ଯାଜପୁର: ଯାଜପୁରରୁ ଧରାପଡ଼ିଲା କାଶ୍ମୀର ଆତଙ୍କବାଦୀ । କାଶ୍ମୀର ଆତଙ୍କବାଦୀ ସୟଦ ଇଶାନ ବୁଖାରୀକୁ ଗିରଫ କଲା ଏସଟିଏଫ୍ । ସ୍ଥାନୀୟ ପୋଲିସ ସହାୟତାରେ ଯାଜପୁର ଧର୍ମଶାଳା ଅଞ୍ଚଳର ନେଉଳପୁରରେ ଚଢ଼ାଉ କରିଥିଲା ଏସଟିଏଫ୍ । ଶୁକ୍ରବାର ନେଉଳପୁରରୁ ଇଶାନ ବୁଖାରୀକୁ ଗିରଫ କରିଛି ଏସଟିଏଫ୍ । ନିଜକୁ ବିଭିନ୍ନ ନାଁରେ ପରିଚୟ ଦେଇ ବୁଲୁଥିଲା ସୟଦ ବୁଖାରୀ । ନିଜକୁ ସେନାର ଜଣେ ଡାକ୍ତର ଓ ପିଏମଓ ଅଧିକାରୀର ପରିଚୟ ଦେଉଥିଲା । ତେବେ ସ୍ଥାନୀୟ ଲୋକଙ୍କ ସନ୍ଦେହ ହେବା ପରେ ପୋଲିସକୁ ସୂଚନା ଦେଇଥିଲେ । STF ତାକୁ ଗିରଫ କରିଥିବାବେଳେ ଅଭିଯୁକ୍ତ ସମ୍ପର୍କରେ ଅନେକ ଗୁରୁତ୍ବପୂର୍ଣ୍ଣ ସୂଚନା ଦେଇଛନ୍ତି । ଧରା ହୋଇଥିବା ଆତଙ୍କବାଦୀ ଇଶାବ ୬ରୁ ୭ ଜଣଙ୍କୁ ବିବାହ କରିଛି । ୟୁପି, ମହାରାଷ୍ଟ୍ର ଓ କାଶ୍ମୀରରେ ସେ ବିବାହ କରିଛି । କେରଳ ଓ ପାକିସ୍ତାନର ଅନେକ ସନ୍ଦିଗ୍ଧ ସଂଗଠନ ସହ ଯୋଗାଯୋଗରେ ଥିଲା । ତା ପାଖରୁ ଅନେକ ଆଇ-କାର୍ଡ, ଏଟିଏମ କାର୍ଡ, ଚେକ୍, ଆଧାର କାର୍ଡ ଏବଂ ଭିଜିଟିଙ୍ଗ କାର୍ଡ ଜବତ । NIA ଅଧିକାରୀଙ୍କ ସହ ଯୋଗାଯୋଗ କରାଯାଇଛି, ତଦନ୍ତ ପରେ ସବୁ ସ୍ପଷ୍ଠ ହେବ । କାଶ୍ମୀରରେ ଠକେଇ ମାମଲାରେ ଅଭିଯୁକ୍ତ ବିରୋଧରେ NBW ଜାରି ହୋଇଛି । ଦଫା ୪୧୯, ୪୨୦, ୪୬୫, ୪୬୭, ୪୬୮, ୪୭୧, ୧୨୦(ଖ)ରେ ମାମଲା ରୁଜୁ । ଅଭିଯୁକ୍ତ ନିକଟରୁ ୪ଟି ମୋବାଇଲ ଜବତ ହୋଇଛି । ISI ସହ ଯୋଗାଯୋଗରେ ଥିଲା, ଟେରର ଲିଙ୍କ୍ ନେଇ ତଦନ୍ତ ଚାଲିଛି ।
ଘୋଡ଼ା ଉପରେ କନିଆଁ, ଭାଇରାଲ ହେଉଛି ଭିଡିଓ
ନୂଆଦିଲ୍ଲୀ: ନିଜର ବିବାହକୁ ସ୍ମରଣ କରିବା କରିବା ସମସ୍ତେ ବିଭିନ୍ନ ପ୍ରକାର ପ୍ରସ୍ତୁତି କରିଥାନ୍ତି । କିଏ ବାଜା, ବାଣ, ରୋଷଣୀ ଧରି ନିଆରା ଉପାୟରେ ଆସିଥାଏ ତ ଆଉ କିଏ ଭଲ ଭୋଜି ଦେଇ ଅତିଥୀଙ୍କ ମନ ମୋହିଥାଏ । ସୋସିଆଲ ମିଡିଆରେ ଫଟୋ ପୋଷ୍ଟ କରିବା ପାଇଁ ବର, କନିଆଁ ନିଆରା