ଭୁବନେଶ୍ବର: ରାଜଧାନୀରେ ବୋମାମାଡ଼ । ଚନ୍ଦ୍ରଶେଖରପୁର ଥାନା ଅନ୍ତର୍ଗତ ନୀଳାଦ୍ରି ବିହାର ଅଞ୍ଚଳରେ ବୋମାମାଡ଼ । ଦୁଇ ଦୁର୍ବୃତ୍ତ ବାଇକରେ ଆସି ବୋମାମାଡ଼ କରିଥିବା ସୂଚନା । ଏକ କଳା ରଙ୍ଗର ବାଇକରେ ଆସି ବୋମା ପକାଇଲେ ଦୁର୍ବୃତ୍ତ । ଏକ କାର କ୍ଷତିଗସ୍ତ ହୋଇଥିବା ବେଳେ ଦୁଇ ଜଣ ଆହତ ହୋଇଥିବା ସୂଚନା ମିଳିଛି । ପୋଲିସ ଘଟଣାରେ ଛାନବିନ କରିଛି । ସିସିଟିଭିକୁ ଯାଞ୍ଚ କରୁଛି ପୋଲିସ ।
ଚାଲିଥିଲା ବାହାଘର, ଉଠାଇ ନେଲା ପୋଲିସ
ଭୁବନେଶ୍ବର: ଚାଲିଥିଲା ବାହାଘର, ଆଉ ମାତ୍ର କେହି ମିନିଟ ରେ ପଡିଥାନ୍ତା ହାତ ଗଣ୍ଠି. କିନ୍ତୁ ପରିସ୍ଥିତି ଏମିତି ହେଲା ବାହା ବେଦୀରୁ ବରକୁ ଉଠାଇନେଲା ପୋଲିସ. ଏଭଳି ଘଟଣା ଖୋଦ ଘଟିଛି ଭୁବନେଶ୍ୱର ରେ. ବର ହେଉଛନ୍ତି ଢେଙ୍କାନାଳ କାମାକ୍ଷାନଗର ଅଂଚର ଜିତେନ୍ଦ୍ର ସ୍ୱାଇଁ. ଜିତେନ୍ଦ୍ର 2013 ମସିହା ରେ କଲିକତାର ରମା ସ୍ୱାଇଁ ଙ୍କୁ ପ୍ରଥେମେ ୨୦୧୩ ମସିହା ରେ ପ୍ରେମ କରି କୋର୍ଟ ରେ ବିବାହ କରିଥିଲେ. କିଛି ବର୍ଷ ରହିବା ପରେ 2019 ପରଠାରୁ ଜିତେନ୍ଦ୍ର ରମା କୁ ଛାଡି ଆଉ ଧରା ଛୁଆଁ ଦେଉ ନଥିଲା. ଏହା ପରେ ଆଜି କୌଣସି ବିଶେଷ ସୂତ୍ରରୁ ପ୍ରଥମ ସ୍ତ୍ରୀ ଖବର ପାଇଥିଲେ ଯେ ସେ ପ୍ରଥମ ସ୍ତ୍ରୀ କୁ ନ ଜଣାଇ ଦ୍ଵିତୀୟ ବିବାହ ଭୁବନେଶ୍ୱର ରେ ଏକ ମନ୍ଦିରରେ କରୁଛନ୍ତୁ. ଗତ କାଲିଠାରୁ ରମା ଭୁବନେଶ୍ୱର ଆସି କେତେଜଣ ମାନବାଧିକାର ମହିଳା କର୍ମୀ ଙ୍କ ସହଯୋଗ ରେ ଜିତେନ୍ଦ୍ର କୁ ଖୋଜୁଥିଲେ . ଏହା ପରେ ଆଜି ରାଜଭବନ ପଛପଟେ ଏକ ରାଧାକୃଷ୍ଣ ମନ୍ଦିର ରେ ଜିତେନ୍ଦ୍ର ଦ୍ଵିତୀୟ ବିବାହ କରୁଥିବା ଖବର ପାଇଁ ସିଧା ବାହା ବେଦିରେ ପହଂଚି ବିବାହ କୁ ବନ କରିବାକୁ କହିଥିଲା. ଏହା ପରେ କ୍ୟାପିଟାଲ ପୋଲିସ କୁ ଖବର ଦେବା ପରେ ପ୍ରଥମ ସ୍ତ୍ରୀଙ୍କ ଅଭିଯୋଗ କ୍ରମେ ସ୍ୱାମୀ ଜିତେନ୍ଦ୍ରକୁ ଉଠାଇ ଆଣିଲା ପୋଲିସ..ବର୍ତମାନ ବର ଜିତେନ୍ଦ୍ର କୁ କ୍ୟାପିଟାଲ ପୋଲିସ ଅଟକ ରଖି ପଚରା ଉଚରା କରୁଛି ପୋଲିସ. ବିବାହ ପାଇଁ ସବୁ ଡକ୍ୟୁମେଣ୍ଟ କୁ ପ୍ରଥମ ସ୍ତ୍ରୀ ପୋଲିସ କୁ ହସ୍ତାନ୍ତର କରିବା ପରେ ନ୍ୟାୟ ପାଇଁ ଥାନାରେ ଅଭିଯୋଗ କରି ବସିଛି ରମା.ସେପଟେ ବର ପକ୍ଷରୁ କୌଣସି ପ୍ରତିକ୍ରିୟା ରଖି ନାହାନ୍ତି ।
ଜୀବନ ଅପେରାର ଅଭୁଲା ଚରିତ୍ର ବରମୁଣ୍ଡା ବସଷ୍ଟାଣ୍ଡ
ଭୁବନେଶ୍ବର: ବସନ୍ତ ଆଉ ଆମ୍ବ ବଉଳ, ବର୍ଷା ଆଉ ସାଧବ ବୋହୂ । ଏମାନେ ଯେମିତି ବରମୁଣ୍ଡା ଆଉ ଭୁବନେଶ୍ୱର ଠିକ୍ ସେମିତି । ତ୍ୟାଗ, ତିତିକ୍ଷା, ଦାନ ଓ ବଡ଼ପଣିଆରେ ବରମୁଣ୍ଡାକୁ କେହି ବଳିଯାଇପାରିବେନି । ୯୦ ଦଶକର ସେ ଖେଳପଡିଆରେ କେତେ ସ୍ମୃତି ହଜିଛି, କେତେ କାହାଣୀ ଲେଖାହୋଇଛି । ସେବେଠୁ ଆଜି ଯାଏଁ ବରମୁଣ୍ଡାର ଯାତ୍ରା।
