ବ୍ୟୁରୋ ରିପୋର୍ଟ: ବେଳକୁ ବେଳ ରକ୍ତମୁଖା ସାଜୁଛି ଇସ୍ରାଏଲ । ଗାଜାରେ ଜୋରଦାର ଅପରେସନ । ହମାସର ୬ଶହରୁ ଅଧିକ ସ୍ଥଳୀ ଉପରେ ହମଲା । ଇସ୍ରାଏଲ ଆକ୍ରମଣରେ ୪ ଜଣ ତୁଙ୍ଗ ହମାସ କମାଣ୍ଡର ପ୍ରାଣ ହରାଇଛନ୍ତି । ସେମାନେ ହେଲେ ଜମିଲ ବାବା, ମହମ୍ମଦ ସଫାଦି, ମୁବାମନ ହିଜାଜି ଓ ମହମ୍ମଦ ଅବଦଲ୍ଲା । ବିଶେଷ କରି ଇସ୍ରାଏଲ ବାହିନୀ ହାତରେ ଥିବା ମରକାବା ଟ୍ୟାଙ୍କ ସାରା ଗାଜାକୁ ଧ୍ବଂସ କରିବାରେ ପ୍ରମୁଖ ଭୂମିକା ଗ୍ରହଣ କରିଛି । ଗାଜାର ଉଭୟପଟୁ ଇସ୍ରାଏଲ ପ୍ରତିରକ୍ଷା ବାହିନୀ ପୂର୍ବ ଓ ପଶ୍ଚିମ ଦିଗରୁ ଷଣ୍ଢୁଆସୀ ଆକ୍ରମଣ କରିବାର ଲାଗିଛି । ଗାଜାରେ ବର୍ତ୍ତମାନ ସୁଦ୍ଧା ୮ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଇସ୍ରାଏଲ ସୈନ୍ୟ ଗାଜାର ମୁଖ୍ୟ ସହରରେ ପ୍ରବେଶ କରିଛନ୍ତି । ଆଇଡିଏଫର ସୂଚନା ଅନୁସାରେ ସାରା ଗାଜାରେ ଗ୍ରାଉଣ୍ଡ ଅପରେସନ କରାଯିବ । ଗାଜାରେ ୪୦ ପ୍ରତିଶତ କୋଠା ମାଟିରେ ମିଶିଥିବାବେଳେ ସେଠାରେ ପାଣି, ବିଦ୍ୟୁତ, ମେଡିସିନ, ଖାଦ୍ୟ ବିନା ହାହାକାର ସୃଷ୍ଟି ହୋଇଛି ।
ଆଜି ପାକିସ୍ତାନକୁ ଭେଟିବ ବାଂଲାଦେଶ
ମୁମ୍ବାଇ: ଆଜି ବିଶ୍ବକପରେ ମୁହାଁମୁହିଁ ହେବେ ପାକିସ୍ତାନ ଓ ବାଂଲାଦେଶ । ଦିନ ୨ଟାରୁ କୋଲକାତାର ଇଡେନ ଗାର୍ଡେନ ଗ୍ରାଉଣ୍ଡରେ ମ୍ୟାଚ୍ ଆରମ୍ଭ ହେବ । ୬ଟି ମ୍ୟାଚରୁ ମାତ୍ର ୨ଟି ବିଜୟ ଲାଭ କରି ପଏଣ୍ଟ ଟେବୁଲର ସପ୍ତମ ସ୍ଥାନରେ ରହିଛି ପାକିସ୍ତାନ । ସେହିପରି ୬ଟିରୁ ମାତ୍ର ଗୋଟିଏ ମ୍ୟାଚ୍ ଜିତିଛି ବାଂଲାଦେଶ । ବିଜୟ ପାଇଁ ଉଭୟ ଦଳ ସ୍ବତନ୍ତ୍ର ରଣନୀତି କରିଛନ୍ତି । ଭଲ ପ୍ରଦର୍ଶନ କରି ପରାଜୟ ଧାରା ଭାଙ୍ଗିବାକୁ ପାକିସ୍ତାନ ଲକ୍ଷ୍ୟ ରଖିଥିବା ବେଳେ କଡ଼ା ଜବାବ ଦେବାକୁ ପ୍ରସ୍ତୁତ ଅଛି ବାଂଲାଦେଶ । ସେପଟେ ଗତକାଲି ମ୍ୟାଚରେ ଶ୍ରୀଲଙ୍କାକୁ ପରାଜିତ କରିଥିଲା ଆଫଗାନିସ୍ତାନ ।
