ନୂଆଦିଲ୍ଲୀ: ସଂସଦ ଷଡ଼ଯନ୍ତ୍ର ମାମଲା । ଆତ୍ମସମର୍ପଣ କଲା ମାଷ୍ଟର ମାଇଣ୍ଡ ଲଳିତ ଝା । ଦିଲ୍ଲୀ କର୍ତ୍ତବପଥ ଥାନାରେ ଆତ୍ମସମର୍ପଣ କରିଛି । ଆତ୍ମସମର୍ପଣ ପରେ ଅଭିଯୁକ୍ତ ଲଳିତକୁ ଗିରଫ କରିଛି ପୋଲିସ । ଘଟଣାରେ ପୂର୍ବରୁ ଗିରଫ ହୋଇଥିବା ୪ ଜଣଙ୍କୁ ୭ ଦିନିଆ ରିମାଣ୍ଡରେ ନେଇଛି ପୋଲିସ । ୪ଜଣଙ୍କୁ ଆତଙ୍କବାଦୀ ନିରୋଧୀ ଆଇନ, ୟୁଏପିଏ ଅଧୀନରେ ଗିରଫ କରାଯାଇଛି । ଅପରାଧିକ ଷଡ଼ଯନ୍ତ୍ର ପରି ସଂଗୀନ ଦଫା ମଧ୍ୟ ଲାଗିଛି । ସେହିପରି ୪ ଅଭିଯୁକ୍ତଙ୍କୁ ଘରେ ରଖିଥିବା ଅଭିଯୋଗରେ ଗୁରଗାଓଁର ଭିକି ଶର୍ମା ଓ ତାଙ୍କ ପତ୍ନୀ ରେଖାଙ୍କୁ ଅଟକ ରଖାଯାଇଛି ।ନିଲମ ଆଜାଦ୍ ଓ ଅମୋଲ ସିନ୍ଦେଙ୍କ ଭିଡିଓ ସୁଟ୍ କରିଥିଲେ ଲଳିତ ।
ରାଉରକେଲା ସ୍ବତନ୍ତ୍ର ଜେଲରେ ବିଚାରାଧୀନ କଏଦୀଙ୍କ ମୃତ୍ୟୁ ଅଭିଯୋଗ
ରାଉରକେଲା: ରାଉରକେଲା ସ୍ବତନ୍ତ୍ର ଜେଲରେ ବିଚାରାଧୀନ କଏଦୀଙ୍କ ମୃତ୍ୟୁ ଅଭିଯୋଗ । ୨୪ ଵର୍ଷୀୟ ଏନେମ ଲୁଗୁନଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ମୃତ କଏଦୀଙ୍କ ଘର ଝିରପାଣି ଥାନା ଅନ୍ତର୍ଗତ ମାଷ୍ଟରଟୋଲି । ଏଏନଏମ ଲୁଗୁନ ହତ୍ୟା ମାମଲାରେ ଗିରଫ ହୋଇ ୨୦୨୧ରୁ ରାଉରକେଲା ସ୍ବତନ୍ତ୍ର ଜେଲ ହାଜତରେ ଥିଲା । ତେବେ ସେ ଅସୁସ୍ଥ ଥିବାରୁ ରାଉରକେଲା, ବୁର୍ଲା ଓ କଟକରେ ଚିକିତ୍ସିତ ହେଉଥିବା ରାଉରକେଲା ସ୍ବତନ୍ତ୍ର ଜେଲ ଅଧିକ୍ଷକ ସୂଚନା ଦେଇଛନ୍ତି । ଆଜି ସକାଳେ ଅବସ୍ଥା ଗୁରୁତର ହେଵାରୁ ତାଙ୍କୁ ରାଉରକେଲା ସରକାରୀ ଡାକ୍ତରଖାନାକୁ ଚିକିତ୍ସା ପାଇଁ ନିଆଯାଇଥିଲା । ତେବେ ରାସ୍ତାରେ ତାଙ୍କର ମୃତ୍ୟୁ ହୋଇଥିଲା । ମୃତଦେହ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଆଇନ ଅନୁସାରେ ମାଜିଷ୍ଟ୍ରେଟ ସ୍ତରୀୟ ଓ ଜୁଡିସିଆଲ ତଦନ୍ତ ହେଵ ଵୋଲି ରାଉରକେଲା ଜେଲ ଅଧିକ୍ଷକ ସୂଚନା ଦେଇଛନ୍ତି ।
ଦୁଇଦିନିଆ କଳାହାଣ୍ଡି ଜିଲ୍ଲା ଗସ୍ତରେ ପୋଲିସ ମହା ନିର୍ଦ୍ଦେଶକ ସୁନୀଲ ବଂଶଲ
