ନନ୍ଦିଘୋଷ ବ୍ୟୁରୋ: ଦେଶରେ ୧୦. ୫ ଲକ୍ଷ ପୋଲିଂ ବୁଥ୍ ବ୍ୟବସ୍ଥା ହୋଇଥିବାବେଳେ ଦେଶରେ ୯୭ କୋଟି ପଞ୍ଜିକୃତ ଭୋଟର ଅଛନ୍ତି। ୮୩ ଲକ୍ଷ ଭୋଟରଙ୍କ ବୟସ ୮୦ ବର୍ଷରୁ ଅଧିକ। ଦେଶରେ ଅଛନ୍ତି ୪୮ ହଜାର କିନ୍ନର ଭୋଟର। ୮୫ ବର୍ଷରୁ ଅଧିକ ବୟସର ଭୋଟରଙ୍କ ଘରକୁ ଯିବେ ପ୍ରତିନିଧି। ଭୋଟ ପ୍ରକ୍ରିୟାରେ ହେଲିକପ୍ଟର, ହାତୀର ବ୍ୟବହାର କରାଯିବ। ୧୦୦ ବର୍ଷରୁ ଅଧିକ ବୟସର ଭୋଟରଙ୍କ ସଂଖ୍ୟା ୨ ଲକ୍ଷ ୧୮ ହଜାର। ଦେଶରେ ୪୭.୧ କୋଟି ମହିଳା ଭୋଟର ଥିବାବେଳେ ଆଚରଣବିଧି ଉଲ୍ଲଂଘନ, ଅର୍ଥବଳ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ। ବେଆଇନ କାର୍ଯ୍ୟକଳାପ, ଅନ୍ତରାଷ୍ଟ୍ରୀୟ ସୀମାରେ ଡ୍ରୋନ ବ୍ୟବସ୍ଥା କରାଯାଇଥିବାବେଳେ ୫୫ ଲକ୍ଷ ଇଭିଏମ ଜରିଆରେ ହେବ ନିର୍ବାଚନ। ମାଗଣା ସାମଗ୍ରୀ ଘୋଷଣା ଉପରେ ରୋକ୍ ଲାଗିବ। ପ୍ରତି ତାରକା ପ୍ରଚାରକଙ୍କୁ ଗାଇଡଲାଇନ ପ୍ରଦାନ କରାଯିବ।  ନିର୍ବାଚନ ପରିଚାଳନା ଲାଗି ଦେଶବ୍ୟାପୀ ୨୧ଶହ ପର୍ଯ୍ୟବେକ୍ଷକଙ୍କୁ ନିଯୁକ୍ତି ଦିଆଯିବ।

ଭୁବନେଶ୍ବର: ରାଜ୍ଯ ନିର୍ବାଚନ ନେଇ ସାମ୍ବାଦିକ ସମ୍ମିଳନୀରେ ବିସ୍ତୃତ ସୂଚନା ଦେଇଛନ୍ତି ରାଜ୍ଯ ମୁଖ୍ଯ ନିର୍ବାଚନ ଅଧିକାରୀ ନିକୁଞ୍ଜ ଧଳ । ଓଡ଼ିଶାର ମୋଟ ଲୋକସଭା ଆସନ ସଂଖ୍ଯା ୨୧ ରହିଥିବାବେଳେ ଅନୁସୂଚିତ ଜାତି ପାଇଁ ୩ ଓ ଜନଜାତିଙ୍କ ପାଇଁ ୫ ଆସନ ସଂରକ୍ଷିତ ରହିଛି । ସେହିପରି ୧୪୭ ବିଧାନସଭା ଆସନରୁ ଅନୁସୂଚିତ ଜାତିଙ୍କ ପାଇଁ ୨୪ ଓ ଜନଜାତିଙ୍କ ପାଇଁ ୩୩ ଆସନ ସଂରକ୍ଷିତ ରହିଛି । ନିର୍ବାଚନକୁ ସୁରୁଖୁରୁରେ ପରିଚାଳନା ପାଇଁ ୩୦ ଜିଲ୍ଲା ନିର୍ବାଚନ ଅଧିକାରୀ ନିଯୁକ୍ତ ହୋଇଛନ୍ତି । ପ୍ରାୟ ୨ ଦଶମିକ ୭୦ ଲକ୍ଷ ମତଦାନ କର୍ମଚାରୀ ନିଯୁକ୍ତ ହୋଇଛି । ପ୍ରତି ମତଦାନ କେନ୍ଦ୍ରରେ ଜଣେ ପ୍ରିଜାଇଡିଂ ଅଫିସର ଓ ୫ଜଣ ଲେଖାଏଁ ପୋଲିଂ ଅଫିସର ରହିବେ । ମତଦାନ କେନ୍ଦ୍ରରେ ଭୋଟର ପରିଚୟ ପତ୍ର ସହ ଆଧାରକାର୍ଡ, ପାନକାର୍ଡ, ସ୍ବତନ୍ତ୍ର ଭିନ୍ନକ୍ଷମ ପରିଚୟପତ୍ର, ଡ୍ରାଇଭିଂ ଲାଇସେନ୍ସ, ପାସପୋର୍ଟ, ମନରେଗା କାର୍ଡ ଦେଖାଇପାରିବେ । ଓଡ଼ିଶାରେ ଭୋଟରଙ୍କ ସଂଖ୍ଯା ୩ କୋଟି ୩୪ ଲକ୍ଷ ୭୩ ହଜାର ୫୬୧ । ସେମାନଙ୍କ ମଧ୍ଯରେ ପୁରୁଷ ଭୋଟରଙ୍କ ସଂଖ୍ଯା ୧ କୋଟି ୬୯ ଲକ୍ଷ ୫୫ ହଜାର ୩୬୯, ମହିଳା ଭୋଟରଙ୍କ ସଂଖ୍ଯା ୧ କୋଟି ୬୫ ଲକ୍ଷ ୧୪ ହଜାର ୭୫୪, ତୃତୀୟଲିଙ୍ଗୀ ଭୋଟରଙ୍କ ସଂଖ୍ଯା ୩ ହଜାର ୪୩୮, ଭିନ୍ନକ୍ଷମ ଭୋଟରଙ୍କ ସଂଖ୍ଯା ୫ ଲକ୍ଷ ୧୯ ହଜାର ୮୬୧, ବରିଷ୍ଠ ନାଗରିକ ଭୋଟରଙ୍କ ସଂଖ୍ଯା ୩ ଲକ୍ଷ ୨ ହଜାର ୨୭୩, ୧୮ରୁ ୧୯ ବର୍ଷ ବୟସ୍କ ଭୋଟରଙ୍କ ସଂଖ୍ଯା ୭ ଲକ୍ଷ ୯୯ ହଜାର ୩୩୪, ସର୍ଭିସ ମତଦାତାଙ୍କ ସଂଖ୍ଯା ୪୯ ହଜାର ୫୯୯ ଓ ପ୍ରବାସୀ ଭୋଟରଙ୍କ ସଂଖ୍ଯା ୧୮୪ । ୬୦ ପ୍ରତିଶତ ମତଦାନ କେନ୍ଦ୍ରରେ ୱେବକାଷ୍ଟିଂ ହେବ । ୨୦ ପ୍ରତିଶତ ମଡେଲ ପୋଲିଂ ଷ୍ଟେସନ ଯୁବ ପରିଚାଳିତ ମତଦାନ କେନ୍ଦ୍ର ହେବ । ଭିନ୍ନକ୍ଷମ ଓ ୮୫ ବର୍ଷ ବୟସରୁ ଅଧିକ ବୟସର ନାଗରିକ ନାଗରିକଙ୍କୁ ମତଦାନ ବୁଥରେ ପ୍ରବେଶ ପାଇଁ ଅଗ୍ରାଧିକାର ଦିଆଯିବ । ପ୍ରାର୍ଥୀମାନେ ନିର୍ଦ୍ଦିଷ୍ଟ ଫର୍ମାଟରେ ତାଙ୍କ ବିରୋଧରେ ରହିଥିବା ମାମଲାର ବିବରଣୀ ପ୍ରଦାନ କରିବେ । ପ୍ରଚାର ସମୟରେ ଖବରକାଗଜ, ଟେଲିଭିଜନ ଚ୍ଯାନେଲରେ ତିନିଥର ଅପରାଧିକ ମାମଲାର ତଥ୍ଯ ପ୍ରକାଶ କରିବାକୁ ହେବ । ଲୋକସଭା ନିର୍ବାଚନ ପାଇଁ ପ୍ରାର୍ଥୀମାନେ ସର୍ବାଧିକ ୯୫ ଲକ୍ଷ ଓ ବିଧାନସଭା ନିର୍ବାଚନ ପାଇଁ ୪୦ ଲକ୍ଷ ଟଙ୍କା ଖର୍ଚ୍ଚ କରିପାରିବେ । ପ୍ରାର୍ଥୀ ଓ ରାଜନୈତିକ ଦଳ ନାମାଙ୍କନ ଦାଖଲ, ରାଲି, ବୈଠକ, ଲାଉଡ ସ୍ପିକର ବ୍ଯବହାର ଆଦି ପାଇଁ ସୁବିଧା ପୋର୍ଟାଲ ରେ ଆବେଦନ କରିପାରିବେ ।