ଉପାୟମାନ ଆପଣାଇଥାନ୍ତି । ଏବେ ସୋସିଆଲ ମିଡିଆରେ ଏକ ଭିଡିଓ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ କନିଆଁ ଜଣକ ଘୋଡ଼ା ଉପରେ ବସି ଏଣ୍ଟ୍ରି କରିଛନ୍ତି । ବେଶ ଖୁସିର ସହ ସେ ନଜର ଆସିଥିବାବେଳେ ଘୋଡ଼ାକୁ ମଧ୍ୟ ସୁନ୍ଦରଭାବେ ସଜା ଯାଇଛି । କନିଆଁଙ୍କୁ ଘୋଡ଼ା ଉପରେ ତାଙ୍କ ସ୍ବଜନମାନେ ଚଢ଼ାଉଥିବାବେଳେ ସେ ଖୁସି ନଜର ଆସିଛନ୍ତି । ଘୋଡ଼ା ଉପରେ ବସି କନିଆଁ ଜଣକ ନାଚୁଥିବା ଦେଖୁବାକୁ ମିଳିଛି । ’ଶୁଭ ବିବାହ’ ନାମକ ଜଣେ ୟୁଜର୍ସ ଏହି ଭିଡିଓଟି ପୋଷ୍ଟ କରିଥିବାବେଳେ ୟୁଜର୍ସମାନେ ଏହାକୁ ଲାଇକ, ସେୟାର କରୁଛନ୍ତି । ଏହାସହ ୟୁଜର୍ସମାନେ ମଜାଳିଆ ମଜାଳିଆ କମେଣ୍ଟମାନ ଦେଉଛନ୍ତି ।
https://www.instagram.com/p/CpfOlv8gwwK/?utm_source=ig_embed&utm_campaign=embed_video_watch_again
ଖୁବଶୀଘ୍ର ସରିବ କଟକ ସହରରେ ହେଉଥିବା ବକ୍ସ ଡ୍ରେନ୍
କଟକ: ଖୁବଶୀଘ୍ର ସରିବ କଟକ ସହରରେ ହେଉଥିବା ବକ୍ସ ଡ୍ରେନ୍ । ପଟ୍ଟାପୋଲରୁ ମାତୃଭବନ ପର୍ଯ୍ୟନ୍ତ ଥିବା ପୁରୁଣା ତଥା ବିରାଟ ନାଳ ଉପରେ ଚାଲିଥିବା ସରକାରଙ୍କ ସ୍ବପ୍ନର ବକ୍ସଡ୍ରେନ ଓ ସୁନ୍ଦର ରାସ୍ତାର କାମ ମାର୍ଚ୍ଚ ୩୧ ତାରିଖରେ ସରିବ । କଟକ ମେୟର ସୁବାସ ସିଂ ଓ କମିଶନର ନିଖିଲ ପବନ କଲ୍ୟାଣ ବକ୍ସଡ୍ରେନ ଉପରେ ହେଉଥିବା ନୂଆ ବ୍ରିଜ କାମର ସମୀକ୍ଷା କରିବା ପରେ ଏନେଇ ସୂଚନା ଦେଇଛନ୍ତି । ଦଶ ବର୍ଷ ହେବ ଜାଇକା ବକ୍ସଡ୍ରେନ କାମ କରୁଥିଲା । ତେବେ କାମର ଶୀଥିଳତାକୁ ଦେଖି ରାଜ୍ୟ ସରକାର ମାତ୍ର ବର୍ଷେ ତଳେ ୪୫୦ କୋଟି ଟଙ୍କାରେ ବକ୍ସଡ୍ରେନ ଓ ନୂଆ ରାସ୍ତାର କାମ ପାଇଁ ଅର୍ଥ ମଞ୍ଜୁର କରିଥିଲେ ।