ବରମୁଣ୍ଡା ଗୋଟେ କାହାଣୀ, ଗୋଟେ କବିତା, ଗୋଟେ ଗଳ୍ପ, ଗୋଟେ ଏକାଙ୍କିକା । ଜୀବନ ଅପେରାର ଅଭୁଲା ଚରିତ୍ର । ତାକୁ ଲେଖିଦେଲେ ସେ ପୋଥିଟିଏ, ନଲେଖିଲେ ଛାତି ତଳର ସ୍ମୃତିଟିଏ । ଅନେକ ବସନ୍ତ ବିତିଛି, କୃଷ୍ଣଚୁଡାର ରଙ୍ଗ ଛାଡିଛି । ଶ୍ରାବଣ ପିଠିରେ ସାଧବବୋହୂଟି ଚୁପିଚୁପି ଚାଲି ବି ଯାଇଛି । ହେଲେ ବରମୁଣ୍ଡା ପ୍ରେମ, ପ୍ରଣୟ, ପ୍ରୀତି, ପଲ୍ଲବ, ପ୍ରତାରଣା, ବିଦାୟ, ବିଦାର, ମିଳନ, ଆତୁର, ଆହ୍ଲାଦ ଏମିତି ଜୀବନର ଅନେକ ନିଚ୍ଛକ ଶବ୍ବକୁ, ବାସ୍ତବତାର ଚିତ୍ରକୁ ତୋଳି ଧରିଛି, ସ୍ମୃତିପଟରେ ସାଇତି ରଖିଛି, ବୁଢା ବରଗଛ ସାଜି ଇତିହାସ କହୁଛି ।
୧୯୪୮ ମସିହା । ଭୁବନେଶ୍ବର ହୁଏ ଓଡ଼ିଶାର ରାଜଧାନୀ । ବର୍ଷର ସଂଖ୍ୟା ଗଣିତରେ ଧିରେ ଧିରେ ବିସ୍ତାରୀ ହେଉଥିଲା ଭୁବନେଶ୍ବର । ଏତିକିବେଳେ ଦରକାର ପଡେ ରାଜ୍ୟସ୍ତରୀୟ ବିଶାଳ ବସଷ୍ଟାଣ୍ଡ । ୧୯୯୨ ମସିହାରେ ଯେତେବେଳେ ବସଷ୍ଟାଣ୍ଡ ପାଇଁ ଜାଗା ଖୋଜା ହେଉଥାଏ ସେତେବେଳେ ତ୍ୟାଗ, ତିତିକ୍ଷାର ପଣତ ପାରି ଦେଇଥିଲା ବରମୁଣ୍ଡା । ଦେଖାଇଥିଲା ବଡ଼ପଣିଆର ସବୁଠୁ ବଡ଼ ଉଦାହରଣ । ଖଣ୍ଡଗିରି ପାଦଦେଶରେ ୧୫ ଏକର ବିଶିଷ୍ଟ ଖେଳପଡ଼ିଆ ବନିଯାଇଥିଲା ଭୁବନେଶ୍ବରର ଆଉ ଏକ ପରିଚୟ। ଅସ୍ଥାୟୀ ସ୍କୁଲ ଘର ଭାଙ୍ଗି ଠିଆ ହୋଇଥିଲା ଯୋଗାଯୋଗର ବରମୁଣ୍ଡା କୀର୍ତ୍ତିସ୍ତମ୍ଭ । ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକ ଏହାର ନିଅଁ ପକାଇଥିବା ବେଳେ ଉଦ୍ଘାଟନ କରିଥିଲେ ପ୍ରବାଦପୁରୁଷ ବିଜୁ ପଟ୍ଟନାୟକ ।
ଗାଁଠୁ ସହର, ପିଲାଠୁ ବୁଢା । ରାଜଧାନୀକୁ ଯିଏ ଜାଣିଛି ବରମୁଣ୍ଡାକୁ ସିଏ ଚିହ୍ନିଛି । କୋଟି କୋଟି ହୃଦୟକୁ ୧୫ ଏକରର ଛାତିରେ କୋଳେଇଧରିଥିବା ବିରାଟ ହୃଦୟ ତାର । ସୁଖଦୁଃଖ,ଲୁହ ହସରେ ଫେଣ୍ଟିହୋଇଥିବା ବିଶାଳ ମନ ବି ତାର । ସେ ଶୁଣିଛି ବସ ଭିତରୁ ପ୍ରେମିକର ଗୁମୁରି କାନ୍ଦ, ସେ ଦେଖିଛି ବାପାର କୋକେଇ ଉଠାଇବାକୁ ଯାଉଥିବା ପୁଅର କୋହ । ଭରସାର ସହରରେ ଭଡାଟିଆର ଭାରି ମନକୁ ପଢିଛି, ଚାକିରି ଆଶାରେ ପାଦ ଦେଇଥିବା ଯବାନ ପୁଅର ବିତୃଷ୍ଣା ବି ଅନୁଭବ କରିଛି । ଘରକୁ ଲେଉଟିବାର ଖୁସି ଦେଖିଛି ପୁଣି ଅବୁଝା କୁନି ପିଲାଠୁ ଚକଲେଟ୍ ଆଣିଦେବାଧ ଅଳି ଶୁଣିଛି । ଅଟୋ ବାଲାର ଡାକ, ବାରମଜାର ବେପାର…ପଛକୁ ଚାଲ ପଛକୁ ଚାଲର କୋଳାହଳ, ପେପର ପେପରର ସେ ଶବ୍ଦ ତ ତାରି ଶରୀରରେ ରୁନ୍ଧି ହୋଇ ରହିଛି ।
