ନନ୍ଦିଘୋଷ ବ୍ୟୁରୋ : ସମ୍ବଲପୁରର ଗଙ୍ଗାଧର ମେହେର ବିଶ୍ଵବିଦ୍ୟାଳୟର ୱେବସାଇଟକୁ ହ୍ୟାକ କରାଯାଇଥିବାର ଅଭିଯୋଗ ହୋଇଛି। ଏହି ୱେବସାଇଟ୍ ଖୋଲିଲେ ସେଥିରେ ବାହାରୁଛି ପାକିସ୍ତାନୀ ପତାକା। ତେଣୁ ଆଶଙ୍କା କରାଯାଉଛି ଏହି କାମ ପାକିସ୍ତାନୀ ହ୍ୟାକର କରିଥାଇପାରନ୍ତି। ଆଗରୁ ମଧ୍ୟ ଥରେ ଏହି ୱେବସାଇଟ ହ୍ୟାକ କରାଯାଇଥିଲା। GMU ର ଅନେକ ଗୁରୁତ୍ଵପୂର୍ଣ୍ଣ ତଥ୍ୟ ଏହି ୱେବ୍ ସାଇଟରେ ଥିବାରୁ ସେହି ସବୁ ଡାଟା ଚୋରି ହୋଇପାରେ ବୋଲି ଆଶଙ୍କା ପ୍ରକାଶ ପାଇଛି।
ଖାତା କଲମ ବଦଳରେ ଶିଶୁ ଶ୍ରମିକଙ୍କୁ ନିର୍ମାଣ କାର୍ଯ୍ୟରେ ଲଗାଇଲେ ଜିଲ୍ଲା ଶିକ୍ଷାଅଧିକାରୀଙ୍କ କାର୍ଯ୍ୟାଳୟ
ନନ୍ଦିଘୋଷ ବ୍ୟୁରୋ : ସରକାରୀ ନିର୍ମାଣ କାର୍ଯ୍ୟରେ ଶିଶୁ ଶ୍ରମିକ। ଖାତା କଲମ ବଦଳରେ ଶିଶୁ ଶ୍ରମିକଙ୍କୁ ନିର୍ମାଣ କାର୍ଯ୍ୟରେ ଲଗାଇଲେ ଜିଲ୍ଲା ଶିକ୍ଷାଅଧିକାରୀଙ୍କ କାର୍ଯ୍ୟାଳୟ। ନନ୍ଦିଘୋଷ ଟିଭି ହାତରେ ଲାଗିଛି ଏହାର ଏକ୍ସକ୍ଲୁସିଭ ଭିଜୁଆଲ। ବାଲେଶ୍ଵର ଜିଲ୍ଲା ବାହାନଗା ବ୍ଲକରେ ସରକାରୀ ନିୟମ କାନୁନର ଧଜିଆ ଉଡାଇ ଶିଶୁ ଶ୍ରମିକଙ୍କୁ ସରକାରୀ ବିଦ୍ୟାଳୟରେ ସ୍କୁଲ କୋଠା ନିର୍ମାଣ କାର୍ଯ୍ୟରେ ନିଯୋଜିତ କରିଛି ଜିଲ୍ଲା ଶିକ୍ଷାଧିକାରୀ ତଥା ତଥା ଜିଲ୍ଲା ପ୍ରକଳ୍ପ ସଂଯୋଜକଙ୍କ କାର୍ଯ୍ୟାଳୟ। ବାହାନଗା ବ୍ଲକ ଗୋପାଳପୁର ମଣିଭଦ୍ର ସରକାରୀ ଉଚ୍ଚ ବିଦ୍ୟାଳୟରେ ଶିକ୍ଷା ବିଭାଗ ପକ୍ଷରୁ ପିଏମଶ୍ରୀ ଯୋଜନାରେ ୧୮.୩୩ ଲକ୍ଷ ଟଙ୍କା ଅନୁଦାନରେ କମ୍ପୁଟର ଦ୍ଵାରା ଭାଷା ଶିକ୍ଷା ଲାବ ଗୃହ ନିର୍ମାଣ କାର୍ଯ୍ୟ ଖୋଦ ଜିଲ୍ଲା ଶିକ୍ଷାଧିକାରୀ ତଥା ଜିଲ୍ଲା ପ୍ରକଳ୍ପ ସଂଯୋଜକଙ୍କ କାର୍ଯ୍ୟାଳୟ ପକ୍ଷରୁ କାର୍ଯ୍ୟ ଜାରି ରଖିଛି। ଏପରି ସ୍ଥଳେ ୩ ଜଣ ଶିଶୁ ଶ୍ରମିକଙ୍କୁ ନିର୍ମାଣ କାର୍ଯ୍ୟରେ ଶ୍ରମିକ ଭାବେ ନିଯୋଜିତ କରାଯାଇଥିବାର ଦେଖିବାକୁ ମିଳିଥିଲା। ଏମିତି ରାତି ପର୍ଯ୍ୟନ୍ତ ଅନ୍ଧାରରେ ନିର୍ମାଣ କାର୍ଯ୍ୟ ଜାରି ରହିଥିବା ବେଳେ କାର୍ଯ୍ୟର ତଦାରଖ ପାଇଁ କୌଣସି ବି ଅଧିକାରୀ ଉପସ୍ଥିତ ନଥିଲେ। କାର୍ଯ୍ୟରେ ଶ୍ରମିକ ଭାବେ ନିଯୋଜିତ ଥିବା ୩ ଜଣ ଶିଶୁ ଔପଦା ଅଞ୍ଚଳର ହୋଇଥିବା ବେଳେ ଜଣାପଡ଼ିଛି। ଶ୍ରମ ବିଭାଗ ମଧ୍ୟ ଶିଶୁଙ୍କୁ ଶ୍ରମିକ ଭାବେ କାର୍ଯ୍ୟ କରାଇବା ଆଇନଗତ ଅପରାଧ ବୋଲି ନିୟମ ପ୍ରଣୟନ ସହ ଡିଣ୍ଡିମ ପିଟୁଛନ୍ତି ସରକାର । ଏପରିସ୍ଥଳେ ଖୋଦ ଶିକ୍ଷା ବିଭାଗର ଜିଲ୍ଲା ମୁଖିଆଙ୍କ କାର୍ଯ୍ୟାଳୟ ପକ୍ଷରୁ କରାଯାଉଥିବା ନିର୍ମାଣ କାର୍ଯ୍ୟରେ ଶିଶୁ ଶ୍ରମିକଙ୍କୁ ନିଯୋଜିତ କରାଯିବା ସରକାରୀ ବ୍ୟବସ୍ଥା ଉପରେ ପ୍ରଶ୍ନ ଚିହ୍ନ ଛିଡା କରିଛି।
Fashion Tips: କେଉଁ ଜୋତା କେଉଁ ଜିନ୍ସ ସହିତ ଉପଯୁକ୍ତ …ଜାଣନ୍ତୁ …
ନନ୍ଦିଘୋଷ ବ୍ୟୁରୋ: ଫ୍ୟାଶନ୍ ଏବେ କେବଳ ପୋଷାକରେ ସୀମିତ ନୁହେଁ। ଏହା ଏକ ଷ୍ଟାଇଲ୍ ଷ୍ଟେଟମେଣ୍ଟ ପାଲଟିଛି। ଆମେ ପ୍ରାୟତଃ ସଂପୂର୍ଣ୍ଣ ପୋଷାକ ବାଛୁ କିନ୍ତୁ ଗୋଟିଏ ଛୋଟ ଭୁଲ ଆମର ସମ୍ପୂର୍ଣ୍ଣ ଲୁକକୁ ନଷ୍ଟ କରିପାରେ ଏବଂ ତାହା ହେଉଛି ଭୁଲ ଜୋତା। କାଜୁଆଲ୍ ଜିନ୍ସ ଏବଂ ଟି-ସାର୍ଟ ହେଉ କିମ୍ବା କୌଣସି ଫର୍ମାଲ୍ ପୋଷାକ ଯଦି ଆପଣ ଏହି ଲୁକରେ ସଠିକ ଜୋତା ଚୟନ ନକଲେ ତାହେଲେ ଆପଣଙ୍କ ଷ୍ଟାଇଲ ପୁରା ବର୍ବାଦ ହେଇପାରେ । ଆଜିକାଲି ବଜାରରେ ଅନେକ ପ୍ରକାରର ଜୋତା ଉପଲବ୍ଧ, ଯାହାକୁ ବିଭିନ୍ନ ପୋଷାକ ସହିତ ଯୋଡା ଯାଇପାରିବ। ଏଥିରେ ଚେଲସି ବୁଟ୍, ଲୋଫର୍, ଅକ୍ସଫୋର୍ଡ, ହିଲ୍ସ, ସ୍ନିକର୍ସ, ଫ୍ଲାଟ୍ ଏବଂ ସାଣ୍ଡାଲ୍ ଅନ୍ତର୍ଭୁକ୍ତ । ତେବେ ବଡ଼ ପ୍ରଶ୍ନ ହେଉଛି କି କେଉଁ ଜୋତା କେଉଁ ପୋଷାକ ସହିତ ସବୁଠାରୁ ଭଲ ଦେଖାଯାଏ ଆସନ୍ତୁ ଜାଣିବା .. କେଉଁ ଜୋତାକୁ କେଉଁ ଜିନ୍ସ ସହିତ ପିନ୍ଧିବା ଉଚିତ ଯାହା ଦ୍ୱାରା ଆପଣ ଏକ ସଂପୂର୍ଣ୍ଣ ଷ୍ଟାଇଲିଶ୍ ଲୁକ୍ ପାଇପାରିବେ ।