୨୪୨ ରନର ବିଜୟ ଲକ୍ଷ୍ୟକୁ ୪୫ ଓଭର ୨ଟି ବଲରେ ହାସଲ କରି ଶ୍ରୀଲଙ୍କାକୁ ୭ଓ୍ବିକେଟରେ ପରାସ୍ତ କରିଥିଲା ଆଫଗାନିସ୍ତାନ । ନିଜର ତୃତୀୟ ବିଜୟ ସହ ପେଣ୍ଟ ଟେବୁଲର ପଞ୍ଚମ ସ୍ଥାନକୁ ଉଠିଛି ଆଫଗାନିସ୍ତାନ । ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ବୋଲରଙ୍କ ଆଗରେ ତିଷ୍ଠି ପାରିନଥିଲେ ଶ୍ରୀଲଙ୍କା ବ୍ୟାଟ୍ସମ୍ୟାନ୍ । ଦଳୀୟ ସ୍କୋର ୨୨ ରନ ଥିବା ବେଳେ ମାତ୍ର ୧୫ ରନ କରି ପାଭିଲିଅନ ଫେରିଥିଲେ ଦିମୁଥ କରୁଣାରତ୍ନେ । ୪୬ ରନ କରି ନିଶାଙ୍କା ମଧ୍ୟ ଆଉଟ ହୋଇଥିଲେ ।
ମେଣ୍ଡିସ ୩୯ ରନ କରିଥିବାବେଳେ ସଦିରା ୩୬ ରନ କରିବାକୁ ସକ୍ଷମ ହୋଇଥିଲେ । ଫଜଲହକ ଫାରୁକି ୪ ଓ୍ବିକେଟ ନେଇ ଶ୍ରୀଲଙ୍କାକୁ ଦୁର୍ବଳ କରିଦେଇଥିଲେ । ଶ୍ରୀଲଙ୍କା ୪୯ ଦଶମିକ ୩ ଓଭରରେ ୨୪୧ ରନ କରି ଅଲଆଉଟ ହୋଇଥିଲା । ଜବାବରେ ଆଫଗାନିସ୍ତାନ ପ୍ରଭାବୀ ପ୍ରଦର୍ଶନ ଦେଖାଇଥିଲା । ଆଜମାଥୁଲା ଓମାରଜି ଅପରାଜିତ ୭୩ ରନ କରିଥିବା ବେଳେ ହାସମାଥୁଲା ସାହିଦି ୫୮ ରନ କରିଥିଲେ । ୪୫.୨ ଓଭରରେ ଦଳ ୩ଓ୍ବିକେଟ ହରାଇ ମ୍ୟାଚକୁ ଜିତିନେଇଥିଲା ।
ଜାଡ଼ିଲାଣି ଓଡ଼ିଶା
ଭୁବନେଶ୍ବର: ଓଡ଼ିଶାକୁ ଧିରେଧିରେ ପ୍ରବେଶ କରୁଛି ଶୀତ। ସଂନ୍ଧ୍ୟାରୁ ଭୋର ପର୍ଯ୍ୟନ୍ତ କମୁଛି ତାପମାତ୍ରା । ସ୍ବାଭାବିକ ଠାରୁ ୨ରୁ ୪ ଡିଗ୍ରୀ ତଳେ ରହିଛି ପାରଦ । କନ୍ଧମାଳ ଜି.ଉଦୟଗିରିରେ ରେକର୍ଡ ହୋଇଛି ଚଳିତ ମାସର ସର୍ବନିମ୍ନ ତାପମାତ୍ରା । ଏକାଧିକ ସହରର ତାପମାତ୍ରା ୧୫ ଡିଗ୍ରୀ ତଳେ ରେକର୍ଡ ରହୁଛି । ବଙ୍ଗୋପସାଗରରୁ ଓଡ଼ିଶାକୁ ପ୍ରବାହିତ ହେଉଛି ପୂର୍ବାଳୀ ତରଙ୍ଗାୟିତ ପବନ । ପ୍ରଭାବରେ ଆଜିଠୁ ଦକ୍ଷିଣ ଓଡ଼ିଶାରେ ବଦଳିବ ପାଗ । ଅଧିକାଂଶ ସ୍ଥାନରେ ପାଗ କୋହଲା ରହିବା ସହ କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତା ୩ ତାରିଖ ପର୍ଯ୍ୟନ୍ତ ଗଞ୍ଜାମ, ଗଜପତି, ରାୟଗଡା, ମାଲକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି ଏବଂ କନ୍ଧମାଳରେ ବର୍ଷା ହୋଇପାରେ ।
ରାଜନୈତିକ ଦଳ ଲାଗି ପାଣ୍ଠି ଯୋଗାଣ ସଂକ୍ରାନ୍ତ ଇଲେକ୍ଟୋରାଲ ବଣ୍ଡ ସ୍କିମର ବୈଧତା ମାମଲାର ଶୁଣାଣି କରିବେ ସୁପ୍ରିମକୋର୍ଟଙ୍କ ୫ଜଣିଆ ଖଣ୍ଡପୀଠ
ନୂଆଦିଲ୍ଲୀ: ରାଜନୈତିକ ଦଳ ଲାଗି ପାଣ୍ଠି ଯୋଗାଣ ସଂକ୍ରାନ୍ତ ଇଲେକ୍ଟୋରାଲ ବଣ୍ଡ ସ୍କିମର ବୈଧତା ପ୍ରସଙ୍ଗ। ଆଜି ମାମଲାର ଶୁଣାଣି କରିବେ ସୁପ୍ରିମକୋର୍ଟଙ୍କ ୫ଜଣିଆ ଖଣ୍ଡପୀଠ । ସମ୍ବିଧାନ ଅନୁସାରେ ରାଜନୈତିକ ଦଳ କାହାଠାରୁ ଚାନ୍ଦା ପାଇଲେ ତାହା ଜାଣିବା ସମ୍ପର୍କରେ କାହାର ଅଧିକାର ନାହିଁ ବୋଲି ସୁପ୍ରିମକୋର୍ଟ ନିକଟରେ ଗତକାଲି କହିଥିଲେ କେନ୍ଦ୍ର ସରକାର । ଆଟର୍ଣ୍ଣି ଜେନେରାଲ ଆର. ଭେଙ୍କଟରମଣି କହିଥିଲେ- ସମ୍ବିଧାନର ଧାରା 19(1)(ଏ) ଅନୁସାରେ ପ୍ରାର୍ଥୀଙ୍କ ଅତୀତ ଇତିହାସ ଜାଣିବା ଭୋଟରଙ୍କ ଅଧିକାର ରହିଛି । ମାତ୍ର ସବୁକିଛି ଜାଣିବାର ଅଧିକାର ନାହିଁ । ରାଜନୈତିକ ଦଳଙ୍କୁ ପାଣ୍ଠି ପ୍ରଦାନରେ ସ୍ବଚ୍ଛତା ଆଣିବା ଲାଗି ନଗଦ ଅର୍ଥ ପ୍ରଦାନ ବଦଳରେ ଇଲକ୍ଟୋରାଲ ବଣ୍ଡ ପ୍ରଦାନ କରିବା ଲାଗି ଗତ ୨୦୧୮ ଜାନୁଆରୀ ୨ରେ ଏକ ବିଜ୍ଞପ୍ତି ଆଣିଥିଲେ ସରକାର ।
ପ୍ରଧାନ ବିଚାରପତି ଜଷ୍ଟିସ ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ନେତୃତ୍ବରେ ଗଠିତ ଖଣ୍ଡପୀଠ ମାମଲାର ଶୁଣାଣି କରିବେ । ଏହି ଖଣ୍ଡପୀଠରେ ରହିଥିବା ଅନ୍ୟ ସଦସ୍ୟମାନେ ହେଉଛନ୍ତି ଜଷ୍ଟିସ ସଞ୍ଜୀବ ଖନ୍ନା, ବିଆର ଗଭାଇ, ଜେବି ପାର୍ଦିଓ୍ବାଲା ଓ ମନୋଜ ମିଶ୍ର । କଂଗ୍ରେସ, ସିପିଏମ ସମେତ ୪ଟି ପକ୍ଷ ଏନେଇ ମାମଲା ଦାୟର କରିଥିଲେ । ଇଲେକ୍ଟୋରାଲ ବଣ୍ଡ ଏକ ପ୍ରତିଜ୍ଞାମୂଳକ ନୋଟ ଏବଂ ଏହା ସୁଧମୁକ୍ତ ବ୍ୟାଙ୍କିଂଙ୍କ ବ୍ୟବସ୍ଥାର ଏକ ଟୁଲ୍ । କୌଣସି ଭାରତୀୟ ବା ଭାରତରେ ପଞ୍ଜୀକୃତ ସଂଗଠନ ରିଜର୍ଭ ବ୍ୟାଙ୍କର ନିର୍ଦ୍ଧାରିତ ନିୟମ ଅନୁସାରେ କେଓ୍ବାଇସି ପୂରଣ କରି ବଣ୍ଡ ହାସଲ କରିପାରିବେ ।