ଆଜି ବରମୁଣ୍ଡା ନୂଆ ରୂପରେ ଆସିଛି । ଫାଇଭ-ଟି ସ୍ପର୍ଶରେ ସବୁଆଡ଼େ ନୂଆ ଲାଗୁଛି । ଓଡ଼ିଶାର ପ୍ରଥମ ବିଶ୍ୱସ୍ତରୀୟ ଟ୍ରାନ୍ଜିଟ୍ ସିଷ୍ଟମ ବସ୍ ଟର୍ମିନାଲ ଭାବେ ବରମୁଣ୍ଡାକୁ ବିକଶିତ କରାଯାଇଛି । ବିମାନବନ୍ଦରରେ ମିଳୁଥିବା ସୁବିଧା ଏଇଠି ପାଇପାରୁଛନ୍ତି ଜନସାଧାରଣ । ‘ନବୀନ ଓଡ଼ିଶା’ର ନୂଆରୂପ ଭାବେ ଉଭା ହୋଇଛି ଏହି ଅନ୍ତଃରାଜ୍ୟ ବସ୍ ଟର୍ମିନାଲ୍ ।
ରାଜଯୋଗ ମାଧ୍ୟମରେ ମଣିଷ ନିଜର ଆତ୍ମାକୁ ସଶକ୍ତ କରି ପାରିବ
କଟକ: ସେବା, ସମାଜକୁ ସଶକ୍ତ, ନିଜର ପରିବର୍ତ୍ତନରେ ବିଶ୍ୱ ପରିବର୍ତ୍ତନର କାମ ବ୍ରହ୍ମମାକୁମାରୀ ସଂଗଠନ ଖୁବ ସୁନ୍ଦର ଭାବରେ କରୁଛି । ସବୁ ପ୍ରକାର ଅଶାନ୍ତ ବାତାବରଣ ଭିତରେ ନିଜକୁ କିଭଳି ଶାନ୍ତ କରି ରଖିହେବ, ସେହି ଜ୍ଞାନ ଦେଉଛି ପ୍ରଜାପିତା ବ୍ରହ୍ମା କୁମାରୀ ଇଶ୍ବରୀୟ ବିଶ୍ବବିଦ୍ଯାଳୟ । କଟକ ଜବାହାର ଲାଲ ନେହେରୁ ଇଣ୍ଡୋର ଷ୍ଟାଡିୟମରେ ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱ ବିଦ୍ୟାଳୟର ୫୦ ବର୍ଷ ପୂର୍ତ୍ତି ଅବସରରେ ଆୟୋଜିତ କାର୍ଯ୍ୟକ୍ରମରେ ଏହା କହିଛନ୍ତି ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । କଟକରୁ ୧୯୭୩ ମସିହାରେ ଆରମ୍ଭ ହୋଇଥିବା ଏହି ସେବାର ସୁବର୍ଣ୍ଣ ଜୟନ୍ତୀ ଉତ୍ସବରେ ଯୋଗଦେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହି ଆଧ୍ୟାତ୍ମିକ ସେବାର ଆବଶ୍ୟକତା, ପ୍ରସଙ୍ଗିକତା ଓ ମହତ୍ୱ ଉପରେ ଆଲୋକପାତ କରିଛନ୍ତି । ରାଜଯୋଗ ମାଧ୍ୟମରେ ମଣିଷ ନିଜର ଆତ୍ମାକୁ ସଶକ୍ତ କରି ପାରିବ ଓ ଆଜିକାର ଅଶାନ୍ତ ବାତାବରଣ ଭିତରେ ଆତ୍ମା ସଶକ୍ତ ହେଲେହିଁ ଏକ ଶାନ୍ତିପୂର୍ଣ୍ଣ ସମାଜ ଗଠନ ହୋଇପାରିବ ବୋଲି କହିଛନ୍ତି ରାଷ୍ଟ୍ରପତି । ବ୍ୟକ୍ତି ଚରିତ୍ର ପରିବର୍ତ୍ତନ କାମ ବ୍ରହ୍ମା କୁମାରୀ ସଂଗଠନ ବେଶ ପ୍ରଭାବଶାଳୀ ଢଙ୍ଗରେ କରିଛି । ଆଉ ଏହି ବ୍ୟକ୍ତି ଚରିତ୍ର ପରିବର୍ତ୍ତନ ହେଲେ, ସମାଜରେ, ରାଜ୍ୟରେ, ଦେଶରେ ଓ ବିଶ୍ୱରେ ବ୍ୟାପକ ପରିବର୍ତ୍ତନ ସମ୍ଭବ ବୋଲି ନିଜ ଅଭିଭାଷଣରେ କହିଛନ୍ତି ରାଷ୍ଟ୍ରପତି ।
ମହାପ୍ରଭୁ ଜଗନ୍ନାଥଙ୍କ ପାଇଁ ତୁଳସୀ ଯୋଗାଇବ ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟ
ନନ୍ଦିଘୋଷ ବ୍ୟୁରୋ: ଶ୍ରୀଅଙ୍ଗକୁ ତୁଳସୀ ମହାଲକ୍ଷ୍ମୀଙ୍କ ପାଇଁ ପଦ୍ମ ଯୋଗାଇବ ଓୟୁଏଟି । ପାରମ୍ପରିକ ବନସ୍ପତିର ଔଷଧୀୟ ଗୁଣ ଓ ଉପଯୋଗିତା ଉପରେ ଦୁଇଦିନିଆ ରାଜ୍ୟସ୍ତରୀୟ କର୍ମଶାଳାରେ ବୃକ୍ଷଲତାର ଉପଯୋଗିତା ଛାତ୍ରଛାତ୍ରୀଙ୍କୁ ସଚେତନ କରାଯାଇଛି । ଭୁବନେଶ୍ବରରେ ଥିବା ଓୟୁଏଟିର ୧୦୦ ଏକର ପରିମିତ ଭାଟିକାରେ ୧୦୦ ପ୍ରକାର ଔଷଧୀୟ ଗୁଳ୍ମ ଓ ବୃକ୍ଷଲତା ଚାଷ କରାଯାଉଛି । ଆଗାମୀ ଦିନରେ ଆୟୁର୍ବିଜ୍ଞାନରେ ଶରୀରର ବିଭିନ୍ନ ରୋଗ ପାଇଁ ଔଷଧୀୟ ବୃକ୍ଷଲତା ପରୀକ୍ଷାମୂଳକ ଭାବେ ପ୍ରକ୍ରିୟା କରି ଔଷଧ ପାଇଁ କଞ୍ଚାମାଲ ଯୋଗାଇବାକୁ ଲକ୍ଷ୍ୟ ରଖାଯାଇଛି ।
