ନୂଆପଡ଼ା ଉପନିର୍ବାଚନରେ କଂଗ୍ରେସର ପ୍ରାର୍ଥୀ ହୋଇପାରନ୍ତି ଭେଟରାନ କଂଗ୍ରେସ ନେତା ଘାସିରାମ ମାଝୀ । ଏନେଇ ପରୋକ୍ଷରେ ସଂକେତ ଦେଇଛନ୍ତି ପିସିସି ସଭାପତି ଭକ୍ତ ଚରଣ ଦାସ । ଏବେ ସେ ନୂଆପଡ଼ା ଜିଲ୍ଲା କଂଗ୍ରେସର ସଂଯୋଜକ ଅଛନ୍ତି । ଗତ ନିର୍ବାଚନରେ ଘାସିରାମଙ୍କୁ ଟିକେଟ ଦିଆ ଯାଇ ନଥିଲା । ସର୍ବକ୍ଷମା ପରେ କଂଗ୍ରେସକୁ ଫେରି ଏବେ ଜିଲ୍ଲା ସଂଯୋଜକ ଅଛନ୍ତି ଘାସିରାମ । ଗତ ନିର୍ବଚନରେ ଘାସିରାମ ୫୧ ହଜାର ଭୋଟ ପାଇଥିବା ବେଳେ କଂଗ୍ରେସ ପ୍ରାର୍ଥୀ ୧୫ ହଜାର ଭୋଟ ପାଇଥିଲେ । କଂଗ୍ରେସ ଭୋଟ ବ୍ୟାଙ୍କ ଦେଖି ଭୟଭୀତ ଅନ୍ୟ ଦଳ । କଂଗ୍ରେସ ପ୍ରାର୍ଥୀଙ୍କୁ ଯେତେ ଅଫର ଆସିଲେ ବି ବିକ୍ରି ହେବେନି ବୋଲି କହିଛନ୍ତି ଭକ୍ତ ।
AIIMS ଡାକ୍ତରଙ୍କ ଚେତାବନୀ: ଅଧା ରନ୍ଧା ଚିକେନ୍ ଖାଇଲେ ଶରୀର ହୋଇପାରେ ପାରାଲାଇଜ୍
ଆଜିର ସମୟରେ ନିଜର ଖାଦ୍ୟପେୟରେ ପରିବର୍ତ୍ତନ କାରଣରୁ ମଣିଷ ଅନେକ ରୋଗର ସାମ୍ନା କରୁଛି । ତେବେ ଏହା ମଧ୍ୟରେ ଅଖିଳ ଭାରତୀୟ ବିଜ୍ଞାନ ପ୍ରତିଷ୍ଠାନ (ଏମ୍ସ)ର ଡାକ୍ତରମାନେ ଏକ ଚେତାବନୀ ଦେଇଛନ୍ତି । ଅଧା ରନ୍ଧା ଚିକେନ ଖାଇଲେ ଶରୀର ପାରାଲାଇଜ୍ ହୋଇପାରେ । ପ୍ରଥମେ ପାଦ ଝିମଝିମ୍ ହେବା ଆରମ୍ଭ ହୋଇ ପରେ ଏହା ସାରା ଶରୀରକୁ ବ୍ୟାପିପାରେ । ଏହାକୁ ଗିଲିୟନ-ବୈରେ ସିଣ୍ଡ୍ରୋମ (GBS) କୁହାଯାଏ । ଏହି ବିମାରୀ ବହୁତ କମ୍ ଲୋକଙ୍କ ଠାରେ ଦେଖିବାକୁ ମିଳିଥାଏ, ମାତ୍ର ଏହା ଗମ୍ଭୀର ହୋଇପାରେ ।
ଏମ୍ସ, ହାର୍ଭାର୍ଡ ଓ ଷ୍ଟେନଫୋର୍ଡରୁ ଟ୍ରେନିଂ ପ୍ରାପ୍ତ ଜଣେ ଡାକ୍ତର ଏକ ଇନଷ୍ଟାଗ୍ରାମ ଭିଡିଓରେ ଏ ବାବଦରେ ଉଲ୍ଲେଖ କରିଛନ୍ତି । ଅନେକ ସମୟରେ ଫ୍ଲୁ ବା ଅଧା ରନ୍ଧା ଚିକେନ ଖାଇବା ଦ୍ବାରା ହେଉଥିବା ଫୁଡ ପଏଜନିଂ ପରେ ମଧ୍ୟ ଜିବିଏସ ହୋଇପାରେ । ଜିବିଏସର ପ୍ରାରମ୍ଭିକ ଲକ୍ଷଣ ଚିହ୍ନଟ କରିବା ଓ ତୁରନ୍ତ ଡାକ୍ତରଙ୍କ ସହ ସଂପର୍କ କରିବା ବହୁତ ଜରୁରୀ । କାରଣ ଠିକ୍ ସମୟରେ ଚିକିତ୍ସା ନକଲେ ଗମ୍ଭୀର କ୍ଷତି ହୋଇପାରେ । ଜିବିଏସ ଏକ ଏପରି ବିମାରୀ, ଯାହା ଫଳରେ ଶରୀର ନିଜର ଇମ୍ୟନ ସିଷ୍ଟମ ଭୁଲ ଭାବେ ନର୍ଭସ ଉପରେ ଆକ୍ରମଣ କରିଦେଇଥାଏ । ଏହାଦ୍ବାରା ହାତ, ପାଦ ଝିମଝିମ, ମାଂସପେଶୀ ଦୁର୍ବଳ ହୋଇଥାଏ । ଯଦି ଠିକ୍ ସମୟରେ ଚିକିତ୍ସା କରାନଯାଏ, ତେବେ କିଛି ମାମଲାରେ ଶରୀରର ଅଙ୍ଗ ପାରାଲାଇଜ ମଧ୍ୟ ହୋଇପାରେ ।
ସର୍ବପ୍ରଥମେ ପାଦରେ ଦୁର୍ବଳ ଅନୁଭବ ହୋଇଥାଏ । ଯଦି ଠିକ୍ ସମୟରେ ଚିକିତ୍ସା କରାନଯାଏ, ତେବେ ଏହି ଦୁର୍ବଳତା ଉପରକୁ ବଢ଼ି ପୂରା ଶରୀରକୁ ପାରାଲାଇଜ କରିପାରେ । ବେଳେବେଳେ କଥା କହିବା ସମୟରେ ଖାଦ୍ୟ ଖାଇବାରେ ସମସ୍ୟା ହୋଇଥାଏ । ଏହାର ଅର୍ଥ ହେଉଛି, ଗଳାର ମାଂସପେଶୀକୁ ନିୟନ୍ତ୍ରଣ କରୁଥିବା ନସ ମଧ୍ୟ ପ୍ରଭାବିତ ହେଉଛି । ପରିସ୍ରା, ମଳତ୍ୟାଗରେ ସମସ୍ୟା ମଧ୍ୟ ଏହାର ସଙ୍କେତ ହୋଇପାରେ । ଜିବିଏସ କାରଣରୁ ବହୁତ ଯନ୍ତ୍ରଣା ହୋଇଥାଏ । ଏହି କାରଣରୁ ପିଠି, ଜଂଘ, ହାତ ଓ ପାଦରେ ସମସ୍ୟା ଦେଖାଦେଇଥାଏ ।
ମ୍ୟାଚରେ ହାତ ମିଳାଇବା କ’ଣ ଜରୁରୀ, କ’ଣ ରହିଛି ICCର ନିୟମ ?
ଦୁବାଇରେ ଗତକାଲି ଭାରତ-ପାକିସ୍ତାନ ମଧ୍ୟରେ ଖେଳାଯାଇଥିବା ମ୍ୟାଚରେ ଏକ ନୂଆ ବିବାଦ ଜନ୍ମ ନେଇଛି । ଏସିଆ କପର ଏହି ମୁକାବିଲାରେ ପାକିସ୍ତାନକୁ ୭ ଓ୍ବିକେଟରେ ପରାସ୍ତ କରିଛି ଭାରତ । ଟସ ଓ ଜିତିବା ପରେ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇ ନଥିଲେ । ଏହାପରେ ପାକିସ୍ତାନୀ ଅଧିନାୟକ ସଲମାନ ଆଗା ମ୍ୟାଚ ପରେ ପ୍ରେଜେଣ୍ଟେସନ ସେରେମନୀରେ ସାମିଲ ହୋଇନଥିଲେ । ଏହା ବିସିସିଆଇ ଓ ଟିମ୍ ମ୍ୟାନେଜମେଣ୍ଟର ନିଷ୍ପତ୍ତି ଥିଲା । କିଛି ଜିନିଷ ଖେଳ ଭାବନା ଠାରୁ ଅଧିକ ହୋଇଥାଏ ବୋଲି ଭାରତୀୟ କ୍ୟାପ୍ଟେନ ସୂର୍ଯ୍ୟକୁମାର ଯାଦବ କହିଛନ୍ତି ।
ତେବେ ଏଠାରେ ପ୍ରଶ୍ନ ଉଠୁଛି, ଖେଳ ପଡ଼ିଆରେ ଖେଳାଳିଙ୍କ ସହ ହାତ ମିଳାଇବା କ’ଣ ଜରୁରୀ ? ଏନେଇ ଅନ୍ତର୍ଜାତୀୟ କ୍ରିକେଟ ପରିଷଦ (ICC)ର କ’ଣ ନିୟମ ରହିଛି ? ବ୍ୟାଟିଂ କରୁଥିବା ଟିମ ବିରୋଧୀ ଟିମ ସହ ହାତ ମିଳାଇବା ପାଇଁ ପଡ଼ିଆରେ ପ୍ରବେଶ କରିବା ନେଇ ଅନ୍ତରାଷ୍ଟ୍ରୀୟ କ୍ରିକେଟରେ ଏକ ପରମ୍ପରା ରହିଛି । ଏହା ଉଭୟ ପକ୍ଷଙ୍କୁ ଏକ ବନ୍ଧୁତାପୂର୍ଣ୍ଣ ମ୍ୟାଚର ପରିସମାପ୍ତି କରିବା ଓ ପ୍ରୋତ୍ସାହିତ ଭରା ଶବ୍ଦର ଆଦାନ ପ୍ରଦାନ କରିବାର ସୁଯୋଗ ଦେଇଥାଏ । ତେବେ ଖେଳାଳିମାନେ ହାତ ମିଳାଇବା ବାଧ୍ୟତାମୂଳକ ବୋଲି ଆଇସିସିର ନିୟମରେ ଲେଖା ନାହିଁ । ଆଇସିସି କୋଡ ଅଫ୍ କଣ୍ଡକ୍ଟରେ ଅନ୍ୟ କିଛି କଥା ଉଲ୍ଲେଖ କରାଯାଇଛି । କୁହାଯାଇଛି ଯେ, ’ମ୍ୟାଚରେ ବିରୋଧୀ ଟିମର ଖେଳାଳି ଓ ଅମ୍ପାୟାର୍ସଙ୍କୁ ସମ୍ମାନ କରାଯିବା ଉଚିତ ।’ ଏଥିପାଇଁ କ୍ରିକେଟରେ ମ୍ୟାଚ ସରିବା ପରେ ଖେଳାଳିମାନେ ସାଧାରଣ ଭାବେ ହାତ ମିଳାଇଥାନ୍ତି ଓ ବ୍ୟାଟ / ଗ୍ଲୋବସରେ ଅଭିବାଦନ କରିଥାନ୍ତି ।
କୋଡ ଅଫ୍ କଣ୍ଡକ୍ଟ କହୁଛି, କ୍ରିକେଟକୁ ଖେଳର ଭାବନା ଦ୍ବାରା ଖେଳାଯିବା ଉଚିତ । ନିରପେକ୍ଷ ଖେଳ ଖେଳିବାର ଦାୟିତ୍ବ ଅଧିନାୟକଙ୍କର । ଏହା ସମସ୍ତ ଖେଳାଳି, ଅମ୍ପାୟାର, ବିଶେଷ ରୂପେ ଜୁନିୟର କ୍ରିକେଟ ଶିକ୍ଷକ, ପ୍ରଶିକ୍ଷକ ଓ ଅଭିଭାବକଙ୍କର ମଧ୍ୟ ହୋଇଥାଏ । ନିଜ ଦଳର ଅଧିନାୟକ, ଟିମର ସାଥୀମାନେ, ବିରୋଧୀ ଓ ଅମ୍ପାୟାରଙ୍କ ଅଧିକାରର ସମାନ କରନ୍ତୁ । ଅମ୍ପାୟାରଙ୍କ ନିଷ୍ପତ୍ତିକୁ ସ୍ବୀକାର କରନ୍ତୁ । ବିପକ୍ଷ ଦଳର ସଫଳତା ପାଇଁ ଅଭିନନ୍ଦନ ଜଣାନ୍ତୁ ଓ ନିଜ ଟିମର ସଫଳତାର ଆନନ୍ଦ ନିଅନ୍ତୁ । ତେବେ ନୋ-ହ୍ୟାଣ୍ଡଶେକଙ୍କୁ ନେଇ ପାକିସ୍ତାନର ବହୁ ପୂର୍ବତନ କ୍ରିକେଟର ସମାଲୋଚନା କରିଛନ୍ତି । ମ୍ୟାଚ ପରେ ସଲମାନ ଅଲୀ ଆଗା ନ ଆସି ଠିକ୍ କରିଛନ୍ତି ବୋଳି ଶୋଏବ ଅଖତର କହିଛନ୍ତି । ଅନ୍ୟପକ୍ଷରେ ଆମେ ନିଜ ସରକାର ଓ ବିସିସିଆଇ ସହ ଅଛୁ ବୋଲି ସୂର୍ଯ୍ୟକୁମାର କହିଛନ୍ତି ।
ମହାରାଷ୍ଟ୍ର ରାଜ୍ୟପାଳ ଭାବେ ଶପଥ ନେଲେ ଆଚାର୍ଯ୍ୟ ଦେବବ୍ରତ
