ଭୁବନେଶ୍ବର: ବାର୍ ମାଲିକ ଓ ପବ୍ ମାଲିକଙ୍କ ସହ କମିଶନରେଟ ପୋଲିସ ଓ ଅବକାରୀ ବିଭାଗର ଗୁରୁତ୍ୱପୂର୍ଣ୍ଣ ବୈଠକ । ଧୁମଧାମରେ କଟିବ ନୂଆବର୍ଷ । ଜିରୋ ନାଇଟ ସେଲିବ୍ରେସନ ପାଇଁ ଆରମ୍ଭ ହୋଇଛି ପ୍ରସ୍ତୁତି । ୨୦୨୪ କୁ ସ୍ୱାଗତ ପାଇଁ ହୋଟେଲ, ପବ, ଡ୍ୟାନ୍ସ ବାର ପ୍ରସ୍ତୁତ ହୋଇ ରହିଥିବା ବେଳେ ସେମାନଙ୍କ ଉପରେ ଆଖି ରଖିଛି ଅବକାରୀ ବିଭାଗ ଓ କମିଶନରେଟ ପୋଲିସ । ମଙ୍ଗଳବାର ବାର୍ କ୍ଲବ ମାଲିକଙ୍କ ସହ ଆଲୋଚନା କରିଛନ୍ତି ଡିସିପି । ୧୨ ଟା ରାତି ପରେ କ୍ଲବ , ପବ ଚଳାଇବା ପାଇଁ ଆବେଦନ ମୁତାବକ ଅନୁମତି ମିଳିଛି । ୧ ଟା ୩୦ ପର୍ଯ୍ୟନ୍ତ ବାର ଓ କ୍ଲବ ଖୋଲାଯିବ । ୩୧ ତାରିଖ ରାତିରେ ଜିରୋ ନାଇଟ ସେଲିବ୍ରେସନ ନେଇ କୌଣସି ଇଭେଣ୍ଟ ବା ପ୍ରାଇଭେଟ ସଂସ୍ଥାକୁ ଆଇନଶୃଙ୍ଖଳା ଦୃଷ୍ଟିରୁ ଅନୁମତି ମିଳିବ ନାହିଁ । ଖିଲାପକାରୀଙ୍କୁ ଜଗିବା ପାଇଁ ୩ଟି ଫ୍ଲାଇଙ୍ଗ ସ୍କ୍ବାଡ ଗଠନ କରିଛି ଅବକାରୀ ବିଭାଗ । ସେପଟେ ଡିସେମ୍ବର ୩୧ ତାରିଖ ଓ ଜାନୁଆର ୧ ତାରିଖରେ ଟୁଇନ ସିଟିରେ ପୋଲିସ ବ୍ୟାପକ ପହରା ମାରିବ । ଭିଡ ନିୟନ୍ତ୍ରଣ ଓ Drunk and drive ପାଇଁ ବିଭିନ୍ନ ସ୍ଥାନରେ ପୁଲିସ ପାଟ୍ରୋଲିଂ କରିବା ସହ ନାକାବନ୍ଦୀ କରିବ । ବଡ଼ଦିନ ପାଇଁ ଚର୍ଚ୍ଚ, ପିକନିକ ପ୍ଲେସରେ ମଦ୍ୟପଙ୍କ ଉପଦ୍ରବ ରୋକିବା ପାଇଁ ପ୍ରତ୍ୟୋକ ଥାନାକୁ ବ୍ରେଥ ଆନାଲାଇଜର ଦିଆଯାଇଥିବା କହିଛନ୍ତି ଡିସିପି ।
ଶ୍ରୀକ୍ଷେତ୍ରରୁ ସାରାରାଜ୍ୟ, ବିଭିନ୍ନ ମନ୍ଦିରରେ ପହଞ୍ଚିଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିମନ୍ତ୍ରଣ
ନନ୍ଦିଘୋଷ ବ୍ୟୁରୋ: ବିଭିନ୍ନ ମନ୍ଦିରରେ ପହଞ୍ଚିଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିମନ୍ତ୍ରଣ । ସବୁଠି ଉତ୍ସାହର ସହ ଆମନ୍ତ୍ରଣ କରାଯାଇଥିବାବେଳେ ବ୍ୟାପକ ବ୍ୟବସ୍ଥା ମଧ୍ୟ କରାଯାଇଛି । ଭବ୍ୟ ସ୍ବାଗତ କରାଯାଇଛି । ମହାପ୍ରଭୁଙ୍କ ମାମୁ ଘରକୁ ଗଲା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିମନ୍ତ୍ରଣ । ନିଆଳି ମାଧବାନନ୍ଦ ଦେବଙ୍କ ମନ୍ଦିରରେ ପହଞ୍ଚିଛି ନିମନ୍ତ୍ରଣ ପତ୍ର । ବାଡ଼ଗ୍ରାହୀ ସେବାୟତ ଜଗନ୍ନାଥ ଦାସ ମହାପାତ୍ର, ବିଭୁ ପ୍ରସାଦ ଦାସମହାପାତ୍ରଙ୍କ ସହ ବରିଷ୍ଠ ଅଧିକାରୀ ମାଧବ ପୀଠରେ ପହଞ୍ଚି ନିମନ୍ତ୍ରଣ ପତ୍ର ପ୍ରଦାନ କରିଛନ୍ତି । ଏହି ଅବସରରେ ମନ୍ଦିରର ସେବାୟତ ଓ ଅଞ୍ଚଳବାସୀଙ୍କ ପକ୍ଷରୁ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା l
ପୁରୀରୁ ଆସିଛି ଡାକରା । ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଲୋକାର୍ପଣ ଉତ୍ସବରେ ବାଲେଶ୍ବର ଜିଲ୍ଲାର ମଠ ମନ୍ଦିରକୁ ନିମନ୍ତ୍ରଣ ଦେଲେ ପୁରୀରୁ ଆସିଥିବା ଦଇତାପତି । ଏହି ଦଇତାପତି ଦଳକୁ ପ୍ରଥମେ ସିମୁଳିଆ ଠାରେ ସ୍ବାଗତ କରାଯାଇଥିବା ବେଳେ ବାଲେଶ୍ବରରେ ଲୋକପ୍ରତିନିଧି ଓ ଜିଲ୍ଲା ପ୍ରଶାସନ ତରଫରୁ ସମ୍ବର୍ଦ୍ଧିତ କରାଯାଇଥିଲା । ଦଇତାପତି ଦଳ ଶ୍ରୀମନ୍ଦିରରୁ ଆଣିଥିବା ନିମନ୍ତ୍ରଣ ପତ୍ର ସହିତ ଚତୁର୍ଦ୍ଧାମୂର୍ତ୍ତିଙ୍କ ଶ୍ରୀବସ୍ତ୍ର ପ୍ରଦାନ କରିଥିଲେ । ନୀଳଗିରି ଜଗନ୍ନାଥ ମନ୍ଦିର ଓ ବାବା ଚନ୍ଦନେଶ୍ଵର ମନ୍ଦିରର ପୂଜକମାନେ ଦଇତାପତିଙ୍କ ହାତରୁ ନିମନ୍ତ୍ରଣ ପତ୍ର ଗ୍ରହଣ କରି ସେମାନଙ୍କୁ ମନ୍ଦିର ତରଫରୁ ଉପହାର ଓ ପ୍ରସାଦ ଅର୍ପଣ କରିଥିଲେ । ସମସ୍ତ ମଠ, ମନ୍ଦିର ସହିତ ଜନସାଧାରଣ ଏହି ଭବ୍ଯ ଉତ୍ସବରେ ଯୋଗ ଦେବାକୁ ଦଇତାପତିମାନେ ନିମନ୍ତ୍ରଣ ଦେଇଛନ୍ତି । ଜାନୁଆରି 17 ତାରିଖ ଠାରୁ ସମସ୍ତ ଘର ସମ୍ମୁଖରେ ପୂର୍ଣ୍ଣକୁମ୍ଭ ପ୍ରତିଷ୍ଠା ସହିତ ଘୀଅ ଦୀପ ଜାଳି ନିରାମିଷ ଆହାର କରିବାକୁ ଦଇତାପତିମାନେ ଜନସାଧାରଣଙ୍କୁ ପରାମର୍ଶ ଦେଇଛନ୍ତି ।
କଣ ରହିଥିଲା ଫ୍ରାନ୍ସରେ ବିମାନ ଅବତରଣର କାରଣ?
