ନନ୍ଦିଘୋଷ ବ୍ୟୁରୋ: ଚାଲିଛି ଆଇପିଏଲ । ବିଶ୍ବର ସବୁଠାରୁ ଧନୀ କ୍ରିକେଟ ଲିଗ ଖେଳିବା ପାଇଁ ଭାରତୀୟ ଏବଂ ବିଦେଶୀ ଖେଳାଳିଙ୍କ ମଧ୍ୟରେ ଦେଖିବାକୁ ମିଳିଥାଏ ଆଗ୍ରହ । ତେବେ ମ୍ୟାଚ ବେଶ ରୋମାଞ୍ଚକ ହେଉଥିବାବେଳେ ବହୁ ଯୁବ ଏବଂ ଅଭିଜ୍ଞ ଖେଳାଳିମାନେ ଖେଳୁଛନ୍ତି । ତେବେ ଚଳିତ ସିଜିନ ବହୁ ଖେଳାଳିଙ୍କ ପାଇଁ ଶେଷ ଟୁର୍ଣ୍ଣାମେଣ୍ଟ ହୋଇପାରେ । ଆଇପିଏଳର ସବୁଠାରୁ ସଫଳ ଅଧିନାୟକଭାବେ ଜଣାଶୁଣା ମହେନ୍ଦ୍ର ସିଂ ଧୋନୀଙ୍କ ଏହା ଶେଷ ଆଇପିଏଲ ସିଜିନ ହୋଇପାରେ । ଗତବର୍ଷ ସେ ଅବସର ନେବେ ବୋଲି ଚର୍ଚ୍ଚା ହେଉଥିଲା । ମାତ୍ର ସେ ଅନ୍ତିମ ମ୍ୟାଚ ପର୍ଯ୍ୟନ୍ତ ଖେଳିଥିବାବେଳେ ଚେନ୍ନାଇ ଚାମ୍ପିୟନ ହୋଇଥିଲା । ମାତ୍ର ଏଥରକ ସେ ଟୁର୍ଣ୍ଣାମେଣ୍ଟ ଆରମ୍ଭରୁ ଅଧିନାୟକ ପଦ ଛାଡ଼ିଥିବାବେଳେ ଗାଏକ୍ବାଡ ଅଧିନାୟକ ହୋଇଛନ୍ତି । ଏଣୁ ସେ ଅବସର ନେଇପାରନ୍ତି ବୋଲି କୁହାଯାଉଛି । ସେପଟେ ଅନ୍ୟମାନଙ୍କ ମଧ୍ୟରେ ଫାଫ ଡୁପ୍ଲେସି, ଦିନେଶ କାର୍ତ୍ତିକ, ଅମିତ ମିଶ୍ରା ଏବଂ ଶିଖର ଧାଓ୍ବନଙ୍କ ଏହା ଶେଷ ସିଜିନ ହୋଇପାରେ । ବୟସ ଦୃଷ୍ଟିରୁ ଦେଖିଲେ ଏମାନେ ଅବସର ନେଇପାରନ୍ତି ବୋଲି କୁହାଯାଇପାରେ । ତେବେ ଡୁପ୍ଲେସି ଦୀର୍ଘଦିନ ହେବ ଆନ୍ତର୍ଜରତୀୟ ଦଳରୁ ଅବସର ନେଇସାରିଲେଣି । ମାତ୍ର ଉଦଘାଟନୀ ମ୍ୟାଚରେ ସେ ଯେଭଳି ପ୍ରଦର୍ଶନ କଲେ ଆଜି ମଧ୍ୟ ଯୁବ ଖେଳାଳିଙ୍କ ଭଳି ଜଣାପଡ଼ୁଛନ୍ତି ।
ରେକର୍ଡ କହୁଛି ଏଥର ବିଜେଡିର ରେକର୍ଡ ବିଜୟ