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ରର ରାଜ୍ୟପାଳ ଭାବେ ଭାବେ ଶପଥ ନେଲେ ଆଚାର୍ଯ୍ୟ ଦେବବ୍ରତ । ସେ ଗୁଜରାଟ ସହ ମହାରାଷ୍ଟ୍ରର ଦାୟିତ୍ବ ମଧ୍ୟ ତୁଲାଇବେ। ନୂଆ ରାଜ୍ୟପାଳଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ବମ୍ବେ ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ ଚନ୍ଦ୍ରଶେଖର। ଗତ ସପ୍ତାହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମହାରାଷ୍ଟ୍ର ରାଜ୍ୟପାଳ ଭାବେ ତାଙ୍କୁ ନିଯୁକ୍ତ କରିଥିଲେ ।ରାଜ୍ୟପାଳ ଥିବା ସି ପି ରାଧାକ୍ରିଷ୍ଣନ ଉପରାଷ୍ଟ୍ରପତି ନିର୍ବାଚିତ ହେବା ପରେ ମହାରାଷ୍ଟ୍ର ରାଜ୍ୟପାଳ ପଦ ଖାଲି ପଡିଥିଲା।
ଆଜି ଏକ ଭବ୍ୟ ଉତ୍ସବରେ ସେ ଆଚାର୍ଯ୍ୟ ଦେବବ୍ରତ ନୂଆ ରାଜ୍ୟପାଳ ଭାବେ ଶପଥ ଗ୍ରହଣ କରିଛନ୍ତି । ସେ ସଂସ୍କୃତରେ ଶପଥ ନେଇଛନ୍ତି । ଶପଥ ଗ୍ରହଣ ଉତ୍ସବରେ ମୁଖ୍ଯମନ୍ତ୍ରୀ ଦେବେନ୍ଦ୍ର ଫଡନାଭିସ, ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଅନ୍ୟ କ୍ୟାବିନେଟ ମନ୍ତ୍ରୀ ଉପସ୍ଥିତ ଥିଲେ । ୬୬ ବର୍ଷୀୟ ଆଚାର୍ଯ୍ୟ ଦେବବ୍ରତ ହିନ୍ଦୀ ଓ ଇତିହାସରେ ପୋଷ୍ଟ ଗ୍ରାଜୁଏସନ କରିଥିବାବେଳେ ନାଚ୍ଯୁରୋପାଥି ଓ ଯୋଗ ବିଜ୍ଞାନରେ ଡକ୍ଟରେଟ କରିଛନ୍ତି । ସେ ଜଣେ ଶିକ୍ଷାବିତ ଓ ଆର୍ଯ୍ୟ ସମାଜ ପ୍ରଚାରକ ଭାବେ ପରିଚିତି ହାସଲ କରିଛନ୍ତି । ୨୦୧୯ରୁ ସେ ଗୁଜରାଟ ରାଜ୍ୟପାଳ ଭାବେ କାର୍ଯ୍ୟ କରିଆସୁଛନ୍ତି ।
ନେପାଳରେ ପୁଣି ରାଜନୈତିକ ଅସ୍ଥିରତା; କାର୍କିଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ
ନନ୍ଦିଘୋଷ ବ୍ୟୁରୋ: ପୁଣି ଅଶାନ୍ତ ହେଉଛି ନେପାଳ । ସୁଶୀଳା କାର୍କିଙ୍କ ଶପଥ ଗ୍ରହଣର ମାତ୍ର ତିନି ଦିନ ପରେ ନେପାଳର ରାଜନୀତି ପୁଣି ଥରେ ବଦଳିଯାଇଛି । ରାଷ୍ଟ୍ରପତି ରାମଚନ୍ଦ୍ର ପାଉଡେଲଙ୍କ ନିକଟରେ କାର୍କିଙ୍କ ନାମ ପାଇଁ ଲବି କରୁଥିବା ଜେନେରେସନ-ଜେଡ୍ ଲୋକମାନେ ଏବେ ତାଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରୁଛନ୍ତି । ସୋମବାର ଦିନ ଜେନେରେସନ-ଜେଡ୍ ପ୍ରଧାନମନ୍ତ୍ରୀଙ୍କ ସରକାରୀ ବାସଭବନ ବାହାରେ ପ୍ରତିବାଦ କରାଯାଉଛି । ‘ହମ୍ ନେପାଳୀ’ ଏନଜିଓର ସୁଦାନ ଗୁରୁଙ୍ଗଙ୍କ ନେତୃତ୍ୱରେ ଏହି ପ୍ରତିବାଦ କରାଯାଇଥିଲା। ପୋଲିସ ଗୁଳିରେ ଯେଉଁମାନଙ୍କର ପିଲାମାନେ ପ୍ରାଣ ହରାଇଥିଲେ, ସେମାନେ ମଧ୍ୟ ଏହି ପ୍ରତିବାଦରେ ଅଂଶଗ୍ରହଣ କରିଥିଲେ।
ଏକ ରିପୋର୍ଟ ଅନୁଯାୟୀ ସୁଦାନ ଗୁରୁଙ୍ଗଙ୍କ ନେତୃତ୍ୱରେ ପ୍ରଦର୍ଶନକାରୀମାନେ ସୁଶୀଳା କାର୍କି ମୁର୍ଦାବାଦ ସ୍ଲୋଗାନ ଦେଇଥିଲେ। ଏହି ପ୍ରଦର୍ଶନକାରୀମାନେ କହିଥିଲେ ଯେ କାର୍କି ପ୍ରଧାନମନ୍ତ୍ରୀଙ୍କ ଚୌକିରେ ବସିବା ମାତ୍ରେ ଆନ୍ଦୋଳନର ମୌଳିକ ନୀତିଗୁଡ଼ିକୁ ଭୁଲି ଯାଇଛନ୍ତି। କାର୍କିଙ୍କ ଉପରେ ମନଇଚ୍ଛା ନିଷ୍ପତ୍ତି ନେବାର ଅଭିଯୋଗ ରହିଛି । ପ୍ରତିବାଦକାରୀମାନେ କହିଛନ୍ତି ଯେ କାର୍କି ଗଠନ କରୁଥିବା ମଧ୍ୟବର୍ତ୍ତୀକାଳୀନ କ୍ୟାବିନେଟରେ ଜେନେରେସନ-ଜେଡର ମତାମତକୁ ବିଚାରକୁ ନିଆଯାଉନାହିଁ। ସୋମବାର ଦିନ କାର୍କି ମଧ୍ୟବର୍ତ୍ତୀକାଳୀନ ସରକାରରେ ୩ ଜଣଙ୍କୁ ମନ୍ତ୍ରୀ ଭାବରେ ନିଯୁକ୍ତ କରିଥିଲେ।