ନନ୍ଦିଘୋଷ ବ୍ୟୁରୋ: ଫ୍ରାନ୍ସରେ ଅଟକ ଥିବା ଭାରତୀୟ ଫେରିଛନ୍ତି ସ୍ବଦେଶ । ସମ୍ଭାବ୍ୟ ମାନବ ଚାଲାଣ ଅଭିଯୋଗର ଛାନବିନ ହେବା ପରେ ଫେରିଛନ୍ତି ଯାତ୍ରୀ। ତେବେ ବିମାନର ଯାତ୍ରାକୁ ନେଇ ଉଠିଛି ଅନେକ ପ୍ରଶ୍ନ । ଦୁବାଇରୁ ବିମାନ ଆମେରିକା କିମ୍ବା କାନାଡା ଯିବା ନେଇ ଥିଲା ସମ୍ଭାବନା । ୨୭୬ ଯାତ୍ରୀ ଫେରିଥିବାବେଳେ ଫ୍ରାନ୍ସରେ ଆଶ୍ରୟ ନେଇଛନ୍ତି ୨୭ ଭାରତୀୟ । ଡଙ୍କି ପ୍ରସେସ ନେଇ ସୃଷ୍ଟି ହୋଇଛି ସସପେନ୍ସ ।
କଣ ରହିଥିଲା ଫ୍ରାନ୍ସରେ ବିମାନ ଅବତରଣର କାରଣ? କାହିଁକି ୩୦୩ ଭାରତୀୟଙ୍କୁ ୪ ଦିନ ଧରି ରଖାଯାଇଥିଲା ଅଟକ? ବିମାନଟି ଥିଲା ଡଙ୍କି ଫ୍ଲାଇଟ ନା ସାଧାରଣ? ଫ୍ଲାଇଟରେ ମାନବ ଚାଲାଣ ଅଭିଯୋଗ ସତ ନା ମିଛ? ଏସବୁ ଦ୍ବନ୍ଦ୍ବର ଅନ୍ତ ଘଟି ନଥିଲେ ବି ମୁମ୍ବାଇରେ ଅବତରଣ କରିଛି ବିମାନ । ଫେରିଛନ୍ତି ୨୭୬ ଯାତ୍ରୀ । ଆଶ୍ରୟ ନେବାକୁ ଅନୁରୋଧ କାରଣରୁ ୨୭ ଯାତ୍ରୀଙ୍କୁ ରଖାଯାଇଛି ଫ୍ରାନ୍ସରେ । ଗତ ଗୁରୁବାର ୩୦୩ ଯାତ୍ରୀଙ୍କୁ ନେଇ ଦୁବାଇରୁ ରୋମାନିଆର ଲିଜେଣ୍ଡ କମ୍ପାନୀର ଏକ ଚାର୍ଟର ବିମାନ ନିକାରାଗୁଆ ଯିବା ବାଟରେ ଫ୍ରାନ୍ସର ଭାଟ୍ରି ବିମାନବନ୍ଦରରେ ଅବତରଣ କରିଥିଲା । ଯାତ୍ରୀଙ୍କ ମଧ୍ୟରେ ଥିଲେ ୧୧ ନାବାଳକ ଓ ଜଣେ ୨୧ ମାସର ଶିଶୁ । ବିମାନକୁ ଭାରତ ଫେରାଇ ନେବା ଲାଗି ପ୍ୟାରିସସ୍ଥିତ ଭାରତୀୟ ଦୂତାବାସ ହସ୍ତକ୍ଷେପ କରିଥିଲା । ବିମାନଟି ଆମେରିକା ବା କାନାଡ଼ାରେ ବେଆଇନ ଭାବେ ପ୍ରବେଶ କରିବା ସମ୍ଭାବନା ଥିଲା ।
ଏବେ ଆସନ୍ତୁ ନଜର ପକାଇବା କଣ ଏହି ଡଙ୍କି ରୁଟ ଓ ଡଙ୍କି ଫ୍ଲାଇଟ । ବିନା ପାସପୋର୍ଟ, କୌଣସି ଆଇନସମ୍ମତ ନଥି ବିନା ଗୋଟିଏ ଦେଶରୁ ଅନ୍ୟ ଏକ ଦେଶକୁ ଯାତ୍ରା କରିବା ହିଁ ଡଙ୍କି ପ୍ରସେସ । ବିଶେଷ କରି ଆମେରିକା, କାନାଡା ଓ ମେକ୍ସିକୋରେ ଏହି ବ୍ୟବସ୍ଥା ଅଧିକ ଆଦୃତ । ଲକ୍ଷ ଲକ୍ଷ ଟଙ୍କା ଦେଇ ଏହି ବେଆଇନ ମାର୍ଗ ଅବଲମ୍ବନ କରିଥାନ୍ତି ଭାରତୀୟ । ସମ୍ଭାବ୍ୟ ପଥରେ ଥାଏ ଗିରଫଦାରୀ, ହତ୍ୟା ତଥା କ୍ଷୁଧା ଓ ଅନ୍ୟାନ୍ୟ କାରଣଜନିତ ମୃତ୍ୟୁ ବିପଦ । ତଥାପି ଏହି ପଥରେ ଆକର୍ଷିତ ହୋଇଥାନ୍ତି ହଜାର ହଜାର ଭାରତୀୟ । ଆର୍ଥିକ ଦୁରବସ୍ଥା, ଅଧିକ ଅର୍ଥ ପାଇବାର ମୋହ, ଅନ୍ତର୍ଜାତୀୟ ରାକେଟ କାରଣ ରହିଛି ଏହା ପଛରେ ।
୨୦୨୩ରେ ୯୭ ହଜାର ଭାରତୀୟ ବେଆଇନ ଭାବେ ଆମେରିକାରେ ପ୍ରବେଶ କରିଥିଲେ । ୨୦୨୨ ତୁଳନାରେ ଏହି ହାର ୫୧ ଦଶମିକ ୬୧ ପ୍ରତିଶତ ଅଧିକ । ୨୦୨୨ରେ ୪୧ ହଜାର ୭୭୦ ଭାରତୀୟ ମେକ୍ସିକୋ ସୀମା ଦେଇ ଆମେରିକାରେ ପ୍ରବେଶ ଲାଗି ଉଦ୍ୟମ କରିଥିଲେ ।
ସୀମାଙ୍କୁ ନେଇ ଏମିତି କହିଲେ ଅଞ୍ଜୁ
