମାନ ପ୍ରଦାନ କରାଯିବ । ୨୦୧୩ରୁ ୨୦୨୨ ମଧ୍ୟରେ ପ୍ରକାଶିତ ପୁସ୍ତକଗୁଡ଼ିକୁ ବିଚାର କରାଯିବା ପରେ ପ୍ରଭା ବର୍ମାଙ୍କୁ ମନୋନୀତ କରାଯାଇଛି । ଭାରତୀୟ ସାହିତ୍ୟ ପାଇଁ କେ. କେ. ବିରଳା ଫାଉଣ୍ଡେସନ ପକ୍ଷରୁ ୧୯୯୧ ମସିହାରୁ ସରସ୍ବତୀ ସମ୍ମାନ ପ୍ରଦାନ କରାଯାଇ ଆସୁଛି । ୧୯୯୨ ମସିହାରେ ଓଡ଼ିଆ କାବ୍ୟକୃତି ‘ଶ୍ରୀରାଧା’ ନିମନ୍ତେ ପ୍ରତିଷ୍ଠିତ କବି ରମାକାନ୍ତ ରଥଙ୍କୁ ସରସ୍ବତୀ ସମ୍ମାନ ପ୍ରଦାନ କରାଯାଇଥିଲା । ଓଡ଼ିଶାରୁ ପ୍ରଖ୍ୟାତ ସାହିତ୍ୟିକ ମନୋଜ ଦାସ ଏବଂ ଜଗନ୍ନାଥ ପ୍ରସାଦ ଦାସ ମଧ୍ୟ ସରସ୍ବତୀ ସମ୍ମାନୀତ ହୋଇଛନ୍ତି । ୧୯୯୧ ମସିହାରେ ଆତ୍ମକଥା ‘ଦଶ ଦ୍ବାର ସେ ସୋପାନ ତକ୍’ ନିମନ୍ତେ ଡ. ହରିବଂଶ ରାୟବଚନ ପ୍ରଥମ ସରସ୍ବତୀ ସମ୍ମାନ ପ୍ରଦାନ କରାଯାଇଥିଲା । ପ୍ରଭା ବର୍ମା ସମକାଳୀନ ମଲାୟଲମ ସାହିତ୍ୟର ଜଣେ ଶକ୍ତିଶାଳୀ ଉଚ୍ଚାରଣ । ଜଣେ ସ୍ବମାନଧନ୍ୟ କବି, ସାହିତ୍ୟିକ, ଗୀତିକାର, ସାଂସ୍କୃତିକ କାର୍ଯ୍ୟକର୍ତ୍ତା ଭାବେ ସେ ସୁପରିଚିତ । ଏଥିସହିତ ସେ ପାରମ୍ପରିକ ଓ ବୈଦୁତିକ ଗଣମାଧ୍ୟମ ସାମ୍ବାଦିକ ଭାବେ ବେଶ୍ ପରିଚିତ । ଉଭୟ ମଲାୟଲମ ଓ ଇଂରାଜୀ ସାହିତ୍ୟରେ ତାଙ୍କର ବେଶ୍ ସୁନାମ ରହିଛି ।
ଚଳିତବର୍ଷ ସେ ତାଙ୍କ ସୃଜନାନ୍ମକ ଲେଖକୀୟ ଜୀବନର ୫୦ ବର୍ଷ ପୂରଣ କରିଛନ୍ତି । ପ୍ରଭା ବର୍ମା ୩୦ରୁ ଅଧିକ ପୁସ୍ତକ ରଚନା କରିଛନ୍ତି । ସେଥିମଧ୍ୟରେ ୧୨ଟି କବିତା ସଂକଳନ, ତିନୋଟି କାବ୍ୟାତ୍ମକ ଉପନ୍ୟାସ, ସମକାଳୀନ ସାମାଜିକ ରାଜନୈତିକ ପରିବେଶ ଓ ସାହିତ୍ୟ ଉପରେ ଆଧାରିତ ୮ଟି ପୁସ୍ତକ, ୭ଟି ଆଲୋଚନାତ୍ମକ ନିବନ୍ଧ, ଗଣମାଧ୍ୟମ ସଂପର୍କିତ ଏକ ସମୀକ୍ଷାତ୍ମକ ପୁସ୍ତକ, ଦୁଇଟି ଚଳଚ୍ଚିତ୍ର ଆଲେଖ୍ୟ, ଏକ ଇଂରାଜୀ ଉପନ୍ୟାସ, ଏବଂ ଏକ ଭ୍ରମଣ କାହାଣୀ ଅନ୍ତର୍ଭୁକ୍ତ । ତାଙ୍କର ପୁରସ୍କୃତ ପୁସ୍ତକ ‘ରୌଦ୍ର ସାତ୍ବିକମ୍’ ରାଜନୀତି ଓ କ୍ଷମତା, ବ୍ୟକ୍ତିତ୍ବ ଓ ରାଜ୍ୟ, କଳା ଓ ଶକ୍ତିର ସଂପର୍କ ମଧ୍ୟରେ ବ୍ୟାପ୍ତ ଅନ୍ତର୍ବିରୋଧୀ ଚେତନାକୁ ନେଇ ସ୍ବତନ୍ତ୍ର ଶୈଳୀରେ ଲିଖିତ ପୁସ୍ତକ । କାଳ ଓ ଗତିର ଅବଧାରଣା, ଧର୍ମ ଓ ଆଧ୍ୟାତ୍ମିକତାର ସମନ୍ବୟକୁ ବାଖ୍ୟାନ କରିଛି ।
୧୯୫୯ ମସିହାରେ ଐତିହାସିକ ପମ୍ପା ନଦୀ କୂଳରେ ଅବସ୍ଥିତ ତିରୁଓ୍ବଲରେ ପ୍ରଭା ବର୍ମା ଜନ୍ମଗ୍ରହଣ କରିଥିଲେ । ସେଇଠୁ ତାଙ୍କର ସାହିତ୍ୟ ସାଧନା ଆରମ୍ଭ ହୋଇଥିଲା । ପ୍ରଭା ବର୍ମା ୭୦ରୁ ଅଧିକ ପୁରସ୍କାର ଓ ସମ୍ମାନରେ ସମ୍ମାନିତ ହୋଇଛନ୍ତି । ସେ ସମ୍ମାନଜନକ ରଜତ କମଳ ରାଷ୍ଟ୍ରୀୟ ଚଳଚ୍ଚିତ୍ର ପୁରସ୍କାର, କେରଳ ସାହିତ୍ୟ ଏକାଡେମୀ , କେରଳ ସଂଗୀତ ନାଟକ ଏକାଡେମୀ ସମ୍ମାନ, କେରଳ ରାଜକୀୟ ଫିଲ୍ମ ସମ୍ମାନ ଆଦିରେ ସମ୍ମାନିତ ହୋଇଛନ୍ତି । ୨୦୧୩ରେ କେରଳର ଜ୍ଞାନପୀଠ ବିବେଚିତ ଭୟଲାର ପୁରସ୍କାର ପାଇଛନ୍ତି । ଶ୍ରେଷ୍ଠ ଲିରିକ୍ ପାଇଁ ତାଙ୍କୁ ନାସନାଲ ଫିଲ୍ମ ଆଓ୍ବାର୍ଡ ମଧ୍ୟ ମିଳିଛି । ଏଥିସହିତ ଆବୁଧାବି ଶକ୍ତି ଆଓ୍ବାର୍ଡ, ବାହାରିନ ଇଣ୍ଡିଆନ ସମାଜମ ଆଓ୍ବାର୍ଡ, ପଦ୍ମପ୍ରଭା ପୁରସ୍କାର ଆଦି ସମ୍ମାନରେ ସମ୍ମାନିତ ହୋଇଛନ୍ତି । ମୋହିନୀଆଟମ୍, ଭାରତନାଟ୍ୟମ୍ ପାଇଁ ବହୁ କର୍ଣ୍ଣାଟକ ସଂଗୀତ, ଭଜନ ମାଧ୍ୟମରେ ଶାସ୍ତ୍ରୀୟ ସଂଗୀତ କ୍ଷେତ୍ରରେ ତାଙ୍କର ମହାନ ଯୋଗଦାନ ରହିଛି। ସଂପ୍ରତି କେରଳ ମୁଖ୍ୟମନ୍ତ୍ରୀଙ୍କ ଗଣମାଧ୍ୟମ ପରାମର୍ଶଦାତା ଭାବେ ସେ ଅବସ୍ଥାପିତ ।