ନେପାଳ ରାଷ୍ଟ୍ରପତିଙ୍କ କାର୍ଯ୍ୟାଳୟ ଅନୁଯାୟୀ, କୁଲମାନ ଘିସିଂଙ୍କୁ ଶକ୍ତି ଏବଂ ପଦାର୍ଥ ବିଜ୍ଞାନ ବିଭାଗର ମଧ୍ୟବର୍ତ୍ତୀକାଳୀନ ମନ୍ତ୍ରୀ, ଓମ ପ୍ରକାଶ ଆର୍ଯ୍ୟଲଙ୍କୁ ଗୃହ ଏବଂ ଆଇନ ବିଭାଗର ମଧ୍ୟବର୍ତ୍ତୀକାଳୀନ ମନ୍ତ୍ରୀ ଏବଂ ରାମେଶ୍ୱର ଖାନଲଙ୍କୁ ଅର୍ଥ ବିଭାଗର ମଧ୍ୟବର୍ତ୍ତୀକାଳୀନ ମନ୍ତ୍ରୀ ଭାବରେ ନିଯୁକ୍ତ କରାଯାଇଛି । ସୁଦାନ ଗୁରୁଙ୍ଗ କହିଛନ୍ତି ଯେ ଓମ ପ୍ରକାଶ ଆର୍ଯ୍ୟଲ ପ୍ରତିବାଦରେ କୌଣସି ସ୍ଥାନରେ ନଥିଲେ। ବାଲେନ୍ଦ୍ର ସାହଙ୍କ ଅନୁରୋଧରେ ତାଙ୍କୁ ଗୃହ ବିଭାଗର ଦାୟିତ୍ୱ ଦିଆଯାଇଛି । ଆଗାମୀ ନିର୍ବାଚନରେ ବାଲେନ୍ଦ୍ର ସାହ ଭୂମିକା ଗ୍ରହଣ କରିପାରିବେ। ଆର୍ଯ୍ୟଲ ସାହଙ୍କ ଆଇନଗତ ପରାମର୍ଶଦାତା ରହିଆସିଛନ୍ତି।
ଜେନେରେସନ-ଜେଡର ବିରୋଧ ପରେ, କେପି ଶର୍ମା ଓଲି ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ଓଲିଙ୍କ ଇସ୍ତଫା ପରେ, ରାଷ୍ଟ୍ରପତି ରାମଚନ୍ଦ୍ର ପାଉଡେଲ ସଂସଦକୁ ଭାଙ୍ଗି ଦେଇଥିଲେ। ଜେନେରେସନ-ଜେଡର ସୁପାରିଶରେ ପାଉଡେଲ ସୁଶୀଳା କାର୍କିଙ୍କୁ ମଧ୍ୟବର୍ତ୍ତୀକାଳୀନ ପ୍ରଧାନମନ୍ତ୍ରୀ ଭାବରେ ନିଯୁକ୍ତ କରିଥିଲେ। କାର୍କି ନେପାଳର ପୂର୍ବତନ ମୁଖ୍ୟ ବିଚାରପତି ରହିସାରିଛନ୍ତି ।
ନେପାଳ ରାଷ୍ଟ୍ରପତିଙ୍କ ଅନୁଯାୟୀ ଆସନ୍ତା୬ମାସ ମଧ୍ୟରେ ସାଧାରଣ ନିର୍ବାଚନ ଅନୁଷ୍ଠିତ ହେବ। ଏହା ପରେ କାର୍କି ନିର୍ବାଚିତ ନେତାଙ୍କୁ ପ୍ରଧାନମନ୍ତ୍ରୀଙ୍କ ଚୌକି ହସ୍ତାନ୍ତର କରିବେ। କାର୍କିଙ୍କୁ ମୁଖ୍ୟତଃ ନିରପେକ୍ଷ ନିର୍ବାଚନ ପରିଚାଳନା ଦାୟିତ୍ୱ ଦିଆଯାଇଛି । ନେପାଳରେ ପ୍ରଧାନମନ୍ତ୍ରୀ ପ୍ରତିନିଧି ସଭା ମାଧ୍ୟମରେ ନିଯୁକ୍ତ ହୁଅନ୍ତି । ପ୍ରତିନିଧି ସଭାରେ ୨୭୫ଟି ଆସନ ଅଛି। ସରକାର ଗଠନ ପାଇଁ ୧୩୮ଟି ଆସନ ଆବଶ୍ୟକ।
ଚାଷୀଙ୍କ ପାଇଁ ସରକାରଙ୍କୁ ଘେରିଲା ବିଜେଡି ; ରାଜଭବନ ଆଗରେ ବିଜେଡିର ଧାରଣା
ଭୁବନେଶ୍ବର : ଚାଷୀଙ୍କ ପାଇଁ ବିଜେଡିର ଲଢ଼େଇ। ରାଜ୍ୟରେ ଚାଲିଥିବା ସାର ସଙ୍କଟ ବିରୋଧରେ ରାଜଭବନ ଆଗରେ ବିଜେଡିର ଧାରଣା। ବିଜେପି ସରକାର ଉପରେ ଜଣେ ଜଣେ ପରେ ସମସ୍ତ ବିଜେଡି ନେତା ବର୍ଷିଛନ୍ତି। ଏ ପର୍ଯ୍ୟନ୍ତ ସବୁ ଜିଲ୍ଲାରେ ପହଞ୍ଚିପାରିଲାନି ଆବଶ୍ୟକ ସାର । ସାର ପାଇଁ ଡହଳବିକଳ ହେଉଛନ୍ତି ଚାଷୀ । ମନ୍ତ୍ରୀମାନେ କହୁଛନ୍ତି, ରାଜ୍ୟରେ ଯଥେଷ୍ଟ ସାର ମହଜୁଦ ଅଛି। ଯଦି ସାର ଅଛି, ତେବେ ଚାଷୀଙ୍କୁ କାହିଁକି ମିଳୁନି। ମିଛ କହୁଛନ୍ତି ମନ୍ତ୍ରୀମାନେ। ସାର ଯୋଗାଣକୁ ବ୍ୟବସ୍ଥିତ ଓ କଳାବଜାରୀ ରୋକିବାରେ ରାଜ୍ୟ ସରକାର ସମ୍ପୂର୍ଣ୍ଣ ବିଫଳ ହୋଇଛନ୍ତି। ସମସ୍ୟାର ସମାଧାନ କରିବା ପରିବର୍ତ୍ତେ ରାଜ୍ୟର କୃଷକ ସମାଜକୁ ସରକାର ଭୁଆଁ ବୁଲାଉଛନ୍ତି ।