ଭୁବନେଶ୍ବର: ୨୦୨୪ରେ ସାଧାରଣ ନିର୍ବାଚନରେ ତିନି ଚତୁଥାଂଶରୁ ଅଧିକ ଆସନରେ ବିଜୟୀ ହେବ ବିଜୁ ଜନତା ଦଳ । ନୂତନ ଓ ସଶକ୍ତ ଓଡ଼ିଶା ଗଠନ ଲକ୍ଷ୍ୟରେ ବିଜେଡି କାମ ଆରମ୍ଭ କରିଛି । ମହାପ୍ରଭୁ ଜଗନ୍ନାଥଙ୍କ ଆର୍ଶୀବାଦ ଓ ଓଡ଼ିଶାବାସୀଙ୍କ ଭଲପାଇବା ଦଳକୁ ବଡ଼ ସଫଳତା ଦେବ ବୋଲି ବିଜେଡି ସାଂଗଠନିକ ସମ୍ପାଦକ ଏକ୍ସରେ କହିବା ପରେ ଜୋସରେ ବିଜେଡି ନେତା ଓ କର୍ମୀ । ପଂଚାୟତ ଓ ପୌର ନିର୍ବାଚନ ପରି ୨୪ରେ ଓଡ଼ିଶାବାସୀ ବିଜେଡିକୁ ଏକ ପାଖିଆ ବିଜୟୀ କରିବେ ବୋଲି ବିଜେଡି ବିଧାୟକ ଦମ୍ଭୋକ୍ତି ପ୍ରକାଶ କରିଛନ୍ । ଯାହାକୁ ନେଇ ରାଜ୍ୟ ରାଜନୀତି ହଲଚଲ ହୋଇଛି ।
ନିର୍ବାଚନ ତାରିଖ ଘୋଷଣା ପରେ ବଢୁଛି ବିଜେଡ଼ି ଶକ୍ତି । ଉଭୟ ବିଧାନସଭା ଓ ଲୋକସଭା ଆସନରେ ଦଳ ରେକର୍ଡ଼ ସଂଖ୍ୟକ ଆସନରେ ବିଜୟୀ ହେବାନେଇ ବିଜେଡ଼ି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ସୋସିଆଲ ମିଡ଼ିଆ ଏକ୍ସରେ ଦମ୍ଭୋକ୍ତି ପ୍ରକାଶ କରିବା ପରେ ଉଷ୍ମ ହୋଇଛି ରାଜ୍ୟ ରାଜନୀତି । ବିଜେଡ଼ି ୧୪୭ ବିଧାନସଭା ଓ ୨୧ ଲୋକସଭା ନିର୍ବାଚନ ମଣ୍ଡଳୀରେ ପ୍ରତିଦ୍ବନ୍ଦିତା କରି ଓଡ଼ିଶାବାସୀଙ୍କ ସମର୍ଥନରେ ୨୦୨୪ରେ ତିନି ଚତୁଥାଂଶରୁ ଅଧିକ ଆସନରେ ବିଜୟୀ ହେବାନେଇ ଦୋହରାଇଛି ଦଳ । ସାଢେ ଚାରିକୋଟି ଓଡ଼ିଆଙ୍କୁ ନିଜର ପରିବାର ଭାବେ ଗ୍ରହଣ କରି ମୁଖ୍ୟମନ୍ତ୍ରୀ ଯେଉଁସବୁ ଯୋଜନା କରିଛନ୍ତି ତାହା ଦଳକୁ ବଡ଼ ବିଜୟ ଭେଟିଦେବ ବୋଲି ବିଧାୟକମାନେ କହିଛନ୍ତି । ଏଥର ବିଜେଡି ଏକାକୀ ନିର୍ବାଚନ ଲଢି ୧୨୮ ବିଧାନସଭା ଓ ୧୮ ଲୋକସଭା ଆସନ ଦଖଲ କରିବ ବୋଲି ନେତାଏ ଦମ୍ଭୋକ୍ତି ପ୍ରକାଶ କରିଛନ୍ତି ।
