ହାଇଦ୍ରାବାଦ: ଆନ୍ଧ୍ରପ୍ରଦେଶ ପୂର୍ବତନ ମୁଖ୍ୟମନ୍ତ୍ରୀ ତଥା ଟିଡିପି ମୁଖ୍ୟମନ୍ତ୍ର ଏନ୍.ଚନ୍ଦ୍ରବାବୁ ନାଇଡୁଙ୍କୁ ଜାମିନ । ମଧ୍ୟବର୍ତ୍ତିକାଳୀନ ଜାମିନ ପ୍ରଦାନ କଲେ ଆନ୍ଧ୍ରପ୍ରଦେଶ ହାଇକୋର୍ଟ । ୪ ସପ୍ତାହ ଜାମିନ ମଂଜୁର କରିଛନ୍ତି ହାଇକୋର୍ଟ । ଦକ୍ଷତା ବିଭାଗ ବିଭାଗରେ କୋଟି କୋଟି ଟଙ୍କାର ଅର୍ଥ ହେରଫେର ମାମଲାରେ ଗତ ସେପ୍ଟେମ୍ବର ୯ ତାରିଖରେ ଗିରଫ କରିଥିଲା ସିଆଇଡି। ଚନ୍ଦ୍ରବାବୁଙ୍କ ଗିରଫ ପରେ ଆନ୍ଧ୍ରରେ ରାଜନୈତିକ ଅସ୍ଥିରତା ସୃଷ୍ଟି ହୋଇଥିଲା । ଗିରଫଙ୍କୁ ରାଜନୈତିକ ପ୍ରଣୋଦିତ ବୋଲି କହି ଆସୁଛନ୍ତି ତେଲୁଗୁ ଦେଶ ପାର୍ଟିର ଅନେକ ନେତା । ଚନ୍ଦ୍ରବାବୁଙ୍କ ଗିରଫଦାରି ନେଇ ବିଭିନ୍ନ ଟିଡିପି କର୍ମୀ ବିକ୍ଷୋଭ ସହ ଆନ୍ଦୋଳନ ମଧ୍ୟ କରିଥିଲେ । ମିଛ ମାମଲାରେ ପୂର୍ବତନ ମୁଖ୍ୟମନ୍ତ୍ରୀଙ୍କୁ ଗିରଫ କରାଯାଇଥିବା ଅଭିଯୋଗ କରି ଆସୁଛନ୍ତି ଟିଡିପି।
ଶିମିଳିପାଳ ପାଦଦେଶରୁ ପୁଣି ୭୧ଟି ବେଆଇନ ଦେଶୀ ବନ୍ଧୁକ ଜବତ
ବାରିପଦା: ଶିମିଳିପାଳ ପାଦଦେଶରୁ ପୁଣି ୭୧ଟି ବେଆଇନ ଦେଶୀ ବନ୍ଧୁକ ଜବତ । ଶିମିଳିପାଳରେ ପୋଲିସ ପକ୍ଷରୁ ଦ୍ବିତୀୟ ପର୍ଯ୍ୟାୟ ସର୍ଚ୍ଚ ଅପରେସନ ଜାରିଥିବାବେଳେ ଏହି ବନ୍ଧୁକ ଜବତ ନେଇ ସୂଚନା ଦିଆଯାଇଛି । ଶିକାରୀଙ୍କ ଆକ୍ରମଣରେ ଦୁଇ ବନ କର୍ମଚାରୀ ସହିଦ ହେବା ପରେ ପରେ ଜୁନ ୧୮ ତାରିଖରେ ପୋଲିସ ପକ୍ଷରୁ ଶିମିଳିପାଳକୁ ଶିକାର ଓ ଶିକାରୀମୁକ୍ତ କରିବା ପାଇଁ ୯ଟି ଥାନା ଅଧୀନସ୍ଥ ଜଙ୍ଗଲ ସଂଲଗ୍ନ ଗାଁଗୁଡ଼ିକରେ ଅସ୍ତ୍ରଶସ୍ତ୍ର ତଲାସି ଅଭିଯାନ ଆରମ୍ଭ ହୋଇଥିଲା। ୪ପ୍ଲାଟୁନ ପୋଲିସ ଫୋର୍ସ ସହିତ ଥାନା କର୍ମଚାରୀ ଏଥିରେ ସାମିଲ ଅଛନ୍ତି ।