ନୂଆଦିଲ୍ଲୀ: ପାକିସ୍ତାନରୁ ଅଞ୍ଜୁ ଭାରତ ଫେରିବା ପରେ ତାଙ୍କୁ ଅନେକ ଚର୍ଚ୍ଚା । ସେ କେଉଁଠାରେ ରହିବେ କଣ କରିବେ? ଏଭଳି ପ୍ରଶ୍ନ ଉଠୁଥିବାବେଳେ ଅଞ୍ଜୁ ଏକ ଜାତୀୟ ଗଣମାଧ୍ୟମକୁ ନିଜର ପ୍ରତିକ୍ରିୟା ଦେଇଛନ୍ତି । ତାଙ୍କୁ ପ୍ରଶ୍ନ କରାଯାଇଥିଲା କି, ତୁମେ ଭାରତକୁ ଫେରି ଆସିଲ । ସୀମା ଫେରିଯିବେ କି? ଏହାର ଉତ୍ତରରେ ଅଞ୍ଜୁ କହିଥିଲେ କି, ସେ ଭାଗିକି ଆସି ବିବାହ କରିଛି । ମୁଁ ଭିସା ନେଇ ଆଇନ ଅନୁସାରେ ଯାଇଥିଲି । ପୂର୍ବରୁ ଜାଣିଥିଲି କି, ଭାରତକୁ ଫେରିବି । ମାତ୍ର ସୀମା ଆଇନ ଅନୁସାରେ ଆସିନାହିଁ । ସେ ଲୁଚିକି ଆସିଥିବାରୁ ପାକିସ୍ତାନକୁ ଫେରିପାରିବ ନାହିଁ । ମାତ୍ର ମୋର ସମସ୍ତ ଡକ୍ୟୁମେଣ୍ଟ ଠିକ୍ ଅଛି ।
ଏହାସହ ଅଞ୍ଜୁ କହିଛନ୍ତି କି, ପାକିସ୍ତାନ କିମ୍ବା ଭାରତରେ ରହିବା ପାଇଁ ଚାହୁଁନାହାନ୍ତି । ପାକିସ୍ତାନୀ ସ୍ବାମୀ ନସରୁଲ୍ଲାଙ୍କ ସହ ଦୁବାଇରେ ରହିବେ । ପାକିସ୍ତାନରୁ ଆସି ଭାରତରେ ରହିଥିଲେ ସୁଦ୍ଧା ପାକିସ୍ତାନୀ ସ୍ବାମୀ ନସରୁଲ୍ଲାଙ୍କ ସହ ନିରନ୍ତର ସମ୍ପର୍କରେ ରହିଛନ୍ତି । ପ୍ରତିଦିନ କଥା ହେଉଥିବାବେଳେ ଦୁବାଇରେ ରହିବେ । ଯଦି ଅଞ୍ଜୁଙ୍କ ପିଲାମାନେ ରାଜି ହୁଅନ୍ତି ତାହେଲେ ସେମାନଙ୍କୁ ମଧ୍ୟ ନେଇ ସାଙ୍ଗରେ ଯିବେ ।
୨୭ ବର୍ଷ : ଆଞ୍ଚଳିକ ଦଳରୁ ଆନ୍ଦୋଳନ
ଭୁବନେଶ୍ବର: ୨୭ ତମ ପ୍ରତିଷ୍ଠା ଦିବସ ପାଳନ କରିଛି ବିଜୁ ଜନତା ଦଳ । ଏହି ଅବସରରେ ସେବା ଓ ବିକାଶର ବାର୍ତ୍ତା ଦେଇଥିବା ବିଜେଡି ପକ୍ଷରୁ ସାଇକେଲ ରାଲି ସହ ରକ୍ତଦାନ କାର୍ଯ୍ୟକ୍ରମ କରାଯାଇଛି । ଭୁବନେଶ୍ବର ବିଜୁ ପଟ୍ଟନାୟକ ପାର୍କରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଶଙ୍ଖ ଭବନରେ ସେବା ଓ ବିକଶିତ ଓଡ଼ିଶା ଗଠନ ପାଇଁ ଶପଥ ପାଠ କଲେ ଦଳୀୟ କର୍ମୀ ଓ ନେତା ।
ବର୍ଷ ବର୍ଷ ଧରି ସଫଳତାର ପାହାଚ ଚଢିଚାଲିଛି ବିଜେଡି । ବିଜୁ ଜନତା ଦଳର ୨୭ ତମ ପ୍ରତିଷ୍ଠା ଦିବସ ଥିଲା ନିଆରା । ସକାଳୁ ସକାଳୁ ଶଙ୍ଖ ଭବନରେ ଜମିଥିଲା ନେତାଙ୍କ ଭିଡ଼ । ୨୦୨୪ ନିର୍ବାଚନ ପୂର୍ବରୁ ଶେଷ ପ୍ରତିଷ୍ଠା ଦିବସ ପାଳଛି ଦଳ । ଏହାକୁ ସେବା ଓ ସମର୍ପଣ ଜରିଆରେ ରାଜ୍ୟବାସୀଙ୍କ ପାଖକୁ ପହଞ୍ଚାଇବାକୁ ଶଙ୍ଖ ଭବନରେ ବିଶେଷ କାର୍ଯ୍ୟକ୍ରମର ଆୟୋଜନ ହୋଇଛି । ସକାଳ ୭.୨୫ରେ ଶଙ୍ଖ ଭବନରେ ଦଳୀୟ ପତାକା ଉତ୍ତୋଲନ କରିଥିଲେ ଦଳର ବରିଷ୍ଠ ନେତା ଓ କର୍ମୀ । ଦିନ ୧୦.୩୦ରେ ଭୁବନେଶ୍ବର ବିଜୁ ପଟ୍ଟନାୟକ ପାର୍କରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ସେହିପରି ନବୀନଙ୍କ ପ୍ରତି ଜୀବନ ମୂଲ୍ୟବାନ ନାରାକୁ ଆହୁରି ବାସ୍ତବ ରୂପ ଦେବା ପାଇଁ ଶଙ୍ଖ ଭବନରେ ମେଗା ରକ୍ତଦାନ ଶିବିର ଅନୁଷ୍ଠିତ ହୋଇଥିଲା । ଯେଉଁଥିରେ ସ୍ବେଚ୍ଛାକୃତ ଭାବେ ଲୋକେ ଯୋଗ ଦେଇ ରକ୍ତଦାନ କରିଥିଲେ । ସେମାନଙ୍କ ମନୋବଳ ବୃଦ୍ଧି କରିଥିଲେ ବିଜେଡିର ହେଭିଓ୍ବେଟ୍ ନେତା । ଦଳର ୨୬ ବର୍ଷ ପୂର୍ତ୍ତି ଅବସରରେ ୨୬ ହଜାର ୟୁନିଟ ରକ୍ତ ସଂଗ୍ରହ କରିବା ଦିଗରେ ଗତ ମାସେ ହେଲା ରକ୍ତଦାନ ଶିବିର ଜାରି ରଖିଥିଲା ବିଜେଡି । ଓଡ଼ିଶାର ସ୍ବାର୍ଥ ପାଇଁ କାମ କରି ସମୃଦ୍ଧ, ସଶକ୍ତ ଓ ସ୍ବାଭିମାନୀ ଓଡ଼ିଶା ଗଠନ ଦିଗରେ କାମ କରିବା ପାଇଁ ବିଜେଡି ନେତା ଓ କର୍ମୀ ଶଙ୍ଖ ଭବନରେ ଶପଥ ପାଠ କରିଥିଲେ ।