ଶଙ୍ଖ ଭବନରେ ଅନୁଷ୍ଠିତ ମିଶ୍ରଣ ପର୍ବରେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ କହିଛନ୍ତି, ଓଡ଼ିଶାରେ ବିଜେଡି ଏକମାତ୍ର ଦଳ ଯିଏ ଓଡ଼ିଶାର ସ୍ବାର୍ଥ ଓ ଓଡ଼ିଶାର ପ୍ରଗତିକୁ ପ୍ରାଥମିକତା ଦେଇଛି । ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁନ୍ଦୁଲି କହିଛନ୍ତି, ୨୦୨୪ ସାଧାରଣ ନିର୍ବାଚନରେ ପଂଚାୟତ ଓ ପୌର ନିର୍ବାଚନ ଫଳାଫଳ ପରି ଏକପାଖିଆ ବିଜେଡିକୁ ବିଜୟୀ କରିବା ପାଇଁ ଓଡ଼ିଶାବାସୀ ମନ୍ତସ୍ଥ କରିଛନ୍ତି । ୨୦୧୯ରେ ୪୪.୭୧ ଭୋଟ ସହ ୧୧୨ ସିଟ୍ ପାଇଥିଲା ବିଜେଡି । ୨୦୧୯ପରେ ହୋଇଥିବା ୮ଟି ଉପନିର୍ବାଚନରେ କେବଳ ଧାମନଗରକୁ ଛାଡି ଅନ୍ୟ ୭ଟିରେ ଦଳ ବିଜୟୀ ହୋଇଛି। ଏପରିକି ବିଜେପି ଜିତିଥିବା ବାଲେଶ୍ୱର ସଦର ଆସନକୁ ଉପନିର୍ବାଚନରେ ନିଜ ଖାତାକୁ ଆଣିପାରିଥିଲା ବିଜୁ ଜନତା ଦଳ । ରାଜ୍ୟରେ ପଞ୍ଚାୟତସ୍ତରରେ ଉପନିର୍ବାଚନରେ ବି ବିଜେଡି ସମର୍ଥିତ ପ୍ରାର୍ଥୀ ବିଜୟୀ ହୋଇଛନ୍ତି । ରାଜ୍ୟର ଏହି ରାଜନୈତିକ ଅଙ୍କ କହୁଛି ୨୪ରେ ବିଜେଡିର ବୃହତ ବିଜୟ ସୁନିଶ୍ଚିତ ।
୨୦୨୪ ନିର୍ବାଚନରେ ବିଜେଡି ପୁଣି କ୍ଷମତା ଦଖଲ କରିବା ସହ ନବୀନ ଷଷ୍ଠଥର ମୁଖ୍ୟମନ୍ତ୍ରୀ ହୋଇ ଦେଶର ରାଜନୀତିରେ ରେକର୍ଡ଼ କରିବେ ବୋଲି ବିଭିନ୍ନ ସର୍ଭେ ରିପୋର୍ଟରେ ପ୍ରକାଶ ପାଇଛି । ପଞ୍ଚାୟତ ନିର୍ବାଚନ କହିଛି, ପୈାର ନିର୍ବାଚନ ସଂକେତ ଦେଇଛି ଓଡିଶାରେ ବିଜୁ ଜନତା ଦଳ ଅର୍ଥାତ୍ ବିଜେଡି ପ୍ରତି ଲୋକଙ୍କର ଅହେତୁକ ଆଶୀର୍ବାଦ ରହିଛି । ନଜର ପକାନ୍ତୁ ଓଡ଼ିଶାବାସୀଙ୍କ ରାୟ ଉପରେ । ତଥ୍ୟ କହୁଛି ୨୦୨୨ ପଂଚାୟତ ନିର୍ବାଚନରେ ବିଜେଡି ୫୨ ପ୍ରତିଶତରୁ ଅଧିକ ଭୋଟ ସାଙ୍ଗକୁ ୩୦ରୁ ୩୦ ଜିଲ୍ଲା ପରିଷଦ ଗଠନ କରିଛି । ୮୫୩ ଜିଲ୍ଲା ପରିଷଦରୁ ବିଜୁ ଜନତା ଦଳ ଏକାକି ୭୬୬ ଆସନରେ ବିଜୟୀ ହୋଇଥିଲା। ସେହି ଅନୁପାତରେ ବ୍ଲକ ଅଧ୍ୟକ୍ଷ ଓ ସରପଞ୍ଚ ପଦବୀରେ ବି ବିଜେଡି ସମର୍ଥିତ ପ୍ରାର୍ଥୀ ବିଜୟୀ ହୋଇଛନ୍ତି ।