ମହାପ୍ରଭୁ ଜଗନ୍ନାଥଙ୍କ ପାଇଁ ତୁଳସୀ ଯୋଗାଇବ ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟ । ଖାଲିସେତିକି ନୁହେଁ ଶ୍ରୀମନ୍ଦିରରେ ବିରାଜମାନ ମହାଲକ୍ଷ୍ମୀଙ୍କ ପାଇଁ ଓୟୁଏଟି ପ୍ରସ୍ତୁତ କରୁଛି ପଦ୍ମପୋଖରୀ । ସାକ୍ଷୀଗୋପାଳ ସ୍ଥିତ ଓୟୁଏଟିର କୃଷି ବିଜ୍ଞାନ କେନ୍ଦ୍ରରେ ଚାଲିଛି ପ୍ରସ୍ତୁତି । ଏଥିପାଇଁ ଚାଲିଛି ଜମି ପ୍ରସ୍ତୁତି ।
ଗୁଳୁଚି, ଘି କୁଆଁରି, ଅଶୋକ, ପାନଗଛ, ସର୍ପଗନ୍ଧା । ଏସବୁ ଆୟୁର୍ବିଜ୍ଞାନର ମହୌଷଧୀ । ଶରୀରକୁ ସୁସ୍ଥ ରଖିବା ପାଇଁ ଏବେ ପ୍ରାକୃତିକ ଉପଚାର ଉପରେ ଲୋକଙ୍କ ଆଗ୍ରହ । ଭୁବନେଶ୍ବରରେ ଏପରି ଅର୍ଗାନିକ ପଦ୍ଧତିରେ ଔଷଧୀୟ ବୃକ୍ଷ, ଲତା ଓ ଗୁଳ୍ମ ଉତ୍ପାଦନ କରୁଛି ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟ ଓୟୁଏଟି । ବରମୁଣ୍ଡା ସ୍ଥିତ ୧୦୦ ଏକର ପରିମିତ ସ୍ଥାନରେ ଓୟୁଏଟି ଉତ୍ପାଦନ କରୁଛି ୧୦୦ ପ୍ରକାର ଔଷଧୀୟ ଗୁଳ୍ଣ ଓ ଲତା ଭରା ଓୟୁଏଟି ଭାଟିକା ।
ଆଧୁନିକ ଚିକିତ୍ସା ବିଜ୍ଞାନ ଯେତେ ଉନ୍ନତ ହେଲେ ବି ଆୟୁର୍ବେଦ ଚିକିତ୍ସା ଓ ପାରମ୍ପରିକ ବୃକ୍ଷ ଲତାରୁ ମିଳୁଥିବା ଔଷଧୀୟ ଗୁଣର ଉପଯୋଗିତା ଏବେ ବି ପ୍ରାସଙ୍ଗିକ ରଖୁଛି । କୃତ୍ରିମ ରସାୟନ ମୁକ୍ତି ଔଷଧ ପ୍ରସ୍ତୁତି ଉପରେ ଏବେ ଗବେଷକ ଅଧିକ ଗୁରୁତ୍ବ ଦେଇଛନ୍ତି । ବିନା ପାର୍ଶ୍ବ ପ୍ରତିକ୍ରିୟାରେ ବୃକ୍ଷଲତାଙ୍କଠାରୁ ମିଳୁଥିବା ଅର୍କ, ରସ ଓ ପତ୍ରରେ ବିଭିନ୍ନ ଔଷଧ ପ୍ରସ୍ତୁତ କରାଯାଉଛି । ଓଡ଼ିଶାର ବିଭିନ୍ନ ପାହାଡ଼, ପର୍ବତ ଅଞ୍ଚଳରୁ ଔଷଧୀୟ ବୃକ୍ଷ, ଗୁଳ୍ମ ସଂଗ୍ରହ କରାଯାଇ ଭୁବନେଶ୍ବରରେ ଚାରା ଓ ପ୍ଲାଣ୍ଟେସନ୍ କରାଯାଇଛି । ସରକାରଙ୍କୁ ଆଗାମୀ ଦିନରେ ଆୟୁର୍ବିଜ୍ଞାନରେ ବିଭିନ୍ନ ଔଷଧ ପ୍ରସ୍ତୁତି ନେଇ କଞ୍ଚାମାଲ ଯୋଗାଇବାକୁ ଓୟୁଏଟି ଲକ୍ଷ୍ୟ ରଖିଛି । ସଚେତନତା ପାଇଁ ଭୁବନେଶ୍ବରରେ ଅନୁଷ୍ଠିତ ହେଉଛି ଦୁଇଦିନିଆ ରାଜ୍ୟସ୍ତରୀୟ କର୍ମଶାଳା ।
ହାତୀ ଗଣନା ସହ ଏକକାଳୀନ କଲରାପତରିଆ ବାଘ ଗଣନା କରିବେ ରାଜ୍ୟ ସରକାର
ନନ୍ଦିଘୋଷ ବ୍ୟୁରୋ: ଓଡ଼ିଶା ସରକାରଙ୍କ ନିଜସ୍ବ ବାଘ ଗଣନା ସରିବା ପରେ ଆସନ୍ତା ମେ ମାସରୁ ହେବ ରାଜ୍ୟ ସରକାରଙ୍କ ନିଜସ୍ଵ କଲରାପତରିଆ ବାଘ ଗଣନା । ହାତୀ ଗଣନା ସହ ଏକକାଳୀନ କଲରାପତରିଆ ବାଘ ଗଣନା କରିବେ ରାଜ୍ୟ ସରକାର । ରାଜ୍ୟରେ କଲରାପତରିଆ ବାଘ ସଂଖ୍ୟାକୁ ନେଇ ଏନଟିସିଏ ରିପୋର୍ଟ ସହ ଏକମତ ହୋଇପାରିନି ବନ ବିଭାଗ । ସେଥିପାଇଁ ନିଜସ୍ବ ଗଣନା କରିବାକୁ ନିଷ୍ପତି ନେଇଛନ୍ତି ସରକାର ।
ଆସନ୍ତା ମେ ମାସରୁ ରାଜ୍ଯରେ ଲିଓପାର୍ଡ ସେନସସ। ଏକ ସଙ୍ଗେ ହେବ ହାତୀ ଗଣନା ଓ କଲରାପତରିଆ ବାଘ ଗଣନା। ବନ୍ୟପ୍ରାଣୀ ପିସିସିଏଫ୍ କହିଛନ୍ତି, NTCA ରିପୋର୍ଟକୁ ତର୍ଜମା କରାଯାଉଛି । ତେବେ ସେଥିରେ ଥିବା କିଛି ତ୍ରୁଟିକୁ ରାଜ୍ଯ ସ୍ତରରେ ସଂଶୋଧନ କରାଯିବ। ପ୍ରଥମତଃ ଏହା NTCAର ଏକ ଆକଳନ ରିପୋର୍ଟ । ଦ୍ଵିତୀୟରେ ୨୦୨୨ରେ ସେମାନେ ମାତ୍ର ୩ଟି ସ୍ଥାନରେ କ୍ୟାମେରା ଟ୍ରାପ୍ ଲଗାଇଥିଲେ । ତେବେ ୨୦୧୮ ଆକଳନ ବେଳେ ୧୪ ଜାଗାରେ କ୍ୟାମେରା ଲାଗିଥିଲା, ଯେଉଁଥିରୁ ସେମାନେ ୭୬୦ କଲରାପତରିଆ ଥିବା ଜାଣିବାକୁ ପାଇଥିଲେ । ୨୦୨୨ରେ ଶିମିଳିପାଳ ଓ ସାତକୋଶିଆରେ କଲରାପତରିଆ ସଂଖ୍ୟା ବଢ଼ିଥିବା ରାଜ୍ୟ ପାଇଁ ଖୁସି ଖବର । କ୍ୟାମେରା ଜରିଆରେ NTCA କଳରପତରିଆ ଆକଳନ ରିପୋର୍ଟ ଗ୍ରହଣୀୟ, କିନ୍ତୁ ସେମାନେ ବହୁତ କମ ଅଞ୍ଚଳ କ୍ୟାମେରା କଭର କରିଥିବାରୁ ଆକଳନ ନେଇ ସହମତ ହୋଇପାରିନାହିଁ ବନ ବିଭାଗ।
ରାଷ୍ଟ୍ରୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ – NTCAର ସଦ୍ୟତମ ଷ୍ଟାଟସ୍ ଅଫ ଲିଓପାର୍ଡସ୍ ଇନ୍ ଇଣ୍ଡିଆ ୨୦୨୨ ରିପୋର୍ଟ ପ୍ରକାଶିତ ହୋଇଛି। ରିପୋର୍ଟ କହୁଛି, ୨୦୧୮ ଗଣନା ଅନୁସାରେ ଓଡ଼ିଶା ଜଙ୍ଗଲରେ ୭୬୦ଟି କଲରାପତରିଆ ବାଘ ଥିଲେ । ୨୦୨୨ରେ ଏହି ସଂଖ୍ୟା ୫୬୮କୁ ଖସିଆସିଛି । ତେବେ ସାରା ଦେଶରେ କଲରାପତରିଆ ବାଘ ସଂଖ୍ୟା ୨୦୧୮ରେ ୧୨ ହଜାର ୮୫୨ ତୁଳନାରେ ୨୦୨୨ରେ ୧୩ ହଜାର ୮୭୪କୁ ବୃଦ୍ଧି ଘଟିଛି । ସେଣ୍ଟ୍ରାଲ ଇଣ୍ଡିଆ ଆଣ୍ଡ ଇଷ୍ଟର୍ଣ୍ଣ ଘାଟସ୍ ଲ୍ୟାଣ୍ଡସ୍କେପରେ ଓଡ଼ିଶା ସମେତ ଛତିଶଗଡ ଓ ତେଲଙ୍ଗାନାରେ ବାଘ ସଂଖ୍ୟା ଖସିବା ନେଇ ରିପୋର୍ଟରେ ଚିନ୍ତା ପ୍ରକଟ କରାଯାଇଛି । ତେବେ ଏହି ରିପୋର୍ଟକୁ ନେଇ ବନ ବିଭାଗର ଭିନ୍ନମତ ଥିବା ବେଳେ ଏନଟିସିଏର ଗଣନା ପଦ୍ଧତିକୁ ଠିକ୍ ବୋଲି କହିଛନ୍ତି ବ୍ୟାଘ୍ର ବିଶେଷଜ୍ଞ ତଥା ଏନଟିସିଏର ପୂର୍ବତନ ଅଧିକାରୀ । କଲରାପତରିଆ ବାଘ ଜଙ୍ଗଲରେ ଖାଦ୍ଯଶୃଙ୍ଖଳକୁ ବଜାୟ ରଖିବାରେ ଗୁରୁତ୍ବପୂର୍ଣ୍ଣ ଭୂମିକା ନିଭାଉଥିବାରୁ ଏମାନଙ୍କ ସଂଖ୍ୟା ବୃଦ୍ଧି ଉପରେ ଗୁରୁତ୍ବ ଦିଆଯିବା ଜରୁରୀ ।
ହସ୍ପିଟାଲକୁ କଲ୍ କଲେ ହ୍ୟାକର ନେଇଯାଉଛି ଟଙ୍କା
ଭୁବନେଶ୍ବର: ହସ୍ପିଟାଲକୁ ଫୋନ କଲେ ଆକାଉଣ୍ଟ ହେଉଯାଉଛି ଗୋଲ । ଗୁଗୁଲରୁ ସର୍ଚ୍ଚ କରି କଲ କଲେ ହ୍ୟାକର ନେଇଯାଉଛି ଟଙ୍କା । ସେପଟେ କ୍ରେଡିଟ କାର୍ଡ ଠକେଇର ଶିକାର ହୋଇଛନ୍ତି ଜଣେ ବିଏସଏଫ ଯବାନ । ଫୋନ ଖୋଲିଲେ ଖାଲି ହୋଇଯାଉଛି ଆକାଉଣ୍ଟ । ହସ୍ପିଟାଲକୁ କଲ କଲେ ହ୍ୟାକର ନେଇଯାଉଛି ଟଙ୍କା । ଯବାନଙ୍କୁ ଚୂନ ଲଗାଇଦେଲେ ସାଇବର ଠକ । ଏ ଯୁବକ ଜଣଙ୍କୁ ଦେଖନ୍ତୁ । ବାପା ବ୍ରେନ ଷ୍ଟୋକରେ ଆକ୍ରାନ୍ତ ହେବା ପରେ ବାଲୁଗାଁରୁ ଆସି ଭୁବନେଶ୍ୱର ଫାୟରଷ୍ଟେସନରେ ଥିବା ବିବେକାନନ୍ଦ ହସ୍ପିଟାଲରେ ଚିକିତ୍ସିତ କରାଇଥିଲେ । କିଛିଦିନ ପରେ ତାଙ୍କର ମୃତ୍ୟୁ ଘଟିଥିଲା । ଡିସଚାର୍ଜ ସାର୍ଟିଫିକେଟ ଓ ଅନ୍ୟ କିଛି ଡକ୍ୟୁମେଣ୍ଟ ପାଇଁ ଯୁବକ ଜଣଙ୍କ ଗୁଗୁଲରୁ ସର୍ଚ୍ଚ କରି ଯେତବେଳେ କଲ କରିଥିଲେ ସେତେବେଳେ ସଂପୃକ୍ତ ନମ୍ବରରୁ କିଛି ଟଙ୍କା ପଠାଇବାକୁ କୁହାଯାଇଥିଲା । ୟୁପିଆଇ ଜରିଆରେ ଟଙ୍କା ପଠେଇବା ବେଳେ ଆକାଉଣ୍ଟରୁ କଟିଥିଲା ୨୩ ହଜାର ଟଙ୍କା । ଏହାକୁ ନେଇ ସାଇବର ଥାନାର ଦ୍ୱାରସ୍ଥ ହୋଇଥିବା ବେଳେ ହସ୍ପିଟାଲ ରିସେପ୍ସନ ନମ୍ବର ହ୍ୟାକ ହୋଇଥିବା କହିଛନ୍ତି ହସ୍ପିଟାଲ କର୍ତ୍ତୃପକ୍ଷ । ଅପରପକ୍ଷରେ ଏହି ନମ୍ବରରେ କେହି ଟଙ୍କା ନପଠାଇବା ପାଇଁ ଅନୁରୋଧ କରିଛି ହସ୍ପିଟାଲ ।
ସେପଟେ ସାଇବର ଠକେଇର ଶିକାର ହୋଇଛନ୍ତି ଜଣେ ବିଏସ୍ଏଫ୍ ଯବାନ । କ୍ରେଡିଟ୍ କାର୍ଡ ବନ୍ଦ କରାଇବା ଆଳରେ ତାଙ୍କ ଠାରୁ ୪ ଲକ୍ଷ ୭୫ ହଜାରର ଠକେଇ ହୋଇଛି । କାର୍ଡ ବନ୍ଦ କରିବାକୁ କହି ସାଇବର ଠକଙ୍କ ଜାଲରେ ପଡ଼ିଥିଲେ ଯବାନ । କ୍ରେଡିଟ୍ କାର୍ଡର ନମ୍ବର ସହ ସିଭିଭି ନମ୍ବର ମାଗି ନେଇଥିଲେ ଠକ । ଯାହା ଜରିଆରେ ଆକାଉଣ୍ଟ ରୁ ୪ ଲକ୍ଷ ୭୫ ହଜାର ଲୁଟ ହୋଇଥିବା ଜାଣିବାକୁ ପାଇଛି ସାଇବର ଥାନା ପୋଲିସ । ବାରମ୍ବାର ଓଡିଶା ପୋଲିସ, କ୍ରାଇମବ୍ରାଞ୍ଚ ପକ୍ଷରୁ ସାଇବର ସଚେତନତା କରାଯାଉଛି । ସାରା ଓଡ଼ିଶାରେ ସଚେତନତା ରଥ ବୁଲିଛି । ତଥାପି ଏଭଳି ଠକେଇର ପୁନରାବୃତ୍ତି ପୋଲିସ ପାଇଁ ଚିନ୍ତା ବଢ଼ାଇଛି ।
ବାସ୍ତୁଦୋଷ ଦୂର କରିବା ଆଳରେ ଠକେଇ କରୁଥିଲେ ଭଣ୍ଡବାବା
ମାହାଙ୍ଗା: ବାସ୍ତୁଦୋଷ ଦୂର କରିବା ଆଳରେ ସୁନା ଠକେଇ । ଠକକୁ କାବୁ କରି ପୋଲିସରେ ଦେଲେ ଲୋକେ । ଘରର ବାସ୍ତୁ ଦୋଷ ଅଛି ଦୂର ହେଲେ ପରିବାରର ସମସ୍ୟା ଦୂର ହେବ ପରିବାରରେ ଶାନ୍ତି ଫେରିବ । ଏହିଭଳି କଥା କହି ନିରୀହ ଲୋକଙ୍କୁ ପୂଜାପାଠ ଆଳରେ ଘରର ସୁନା ଅଳଙ୍କାର ତରଳାଇ ଚୋରି କରି ନେଇଥିବା ଠକ ବାବାକୁ କାବୁ କରି ପୋଲିସର ଜିମା ଦେଇଛନ୍ତି ଗ୍ରାମବାସୀ । ଏଭଳି ଘଟଣା ଘଟିଛି କଟକ ଜିଲ୍ଲା ମାହାଙ୍ଗା ଥାନା ଚାହାପଡା ପଞ୍ଚାୟତ ବ୍ରହ୍ମଗଦା ଗ୍ରାମରେ । ଗ୍ରାମର ଚନ୍ଦ୍ରମଣି ପୃଷ୍ଟି, ସୂର୍ଯ୍ୟମଣି ଓ ଦୁର୍ଯ୍ୟୋଧନ ପୃଷ୍ଟିଙ୍କ ଘରେ ଯାଜପୁର ବ୍ରହ୍ମବରଦା ଅଞ୍ଚଳର ହରିଦାସ ନାମକ ଠକ ବାବା ବାସ୍ତୁ ଦୋଷ ଦୂର ପାଇଁ ପୂଜାପାଠ କରିଥିଲେ।