ଶିମିଳିପାଳ ସଂଲଗ୍ନ ୧୨ଟି ଥାନାରେ ଦେଶୀବନ୍ଧୁକ ସମର୍ପଣ ଅଭିଯାନ ଆରମ୍ଭ କରାଯାଇ ବ୍ୟାପକ ଜନସେଚତନା କାର୍ଯ୍ୟକ୍ରମ ଆୟୋଜନ କରାଯାଇଥିଲା। ପୂର୍ବରୁ ଏ ସମ୍ପର୍କରେ ୪୦ଟି ମାମଲା ରୁଜୁ ହେବା ସହିତ ୧୬୫ଟି ବନ୍ଧୁକ, ଗୁଳି, ଗୋଟିଏ ଦେଶୀ ବନ୍ଧୁକ ତିଆରି କାରଖାନା, ବଜ୍ରକାପ୍ତା ଛାଲ, ନଗଦ ୨ଲକ୍ଷ ୯୫ହଜାର ଟଙ୍କା, ମୋବାଇଲ ଫୋନ, ବନ୍ୟପ୍ରାଣୀ ମୃତଦେହ, ମାଂସ ଆଦି ଜବତ କରାଯିବା ସହିତ ୨୧ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା। ଦ୍ବିତୀୟ ପର୍ଯ୍ୟାୟ ସର୍ଚ୍ଚ ଅପରେସନ ଜାରିଥିବାବେଳେ ୭୧ଟି ବନ୍ଧୁକ ଜବତ କରାଯାଇଛି ।
ସ୍ଥାନାନ୍ତର ହେଲା କଟକର ସର୍ବ ପୁରାତନ ଛତ୍ର ବଜାର ପରିବା ମାର୍କେଟ୍
କଟକ: ଅର୍ବାନ ହାଟ ପରିସରକୁ ସ୍ଥାନାନ୍ତର ହେଲା କଟକର ସର୍ବ ପୂରାତନ ଛତ୍ରବଜାର ପରିବା ମାର୍କେଟ । ଦେଢ଼ ଶହ ବର୍ଷର ଛତ୍ରବଜାର ଆଜିଠୁ ଅର୍ବାନ ହାଟ ପରିସରକୁ ସ୍ଥାନାନ୍ତର ହୋଇଛି । ଏଠାରେ ଆଜିଠାରୁ ଏକ ହଜାରରୁ ଅଧିକ ପରିବା ବ୍ଯବସାୟୀ ଓ ଚାଷୀ ବିଭିନ୍ନ ପିଣ୍ଡିରେ ବସି ବ୍ୟବସାୟ କରିପାରିବେ । ପୂର୍ବରୁ ତାଳଦଣ୍ଡା କେନାଲ କୂଳରେ ପ୍ରାୟ ଦୁଇ କିଲୋମିଟର ରାସ୍ତାକଡେ ବ୍ଯବସାୟୀ ବେପାର କରି ଆସୁଥିଲେ । ଦୈନନ୍ଦିନ କଟକ ଓ ଆଖପାଖ ଅଞ୍ଚଳର ହଜାର ହଜାର ଗ୍ରାହକ ଏଠାରୁ ପରିବା କିଣି ନେଉଥିଲେ । ଲୋକଙ୍କ ସୁବିଧା ପାଇଁ ରାଜ୍ୟ ସରକାର 1.62 ଏକର ଜମିରେ ୩ କୋଟି ୨୨ ଲକ୍ଷ ଟଙ୍କା ବ୍ୟୟରେ ଏହି ଅର୍ବାନ ହାଟ ପ୍ରତିଷ୍ଠା କରିଛନ୍ତି । ୧୮୬୬ ମସିହା ନଅଙ୍କ ଦୁର୍ଭିକ୍ଷ ପରେ ଛତ୍ରବଜାରରେ ପରିବା ବ୍ଯବସାୟ କରି ଆସୁଥିଲେ ବେପାରୀ । କେବଳ କରୋନା ସମୟରେ ପରିସ୍ଥିତିକୁ ଦେଖି କିଛି ମାସ ପାଇଁ ଛତ୍ରବଜାର ପରିବା ମାର୍କେଟକୁ ବିଭିନ୍ନ ସ୍ଥାନକୁ ସ୍ଥାନାନ୍ତର କରାଯାଇଥିଲା ।
ଶପଥ ଗ୍ରହଣ କଲେ ଓଡ଼ିଶାର ନୂଆ ରାଜ୍ୟପାଳ ରଘୁବର ଦାସ