ଗତ ପଞ୍ଚାୟତ ନିର୍ବାଚନରେ ବିଜୁ ଜନତା ଦଳ ୧ କୋଟି ୧୦ ଲକ୍ଷ ୮୯ ହଜାର ୭୧୨ ଖଣ୍ଡ ଭୋଟ୍ ପାଇଥିଲା । ଯାହାକି ୨୦୧୯ ସାଧାରଣ ନିର୍ବାଚନରେ ମିଳିଥିବା ୧ କୋଟି ୪ ଲକ୍ଷ ୭୫ ହଜାର ୬୯୭ ଖଣ୍ଡ ଭୋଟଠାରୁ ପ୍ରାୟ ୬ଲକ୍ଷ ଅଧିକ। ଅର୍ଥାତ ବିଜେଡିର ଲୋକପ୍ରିୟତା ଦୃତ ହାରରେ ବୃଦ୍ଧି ପାଉଛି । ପୈାରାଞ୍ଚଳରେ ୮୦ ପ୍ରତିଶତ ଆସନ ଜିତିଥିଲା ବିଜେଡି । ଏପରିକି ପଞ୍ଚାୟତ, ପୈାର ନିର୍ବାଚନ ପରେ ରାଜ୍ୟରେ ଆସିଥିବା ଅଦ୍ଭୁତପୂର୍ବ ରୂପାନ୍ତରଣ ଦଳକୁ ଆହୁରି ଅଧିକ ଲୋକପ୍ରିୟ କରିଛି । ଏଣୁ ୨୦୨୪ରେ ଆହୁରି ଅଧିକ ଜନସମର୍ଥନ ସହ ବଡ ବ୍ୟବଧାନରେ ବିଜୟ ନେଇ ବିଜେଡିର ପଲ୍ଲା ଏକଦମ ଭାରି ରହିଛି। ୨୦୨୪ ବିଜୟ ପଥ ପୂରା ପରିସ୍କାର ରହିଛି । ଏଭଳି ସ୍ଥିତିରେ ବିଜେଡିକୁ ଷଷ୍ଠ ଥର ସରକାର ଗଠନ ପାଇଁ ବିଜେପିର କୈାଣସି ସହାୟତା ଆବଶ୍ୟକ ନାହିଁ । ଅର୍ଥାତ ରାଜ୍ୟରେ ସରକାର ଗଠନ ପାଇଁ ବିଜେଡି ମେଣ୍ଟର ଆବଶ୍ୟକତା କରୁନି ବୋଲି ଦଳ କହିଛି ।
କେନ୍ଦ୍ର ସରକାରଙ୍କ ଉପରେ ବର୍ଷିଲେ ତାରା
ନନ୍ଦିଘୋଷ ବ୍ୟୁରୋ: ଆକ୍ରୋଶମୂଳକ ଭାବେ ବିରୋଧୀ ଦଳମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି କେନ୍ଦ୍ର ସରକାର। କଂଗ୍ରେସର ବ୍ୟାଙ୍କ ଆକାଉଣ୍ଟ ଅଚଳ କରୁଛନ୍ତି ତ ବିରୋଧୀ ମୁଖ୍ୟମନ୍ତ୍ରୀମାନଙ୍କୁ ଇଡି ଭୟ ଦେଖାଇ ଗିରଫ କରୁଛନ୍ତି । ଗଣତନ୍ତ୍ରକୁ ହତ୍ୟା କରୁଛନ୍ତି କେନ୍ଦ୍ର ସରକାର । କିନ୍ତୁ ଏହାକୁ କଂଗ୍ରେସ ଡରେ ନାହିଁ । ଲୋକେ ବୁଝିଲେଣି, ଠିକ ସମୟରେ ଉଚିତ ଜବାବ ଦେବେ ବୋଲି କହିଛନ୍ତି ଜୟପୁର ବିଧାୟକ ତାରା ପ୍ରସାଦ ବାହିନୀପତି । ଧାନର ସର୍ବନିମ୍ନ ସାହାୟକ ମୂଲ୍ୟ ଦେଲେନାହିଁ କାହିଁକି କେନ୍ଦ୍ର ସରକାର ? ପୂର୍ବ ନିର୍ବାଚନବେଳେ ଦେଇଥିବା ବିଭିନ୍ନ ପ୍ରତିଶ୍ରୁତି କେବେ ପୂରଣ ହେବ ବୋଲି ପ୍ରଶ୍ନ କରିଛନ୍ତି । ଆସନ୍ତା ନିର୍ବାଚନରେ କଂଗ୍ରେସ ଏହାକୁ ପ୍ରସଙ୍ଗ କରି ମଇଦାନକୁ ଓହ୍ଲାଇବ ବୋଲି କହିଛନ୍ତି ତାରା ।
ଚିନ୍ତା ବଢ଼ାଇଲା ଲାନସେଟ ଜର୍ଣ୍ଣାଲରେ ପ୍ରକାଶିତ ରିପୋର୍ଟ, ୧୯୫୦ରୁ ଦେଶରେ ହ୍ରାସ ପାଉଛି ପ୍ରଜନନ ହାର
ନନ୍ଦିଘୋଷ ବ୍ୟୁରୋ: ୧୯୫୦ରୁ ଦେଶରେ ହ୍ରାସ ପାଉଛି ପ୍ରଜନନ ହାର। ଲାନସେଟ ଜର୍ଣ୍ଣାଲରେ ପ୍ରକାଶିତ ଏହି ରିପୋର୍ଟ ବଢ଼ାଇଛି ଚିନ୍ତା। ୧୯୫୦ରେ ଭାରତରେ ପ୍ରଜନନ ହାର ୬.୨ ରହିଥିବାବେଳେ ୨୦୨୧ରେ ଏହା ୨ରୁ କମ ରହିଛି। ୧୯୫୦ରେ ଜଣେ ମହିଳା ହାରାହାରି ୬ ସନ୍ତାନଙ୍କୁ ଜନ୍ମ ଦେଉଥିବାବେଳେ ୨୦୨୧ରେ ଜଣେ ମହିଳା ହାରାହାରି ୨ରୁ କମ ସନ୍ତାନଙ୍କୁ ଜନ୍ମ ଦେଇଛନ୍ତି। ୨୦୫୦ ଓ ୨୧୦୦ ମସିହା ସୁଦ୍ଧା ଏହା ଯଥାକ୍ରମେ ୧.୨୯ ଓ ୧.୦୪କୁ ହ୍ରାସ ପାଇବ ବୋଲି ରିପୋର୍ଟରେ ଉଲ୍ଲେଖ କରାଯାଇଛି। ସେହିପରି ୧୯୫୦ରେ ବିଶ୍ବରେ ପ୍ରଜନନ ହାର ୪.୮ ଥିବାବେଳେ ୨୦୨୧ରେ ଏହା ୨.୨କୁ ହ୍ରାସ ପାଇଥିଲା। ୨୦୫୦ ଓ ୨୧୦୦ ସୁଦ୍ଧା ଏହି ହାର ଯଥାକ୍ରମେ ୧.୮ ଏବଂ ୧.୬କୁ ହ୍ରାସ ପାଇବ ବୋଲି ଅନୁମାନ କରାଯାଉଛି। ୧୯୫୦ରେ ଭାରତରେ ୧.୬ କୋଟି ଶିଶୁ ଜନ୍ମଗ୍ରହଣ କରିଥିବାବେଳେ ୨୦୨୧ରେ ଏହା ୨.୨ କୋଟି ରହିଥିଲା। ୨୦୫୦ରେ ଏହା ୧.୩ କୋଟିକୁ ହ୍ରାସ ପାଇବ ବୋଲି ଆଶଙ୍କା କରାଯାଉଛି। ସେହିପରି ୧୯୫୦ରେ ବିଶ୍ବରେ ୯.୩ କୋଟି ଶିଶୁ ଜନ୍ମଗ୍ରହଣ କରିଥିବାବେଳେ ୨୦୨୧ରେ ନବଜାତକଙ୍କ ସଂଖ୍ୟା ୧୨.୯ କୋଟି ରହିଥିଲା।
