spot_img
Home Blog Page 2703

ସାନ ସିନା ଜ୍ଞାନ ତା ମହାନ, ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଲେ ୩ ବର୍ଷର କୁନି ଝିଅ ଆରଭି ୟୁଭାନିକା

ଭୁବନେଶ୍ବର: କୁନି ବୟସ ହେଲେ ଅଗାଢ ଜ୍ଞାନ । ମାତ୍ର ୩ ବର୍ଷ ବୟସରେ ଇଣ୍ଡିଆ ବୁକ ଅଫ ରେକର୍ଡସରେ ସ୍ଥାନ ପାଇଛନ୍ତି ଭୁବନେଶ୍ବରର ଆରଭି ୟୁଭାନିକା । ସେ ଅନର୍ଗଳ ବାହରୁଛି ଶ୍ଳୋକ, ହନୁମାନ ଚାଳିଶା, ଜାତୀୟ ସଂଗୀତ, ଉତ୍କଳ ଜନନୀ, ସାଧାରଣ ଜ୍ଞାନ ଭଳି କେତେ କଣ । ଆରଭିଙ୍କ ଏହି ସଫଳତା ପାଇଁ ବହୁ ଅନୁଷ୍ଠାନ ପକ୍ଷରୁ ତାଙ୍କୁ ଦିଆଯାଇଛି ସମ୍ବର୍ଦ୍ଧନା ।

ସାନ ସିନା ଜ୍ଞାନ ତାର ମହାନ । ମାତ୍ର ୩ ବର୍ଷ ବୟସରେ କୁନି ଝିଅର କମାଲ । ଇଣ୍ଡିଆ ବୁକ ଅଫ ରେକର୍ଡସରେ ସ୍ଥାନ ପାଇଛନ୍ତି ବିସ୍ମୟ ବାଳିକା ଆରଭି ୟୁଭାନିକା । ମୁହଁରୁ ଅନର୍ଗଳ ବାହରୁଛି ଶ୍ଳୋକ, ହନୁମାନ ଚାଳିଶା, ଜାତୀୟ ସଂଗୀତ, ଉତ୍କଳ ଜନନୀ, ସାଧାରଣ ଜ୍ଞାନ । ଏହାସହ ୨୮ ରାଜ୍ୟ ଓ ତାହାର ରାଜଧାନୀ, ୧୨ ଜଣ କବି ଓ ସେମାନଙ୍କ ଉପାଧି ନାମ, ୧୦ ଜଣ ଲେଖକ ରଚନା କରିଥିବା ଗ୍ରନ୍ଥ ଓ ଉପନ୍ୟାସର ନାମ ଭଳି କେତେବେ କଣ ରହିଛି ଭୁବନେଶ୍ବରର ଆରଭିଙ୍କ ଜିଭ ଅଗରେ । ୪୭ଟି ସାଧାରଣ ଜ୍ଞାନ ପ୍ରଶ୍ନର ଉତ୍ତର ଦେଇ ଇଣ୍ଡିଆ ବୁକ ଅଫ ରେକର୍ଡରେ ସ୍ଥାନ ପାଇଛନ୍ତି ଆରଭି । ସ୍ବାସ୍ଥ୍ୟ ବିଭାଗରେ କାର୍ଯ୍ୟରତ ଯୁବ ଇଞ୍ଜିନିଅର ଚନ୍ଦନ ରାଉତ ଓ ମାତା ଇଞ୍ଜିନିଅର ସ୍ବପ୍ନାଶ୍ରୀ ସାମଲଙ୍କ କନ୍ୟା ଅଟନ୍ତି ଆରଭି  ।

ଆରଭିଙ୍କ ଏହି ସଫଳତା ପାଇଁ ବହୁ ଅନୁଷ୍ଠାନ ପକ୍ଷରୁ ପାଇଛନ୍ତି ସମ୍ବର୍ଦ୍ଧନା  । ଭୁବନେଶ୍ବରର ରୋଟାରି ଭବନରେ ଏକ ସମ୍ବର୍ଦ୍ଧନା କାର୍ଯ୍ୟକ୍ରମରେ ବିଶିଷ୍ଟ ସମାଜସେବୀ ତଥା ଜଜବା ଟ୍ରଷ୍ଟ ଅଧ୍ୟକ୍ଷ ସଫଦର ହସୀମ, ବିଶିଷ୍ଟ ଆଇନଜୀବୀ ହାସନ ଖାଁ, ଅଭିନେତା ବାବୁ ରାଜା, ଯୁବ ସମାଜସେବୀ ଗାୟତ୍ରୀ ମିଶ୍ର ଏହି କୁନି ଶିଶୁକୁ ଆଶିର୍ବାଦ ପ୍ରଦାନ କରିଛନ୍ତି  । ଆଗକୁ ଏସିଆ ଓ ଓ୍ବାର୍ଲଡ ରେକର୍ଡରେ ସ୍ଥାନ ପାଇବା ନେଇ ଆଶାବାଦୀ ଅଛନ୍ତି ଆରଭିଙ୍କ ମାତା ପିତା ।