ଭୁବନେଶ୍ବର: ଶପଥ ଗ୍ରହଣ କଲେ ଓଡ଼ିଶାର ନୂଆ ରାଜ୍ୟପାଳ । ରାଜଭବନରେ ଏକ ବର୍ଣ୍ଣାଢ଼୍ୟ ପରିବେଶରେ ଶପଥ ଗ୍ରହଣ କଲେ ନୂଆ ରାଜ୍ୟପାଳ ରଘୁବର ଦାସ । ଓଡ଼ିଶା ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଶପଥ ଗ୍ରହଣ କରାଇଛନ୍ତି । ଏହି ଶପଥ ଗ୍ରହଣରେ ମୁଖ୍ୟମନ୍ତ୍ରୀଙ୍କ ସମେତ ବରିଷ୍ଠ ବ୍ୟକ୍ତିମାନେ ଉପସ୍ଥିତ ରହିଥିଲେ । ଓଡ଼ିଶାର ରାଜ୍ୟପାଳ ଭାବେ ଶପଥ ନେଲେ ରଘୁବର ଦାସ । ଓଡ଼ିଶାର ୨୬ତମ ରାଜ୍ୟପାଳ ଭାବେ ଦାୟିତ୍ବ ନେଇଛନ୍ତି ରଘୁବର ଦାସ । ନୂଆ ରାଜ୍ୟପାଳଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ ବିଦ୍ୟୁତ ରଞ୍ଜନ ଷଡ଼ଙ୍ଗୀ । ରାଜଭବନ ପରିସରରେ ରାଜ୍ୟପାଳଙ୍କୁ ଗାର୍ଡ ଅଫ ଅନର ଦିଆଯାଇଥିଲା । ଶପଥ ଗ୍ରହଣ ସମାରୋହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉପସ୍ଥିତ ଥିଲେ ।
ଶପଥ ଗ୍ରହଣ ପୂର୍ବରୁ ଆଜି ସକାଳେ ଲିଙ୍ଗରାଜଙ୍କୁ ଦର୍ଶନ କରିଥିଲେ ରଘୁବର ଦାସ । ଗତକାଲି ସକାଳେ ରଘୁବର ପ୍ରଥମେ ପୁରୀ ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ । ଗତକାଲି ରଘୁବର ଦାସ ଭୁବନେଶ୍ବର ରାଜଭବନରେ ପହଞ୍ଚିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବାଚସ୍ପତି ପ୍ରମିଳା ମଲ୍ଲିକ ତାଙ୍କୁ ସ୍ବାଗତ କରିଥିଲେ । ରଘୁବର ଦାସ ଥିଲେ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ । ସେ ପାଞ୍ଚ ଥର ଝାଡ଼ଖଣ୍ଡ ବିଧାନସଭାକୁ ନିର୍ବାଚିତ ହୋଇଥିଲେ । ଝାଡ଼ଖଣ୍ଡର ଉପମୁଖ୍ୟମନ୍ତ୍ରୀ ଓ ପରବର୍ତ୍ତୀ ସମୟରେ ମୁଖ୍ୟମନ୍ତ୍ରୀ ଭାବରେ ଅବସ୍ଥାପିତ ହୋଇଥିଲେ । ୧୯୫୫ ମେ ୩ ତାରିଖରେ ଜନ୍ମ ଗ୍ରହଣ କରିଥିବା ରଘୁବର ଭାଲୁବସା ହରିଜନ ହାଇସ୍କୁଲର ମାଟ୍ରିକ ଓ ଜାମସେଦପୁର କୋ-ଅପରେଟିଭ୍ କଲେଜରୁ ସ୍ନାତକ ଶିକ୍ଷା ଶେଷ କରିଥିଲେ । ପରବର୍ତ୍ତୀ ସମୟରେ ସେ ଆଇନରେ ସ୍ନାତକ ଡ଼ିଗ୍ରୀ ହାସଲ କରି ଟାଟା କମ୍ପାନୀରେ ଯୋଗ ଦେଇଥିଲେ ।