ଏକବିଂଶ ଶତାବ୍ଦୀରେ ବିଶ୍ବରେ ପ୍ରଜନନ ହାର ସମସ୍ୟା ସୃଷ୍ଟି କରିଥିବାବେଳେ ସ୍ବଳ୍ପ ଆୟକାରୀ ରାଷ୍ଟ୍ରରେ ଏହା ସନ୍ତୋଷଜନକ ରହିଥିବା କୁହାଯାଇଛି। ଏଭଳି ରାଷ୍ଟ୍ର ମଧ୍ୟରେ ଅଧିକାଂଶ ଆଫ୍ରିକା ମହାଦେଶରେ ରହିଛି। ତେବେ ଗରିବ ତଥା ସ୍ବଳ୍ପ ଆୟକାରୀ ରାଷ୍ଟ୍ରରେ ପ୍ରଜନନ ହାର ବୃଦ୍ଧି ପାଉଥିବାରୁ ବିଶ୍ବରେ ଏହା ସନ୍ତୁଳନ ବଜାୟ ରଖିପାରୁଛି। ଏଥିଯୋଗୁଁ ୨୦୨୧ରୁ ୨୧୦୦ ମସିହା ମଧ୍ୟରେ ବିଶ୍ବରେ ପ୍ରଜନନ ହାର ୧୮ରୁ ୩୫ ପ୍ରତିଶତକୁ ବୃଦ୍ଧି ପାଇବ ବୋଲି ରିପୋର୍ଟରେ ଦର୍ଶାଯାଇଛି। ଜଳବାୟୁ ପରିବର୍ତ୍ତନ ବର୍ତ୍ତମାନ ବୈଶ୍ବିକ ସମସ୍ୟାଭାବେ ଉଭା ହୋଇଥିବାବେଳେ ଆଫ୍ରିକାର ଏହି ରାଷ୍ଟ୍ରଗୁଡିକରେ ଆଗାମୀ ଦିନରେ ବନ୍ୟା, ମରୁଡି ଏବଂ ଗ୍ରୀଷ୍ମପ୍ରବାହ ଭଳି ପ୍ରାକୃତିକ ବିପର୍ଯ୍ୟୟ ଦେଖିବାକୁ ମିଳିବ। ଫଳରେ ସେଠାରେ ଖାଦ୍ୟ, ପାନୀୟଜଳ ସଂକ୍ରାନ୍ତ ସମସ୍ୟା ଉତ୍କଟ ରୂପ ଧାରଣ କରିବ। ବର୍ତ୍ତମାନ ବିଶ୍ବ ଲୋକସଂଖ୍ୟାର ଅଧିକାଂଶ ବୟସ୍କ ହୋଇପଡିଥିବାରୁ ପ୍ରଜନନ ହାର ହ୍ରାସ ପାଇଲେ ଏହାର ପ୍ରତିକୂଳ ପ୍ରଭାବ ଅର୍ଥନୀତି, ଖାଦ୍ୟ ନିରାପତ୍ତା, ସ୍ବାସ୍ଥ୍ୟ ଏବଂ ପରିବେଶ ଉପରେ ପଡିବ ବୋଲି ରିପୋର୍ଟରେ ଚେତାବନୀ ଦିଆଯାଇଛି। ଅପରପକ୍ଷରେ ବିଶ୍ବ ଜନସଂଖ୍ୟା ହ୍ରାସ ପାଇଲେ ପରିବେଶ ଅଧିକ ସୁରକ୍ଷିତ ରହିବ ବୋଲି କୁହାଯାଇଛି।
ଭଗଲପୁର ଆସନରୁ ନିର୍ବାଚନ ଲଢ଼ିପାରନ୍ତି ନେହା ଶର୍ମା
ନନ୍ଦିଘୋଷ ବ୍ୟୁରୋ: ଲୋକସଭା ନିର୍ବାଚନରେ ପ୍ରାର୍ଥୀ ହୋଇପାରନ୍ତି ବଲିଉଡ ଅଭିନେତ୍ରୀ ତଥା ମଡେଲ ନେହା ଶର୍ମା । ସେ ଭଗବଲପୁର ଆସନରୁ କଂଗ୍ରେସ ଟିକେଟରେ ନିର୍ବାଚନ ଲଢ଼ିପାରନ୍ତି । ଏନେଇ ତାଙ୍କ ପିତା ଏକ ଖୁଲାସା କରିଥିବା ଦେଖିବାକୁ ମିଳିଛି । ଭଗଲପୁର ବିଧାୟତ ଅଜିତ ଶର୍ମା କହିଛନ୍ତି କି, ଯଦି ଗଠବନ୍ଧନ ଟିକେଟ ବଣ୍ଟାରେ ଏହି ଆସନରେ ସେମାନଙ୍କୁ ମିଳେ ତାହେଲେ ନେହା ପ୍ରାର୍ଥୀ ହୋଇପାରନ୍ତି । ତେବେ କଂଗ୍ରେସକୁ ଏହି ଆସନ ମିଳିବା ଦରକାର । କାହିଁକି ନାଁ ଏହା ହେଉଛି କଂଗ୍ରେସର ଗଡ଼ । ଏଣୁ ଦଳ ଯଦି ମୋ ମତ ନିଅନ୍ତି ତାହେଲେ ଏହି ଆସନରୁ ମୁଁ କିମ୍ବା ମୋ ଝିଅ ନିର୍ବାଚନ ଲଢ଼ିବୁ ବୋଲି କହିବୁ । ଏହାସହ ସେ ବିଜେପିକୁ ଟାର୍ଗେଟ କରି କହିଛନ୍ତି କି, ଏଥରକ ବିହାରରେ ଏନଡିକୁ ସଫା କରିଦେବୁ । ସେପଟେ ବିହାରରେ ଏନଡିଏର ଆସନ ବୁଝାମଣା ସରିଛି । ବିଜେପି ୧୭ ଆସନରେ ନିର୍ବାଚନ ଲଢ଼ିବାକୁ ଥିବାବେଳେ ଜେଡିୟୁ ୧୬ ଲୋକସଭା ଆସନରେ ନିର୍ବାଚନ ଲଢ଼ିବ । ଏହାସହ ସହଯୋଗି ଦଳମାନଙ୍କୁ ମଧ୍ୟ କିଛି ଆସନ ଦିଆଯାଇଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ଯଦି ନେହା ଶର୍ମା ନିର୍ବାଚନ ଲଢ଼ନ୍ତି ତାହେଲେ ତାଙ୍କୁ ଜନତା କିଭଳି ସମର୍ଥନ ଦେଉଛନ୍ତି ତାହା ଦେଖିବାକୁ ବାକି ରହିଲା ।
ଗାନ୍ଧିଜୀଙ୍କୁ ମନେ ପକାଇଲେ ଓଡ଼ିଶାବାସୀ
ନନ୍ଦିଘୋଷ ବ୍ୟୁରୋ: ଜାତିର ପିତା ମହାତ୍ମା ଗାନ୍ଧି ପ୍ରଥମଥର ଲାଗି ୧୯୨୧ ରେ ଓଡିଶା ଆସିଥିଲେ । ଏହି ଅବସରରେ ମାର୍ଚ୍ଚ ୨୩ ତାରିଖରେ ଗାନ୍ଧିଜୀ କଟକ ପୁରୀଘାଟ କାଠଯୋଡ଼ି ବାଲିରେ ଏକ ବିଶାଳ ସଭାରେ ଯୋଗ ଦେଇଥିଲେ। ପରେ ଓଡିଶାର ବିଭିନ୍ନ ଅଂଚଳ ବୁଲି ଇଂରେଜ ମାନଙ୍କ ବିରୁଦ୍ଧରେ ସ୍ବାଧୀନତା ଆନ୍ଦୋଳନକୁ ଶାଣିତ କରିଥିଲେ । ଗାନ୍ଧିଜୀଙ୍କ ସେହି ପୁରୀଘାଟ ସଭାକୁ ସ୍ମରଣୀୟ କରିବା ପାଇଁ ବେଲଭ୍ୟୁ ଗାନ୍ଧି ସ୍ମାରକୀ ପାର୍କରେ ପ୍ରଶାସନ ଓ ଗାନ୍ଧିବାଦୀ ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯାଇଛି।