ବିଜେଡିର ପ୍ରତିଷ୍ଠା ଦିବସରେ ବିଜୁ ବାବୁଙ୍କ କଟକରୁ ପେଶାଓ୍ବର ଯାଏ ଦୁଃସାହସିକ ସାଇକେଲ ଯାତ୍ରାର ସ୍ମୃତିଚାରଣ କରାଯାଇଥିଲା । ଏହାର ସ୍ମରଣ ଉଦ୍ଦେଶ୍ୟରେ ଦଳ ପକ୍ଷରୁ ବିରାଟ ସାଇକେଲ ଯାତ୍ରା କରାଯାଇଥିଲା । ସକାଳ ୮ଟାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନ୍ମସ୍ଥାନ କଟକ ଆନନ୍ଦ ଭବନରୁ ଭୁବନେଶ୍ବର ବିମାନ ବନ୍ଦର ନିକଟରେ ଥିବା ବିଜୁ ପଟ୍ଟନାୟକଙ୍କ ପ୍ରତିୂମୂର୍ତ୍ତି ଯାଏ ବିଶାଳ ସାଇକେଲ ଶୋଭାଯାତ୍ରା କରାଯାଇଥିଲା । କଟକରୁ ନଖରା, ହଂସପାଳ, ରସୁଲଗଡ଼, ବାଣୀବିହାର, ରାମ ମନ୍ଦିର ଛକ, ମାଷ୍ଟର କ୍ୟାଣ୍ଟିନ ଛକ, ରାଜମହଲ ଛକ, ଶିଶୁଭବନ ଛକ, କ୍ୟାପିଟାଲ ହସ୍ପିଟାଲ ଛକ ଓ ଏୟାରପୋର୍ଟ ଛକ ଅତିକ୍ରମ କରିଥିଲା ସାଇକେଲ ଯାତ୍ରା । ଶେଷରେ ଭୁବନେଶ୍ବରର ବିମାନ ବନ୍ଦର ନିକଟରେ ଥିବା ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତିରେ ମାଲ୍ୟାପର୍ଣ କରାଯାଇ ସାଇକେଲ ଶୋଭାଯାତ୍ରା ଶଂଖ ଭବନ ଅଭିମୁଖେ ଗଡ଼ିଥିଲା ।
ଦୁଇ ଦଶନ୍ଧିରୁ ଅଧିକ ବିକାଶ ଓ ସେବାର ମନୋଭାବ ନେଇ ରାଜ୍ୟବାସୀଙ୍କ ପାଇଁ କାମ କରି ଚାଲିଛି ବିଜୁ ଜନତା ଦଳ । ଆଞ୍ଚଳିକ ଦଳ ଭାବେ ବାରମ୍ବାର ଲୋକଙ୍କ ଆଶୀର୍ବାଦ ଲାଭ କରିଛି । ବିଜୁ ବାବୁଙ୍କ ଆଦର୍ଶରେ ଗଠନ ହୋଇଥିବା ଏହି ଦଳର ଏକ ମାତ୍ର ଲକ୍ଷ୍ୟ ହେଉଛି ରାଜ୍ୟର ବିକାଶ ଓ ରାଜ୍ୟବାସୀଙ୍କ ଉନ୍ନତି । ରୂପାନ୍ତରିତ ଓଡ଼ିଶା ଗଠନ କରି ବିକଶିତ ଓଡ଼ିଶା ଗଠନ ଦିଗରେ କାମ ଜାରି ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ପୁଣି ବଢିପାରେ ପେଟ୍ରୋଲ-ଡିଜେଲର ଖୁଚୁରା ଦର
ଭୁବନେଶ୍ବର: ପୁଣି ବଢିପାରେ ପେଟ୍ରୋଲ-ଡିଜେଲର ଖୁଚୁରା ଦର । ପୁଣି ମହଙ୍ଗା ହୋଇପାରେ ଖାଇବା ତେଲ । ଲୋହିତ ସାଗରରେ ଅଶୋଧିତ ତୈଳ ନେଇ ଭାରତ ଆସୁଥିବା ଜାହାଜଙ୍କୁ ଲଗାତାର ଡ୍ରୋନ୍ ଆକ୍ରମଣ କରିଛନ୍ତି ହାଉଥି ଆତଙ୍କବାଦୀ । ଠିକଣା ସମୟରେ ତୈଳ ଆସିପାରୁନଥିବାରୁ ଇନ୍ଧନ ଜାତୀୟ ତେଲ ଓ ଖାଇବା ତେଲର ଦର ବୃଦ୍ଧି ହେବା ନେଇ ଆଶଂକା ଦେଖାଦେଲାଣି । ଗତ ୧୩ ଦିନ ଭିତରେ ଅଶୋଧିତ ତୈଳ ବ୍ୟାରେଲ୍ ୭୨ ଡଲାରରୁ ୭୯ ଡଲାରରେ ପହଞ୍ଚିଲାଣି । ଏମିତି ସ୍ଥିତି ରହିଲେ ଭାରତକୁ ତୈଳ ଆମଦାନୀ ଆଫ୍ରିକା ବାଟେ କରିବାକୁ ପଡ଼ିବ । ଯାହା ବ୍ୟୟ ବହୁଳ । ଫଳରେ ଖାଉଟିଙ୍କୁ ଆହୁରି ମହଙ୍ଗାମାଡ଼ର ଶିକାର ହେବା ଆଶଙ୍କା ଉପୁଜିଛି ।