୧୯୭୭ରେ ଜନତା ପାର୍ଟିରେ ଯୋଗ ଦେଇଥିଲେ ଓ ପରେ ୧୯୮୦ରେ ବିଜେପିର ପ୍ରତିଷ୍ଠାତା ସଦସ୍ୟ ରହିଥିଲେ । ଜାମସେଦପୁର ପୂର୍ବ ବିଧାନସଭା ଆସନରୁ ବିଧାନସଭାକୁ ୧୯୯୫ରେ ନିର୍ବାଚିତ ହୋଇଥିଲେ । ୨୦୦୪ରେ ଝାଡ଼ଖଣ୍ଡ ରାଜ୍ୟ ବିଜେପିର ସଭାପତି ରୂପେ ଅବସ୍ଥାପିତ ହୋଇଥିଲେ । ୨୦୦୫ରେ ଅର୍ଜୁନ ମୁଣ୍ଡାଙ୍କ ନେତୃତ୍ୱାଧୀନ ଝାଡ଼ଖଣ୍ଡ ବିଜେପି ସରକାରରେ ସେ ସହରାଞ୍ଚଳ ବିକାଶ ମନ୍ତ୍ରୀ ରୂପେ ନିଯୁକ୍ତି ପାଇଥିଲେ । ୨୦୦୯ରେ ସେ ଶିବୁ ସୋରେନଙ୍କ ସରକାରରେ ଉପମୁଖ୍ୟମନ୍ତ୍ରୀ ପଦରେ ଅବସ୍ଥାପିତ ହୋଇଥିଲେ । ୨୦୧୪ରେ ସେ ବିଜେପି ଜାତୀୟ କମିଟିରେ ସ୍ଥାନ ପାଇଥିଲେ ଓ ତାଙ୍କୁ ଦଳର ରାଷ୍ଟ୍ରୀୟ ଉପସଭାପତି ପଦ ମିଳିଥିଲା । ମାତ୍ର ରାଜ୍ୟରେ ସେହିବର୍ଷ ବିଜେପି ସଂଖ୍ୟା ଗରିଷ୍ଠତା ହାସଲ କରିବା ପରେ ଝାଡ଼ଖଣ୍ଡର ପ୍ରଥମ ଅଣ ଆଦିବାସୀ ମୁଖ୍ୟମନ୍ତ୍ରୀ ଭାବରେ ରଘୁବର ଦାସ ଅଧିଷ୍ଠିତ ହୋଇଥିଲେ । ୨୦୧୪ରୁ ୨୦୧୯ ପର୍ଯ୍ୟନ୍ତ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ଥିଲେ ରଘୁବର ଦାସ । ଆଜି ସେ ଓଡ଼ିଶାର ରାଜ୍ୟପାଳ ଭାବେ ଶପଥ ଗ୍ରହଣ କରିଛନ୍ତି ।
ବିୟର ପିଇଲେ, ରାସ୍ତା ଉପରେ ବୋତଲ ଭାଙ୍ଗିଲେ ଯୁବତୀ
ଭୁବନେଶ୍ବର: ବିୟର ପିଇଲେ, ରାସ୍ତା ଉପରେ ବୋତଲ ଭାଙ୍ଗିଲେ । ଯାହାକୁ ପାରିଲେ ଗାଳିଗୁଲଜ କଲେ । ନିଶାରେ ଗାଡି ମୋଟର ମଧ୍ୟ ରୋକିଲେ । ଜଣେ ଯୁବତୀ ମଦ ପିଇ ମାତାଲ ହୋଇ ରାଜରାସ୍ତା ଉପରେ ହଙ୍ଗାମା କରିବାର ଏ ଦୃଶ୍ୟ ହେଉଛି ପଟିଆ ଛକ ନିକଟର । ପଟିଆ ବିଗବଜାର ଛକଠାରୁ କିଛି ଦୂରରେ ଥିବା ଏକ ବିଦେଶୀ ଠିପି ବନ୍ଦ ମଦ ଦୋକାନ ସମ୍ମୁଖରେ ଏଭଳି ଉନ୍ମତ୍ତ କାଣ୍ଡ ଭିଆଇଛନ୍ତି ଜଣେ ଯୁବତୀ । ପ୍ରାୟ ୩ରୁ ୪ ଘଣ୍ଟା ଧରି ସେ ଏଭଳି ନାଟକ କରିଥିଲେ । ବାରମ୍ବାର ସେଠାକୁ ଖବର ପାଇ ପିସିଆର ଆସୁଥିଲେ ସୁଦ୍ଧା ମହିଳା ଷ୍ଟାଫ ନଥିବାରୁ ଫେରିଯାଉଥିବା କଥା ସ୍ଥାନୀୟ ଲୋକେ କହିଛନ୍ତି । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ପୋଲିସ ତଦନ୍ତ ବେଳେ ସେ ଜଣେ ବିବାହିତା ମହିଳା ଓ ତାଙ୍କର ଏକ ଝିଅ ଥିବା କଥା ଜଣାପଡିଛି । ଗୋଟିଏ ବେସରକାରୀ କମ୍ପାନୀରେ ସେ କାମ କରନ୍ତି ବୋଲି କହିଛନ୍ତି ।
ଭୁବନେଶ୍ବର ମହାନଗର ନିଗମ ପକ୍ଷରୁ ଯୋଗ୍ୟ ବସ୍ତି ହିତାଧିକାରୀଙ୍କୁ ଦିଆଯିବ ଭୂମି ଅଧିକାର ପ୍ରମାଣପତ୍ର
ଭୁବନେଶ୍ବର: ଭୁବନେଶ୍ବର ମହାନଗର ନିଗମ ପକ୍ଷରୁ ଆଜି ଯୋଗ୍ୟ ବସ୍ତି ହିତାଧିକାରୀଙ୍କୁ ଦିଆଯିବ ଦ୍ବିତୀୟ ପର୍ଯ୍ୟାୟ ଭୂମି ଅଧିକାର ପ୍ରମାଣ ପତ୍ର। ରାଜ୍ୟ ସରକାରଙ୍କର ସ୍ବତନ୍ତ୍ର କାର୍ଯ୍ୟକ୍ରମ ଜାଗା ମିଶନ ଜରିଆରେ ସମସ୍ତ ଯୋଗ୍ୟ ବସ୍ତି ବାସିନ୍ଦାଙ୍କୁ ଭୂମି ଅଧିକାର ଯୋଗାଇ ଦିଆଯାଉଛି। ମୁଖ୍ୟମନ୍ତ୍ରୀଙ୍କ ଦ୍ବାରା ଅଗଷ୍ଟ ୨୮ ତାରିଖରେ ୫୧ ହଜାର ପରିବାରଙ୍କୁ ଭୂମି ଅଧିକାର ପ୍ରମାଣ ପତ୍ର ପ୍ରଦାନ କରାଯାଇଥିଲା । ପର୍ଯ୍ୟାୟକ୍ରମେ ଅନ୍ୟ ଯୋଗ୍ୟ ହିତାଧିକାରୀଙ୍କୁ ଭୂମି ଅଧିକାର ପ୍ରମାଣ ପ୍ରଦାନ କରାଯିବ । ଭୁବନେଶ୍ବର ମହାନଗର ନିଗମର ୩ଟି ଜୋନ ୫ ହଜାର ୫୪୨ ପରିବାରଙ୍କୁ ଭୂମି ଅଧିକାର ପ୍ରମାଣ ପତ୍ର ବଣ୍ଟନ କରାଯିବ। ଦକ୍ଷିଣ-ପଶ୍ଚିମ ଜୋନ୍ ପାଇଁ ୱାର୍ଡ ନମ୍ବର ୫୭ର ବଡ଼ଗଡ଼ ବ୍ରିଟ୍ କଲୋନୀ, ଦକ୍ଷିଣ-ପୂର୍ବ ଜୋନ୍ ପାଇଁ ୱାର୍ଡ ନମ୍ବର ୪୭ର ୟୁନିଟ୍ ୮ କମ୍ୟୁନିଟି ସେଣ୍ଟର ଓ ଉତ୍ତର ଜୋନ୍ ପାଇଁ ଚନ୍ଦ୍ରଶେଖରପୁର କଲ୍ୟାଣ ମଣ୍ଡପରେ ଏଲ୍ଆରସି ବଣ୍ଟନ କରାଯିବ।
ବିରାଟ କୋହଲିଙ୍କ ଜନ୍ମଦିନରେ ଇଡେନ ଗାର୍ଡେନରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ଦେଖିବାକୁ ମିଳିବେ ୭୦ ହଜାର କୋହଲି!