ଫର୍ମାଲ୍ ଟ୍ରାଉଜର ସହିତ ଅକ୍ସଫୋର୍ଡ ଜୋତା
ଅଧିକାଂଶ ଲୋକ ଅଫିସ୍ କିମ୍ବା ବିବାହ ପାଇଁ ଫର୍ମାଲ୍ ପୋଷାକ ପସନ୍ଦ କରନ୍ତି। ଫର୍ମାଲ୍ ଟ୍ରାଉଜରଗୁଡ଼ିକ ସଫା ଏବଂ ସଂରଚିତ କଟ୍ ହୋଇଥାଏ। ଫର୍ମାଲ୍ ଲୁକକୁ ସଂପୂର୍ଣ୍ଣ କରିବା ପାଇଁ ଆପଣଙ୍କୁ ଅକ୍ସଫୋର୍ଡ, ଡର୍ବି କିମ୍ବା ଲୋଫର୍ ଜୋତା ପରି ଜୋତା ପିନ୍ଧିବା ଉଚିତ।
ଚଉଡା ଲେଗ୍ ଜିନ୍ସ ସହିତ ଚଙ୍କି ଜୋତା
ପୁରୁଷ ଏବଂ ମହିଳା ଉଭୟଙ୍କ ମଧ୍ୟରେ ଚଉଡା-ଲେଗ୍ ଜିନ୍ସ ପ୍ରିୟ। ଏହା ଆରାମଦାୟକ ଏବଂ ଷ୍ଟାଇଲିସ୍। ଆପଣ ଏହା ସହିତ ଅନ୍ୟ କୌଣସି ଜୋତା ପିନ୍ଧିପାରିବେ ନାହିଁ। ଚଉଡା-ଲେଗ୍ ଜିନ୍ସ ଏକ ଭାରୀ ଏବଂ ଢିଲା ଲୁକ୍ ଥାଏ। ତେଣୁ ଚଙ୍କି ଜୋତା (ଘୋଡା ସୋଲ) ଏହା ସ
ସ୍କିନି ଜିନ୍ସ ସହିତ ଚେଲସି ବୁଟ୍
ଆଜିକାଲି ସ୍କିନି ଜିନ୍ସ ବହୁତ କମ୍ ପିନ୍ଧାଯାଏ। କିନ୍ତୁ ଯଦି ଆପଣ ଏବେ ବି ପିନ୍ଧୁଛନ୍ତି ତେବେ ଏକ ଷ୍ଟାଇଲିସ୍ ଲୁକ୍ ପାଇଁ ଚେଲସି ବୁଟ୍ ସହିତ ସେଗୁଡ଼ିକୁ ଯୋଡ଼ନ୍ତୁ। ଏଗୁଡ଼ିକ ଏକ ସ୍ଲିମ୍ ଏବଂ ସୁନ୍ଦର ଲୁକ୍ ସୃଷ୍ଟି କରିବାରେ ସାହାଯ୍ୟ କରନ୍ତି। ଏଗୁଡ଼ିକ ଟ୍ରେଣ୍ଡି ହୋଇଥିବାରୁ ଆପଣଙ୍କୁ ଷ୍ଟାଇଲିସ୍ ଦେଖାଯାଏ।
ଷ୍ଟ୍ରେଟ୍-ଫିଟ୍ ଜିନ୍ସ ସହିତ ସ୍ନିକର୍ସ
ଷ୍ଟ୍ରେଟ୍-ଫିଟ୍ ଜିନ୍ସ ମଧ୍ୟ ବହୁତ ଟ୍ରେଣ୍ଡି, ଯାହାକୁ ଝିଅ ଏବଂ ପୁଅ ଉଭୟ ପସନ୍ଦ କରନ୍ତି। ଏହା ଦୃଶ୍ୟମାନ ଭାବରେ ଉଚ୍ଚତା ବୃଦ୍ଧି କରେ ଏବଂ ଆରାମଦାୟକ ମଧ୍ୟ। ଷ୍ଟ୍ରେଟ୍-ଫିଟ୍ ଜିନ୍ସ ପାଇଁ ସ୍ନିକର୍ସ ଏକ ଉତ୍ତମ ବିକଳ୍ପ। ଏହି ଫିଟ୍ ସହିତ ସ୍ନିକର୍ସର ସରଳ ଆକୃତି ପ୍ରାକୃତିକ ଦେଖାଯାଏ।
କାର୍ଗୋ ପ୍ୟାଣ୍ଟ ସହିତ ହାଇ ଟପ୍ ଜୋତା