ଆସୋସିଏସନ ଫର ଡେମୋକ୍ରାଟିକ ରିଫର୍ମସ ବା ଏଡିଆର ପକ୍ଷରୁ ଲଢୁଥିବା ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣ କହିଛନ୍ତି-ଇଲେକ୍ଟୋରାଲା ବଣ୍ଡ ଜରିଆରେ ପାଣ୍ଠି ପ୍ରଦାନ ଦୁର୍ନୀତି ବଢାଇବ ଏବଂ ଏହା ଏକ ଦୁର୍ନୀତିମୁକ୍ତ ରାଷ୍ଟ୍ର ଗଠନ ଲାଗି ନାଗରିକଙ୍କ ଅଧିକାରର ଉଲ୍ଲଂଘନ କରିବ । ଦାୟର ମାମଲାର ତଥ୍ୟ ଅନୁସାରେ ଇଲେକ୍ଟୋରାଲ ବଣ୍ଡ ଜରିଆରେ ବିଭିନ୍ନ ରାଜନୈତିକ ଦଳଙ୍କୁ ୧୨ ହଜାର କୋଟି ଟଙ୍କା ଯାଇଛି । ସେଥିରୁ କେବଳ ଦୁଇ ତୃତୀୟାଂଶ ଯାଇଛି ଗୋଟିଏ ପ୍ରମୁଖ ରାଜନୈତିକ ଦଳ ନିକଟକୁ। ଗତ ୨୦୧୯ ଏପ୍ରିଲରେ ଇଲେକ୍ଟୋରାଲ ବଣ୍ଡ ଯୋଜନାକୁ ବାତିଲ କରିବା ଲାଗି ଅଗ୍ରାହ୍ୟ କରିଥିଲେ ସୁପ୍ରିମକୋର୍ଟ।
ଆଜି ଶପଥ ନେବେ ନୂଆ ରାଜ୍ୟପାଳ ରଘୁବର ଦାସ
ଭୁବନେଶ୍ବର: ମଙ୍ଗଳବାର ଓଡ଼ିଶାର ରାଜ୍ୟପାଳ ଭାବେ ଶପଥ ନେବେ ରଘୁବର ଦାସ । ଦିନ ୧୧ଟା ୪୫ ମିନିଟରେ ଶପଥଗ୍ରହଣ ଉତ୍ସବ ଅନୁଷ୍ଠିତ ହେବ । ରଘୁବର ଓଡ଼ିଶାର ୨୬ ତମ ରାଜ୍ୟପାଳ ଭାବେ ସେ ଦାୟିତ୍ବ ନେବେ । ନୂଆ ରାଜ୍ୟପାଳଙ୍କୁ ପଦ ଓ ଗୋପନୀୟତାର ଶପଥପାଠ କରାଇବେ ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ ବିଦ୍ୟୁତ ରଞ୍ଜନ ଷଡ଼ଙ୍ଗୀ। ଗତକାଲି ରାଜଭବନକୁ ଆସିଛନ୍ତି ରଘୁବର ଦାସ । ରାଜ୍ୟପାଳଙ୍କ ସମେତ ୧୦୦ରୁ ଅଧିକ ଅତିଥି ରାଜଭବନ ଆସିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବାଚସ୍ପତି ପ୍ରମିଳା ମଲ୍ଲିକ ରାଜ୍ୟପାଳଙ୍କୁ ସ୍ବାଗତ କରିଥିଲେ । ରାଜଭବନରେ ସମସ୍ତଙ୍କୁ ଗାର୍ଡଅଫଅନର ପ୍ରଦାନ କରାଯାଇଥିଲା । ଏହା ପୂର୍ବରୁ ପୁରୀ ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ ନୂଆ ରାଜ୍ୟପାଳ ।
ରଘୁବର ଦାସ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ । ସେ ପାଞ୍ଚ ଥର ଝାଡ଼ଖଣ୍ଡ ବିଧାନସଭାକୁ ନିର୍ବାଚିତ ହୋଇଥିଲେ । ଝାଡ଼ଖଣ୍ଡର ଉପମୁଖ୍ୟମନ୍ତ୍ରୀ ଓ ପରବର୍ତ୍ତୀ ସମୟରେ ମୁଖ୍ୟମନ୍ତ୍ରୀ ଭାବରେ ଅବସ୍ଥାପିତ ହୋଇଥିଲେ । ୧୯୫୫ ମେ ୩ ତାରିଖରେ ଜନ୍ମ ଗ୍ରହଣ କରିଥିବା ରଘୁବର ଭାଲୁବସା ହରିଜନ ହାଇସ୍କୁଲର ମ୍ୟାଟ୍ରିକ ଓ ଜାମସେଦପୁର କୋ-ଅପରେଟିଭ୍ କଲେଜରୁ ସ୍ନାତକ ଶିକ୍ଷା ଶେଷ କରିଥିଲେ । ପରବର୍ତ୍ତୀ ସମୟରେ ସେ ଆଇନରେ ସ୍ନାତକ ଡ଼ିଗ୍ରୀ ହାସଲ କରି ଟାଟା କମ୍ପାନୀରେ ଯୋଗ ଦେଇଥିଲେ । ୧୯୭୭ରେ ଜନତା ପାର୍ଟିରେ ଯୋଗ ଦେଇଥିଲେ ଓ ପରେ ୧୯୮୦ରେ ବିଜେପିର ପ୍ରତିଷ୍ଠାତା ସଦସ୍ୟ ରହିଥିଲେ । ଜାମସେଦପୁର ପୂର୍ବ ବିଧାନସଭା ଆସନରୁ ବିଧାନସଭାକୁ ୧୯୯୫ରେନିର୍ବାଚିତ ହୋଇଥିଲେ ।
୨୦୦୪ରେ ଝାଡ଼ଖଣ୍ଡ ରାଜ୍ୟ ବିଜେପିର ସଭାପତି ରୂପେ ଅବସ୍ଥାପିତ ହୋଇଥିଲେ । ୨୦୦୫ରେ ଅର୍ଜୁନ ମୁଣ୍ଡାଙ୍କ ନେତୃତ୍ୱାଧୀନ ଝାଡ଼ଖଣ୍ଡ ବିଜେପି ସରକାରରେ ସେ ସହରାଞ୍ଚଳ ବିକାଶ ମନ୍ତ୍ରୀ ରୂପେ ନିଯୁକ୍ତି ପାଇଥିଲେ । ୨୦୦୯ରେ ସେ ଶିବୁ ସୋରେନଙ୍କ ସରକାରରେ ଉପମୁଖ୍ୟମନ୍ତ୍ରୀ ପଦରେ ଅବସ୍ଥାପିତ ହୋଇଥିଲେ । ୨୦୧୪ରେ ସେ ବିଜେପି ଜାତୀୟ କମିଟିରେ ସ୍ଥାନ ପାଇଥିଲେ ଓ ତାଙ୍କୁ ଦଳର ରାଷ୍ଟ୍ରୀୟ ଉପସଭାପତି ପଦ ମିଳିଥିଲା । ମାତ୍ର ରାଜ୍ୟରେ ସେହିବର୍ଷ ବିଜେପି ସଂଖ୍ୟା ଗରିଷ୍ଠତା ହାସଲ କରିବା ପରେ ଝାଡ଼ଖଣ୍ଡର ପ୍ରଥମ ଅଣ ଆଦିବାସୀ ମୁଖ୍ୟମନ୍ତ୍ରୀ ଭାବରେ ରଘୁବର ଦାସ ଅଧିଷ୍ଠିତ ହୋଇଥିଲେ । ୨୦୧୪ରୁ ୨୦୧୯ ପର୍ଯ୍ୟନ୍ତ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ଥିଲେ ରଘୁବର ଦାସ ।
ଭାରତ ଫେରିଲେ ସୁନା ପୁଅ ପ୍ରମୋଦ ଭଗତ
ନୂଆଦିଲ୍ଲୀ: ଭାରତ ଫେରିଲେ ସୁନା ପୁଅ ପ୍ରମୋଦ ଭଗତ। ପାରା ଏସିଆନ ଗେମ୍ସରେ ଓଡ଼ିଶା ପାଇଁ ଗୌରବ ଆଣିଛନ୍ତି ପ୍ରମୋଦ। ନୂଆଦିଲ୍ଲୀ ଏୟାରପୋର୍ଟରେ ସେ ଆଜି ପହଞ୍ଚିଛନ୍ତି । ପାରା ଏସିଆନ ଗେମ୍ସରେ ସ୍ବର୍ଣ୍ଣ ପଦକ ଜିତିଛନ୍ତି ପ୍ରମୋଦ ଭଗତ। ବ୍ୟାଡମିଣ୍ଟନ ସିଙ୍ଗିଲ୍ସରେ ପ୍ରମୋଦ ଜିତିଛନ୍ତି ଗୋଲ୍ଡ ମେଡାଲ । ନିଜ ଦେଶର ନିତେଶ କୁମାରଙ୍କୁ ହରାଇ ସେ ସ୍ବର୍ଣ୍ଣ ପଦକ ହାସଲ କରିଛନ୍ତି। ସ୍ବର୍ଣ୍ଣ ପଦକ ବିଜେତା ପ୍ରମୋଦଙ୍କ ପାଇଁ ୨ କୋଟି ଟଙ୍କା ପୁରସ୍କାର ରାଶି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଥମ ଥର ପାଇଁ ପାରା ଏସିଆନ ଗେମ୍ସରେ ୩ଟି ପଦକ ହାସଲ କରିଛନ୍ତି ପ୍ରମୋଦ। ପୂର୍ବରୁ ପ୍ରମୋଦ ମିଶ୍ରିତ ଯୁଗଳରେ କାଂସ୍ୟ ଓ ଯୁଗଳରେ ମଧ୍ୟ କାଂସ୍ୟ ପଦକ ହାସଲ କରିଥିଲେ ।