କୋଲକାତା: ଭାରତୀୟ ଦଳର ଷ୍ଟାର ବ୍ୟାଟର ବିରାଟ କୋହଲିଙ୍କ ଜନ୍ମଦିନ ଆସନ୍ତା ନଭେମ୍ବର ୫ ତାରିଖରେ ପଡ଼ୁଛି । ଏହିଦିନ ଭାରତ ବିଶ୍ବକପରେ ନିଜର ଅଷ୍ଟମ ମ୍ୟାଚ୍ ଦକ୍ଷିଣ ଆଫ୍ରିକା ବିପକ୍ଷରେ ଖେଳିବାକୁ ଯାଉଛି । ଐତିହାସିକ ଇଡେନ ଗାର୍ଡେନରେ ଏହି ମ୍ୟାଚ ଅନୁଷ୍ଠିତ ହେବାକୁ ଥିବାବେଳେ କ୍ରିକେଟ ଆସୋସିଏସନ ଅଫ୍ ବଙ୍ଗାଲ ପକ୍ଷରୁ ସ୍ବତନ୍ତ୍ର ଆୟୋଜନ ନେଇ ପ୍ରସ୍ତୁତି ଆରମ୍ଭ ହୋଇଛି । ସୂଚନା ମିଳିଛି କି, ଖେଳ ଦେଖିବା ପାଇଁ ଆସିଥିବା ଦର୍ଶକଙ୍କୁ ମାଗଣାରେ ଦିଆଯିବ କୋହଲିଙ୍କ ମୁଖା । ଇଡେନ ଗାର୍ଡେନରେ ହେବାକୁ ଥିବା ଏହି ହାଇଭୋଲଟେଜ୍ ମ୍ୟାଚ୍ ପାଇଁ ସମସ୍ତ ଟିକେଟ ବିକ୍ରି ହୋଇ ସାରିଛି । ଅଥବା ୭୦ ହଜାର ଦର୍ଶକ ଦେଖି ପାରିବାର ସକ୍ଷମ ରହିଥିବା ଇଡେନ ଗାର୍ଡେନରେ ସମସ୍ତ ଦର୍ଶକ କୋହଲିଙ୍କ ମୁଖା ପିନ୍ଧି ମ୍ୟାଚ ଦେଖିବେ । ଫଳରେ ଷ୍ଟାଡିୟମ କୋହଲି କୋହଲି ଦିଶିବ । ଚଳିତ ବିଶ୍ବକପରେ କୋହଲି ଦମଦାର ଫର୍ମରେ ନଜର ଆସିଥିବେଳେ ନୂଆ ରେକର୍ଡ ମଧ୍ୟ ସ୍ଥାପନ କରିଛନ୍ତି । ଭାରତ ନିଜର ପରବର୍ତ୍ତୀ ମ୍ୟାଚ ଶ୍ରୀଲଙ୍କା ବିପକ୍ଷରେ ଖେଳିବାକୁ ଯାଉଛି । ଚଳିତ ବିଶ୍ବକପରେ ପଏଣ୍ଟ ଟେବୁଲର ଶୀର୍ଷରେ ରହିଛି ଟିମ ଇଣ୍ଡିଆ । ବିରାଟ କୋହଲି ନିଜର ଶ୍ରେଷ୍ଠ ପ୍ରଦର୍ଶନ କରୁଥିବାବେଳେ ଦଳର ବାକି ଖେଳାଳି ମଧ୍ୟ ଭଲ ପ୍ରଦର୍ଶନ କରୁଛନ୍ତି ।
ରକ୍ତମୁଖା ସାଜୁଛି ଇସ୍ରାଏଲ, ଗାଜାରେ ଜୋରଦାର ଅପରେସନ
ବ୍ୟୁରୋ ରିପୋର୍ଟ: ବେଳକୁ ବେଳ ରକ୍ତମୁଖା ସାଜୁଛି ଇସ୍ରାଏଲ । ଗାଜାରେ ଜୋରଦାର ଅପରେସନ । ହମାସର ୬ଶହରୁ ଅଧିକ ସ୍ଥଳୀ ଉପରେ ହମଲା । ଇସ୍ରାଏଲ ଆକ୍ରମଣରେ ୪ ଜଣ ତୁଙ୍ଗ ହମାସ କମାଣ୍ଡର ପ୍ରାଣ ହରାଇଛନ୍ତି । ସେମାନେ ହେଲେ ଜମିଲ ବାବା, ମହମ୍ମଦ ସଫାଦି, ମୁବାମନ ହିଜାଜି