କାର୍ଗୋ ପ୍ୟାଣ୍ଟଗୁଡ଼ିକ ଭାରୀ ଏବଂ ଏଥିରେ ଅନେକ ପକେଟ୍ ଥାଏ। ଲୋକମାନେ ଏହାକୁ ସାଧାରଣ ସାକ୍ଷାତ କିମ୍ବା ଯାତ୍ରା ପାଇଁ ପିନ୍ଧିବାକୁ ଭଲ ପାଆନ୍ତି। ହାଇ-ଟପ୍ ଜୋତା ସହିତ ସେଗୁଡ଼ିକୁ ଯୋଡ଼ିବା ଏକ ଉତ୍ତମ ଲୁକ୍ ସୃଷ୍ଟି କରେ। କମ୍ କଟ୍ ଜୋତା ପିନ୍ଧିବା ଏକ ଅସନ୍ତୁଳନ ସୃଷ୍ଟି କରିପାରେ।
ଆତ୍ମସମର୍ପଣ କଲେ ୨୬ ହାର୍ଡକୋର ମାଓବାଦୀ
ନନ୍ଦିଘୋଷ ବ୍ୟୁରୋ : ଆତ୍ମସମର୍ପଣ କଲେ ୨୬ ହାର୍ଡକୋର ମାଓବାଦୀ। ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର ସୁକମା SP ଙ୍କ ନିକଟରେ ମାଓବାଦୀ ଆତ୍ମସମର୍ପଣ କରିଥିବା ଦେଖିବାକୁ ମିଳିଛି। ୨୬ ଜଣ ହାର୍ଡକୋର ମାଓବାଦୀଙ୍କ ମଧ୍ୟରେ ୭ ଜଣ ଝିଅ ଥିବା ଜଣାପଡିଛି। ସେମାନଙ୍କ ଉପରେ ଥିଲା ୬୪ ଲକ୍ଷ ଟଙ୍କା ପୁରସ୍କାର। ଆତ୍ମସମର୍ପଣ ମାଓବାଦୀ ସବୁ ଓଡିଶା ଏବଂ ସୁକମା ମାଡ଼ ଅଞ୍ଚଳରେ ସକ୍ରିୟ ରହି ହିଂସାକାଣ୍ଡ ଘଟାଉଥିଲେ। ସରକାରଙ୍କ ଆତ୍ମସମର୍ପଣ ନିତିରେ ଆକର୍ଷିତ ହୋଇ ପୋଲିସ ଆଗରେ ଆତ୍ମସମର୍ପଣ କରିଛନ୍ତି।ସେମାନଙ୍କୁ ମଧ୍ୟ ମୁଖ୍ୟ ସ୍ରୋତରେ ସାମିଲ କରିବାକୁ ସବୁ ପ୍ରକାର ସାହାଯ୍ୟ ସହଯୋଗ ଯୋଗାଇ ଦିଆଯିବ ବୋଲି ସୁକମା SP କୀରଣ ଚୌହାନ କହିଛନ୍ତି।
ଆଜିଠୁ ସ୍ବାଭାବିକ ହେବ ମଣ୍ଡି ; ଧାନ କିଣିବେ ମିଲର୍ସ
ନନ୍ଦିଘୋଷ ବ୍ୟୁରୋ : ଆଜିଠୁ ସ୍ବାଭାବିକ ହେବ ମଣ୍ଡି। ଧାନ କିଣିବେ ମିଲର୍ସ। ୪ ଦଫା ଦାବିରୁ ଗୋଟିଏ ଦଫା ଦାବିକୁ ମାନିଛନ୍ତି ସରକାର। ଏନେଇ ସୂଚନା ଦେଇଛି ଅଲ୍ ଓଡିଶା ରାଇସ୍ ମିଲର୍ସ ମହାସଂଘ। ରକ୍ଷଣାବେକ୍ଷଣ ବାବଦରେ ବକେୟା ଥିବା ୧୬୦ କୋଟି ଟଙ୍କା ତୁରନ୍ତ ପ୍ରଦାନ କରିବାକୁ ସରକାର ସହମତି ପ୍ରକାଶ କରିଛନ୍ତି। ଆସନ୍ତା ସପ୍ତାହକ ମଧ୍ୟରେ ସମସ୍ତ ମିଲର୍ସ ସେମାନଙ୍କ ପ୍ରାପ୍ୟ ପାଇବେ। ସେହିପରି