ନୂଆଦିଲ୍ଲୀ: ଅଯୋଧ୍ୟା ରାମ ମନ୍ଦିର ଉଦଘାଟନ ଉତ୍ସବରେ ସାମିଲ ହେବେନି ପୁରୀ ଗୋବର୍ଦ୍ଧନ ପୀଠ ଶଙ୍କରାଚାର୍ଯ୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀ । ପଶ୍ଚିମବଙ୍ଗ ସ୍ଥିତ ସାଗର ଦୀପରେ ଆୟୋଜିତ ବିଶ୍ଵ ପ୍ରସିଦ୍ଧ ଗଙ୍ଗା ସାଗର ମେଳାରେ ଯୋଗଦେଇ ଏଭି ପ୍ରତିକ୍ରିୟା ରଖିଛନ୍ତି ଶଙ୍କରାଚାର୍ଯ୍ୟ। ତାଙ୍କ ସହ ଅନ୍ୟ ତିନି ଶଙ୍କରାଚାର୍ଯ୍ୟ ବି ଉତ୍ସବରେ ସାମିଲ ହେବେ ନାହିଁ ବୋଲି କହିଛନ୍ତି। ରାମ ମନ୍ଦିର ସମ୍ପୂର୍ଣ୍ଣ ଭାବେ ନିର୍ମାଣ ହୋଇନାହିଁ। ଅଧା ମନ୍ଦିର ନିର୍ମାଣ ହୋଇ ଉଦଘାଟନ ସହିତ ପୂଜା ହେବା ଠିକ ନୂହେଁ ବୋଲି କହିଛନ୍ତି ଶଙ୍କରାଚାର୍ଯ୍ୟ। ଜାନୁଆରୀ ୨୨ରେ ହେବାକୁ ଯାଉଛି ରାମ ମନ୍ଦିରର ପ୍ରାଣ ପ୍ରତିଷ୍ଠା ଉତ୍ସବ । ଜାଣନ୍ତୁ, କିଏ କ’ଣ କହିଛନ୍ତି…
ଶଙ୍କରାଚାର୍ଯ୍ୟ ସ୍ୱାମୀ ଶ୍ରୀ ନିଶ୍ଚଳାନନ୍ଦ ସରସ୍ୱତୀ-
ପୁରୀ ଗୋବର୍ଦ୍ଧନପୀଠର ଶଙ୍କରାଚାର୍ଯ୍ୟ ହେଉଛନ୍ତି ସ୍ୱାମୀ ଶ୍ରୀ ନିଶ୍ଚଳାନନ୍ଦ ସରସ୍ୱତୀ । ସେ ପୁରୀ ଜଗନ୍ନାଥ ମନ୍ଦିର ଗୋବର୍ଦ୍ଧନ ପୀଠର ୧୪୫ ତମ ଶଙ୍କରାଚାର୍ଯ୍ୟ । ସେ ୧୯୯୨ଫେବୃଆରୀ ୯ରେ ପୀଠର ଦାୟିତ୍ୱ ଗ୍ରହଣ କରିଥିଲେ। ଅଧା ମନ୍ଦିର ନିର୍ମାଣ ହୋଇ ଉଦଘାଟନ ସହିତ ପୂଜା ହେବା ଠିକ ନୁହେଁ। ଖାଲି ରାଜନୈତିକ ଚାଲ୍ ଭାବେ ଅର୍ଦ୍ଧନିର୍ମିତ ମନ୍ଦିରର ପ୍ରତିଷ୍ଠା କରାଯାଉଛି ।
ଶଙ୍କରାଚାର୍ଯ୍ୟ ସ୍ୱାମୀ ଅଭିମୁକ୍ତେଶ୍ୱରାନନ୍ଦ-
୨୦୦୬ରେ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ ଉତ୍ତରାଖଣ୍ଡର ଜ୍ୟୋତିର୍ ମଠର ଦାୟିତ୍ୱ ଗ୍ରହଣ କରିଥିଲେ । ସେ କହିଛନ୍ତି ଯେ, ହିନ୍ଦୁ ଧର୍ମ ଅନୁଯାୟୀ, କୌଣସି ନିୟକ ପାଳନ କରାଯାଉନାହିଁ । ଆମେ ମୋଦି ବିରୋଧୀ ନୁହେଁ କିନ୍ତୁ ଆମେ ଆମ ଧର୍ମ ଶାସ୍ତ୍ର ବିରୋଧରେ ଯାଇପାରିବୁ ନାହିଁ ।
ଶଙ୍କରାଚାର୍ଯ୍ୟ ଭାରତୀ ତିର୍ଥ-
ଶ୍ରୀଙ୍ଗେରୀ ଶାରଦା ପୀଠର ୩୬ ତମ ଶଙ୍କରାଚାର୍ଯ୍ୟ ହେଉଛନ୍ତି ଭାରତୀ ତିର୍ଥ। ଜାନୁଆରୀ ୨୨ରେ ସେ ରାମ ମନ୍ଦିର ପ୍ରତିଷ୍ଠା କାର୍ଯ୍ୟକ୍ରମରେ ଯୋଗଦେବେ ନାହିଁ ବୋଲି ଗଣମାଧ୍ୟମର ରିପୋର୍ଟରେ ଦର୍ଶାଯାଇଛି । କିନ୍ତୁ ଶ୍ରୀଙ୍ଗେରୀ ମଠ ଏହି ଦାବିକୁ ପ୍ରତ୍ୟାଖ୍ୟାନ କରିଛନ୍ତି। ତେବେ ଶଙ୍କରାଚାର୍ଯ୍ୟ ଏହି ସମାରୋହରେ ଯୋଗଦେବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ଶଙ୍କରାଚାର୍ଯ୍ୟ ସଦାନନ୍ଦ ସରସ୍ୱତୀ-
ସଦାନନ୍ଦ ସରସ୍ୱତୀ ହେଉଛନ୍ତି ପଶ୍ଚିମାନନୟ ଦ୍ୱାରକା ଶାରଦାପିଠର ଶଙ୍କରାଚାର୍ଯ୍ୟ । ଏହା ସାଧୁ ଆଦି ଶଙ୍କରଙ୍କ ଦ୍ୱାରା ପ୍ରତିଷ୍ଠିତ ଚାରି ଧର୍ମପୀଠରୁ ଅନ୍ୟତମ । ଏହା ଗୁଜୁରାଟର ଦ୍ୱାରକାରେ ଅବସ୍ଥିତ, ଏହା କାଲିକା ମଠ ନାମରେ ମଧ୍ୟ ଜଣାଶୁଣା। ରିପୋର୍ଟ ଅନୁଯାୟୀ ଶଙ୍କରାଚାର୍ଯ୍ୟ ସଦାନନ୍ଦ ସରସ୍ୱତୀ ଏହି ଉତ୍ସବରେ ସାମିଲ ହେବେନାହିଁ । ଯଦିଓ ଏନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ ।