ଏହା ପରେ ଦ୍ରୁତ ଗତିରେ କାମ ଚାଲି ତିନି କିଲୋମିଟର ଅର୍ଥାତ ଛତ୍ରବଜାର ପର୍ଯ୍ୟନ୍ତ କାମ ପ୍ରାୟ ସରି ଆସିଲାଣି । ବଜ୍ରକବାଟି ଓ ବକ୍ସିବଜାର ପାଖ ବ୍ରିଜ ଜାନୁଆରୀ ୧୫ ସୁଦ୍ଧା ସରିବ । ଏହା ପରେ ମାର୍ଚ୍ଚ ଶେଷ ସୁଦ୍ଧା କାମ ସରି ବକ୍ସଡ୍ରେନ ଉପରେ ଲୋକଙ୍କ ଯାତାୟତ ଆରମ୍ଭ ହେବ ବୋଲି କହିଛନ୍ତି କଟକ ମେୟର । ବକ୍ସଡ୍ରେନ କାମ ସରିଲେ ପଟ୍ଟାପୋଲ ଠାରୁ ବର୍ଷା ଜଳ ଓ ନର୍ଦ୍ଦମାର ପାଣି ସହଜରେ ନିଷ୍କାସିତ ହେବ । ଏହାସହ ପଟ୍ଟାପୋଲରୁ ବକ୍ସିବଜାର ଗମ୍ମାଢିଆ ପର୍ଯ୍ୟନ୍ତ ଦୁଇ ଥାକିଆ ଓ ସେଠାରୁ ଛତ୍ରବଜାର ପର୍ଯ୍ୟନ୍ତ ତିନିଥାକିଆ ରାସ୍ତା ଦେଇ ଛୋଟ ବଡ ସବୁ ଗାଡି ସହଜରେ ଯାତାୟତ କରିପାରିବ । ରାସ୍ତାର ଫୁଟପାଥ୍ ଓ ସୌନ୍ଦର୍ଯ୍ୟକରଣ କାମ ମଧ୍ୟ ଶୀଘ୍ର କରାଯିବ ବୋଲି ସିଏମସି କମିଶନର କହିଛନ୍ତି ।
ସଂସଦରେ ସୁରକ୍ଷା ତ୍ରୁଟି ପ୍ରସଙ୍ଗରେ ଖୋଲୁଛି ଗୁମର
ନୂଆଦିଲ୍ଲୀ: ସଂସଦରେ ସୁରକ୍ଷା ତ୍ରୁଟି ପ୍ରସଙ୍ଗରେ ଖୋଲୁଛି ଗୁମର। ଘଟଣାର ମାଷ୍ଟରମାଇଣ୍ଡ ଲଳିତ ଝାକୁ ରିମାଣ୍ଡରେ ନେଇ ପଚରାଉଚରା କରୁଛି ଦିଲ୍ଲୀ ପୋଲିସର ସ୍ପେଶାଲ ସେଲ। ପଚରାଉଚରାବେ ଅନେକ ସତ ଉଗାଳିଛି ଲଳିତ । ସରକାରଙ୍କୁ ନିଜର ଦାବି ପୂରଣ କରିବାକୁ ବାଧ୍ୟ କରିବାକୁ ଚାହୁଁଥିଲା ଲଳିତ। ସେଥିଲାଗି ଦେଶରେ ଅରାଜକତା ସୃଷ୍ଟି କରିବାକୁ ରଚିଥିଲା ଏହି ହଂଗାମା ଷଡ଼ଯନ୍ତ୍ର। ପାର୍ଲାମେଣ୍ଟରେ ଅଶାନ୍ତ ସୃଷ୍ଟି କରିବାକୁ ଲଳିତ ଅନ୍ୟ ଅଭିଯୁକ୍ତଙ୍କ ସହ ଯୋଜନା କରିଥିବା ଦିଲ୍ଲୀର ପଟିଆଲ ହାଉସ କୋର୍ଟରେ ସୂଚନା ଦେଇଛି ଦିଲ୍ଲୀ ପୋଲିସ। ଏକାଧିକ ଥର ଅନ୍ୟ ଅଭିଯୁକ୍ତଙ୍କୁ ଲଳିତ ସାକ୍ଷାତ କରିଥିଲା ।
ପ୍ରଥମେ ବାହାରୁ ବିରୋଧ କରିବାକୁ ଯୋଜନା କରିଥିଲେ । ତେବେ ପୁଣିଥରେ ସାହସ ବାନ୍ଧି ସଂସଦ ଭିତରେ ଅନୁପ୍ରବେଶ କରିବାକୁ ନିଷ୍ପତ୍ତି ନେଇଥିଲେ । ଅଭିଯୁକ୍ତ ସୂଚନା ସଂଗ୍ରହ କରିବାକୁ ଗୁଗଲର ସହାୟତା ନେଇଥିଲେ । ସଂସଦ ସୁରକ୍ଷା ନେଇ ପୁରୁଣା ଭିଡିଓ ସବୁକୁ ଯାଞ୍ଚ କରିଥିଲେ। ସୁରକ୍ଷା ବ୍ୟବସ୍ଥା ବିଷୟରେ ଅଧିକ ଜାଣିବା ସହ ଏହାପରେ ସମସ୍ତେ କଲର ସ୍କୋକ୍ ସ୍ପ୍ରେ କରିବାକୁ ସ୍ଥିର କରିଥିଲେ। ପରସ୍ପରକୁ ଯୋଗାଯୋଗ କରିବାକୁ ଏକ ଆପ୍ ର ବ୍ୟବହାର କରୁଥିଲେ। ଘଟଣା ଘଟାଇବା ସହ ତୁରନ୍ତ ଅଭିଯୁକ୍ତ ଲଳିତ ଝା ଅନ୍ୟ ରାଜ୍ୟକୁ ଫେରାର ହୋଇଯାଇଥିଲା।