ପୂଜାପାଠ କରିଥିବା ସମୟର ତିନି ଭାଇଙ୍କ ଘରୁ ସୁନା ଆଣିବାକୁ କହିଥିଲେ । ସେମାନେ ୩ ହଳ ସୁନା କାନଫୁଲ ଦେବା ପରେ ଏହାକୁ ଭାଙ୍ଗି ତରଳାଇ ପୂଜାରେ ଲଗାଇ ଥିବା ବେଳେ ସୂର୍ଯ୍ୟମଣିଙ୍କ ପୁଅର ସନ୍ଦେହ ସୃଷ୍ଟି ହୋଇଥିଲା । ପରେ ତରଳ ସୁନା କମ୍ ଥିବା ଜାଣିପାରି ଥିଲେ । ଏହାପରେ ହରିଦାସଙ୍କୁ କାବୁ କରି ପୋଲିସରେ ଦେଇଥିଲେ । ପୋଲିସ ତଦନ୍ତ କରି ତାଙ୍କ ନିକଟରୁ ସୁନା ତରଳା ଏସିଡ, ଗ୍ୟାସ, ଓଜନ କଣ୍ଟା, ସହ ବିଭିନ୍ନ ତାବିଜ ଜବତ କରିଛି । ଏହାସହ ତାଙ୍କ ନିକଟରୁ ଏକ ଡ୍ରାଇଭିଂ ଲାଇସେନ୍ସ ଜବତ ହୋଇଛି । ଯେଉଁଥିରେ ତାଙ୍କ ନାମ କେଶବ ସାହୁ ବୋଲି ଲେଖାଅଛି । ନାମ ବଦଳାଇ ସେ ଏପରି ଠକେଇ କରୁଥିବା ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି ।
ବାବା ସାହେବ ଭୀମରାଓ ଆମ୍ବେଦର ବସ୍ ଟର୍ମିନାଲ ଲୋକାର୍ପଣ କଲେ ମୁଖ୍ୟମନ୍ତ୍ରୀ
ଭୁବନେଶ୍ବର: ଲୋକାର୍ପିତ ହେଲା ବାବା ସାହେବ ଭୀମ ରାଓ ଆମ୍ୱେଦକର ବସ୍ ଟର୍ମିନାଲ। ଏହି ଅତ୍ଯାଧୁନିକ ବସ ଟର୍ମିନାଲର ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜ୍ୟର ସବୁଠାରୁ ବଡ଼ ବସ୍ ଟର୍ମିନାଲ ଉଦଘାଟିତ ହୋଇଯାଇଛି । ମୁଖ୍ୟମନ୍ତ୍ରୀଙ୍କ ସହ ଏହି ଉଦଘାଟନୀ ସମାରୋହରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଉପସ୍ଥିତ ରହିଥିଲେ । ଲୋକାର୍ପଣ ପରେ ବସ ଟର୍ମିନାଲ ବୁଲି ଦେଖିଲେ ମୁଖ୍ୟମନ୍ତ୍ରୀ । ଆହାର କେନ୍ଦ୍ରକୁ ଯିବା ସହ ଖାଦ୍ୟ ମଧ୍ୟ ପରଶିଥିଲେ ।
କହି ରଖୁଛୁ କି, ଯାତ୍ରୀଙ୍କୁ ଏଠାରେ ବିମାନ ବନ୍ଦର ଭଳି ଅନୁଭୂତି ମିଳିବ। ନବୀନ ଓଡ଼ିଶାର ନୂଆରୂପ ଭାବେ ଅନ୍ତଃରାଜ୍ୟ ବରମୁଣ୍ଡା ବସ୍ ଟର୍ମିନାଲ୍ ଉଭା ହେଉଛି। BSABT ବରମୁଣ୍ଡାର କୋଣ ଅନୁକୋଣରେ ହାଇଟେକ୍ ବ୍ୟବସ୍ଥା କରାଯାଇଛି। ଫୁଡ୍ କୋର୍ଟ ସହ ବୈଦ୍ୟୁତିକ ସିଡ଼ି, ଲିଫ୍ଟ ଲଗାଯାଇଛି। ଯାତ୍ରୀଙ୍କୁ ସୂଚନା ଲାଗି ଅତ୍ୟାଧୁନିକ ଏଲ୍ଇଡି ସ୍କ୍ରିନରେ ବସ୍ ସମ୍ପର୍କିତ ସବିଶେଷ ତଥ୍ୟ ମିଳିବ। ଗାଁଠାରୁ ଆରମ୍ଭ କରି ପଞ୍ଚାୟତ, ବ୍ଲକ ଓ ସଦର ମହକୁମାକୁ ଯିବା ପାଇଁ ବସ୍ର ସମସ୍ତ ବିବରଣୀ ଏହି ଏଲ୍ଇଡି ସ୍କ୍ରିନରେ ପ୍ରଦାନ କରାଯିବ। ଲିଫ୍ଟ, ଏସ୍କାଲେଟରରେ ଗୋଟିଏ ମହଲାରୁ ଅନ୍ୟ ମହଲାକୁ ସହଜରେ ଯା’ଆସ ଲାଗି ବ୍ୟବସ୍ଥା ରହିଛି। ଯାତ୍ରୀଙ୍କ ଲାଗି ଶୀତତାପ ନିୟନ୍ତ୍ରିତ କୋଠରୀ ରହିଛି।। ଗୋଟିଏ ଛାତ ତଳେ ଯାତ୍ରୀଙ୍କୁ ଫ୍ରଣ୍ଟ ଅଫିସରୁ ଆରମ୍ଭ କରି ମେଡିକାଲ୍, ଏଟିଏମ୍, ଆହାର କେନ୍ଦ୍ର ଭଳି ସେବା ମିଳିବ। ଯାତ୍ରୀଙ୍କ ସୁବିଧାକୁ ଦୃଷ୍ଟିରେ ରଖି ଆହାର ପ୍ଲସ୍ କେନ୍ଦ୍ର ତିଆରି ହୋଇଛି। ସାଧାରଣ ଆହାର କେନ୍ଦ୍ର ତୁଳନାରେ ଏହା ଯଥେଷ୍ଟ ଉନ୍ନତମାନର ରହିବ।ସେହିପରି ଶୀତତାପ ନିୟନ୍ତ୍ରିତ କୋଠରୀରେ ଷ୍ଟାର୍ ହୋଟେଲ୍ ଭଳି ସୁବିଧା ମିଳିବ।
ଏହାସାଙ୍ଗକୁ ଯାତ୍ରୀଙ୍କୁ ମିଶନଶକ୍ତି କାଫେ, ଓର୍ମାସ ଓ ମିଲେଟ୍ କାଫେରେ ମା’ ହାତ ତିଆରି ଖାଦ୍ୟ ଖାଇବାକୁ ମିଳିବ। ଏହାସହ ଅପେକ୍ଷାରତ ଶିଶୁଙ୍କ ପାଇଁ କ୍ରୀଡ଼ାଙ୍ଗନ ରହିଥିବାବେଳେ ବାବା ସାହେବ ଭୀମ ରାଓ ଆମ୍ୱେଦକରଙ୍କ ଖୋଦେଇ ପ୍ରତିମୂର୍ତ୍ତି ରହିଛି। କାନ୍ଥବାଡ଼ରେ କଳା ସଂସ୍କୃତିର ଝଲକ ଦେଖିବାକୁ ମିଳିବ। ଯାତ୍ରୀଙ୍କ ସୁରକ୍ଷା ପାଇଁ ପୋଲିସ ଫାଣ୍ଡି ତିଆରି ହୋଇଛି। ବେସମେଣ୍ଟରେ ୧୧୫ କାର୍ ପାର୍କିଂ ପାଇଁ ସ୍ଥାନ ସଂରକ୍ଷିତ ରହିଛି। ଟର୍ମିନାଲରେ ୫୦ ବସ୍ ବେ ସହ ୨୦୦ ବସ୍ ରହଣି ପାଇଁ ପାର୍କିଂ ସ୍ପେସର ବ୍ୟବସ୍ଥା ହୋଇଛି। ସିଟିବସ୍ ପାଇଁ ୫ସ୍ଥାନ ସଂରକ୍ଷିତ ରଖାଯିବାର ବ୍ୟବସ୍ଥା ହୋଇଛି। ଦୁଇଚକିଆ ଯାନ ପାର୍କିଂ ପାଇଁ ମଧ୍ୟ ସ୍ୱତନ୍ତ୍ର ସ୍ଥାନ ରହିଛି। ସ୍ୱତନ୍ତ୍ର ରାସ୍ତା ସହ ବସ୍ ପ୍ରବେଶ ଓ ପ୍ରସ୍ଥାନ ଗେଟ୍ ଅଲଗା ଅଲଗା କରାଯାଇଛି। ଗତମାସ ଦ୍ବିତୀୟ ସପ୍ତାହରେ ଫାଇଭ ଟି ଅଧ୍ୟକ୍ଷ ଭୁବନେଶ୍ବର ବସ ଟର୍ମିନାଲ ନବୀକରଣ କାମର ସମୀକ୍ଷା କରିଥିଲେ। ପେବୃଆରୀ ସୁଦ୍ଧା କାମ ସାରିବାକୁ ନିର୍ଦ୍ଦେଶ ଦେଇଥିଲେ। ନିର୍ଦ୍ଦେଶ ମୁତାବକ ଠିକ୍ ସମୟରେ ଏହି ବସ ଟର୍ମିନାଲର କାମ ସମ୍ପନ୍ନ ହୋଇଛି। ବିଡିଏ ଦ୍ୱାରା ସାଢେ ୧୫ ଏକରରୁ ଅଧିକ ଜମିରେ ରହିଛି ଏହି ବସ୍ ଟର୍ମିନାଲ।…
ଗମନାଗମନ କ୍ଷେତ୍ରରେ ଯୋଡୁଛି ନୂଆ ଅଧ୍ଯାୟ, ସମ୍ପର୍କର ସେତୁ ପାଲଟିଛି ବିଜୁ ସେତୁ
କଣ୍ଟାବାଞ୍ଜି: ସମ୍ପର୍କର ସେତୁ ପାଲଟିଛି ବିଜୁ ସେତୁ । ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ରାଣୀପୁର- ମଲକା ସଡ଼ା-ଟାଙ୍ଗ ଜୋର ଉପରେ ନିର୍ମାଣ ହୋଇଛି ବିଜୁସେତୁ । ଦୂର ହୋଇଛି ଲୋକଙ୍କ ସମସ୍ଯା । ଦୀର୍ଘ ଦିନର ଦାବି ପୂରଣ ହୋଇଥିବାରୁ ରାଜ୍ଯ ସରକାରଙ୍କୁ ଧନ୍ଯବାଦ ପ୍ରଦାନ କରିଛନ୍ତି ଅଞ୍ଚଳବାସୀ ସମ୍ପର୍କର ସେତୁ ପାଲଟିଛି ବିଜୁ ସେତୁ । ଗମନାଗମନ କ୍ଷେତ୍ରରେ ଯୋଡୁଛି ନୂଆ ଅଧ୍ଯାୟ। ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ରାଣୀପୁର- ମଲକା ସଡ଼ା- ଟାଙ୍ଗଜୋର ଉପରେ ନିର୍ମାଣ ହେଇଛି ବିଜୁସେତୁ । ଦୂର ହୋଇଛି ଲୋକଙ୍କ ସମସ୍ଯା । ଟାଙ୍ଗ ଜୋର ଉପରେ ସ୍ଥାୟୀ ପୋଲଟିଏ ନଥିବାରୁ ଲୋକେ ଅନେକ ଅସୁବିଧାର ସମ୍ମୁଖୀନ ହେଉଥିଲେ । ଏହି ସେତୁ ନିର୍ମାଣ ପରେ ୪ଟି ପଞ୍ଚାୟତ ଝରିଆଲ, ଠେମରା, ଗରେଇଁ ଲେବଡାର ଲୋକେ ଉପକୃତ ହୋଇପାରୁଛନ୍ତି । ରାଜ୍ୟ ସରକାରଙ୍କ ପକ୍ଷରୁ ୬ ଲକ୍ଷ ୬୬ହଜାର ୯୬ ଟଙ୍କାରେ ନିର୍ମାଣ ହେଇଛି ବିଜୁ ସେତୁ । ସେତୁ ନିର୍ମାଣ ପରେ ଶିକ୍ଷା , ସ୍ୱାସ୍ଥ୍ୟ ବ୍ୟବସାୟ ସହ ଅର୍ଥନୈତିକ ସ୍ଥିତିରେ ଉନ୍ନତି ହୋଇପାରିଛି । ଦୀର୍ଘ ଦିନର ଦାବି ପୂରଣ ହୋଇଥିବାରୁ ରାଜ୍ଯ ସରକାରଙ୍କୁ ଧନ୍ଯବାଦ ପ୍ରଦାନ କରିଛନ୍ତି ଅଞ୍ଚଳବାସୀ ।