ଟ୍ରାନ୍ସପୋର୍ଟେସନ ଚାର୍ଜ ଅର୍ଥାତ ମଣ୍ଡିରୁ ମିଲକୁ ଧାନ ଆସିବା ଏବଂ ମିଲରୁ ବିଭିନ୍ନ ଗୋଦାମକୁ ଧାନ ଯିବା ନେଇ ପରିବହନ ଖର୍ଚ୍ଚ ବାବଦରେ ବିଭାଗ ଅନୁଧ୍ୟାନ କରୁଛି। ଅରୁଆ ଧାନ ପାଇଁ ଡ୍ରାଇଜ ସମସ୍ୟାର ସମାଧାନ ପାଇଁ ମଧ୍ୟ ସରକାର ସମୟ ମାଗିଛନ୍ତି। ପୂର୍ବ ଦାବି ଅନୁସାରେ କ୍ଷତିଭରଣା ପାଇଁ ସଙ୍ଘ ଦାବି କରିଛି। ୧୫ ଦିନ ଭିତରେ ସମସ୍ତ ଦାବି ଉପରେ ଆଲୋଚନା କରି ସରକାର ସମାଧାନ କରିବେ ବୋଲି ଆଶା ରଖିଛି ସଂଘ। ଦାବି ପୂରଣ ନ ହେଲେ ଆଲୋଚନା କରି ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ସଙ୍ଘ କହିଛି।
PUCC ଓ ମନମୁଖୀ ଫାଇନ ବିରୋଧରେ ଆଜି ବିଜେଡିର ଯୁବ ଓ ଛାତ୍ର ଗର୍ଜନ
ନନ୍ଦିଘୋଷ ବ୍ୟୁରୋ : PUCC ଓ ମନମୁଖୀ ଫାଇନ ବିରୋଧରେ ଆଜି ବିଜେଡିର ଯୁବ ଓ ଛାତ୍ର ଗର୍ଜନ ସମାବେଶ । ଭୁବନେଶ୍ୱର RTO-୧ ଆଗରେ ପିକେଟିଙ୍ଗ ସହ ଲୋକଙ୍କୁ ସଚେତନ କରାଯିବ । PUCC ଓ ଚାଲାଣକୁ ଅଲଗା କରିବାକୁ ପ୍ରମୁଖ ଦାବି ରହିବ। ମନଇଚ୍ଛା ମିଥ୍ୟା ଫାଇନ ଆଦାୟ ହେଉଛି। ପ୍ରଦୂଷଣ କେବଳ ଗାଡ଼ିରୁ ହେଉନି। ଗଛ କଟାରୁ ମଧ୍ୟ ହେଉଛି। ଏ ନେଇ ଲୋକଙ୍କୁ ସଚେତନ କରିବା ସହ ଚାରା ବଣ୍ଟନ କରାଯିବ। ସରକାରଙ୍କୁ ପ୍ରଶ୍ନ କରାଯିବ ଓ ଜଣାଯିବ ଯେ ଗଛ ଲଗାଇଲେ ପ୍ରଦୂଷଣ କମେ । ଯିଏ ଫାଇନ ଦେଇ ଦେଲା ତାଙ୍କୁ PUCC ମିଳିଯାଉଛି । ସେ ସମୟରେ ଆଉ ଦେଖା ଯାଉନି ଯେ ଗାଡିରୁ ଧୂଆଁ ବାହାରୁଛି ନା ନାହିଁ । ଏହାକୁ ସରକାରଙ୍କୁ ଅପାରଗତାର ନାଁ ଦେଇଛି ବିଜୁ ଜନତା ଦଳ । ସୁଭଦ୍ରା ଟଙ୍କା ଦେବାକୁ ଟଙ୍କା ନଥିବାରୁ PUCC ଓ ଫାଇନର ପ୍ରହସନ କରାଯାଉଛି ବୋଲି ବିଜେଡି ଅଭିଯୋଗ କରିଛି। କଳା ଓ ଜନବିରୋଧୀ ଆଇନ ପରିବର୍ତ୍ତନ ନ ହେବା ଯାଏଁ ଆନ୍ଦୋଳନ ଜାରି ରହିବା ନେଇ ଯୁବ ଓ ଛାତ୍ର ବିଜେଡି ପକ୍ଷରୁ ସରକାରଙ୍କୁ ଚେତାବନୀ ଦିଆଯାଇଛି ।