ନଭେମ୍ବର ୨ରେ ଇଡିରେ ହାଜର ହେବେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ
ନୂଆଦିଲ୍ଲୀ: ବହୁଚର୍ଚ୍ଚିତ ଦିଲ୍ଲୀ ମଦ ନୀତି ମାମଲା । ଆସନ୍ତା ନଭେମ୍ବର ୨ରେ ପ୍ରବର୍ତ୍ତନ ନିର୍ଦ୍ଦେଶାଳୟରେ ହାଜର ହେବେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । ବେଆଇନ ଅର୍ଥ କାରବାର ମାମଲାରେ କେଜ୍ରିଓ୍ବାଲଙ୍କୁ ହାଜର ହେବାକୁ ଦିଆଯାଇଛି ନିର୍ଦ୍ଦେଶ । ପୂର୍ବରୁ ଗତ ଏପ୍ରିଲ ୧୬ ତାରିଖରେ ଅରବିନ୍ଦ କେଜ୍ରିଓ୍ବାଲଙ୍କୁ ସିବିଆଇ ଜେରା କରିଥିଲା । ସେହିପରି ଗତ ଅକ୍ଟୋବର ୪ ତାରିଖରେ ରାଜ୍ୟସଭା ସାଂସଦ ସଞ୍ଜୟ ସିଂଙ୍କୁ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଏହି ମାମଲାରେ ଗିରଫ ହୋଇଥିଲେ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ । ସିସୋଦିଆଙ୍କ ଆବେଦନକୁ ଖାରଜ କରିଥିଲେ ସୁପ୍ରିମକୋର୍ଟ । ଫଳରେ ମନୀଷ ସିସୋଦିଆଙ୍କୁ ଆହୁରି ୬ ମାସ ଜେଲରେ ରହିବାକୁ ପଡିବ । ଦିଲ୍ଲୀ ମଦ ନୀତି ଭ୍ରଷ୍ଟାଚାର ମାମଲାରେ ୩୩୮ କୋଟି ହେରଫେର ହୋଇଥିବା ଅଭିଯୋଗ ହୋଇଥିଲା ।
ଅଡୁଆରେ ବଲିଉଡ ରାପର ବାଦଶା
ମୁମ୍ବାଇ: ଅଡୁଆରେ ବଲିଉଡ ରାପର ବାଦଶା । ମହାରାଷ୍ଟ୍ର ସାଇବର ଅଫିସରେ ହାଜର ହୋଇଛନ୍ତି ବାଦଶା । ଫେୟାରପ୍ଲେ ବେଟିଂ ଆପରେ ଇଣ୍ଡିଆନ ପ୍ରିମିୟର ଲିଗ ଦେଖିବା ଲାଗି ଦର୍ଶକଙ୍କୁ ପ୍ରୋତ୍ସାହନ ଦେଉଥିବା ଅଭିଯୋଗରେ ବାଦଶାଙ୍କ ବିରୋଧରେ ଏକ ଅଭିଯୋଗ ଦାୟର କରିଥିଲା ଭାୟାକମ ୧୮ ନେଟଓ୍ବର୍କ । ବାଦଶା ଓ ଅଭିନେତା ସଞ୍ଜୟ ଦତ୍ତଙ୍କ ସମେତ ୪୦ଜଣଙ୍କ ନାମରେ ଏହି ମାମଲା ଦାୟର ହୋଇଥିଲା । ଆଇପିଏଲ ପ୍ରସାରଣ ଲାଗି ଭାୟାକମ ୧୮ ନେଟଓ୍ବର୍କ ବୌଦ୍ଧିକ ସମ୍ପତ୍ତିଗତ ଅଧିକାର ବା ଆଇପିଆର ହାସଲ କରିଥିଲା । ମାତ୍ର ଫେୟାରପ୍ଲେ ଜରିଆରେ ଆଇପିଏଲ ଦେଖିବା ଲାଗି ବାଦଶା