କଳାହାଣ୍ଡି: ଦୁଇଦିନିଆ କଳାହାଣ୍ଡି ଜିଲ୍ଲା ଗସ୍ତରେ ପୋଲିସ ମହା ନିର୍ଦ୍ଦେଶକ ସୁନୀଲ ବଂଶଲ । ହେଲିକେପ୍ଟର ଯୋଗେ ଆଜି ଭବାନୀପାଟଣା ରିଜର୍ଭ ପୋଲିସ ପଡିଆରେ ପହଞ୍ଚିବା ପରେ ଜିଲ୍ଲା ଏସପିଙ୍କ କାର୍ଯ୍ୟାଳୟରେ ବୈଠକ ଅନୁଷ୍ଟିତ ହୋଇଥିଲା । ଏଥିରେ ଡାଇରେକ୍ଟର ଇଣ୍ଟେଲିଜେନ୍ସ ସଞ୍ଜୀବ ପଣ୍ଡା, ଏଡିଜିପି ଦେବବ୍ରତ ସିଂ, ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ଚରଣ ସିଂ ମୀନା, କଳାହାଣ୍ଡି ଏସପି ଅଭିଳାଷ ଜି, ବୌଦ୍ଧ ଏସପି ରାଜ ପ୍ରାସାଦ, କନ୍ଧମାଳ ଏସପି, ସୁଧାଂଶୁ ପାତ୍ର, ବଲାଙ୍ଗୀର ଏସପି ହୃଷୀକେଶ ଡି. ଖିଲାଡ଼ି, ନବରଙ୍ଗପୁର ଏସପି ରୋହିତ ବର୍ମା, ନୂଆପଡ଼ା ଏସପି ରାଘବେନ୍ଦ୍ର ରେଡ୍ଡୀ ଓ ସିଆରପିଏଫ ଅଧିକାରୀ ଉପସ୍ଥିତ ଥିଲେ । ବୈଠକରେ ମାଓ ସ୍ଥିତିର ସମୀକ୍ଷା ସହ ଜିଲ୍ଲାରେ ଆଇନ ଶୃଙ୍ଖଳା ସ୍ଥିତିକୁ ସମୀକ୍ଷା କରାଯାଇଥିଲା । ପରେ ଜିଲ୍ଲାର ମଦନପୁର ରାମପୁରକୁ ଯାଇ ଥାନା ପରିଦର୍ଶନ କରିବା ସହ ସ୍ଥାନୀୟ ସିଆରପିଏଫ କ୍ୟାମ୍ପ ପରିଦର୍ଶନ କରିଥିଲେ ଡିଜିପି । ଜିଲ୍ଳାର ୧୩ଟି ବ୍ଲକ ମଧ୍ୟରୁ ୧୧ଟି ବ୍ଲକ ମାଓ ଅଧ୍ୟୁଷିତ ଅଞ୍ଚଳ ହୋଇଥିବା ବେଳେ ସେହି ଅଞ୍ଚଳରେ ମାଓ ସ୍ଥିତି କିଭଳି ରହିଛି ତାହାର ଟିକିନିଖି ସମୀକ୍ଷା କରିଛନ୍ତି ଡିଜିପି । ଛତିଶଗଡ଼ ଅଞ୍ଚଳର ମାଓବାଦୀ କଳାହାଣ୍ଡି ଅଞ୍ଚଳର ବିଭିନ୍ନ ଜଙ୍ଗଲକୁ ଯିବା ଆସିବା କରୁଥିବା ଜଣାପଡ଼ିଛି ।
କୁଆଡ଼େ କିଛି ନଥାଇ ହଠାତ ଘରେ ଲାଗିଯାଉଛି ନିଆଁ, ଚିନ୍ତାରେ ଲୋକେ
ଯାଜପୁର: କୁଆଡ଼େ କିଛି ନାହିଁ, ହଠାତ ଘରେ ଲାଗିଯାଉଛି ନିଆଁ । ଜଳିଯାଉଛି ଘରର କପଡ଼ା ଓ ଆସବାବପତ୍ର । ଦେଖୁଦେଖୁ ଘର ଭିତରେ ବ୍ୟାପୀ ଯାଉଛି ନିଆଁ । ଏମିତି ଆଶ୍ଚର୍ଯ୍ୟଜନକ ଘଟଣା ଘଟୁଛି ଯାଜପୁର ବ୍ଲକ ବାସୁଦେବପୁର ପଞ୍ଚାୟତ ଗୋବିନ୍ଦପୁର ଗ୍ରାମରେ । ଗୋବିନ୍ଦପୁର ଗ୍ରାମର ଗୋପାଳ ଚନ୍ଦ୍ର ସାହୁ ଓ ଗୋବିନ୍ଦ ଚନ୍ଦ୍ର ସାହୁଙ୍କ ଘରେ ଗତ କିଛିଦିନ ହେଲା ଏପରି ଘଟଣା ଘଟୁଥିବା ଅଭିଯୋଗ ହୋଇଛି । ଏହା ଭୌତିକ ନା ଅଲୌକିକ କାଣ୍ଡ, ଯାହାକୁନେଇ ପରିବାର ଲୋକେ ଆତଙ୍କିତ ହୋଇପଡ଼ିଛନ୍ତି । ଭୟରେ ପରିବାର ଲୋକେ ଓ ସ୍ଥାନୀୟ ଲୋକେ ରାତିରେ ଶୋଉପାରୁ ନଥିବା କହିଛନ୍ତି । ସମସ୍ୟାର ସମାଧାନ ଲାଗି ଗୁଣିଆର ସହାୟତା ନେଇଛନ୍ତି ପରିବାର ଲୋକ । ନିଆଁ ଲାଗି ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା ପରିବାର ଲୋକ ଅଭିଯୋଗ କରିଛନ୍ତି ।