ୱାକଫ୍ ଆଇନ ଉପରେ ରୋକ୍ ଲଗାଇବାକୁ ମନା କଲେ ସୁପ୍ରିମକୋର୍ଟ, ଦୁଇଟି ଯୁକ୍ତି ଉପରେ ରାଜି
ନନ୍ଦିଘୋଷ ବ୍ୟୁରୋ : ଓ୍ବାକଫ ଆଇନକୁ ନେଇ ଆସିଲା ବଡ଼ ଖବର । ୱାକଫ ଆଇନ ଉପରେ ସୁପ୍ରିମକୋର୍ଟ ନେଇଛନ୍ତି ବଡ଼ ନିଷ୍ପତ୍ତି । ସୁପ୍ରିମକୋର୍ଟ ଏହି ମାମଲାରେ ମୁସଲିମ ପକ୍ଷର କିଛି ଯୁକ୍ତି ଗ୍ରହଣ କରିଛନ୍ତି କିନ୍ତୁ ସମ୍ପୂର୍ଣ୍ଣ ଆଇନ ଉପରେ ରୋକ ଲଗାଇବାକୁ ମନା କରିଛନ୍ତି। ସିଜେଆଇ ବିଆର ଗଭାଇଙ୍କ ଅଧ୍ୟକ୍ଷତାରେ ଗଠିତ ସୁପ୍ରିମକୋର୍ଟ ଖଣ୍ଡପୀଠ ସ୍ପଷ୍ଟ କରିଛନ୍ତି ଯେ ୱାକଫ ସମ୍ପତ୍ତି ସମ୍ପର୍କରେ କଲେକ୍ଟରଙ୍କ ନିଷ୍ପତ୍ତି ଚୂଡ଼ାନ୍ତ ନିଷ୍ପତ୍ତି ହେବ ନାହିଁ। ଏହା ସହିତ, ୱାକଫ ସଂଶୋଧନ ଆଇନ ୨୦୨୫ର ସେହି ବ୍ୟବସ୍ଥା ଉପରେ ରୋକ ଲଗାଯାଇଛି, ଯେଉଁଥିରେ କୁହାଯାଇଥିଲା ଯେ ୱାକଫ ସୃଷ୍ଟି କରିବା ପାଇଁ ଜଣେ ବ୍ୟକ୍ତି ୫ ବର୍ଷ ପାଇଁ ଇସଲାମ ଧର୍ମର ଅନୁଗାମୀ ହେବା ଆବଶ୍ୟକ।
ସିଜେଆଇ ଗଭାଇ ସ୍ପଷ୍ଟ କରିଥିଲେ ଯେ ଏହି ସମ୍ପୂର୍ଣ୍ଣ ଆଇନକୁ ନିଷିଦ୍ଧ କରିବାର କୌଣସି ଆଧାର ନାହିଁ। ପୂର୍ବରୁ ମେ ୨୨ ତାରିଖରେ ଲଗାତାର ତିନି ଦିନର ଶୁଣାଣି ପରେ, କୋର୍ଟ ନିଷ୍ପତ୍ତି ସଂରକ୍ଷିତ ରଖିଥିଲେ। ଗତ ଶୁଣାଣିରେ ଆବେଦନକାରୀମାନେ କହିଥିଲେ ଯେ ଏହି ଆଇନ ମୁସଲମାନମାନଙ୍କ ଅଧିକାର ବିରୁଦ୍ଧରେ ଏବଂ ମଧ୍ୟବର୍ତ୍ତୀକାଳୀନ ସ୍ଥଗିତାଦେଶ ଦାବି କରିଥିଲେ। ସେହି ସମୟରେ କେନ୍ଦ୍ର ସରକାର ଆଇନ ସପକ୍ଷରେ ଯୁକ୍ତି ଉପସ୍ଥାପନ କରିଥିଲେ।
ପ୍ରକୃତରେ ଦେଶରେ ୱାକଫ ଆଇନ କାର୍ଯ୍ୟକାରୀ ହେବା ପରେ ସୁପ୍ରିମକୋର୍ଟରେ ଏହା ବିରୁଦ୍ଧରେ ଏକ ଆବେଦନ ଦାୟର କରାଯାଇଥିଲା ଯେଉଁଥିରେ ଏହି ଆଇନକୁ ସମ୍ବିଧାନ ବିରୋଧୀ ବୋଲି କୁହାଯାଇଥିଲା। ମାମଲାର ତିନି ଦିନ ଧରି ନିରନ୍ତର ଶୁଣାଣି ହୋଇଥିଲା ଏବଂଏହି ସମୟରେ ସମସ୍ତ ପକ୍ଷଙ୍କ ଯୁକ୍ତି ଶୁଣାଯାଇଥିଲା ଏବଂ ନିଷ୍ପତ୍ତି ସଂରକ୍ଷିତ ରଖାଯାଇଥିଲା।
ତେବେ ଜାଣନ୍ତୁ ସୁପ୍ରିମକୋଟ କ’ଣ ରାୟ ଦେଇଛନ୍ତି ..
-ୱାକଫ ବୋର୍ଡ ସରକାରୀ ସମ୍ପତ୍ତି ଉପରେ ଜବରଦଖଲ କରିଛି କି ନାହିଁ ତାହା କେବଳ ଜଣେ ସରକାରୀ ଅଧିକାରୀ ନିଷ୍ପତ୍ତି ନେବେ । ଏହି ବ୍ୟବସ୍ଥା ୱାକଫ ସଂଶୋଧନ ଆଇନରେ ସଂରକ୍ଷିତ ରହିବ ଯାହା ଜଣେ ସରକାର ଦ୍ୱାରା ନିଯୁକ୍ତ ଅଧିକାରୀଙ୍କୁ ୱାକଫ ସମ୍ପତ୍ତି ସରକାରୀ ସମ୍ପତ୍ତି ଉପରେ ଜବରଦଖଲ କରିଛି କି ନାହିଁ ତାହା ନିର୍ଣ୍ଣୟ କରିବାର କ୍ଷମତା ପ୍ରଦାନ କରେ।
-ୱାକଫ ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜଣେ ମୁସଲମାନ ହେବା ଉଚିତ । ସୁପ୍ରିମକୋର୍ଟ ୱାକଫ ବୋର୍ଡରେ ଜଣେ ଅଣମୁସଲିମ ବ୍ୟକ୍ତିଙ୍କୁ ସିଇଓ ଭାବରେ ନିଯୁକ୍ତି ଦେବା ସମ୍ପର୍କିତ ସଂଶୋଧନ ଉପରେ ସ୍ଥଗିତାଦେଶ ଦେବାକୁ ମନା କରିଦେଇଥିଲେ। ତଥାପି ଏହା ମଧ୍ୟ ନିର୍ଦ୍ଦେଶ ଦେଇଥିଲେ ଯେ ଯଥାସମ୍ଭବ ୱାକଫ ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜଣେ ମୁସଲିମ ହେବା ଉଚିତ।