ଦେଢ଼ବର୍ଷ ହେଲାଣି ପେଟ୍ରୋଲ-ଡିଜେଲ ଦର କମିନି । ଭାରତର ଅର୍ଥନୀତିକୁ ଅସ୍ଥିର କରିବାକୁ ଅନ୍ତଃରାଷ୍ଟ୍ରୀୟ ଆତଙ୍କବାଦୀଙ୍କ ଆକ୍ରମଣ । କମିବା ପରିବର୍ତ୍ତେ ଏଣିକି ଖୁଚୁରା ପେଟ୍ରୋଲ ଓ ଡିଜେଲ ଦର ବଢିବା ଆଶଙ୍କା । ଖାଲି ପେଟ୍ରୋଲ-ଡିଜେଲ ନୁହଁ, ବଢିବ ଖାଇବା ତେଲ ପାମ୍, ସୂର୍ଯ୍ୟମୁଖୀ ଓ ସୋରିଷ ତେଲ ସମେତ ଆମଦାନୀ ହେଉଥିବା ବୈଦ୍ୟୁତିକ ସାମଗ୍ରୀ ଦର । ମହଙ୍ଗା ମାଡ଼ରେ ଆହୁରି ଆଉଟୁପାଉଟୁ ହେବେ ଖାଉଟି । କାରଣ ଲୋହିତ ସାଗରରେ ପଣ୍ୟ ଓ ଅଶୋଧିତ ତୈଳ ନେଇ ଭାରତ ଆସୁଥିବା ଜାହଜ ଉପରେ ହାଉଥି ଆତଙ୍କବାଦୀ ଗୋଷ୍ଠୀ ଡ୍ରୋନ୍ ମାଡ଼ କରୁଛନ୍ତି । ଇସ୍ରାଏଲ୍-ହମାସ ଲଢ଼େଇ ପରିଣତି ଏବେ ଭାରତ ଉପରେ ପଡ଼ିବାକୁ ଯାଉଛି । ଗତ ୧୩ ଦିନ ଭିତରେ ଅଶୋଧିତ ତୈଳ ଦର ୭୨ ଡଲାରରୁ ବଢ଼ି ୭୯.୨୭ ଡଲାର ପହଞ୍ଚିଲାଣି । ୩୩ ପ୍ରତିଶତ ଅଶୋଧିତ ତୈଳ ଋଷରୁ ଭାରତ ଆମଦାନୀ କରୁଛି । ବାକି ଆବଶ୍ୟକ ତୈଳ ଲୋହିତ ସାଗର ଦେଇ ଭାରତ ମଧ୍ୟପ୍ରାଚ୍ୟ ଇରାକ୍, ସାଉଦି ଆରବରୁ ଆମଦାନୀ କରିଥାଏ । ଲୋହିତ ସାଗରରେ ଏପରି ଆକ୍ରମଣ ଜାରି ରହିଲେ ଭାରତକୁ ଆଫ୍ରିକା ଦେଇ ଜାହାଜ ଆଣିବାକୁ ପଡ଼ିବ । ଫଳରେ ତୈଳ କମ୍ପାନୀଙ୍କୁ ଅଧିକ ଖର୍ଚ୍ଚ ବହନ କରିବାକୁ ପଡ଼ିବ ।
ଦେଢ଼ବର୍ଷ ହେଲାଣି ପେଟ୍ରୋଲ-ଡିଜେଲ ଦର ମହଙ୍ଗା । ଘାଇଲା ଖାଉଟି । ସ୍ଥିତି ଏମିତି ଚଳିତବର୍ଷ ଶୀତଦିନରେ ବି ବଜାର ଦରରୁ ଲୋକଙ୍କୁ ନିସ୍ତାର ମିଳିନି । ଆଗକୁ ସ୍ଥିତି ଆହୁରି ସଙ୍ଗୀନ ହେବାକୁ ଯାଉଛି । ପାମ୍ ଖାଇବା ତେଲ ଚାହିଦା ମେଣ୍ଟାଇବା ପାଇଁ ଆନ୍ଧ୍ରପ୍ରଦେଶର ଗୋଦାବରୀ ଅବବାହିକାରେ ଗତ ୩ ବର୍ଷ ଭିତରେ ପାମ୍ ତେଲ ଚାଷ କରାଯାଇ ଉତ୍ପାଦନ ଆରମ୍ଭ ହୋଇଛି । କିନ୍ତୁ ଭାରତକୁ ଏବେ ବି ସୂର୍ଯ୍ୟମୁଖୀ ଓ ସୋରିଷ ତେଲ ପାଇଁ ବିଦେଶରୁ ଆମଦାନୀ କରିବାକୁ ପଡୁଛି । ଜାହାଜ ଆକ୍ରମଣର ପ୍ରଭାବ ଏବେ ହଠାତ୍ ଦରବୃଦ୍ଧି କରିନାହିଁ । ଏବେ ପାମ୍ ତେଲର ପାଇକରୀ ଦର ୮୦ ଟଙ୍କାରୁ ୯୩ ଟଙ୍କା ଭିତରେ ରହିଛି । ଯଦି ଭାରତ ସମେତ ଅନ୍ତଃରାଷ୍ଟ୍ରୀୟ ସଂସ୍ଥା ପାଲେଷ୍ଟାଇନ୍-ହମାସ ଓ ଋଷ ୟୁକ୍ରେନ୍ ଯୁଦ୍ଧ ବନ୍ଦ କରିବାକୁ ଉଦ୍ୟମ ନ କରନ୍ତି ତାହେଲେ ଆଉ ୩ରୁ ୪ ମାସ ଭିତରେ ଜିନିଷପତ୍ର ଦର ହୁହୁ ହୋଇ ବଢିଚାଲିବ ।
ଜାନୁଆରୀରେ ମାଲକାନଗିରିକୁ ଉଡ଼ିବ ବିମାନ
ଭୁବନେଶ୍ବର: ଉପାନ୍ତ ଜିଲ୍ଲା ମାଲକାନଗିରିରୁ ଉଡ଼ିବ ବିମାନ। ଆସନ୍ତା ଜାନୁଆରୀ ମାସ ପ୍ରଥମ ସପ୍ତାହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଲୋକାର୍ପଣ କରିବେ । ଯାତ୍ରୀବାହୀ ବିମାନ ସେବା ଆରମ୍ଭ ପାଇଁ ମାଲକାନଗିରି ବିମାନବନ୍ଦରରେ ସମସ୍ତ କାର୍ଯ୍ୟ ପ୍ରାୟ ଶେଷ ହୋଇଛି । ରନଓ୍ବେ, ପାଚେରୀ, ଏଟିସି ଟାଓ୍ବାର, ଯାତ୍ରୀ ପ୍ରତୀକ୍ଷାଳୟ ନିର୍ମାଣ ସରିଛି । ପ୍ରଥମ ପର୍ଯ୍ୟାୟରେ ଏଠାରୁ ୯ ଆସନ ବିଶିଷ୍ଟ ବିମାନ ସେବା ଆରମ୍ଭ ହେବା ସମ୍ଭାବନା ଅଛି । ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ପକ୍ଷରୁ ମାଲକାନଗିରି ବିମାନବନ୍ଦର କାର୍ଯ୍ୟକ୍ଷମ କରିବା ଲାଗି ସମସ୍ତ ବୈଷୟିକ ସହାୟତା ପ୍ରଦାନ କରାଯାଉଛି । ବାଣିଜ୍ୟ ଓ ପରିବହନ ବିଭାଗ ଏବଂ ବିମାନବନ୍ଦର କର୍ତ୍ତୃପକ୍ଷଙ୍କର ଏକ ଉଚ୍ଚପଦସ୍ତ ଟିମ୍ ମାଲକାନଗିରି ବିମାନବନ୍ଦର ଗସ୍ତ କରି ପ୍ରସ୍ତୁତି ଅନୁଧ୍ୟାନ କରିବା କାର୍ଯ୍ୟକ୍ରମ ରହିଛି ।
ଚଳିତ ବର୍ଷ ମେ’ ମାସରେ ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ ମାଲକାନଗିରି ଗସ୍ତ ସମୟରେ କୋଟେଲଗୁଡ଼ା ଠାରେ ଥିବା ଏହି ବିମାନବନ୍ଦରର ସମ୍ପ୍ରସାରଣ କାର୍ଯ୍ୟ ଅନୁଧ୍ୟାନ କରିବା ସହିତ ଜାନୁଆରୀ ମାସ ସୁଦ୍ଧା କାମ ଶେଷ କରିବା ପାଇଁ ନିର୍ଦ୍ଦେଶ ଦେଇଥିଲେ । ଭୁବନେଶ୍ୱର, ଝାରସୁଗୁଡ଼ା, ଜୟପୁର, ଉତ୍କେଲା, ରାଉରକେଲା ପରେ ମାଲକାନଗିରି ବିମାନ ଉଡ଼ାଣ ସୂଚୀରେ ସାମିଲ ହେବାକୁ ଯାଉଛି । ଏକଦା ମାଓବାଦୀଙ୍କ ଗଡ଼ ଥିବା ମାଲକାନଗିରି ଜିଲ୍ଲା ଆଜି ରୂପାନ୍ତରଣ ନୂଆ ଅଧ୍ୟାୟ ଲେଖିବାକୁ ଯାଉଛି । ବିମାନ ସେବା ଆରମ୍ଭ ହେବା ଜିଲ୍ଲା ପାଇଁ ବଡ଼ ଉପଲବ୍ଧି ।
ସୁଟିଂ ସମୟର ଭିଡିଓ ସେୟାର କଲେ ପାକିସ୍ତାନୀ ଅଭିନେତ୍ରୀ, ୟୁଜର୍ସ କହିଲେ..
ମୁମ୍ବାଇ: ଦର୍ଶକମାନେ ଅଢ଼େଇ ଘଣ୍ଟା ଏବଂ ୩ ଘଣ୍ଟା ମଧ୍ୟରେ ଫିଲ୍ମ ଦେଖି ହିଟ୍ ଫ୍ଲପକୁ ନେଇ ଯୁକ୍ତି ବାଢ଼ୁଛେ । ମାତ୍ର ଫିଲ୍ମ ସୁଟିଂ ପାଇଁ ଅଭିନେତା ଅଭିନେତ୍ରୀମାନେ ବହୁ କଷ୍ଟ କରନ୍ତି । ତେବେ ପାକିସ୍ତାନୀ ଅଭିନେତ୍ରୀ ଆୟେଜା ଏଭଳି ଏକ ପୋଷ୍ଟ କରିଛନ୍ତି । ଇନଷ୍ଟାଗ୍ରାମରେ ସେ ଏକ ଭିଡିଓ ପୋଷ୍ଟ କରିଛନ୍ତି । ସୁଟିଂ ସମୟରେ କମ୍ବଳରେ ନିଆଁ ଲାଗିଥିବାବେଳେ ସେ ଏହାକୁ ଫିଙ୍ଗୁଛନ୍ତି । ଆଉ ନିଆଁ ତାଙ୍କ ଗୋଡ଼ ପାଖରେ ପଡ଼ୁଥିବାବେଳେ ସେ ଡେଇଁ ପଡ଼ିଛନ୍ତି । ଆଉ ଏହି ଭିଡିଓ ସହ କ୍ୟାପସନରେ ସେ ଲେଖିଛନ୍ତି କି, ଅଭିନେତା କିମ୍ବା ଅଭିନେତ୍ରୀ ହେବା ସହଜ ନୁହେଁ । ବହୁ କଷ୍ଟ କରିବାକୁ ପଡ଼ିଥାଏ । ଜୀବନ ସହ ଖେଳିବାକୁ ମଧ୍ୟ ପଡ଼ିଥାଏ । ବେଳେବେଳେ ସେଟରେ ବହୁ ଅପ୍ରତ୍ୟାଶିତ ଘଟଣାମାନ ଘଟିଥାଏ ।
ତେବେ ଅଭିନେତ୍ରୀ ଜଣକ ଏହି ପୋଷ୍ଟ କରିଥିବାବେଳେ ୟୁଜର୍ସମାନେ ବିଭିନ୍ନ କମେଣ୍ଟମାନ ଦେଉଛନ୍ତି । ମଜାଳିଆ କମେଣ୍ଟ ସାଙ୍ଗକୁ ଟ୍ରୋଲ କରିଛନ୍ତି କିଛି ଫ୍ୟାନ୍ସ । ଜଣେ ୟୁଜର୍ସ ଲେଖିଛନ୍ତି କି, ଏହା କିଛି ବଡ଼ କଥା ନୁହଁ । ଏଭଳି ବଡ଼ ବଡ଼ ଘଟଣାମାନ ଘଟିଛି । ଏହା ବଡ଼ ଅଗ୍ନିକାଣ୍ଡ ନୁହେଁ । ବଲିଉଡରେ ଆମର ଏଭଳି ବଡ଼ ବଡ଼ ଘଟଣା ଘଟୁଛି । ଆମ ଅଭିନେତାମାନେ ଷ୍ଟଣ୍ଡ ଦେବା ସହ ଜୀବନକୁ ମଧ୍ୟ ବାଜି ଲଗାଉଛନ୍ତି ବୋଲି ଭାରତୀୟ ୟୁଜର୍ସମାନେ କମେଣ୍ଟମାନ ଦେଇଛନ୍ତି ।
ସଫ୍ଟୱେର ଚାକିରି ଛାଡି ପଶୁପକ୍ଷୀ ସେବାରେ..