କୁମ୍ଭୀର ଗଣନା ପାଇଁ ଆଜିଠାରୁ ପର୍ଯ୍ୟଟକଙ୍କ ପାଇଁ ବନ୍ଦ ରହିବ ଭିତରକନିକା
ନନ୍ଦିଘୋଷ ବ୍ୟୁରୋ : କୁମ୍ଭୀର ଗଣନା ପାଇଁ ଆଜିଠାରୁ ପର୍ଯ୍ୟଟକଙ୍କ ପାଇଁ ବନ୍ଦ ରହିବ ଭିତରକନିକା। ଆଜିଠାରୁ ୧୦ ତାରିଖ ପର୍ଯ୍ୟନ୍ତ ୩ଦିନ ଧରି ବନ୍ଦ ରହିବ । ଭିତରକନିକାର ନଦୀ, ନାଳରେ ବଉଳା କୁମ୍ଭୀର ଗଣନା ହେବ । କୁମ୍ଭୀର ଗଣନା ସମୟରେ ନଦୀରେ ବୋଟ ଚଳାଚଳ କଲେ କୁମ୍ଭୀର ଗଣନାରେ ବାଧା ସୃଷ୍ଟି ଯୋଗୁଁ ପର୍ଯ୍ୟଟକ ମାନଙ୍କ ପାଇଁ ଭିତରକନିକା ବନ୍ଦ ରହିଥାଏ । ଏହି ସମୟରେ ପର୍ଯ୍ୟଟକ ମାନଙ୍କୁ ଭିତରକନିକା ବୁଲି ନଯିବାକୁ ରାଜନଗର ବନଖଣ୍ଡ ପକ୍ଷରୁ ସୂଚନା ଦିଆଯାଇଛି । ୧୯୭୬ ମସିହାରୁ ଭିତରକନିକାରେ କୁମ୍ଭୀର ଗଣନା କରାଯାଉଛି। ଚଳିତ ଡ୍ରୋନ ବ୍ୟବହାର କରି ୧୦ ଦିନ ପରିବର୍ତ୍ତେ ୩ ଦିନରେ ଏହି କାମକୁ ଶେଷ କରିବାକୁ ନିଷ୍ପତ୍ତି ହୋଇଥିଲା। ତେବେ ଏଥର ବି ଡ୍ରୋନ ବ୍ୟବହାର କରାଯିବ ନାହିଁ ବୋଲି ଜଣାପଡ଼ିଛି। ଆଗର ପୁରୁଣା ପଦ୍ଧତିରେ ହୁଲି ଡଙ୍ଗା ସାହାଯ୍ୟରେ କରାଯାଉଛି କୁମ୍ଭୀର ଗଣନା।
ବିଶିଷ୍ଟ ଜଳବାୟୁ କର୍ମୀ ସୋନମ ୱାଙ୍ଗଚୁକଙ୍କ ଜାମିନ ଆବେଦନର ଶୁଣାଣି ଆଜି କରିବେ ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ : ବିଶିଷ୍ଟ ଜଳବାୟୁ କର୍ମୀ ସୋନମ ୱାଙ୍ଗଚୁକଙ୍କ ଜାମିନ ଆବେଦନର ଶୁଣାଣି ଆଜି କରିବେ ସୁପ୍ରିମକୋର୍ଟ। ଜାତୀୟ ନିରାପତ୍ତା ଆଇନ ବଳରେ ଅଟକ ଥିବା ସୋନମଙ୍କ ମୁକ୍ତି ହେବ ନା ସେ ପୁଣି ଜେଲରେ ରହିବେ ତାହାକୁ ନେଇ ସସପେନ୍ସ। ଜଷ୍ଟିସ ଅରବିନ୍ଦ କୁମାରଙ୍କ ନେତୃତ୍ବରେ ଗଠିତ ଖଣ୍ଡପୀଠ ମାମଲାର କରିବେ ଶୁଣାଣି। ସୋନମଙ୍କ ଜାମିନ ଲାଗି ପତ୍ନୀ ଗୀତାଞ୍ଜଳି ଆଙ୍ଗମୋ କରିଥିଲେ ଆବେଦନ। ସୋନମଙ୍କ ଲାଗି