ପ୍ରମାଣ ନଷ୍ଟ ପାଇଁ ସେ ତାର ଫୋନ ଫିଙ୍ଗିଦେବା ସହ ଅନ୍ୟ ୪ ସାଥୀଙ୍କ ଫୋନକୁ ଜଳାଇ ଦେଇଥିବା କହିଛି। ରାଜସ୍ଥାନର ନାଗୋରକୁ ଯାଇ ସମ୍ପର୍କୀୟ କୈଳାସ ଓ ମହେଶକୁ ସାକ୍ଷାତ କରିଥିଲା ଲଳିତ। ଉଭୟ ଲଳିତର ସେଠାରେ ରହିବା ବନ୍ଦୋବସ୍ତ କରିଥିଲେ। ବେକାରୀ ସମସ୍ୟାକୁ ନେଇ ଲଳିତ ଏହି ହଙ୍ଗାମା କରିଥିବା କାରଣ ଦର୍ଶାଉଛି । ଲଳିତ ସମେତ ଅନ୍ୟ ୪ ପାର୍ଲାମେଣ୍ଟ ପରିସରରେ ଆତ୍ମାହୁତି କରିବାକୁ ମଧ୍ୟ ଯୋଜନା କରିଥିବା ଜଣାପଡିଛି । ତେବେ ଶେଷ ମୁହୂର୍ତ୍ତରେ ଏହି ପ୍ଲାନକୁ ରୋକି କଲର ସ୍ମୋକ ସ୍ପ୍ରେ କରିବାକୁ ସ୍ଥିର କରିଥିଲେ। ତେବେ ପୋଲିସ ଏହା ପଛରେ ଷଡ଼ଯନ୍ତ୍ର ଥିବା ସନ୍ଦେହ କରୁଛି। ଯୋତା ମଧ୍ୟରେ ସ୍କୋକ କାନିଷ୍ଟର ନେବାକୁ ଯୋତା ପ୍ରସ୍ତୁତକାରୀକୁ ଖୋଜୁଛି ପୋଲିସ ।
ବର୍ତ୍ତମାନ ସୁଦ୍ଧା ଏହି ମାମଲାରେ ୫ ଜଣଙ୍କୁ ଗିରଫ କରି ତନାଘନା କରୁଛି ଦିଲ୍ଲୀ ପୋଲିସର ସ୍ପେଶାଲ ସେଲ । ସାଗର ଶର୍ମା ଓ ମନୋରଂଜନ, ନୀଲମ ଓ ଅମୋଲ ସିନ୍ଦେଙ୍କୁ ରିମାଣ୍ଡରେ ନେଇ ଜେରା କରୁଛି ପୋଲିସ । ଲଳିତର ଅନ୍ୟ କୌ୍ଣସି ଦେଶ କିମ୍ବା ଆତଙ୍କୀ ସଂଗଠନ ସହ ଲିଙ୍କ ଅଛି ନା ନାହିଁ ଏହାର ତନାଘନା କରିବ ପୋଲିସ ।ରାଜସ୍ଥାନରେ ସେ ୨ ଦିନ ରହିଥିଲା। ତାପରେ ଦିଲ୍ଲୀ ଫେରି ଆସି ଆତ୍ମସମର୍ପଣ କରିଥିଲା। ରାଜସ୍ଥାନ ଯାଇ କଣ ସବୁ କରିଥିଲା ଏଥିଲାଗ ତାଙ୍କୁ ପୁଣିଥରେ ରାଜସ୍ଥାନ ନେଇପାରେ । ତେବେ କେମିତି ଘଟାଇଥିଲା ଏ କାଣ୍ଡ ଏହାକୁ ନେଇ ସିନ୍ ରିକ୍ରିଏଟ କରିପାରେ ଦିଲ୍ଲୀ ପୋଲିସ । ଏଥିଲାଗି ଦିଲ୍ଲୀ ପୋଲିସକୁ ସଂସଦର ଅନୁମତି ନେବାକୁ ପଡିପାରେ।
MI ଉପରେ ଖପ୍ପା ଫ୍ୟାନ୍ସ, ଜାଳିଦେଲେ ଜର୍ସି ଇନଷ୍ଟାରେ କମିଗଲେ ଫଲୋଅର୍ସ
ନୂଆଦିଲ୍ଲୀ: ନିଜ ଟିମ୍ର ସବୁଠାରୁ ସଫଳ ଅଧିନାୟକଙ୍କୁ ହଟାଇ ଦେଇଛି ମୁମ୍ବାଇ ଇଣ୍ଡିଆନ୍ସ ଟିମ୍ । ଫ୍ରାଞ୍ଚାଇଜ ଗୁଜୁରାଟ ଟାଇଟନ୍ସର ହାର୍ଦ୍ଦିକ ପାଣ୍ଡ୍ୟାଙ୍କୁ ନିଜ ନୂଆ ଅଧିନାୟକ ନିଯୁକ୍ତ କରିଛନ୍ତି । ଏହାପରେ ସୋସିଆଲ ମିଡିଆରେ ଦେଖିବାକୁ ମିଳିଛି ଏହାର ସିଧାସଳଖ ପ୍ରଭାବ । ସୋସିଆଲ ମିଡିଆ Xରେ ଲଗାତାର ଟ୍ରେଣ୍ଡ କରୁଛି #ShameOnMI । ହାର୍ଦ୍ଦିକ ୨୦୨୧ ପର୍ଯ୍ୟନ୍ତ ମୁମ୍ବାଇର ଅଂଶୀଦାର ଥିଲେ । ରୋହିତ ଶର୍ମା ୨୦୧୩ରୁ ମୁମ୍ବାଇ ଇଣ୍ଡିଆନ୍ସର ଅଧିନାୟକ ରହିଆସିଛନ୍ତି । ତାଙ୍କ ଅଧିନାୟକତ୍ବରେ ଟିମ ୫ ଥର ଚାମ୍ପିଅନ ହୋଇଛନ୍ତି ।
ରୋହିତ ଶର୍ମା ଅଧିନାୟକ ପଦରୁ ବିଦା ହେବା କାରଣରୁ ଫ୍ୟନ୍ସଙ୍କ ଆକ୍ରୋଶ ସୋସିଆଲ ମିଡିଆରେ ଦେଖିବାକୁ ମିଳୁଛି । ଜଣେ ପ୍ରଶଂସକ ମୁମ୍ବାଇ ଇଣ୍ଡିଆନ୍ସର ଜର୍ସିରେ ନିଆଁ ଲଗାଇ ଭିଡିଓ ସେୟାର କରିଛନ୍ତି । ସେହିପରି ଆଉ ଜଣେ ମୁମ୍ବାଇର କ୍ୟାପ୍କୁ ଗୋଡରେ ଦଳିଦେବା ପରେ ଏଥିରେ ନିଆଁ ଲଗାଇ ଦେଉଛି । ଏହା ସହ ମୁମ୍ବାଇର ପତାକାକୁ ବି ନିଆଁ ଲଗାଇ ଦେଇଛନ୍ତି ଫ୍ୟାନ୍ସ ।
ମୁମ୍ବାଇ ଇଣ୍ଡିଆନ୍ସର ସୋସିଆଲ ମିଡିଆ ଆକାଉଣ୍ଟରେ ବି ରୋହିତ ଶର୍ମାଙ୍କ ପ୍ରଭାବ ଦେଖିବାକୁ ମିଳିଛି । ହାର୍ଦ୍ଦିକଙ୍କୁ ଅଧିନାୟକ କରିବା ପରେ ଏମଆଇର ଇନଷ୍ଟାଗ୍ରାମରେ ୧୩.୨ ମିଲିୟନ ଫଲୋଅର୍ସ ଥିଲେ । ଏହାର ୨୪ ଘଣ୍ଟା ନ ପୁରୁଣୁ ମୁମ୍ବାଇର ଫଲୋଅର୍ସ ୧୨.୮ ମିଲିଅନ ଛୁଇଁଥିଲେ । Xରେ ବି ୮.୬ ମିଲିଅନରୁ ମୁମ୍ବାଇର ଫଲୋଅର୍ସ ୮.୨ ମିଲିଅନରେ ପହଞ୍ଚିଥିଲେ । ଫ୍ୟାନ୍ସଙ୍କ ଆକ୍ରୋଶ ଦେଖି ଏବେବି ଫଲୋଅର୍ସ କମିବା ନେଇ ଆଶଙ୍କା କରାଯାଉଛି ।
ଟ୍ରକ ଧକ୍କାରେ ଶ୍ବଶୁର-ଜ୍ବାଇଁ ମୃତ