କଟକ: ଯୁବ ବୟସରେ ପଶୁପକ୍ଷୀଙ୍କ ପ୍ରତି ରହିଛି ଅଗାଧ ଭଲପାଇବା । ସେଥିପାଇଁ ସଫ୍ଟୱେର ଚାକିରି ଛାଡି ପଶୁପକ୍ଷୀ ସେବାରେ ନିଜକୁ ସମର୍ପିତ କରିଛନ୍ତି । ନଜସ୍ବ ଉଦ୍ୟମରେ କଟକ ବିଡାନାସୀରେ ଏକ ସେଲଟର କରି ଅନେକ ରୋଗାକ୍ରାନ୍ତ ପଶୁପକ୍ଷୀ ଏବଂ ଦୁର୍ଘଟଣାଗସ୍ତ ଜୀବଜନ୍ତୁଙ୍କୁ କରୁଛନ୍ତି ଚିକିତ୍ସା । ପଶୁ ପକ୍ଷୀଙ୍କୁ ଛଟପଟ ହେଉଥିବା ଦେଖିଲେ ତାଙ୍କ ମନ ବିଚଳିତ ହୋଇପଡ଼େ । ତୁରନ୍ତ ତାଙ୍କୁ ନେଇ ଆସି ନିଜ କେନ୍ଦ୍ରର ସେବା ଯୋଗାଇ ଦିଅନ୍ତି । ତାଙ୍କର ଏହି ମହତ୍ କାର୍ଯ୍ୟ ଅନ୍ୟମାନଙ୍କ ପାଇଁ ସାଜିଛି ପ୍ରେରଣା ।
ଯୁବ ବୟସରେ ପଶୁପକ୍ଷୀଙ୍କ ପ୍ରତି ରହିଛି ଅଗାଧ ଭଲପାଇବା । ସେଥିପାଇଁ ସଫ୍ଟୱେର ଚାକିରୀ ଛାଡି ପଶୁପକ୍ଷୀ ସେବାରେ ନିଜକୁ ସମର୍ପିତ କରିଛନ୍ତି । ନଜସ୍ବ ଉଦ୍ୟମରେ କଟକ ବିଡାନାସୀରେ ଏକ ସେଲଟର କରି ଅନେକ ରୋଗାକ୍ରାନ୍ତ ପଶୁପକ୍ଷୀ ଏବଂ ଦୁର୍ଘଟଣାଗସ୍ତ ଜୀବଜନ୍ତୁଙ୍କୁ କରୁଛନ୍ତି ଚିକିତ୍ସା । ପଶୁ ପକ୍ଷୀଙ୍କୁ ଛଟପଟ ହେଉଥିବା ଦେଖିଲେ ତାଙ୍କ ମନ ବିଚଳିତ ହୋଇପଡ଼େ। ତୁରନ୍ତ ତାଙ୍କୁ ନେଇ ଆସି ନିଜ କେନ୍ଦ୍ରର ସେବା ଯୋଗାଇ ଦିଅନ୍ତି । ତାଙ୍କର ଏହି ମହତ୍ କାର୍ଯ୍ୟ ଅନ୍ୟମାନଙ୍କ ପାଇଁ ସାଜିଛି ପ୍ରେରଣା ।
କାହାର ଗୋଡ଼ ନାହିଁ ତ କାହାର ଲାଞ୍ଜ । କିଏ ଆଖି ହରାଇଛି ତ କିଏ ରୋଗରେ ପଡ଼ି ଛଟପଟ ହେଉଛି । ସମସ୍ତଙ୍କ ପାଇଁ ସାହାରା ପାଲଟିଛନ୍ତି କଟକ ବିଡ଼ାନାସୀର ସାଇନୀ । ଜୀବେଦୟା ତାଙ୍କର ଜୀବନର ଶ୍ରେଷ୍ଠ ବ୍ରତ ପାଲଟିଛି । ଏଥିପାଇଁ ସଫ୍ଟଓ୍ବେର କମ୍ପନୀରୁ ଚାକିରି ଛାଡ଼ି ପଶୁପକ୍ଷୀଙ୍କ ସେବାରେ ନିଜକୁ ନିୟୋଜିତ କରିଛନ୍ତି । ବିଡ଼ାନାସୀ ଲକ୍ଷ୍ମୀନଗର ଲେନ୍-୩ରେ ରହିଛି ସାଇନୀ ମିଶ୍ରଙ୍କ ଶୁଶ୍ରୂଷା ଓ୍ବେଲଫେୟାର୍ ଫାଉଣ୍ଡେସନ । କଟକ ସହରର ବିଭିନ୍ନ ଅଞ୍ଚଳ ମାନଙ୍କରେ ରହୁଥିବା ପଶୁପ୍ରେମୀ ମାନଙ୍କୁ ଯୋଡ଼ି ଏହି ପଶୁ ପକ୍ଷୀ କଲ୍ୟାଣ କେନ୍ଦ୍ରରେ ସେବା କାର୍ଯ୍ୟ କରୁଛନ୍ତି ସାଇନୀ । ଦୁର୍ଘଟଣାଗ୍ରସ୍ତ ପଶୁପକ୍ଷୀଙ୍କୁ ଚିକିତ୍ସା ଯୋଗାଇ ଦେବା ସହ ସେମାନଙ୍କ ସେବା ଶୁଶ୍ରୂଷା କରନ୍ତି । ଏଥିରେ ତାଙ୍କୁ ପରମ ଆନନ୍ଦ ମିଳୁଥିବା କହନ୍ତି ସାଇନୀ।
ସର୍ବେଶ୍ୱର ମିଶ୍ର ଓ ମଞ୍ଜୁଲତାଙ୍କ ଝିଅ ସାଇନୀ ମିଶ୍ର । ଛୋଟ ବେଳରୁ ପଶୁପକ୍ଷୀଙ୍କ ସେବା କରିବାକୁ ଭଲ ପାଆନ୍ତି । ଦୁର୍ଘଟଣାଗ୍ରସ୍ତ ପଶୁପକ୍ଷୀଙ୍କୁ ଦେଖିଲେ ତାଙ୍କ ଆଖିରେ ଲୁହ ଆସିଯାଏ । ସେଥିପାଇଁ ୨୦୧୭ରୁ ଆରମ୍ଭ କରିଦିଅନ୍ତି ଚିକିତ୍ସା । ତେବେ ୨୦୧୮ରେ ଏମବିଏ ଶିକ୍ଷା ସରିବା ପରେ ବେଙ୍ଗଳୁରୁର ଏକ ସଫ୍ଟଓ୍ବେୟାର କମ୍ପାନୀରେ ମୋଟା ଅଙ୍କରେ ଚାକିରି କରନ୍ତି । କିନ୍ତୁ ୬ ମାସ ଚାକିରି ଭିତରେ ତାଙ୍କର ଜୀବେଦୟା ମନ ପୁଣି କଟକ ଟାଣିଆଣେ । ତାଙ୍କର ଏହି ମହତ କାର୍ଯ୍ୟରେ ବାପା ମାଆ ବି ସହଯୋଗ କରନ୍ତି ।