ଗାନ୍ଧିଜୀଙ୍କୁ ମନେ ପକାଇଲେ ଓଡ଼ିଶାବାସୀ । କଟକରେ ଗାନ୍ଧି ସ୍ମୃତିରେ କାର୍ଯ୍ୟକ୍ରମ । ସ୍ମୃତିଚାରଣ କଲେ ଗାନ୍ଧିବାଦୀ । ଭାରତୀୟ ସ୍ବାଧୀନତା ସଂଗ୍ରାମର କର୍ଣ୍ଣଧାର ଜାତିର ପିତା ମହାତ୍ମା ଗାନ୍ଧି ୧୯୨୧ ମସିହା ମାର୍ଚ୍ଚ ମାସ ୨୩ ତାରିଖରେ ପ୍ରଥମଥର ଲାଗି କଟକ ଆସିଥିଲେ । ଏହି ଅବସରରେ କାଠଯୋଡ଼ିର ନଦୀକୂଳରେ ଏକ ବିରାଟ ସାଧାରଣ ସଭାରେ ଯୋଗ ଦେଇଥିଲେ । ଅସହଯୋଗ ଆନ୍ଦୋଳନ ସମୟରେ ଗାନ୍ଧିଜୀଙ୍କ ଏହି ଗସ୍ତ ଓ ସଭା ସ୍ବାଧୀନତା ଆନ୍ଦୋଳନକୁ ଆହୁରି ଶାଣିତ କରିଥିଲା । ସଭାରେ ୧୦ ହଜାର ଲୋକ ଯୋଗ ଦେଇ ଗାନ୍ଧିଜୀଙ୍କ ଆଦର୍ଶରେ ଅନୁପ୍ରାଣିତ ହୋଇଥିଲେ । ସେହି ସଭାକୁ ୧୦୩ ବର୍ଷ ପୂର୍ତ୍ତି ଅବସରରେ କଟକ ବେଲଭ୍ୟୁରେ ଥିବା ଗାନ୍ଧି ସ୍ମାରକୀ ପାର୍କରେ ଗାନ୍ଧିବାଦୀ ଏକାଠି ହୋଇ ଗାନ୍ଧିଜୀଙ୍କ ସ୍ମୃତିଚାରଣ କରିଛନ୍ତି ।
ବଡକଥା ହେଉଛି ଗାନ୍ଧିଜୀଙ୍କ କଟକ ପୁରୀଘାଟ ସଭା ଓ ଓଡିଶା ଗସ୍ତ ବେଳେ ସେ ଗରିବ ଲୋକମାନଙ୍କ ଖାଦ୍ଯାଭାବକୁ ଅତି ନିକଟରୁ ଦେଖିଥିଲେ । ଏହା ତାଙ୍କୁ ଏତେ ପ୍ରଭାବିତ କରିଥିଲା ଯେ, ଏହା ପରେ ସେ ଆଉ ପୋଷାକ ପିନ୍ଧିଲେ ନାହିଁ । କେବଳ ନିଜର ଧୋତିକୁ ଦୁଇ ଫାଳ କରି ଖଣ୍ଡେ ପିନ୍ଧିଲେ ଓ ଆଉ ଖଣ୍ଡେ କାନ୍ଧରେ ପକାଇଲେ । ଏହାସହ କଟକ ଗସ୍ତ ବେଳେ ତାଙ୍କ ପାଦରେ ଆଘାତ ଲାଗିବାରୁ ଏଠାରେ ତାଙ୍କୁ ଏକ ଆଶ୍ରାବାଡି ମିଳିଥିଲା, ଯାହାକୁ ସେ ସବୁଦିନ ନିଜ ସାଥିରେ ରଖିଥିଲେ । ଗାନ୍ଧିଜୀଙ୍କ ସେହି ଦିନକୁ ସ୍ମରଣପୂର୍ବକ ପୁଷ୍ପମାଲ୍ଯ ଅର୍ପଣ କରାଯାଇ ପାର୍କର ବିକାଶ ପାଇଁ ପ୍ରତିଶ୍ରୁତି ଦିଆଯାଇଛି ।