ଉମରକୋଟ: ଟ୍ରକ୍ ଚକ ତଳେ ପଡ଼ି ଶ୍ବଶୁର- ଜ୍ୱାଇଁ ମୃତ । ନବରଙ୍ଗପୁର ଜିଲ୍ଲା ରାଇଘର ଡିଏନକେ ଡାକଘର ନିକଟରେ ଏହି ଦୁର୍ଘଟଣା ଘଟିଛି । ଟ୍ରକଟି ଜୟପୁର ଯାଉଥିଲା । ଶ୍ବଶୁର – ଜ୍ବାଇଁ ଯାଉଥିବା ବାଇକଟି ଓଭରଟେକ୍ କରିବା ବେଳେ ଟ୍ରକ୍ ଚକ ତଳେ ପଡ଼ି ଯାଇଥିଲେ । ଜ୍ୱାଇଁଙ୍କ ଅଣ୍ଟା ଓ ଶ୍ବଶୁରଙ୍କ ମୁଣ୍ଡ ଉପରେ ଟ୍ରକ୍ ଚକ୍ ଚଢ଼ି ଯାଇଥିଲା । ଘଟଣାସ୍ଥଳରେ ଜ୍ବାଇଁଙ୍କ ମୃତ୍ୟୁ ହୋଇଥିବା ବେଳେ ମେଡିକାଲରେ ଶ୍ବଶୁର ପ୍ରାଣ ହରାଇଛନ୍ତି । ଜ୍ବାଇଁ ଲଖମନ ଜାନିଙ୍କ ଘର ମୁଣ୍ଡିବେଡ଼ା ପଞ୍ଚାୟତର ଭିମାଟିକିରା ଓ ଶ୍ବଶୁର ବଳି ଜାନିଙ୍କ ଘର ଗଞ୍ଜପାର ପଞ୍ଚାୟତ ମାରାଙ୍ଗପଲ୍ଲୀରେ ବୋଲି ଜଣା ପଡ଼ିଛି । ଜଣେ ସମ୍ପର୍କୀୟଙ୍କ ମୃତ୍ୟୁ ଖବର ପାଇ ତାଙ୍କ ଘରକୁ ଯିବା ସମୟରେ ଶ୍ବଶୁର -ଜ୍ବାଇଁ ପ୍ରାଣ ହରାଇଛନ୍ତି ।
5T ଅଧ୍ୟକ୍ଷଙ୍କ ଗଞ୍ଜାମ ଗସ୍ତ ପୂର୍ବରୁ ବିଭିନ୍ନ ମନ୍ଦିରରେ ଉନ୍ନୟନ କାମ ଓ ପ୍ରସ୍ତୁତି ସମୀକ୍ଷା
ବ୍ରହ୍ମପୁର: 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଦୁଇଦିନିଆ ଗଞ୍ଜାମ ଜିଲ୍ଲା ପାଇଁ ପ୍ରସ୍ତୁତି । ବିଭିନ୍ନ ମନ୍ଦିରରେ ଉନ୍ନୟନ କାମ ଓ ପ୍ରସ୍ତୁତି ସମୀକ୍ଷା କରିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ ସାଂସଦ ମାନସ ରଞ୍ଜନ ମଙ୍ଗରାଜ। ଛତ୍ରପୁର ନିର୍ବାଚନମଣ୍ଡଳୀର ସୁନ୍ଦରପୁରସ୍ଥିତ ସୁନ୍ଦେରଶ୍ବର ଶୈବପୀଠରେ ପ୍ରଥମେ ସମୀକ୍ଷା କରିଥିଲେ । ଉପସ୍ଥିତ ଥିଲେ ଛତ୍ରପୁର ବିଧାୟକ ସୁବାସ ବେହରା । 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଆଜିଠାରୁ ଦୁଇଦିନିଆ ଗଞ୍ଜାମ ଗସ୍ତ କାଳରେ ଖଲ୍ଲିକୋଟ ନିର୍ବାଚନମଣ୍ଡଳୀର ତୁମ୍ବେଶ୍ବର ମନ୍ଦିର, ପୋଲସରା ନିର୍ବାଚନମଣ୍ଡଳୀର ଶରଣ ଶ୍ରୀକ୍ଷେତ୍ର ମାରଦା ମନ୍ଦିର, କବିସୂର୍ଯ୍ୟନଗର ଆଠଗଡ଼ର ଜଗନ୍ନାଥ ମନ୍ଦିର, ଆସିକାର ଖମ୍ବେଶ୍ବରୀ ମନ୍ଦିରକୁ ଯାଇ ଉନ୍ନୟନ କାମର ସମୀକ୍ଷା କରିବା କାର୍ଯ୍ୟକ୍ରମ ରହିଛି । କାର୍ତ୍ତିକ ପାଣ୍ଡିଆନଙ୍କ ଗସ୍ତ ପୂର୍ବରୁ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ ସାଂସଦ ମାନସ ରଞ୍ଜନ ମଙ୍ଗରାଜ ପ୍ରସ୍ତୁତି ଓ ଉନ୍ନୟନ କାମର ସମୀକ୍ଷା କରିଛନ୍ତି।