-ସୁପ୍ରିମକୋର୍ଟ ୱାକଫ ସଂଶୋଧନ ଆଇନ ୨୦୨୫ର ସେହି ବ୍ୟବସ୍ଥା ଉପରେ ସ୍ଥଗିତାଦେଶ ଜାରି କରିଛନ୍ତି, ଯେଉଁଥିରେ କୁହାଯାଇଥିଲା ଯେ ୱାକଫ ସୃଷ୍ଟି କରିବା ପାଇଁ ଜଣେ ବ୍ୟକ୍ତିଙ୍କୁ ୫ବର୍ଷ ପାଇଁ ଇସଲାମ ଧର୍ମର ଅନୁଗାମୀ ହେବାକୁ ପଡିବ। ରାଜ୍ୟ ସରକାରମାନେ ଜଣେ ବ୍ୟକ୍ତି ଇସଲାମ ଧର୍ମର ଅନୁଗାମୀ କି ନୁହେଁ ତାହା ନିର୍ଣ୍ଣୟ କରିବା ପର୍ଯ୍ୟନ୍ତ ଏହି ବ୍ୟବସ୍ଥା ସ୍ଥଗିତ ରହିବ।
-ୱାକଫ ସମ୍ପତ୍ତି ଉପରେ କଲେକ୍ଟରଙ୍କ ନିଷ୍ପତ୍ତି ଚୂଡ଼ାନ୍ତ ନୁହେଁ । ୱାକଫ ସମ୍ପତ୍ତି ସମ୍ପର୍କରେ କଲେକ୍ଟରଙ୍କ ଅଧିକାର ଉପରେ ସୁପ୍ରିମକୋର୍ଟ କହିଛନ୍ତି ଯେ କଲେକ୍ଟରଙ୍କ ନିଷ୍ପତ୍ତି ଚୂଡ଼ାନ୍ତ ନିଷ୍ପତ୍ତି ହେବ ନାହିଁ। ସୁପ୍ରିମକୋର୍ଟ ମୁସଲିମ ପକ୍ଷର ଏହି ଯୁକ୍ତିକୁ ଗ୍ରହଣ କରିଛନ୍ତି ।
-ୱାକଫ ସମ୍ପତ୍ତିର ପଞ୍ଜୀକରଣର ବ୍ୟବସ୍ଥା ନୂଆ ନୁହେଁ । ୱାକଫ ଆଇନ ଉପରେ ସୁପ୍ରିମକୋର୍ଟ ଜେଆଇ ବି.ଆର. ଗଭାଇ କହିଛନ୍ତି, ଆମେ କହିଛୁ ଯେ ପଞ୍ଜୀକରଣ ୧୯୯୫ ରୁ ୨୦୧୩ ପର୍ଯ୍ୟନ୍ତ ଥିଲା । ତେଣୁ ଆମେ କହିଛୁ ଯେ ପଞ୍ଜୀକରଣ ଏକ ନୂତନ ବ୍ୟବସ୍ଥା ନୁହେଁ। ଆମେ ପଞ୍ଜୀକରଣର ସମୟ ସୀମା ମଧ୍ୟ ବିଚାର କରିଛୁ।
-ୱାକଫ ବୋର୍ଡରେ ୩ଜଣରୁ ଅଧିକ ଅଣମୁସଲିମ ସଦସ୍ୟ ରହିବେ ନାହିଁ… ସିଜେଆଇ ଗଭାଇ ଏହା ମଧ୍ୟ କହିଛନ୍ତି ଯେ କଲେକ୍ଟରଙ୍କୁ ବ୍ୟକ୍ତିଗତ ନାଗରିକଙ୍କ ଅଧିକାର ନିଷ୍ପତ୍ତି ନେବାକୁ ଅନୁମତି ଦିଆଯାଇପାରିବ ନାହିଁ। ଏହା କ୍ଷମତା ପୃଥକୀକରଣ ନୀତିକୁ ଉଲ୍ଲଂଘନ କରିବ। ଯେପର୍ଯ୍ୟନ୍ତ ଟ୍ରିବ୍ୟୁନାଲ ଦ୍ୱାରା ନିଷ୍ପତ୍ତି ନିଆଯାଇନାହିଁ, ସେପର୍ଯ୍ୟନ୍ତ କୌଣସି ପକ୍ଷ ବିରୁଦ୍ଧରେ କୌଣସି ତୃତୀୟ ପକ୍ଷ ଅଧିକାର ସୃଷ୍ଟି କରାଯାଇପାରିବ ନାହିଁ। କଲେକ୍ଟରଙ୍କୁ ଏପରି କ୍ଷମତା ପ୍ରଦାନ କରିବାର ବ୍ୟବସ୍ଥା ସ୍ଥଗିତ ରହିବ।
-ସମ୍ପୂର୍ଣ୍ଣ ୱାକଫ ଆଇନକୁ ନିଷିଦ୍ଧ କରିବାର କୌଣସି ଆଧାର ନାହିଁ… CJI ବି.ଆର. ଗଭାଇ କହିଛନ୍ତି, ‘ଆମେ ସ୍ୱୀକାର କରିଛୁ ଯେ ଯେକୌଣସି ଆଇନର ସାମ୍ବିଧାନିକତା ସପକ୍ଷରେ ସର୍ବଦା ଏକ ଅନୁମାନ ରହିଥାଏ ଏବଂ କେବଳ ଅତି ବିରଳ କ୍ଷେତ୍ରରେ ହସ୍ତକ୍ଷେପ କରାଯାଇପାରିବ। ସେ କହିଛନ୍ତି, ‘ଆମେ ପ୍ରତ୍ୟେକ ଧାରା ପ୍ରତି ପ୍ରାରମ୍ଭିକ ଚ୍ୟାଲେଞ୍ଜକୁ ବିଚାର କରିଛୁ। ସମଗ୍ର ଆଇନର ବ୍ୟବସ୍ଥାକୁ ସ୍ଥଗିତ ରଖିବା ପାଇଁ ଆଧାର ଅଛି। କିନ୍ତୁ କିଛି ଧାରା ସୁରକ୍ଷା ଆବଶ୍ୟକ କରେ। ଧାରା 3 (r) ବ୍ୟବସ୍ଥା ଏକ ସର୍ତ୍ତ ଲାଗୁ କରେ ଯେ ବ୍ୟକ୍ତି 5 ବର୍ଷ ପାଇଁ ଇସଲାମ ପାଳନ କରିବା ଉଚିତ। କୌଣସି ବ୍ୟବସ୍ଥା ବିନା ଏହି ବ୍ୟବସ୍ଥା ମନମୁଖୀ କ୍ଷମତା ବ୍ୟବହାର କରିବ ତେଣୁ ଏହାକୁ ସ୍ଥଗିତ ରଖାଯାଇଛି।