ଗୁଗଲ ମ୍ୟାପ ପର୍ଯ୍ୟଟକଙ୍କୁ କଲା ବାଟ ବଣା, ଉଦ୍ଧାର କଲେ ସ୍ଥାନୀୟ ଯୁବକ
ବାଲେଶ୍ବର: ଗୁଗୁଲି ମ୍ୟାପ ପର୍ଯ୍ୟଟକଙ୍କୁ କଲା ବାଟ ବଣା ।ସୁଦୂର ଫ୍ରାନ୍ସରୁ ଆସିଥିବା ଜଣେ ଯୁବ ପର୍ଯ୍ୟଟକ ବାଟ ଭୁଲିଯିବାରୁ ସ୍ଥାନୀୟ ଯୁବକମାନେ ତାଙ୍କୁ ଉଦ୍ଧାର କରି ତାଙ୍କ ସହ ବନ୍ଧୁତ୍ୱ ସ୍ଥାପନ କରିବା ସହ ଓଡ଼ିଆ ଖାଦ୍ୟ ଖୁଆଇ ତାଙ୍କ ମନ ଜିଣିଛନ୍ତି। ଫ୍ରାନ୍ସର ଯୁବକ ବିଲ୍ୟୁ ଗତ ନଭେମ୍ବର ମାସରେ ଭାରତ ଭ୍ରମଣ ପାଇଁ ଆସିଥିଲେ। ପ୍ରଥମେ ଦିଲ୍ଲୀ ଓ ପରେ ପରେ ବାରାଣସୀ ବୁଲିବା ପରେ ଟ୍ରେନ ଯୋଗେ ଖଡ଼ଗପୁର ଯାଇଥିଲେ ସେଠାରୁ ଭୁବନେଶ୍ୱର ଏବଂ ପୁରୀ ବୁଲିବା ପରେ ଭଦ୍ରକ ଆସିଥିଲେ। ଭଦ୍ରକରୁ କୋଲକାତା ଯିବା ବଦଳରେ ସୋର ଷ୍ଟେସନରେ ଓହ୍ଲାଇ ଗୁଗୁଲି ମ୍ୟାପରେ ଗୋପାଳପୁର ୱାଟର ଫଲ ସର୍ଚ୍ଚ କରିଥିଲେ। ଗୁଗୁଲି ମ୍ୟାପରେ ଗୋପାଳପୁର ୱାଟର ଫଲ ସ୍ଥାନରେ ସିନ୍ଧୁଆ ଡ୍ୟାମ ଦେଖାଇଥିଲା ।
ଯୁବକ ଜଣଙ୍କ ମ୍ୟାପକୁ ଅନୁସରଣ କରି ବାଟ ଭୁଲି ସିନ୍ଧୁଆ ଅଭିମୁଖେ ଚାଲିଚାଲି ଯାଉଥିବା ବେଳେ ସ୍ଥାନୀୟ ଅଞ୍ଚଳରେ ଆୟୋଜିତ ହେଉଥିବା ମୁକ୍ତେଶ୍ଵର ସର୍ବଭାରତୀୟ କ୍ରିକେଟ ଟୁର୍ଣାମେଣ୍ଟର ଯୁବକ ମାନେ ତାଙ୍କୁ ଉଦ୍ଧାର କରି ସେ ବାଟ ଭୁଲି ଯାଇଥିବା ଜାଣିବାକୁ ପାଇଥିଲେ। ଫଳରେ ତାଙ୍କୁ ଅତିଥି ଭଳି ସେବା ଯୋଗାଇବା ସହିତ ତାଙ୍କୁ ଓଡ଼ିଆ ଖାଦ୍ୟପେୟର ବ୍ୟବସ୍ଥା କରିଥିଲେ। ଯାହାକୁ ବିଦେଶୀ ଯୁବକ ଜଣଙ୍କ ବହୁ ପ୍ରଶଂସା କରିବା ସହିତ ସେମାନଙ୍କର ବନ୍ଧୁତ୍ୱ ଓ ସାହାଯ୍ୟକୁ ଭରପୁର ପ୍ରଶଂସା କରି କୃତଜ୍ଞତା ଜଣାଇଥିଲେ। ତେବେ କ୍ରିକେଟ ଟୁର୍ଣାମେଣ୍ଟ ଚାଲିଥିବାରୁ ଦୁଇଦିନ ଧରି ପର୍ଯ୍ୟଟକ ଜଣଙ୍କ ସ୍ଥାନୀୟ ଯୁବକଙ୍କ ନିକଟରେ ରହୁଛନ୍ତି। ଖେଳ ସରିବା ପରେ ସେ ଯିବେ ବୋଲି କହିଥିବା ବେଳେ ସୋର ପୁଲିସ ତାଙ୍କୁ ଥାନାକୁ ଆଣି ପାସପୋର୍ଟ ଯାଞ୍ଚ କରିଥିବା ଜଣାପଡ଼ିଛି।