ଦର୍ଶକଙ୍କୁ ପ୍ରୋତ୍ସାହନ ଦେଉଥିଲେ । ଡିଜିଟାଲ ପାଇରାସି ଅନୁସାରେ ଏହି ମାମଲା ରୁଜୁ ହୋଇଛି ହୋଇଥିବାବେଳେ ଅନ୍ୟ ଅଭିନେତାଙ୍କ ବିରୋଧରେ ସମନ ଜାରି କରାଯିବ ବୋଲି ସୂଚନା ମିଳିଛି । ଫେୟାରପ୍ଲେ ଆପ ସୌରଭ ଚନ୍ଦ୍ରକର ଓ ରବି ଉପ୍ଲଲଙ୍କ ମାଲିକାନାରେ ଚାଲିଥିବା ମହାଦେବ ଆପ୍ ସହ ସମ୍ପର୍କିତ ବୋଲି ସୂଚନା ମିଳିଛି । ମହାଦେବ ଆପ୍ ବିରୋଧରେ ବର୍ତ୍ତମାନ ପ୍ରବର୍ତ୍ତନ ନିର୍ଦ୍ଦେଶାଳୟ ତଦନ୍ତ ଜାରି ରଖିଛି । ଗତ ଫେବ୍ରୁଆରୀରେ ୟୁଏଇରେ ଚନ୍ଦ୍ରକରଙ୍କ ବିବାହ ଉତ୍ସବରେ ସଞ୍ଜୟ ଦତ୍ତ, ସୁନୀଲ ସେଟ୍ଟି, ଟାଇଗର ଶ୍ରଫଙ୍କ ସମେତ ବହୁ ନାମୀଦାମୀ ଅଭିନେତା ଯୋଗଦେଇଥିଲେ ।
ମାଲାୟଲମ ଅଭିନେତ୍ରୀଙ୍କ ଆତ୍ମହତ୍ୟାକୁ ନେଇ ସାମନାକୁ ଆସିଲା ରୋଚକ ତଥ୍ୟ
ମୁମ୍ବାଇ: ଚର୍ଚ୍ଚିତ ମାଲାୟଲମ୍ ଅଭିନେତ୍ରୀ ରଞ୍ଜୁସ ମେନନଙ୍କ ଆକସ୍ମିକ ମୃତ୍ୟୁକୁ ନେଇ ଉଠିଛି ଅନେକ ପ୍ରଶ୍ନ । ଏକାଧିକ ହିଟ୍ ଫିଲ୍ମରେ ଅଭିନୟ କରିଥିବା ରଞ୍ଜୁଙ୍କ ମୃତଦେହ କେରଳର ଥିରୁଅନନ୍ତପୁରମ୍ ସ୍ଥିତ ତାଙ୍କ ଫ୍ଲାଟରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା । ରଞ୍ଜୁ ଆତ୍ମହତ୍ୟା କରିଛନ୍ତି ବୋଲି ପ୍ରାଥମିକ ତଦନ୍ତରୁ ପୋଲିସ ଜାଣିବାକୁ ପାଇଛି । ରଞ୍ଜୁସ୍ ନିଜ ସ୍ବାମୀ ମନୋଜଙ୍କ ସହ କରିୟମ ଫ୍ଲାଟରେ ରହୁଥିଲେ । ତେବେ ମାତ୍ର ୩୫ ବର୍ଷ ବୟସରେ ରଞ୍ଜୁସ କାହିଁକି ଜୀବନ ହାରିଲେ ତାକୁ ନେଇ ଉଠିଛି ବଡ଼ ପ୍ରଶ୍ନ । ସ୍ତ୍ରୀ, ନିଝାଲାତମ୍ ସିରିଏଲ୍ ପାଇଁ ଖୁବ୍ ଚର୍ଚ୍ଚିତ ଥିଲେ ରଞ୍ଜୁସ୍ । ମନୋରମାର ରିପୋର୍ଟ ଅନୁସାରେ ଗତକିଛି ମାସ ଧରି ରଞ୍ଜୁସ୍ ଅର୍ଥିକ ଅଭାବ ମଧ୍ୟରେ ରହିଥିଲେ । ଏହାକୁ ନେଇ ସେ ମାନସିକ ଚାପରେ ରହିଥିଲେ । କିଛି ବନ୍ଧୁଙ୍କ ସହ ସେ ଏ ସବୁ କଥା ସେୟାର କରିଥିଲେ ମଧ୍ୟ ପରିବାର ଲୋକଙ୍କୁ ସେ କେବେବି ଏ ସଂପର୍କରେ ସୂଚନା ଦେଇନଥିଲେ । ବିଭିନ୍ନ ମାଲାୟଲମ୍ ଫିଲ୍ମ ଓ ସିରିଏଲରେ କାମ କରିବା ଅପେକ୍ଷା କିଛି ପ୍ରୋଜେକ୍ଟରେ ଲାଇନ୍ ପ୍ରଡ୍ୟୁସରଭାବେ କାର୍ଯ୍ୟ କରିଥିଲେ । ଫିଲ୍ମ ସିଟି ଅଫ୍ ଗଡ, ବମ୍ବେ ମାର୍ଚ୍ଚ ୧୨, ଲିସାମାୟୁଡେ ଭେଡୁ, ଅଥଭୁଥ ଦୀପୁ, କାର୍ଯ୍ୟସ୍ଥାନ ପ୍ରମୁଖ ତାଙ୍କର ହିଟ୍ ଫିଲ୍ମ ମଧ୍ୟରୁ ଅନ୍ୟତମ ।
