ଥିରୁଅନନ୍ତପୁରମ: ଯୌତୁକ ଚାପରେ ଆତ୍ମହତ୍ୟା କରିଦେଲେ ଡାକ୍ତରୀ ଛାତ୍ରୀ । ପୁଅ ଘର ଦାବି କରୁଥିଲେ BMW କାର୍ । କେରଳରେ ଘଟିଛି ଏହି ଘଟଣା । ୨୬ ବର୍ଷୀୟ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ମୃତ୍ୟୁ ନେଇ ରାଜ୍ୟର ସ୍ବାସ୍ଥ୍ୟମନ୍ତ୍ରୀ ବୀଣା ଜର୍ଜ ତଦନ୍ତ ପାଇଁ ମହିଳା ଏବଂ ଶିଶୁ ବିଭାଗକୁ ନିର୍ଦ୍ଦେଶ ଦେଇଛନ୍ତି ।
ଗତ ମଙ୍ଗଳବାର ଛାତ୍ରୀ ଶାହାନାଙ୍କ ମୃତଦେହ ଥରୁଅନନ୍ତପୁରମ ସ୍ଥିତ ମେଡିକାଲ କଲେଜ ପାଖରେ ଥିବା ଏକ ଭଡ଼ା ଘରୁ ଉଦ୍ଧାର କରାଯାଇଛି । ତାଙ୍କର ହେବାକୁ ଥିବା ଶ୍ବଶୂର ଘର ଲୋକେ ବହୁ ଅଧିକା ଯୌତୁକ ଦାବି କରୁଥିଲେ । ଛାତ୍ରୀଙ୍କ ଘର ଲୋକ ଏତେ ଦେଇ ପାରିବେ ନାହିଁ କହିବାକୁ ବାହାଘର ଭାଙ୍ଗି ଯାଇଥିଲା । ଏହା ପରେ ଶାହାନା ଆତ୍ମହତ୍ୟା କରିଥିବା ପରିବାର ଲୋକେ କହିଛନ୍ତି ।
ସୂଚନା ଅନୁସାରେ, ଛାତ୍ରୀଜଣଙ୍କ ସେହି ଅନୁଷ୍ଠାନର ଜଣେ ପିଜି ଛାତ୍ରଙ୍କୁ ଭଲ ପାଉ ଥିଲେ । ବାହାଘର ମଧ୍ୟ ଠିକ୍ ହୋଇଥିଲା । କିନ୍ତୁ ପୁଅ ଘର ଲୋକେ ଅଧିକ ଯୌତୁକ ଦାବି କରୁଥିଲେ । ସୁନା, ଜମି ସହ BMW କାର ଏବଂ ଅନ୍ୟାନ୍ୟ ସାମଗ୍ରୀ ମାଗୁଥିଲେ । ହେଲେ ତାଙ୍କ ପୁରୁଷ ବନ୍ଧୁ ଯୌତୁକ ନଦେଲେ ବିବାହ କରିବେ ନାହିଁ ବୋଲି ସିଧା ସିଧା ମନା କରିଦେଇଥିଲେ ।
ଶାହାନାଙ୍କ ବାପାଙ୍କର ଦେହାନ୍ତ ହୋଇଯାଇଛି । ତାଙ୍କ ମାଆ ଆଉ ଶାହାନା ଦୁହେଁ ରୁହନ୍ତି । ତେବେ ଶାହାନାଙ୍କ ଆତ୍ମହତ୍ୟା ପରେ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ତାଙ୍କ ମାଆ ।