ଋତୁସ୍ରାବ ଏକ ଅକ୍ଷମତା ନୁହେଁ, ପେଡ୍ ଲିଭର ଆବଶ୍ୟକତା ନାହିଁ : ସ୍ମୃତି ଇରାନୀ
ନୂଆଦିଲ୍ଲୀ: ଋତୁସ୍ରାବ ଏକ ଅକ୍ଷମତା ନୁହେଁ, ପେଡ୍ ଲିଭର ନାହିଁ ଆବଶ୍ୟକତା । ରାଜ୍ୟସଭାରେ ଉତ୍ତର ରଖି କହିଲେ କେନ୍ଦ୍ର ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ସ୍ମୃତି ଇରାନୀ । ଋତୁସ୍ରାବ ସମୟରେ ମହିଳାଙ୍କୁ ଦରମା ସହିତ ଛୁଟି ଦେବାକୁ ନେଇ ଦାବି ହେବା ସହ ବିଭିନ୍ନ କ୍ୟାମ୍ପେନ ମଧ୍ୟ ଚାଲିଛି । ତେବେ ଦରମା ସହିତ ଛୁଟି ନୀତିକୁ ବିରୋଧ କରିଛନ୍ତି କେନ୍ଦ୍ର ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ସ୍ମୃତି ଇରାନୀ । ରାଜ୍ୟ ସଭାରେ ଆରଜେଡି ସାଂସଦ ମନୋଜ ଝାଙ୍କ ପ୍ରଶ୍ନର ଉତ୍ତର ଦେବା ବେଳେ ଏନେଇ ମତ ରଖିଛନ୍ତି ସ୍ମୃତି ଇରାନୀ । କହିଛନ୍ତି, ଋତୁସ୍ରାବ ଏକ ଋତୁ ଚକ୍ର ଅଟେ, ଏହା ଅକ୍ଷମତା ନୁହେଁ । ଋତୁସ୍ରାବ ମହିଳାଙ୍କ ଜୀବନ ଯାତ୍ରାର ପ୍ରାକୃତିକ ଅଂଶ । ତେଣୁ ଏଥିପାଇଁ ଦରମା ସହିତ ଛୁଟି ପାଇଁ ଏକ ସ୍ୱତନ୍ତ୍ର ନିୟମ କରିବାର ଆବଶ୍ୟକତା ନାହିଁ । ଏପରି ପ୍ରସ୍ତାବ ଦେବା ଉଚିତ ନୁହେଁ ଯେଉଁଠାରେ ମହିଳାମାନେ ସମାନ ସୁଯୋଗରୁ ବଞ୍ଚିତ ହେବେ । ଦେଶରେ ଋତୁସ୍ରାବ ସ୍ୱଚ୍ଛତା ନୀତି ଉପର ଆରଜେଡି ସାଂସଦ ମନୋଜ କୁମାର ଝାଙ୍କ ପ୍ରଶ୍ନର ଉତର ସ୍ମୃତି ଇରାନୀ ରାଜ୍ୟସଭାରେ ଏହି କଥା କହିଛନ୍ତି ।
ଦୈହିକ ସମ୍ପର୍କ ଲାଗି ମନା କରିବାରୁ ‘ଲିଭ୍-ଇନ୍ ପାର୍ଟନରଙ୍କୁ କଇଁଚିରେ ଭୁସି ହତ୍ୟା
ନନ୍ଦିଘୋଷ ବ୍ୟୁରୋ: ଦୈହିକ ସମ୍ପର୍କ ଲାଗି ମନା କରିବାରୁ ‘ଲିଭ୍-ଇନ୍’ପାର୍ଟନରଙ୍କୁ କଇଁଚିରେ ଭୁସି ହତ୍ୟା କଲେ ଯୁବକ । ଦୈହିକ ସମ୍ପର୍କ ଲାଗି ଅରାଜି ହେବାରୁ ୨୦ ବର୍ଷୀୟ ‘ଲିଭ୍-ଇନ୍’ପାର୍ଟନର୍ଙ୍କୁ କଇଁଚିରେ ଭୁସି ହତ୍ୟା କରିଥିବା ଜଣେ ଯୁବକଙ୍କୁ ବୁଧବାର ଦିନ ଇନ୍ଦୋରରୁ ଗିରଫ କରାଯାଇଥିବା କଥା ପୁଲିସ କହିଛି ।