ଓ ମହମ୍ମଦ ଅବଦଲ୍ଲା । ବିଶେଷ କରି ଇସ୍ରାଏଲ ବାହିନୀ ହାତରେ ଥିବା ମରକାବା ଟ୍ୟାଙ୍କ ସାରା ଗାଜାକୁ ଧ୍ବଂସ କରିବାରେ ପ୍ରମୁଖ ଭୂମିକା ଗ୍ରହଣ କରିଛି । ଗାଜାର ଉଭୟପଟୁ ଇସ୍ରାଏଲ ପ୍ରତିରକ୍ଷା ବାହିନୀ ପୂର୍ବ ଓ ପଶ୍ଚିମ ଦିଗରୁ ଷଣ୍ଢୁଆସୀ ଆକ୍ରମଣ କରିବାର ଲାଗିଛି । ଗାଜାରେ ବର୍ତ୍ତମାନ ସୁଦ୍ଧା ୮ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଇସ୍ରାଏଲ ସୈନ୍ୟ ଗାଜାର ମୁଖ୍ୟ ସହରରେ ପ୍ରବେଶ କରିଛନ୍ତି । ଆଇଡିଏଫର ସୂଚନା ଅନୁସାରେ ସାରା ଗାଜାରେ ଗ୍ରାଉଣ୍ଡ ଅପରେସନ କରାଯିବ । ଗାଜାରେ ୪୦ ପ୍ରତିଶତ କୋଠା ମାଟିରେ ମିଶିଥିବାବେଳେ ସେଠାରେ ପାଣି, ବିଦ୍ୟୁତ, ମେଡିସିନ, ଖାଦ୍ୟ ବିନା ହାହାକାର ସୃଷ୍ଟି ହୋଇଛି ।
ଆଜି ପାକିସ୍ତାନକୁ ଭେଟିବ ବାଂଲାଦେଶ
ମୁମ୍ବାଇ: ଆଜି ବିଶ୍ବକପରେ ମୁହାଁମୁହିଁ ହେବେ ପାକିସ୍ତାନ ଓ ବାଂଲାଦେଶ । ଦିନ ୨ଟାରୁ କୋଲକାତାର ଇଡେନ ଗାର୍ଡେନ ଗ୍ରାଉଣ୍ଡରେ ମ୍ୟାଚ୍ ଆରମ୍ଭ ହେବ । ୬ଟି ମ୍ୟାଚରୁ ମାତ୍ର ୨ଟି ବିଜୟ ଲାଭ କରି ପଏଣ୍ଟ ଟେବୁଲର ସପ୍ତମ ସ୍ଥାନରେ ରହିଛି ପାକିସ୍ତାନ । ସେହିପରି ୬ଟିରୁ ମାତ୍ର ଗୋଟିଏ ମ୍ୟାଚ୍ ଜିତିଛି ବାଂଲାଦେଶ । ବିଜୟ ପାଇଁ ଉଭୟ ଦଳ ସ୍ବତନ୍ତ୍ର ରଣନୀତି କରିଛନ୍ତି । ଭଲ ପ୍ରଦର୍ଶନ କରି ପରାଜୟ ଧାରା ଭାଙ୍ଗିବାକୁ ପାକିସ୍ତାନ ଲକ୍ଷ୍ୟ ରଖିଥିବା ବେଳେ କଡ଼ା ଜବାବ ଦେବାକୁ ପ୍ରସ୍ତୁତ ଅଛି ବାଂଲାଦେଶ । ସେପଟେ ଗତକାଲି ମ୍ୟାଚରେ ଶ୍ରୀଲଙ୍କାକୁ ପରାଜିତ କରିଥିଲା ଆଫଗାନିସ୍ତାନ ।
୨୪୨ ରନର ବିଜୟ ଲକ୍ଷ୍ୟକୁ ୪୫ ଓଭର ୨ଟି ବଲରେ ହାସଲ କରି ଶ୍ରୀଲଙ୍କାକୁ ୭ଓ୍ବିକେଟରେ ପରାସ୍ତ କରିଥିଲା ଆଫଗାନିସ୍ତାନ । ନିଜର ତୃତୀୟ ବିଜୟ ସହ ପେଣ୍ଟ ଟେବୁଲର ପଞ୍ଚମ ସ୍ଥାନକୁ ଉଠିଛି ଆଫଗାନିସ୍ତାନ । ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ବୋଲରଙ୍କ ଆଗରେ ତିଷ୍ଠି ପାରିନଥିଲେ ଶ୍ରୀଲଙ୍କା ବ୍ୟାଟ୍ସମ୍ୟାନ୍ । ଦଳୀୟ ସ୍କୋର ୨୨ ରନ ଥିବା ବେଳେ ମାତ୍ର ୧୫ ରନ କରି ପାଭିଲିଅନ ଫେରିଥିଲେ ଦିମୁଥ କରୁଣାରତ୍ନେ । ୪୬ ରନ କରି ନିଶାଙ୍କା ମଧ୍ୟ ଆଉଟ ହୋଇଥିଲେ ।
ମେଣ୍ଡିସ ୩୯ ରନ କରିଥିବାବେଳେ ସଦିରା ୩୬ ରନ କରିବାକୁ ସକ୍ଷମ ହୋଇଥିଲେ । ଫଜଲହକ ଫାରୁକି ୪ ଓ୍ବିକେଟ ନେଇ ଶ୍ରୀଲଙ୍କାକୁ ଦୁର୍ବଳ କରିଦେଇଥିଲେ । ଶ୍ରୀଲଙ୍କା ୪୯ ଦଶମିକ ୩ ଓଭରରେ ୨୪୧ ରନ କରି ଅଲଆଉଟ ହୋଇଥିଲା । ଜବାବରେ ଆଫଗାନିସ୍ତାନ ପ୍ରଭାବୀ ପ୍ରଦର୍ଶନ ଦେଖାଇଥିଲା । ଆଜମାଥୁଲା ଓମାରଜି ଅପରାଜିତ ୭୩ ରନ କରିଥିବା ବେଳେ ହାସମାଥୁଲା ସାହିଦି ୫୮ ରନ କରିଥିଲେ । ୪୫.୨ ଓଭରରେ ଦଳ ୩ଓ୍ବିକେଟ ହରାଇ ମ୍ୟାଚକୁ ଜିତିନେଇଥିଲା ।
ଜାଡ଼ିଲାଣି ଓଡ଼ିଶା
ଭୁବନେଶ୍ବର: ଓଡ଼ିଶାକୁ ଧିରେଧିରେ ପ୍ରବେଶ କରୁଛି ଶୀତ। ସଂନ୍ଧ୍ୟାରୁ ଭୋର ପର୍ଯ୍ୟନ୍ତ କମୁଛି ତାପମାତ୍ରା । ସ୍ବାଭାବିକ ଠାରୁ ୨ରୁ ୪ ଡିଗ୍ରୀ ତଳେ ରହିଛି ପାରଦ । କନ୍ଧମାଳ ଜି.ଉଦୟଗିରିରେ ରେକର୍ଡ ହୋଇଛି ଚଳିତ ମାସର ସର୍ବନିମ୍ନ ତାପମାତ୍ରା । ଏକାଧିକ ସହରର ତାପମାତ୍ରା ୧୫ ଡିଗ୍ରୀ ତଳେ ରେକର୍ଡ ରହୁଛି । ବଙ୍ଗୋପସାଗରରୁ ଓଡ଼ିଶାକୁ ପ୍ରବାହିତ ହେଉଛି ପୂର୍ବାଳୀ ତରଙ୍ଗାୟିତ ପବନ । ପ୍ରଭାବରେ ଆଜିଠୁ ଦକ୍ଷିଣ ଓଡ଼ିଶାରେ ବଦଳିବ ପାଗ । ଅଧିକାଂଶ ସ୍ଥାନରେ ପାଗ କୋହଲା ରହିବା ସହ କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତା ୩ ତାରିଖ ପର୍ଯ୍ୟନ୍ତ ଗଞ୍ଜାମ, ଗଜପତି, ରାୟଗଡା, ମାଲକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି ଏବଂ କନ୍ଧମାଳରେ ବର୍ଷା ହୋଇପାରେ ।