ଥରୁଛି ଓଡ଼ିଶା, ଜାଣନ୍ତୁ କେଉଁଠି କେତେ ରହିଛି ତାପମାତ୍ରା
ଭୁବନେଶ୍ବର: ଶୀତରେ ଥରୁଛି ସାରା ଓଡ଼ିଶା । ହାଡଭଙ୍ଗା ଶୀତରେ ଅସ୍ତବ୍ୟସ୍ତ ହେଲାଣି ଲୋକଙ୍କ ଜନଜୀବନ । ସେହିପରି ଟୁଇନ୍ ସିଟିରେ ଶୀତର ପ୍ରଭାବ ଜାରି ରହିଛି । ଆଜି ଟୁଇନ୍ ସିଟିରେ ପାରଦ ୧୩ ଡିଗ୍ରୀ ଛୁଇଁଛି । ରାଜଧାନୀ ଭୁବନେଶ୍ବରରେ ପାରଦ ୧୩.୨ ଡିଗ୍ରୀ ଥିବା ବେଳେ, କଟକରେ ୧୩.୫ ରେକର୍ଡ କରାଯାଇଛି । ସୁନ୍ଦରଗଡ କିରେଇରେ ସବୁଠୁ ତାପମାତ୍ରା କମ ରହିଛି । ସେଠାରେ ପାରଦ ୮.୩ ଡିଗ୍ରୀ ରେର୍କଡ କରାଯାଇଛି । ସେହିପରି ଜି. ଉଦୟଗିରିରେ ୮.୪ ଡିଗ୍ରୀ, ଫୁଲବାଣୀରେ ୮.୫ ଡିଗ୍ରୀ ରେକର୍ଡ କରାଯାଇଛି । ସେହିପରି ଦାରିଙ୍ଗିବାଡିରେ ତାପମାତ୍ରା ୧୦ ଡିଗ୍ରୀ ରେକର୍ଡ ହୋଇଛି । ସେପଟେ ହାଡ଼ଭଙ୍ଗା ଶୀତ ପାଇଁ ସବୁଠି ଜନ ଜୀବନ ଅସ୍ତବ୍ୟବସ୍ତ ହୋଇ ପଡ଼ିଥିବା ଦେଖିବାକୁ ମିଳିଛି । ଲୋକେ ଶୀତ ଦାଞରୁ ରକ୍ଷା ପାଇବା ପାଇଁ ନିଆଁ ପିଆଁଉଛନ୍ତି ।
ଆରବ ସାଗରରେ ଦମ୍ ଦେଖାଇଲା ଭାରତୀୟ ନୌସେନା
ନନ୍ଦିଘୋଷ ବ୍ୟୁରୋ: ଆରବ ସାଗରରେ ମାଲଟାର ଏକ ଜାହାଜକୁ ଅପହରଣ ଉଦ୍ୟମ । ଭାରତୀୟ ନୌସେନାର ଉଦ୍ୟମ କ୍ରମେ ବିଫଳ ହୋଇଛି ଉଦ୍ୟମ । ଆରବ ସାଗରରେ ମାଲଟାର ଏକ ପଣ୍ୟବାହୀ ଜାହାଜ ଏମଭି ରୁଏନ ଯାତ୍ରା କରୁଥିବାବେଳେ ତାହାକୁ ଅପହରଣ ଲାଗି ଉଦ୍ୟମ କରାଯାଇଥିଲା । ତେବେ ଜରୁରୀ ସୂଚନା ମିଳିବା ପରେ ଆଣ୍ଟିପାଇରାସି ପାଟ୍ରୋଲ ବାହିନୀ ନିକଟରେ ରହିଥିବା ଯୁଦ୍ଧଜାହାଜକୁ ଗଲ୍ଫ ଆଡେନକୁ ପଠାଇଥିଲା ଭାରତୀୟ ନୌସେନା । ପଣ୍ଯବାହୀ ଜାହାଜରେ ୧୮ ଯାତ୍ରୀ ଥିବାବେଳେ ତା ଭିତରକୁ ୬ ଜଣ ଅଜଣା ଯାତ୍ରୀ ପ୍ରବେଶ କରିଥିବା ସୂଚନା ମିଳିଥିଲା । ଜରୁରୀ ସୂଚନା ପରେ ଭାରତୀୟ ନୌସେନାର ପ୍ରମୁଖ ହସ୍ତକ୍ଷେପ ଫଳରେ ଜାହାଜ ଅପହରଣ ଉଦ୍ୟମ ବ୍ୟର୍ଥ ହୋଇଥିଲା । ବର୍ତ୍ତମାନ ସେହି ଜାହାଜ ସୋମାଲିଆ ଅଭିମୁଖେ ଯାତ୍ରା କରୁଥିବା ସୂଚନା ମିଳିଛି । ଭାରତୀୟ ନୌସେନା ଦମ ଦେଖାଇଥିବାବେଳେ ଏହା ଦେଶ ପାଇଁ ଗର୍ବ ଏବଂ ଗୌରବର ବିଷୟ ।