ଇନଷ୍ଟାଗ୍ରାମରେ ବନ୍ଧୁତ୍ବ ନିବିଡ଼ ହେବା ପରେ ଅଳ୍ପ କିଛି ଦିନ ହେବ ଦୁହେଁ ସହରରେ ଗୋଟାଏ ଘର ଭଡ଼ା ନେଇ ପୀଡ଼ିତା ଓ ଅଭିଯୁକ୍ତ ଏକତ୍ର ରହୁଥିଲେ ବୋଲି ଜଣେ ପୁଲିସ ଅଧିକାରୀ କହିଛନ୍ତି । ସାମ୍ବାଦିକମାନଙ୍କୁ ଅତିରିକ୍ତ ଡେପୁଟି ପୁଲିସ କମିସନର୍ ଅଭିନୟ ବିଶ୍ବକର୍ମା କହିଛନ୍ତି ଯେ, ରାଜୋଇ ବଜାର ଅଞ୍ଚଳରେ ଭଡ଼ା ନେଇଥିବା ଉକ୍ତ ଘରେ ରହୁଥିବା ୨୪ ବର୍ଷିୟ ଅଭିଯୁକ୍ତ ପ୍ରବୀଣ ସିଂହ ଧକଡ଼ ଡିସେମ୍ବର ୭ ତାରିଖରେ ସେ ୨୦ ବର୍ଷୀୟ ତରୁଣୀଙ୍କୁ ହତ୍ୟା କରିଥିଲେ ।
ଲିଭ୍-ଇନ୍’ ପାର୍ଟନର୍ ତରୁଣୀଜଣକ ଦୈହିକ ସମ୍ପର୍କ ରଖିବାକୁ ମନା କରିଦେବାରୁ ଗୁଣା ଜିଲ୍ଲାର ମୂଳବାସିନ୍ଦା ପ୍ରବୀଣ ଭୀଷଣ ରାଗିଯାଇ ଗୋଟାଏ କଇଁଚିରେ ତାଙ୍କ ତଣ୍ଟିକୁ ଭୁସି ପକାଇଥିଲେ। ପ୍ରବଳ ରକ୍ତସ୍ରାବ ହେବାରୁ ଘଟଣାସ୍ଥଳରେ ହିଁ ପୀଡ଼ିତାଙ୍କର ମୃତ୍ୟୁ ଘଟିଲା ବୋଲି ସେ କହିଛନ୍ତି।
ଭୟଭୀତ ହୋଇ ଅଭିଯୁକ୍ତ ପ୍ରବୀଣ ଘର ବାହାରପଟୁ ତାଲା ଦେଇ ଖସି ପଳାଇଥିଲେ। ଗଲାବେଳେ ମୃତ ତରୁଣୀର ଫୋନ୍ଟିକୁ ବି ନେଇ ଯାଇଥିଲେ। ଦୁଇ ଦିନ ପରେ ଅର୍ଥାତ୍ ଡିସେମ୍ବର ୯ ତାରିଖ ଦିନ ଏହି ହତ୍ୟା ଘଟଣା ଜଣାପଡ଼ିବାଲା ଏବଂ ଫୋନ୍ ଟ୍ରାକ୍ କରାଯାଇ ଧକଡ଼ଙ୍କୁ ଗିରଫ କରାଗଲା ବୋଲି ବିଶ୍ବକର୍ମା କହିଛନ୍ତି।
ବାସି ଭାତ ଖାଉଥିଲେ ସାବଧାନ! ଏହି ଅସୁବିଧାର ହୋଇପାରନ୍ତି ସମ୍ମୁଖୀନ
ଭୁବନେଶ୍ବର: ଆପଣ ରାତିରେ ଦିନର ବଳକା ଭାତ ଏବଂ ରାତିରେ ରାତିର ବଳକା ଚାଉଳ ମଧ୍ୟ ଖାଉଛନ୍ତି କି। ଯଦି ହଁ, ତେବେ ସାବଧାନ ରୁହନ୍ତୁ, କାରଣ ଏହା ଏକାସାଙ୍ଗରେ ଅନେକ ରୋଗକୁ ନିମନ୍ତ୍ରଣ କରିବା ପରି ଏବଂ ହାର୍ଟ ପାଇଁ ଅତ୍ୟନ୍ତ ବିପଜ୍ଜନକ ଅଟେ। ତେଣୁ ଏହି ଖାଇବା ଅଭ୍ୟାସକୁ ତୁରନ୍ତ ତ୍ୟାଗ କରିବା ଉଚିତ।
ବାସି ଖାଇବା ଦ୍ୱାରା ପେଟ ଏବଂ ହଜମ ସମସ୍ୟା ହୋଇପାରେ। ବାସ୍ତବରେ, ଜୀବାଣୁ ବାସି ଭାତରେ ବହୁତ ବୃଦ୍ଧି କରନ୍ତି, ଯାହା ପେଟ ସଂକ୍ରମଣର କାରଣ ହୋଇପାରେ। ଏହା ବ୍ୟତୀତ ପେଟ ଯନ୍ତ୍ରଣା, ଝାଡ଼ା, ବାନ୍ତି ଭଳି ସମସ୍ୟା ମଧ୍ୟ ହୋଇପାରେ। ଏହା ହୃଦଘାତର କାରଣ ହୋଇଥାଏ । ଇଣ୍ଡିପେଣ୍ଡେନ୍ସର ରିପୋର୍ଟ ଅନୁଯାୟୀ, ଏହାକୁ ଖାଇବା ଦ୍ୱାରା ଖାଦ୍ୟ ବିଷାକ୍ତ ସମସ୍ୟା ବା ଫୁଡ ପଏଜନିଂ ହୋଇପାରେ। ରିପୋର୍ଟରେ କୁହାଯାଇଛି ଯେ କଞ୍ଚା ଚାଉଳରେ ସ୍ପୋରସ ମିଳିଥାଏ, ଯାହା ରାନ୍ଧିବା ସମୟରେ ମଧ୍ୟ ରହିଥାଏ, କିନ୍ତୁ ଚାଉଳ ଗରମ ହେଲେ ଏହି ଜୀବାଣୁ ଶରୀରକୁ କ୍ଷତି ପହଞ୍ଚାଇବାରେ ଅସମର୍ଥ ହୁଅନ୍ତି। ଯେତେବେଳେ ଚାଉଳକୁ କୋଠରୀ ତାପମାତ୍ରାରେ ଅନେକ ଘଣ୍ଟା ରଖାଯାଏ, ସ୍ପୋରସ ଜୀବାଣୁରେ ପରିଣତ ହୁଏ ଏବଂ ଯେତେବେଳେ ଏହି ଜୀବାଣୁ ଶରୀରରେ ପହଞ୍ଚନ୍ତି, ସେତେବେଳେ ଏହା ଜଣଙ୍କୁ ଅସୁସ୍ଥ କରିପାରେ।
ଯେତେବେଳେ ଚାଉଳକୁ ଦୀର୍ଘ ସମୟ ଧରି ରଖାଯାଏ, ଏହା ଦୂଷିତ ହୋଇଯାଏ, ଯାହାକୁ ଭଜା ଚାଉଳ ସିଣ୍ଡ୍ରୋମ କୁହାଯାଏ। ଏହା ପେଟଠାରୁ ଆରମ୍ଭ କରି ଅନେକ ରୋଗର କାରଣ ହୋଇଯାଏ। ଏହା ବ୍ୟତୀତ, ବାସିଭାତ ମଧ୍ୟ ହୃଦୟ ସମ୍ବନ୍ଧୀୟ ରୋଗ କରିଥାଏ । ମଞ୍ଚେଷ୍ଟର ଏବଂ ସାଲଫୋର୍ଡ ୟୁନିଭରସିଟି ଦ୍ୱାରା କରାଯାଇଥିବା ଅନୁସନ୍ଧାନରୁ ଜଣାପଡିଛି ଯେ ଯେଉଁ ମାଟିରେ ଚାଉଳ ଚାଷ କରାଯାଏ, ସେଥିରେ ଆର୍ସେନିକ ଅଧିକ ଥାଏ। ଯେହେତୁ ଚାଉଳ ଚାଷ ପାଇଁ ପ୍ରଚୁର ଜଳ ଆବଶ୍ୟକ। କ୍ଷେତରେ ଥିବା ଧାନ ଫସଲ ସଂପୂର୍ଣ୍ଣ ପାଣିରେ ବୁଡ଼ି ରହିଥାଏ। ଯେଉଁଥିପାଇଁ ଆର୍ସେନିକର ପରିମାଣ ବଢିଥାଏ। ଯେତେବେଳେ ଆର୍ସେନିକ ଅନ୍ୟ ବିଷାକ୍ତ ପଦାର୍ଥ ସହିତ ମିଶ୍ରିତ ହୁଏ ଏହା ହୃଦଘାତର କାରଣ ହୋଇଥାଏ ।
ଜାନୁଆରୀ ୧୫ ଭିତରେ ସରିବ ଜାଗମରାରେ ଓ୍ବାଟକୋ ପକ୍ଷରୁ ହେଉଥିବା ସ୍ବେରେଜ କାମ
ଭୁବନେଶ୍ବର: ଭୁବନେଶ୍ବର ଜାଗମରାରେ ଓ୍ବାଟକୋ ପକ୍ଷରୁ ହେଉଥିବା ସ୍ବେରେଜ କାମ ଜାନୁଆରୀ ୧୫ ଭିତରେ ସରିବ । ରାସ୍ତା ଖୋଳାନଯାଇ ଟ୍ରେଞ୍ଚଲେସ୍ ଟେକ୍ନୋଲୋଜି ମାଧ୍ୟମରେ ମ୍ୟାନହୋଲ କରାଯାଇ ସ୍ବେରେଜ ପାଇପ ବିଛାଯାଉଛି । ଡୁମୁଡୁମା, ଖଣ୍ଡଗିରି, ଜାଗମରା, ଆଇଗିଣିଆ ଅଞ୍ଚଳର ପ୍ରାୟ ୩ଲକ୍ଷ ଲୋକଙ୍କ ସ୍ବେରେଜ ସଂଯୋଗ କରାଯିବ । ମାସେ ହେଲାଣି କାମ ଚାଲିଥିବା ବେଳେ ସ୍ଥାନୀୟ ଲୋକେ ଅସୁବିଧାରେ ଥିଲେ ମଧ୍ୟ ବୃହତ୍ତର ସ୍ବାର୍ଥ ପାଇଁ କିଛି ଦିନର କଷ୍ଟ ସହିବାକୁ ପ୍ରସ୍ତୁତ ଅଛନ୍ତି । ଲୋକଙ୍କ ଅସୁବିଧା ହେଉଥିବାରୁ ଓ୍ବାଟକୋ ପକ୍ଷରୁ ସ୍ବେରେଜ କାମ ପାଇଁ ସ୍ଥାନୀୟ ବାସିନ୍ଦାଙ୍କ ସହଯୋଗ କାମନା କରିଛନ୍ତି ସିଇଓ ।