କଟକରେ ବ୍ୟାଡମିଣ୍ଟନ ଫିଭର, ଜଲୱା ଦେଖାଉଛନ୍ତି ବିଶ୍ବର ସିଡେଡ ସଟଲର

କଟକ: ସିଲଭର ସିଟିରେ ସଟଲ ଜଲୱା । କଟକ ଜବାହରଲାଲ ନେହେରୁ ଇଣ୍ଡୋର ଷ୍ଟାଡିୟମରେ ଆରମ୍ଭ ହୋଇଛି ଓଡିଶା ମାଷ୍ଟର୍ସ ବି.ଡବ୍ଲୁ.ଏଫ ସୁପର ହଣ୍ଡ୍ରେଡ  ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟ । ଛଅ ଦିନ ଧରି ଚାଲିବାକୁ ଥିବା ଏହି ଟୁର୍ଣ୍ଣାମେଣ୍ଟରେ ବିଶ୍ବର ୨୭ଟି ଦେଶର ୩୨୭ରୁ ଅଧିକ ପୁରୁଷ ଓ ମହିଳା ଖେଳାଳି ଭାଗ ନେଇଛନ୍ତି । ଟୁର୍ଣ୍ଣାମେଣ୍ଟ ପାଇଁ ଜବାହରଲାଲ ନେହେରୁ ଇଣ୍ଡୋର ଷ୍ଟାଡିୟମକୁ ଖୁବ ସୁନ୍ଦର ଭାବେ ସଜ୍ଜା ଯାଇଛି । ଚାରୋଟି ମୁଖ୍ୟ କୋର୍ଟରେ ମ୍ୟାଚ ଖେଳାଯାଉଥିବା ବେଳେ ଗୋଟିଏ ପ୍ରାକ୍ଟିସ କୋର୍ଟ ରଖାଯାଇଛି।

କଟକରେ ବ୍ୟାଡମିଣ୍ଟନ ଫିଭର । ଜଲୱା ଦେଖାଉଛନ୍ତି ବିଶ୍ବର ସିଡେଡ ସଟଲର । ୨୭ ଦେଶର ୩୨୭ରୁ ଅଧିକ ଖେଳାଳିଙ୍କ ବେଷ୍ଟ ପରଫର୍ମାନସ । କୋଳାହଳମୟ ଜବାହରଲାଲ ନେହରୁ ଇଣ୍ଡୋର ଷ୍ଟାଡିୟମ । ଆରମ୍ଭ ହୋଇଛି ଓଡିଶା ମାଷ୍ଟର୍ସ ବି.ଡବ୍ଲୁ.ଏଫ ସୁପର ଟୁର୍ଣ୍ଣାମେଣ୍ଟ । ପ୍ରତିଭା ଦେଖାଉଛନ୍ତି ଖେଳାଳି । ଲଗାତର ଦ୍ବିତୀୟଥର ପାଇଁ ଏଠାରେ ଆୟୋଜିତ ହୋଇଛି  ବ୍ୟାଡମିଣ୍ଟନ ମହାକୁମ୍ଭ । ଏଥିରେ ସାରା ବିଶ୍ବର ୨୭ଟି ଦେଶର ୩୨୭ ସିଡେଡ୍ ଖେଳାଳି ଭାଗ ନେଇଛନ୍ତି। ଡେନମାର୍କ, ଇଟାଲୀ, ଇଂଲଣ୍ଡ, ଥାଇଲାଣ୍ଡ, ଇଣ୍ଡୋନେସିଆ, ମାଲେସିଆ, ବାଙ୍ଗଲାଦେଶ, ନେପାଳ ଭଳି ଦେଶର ଶ୍ରେଷ୍ଠ ଖେଳାଳି ଟୁର୍ଣ୍ଣାମେଣ୍ଟରେ ସାମିଲ ହୋଇଛନ୍ତି ।