ସାରା ଦେଶରେ ପାଳନ ହେଉଛି ବିଜୟ ଦିବସ
ନୂଆଦିଲ୍ଲୀ: ସାରା ଦେଶରେ ବିଜୟ ଦିବସ । ୧୯୭୧ ଯୁଦ୍ଧରେ ପାକିସ୍ତାନ ବିରୋଧରେ ଭାରତର ବିଜୟକୁ ସ୍ମରଣ କରିବା ଲାଗି ଏହି ସମାରୋହ ପାଳନ କରାଯାଇଛି । ୧୯୭୧ର ଲୋମଟାଙ୍କୁରା ଯୁଦ୍ଧରେ ସୃଷ୍ଟି ହୋଇଥିଲା ବାଂଲାଦେଶ । ପ୍ରତିବର୍ଷ ଡିସେମ୍ବର ୧୬ରେ ଏହି ଦିବସ ପାଳିତ ହେଉଛି । ଯୁଦ୍ଧରେ ସହିଦ ଯବାନଙ୍କ ସ୍ମୃତି ଉଦ୍ଦେଶ୍ୟରେ ଏହି ଦିବସ ପାଳିତ ହେଉଛି । ୧୯୭୧ ଡିସେମ୍ବର ୧୬ରେ ପୂର୍ବ ପାକିସ୍ତାନରୁ ବାଂଲାଦେଶର ସୃଷ୍ଟି ହୋଇଥିଲା । ପାକିସ୍ତାନର ଲଜ୍ଜାଜନକ ପରାଜୟ ସହ ଭାରତ ଚାଖିଥିଲା ବିଜୟର ସ୍ବାଦ । ଯୁଦ୍ଧରେ ୯୩ ହଜାର ସୈନ୍ୟଙ୍କ ସହ ପାକିସ୍ତାନ ସଶସ୍ତ୍ର ବାହିନୀର ମୁଖ୍ୟ ଜେନେରାଲ ଅମିର ଅବଦୁଲ୍ଲା ଖାଁ ନିଆଜି ଭାରତୀୟ ସେନା ନିକଟରେ ଆତ୍ମସମର୍ପଣ କରିଥିଲେ ।
ବାଂଲାଦେଶରେ ବି ଡିସେମ୍ବର ୧୬କୁ ବିଜୟ ଦିବସ ଭାବେ ପାଳନ କରାଯାଉଛି । ପୂର୍ବ ପାକିସ୍ତାନ ବିରୋଧରେ ପାକିସ୍ତାନର ଜେନେରାଲ ୟାହିଆ ଖାଁଙ୍କ ନେତୃତ୍ବରେ ପାକିସ୍ତାନ ସେନା ଗଣହତ୍ୟା ଜାରିରଖିଥିଲା । ତେବେ ଭାରତର ହସ୍ତକ୍ଷେପ ପରେ ଏହି ଗଣହତ୍ୟା ବନ୍ଦ ହେବା ସହ ଯୁଦ୍ଧର ଅବସାନ ହୋଇଥିଲା । ନୂଆଦିଲ୍ଲୀସ୍ଥିତ ଜାତୀୟ ଯୁଦ୍ଧ ସ୍ମାରକୀରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ସିଡିଏସ ଜେନେରାଲ ଅନିଲ ଚୌହ୍ବାନ, ସେନାମୁଖ୍ୟ ଜେନେରାଲ ମନୋଜ ପାଣ୍ଡେ, ବାୟୁସେନା ଭାଇସ ଚିଫ ଏୟାର ମାର୍ଶାଲ ଅମରପ୍ରୀତ ସିଂ, ନୌସେନା ମୁ୍ଖ୍ୟ ଆଡମିରାଲ ଆର. ହରିକୁମାର ପ୍ରମୁଖ ଉପସ୍ଥିତ ରହି ସହିଦଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ।