ନୂଆଦିଲ୍ଲୀ : କର ଠକେଇ ବିରୋଧରେ ପଦକ୍ଷେପ। ଆଜି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ବସିବ ସମସ୍ତ ରାଜ୍ୟର ଜିଏସଟି ଏନଫୋର୍ସମେଣ୍ଟ ଚିଫ ଓ କେନ୍ଦ୍ରୀୟ ଜିଏସଟି ଅଫିସରଙ୍କ ବୈଠକ। ଏହି ବୈଠକରେ ଜିଏସଟି ଠକେଇ, ବର୍ତ୍ତମାନ ଆସୁଥିବା ବିଭିନ୍ନ ଆହ୍ବାନର ମୁକାବିଲା ଆଦି ପ୍ରସଙ୍ଗରେ ହେବ ଆଲୋଚନା। ସେହିପରି ଫେକ୍ ଇନଭଏସ ରୋକିବା, ସ୍ବଚ୍ଛ ବ୍ଯବସ୍ଥା, ଟେକ୍ନୋଲୋଜି ଓ ଡାଟା ବ୍ଯବସ୍ଥା ଆଦି ସମ୍ପର୍କରେ ବି ବୈଠକରେ ଆଲୋଚନା ହେବ। ବ୍ଯାବସାୟିକ ସ୍ତରରେ ସ୍ବଚ୍ଛତା, ନିୟମକାନୁନ ବ୍ଯବସ୍ଥା ଆଦି ସମ୍ପର୍କରେ ଏହି ଦିନିକିଆ ଅଧିବେଶନରେ ଆହ୍ବାନ ଦେବେ ସୀତାରମଣ।
ଦିଲ୍ଲୀ ମଦନୀତି ମାମଲା: ଆଜି ହାଜର ହେବେ କି ମୁଖ୍ୟମନ୍ତ୍ରୀ କେଜ୍ରିୱାଲ
ନୂଆଦିଲ୍ଲୀ : ବହୁଚର୍ଚ୍ଚିତ ଦିଲ୍ଲୀ ମଦ ନୀତି ମାମଲା। ଆଜି ପ୍ରବର୍ତ୍ତନ ନିର୍ଦ୍ଦେଶାଳୟ ନିକଟରେ ମୁଖ୍ଯମନ୍ତ୍ରୀ ଅରବିନ୍ଦ କେଜ୍ରିୱାଲ ହାଜର ହେବେ କି ନାହିଁ ତାହାକୁ ନେଇ ସସପନସ। ପୂର୍ବରୁ ୭ ଥର କେଜ୍ରିୱାଲଙ୍କୁ ସମନ ଜାରି କରାଯାଇଥିଲେ ବି ସେ ହାଜର ହୋଇ ନଥିଲେ।
୨୦୨୩ ନଭେମ୍ବର ୨ରେ କେଜ୍ରିୱାଲଙ୍କୁ ପ୍ରଥମ ଥର ଲାଗି ନୋଟିସ କରିଥିଲା ଇଡି। ଗତବର୍ଷ ଡିସେମ୍ବର ୨୧ରେ ଦ୍ବିତୀୟ ନୋଟିସ ସତ୍ତ୍ବେ ହାଜର ହୋଇ ନଥିଲେ କେଜ୍ରିୱାଲ। ଗତ ଜାନୁଆରୀ ୩ରେ କେଜ୍ରିୱାଲଙ୍କୁ ତୃତୀୟ ନୋଟିସ, ଜାନୁଆରୀ ୧୮ରେ ଚତୁର୍ଥ ନୋଟିସ, ଫେବୃଆରୀ ୨ରେ ପଞ୍ଚମ ନୋଟିସ, ଫେବୃଆରୀ ୧୭ରେ ଷଷ୍ଠ ନୋଟିସ, ଫେବୃଆରୀ ୨୬ରେ ସପ୍ତମ ନୋଟିସ ଜାରି କରିଥିଲା ଇଡି।
ସେପଟେ ଆଜି ଆଗତ ହୋଇପାରେ ଦିଲ୍ଲୀ ବଜେଟ। ଦିଲ୍ଲୀ ବିଧାନସଭାରେ ଅର୍ଥମନ୍ତ୍ରୀ ଆତିଶି ବଜେଟ ଉପସ୍ଥାପନ କରିବେ। ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଅର୍ଥମନ୍ତ୍ରୀ ବଜେଟରେ କେତେକ ବଡ ଘୋଷଣା କରିବା ଆଶା ରହିଛି। ବଜେଟରେ ଶିକ୍ଷା, ସ୍ବାସ୍ଥ୍ୟ ଆଦିକୁ ଫୋକସ ଦିଆଯିବା ସୂଚନା ମିଳିଛି।
ଭୋଟ ଦେବା କିମ୍ବା ମତ ରଖିବା କ୍ଷେତ୍ରରେ ଲାଞ୍ଚ ନେବା ପ୍ରସଙ୍ଗ: ଆଜି ସୁପ୍ରିମକୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ
ନୂଆଦିଲ୍ଲୀ : ବିଧାନସଭା ବା ସଂସଦରେ ଭୋଟ ଦେବା କିମ୍ବା ମତ ରଖିବା କ୍ଷେତ୍ରରେ ଲାଞ୍ଚ ନେବା ପ୍ରସଙ୍ଗ । ଲାଞ୍ଚ ସଂକ୍ରାନ୍ତ ଅପରାଧିକ ମାମଲାରୁ ସାଂସଦ ଓ ବିଧାୟକଙ୍କୁ ସୁରକ୍ଷିତ ରଖିବା ପ୍ରସଙ୍ଗରେ ଆଜି ସୁପ୍ରିମକୋର୍ଟ ଦେବେ ଗୁରୁତ୍ବପୂର୍ଣ୍ଣ ରାୟ । ଆଜି ସିଜେଆଇ ଜଷ୍ଟିସ ଡି.ଓ୍ବାଇ. ଚନ୍ଦ୍ରଚୂଡ଼ଙ୍କ ନେତୃତ୍ବରେ ଗଠିତ ୭ ଜଣିଆ ଖଣ୍ଡପୀଠ ଶୁଣାଇବେ ରାୟ ।
ଏହି ପ୍ରସଙ୍ଗରେ କେନ୍ଦ୍ର ସରକାର ଯୁକ୍ତି ଦର୍ଶାଇଥିଲେ- ଲାଞ୍ଚ ପରି ଏକ ମାମଲାରୁ ଏମପି ଓ ଏମଏଲଏଙ୍କୁ ସୁରକ୍ଷା ନଦିଆଯାଉ । ଆଇନ ନିର୍ମାତାମାନେ ଆଇନରୁ ଊର୍ଦ୍ଧ୍ବରେ ନୁହନ୍ତି । ଆଟର୍ଣ୍ଣି ଜେନେରାଲ, ସଲିସିଟର ଜେନେରାଲ ଓ ଆମିକସ କ୍ୟୁରୀଙ୍କ ସମେତ ବହୁ ଆଇନଜୀବୀଙ୍କ ମତାମତକୁ ନେଇ ପୂର୍ବରୁ ଶୁଣାଣି ହୋଇଥିବାବେଳେ ରାୟକୁ ସଂରକ୍ଷିତ ରଖିଥିଲେ ସୁପ୍ରିମକୋର୍ଟ ।
ବହୁଚର୍ଚ୍ଚିତ ଜେଏମଏମ ଲାଞ୍ଚ ମାମଲାରେ କୌଣସି ବିବୃତି ବା ଭୋଟ ନେଇ ସାଂସଦ ଓ ବିଧାୟକଙ୍କ ବିରୋଧରେ ମାମଲା ଦାୟରରୁ ସାଂସଦ ଓ ବିଧାୟକଙ୍କୁ ମୁକ୍ତ ରଖିବା ଲାଗି ସୁପ୍ରିମକୋର୍ଟଙ୍କ ୫ ଜଣିଆ ଖଣ୍ଡପୀଠ ରାୟ ଦେଇଥିଲେ । ଏହି ମାମଲାର ପୁନଃଶୁଣାଣି କରୁଛନ୍ତି ସୁପ୍ରିମକୋର୍ଟଙ୍କ ୭ ଜଣିଆ ଖଣ୍ଡପୀଠ । ଦୀର୍ଘ ୨୫ ବର୍ଷ ପରେ ଏହି ମାମଲା ପୁଣି ପଦାକୁ ଆସିଛି । ଲାଞ୍ଚ ଗ୍ରହଣ କରି ସଂସଦ ଓ ବିଧାନସଭାରେ ସାଂସଦ ଓ ବିଧାୟକମାନେ କୌଣସି ମତ ରଖିବା ବା ଭୋଟ ଦେବା ଏକ ଅପରାଧିକ କାର୍ଯ୍ୟ ହୋଇଥିବାବେଳେ ଅତୀତରେ ଖଣ୍ଡପୀଠ ଦେଇଥିବା ରାୟକୁ ପୁନଃତର୍ଜମା କରାଯିବ ବୋଲି ସୁପ୍ରିମକୋର୍ଟ କହିଛନ୍ତି ।
ମାମଲାର ପୁନଃବିଚାର ଲାଗି ଗତ ୨୦୨୩ ସେପ୍ଟେମ୍ବର ୨୦ରେ ସୁପ୍ରିମକୋର୍ଟ ନିଷ୍ପତ୍ତି ନେଇଥିଲେ । ପିଭି ନରସିଂହ୍ମା ରାଓ ବନାମ ସିବିଆଇ ମାମଲାରେ ସୁପ୍ରିମକୋର୍ଟ କହିଥିଲେ- ସମ୍ବିଧାନର ଧାରା ୧୦୫(୨), ୧୯୪(୨) ଅନୁସାରେ ଗୃହ ଭିତରେ କୌଣସି ବିଧାୟକ ଓ ସାଂସଦଙ୍କ ମତ ଓ ଭୋଟ କ୍ଷେତ୍ରରେ ସେମାନଙ୍କ ବିରୋଧରେ କୌଣସି ମାମଲା ରୁଜୁ ହୋଇପାରିବ ନାହିଁ ।
୧୯୯୩ରେ ନରସିଂହ୍ମା ରାଓ ସରକାରଙ୍କୁ ଅନାସ୍ଥା ଭୋଟରୁ ବଞ୍ଚାଇବା ଲାଗି ଜେଏମଏମ ନେତା ଶିବୁ ସୋରେନଙ୍କ ସମେତ 5 ସାଂସଦ ଲାଞ୍ଚନେବା ଅଭିଯୋଗ ହୋଇଥିଲା । ଜେଏମଏମର ସମର୍ଥନ ଯୋଗୁ ରାଓ ସରକାର ବଞ୍ଚିଯାଇଥିଲା । ସେମାନଙ୍କ ବିରୋଧରେ ସିବିଆଇ ମାମଲା ଦାୟର କରିଥିଲେ ବି ଧାରା ୧୦୫(୨)କୁ ଆଧାର କରି ଏହି ମାମଲାକ ରଦ୍ଦ କରିଥିଲେ ସୁପ୍ରିମକୋର୍ଟ ।
ଚର୍ମରୋଗ ବିଶେଷଜ୍ଞ ବିଷ୍ଣୁପ୍ରିୟା ଦେବୀଙ୍କ ପରଲୋକ
କଟକ: ଖ୍ଯାତି ସମ୍ପନ୍ନ ପ୍ରଫେସର ଡକ୍ଟର ବିଷ୍ଣୁପ୍ରିୟା ଦେବୀଙ୍କ ପରଲୋକ । ୮୨ ବର୍ଷ ବୟସରେ କଟକ ନିମସାହିସ୍ଥିତ ବାସଭବନରେ ତାଙ୍କ ପରଲୋକ ଘଟିଛି । ମୃତ୍ୟୁ ପରେ ତାଙ୍କ ଚକ୍ଷୁଦାନ କରିଛନ୍ତି ପରିବାର ଲୋକେ । ଚର୍ମରୋଗ ବିଶେଷଜ୍ଞ ଭାବେ ସେ ଜଣାଶୁଣା ଥିଲେ ।
ଖ୍ଯାତନାମା ପ୍ରଫେସର ଡାକ୍ତର ନିରଞ୍ଜନ ତ୍ରିପାଠୀଙ୍କ ସହଧର୍ମିଣୀ ଥିଲେ ବିଷ୍ଣୁପ୍ରିୟା । ୧୯୪୨ ଜୁନ ୧୪ ତାରିଖରେ କଟକ ଜିଲ୍ଲାର ରାମକୃଷ୍ଣପୁର ଗ୍ରାମରେ ସେ ଜନ୍ମଗ୍ରହଣ କରିଥିଲେ । ଏସସିବି ମେଡିକାଲ କଲେଜରେ ୨୦୦୦ ମସିହାରୁ କାର୍ଯ୍ଯରତ ଥିଲେ । ପରେ ଭୁବେନେଶ୍ୱରସ୍ଥିତ କଳିଙ୍ଗ ହସ୍ପିଟାଲର ଚର୍ମରୋଗ ବିଭାଗର ମୁଖ୍ୟ ଭାବେ କାର୍ଯ୍ୟ କରିଥିଲେ । ସେ ଅନେକ ସାମାଜିକ ଅନୁଷ୍ଠାନ ସହ ଜଡିତ ଥିଲେ । ତାଙ୍କ ନାମରେ ବିଷ୍ଣୁପ୍ରିୟା ଦେବୀ ଚାରିଟେବଲ ଟ୍ରଷ୍ଟ ପରିଚାଳିତ ହେଉଛି ।
ଟଙ୍କା ନେଣଦେଣକୁ ନେଇ ହାଣିଲେ
ଢେଙ୍କାନାଳ: ଟଙ୍କା ଦେଣନେଣକୁ କେନ୍ଦ୍ର କରି ଗୋଡ଼ାଇ ଗୋଡ଼ାଇ ହାଣିଲେ । ଢେଙ୍କାନାଳ ଜିଲ୍ଲା ଗଁଦିଆ ଥାନା ଗୁଣ୍ଡୁରାପଶି ବର ସାହିରେ ଘଟିଛି ଏହି ନିର୍ମମ ହତ୍ୟାକାଣ୍ଡ । ମୃତକ ହେଲେ ଏକାଦଶୀ ମହାଳିକ । ଗାଁର କିଛି ଯୁବକ ଗୋଡାଇ ଗୋଡାଇ ତାଙ୍କୁ ହତ୍ଯା କରିଥିବା ଅଭିଯୋଗ ହୋଇଛି ।
ଅଭିଯୋଗ ଅନୁସାରେ, ମୃତ ଏକାଦଶୀ ସେହି ଗାଁର ସଇଁଆ ପାତ୍ରଠାରୁ କିଛି ବର୍ଷ ତଳେ ୧୫ ହଜାର ଟଙ୍କା ସୁଧକୁ ଆଣିଥିଲେ । ମୂଳ ଟଙ୍କା ଦେଇସାରିଥିବାବେଳେ ସୁଧ ଟଙ୍କା ଦେଇ ନପାରିବାରୁ ସଂଘବଦ୍ଧ ଭାବେ ଆକ୍ରମଣ କରିଥିଲେ ଅଭିଯୁକ୍ତ । ତାଙ୍କୁ ଗୁରୁତର ଅବସ୍ଥାରେ ଢେଙ୍କାନାଳ ଜିଲ୍ଲା ମୁଖ୍ଯ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଶ୍ରୀମନ୍ଦିରରେ ପଶିଲେ ୪ ବାଂଲାଦେଶୀ ଅଣହିନ୍ଦୁ
ପୁରୀ: ଶ୍ରୀମନ୍ଦିର ଭିତରେ ପଶି ଦର୍ଶନ କଲେ ଅଣହିନ୍ଦୁ ବାଙ୍ଗଳାଦେଶୀ ଭକ୍ତ । ଚାରି ଜଣ ଅଣହିନ୍ଦୁ ଭକ୍ତ ଦର୍ଶନ କରିଥିବା ନେଇ ଅଭିଯୋଗ ହୋଇଛି । ଅଭିଯୋଗ ପରେ ୪ ଜଣଙ୍କୁ ସିଂହଦ୍ୱାର ଥାନାରେ ଅଟକ ରଖିଛି ପୋଲିସ । କିପରି ନିୟମ ଉଲ୍ଲଂଘନ କରି ଶ୍ରୀମନ୍ଦିର ଭିତରକୁ ଦର୍ଶନ ପାଇଁ ଯାଇଥିଲେ ସେନେଇ ଅଧିକ ପଚରାଉଚରା କରିଛି ପୋଲିସ । ସେମାନଙ୍କର ପାସପୋର୍ଟ ମଧ୍ୟ ଅନୁଧ୍ୟାନ କରାଯାଉଛି ।
ବିରଳ ପ୍ରଜାତିର ୩୫୧ କଇଁଛ ଉଦ୍ଧାର, ୩ ଗିରଫ
କଟକ: ୩୫୧ ଟି ବିରଳ ପ୍ରଜାତିର କଇଁଛ ଉଦ୍ଧାର । ୩ ଗିରଫ ସହ କାର ଜବତ । କଇଁଛଗୁଡ଼ିକୁ ପଶ୍ଚିମବଙ୍ଗରୁ କର୍ଣ୍ଣାଟକ ଚାଲାଣ ବେଳେ ଧରିଲା ଗୁଇନ୍ଦା ନିର୍ଦ୍ଦେଶାଳୟ । କଟକ ମଙ୍ଗୁଳି ଟୋଲ ଗେଟ୍ ନିକଟରୁ ଏକ କାରକୁ ଅଟକାଇବା ପରେ ସେଥିରେ କଇଁଛ ଚାଲାଣ ହେଉଥିବା ଜଣା ପଡ଼ିଥିଲା । ପରେ ଏହାକୁ ଚାଲାଣ କରୁଥିବା ୩ ଜଣଙ୍କୁ ପଚରାଉଚରା ସହ ସମସ୍ତେ ବନ୍ୟପ୍ରାଣୀ ସ୍ମଗଲର ବୋଲି ଜଣା ପଡିଥିଲା । ପରବର୍ତ୍ତୀ କାର୍ଯ୍ୟନୁଷ୍ଠାନ ପାଇଁ ଉଦ୍ଧାର କଇଁଛ ସହ କାର ଓ ସମସ୍ତ ଚାଲାଣଙ୍କରୀଙ୍କୁ ଓଡ଼ିଶା ବନ୍ୟପ୍ରାଣୀ ବିଭାଗକୁ ହସ୍ତାନ୍ତର କରିଛି ଡିଆରଆଇ ।
୬ ତାରିଖରେ ବିଏସକେୱାଇ ନବୀନ କାର୍ଡର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ
ଭୁବନେଶ୍ବର: ଆସନ୍ତା ୬ ତାରିଖରେ ବିଏସକେୱାଇ ନବୀନ କାର୍ଡର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଥମ ପର୍ଯ୍ଯାୟରେ ଏହା ସମ୍ବଲପୁର ଓ ଖୋର୍ଦ୍ଧା ଜିଲ୍ଲାରେ ଆରମ୍ଭ ହେବ । ପରେ ସବୁ ଜିଲ୍ଲାରେ କାର୍ଯ୍ୟକାରୀ ହେବ । ଏଥିରେ ରାଜ୍ୟର ୯୦ ପ୍ରତିଶତ ଲୋକ ଉପକୃତ ହେବେ । ବିଏସକେୱାଇର ଏହି ତୃତୀୟ ପର୍ଯ୍ୟାୟରେ ଗ୍ରାମାଞ୍ଚଳ ଲୋକଙ୍କୁ ଜଟିଳ ରୋଗ ପାଇଁ ମିଳିବ ମାଗଣା ଚିକିତ୍ସା । ସେହିଦିନ ନବୀନ ମ୍ୟାଜିକ କାର୍ଡ ଓ୍ବେବସାଇଟରେ ପଞ୍ଜୀକରଣ ମଧ୍ୟ ଆରମ୍ଭ ହେବ ।
ରାଜ୍ୟରେ ଅର୍ଥ ଅଭାବରୁ କେହି ବି ଉତ୍ତମ ଚିକିତ୍ସାରୁ ବଞ୍ଚିତ ହେବେ ନାହିଁ । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆରମ୍ଭ କରିଛନ୍ତି ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା । ଆସନ୍ତା ୬ ତାରିଖରେ ସମ୍ବଲପୁର ଓ ଖୋର୍ଦ୍ଧା ଜିଲ୍ଲାରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସକେୱାଇ)ର ତୃତୀୟ ପର୍ଯ୍ୟାୟ ଆରମ୍ଭ କରିବେ ମୁଖ୍ୟମନ୍ତ୍ରୀ । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରୁ ବଞ୍ଚିତ ହୋଇଥିବା ଗାଁ ଗହଳିର ଲୋକଙ୍କୁ ଏହି ପର୍ଯ୍ୟାୟରେ ଜଟିଳ ରୋଗ ପାଇଁ ଘରୋଇ ହସ୍ପିଟାଲରେ କ୍ୟାସଲେସ୍ ଚିକିତ୍ସା ସୁବିଧା ଯୋଗାଇ ଦିଆଯିବ । ସରକାରୀ କର୍ମଚାରୀ ଓ ଆୟକରଦାତାଙ୍କ ବ୍ୟତୀତ ଗାଁରେ ବିଏସକେୱାଇରୁ ବଞ୍ଚିତ ସବୁ ପରିବାର ବିଏସକେଓ୍ବାଇ ନବୀନ କାର୍ଡ ପାଇବେ । ସେମାନେ ଉଭୟ ରାଜ୍ୟ ଭିତରେ ଓ ବାହାରେ ସବୁ ପଞ୍ଜିକୃତ ଘରୋଇ ହସ୍ପିଟାଲରେ ନିର୍ଦ୍ଧାରିତ ଜଟିଳ ରୋଗଗୁଡିକର ମାଗଣା ଚିକିତ୍ସା ସୁବିଧା ପାଇବେ । ତୃତୀୟ ପର୍ଯ୍ୟାୟ ସଂପ୍ରସାରଣରେ ରାଜ୍ୟର ୧ କୋଟି ୧୦ ଲକ୍ଷରୁ ଅଧିକ ପରିବାର ସାମିଲ ହେବାକୁ ଯାଉଛନ୍ତି । ଯାହାକି ରାଜ୍ୟ ଜନସଂଖ୍ୟାର ପ୍ରାୟ ୯୦ ପ୍ରତିଶତ ।
ତୃତୀୟ ପର୍ଯ୍ୟାୟ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ସ୍ପେଶାଲ ଡ୍ରାଇଭ୍ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପକ୍ଷରୁ ବିଭିନ୍ନ ଜିଲ୍ଲା ଗସ୍ତ ସମୟରେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଘୋଷଣା କରିଥିଲେ । ପ୍ରଥମ ପର୍ଯ୍ୟାୟରେ ସବୁ ଲୋକଙ୍କୁ ସେମାନଙ୍କ ରୋଜଗାର ଓ ବାସସ୍ଥାନ ନିର୍ବିଶେଷରେ, ସବୁ ସରକାରୀ ଚିକିତ୍ସାଳୟରେ ସମସ୍ତ ଉପଲବ୍ଧ ଚିକିତ୍ସା ସୁବିଧା ମାଗଣାରେ ମିଳୁଛି । ଦ୍ବିତୀୟ ପର୍ଯ୍ୟାୟରେ ସବୁ ଖାଦ୍ୟ ସୁରକ୍ଷା ହିତାଧିକାରୀ ଘରୋଇ ଚିକିତ୍ସାଳୟରେ ମାଗଣାରେ ଚିକିତ୍ସା ସୁବିଧା ପାଉଛନ୍ତି । ଏହି ଯୋଜନାରେ ପ୍ରତିମାସର ୪୫ ଲକ୍ଷରୁ ଅଧିକ ଲୋକଙ୍କୁ ବିଭିନ୍ନ ସରକାରୀ ସ୍ବାସ୍ଥ୍ୟ ଅନୁଷ୍ଠାନରେ ମାଗଣାରେ ଚିକିତ୍ସା ସୁବିଧା ମିଳୁଛି । ଏଥିସହ ୧ ଲକ୍ଷ ୩୦ ହଜାର ଲୋକ ଘରୋଇ ହସ୍ପିଟାଲରେ କ୍ୟାସଲେସ୍ ଚିକିତ୍ସା ସୁବିଧା ପାଉଛନ୍ତି । ଏଥିପାଇଁ ପଞ୍ଜିକୃତ ଘରୋଇ ହସ୍ପିଟାଲରେ ରାଜ୍ୟ ସରକାର ମାସକୁ ୨୬୦ କୋଟି ଟଙ୍କା ଖର୍ଚ୍ଚ କରୁଛନ୍ତି । ଗତ ୫ ବର୍ଷରେ ବିଏସକେଓ୍ବାଇରେ ରାଜ୍ୟ ସରକାର ୪୫୦୦ କୋଟି ଟଙ୍କା ଖର୍ଚ୍ଚ କରି ୨୧ ଲକ୍ଷ ରୋଗୀଙ୍କୁ ବିଭିନ୍ନ ଘରୋଇ ହସ୍ପିଟାଲରେ କ୍ୟାସଲେସ ଚିକିତ୍ସା ସୁବିଧା ଯୋଗାଇ ଦେଇଛନ୍ତି ।
କୋଭିଡ ପରେ ବଢୁଛି ଭାରତୀୟଙ୍କ ଫୁସଫୁସ୍ ଓ ଶ୍ବାସପ୍ରଶ୍ବାସ ଜନିତ ରୋଗ
ଭୁବନେଶ୍ବର: କୋଭିଡ ପରେ ବଢୁଛି ଭାରତୀୟଙ୍କ ଫୁସଫୁସ୍ ଓ ଶ୍ବାସପ୍ରଶ୍ବାସଜନିତ ରୋଗ । ଭେଲୋର ସ୍ଥିତ ଖ୍ରୀଷ୍ଟିୟାନ୍ ମେଡିକାଲ କଲେଜର ରିପୋର୍ଟକୁ ନେଇ ଚିନ୍ତା । ୨୦୭ ବ୍ୟକ୍ତିଙ୍କ ଫୁସଫୁସ୍ ନଷ୍ଟ ହେବା ସହ ସେ ସବୁ ବ୍ୟକ୍ତି ସ୍ବାଭାବିକ କାମ କରିବାରେ ଅସମର୍ଥ ପ୍ରମାଣିତ ହୋଇଛନ୍ତି । ଇନଫ୍ଲୁଏଞ୍ଜା ଜନିତ ଜ୍ବର, କାଶ ଓ ଥଣ୍ଡା ହେଲେ ଭଲ ହେବାକୁ ୪ରୁ ୬ ସପ୍ତାହ ଲାଗୁଛି । ବାୟୁ ପ୍ରଦୂଷଣ ଓ ଜୈବ ଇନ୍ଧନ ପରିଚାଳିତ ଯାନବାହାନରୁ ନିର୍ଗତ ବିଷାକ୍ତ ଗ୍ୟାସ୍ ବି ଫୁସ୍ଫୁସ୍ କ୍ୟାନସର୍ କରାଉଥିବା ବିଶେଷଜ୍ଞ କହିଛନ୍ତି ।
୩ ବର୍ଷ ତଳୁ ନିୟନ୍ତ୍ରଣ ହେଲାଣି କୋଭିଡ । ହେଲେ ଖୋଳ କରିଦେଇଛି ଆଲ୍ଫା, ଡେଲ୍ଟା-ଓମିକ୍ରନ୍ ! ଏବେ ବି ଭାରତୀୟଙ୍କଠାରେ ବଢୁଛି ଫୁସ୍ଫୁସ୍ ଓ ଶ୍ବାସପ୍ରଶ୍ବାସ ଜନିତ ରୋଗ । କୋଭିଡ ପରେ ଏକାଧିକ ରୋଗରେ ପୀଡ଼ିତ ବ୍ୟକ୍ତି ଏବେ କୋଭିଡ ପରବର୍ତ୍ତୀ ଜଟିଳ ରୋଗରେ ପୀଡ଼ିତ ହେଉଛନ୍ତି । ସାମାନ୍ୟ ଚିକିତ୍ସା ଅଭାବରୁ ପ୍ରାଣ ହରାଉଛନ୍ତି । ଏଭଳି ଏକ ରିପୋର୍ଟ ଭେଲୋରସ୍ଥିତ ଖ୍ରୀଷ୍ଟିଆନ୍ ମେଡିକାଲ୍ ରିସର୍ଚ୍ଚ୍ ଗବେଷଣାରୁ ଜଣାପଡ଼ିଛି । ୨୦୭ ଜଣ ବ୍ୟକ୍ତିଙ୍କଠାରେ ବିଭିନ୍ନ ପରୀକ୍ଷାନିରୀକ୍ଷା କରିବା ପରେ ଏପରି ସାଂଘାତିକ ତଥ୍ୟ ସାମନାକୁ ଆସିଛି । କୋଭିଡ ପରେ ଲୋକଙ୍କର ରକ୍ତସଞ୍ଚାର କରୁଥିବା ଧମନୀଗୁଡ଼ିକ ପ୍ରଭାବିତ ହେବା ସହ ହଠାତ ହୃଦଘାତର ଶିକାର ହେଉଛନ୍ତି ଲୋକେ । ଏପରିକି ଭୂତାଣୁବାହକ ଜ୍ବର, କାଶ, ଥଣ୍ଡା ପାଇଁ ଔଷଧ ଖାଇଲେ ସୁସ୍ଥ ହେବାକୁ ମାସାଧିକ କାଳ ଲାଗୁଛି । ଏବେ ବି ବଡ଼ ମେଡିକାଲକୁ କୋଭିଡ ପରବର୍ତ୍ତୀଜନିତ ଫୁସଫୁସ୍, ଶ୍ବାସ ପ୍ରଶ୍ବାସ ଜନିତ ରୋଗ, ଗ୍ୟାସଟ୍ରାଇଟିସ୍, ଆଜମା ରୋଗୀ ଆସୁଛନ୍ତି । ଏମାନଙ୍କୁ ଚିକିତ୍ସା କରିବାକୁ ହେଲେ ସେମାନେ କୋଭିଡ ପୀଡ଼ିତ ଥିବାବେଳେ ଇଞ୍ଜେକ୍ସନ୍ ନେଇଛନ୍ତି କି ଟାବଲେଟ୍ ଖାଇଛନ୍ତି ସେ ସମସ୍ତ ତଥ୍ୟ ଅନୁଶୀଳନ କରି ଚିକିତ୍ସା କରିବାକୁ ପଡ଼ିବ ।
କେବଳ କୋଭିଡ ନୁହେଁ, ବାୟୁ ପ୍ରଦୂଷଣ ବି ଶ୍ବାସପ୍ରଶ୍ବାସଜନିତ ରୋଗ ବୃଦ୍ଧି କରୁଛି । ବିଶେଷକରି ଜୈବ ଇନ୍ଧନ ଦ୍ବାରା ପରିଚାଳିତ ଯାନବାହାନରୁ ନିର୍ଗତ କାର୍ବନମନୋକ୍ସାଇଡ୍ ଓ ଲିଡ ବାୟୁମଣ୍ଡଳରେ ଘୂରି ବୁଲୁଛି । ଏସବୁ ଲୋକଙ୍କ ଶ୍ବାସକ୍ରିୟାରେ ଯାଇ ଫୁସଫୁସରେ ଜମା ହେଉଛି । ଅନୁସନ୍ଧାନରୁ ଜଣାପଡ଼ିଛି ଆଜିକାଲି ୪୯.୩ ପ୍ରତିଶତ ଲୋକଙ୍କର ଶ୍ବାସକ୍ରିୟା ଜନିତ ସମସ୍ୟା ରହୁଛି । ୨୭.୧ ପ୍ରତିଶତ ଲୋକେ ବାୟୁପ୍ରଦୂଷଣ ଯୋଗୁଁ କଫ ଜନିତ ରୋଗରେ ପୀଡ଼ିତ ହେଉଛନ୍ତି । ବିଶେଷଜ୍ଞଙ୍କ ଆକଳନ ଏପରି ସମସ୍ୟା ଆହୁରି ଅଧିକ ଦେଖାଦେଇପାରେ ।
ଅନୁସନ୍ଧାନରୁ ଜଣାପଡ଼ିଛି କୋଭିଡ ପରେ ଅଧିକାଂଶ ଲୋକଙ୍କ ଦେହରେ ଟିବି ଲକ୍ଷଣ ବି ଦେଖାଦେଉଛି । ତେବେ ଶରୀରରେ ଏସବୁ ରୋଗ ନେଇ କୌଣସି ଲକ୍ଷଣ ଦେଖା ଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେଇ ଔଷଧ ନେଲେ ଆରୋଗ୍ୟ ମିଳିବ ବୋଲି ଡାକ୍ତର ପରାମର୍ଶ ଦେଇଛନ୍ତି ।
ସରକାର ଯୋଗାଇଛନ୍ତି ଭିତ୍ତିଭୂମି: ଓଡ଼ିଶାର ଇଣ୍ଡୋର ଷ୍ଟାଡିୟମରୁ ସୃଷ୍ଟି ହେବେ ନୂଆ ପ୍ରତିଭା
କଟକ: ଭାରତର ସ୍ପୋର୍ଟ୍ସ କ୍ୟାପିଟାଲ ହେବା ଦିଗରେ ଓଡ଼ିଶା । କ୍ରୀଡ଼ା ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂରଦର୍ଶୀ ପଦକ୍ଷେପ ଆଜି ଓଡ଼ିଶାକୁ ଦେଶ ତଥା ବିଶ୍ବ ଦରବାରରେ ଦେଇଛି ସ୍ବତନ୍ତ୍ର ପରିଚିୟ । କ୍ରୀଡାର ବିକାଶ ପାଇଁ ମୁଖ୍ୟମନ୍ତ୍ରୀ ସାରା ରାଜ୍ଯରେ ୫୦ରୁ ଅଧିକ ଇଣ୍ଡୋର ଷ୍ଟାଡିୟମର ଉଦଘାଟନ କରିଛନ୍ତି । ଏହାରି ଭିତରେ ଖେଳାଳିଙ୍କ କୋଳାହଳରେ ଫାଟି ଉଠୁଛି ଇଣ୍ଡୋର ହଲ । କଟକ ସିଡିଏ ସେକ୍ଟର-୬ରେ ହୋଇଥିବା ଟେବୁଲ ଟେନିସ ହଲରେ ଏବେ ଶତାଧିକ କୁନିକୁନି ପିଲା ଅଭ୍ୟାସ କରୁଥିବା ବେଳେ ସେମାନଙ୍କୁ ଉତ୍ସାହିତ କରିଛନ୍ତି କୋଚ, କ୍ରୀଡା ସଂଗଠକ ଓ ପ୍ରଶାସନିକ ଅଧିକାରୀ ।
ଇଣ୍ଡୋର ଷ୍ଟାଡିୟମରୁ ଅଭ୍ୟାସ କରି ସୃଷ୍ଟି ହେବେ ନୂଆ ପ୍ରତିଭା । ବିଶ୍ବରେ କ୍ରୀଡ଼ାର ନୂଆ ଡେଷ୍ଟିନସନ ହେବ ଓଡ଼ିଶା । ସାରା ରାଜ୍ଯରେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ୫୦ରୁ ଅଧିକ ବହୁମୁଖୀ ଇଣ୍ଡୋର ଷ୍ଟାଡିୟମ ଉଦଘାନ କରିବା ପରେ ଏବେ ଖେଳାଳିଙ୍କ ମଧ୍ଯରେ ଉତ୍ସାହ । ଉଦଘାଟନର ଦିନ କେଇଟା ପରେ ଏସବୁ ହଲ ଏବେ ଖେଳାଳିଙ୍କ ପ୍ରକୃଷ୍ଟ ଭିତ୍ତିଭୂମୀ ପାଲଟିଛି । କଟକ ସିଡିଏ ସେକ୍ଟର-୬ରେ ଟେବୁଲ ଟେନିସ ଇଣ୍ଡୋର ଷ୍ଟାଡିୟମର ଶୁଭାରମ୍ଭ ପରେ ଶତାଧିକ କୁନି କୁନି ତଥା ଯୁବ ଖେଳାଳି ଆସି ପ୍ରତିଦିନ ଅଭ୍ୟାସ କରିବା ସହ କୋଚଙ୍କ ଠାରୁ ଶିଖୁଛନ୍ତି କ୍ରୀଡ଼ା କୌଶଳ । ରାଜ୍ଯ ଟେବୁଲ ଟେନିସ ସଂଘ ସଭାପତି ସଂଜୟ ସିଂ ନିଜେ ଇଣ୍ଡୋର ହଲକୁ ଯାଇ ଖେଳାଳିଙ୍କୁ ଉତ୍ସାହିତ କରୁଛନ୍ତି ।
ଚଳିତବର୍ଷ ଜାତୀୟ କ୍ୟାଡେଟ୍ ଓ ସବ ଜୁନିୟର ଟେବୁଲ ଟେନିସ ଚାମ୍ପିଅନସିପରେ ଓଡିଶାର ଖେଳାଳି ବ୍ରୋଞ୍ଜ ପଦକ ଜିତିବାର ଗୌରବ ଅର୍ଜନ କରିଥିଲେ । ଟେବୁଲ ଟେନିସ ଇତିହାସରେ ଓଡିଶାର କୌଣସି ଟିମ ପ୍ରଥମ ଥର ଲାଗି ଜାତୀୟ ସ୍ତରରେ ପଦକ ହାତେଇବାରୁ ସକ୍ଷମ ହୋଇଛି । ଟେବୁଲ ଟେନିସ ସଂଘ ସଭାପତି ଟିମକୁ ସମ୍ବର୍ଦ୍ଧିତ କରି ରାଜ୍ୟ ସରକାର ଦେଇଥିବା ଆର୍ଥିକ ପୁରସ୍କାର ପ୍ରଦାନ କରିଛନ୍ତି ।