ରାଜ୍ୟରେ ହାଲୁକା ଶୀତ ସହ କୁହୁଡି କରିବ କଲବଲ
ଭୁବନେଶ୍ବର: ହାଲୁକା ଶୀତ ସହ କୁହୁଡି କରିବ କଲବଲ। ଉପାନ୍ତରୁ ଉପକୂଳ ସବୁଠି ଘନ କୁହୁଡିର ଆସ୍ତରଣ ଅନୁଭୁତ ହେବ । ଆଜି ଘନ କୁହୁଡି ପାଇଁ ଉତ୍ତର ଉପକୂଳ ଓଡ଼ିଶା ସହ ଦକ୍ଷିଣ ଓଡ଼ିଶାର ୧୯ଟି ଜିଲ୍ଲାରେ ୨୦୦ ମିଟରରୁ କମ୍ ଦୃଶ୍ୟମାନ ଦୂରତା ରହିବ ବୋଲି ସତର୍କ କରାଇଛି ଆଞ୍ଚଳିକ ପାଣିପାଗ କେନ୍ଦ୍ର । କାଲି ପୁରୀ, ଖୋର୍ଦ୍ଧା, ନୟାଗଡ, ଗଞ୍ଜାମ, ଗଜପତି, କଟକ, ଅନୁଗୁଳ, ଦେବଗଡ, ସୁନ୍ଦରଗଡ, ଝାରସୁଗୁଡା, ସମ୍ବଲପୁର, ସୋନପୁର, ବୌଦ୍ଧ, କନ୍ଧମାଳ, କଳାହାଣ୍ଡି, କୋରାପୁଟ ଏବଂ ରାୟଗଡାର ଅଧିକାଂଶ ସ୍ଥାନରେ ଘନ କୁହୁଡି ନେଇ ୟେଲୋ ଆଲର୍ଟ ଜାରି କରାଯାଇଛି । ପାଣିପାଗ କେନ୍ଦ୍ରର ସତର୍କତା ପରେ ସବୁ ଜିଲ୍ଲାର ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ଏସ୍ଆରସି । ବିଶେଷ କରି ପରିବହନ ବିଭାଗ ଏବଂ ପୋଲିସକୁ ଗାଡି ଚଳାଚଳ ନେଇ ଆବଶ୍ୟକ ପଦକ୍ଷେପ ଗ୍ରହଣ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
ଘନ କୁହୁଡି ସମୟରେ ୫୦ ମିଟରରୁ କମ୍ ଦୃଶ୍ୟମାନ ଦୂରତା ରହୁଥିବାରୁ ଦୁର୍ଘଟଣା ଘଟିବାର ସମ୍ଭାବନା ରହିଛି । ତେଣୁ ବିଭିନ୍ନ ଦୁରର୍ଘଟଣା ଜୋନ ଉପରେ ନଜର ରଖିବାକୁ ପରାମର୍ଶ ଦିଆଯାଇଛି । ଆସନ୍ତା ୭ ଦିନ ପର୍ଯ୍ୟନ୍ତ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ । ରାଜ୍ୟକୁ ଉତ୍ତର ପଶ୍ଚିମ ଦିଗରୁ ବହୁଥିବା ଥଣ୍ଡା ପବନର ପ୍ରଭାବ କମିବା ସହ ପୂର୍ବାଳୀ ଗରମ ଶୁଷ୍କ ପବନ ପ୍ରବାହ ବଢିଛି । ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ବୃଦ୍ଧି ହେବା ସହ ତାପମାତ୍ରା ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ବୃଦ୍ଧି ହୋଇଛି । ଫଳରେ ଜାଡ କମିବା ସହ ଘନ କୁହୁଡି ଦେଖାଦେଉଛି । ଆଜି ରାଉରକେଲାରେ ଅତି ଘନକୁହୁଡି ଦେଖିବାକୁ ମିଳିଥିବା ବେଳେ ଫୁଲବାଣୀ, ସୋନପୁର, କେନ୍ଦ୍ରାପଡା ଏବଂ ପରାଦିପରେ ଘନ କୁହୁଡି ଅନୁଭୁତ ହୋଇଛି । କୋରାପୁଟରେ ସର୍ବନିମ୍ନ ୭ ଡିଗ୍ରୀ ତାପମାତ୍ରା ରେକର୍ଡ ହୋଇଥିବା ବେଳେ ଫୁଲବାଣୀରେ ୧୦ ଡିଗ୍ରୀ ତାପମାତ୍ରା ରେକର୍ଡ ହୋଇଛି ।