ପ୍ରଚାର ସମୟରେ ପ୍ରାର୍ଥୀଙ୍କୁ ଛୁରାମାଡ଼
ଚେନ୍ନାଇ: ନିର୍ବାଚନ ପୂର୍ବରୁ ପ୍ରଚାର ସମୟରେ ପ୍ରାର୍ଥୀଙ୍କୁ ଛୁରାମାଡ଼ । ହାତ ମିଳାଇବା ବାହାନାରେ ପେଟକୁ ଛୁରିରେ ଭୁଷିଲେ ସମର୍ଥକ । ଆଜି ତେଲେଙ୍ଗାନାରେ ଦେଖିବାକୁ ମିଳିଛି ଏଭଳି ଏକ ଅଭାବନୀୟ ଘଟଣା । ତେଲଙ୍ଗାନାର ମେଡକରୁ ସାଂସଦ ଥିବା କୋଟା ପ୍ରଭାକର ରେଡ୍ଡିଙ୍କ ଉପରକୁ ହୋଇଛି ଆକ୍ରମଣ । ଭାରତୀୟ ରାଷ୍ଟ୍ରୀୟ ସମିତିର ସାଂସଦ ଥିବା ପ୍ରଭାକର ରେଡ୍ଡି ଏଥର ମେଡକ ଜିଲ୍ଲାର ଡୁବକରୁ ବିଧାୟକ ପ୍ରାର୍ଥୀ ହୋଇଛନ୍ତି । ଡୁବକ ବିଧାନସଭା ନିର୍ବାଚନ ମଣ୍ଡଳୀର ପ୍ରାର୍ଥୀ ହୋଇଥିବା ପ୍ରଭାକର ଦୌଲାତାବାଦ ମଣ୍ଡଳରେ ପ୍ରଚାର ଅଭିଯାନରେ ସାମିଲ ଥିବାବେଳେ ତାଙ୍କୁ ଦୁର୍ବୃତ୍ତ ଛୁରାମାଡ କରିଛି ।
ତାଙ୍କ ପେଟରେ ଛୁରାଘାତ ହେବା ଯୋଗୁ ସେ ଗୁରୁତର ହୋଇଛନ୍ତି । ତାଙ୍କୁ ସ୍ଥାନୀୟ ଏକ ହସ୍ପିଟାଲରେ ଭର୍ତ୍ତି କରାଯାଇଛି । ଛୁରାମାଡ଼ ପରେ ସ୍ଥାନୀୟ ଲୋକେ ଦୁର୍ବୃତ୍ତକୁ କାବୁ କରି ପିଟିଥିବା ସୂଚନା ମିଳିଛି । ତାକୁ ପୋଲିସ ହେପାଜତକୁ ନିଆଯାଇଛି ବୋଲି କହିଛନ୍ତି ସିଦିପେଟ ପୋଲିସ କମିଶନର ଏନ. ଶ୍ବେତା । ସଂପୃକ୍ତ ଯୁବକ ଜଣଙ୍କ ଛେପାୟାଲ ମିର୍ଦ୍ଦୋଧି ମଣ୍ଡଳର ରାଜୁ ବୋଲି ଜଣାପଡିଛି । ପେଷାରେ ରାଜୁ ଜଣେ ୟୁଟ୍ୟୁବର ବୋଲି ପୋଲିସ କହିଛି । ଏ ଛୁରାମାଡ଼ ପଛରେ କଂଗ୍ରେସର ହାତ ଥିବା BRS ମୁଖ୍ୟ ତଥା ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଅଭିଯୋଗ କରିଛନ୍ତି । ଆସନ୍ତା ୩୦ ତାରିଖରେ ତେଲେଙ୍ଗାନାରେ ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ ତା ପୂର୍ବରୁ ଏଭଳି ଘଟଣା ଅନ୍ୟ ପ୍ରାର୍ଥୀଙ୍କର ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।