-ୱାକଫ ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜଣେ ମୁସଲମାନ ହେବା ଉଚିତ । ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ଯେ ଯଥାସମ୍ଭବ ୱାକଫ ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜଣେ ମୁସଲମାନ ହେବା ଉଚିତ। ସେହି ସମୟରେ କୋର୍ଟ ଜଣେ ଅଣମୁସଲମାନକୁ ସିଇଓ ଭାବରେ ନିଯୁକ୍ତି ଦେବା ସମ୍ପର୍କିତ ସଂଶୋଧନ ଉପରେ ସ୍ଥଗିତାଦେଶ ଦେବାକୁ ମନା କରିଦେଇଥିଲେ ।
ନାକେଦମ କଲା ମାଙ୍କଡ ; ତିନି ଘଣ୍ଟା ଧରି ବିଦ୍ୟୁତ ଖୁଣ୍ଟରେ ବସିରହିଲା
ଚୌଦ୍ଵାର : ନାକେଦମ କଲା ମାଙ୍କଡ । ପ୍ରାୟ ତିନି ଘଣ୍ଟା ଧରି ବିଦ୍ୟୁତ୍ ଖୁଣ୍ଟରେ ବସି ରହିଲା । ଅନ୍ଧାରରେ ମାଙ୍କଡକୁ ଉଦ୍ଧାର କରିବାକୁ ଯାଇ ହଇରାଣ ହେଲେ ବିଦ୍ୟୁତ୍,ଦମକଳ, ବନ ବିଭାଗ ଓ ପୋଲିସ କର୍ମଚାରୀ । ଏଭଳି ଏକ ଘଟଣା ଦେଖିବାକୁ ମିଳିଛି ଚୌଦ୍ଵାର ଅଞ୍ଚଳରେ । ଚୌଦ୍ଵାର କଳିଙ୍ଗ ଛକରେ ଥିବା ଏକ ବିଦ୍ୟୁତ୍ ଖୁଣ୍ଟରେ ମାଙ୍କଡଟି ଚଢ଼ିଯିବା ଫଳରେ ବିଦ୍ୟୁତ୍ ସଟ୍ ହୋଇ କରେଣ୍ଟ କଟି ଯାଇଥିଲା । ମାତ୍ର ମାଙ୍କଡଟି ବିଦ୍ୟୁତ୍ ଖୁଣ୍ଟରେ ବସି ରହିଥିଲା । ଦୁଇଟି ତାରକୁ ଧରି କିଛି ସମୟ ଖେଳିବାକୁ ଲାଗିଥିଲା ।
ସ୍ଥାନୀୟ ଲୋକେ ଦେଖି ବିଦ୍ୟୁତ୍ ବିଭାଗକୁ ଖବର ଦେଇଥିଲେ । ବିଦ୍ୟୁତ୍ ବିଭାଗ ନିରୁପ୍ରାୟ ହୋଇ ବନ ବିଭାଗକୁ ଜଣାଇଥିଲେ । ବନ ବିଭାଗ କର୍ମଚାରୀ ଉଦ୍ଧାର କରିବାରେ ସକ୍ଷମ ନହେବାରୁ ଦମକଳ ବିଭାଗର ସାହାଯ୍ୟ ନେଇଥିଲେ । ପ୍ରାୟ ତିନି ଘଣ୍ଟାର କସରତ ପରେ ମାଙ୍କଡ ଟି ଉଦ୍ଧାର ହୋଇଥିଲା । ମାଙ୍କଡଟି ଏବେ ସୁସ୍ଥ ଥିବା ଚୌଦ୍ଵାର ବନପାଳ କହିଛନ୍ତି ।
ଝାଡ଼ଖଣ୍ଡର ଦୁର୍ଦ୍ଦାନ୍ତ ନକ୍ସଲ ନିହତ ; ଏନକାଉଣ୍ଟରରେ ନିହତ ସୁଖଦେବ ଯାଦବ
ନନ୍ଦିଘୋଷ ବ୍ୟୁରୋ: ସୁରକ୍ଷାକର୍ମୀଙ୍କ ଗୁଳିରେ ଦୁର୍ଦ୍ଦାନ୍ତ ନକ୍ସଲ ନିହତ । ଝାଡ଼ଖଣ୍ଡ ପାଲାମୁ ଜିଲ୍ଲାର ମାନାଟୁ ଥାନା ଅଞ୍ଚଳରେ ହୋଇଥିଲା ଏନକାଉଣ୍ଟର । ବାନ୍ସି ଗାଁର ଜଙ୍ଗଲରେ ଦୁର୍ଦ୍ଦାନ୍ତ ନକ୍ସଲ ମୁଖଦେବ ଯାଦବ ଲୁଚିଥିବାର ଖବର ପାଇ ଚଢ଼ାଉ କରିଥିଲେ ସୁରକ୍ଷାକର୍ମୀ । ଗୁଳି ବିନିମୟ ପରେ ସୁଖଦେବ ଯାଦବ ନିହତ ହୋଇଛି । ତା ନାଁରେ ୫ ଲକ୍ଷ ଟଙ୍କାର ପୁରସ୍କାର ଥିଲା । ପୋଲିସ ଘଟଣାସ୍ଥଳରୁ ଗୋଟିଏ ଇନସାସ ରାଇଫଲ୍ ଜବତ କରିଛି ଓ ଅନ୍ୟ ନକ୍ସଲ ଛତ୍ରଭଙ୍ଗ ଦେଇଥିବାରୁ ସର୍ଚ୍ଚ ଅପରେଶନ ଜାରି ରହିଛି ।
ଚାଇବାସା ଜିଲ୍ଲାର ଗୋଇଲକେରା ଥାନା ଅଞ୍ଚଳରେ ଦୁଇ ସପ୍ତାହ ତଳେ ଏକ ଏନକାଉଣ୍ଟରରେ ସିପିଆଇ ମାଓବାଦୀ ଜୋନାଲ କମାଣ୍ଡର ଅମିତ ହାଂସଦା ଓରଫ ଉପ୍ତାନ ବି ନିହତ ହୋଇଥିଲା। ଧୀରେ ଧୀରେ ଏହି ଅଞ୍ଚଳରେ ଲାଲଗଡ଼ ଭୁଶୁଡ଼ୁଛି।
ଭାରତର ସବୁଠାରୁ ଚତୁର ଚୋର, ଯିଏ ବିଚାରପତି ହୋଇ ନିଜ ମୁକ୍ତି ଘୋଷଣା କରିଥିଲେ