ଲଢୁଛି ବରିଷ୍ଠ ଆଇନଜୀବୀ କପିଳ ସିବଲ। ମୌଳିକ ଅଧିକାରର ଉଲ୍ଲଂଘନ କରି ସୋନମଙ୍କୁ ବନ୍ଦୀ କରାଯାଇଥିବା ଅଭିଯୋଗ ହୋଇଛି। ଗତ ଅକ୍ଟୋବର ୨୯ରେ ଏହି ମାମଲାରେ କେନ୍ଦ୍ର ଓ ଲଦାଖ ପ୍ରଶାସନ ଠାରୁ ଉତ୍ତର ଚାହିଁଥିଲେ ସୁପ୍ରିମକୋର୍ଟ। ଲଦାଖକୁ ରାଜ୍ୟ ମାନ୍ଯତା ତଥା ସମ୍ବିଧାନର ଷଷ୍ଠ ଅନୁଚ୍ଛେଦରେ ଲଦାଖକୁ ସାମିଲ କରିବା ଦାବି ନେଇ ଗତ ବର୍ଷ ସେପ୍ଟେମ୍ବରରେ ହୋଇଥିଲା ଆନ୍ଦୋଳନ। ଏଥିରେ ୪ ଜଣ ପ୍ରାଣ ହରାଇଥିଲେ। ଏହି ଘଟଣାରେ ଗତବର୍ଷ ସେପ୍ଟେମ୍ବର ୨୬ରେ ସୋନମଙ୍କୁ କରାଯାଇଥିଲା ଗିରଫ।
ପାଖେଇ ଆସୁଛି ତାମିଲନାଡୁ ବିଧାନସଭା ନିର୍ବାଚନ ; ଡିଏମକେ ମେଣ୍ଟକୁ ନେଇ ପ୍ରକାଶ ପାଇଛି ସସପେନ୍ସ
ନନ୍ଦିଘୋଷ ବ୍ୟୁରୋ : ତାମିଲନାଡୁ ବିଧାନସଭା ନିର୍ବାଚନ ପାଖେଇ ଆସୁଥିବାବେଳେ ଡିଏମକେ ମେଣ୍ଟକୁ ନେଇ ପ୍ରକାଶ ପାଇଛି ସସପେନ୍ସ l ଆସନ ବଣ୍ଟନକୁ ନେଇ ଡିଏମକେ ଓ କଂଗ୍ରେସ ମଧ୍ୟରେ ମତପାର୍ଥକ୍ୟ l ନିର୍ବାଚନ ଲାଗି କଂଗ୍ରେସ ୪୦ ଆସନ ଦାବି କରୁଥିବାବେଳେ ଏତେ ସଂଖ୍ୟକ ଆସନ ଦେବା ଲାଗି ଅରାଜି ଡିଏମକେ l ତେବେ କଂଗ୍ରେସକୁ ୩୨ ଆସନ ଦେବା ଲାଗି ଡିଏମକେ ପ୍ରସ୍ତାବ ଦେବା ପରେ ଅସୁଖୀ ରହିଛି କଂଗ୍ରେସ l ସେପଟେ ରାଜ୍ୟରେ ଚହଳ ସୃଷ୍ଟି କରିଥିବା ବିଜୟଙ୍କ ଟିଭିକେ ସହ ମେଣ୍ଟ କରିବାକୁ ତାମିଲନାଡୁ କଂଗ୍ରେସ ପକ୍ଷରୁ ରାହୁଲ ଗାନ୍ଧୀଙ୍କୁ ପ୍ରସ୍ତାବ ଦିଆଯାଇଥିବା ସୂଚନା ମିଳିଛି l କଂଗ୍ରେସ ସାଂସଦ ମାଣିକରାମ ଟାଗୋର କହିଛନ୍ତି କଂଗ୍ରେସ କେବଳ ମେଣ୍ଟ ଚାହେଁ ନାହିଁ l ଯଦି ମେଣ୍ଟ ସରକାରକୁ ଆସେ ତେବେ ସରକାରରେ ଅଂଶଗ୍ରହଣ କରିବାକୁ ଚାହୁଁଛି l ତେଣେ ଟିଭିକେ ପକ୍ଷରୁ କୁହାଯାଇଛି କଂଗ୍ରେସ ହେଉଛି ଟିଭିକେର ପ୍ରାକୃତିକ ସହଭାଗୀ ଦଳ l ଟିଭିକେ ମୁଖପାତ୍ର ଫେଲିକ୍ସ ଗେରାଲଡ କହିଛନ୍ତି- ବିଜୟ ଓ ରାହୁଲ ହେଉଛନ୍ତି ବନ୍ଧୁ ଏବଂ କଂଗ୍ରେସ ସହ ମେଣ୍ଟ ସମ୍ଭାବନା ବହୁ ଅଧିକ ରହିଛି l ୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ସରକାରୀ ଦଳର ସଂଖ୍ୟା ରହିଛି ୧୫୮ l ଡିଏମକେର ୧୩୩, କଂଗ୍ରେସର ୧୭, ଭିସିକେର ୪, ସିପିଏମର ୨ ଓ ସିପିଆଇର ୨ ବିଧାୟକ ଅଛନ୍ତି l ସେପଟେ ଏନଡିଏର ସଦସ୍ୟ ସଂଖ୍ୟା ରହିଛି ୬୪ l ସେଥିରେ AIADMKର ୬୦ ସଦସ୍ୟ ଥିବାବେଳେ ବିଜେପିର ଅଛନ୍ତି ମାତ୍ର ୪ଜଣ l
ଆସନ୍ତା ଫେବ୍ରୁଆରୀ ୧ ରବିବାର ଆଗତ ହେବ କେନ୍ଦ୍ର ବଜେଟ ; ବଜେଟ ଆଗତ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ
ନନ୍ଦିଘୋଷ ବ୍ୟୁରୋ : ଆସନ୍ତା ଫେବ୍ରୁଆରୀ ୧ ରବିବାର ଆଗତ ହେବ କେନ୍ଦ୍ର ବଜେଟ। ବଜେଟ ଆଗତ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ। ଆସନ୍ତା ଜାନୁଆରୀ ୨୮ରୁ ସଂସଦର ବଜେଟ ଅଧିବେଶନ ଆରମ୍ଭ ହେବ। ଏନେଇ ରାଜନୈତିକ ବ୍ୟାପାର କ୍ୟାବିନେଟ କମିଟି ପକ୍ଷରୁ ନିଷ୍ପତ୍ତି ନିଆଯାଇଛି। ଜାନୁଆରୀ ୨୮ରେ ଅଭିଭାଷଣ ରଖିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ଜାନୁଆରୀ ୨୯ରେ ଉପସ୍ଥାପନ ହେବ ଅର୍ଥନୈତିକ ସର୍ଭେ ରିପୋର୍ଟ। ୨୮ ଜାନୁଆରୀରୁ ୧୩ ଫେବ୍ରୁଆରୀ ଯାଏ ସଂସଦର ପ୍ରଥମ ପର୍ଯ୍ଯାୟ ଅଧିବେଶନ ବସିବ। ସେହିପରି ୯ ମାର୍ଚ୍ଚରୁ ୨ ଏପ୍ରିଲ ଯାଏ ସଂସଦର ଦ୍ବିତୀୟ ପର୍ଯ୍ୟାୟ ଅଧିବେଶନ ବସିବ। ଏହି ଅଧିବେଶନ କାଳରେ କିଛି ଗୁରୁତ୍ବପୂର୍ଣ୍ଣ ବିଲ୍ ଆଗତ ହେବା ସମ୍ଭାବନା ରହିଛି। ଇତିହାସରେ ଦ୍ବିତୀୟ ଥର ଲାଗି ଏଥର ରବିବାର କେନ୍ଦ୍ର ବଜେଟ ଆଗତ ହେବ। ୧୯୯୯ ଫେବ୍ରୁଆରୀ ୨୮ରେ ପ୍ରଥମ ଥର ଲାଗି କେନ୍ଦ୍ର ଅର୍ଥମନ୍ତ୍ରୀ ଯଶବନ୍ତ ସିହ୍ନା ବଜେଟ ଆଗତ କରିଥିଲେ ଯାହା ଥିଲା ରବିବାର।