ଜାନୁଆରୀ ୧୫ ସୁଦ୍ଧା ସରିବ ଜାଗମରା ସ୍ବେରେଜ୍ କାମ । ନଭେମ୍ବର ୧୫ରୁ ହୋଇଛି ଆରମ୍ଭ । ରାସ୍ତାର ଉପର ଭାଗ ଖୋଳାନଯାଇ ଟ୍ରେଞ୍ଚଲେସ୍ ଟେକ୍ନୋଲୋଜି । କୋଚିଲାପୁଟ ଟ୍ରିଟମେଣ୍ଟ ପ୍ଲାଣ୍ଟରେ ସଂଯୋଗ ହେବ ବିଛାଯାଉଥିବା ସ୍ବେରେଜ ଲାଇନ । ଏହି ସ୍ବରେଜ ଦ୍ବାରା ଜାଗମରା, ଖଣ୍ଡଗିରି, ଗଣ୍ଡମୁଣ୍ଡା, ସିରିପୁର, ଆଇଗିଣିଆ ଅଞ୍ଚଳର ପ୍ରାୟ ୩ଲକ୍ଷ ଲୋକଙ୍କ ସ୍ବେରେଜ ପାଣି ମୁଖ୍ୟ ଲାଇନରେ ସଂଯୋଗ ହୋଇପାରିବ । ଆଗରୁ ରାସ୍ତା ଖୋଳି ସ୍ବେରେଜ କାମ ଚାଲୁଥିବା ବେଳେ ମାସାଧିକ ସମୟ ଲାଗୁଥିଲା ଏବଂ ଅନେକ ଦୁର୍ଘଟଣା ମଧ୍ୟ ଘଟୁଥିଲା । ଏହାକୁ ନଜରରେ ରଖି ପୁରା ରାସ୍ତା ଖୋଳାନଯାଇ ମ୍ୟାନହୋଲ ଜରିଆରେ ସ୍ବେରେଜ ପାଇପ ରାସ୍ତାର ୧୦ ଫୁଟ ତଳେ ବିଛାଯାଉଛି । ଏନଜିଟି ନିର୍ଦ୍ଦେଶ କ୍ରମେ ସ୍ବେରେଜ ପରିଚାଳନା ଗୁରୁତର ସହ ନେଉଛି ନଗର ଉନ୍ନୟନ ବିଭାଗ ।
ଜାଗମରାରେ ମାସେ ହେଲାଣି ଚାଲିଛି ସ୍ବେରେଜ କାମ । ଜାଗମରାରୁ ଗଣ୍ଡମୁଣ୍ଡା ଛକ ଯାଏଁ ଗୋଟିଏ ପଟ ରାସ୍ତାକୁ ବ୍ଲକ କରାଯାଇ ୩୬୬ ମିଟର ରାସ୍ତାରେ କାମ ଚାଲିଛି । ଅନ୍ୟପଟ ରାସ୍ତାରେ ଓ୍ବାନ ଓ୍ବେ ବ୍ୟବସ୍ଥା କରାଯାଇଥିଲେ ମଧ୍ୟ ବଡ଼ ଗାଡ଼ିକୁ ଏହି ରାସ୍ତାରେ ବାରଣ କରାଯାଇଛି । ଏଥିପାଇଁ ସ୍ଥାନୀୟ ଲୋକଙ୍କ ଯିବା ଆସିବା ଅସୁବିଧା ହେଉଛି ସତ, ହେଲେ ଦୀର୍ଘଦିନ ଧରି ଥିବା ସ୍ବେରେଜ ସମସ୍ୟାର ସମାଧାନ ସ୍ଥାୟୀ ଭାବେ ହେଉଥିବାରୁ କିଛିଟା ଅସୁବିଧା ସହିବାକୁ ପ୍ରସ୍ତୁତ ସ୍ଥାନୀୟ ବାସିନ୍ଦା । ଏପଟେ ଲୋକଙ୍କ ଅସୁବିଧା କଥାକୁ ଓ୍ବାଟକୋ ଅଧିକାରୀ ସ୍ବୀକାର କରିଥିବା ବେଳେ ଆଉ ମାସକ ପାଇଁ ସ୍ଥାନୀୟ ଲୋକଙ୍କ ସହଯୋଗ କାମନା କରିଛନ୍ତି ।
ଜାତୀୟ ଗ୍ରୀନ ଟ୍ରିବ୍ୟୁନାଲର ନିର୍ଦ୍ଦେଶ କ୍ରମେ ରାଜଧାନୀର ସ୍ବେରେଜ ବ୍ୟବସ୍ଥାକୁ ସଠିକ କରିବା, ସ୍ବେରେଜ ବର୍ଜ୍ୟଜଳକୁ ଟ୍ରିଟମେଣ୍ଟ ପ୍ଲାଣ୍ଟ ଜରିଆରେ ବିଶୋଧନ କରି ଛାଡ଼ିବା, ସବୁ ଘରକୁ ମୁଖ୍ୟ ପାଇପ ଲାଇନ ସହିତ ସଂଯୋଗ କରିବା କାମକୁ ପ୍ରାଥମିକତା ଭିତ୍ତିରେ ଶୀଘ୍ର ସାରିବାକୁ ଉଦ୍ୟମ ଜାରି ରଖିଛି ଓ୍ବାଟକୋ ବା ଓଡ଼ିଶା ଜଳ ନିଗମ ।
ବିନା ମାଟିରେ ଫଳୁଛି ପନିପରିବା