ନନ୍ଦିଘୋଷ ବ୍ୟୁରୋ : ବିଶ୍ୱରେ ଅନେକ ଲୋକ ଅଛନ୍ତି ଯେଉଁମାନେ ସେମାନଙ୍କର କାରନାମା ପାଇଁ ପ୍ରସିଦ୍ଧ। ଚାର୍ଲ୍ସ ଶୋଭରାଜଙ୍କ ନାମ ଏହି ତାଲିକାର ଶୀର୍ଷରେ ଅଛି। ଚାର୍ଲ୍ସଙ୍କ ପରି ଭାରତର ଜଣେ ବଡ଼ ଗୁଣ୍ଡା ଅପରାଧ ଜଗତରେ ବହୁତ ନାମ ଅର୍ଜନ କରିଥିଲେ। ମଜାଦାର କଥା ହେଉଛି ଯେ ସେ ଜଣେ ବିଚାରପତି ହୋଇ ନିଜ ମୁକ୍ତିର ରାୟ ମଧ୍ୟ ଶୁଣାଇଥିଲେ। ଏହା ମଧ୍ୟ କୁହାଯାଏ ଯେ ସେ ଥରେ ଚାର୍ଲ୍ସ ଶୋଭରାଜଙ୍କ ମାମଲାରେ ମଧ୍ୟ ରାୟ ଶୁଣାଇଥିଲେ। ଏହି ବଡ଼ ଗୁଣ୍ଡାଙ୍କ ନାମ ଧନୀରାମ ମିତ୍ତଲ। ଧନୀରାମ ହରିୟାଣାର ବାସିନ୍ଦା ଥିଲେ। ଧନୀରାମ ହଜାରରୁ ଅଧିକ ଗାଡ଼ି ଚୋରି କରିଥିଲେ। ତାଙ୍କ ବିରୁଦ୍ଧରେ ୧୫୦ ରୁ ଅଧିକ ମାମଲା ରୁଜୁ ହୋଇଥିଲା ଏବଂ ସେ ୯୦ ଥର ଜେଲ ଯାଇଥିଲେ। ଧନୀରାମ ହରିୟାଣା, ପଞ୍ଜାବ, ରାଜସ୍ଥାନ ଏବଂ ଚଣ୍ଡିଗଡ଼ର ଅନେକ ଅଞ୍ଚଳରେ ଅପରାଧ କରିଛନ୍ତି। ଏକ ରିପୋର୍ଟ ଅନୁଯାୟୀ, ଧନୀରାମ ହରିୟାଣାର ରୋହତକରୁ ବିଏସସି ସମାପ୍ତ କରିଥିଲେ ଏବଂ ତା’ପରେ ସେ ରାଜସ୍ଥାନରୁ ଏଲଏଲବି ପଢିଥିଲେ। ଯେତେବେଳେ ତାଙ୍କୁ ସରକାରୀ ଚାକିରି ମିଳିଲା ନାହିଁ, ସେ ଅପରାଧ ଜଗତରେ ପ୍ରବେଶ କରିଥିଲେ।
ନିଜ ମୁକ୍ତିର ନିଷ୍ପତ୍ତି ଘୋଷଣା
୧୯୮୦ ମସିହାରେ ଧନୀରାମ ଏପରି କିଛି କରିଥିଲେ ଯାହା ଭାରତ ଇତିହାସରେ ପ୍ରଥମ ଥର ଥିଲା। ସେ ଜଣେ ନକଲି ବିଚାରପତି ଭାବରେ କାମ କରିଥିଲେ ଏବଂ ପ୍ରାୟ ୪୦ ଦିନ ଧରି ଝାଜ୍ଜର କୋର୍ଟରେ ରାୟ ଶୁଣାଇଥିଲେ। ଏହି ସମୟ ମଧ୍ୟରେ ସେ ୨୦୦୦ ରୁ ଅଧିକ କଏଦୀଙ୍କୁ ମୁକ୍ତ କରିଥିବା ଦାବି କରାଯାଏ। ପ୍ରକୃତରେ ଖବରକାଗଜରେ ଖବର ପଢିବା ସମୟରେ, ଧନୀରାମ ଜାଣିବାକୁ ପାଇଲେ ଯେ ଝାଜ୍ଜରର ଅତିରିକ୍ତ ସିଭିଲ୍ ଜଜ୍ଙ୍କ ବିରୁଦ୍ଧରେ ଏକ ବିଭାଗୀୟ ତଦନ୍ତ ଚାଲିଛି। ଏହି ସମୟରେ ଧନୀରାମଙ୍କ ଚତୁର ମନ ଭାବିଲା ଯେ ଏହି ସୁଯୋଗର ଫାଇଦା କାହିଁକି ନିଆଯିବ ନାହିଁ। ସେ ହାଇକୋର୍ଟ ରେଜିଷ୍ଟ୍ରାରଙ୍କ ପକ୍ଷରୁ ଅତିରିକ୍ତ ସିଭିଲ୍ ଜଜ୍ଙ୍କୁ ଏକ ଚିଠି ଲେଖି ସେହି ବିଚାରପତିଙ୍କୁ ଛୁଟିରେ ପଠାଇ ଦେଲେ। ଦ୍ୱିତୀୟ ଚିଠିରେ ଯେପର୍ଯ୍ୟନ୍ତ ଅତିରିକ୍ତ ବିଚାରପତି ଛୁଟିରେ ଅଛନ୍ତି ସେପର୍ଯ୍ୟନ୍ତ ସେ ନିଜେ ବିଚାରପତି ପଦବୀରେ ରହିବେ। ଏହି ସମୟ ମଧ୍ୟରେ ଧନୀରାମ ନିଜକୁ ମୁକ୍ତ କରିବାର ନିଷ୍ପତ୍ତି ମଧ୍ୟ ଘୋଷଣା କରିଥିଲେ।
ସନ୍ଦେହ ପରେ ପଳାଇଥିଲେ
ଧନୀରାମଙ୍କ ନିଷ୍ପତ୍ତିର ଆଲୋଚନା ଦ୍ରୁତ ଗତିରେ ବ୍ୟାପିବାକୁ ଲାଗିଲା। ଜେଲରେ ଥିବା ଅଭିଯୁକ୍ତମାନେ ଏତେ ଶୀଘ୍ର ଜାମିନ ପାଇବା ସମସ୍ତଙ୍କ ପାଇଁ ଆଶ୍ଚର୍ଯ୍ୟଜନକ ଥିଲା। ଓକିଲମାନେ ମଧ୍ୟ ଆଶ୍ଚର୍ଯ୍ୟ ହୋଇଥିଲେ ଯେ ନୂତନ ବିଚାରପତି ସମସ୍ତଙ୍କୁ କିପରି ଜାମିନ ଦେଉଥିଲେ। ଯେତେବେଳେ ଏହି ବିଷୟରେ ଆଲୋଚନା ବଢ଼ିବାକୁ ଲାଗିଲା, ଧନୀରାମ ହଠାତ୍ କୋର୍ଟ ଛାଡି ଚାଲିଗଲେ। ସେତେବେଳେ ତାଙ୍କୁ ଏହି ମାମଲାରେ ଗିରଫ କରାଯାଇପାରିଲା ନାହିଁ। ତଥାପି ତାଙ୍କୁ ଶେଷ ଥର ପାଇଁ ୨୦୧୬ ମସିହାରେ ଗିରଫ କରାଯାଇଥିଲା ଏବଂ ୨୦୨୪ ମସିହାରେ ହୃଦଘାତ ଯୋଗୁଁ ତାଙ୍କର ମୃତ୍ୟୁ ହୋଇଥିଲା।