କଟକ: ବିଭିନ୍ନ ପ୍ରକାର ଫୁଲ, କେଶର ଓ ଷ୍ଟ୍ରବେରୀ ପରେ ଏବେ ପୁଣି ଥରେ ପନିପରିବା ଉତ୍ପାଦନ କରି ଚର୍ଚ୍ଚାରେ ରେଭେନ୍ସା ବିଶ୍ୱବିଦ୍ୟାଳୟର ଉଦ୍ଭିଦ ବିଜ୍ଞାନ ବିଭାଗ । ଉନ୍ନତ ଜ୍ଞାନକୌଶଳ ହାଇଡ୍ରୋପନିକ ଉପାୟରେ ଗବେଷଣା କରିବା ସହ ଉନ୍ନତ ମାନର ପୋଷକ ତତ୍ତ୍ୱର ପ୍ରଭାବ କିଭଳି ପନିପରିବା ଚାଷ ଉପରେ ପଡୁଛି ତାହା ମଧ୍ୟ ନିରୂପଣ କରାଯାଇ ପାରିଛି । ଆଗକୁ ଏହି ବୈଷୟିକ ଜ୍ଞାନ କୌଶଳ ଚାଷୀମାନଙ୍କ ପାଖରେ ପହଞ୍ଚାଇବା ସହ ଅଧ୍ୟୟନ କରୁଥିବା ଛାତ୍ରଛାତ୍ରୀ କିଭଳି ଏଗ୍ରି-ଏଣ୍ଟରପ୍ରିନର ହୋଇ ସ୍ୱାବଲମ୍ବୀ ହୋଇପାରିବେ ସେନେଇ ଲକ୍ଷ୍ୟ ରଖିଛି ଉଦ୍ଭିଦ ବିଜ୍ଞାନ ବିଭାଗ ।
ବିନା ମାଟିରେ ଫଳୁଛି ପନିପରିବା । ଫୁଲକୋବି, ବନ୍ଧାକୋବି, ବ୍ରୋକଲି, ବାଇଗଣ, ବିଲାତିରେ ଭର୍ତ୍ତି ସବୁଜ ଘର । ରେଭେନ୍ସା ବିଶ୍ବବିଦ୍ୟାଳୟ ଉଦ୍ଭିଦ ବିଜ୍ଞାନ ବିଭାଗର ସବୁଜଘରେ ଅଭିନବ ଜ୍ଞାନକୌଶଳ । ହାଇଡ୍ରୋପନିକ ଉପାୟରେ ଅର୍ଥାତ କେବଳ ପାଣିରେ ଏହା ସମ୍ଭବ ହୋଇଛି । ଓଡିଶା ସରକାରଙ୍କ ବିଜ୍ଞାନ ଓ ବୈଷୟିକ ବିଭାଗ ପକ୍ଷରୁ ରେଭେନ୍ସାରେ ନିର୍ମାଣ ହୋଇଥିବା ଏହି ପ୍ରକଳ୍ପରେ ପୂର୍ବରୁ ସଫଳତାର ସହ ଷ୍ଟ୍ରବେରୀ ଓ କେଶର ଉତ୍ପାଦନ ହୋଇସାରିଛି । ଏବେ ନିଜସ୍ୱ ଉଦ୍ୟମରେ ବିଭାଗର ଅଧ୍ୟାପକ ଓ ଛାତ୍ରଛାତ୍ରୀଙ୍କ ଦ୍ବାରା ପନିପରିବା ଚାଷ ସମ୍ଭବ ହୋଇଛି । ଆଗାମୀ ଦିନରେ ଏହି ଜ୍ଞାନ କୌଶଳ କିପରି ଚାଷୀମାନଙ୍କ ପାଖରେ ପହଞ୍ଚିବ ଏଥିପାଇ ପଦକ୍ଷେପ ନିଆଯାଉଥିବା କହିଛନ୍ତି ଉଦ୍ଭିଦ ବିଜ୍ଞାନ ବିଭାଗର ସହକାରୀ ଅଧ୍ୟାପକ ।
ସାଧାରଣ ଚାଷ ଠାରୁ ଏହା ଅନେକାଂଶରେ ବ୍ୟୟ ସାପେକ୍ଷ ହୋଇଥିଲେ ସୁଦ୍ଧା ଏହି ପଦ୍ଧତିରେ ଅଧିକ ଉତ୍ପାଦନ ଓ ଅମଳ ହୋଇପାରୁଛି । ମାଟିରୁ ମିଳୁଥିବା ସମସ୍ତ ପୁଷ୍ଟିସାର କୃତିମ ଉପାୟରେ ଗଛଗୁଡ଼ିକରେ ପହଞ୍ଚାଯାଇ ପାରୁଛି । ଆଉ ବଞ୍ଚିବାପାଇ ଆବଶ୍ୟକ ଥିବା PH, TDS ଓ ECS ସ୍ତରକୁ ବି ନିୟନ୍ତ୍ରଣ କରାଯାଉଛି । ଆଗକୁ ହାଇଡ୍ରୋପନିକ ଉପାୟରେ କିଭଳି ଆହୁରି ଅଧିକ ଉତ୍ପାଦନ କ୍ଷମତା ବୃଦ୍ଧି ହେବ ସେ ନେଇ ଗବେଷଣା କରାଯାଉଛି ।