ଗତବର୍ଷ ମଧ୍ୟ ଜବାହରଲାଲ ନେହେରୁ ଇଣ୍ଡୋର ଷ୍ଟାଡିୟମରେ ଓଡିଶା ମାଷ୍ଟର୍ସ ବି.ଡବ୍ଲୁ.ଏଫ ସୁପର ହଣ୍ଡ୍ରେଡ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟ ସଫଳତାର ସହ ଆୟୋଜିତ ହୋଇଥିଲା । ଗତଥର ଭଳି ଚଳିତ ଥର ମଧ୍ୟ ଖୁବ ଅଧିକ ସଂଖ୍ୟାରେ ଖେଳାଳି ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରିଛନ୍ତି । ଏଥିରେ ପ୍ରିୟାଂଶୁ ରାଜପଥ, ସାଇ ପ୍ରଣିତ ଭଳି ବଛା ବଛା ଖେଳାଳି ଅଛନ୍ତି । ଓଡିଶାରୁ ଦୁଇ ଭଉଣୀ ତଥା ଜଣାଶୁଣା ଅନ୍ତର୍ଜାତୀୟ ବ୍ୟାଡମିଣ୍ଟନ ଖେଳାଳି ଋତୁପର୍ଣ୍ଣା ଓ ଶ୍ବେତପର୍ଣ୍ଣା ଏଥିରେ ଭାଗ ନେଇଛନ୍ତି ।

 

ଭୁବନେଶ୍ବର ସହରର କାନ୍ଥ, ଗଛ, ଓ ବିଦ୍ୟୁତ ଖୁଣ୍ଟରେ ଟୁଲେଟ ଓ ବିଜ୍ଞାପନ ମାରୁଥିଲେ ସାବଧାନ !

ଭୁବନେଶ୍ବର: ରାଜଧାନୀ ଭୁବନେଶ୍ବର ସହରର କାନ୍ଥ, ଗଛ, ଓ ବିଦ୍ୟୁତ ଖୁଣ୍ଟରେ ଟୁଲେଟ ଓ ବିଜ୍ଞାପନ ମାରୁଥିଲେ ସାବଧାନ । ଟୁଲେଟ ଓ ବିଜ୍ଞାପନ ଲଗାଇବାରୁ ୩ ଜଣଙ୍କ ଠାରୁ ୫୦ ହଜାର ଲେଖାଏଁ ଦେଢ ଲକ୍ଷ ଟଙ୍କା ଜରିମାନା ଆଦାୟ କରିଛି ବିଏମସି । କେବଳ ଜରିମାନା ନୁହେଁ ବିଜ୍ଞାପନ ଲଗାଇଥିବା ସଂପୃକ୍ତ ସଂସ୍ଥା ନାଁରେ ଥାନାରେ ଏତଲା ଦିଆଯାଇଛି । ବିନା ଅନୁମତିରେ ବିଜ୍ଞାପନ ଲଗାଉଛନ୍ତି । ଏ ସବୁ ଲଗାଇବା ଦ୍ବାର ସୌନ୍ଦର୍ଯ୍ୟକରଣ , ପରିବେଶ ନଷ୍ଠ ଏବଂ ମାନବ ସମ୍ବଳ ଉପରେ ପ୍ରଭାବ ପଡୁଥିବା ବିଏମସି କମିଶନର କହିଛନ୍ତି ।

ମହଙ୍ଗା ପଡିଲା ଗଛ, କାନ୍ଥ ଓ ବିଦ୍ୟୁତ ଖୁଣ୍ଟରେ ଟୁଲେଟ- ବିଜ୍ଞାପନ ମାରିବା । ମିଶନ କ୍ନିନ ଟିପିଡବ୍ଳୁକୁ ଅମାନିଆଙ୍କ ବାଧା । ନିୟମ ନମାନି ଜରିମାନା ଗଣିଲେ ଉଲଂଘନକାରୀ । ବିଜ୍ଞାପନ ଦ୍ବାରା ନଷ୍ଟ ହେଉଛି ସହରର ସୌନ୍ଦର୍ଯ୍ୟକରଣ । ହଜାରେ କି ଦୁଇ ହଜାର ନୁହେଁ ପୁରା ଗଣିଲେ ୫୦ ହଜାର । ଭୁବନେଶ୍ବର ଫାଷ୍ଟ ଅଭିଯାନକୁ ଜୋରଦାର କରିବାକୁ ବିଏମସି ଦିନ ରାତି ଏକ କରିଛି । ହେଲେ କିଛି ଲୋକ ଓ ସଂସ୍ଥା ସୌନ୍ଦ୍ୟର୍ଯ୍ୟକରଣକୁ ବିଗାଡୁଛନ୍ତି । କିଏ ଗଛରେ ଟ୍ୟୁସନ ପାଇଁ ବିଜ୍ଞାପନ ଦେଉଛି ତ, ଆଉ କିଏ ବିଦ୍ୟୁତ ଖୁଣ୍ଟରେ ଘର ଭଡା ପାଇଁ ଟୁ-ଲେଟ ମାରୁଛି । ଆଉ କେଉଁ ସଂସ୍ଥା କାନ୍ଥରେ ବିଜ୍ଞାପନରେ ପୋତି ଦେଇଛି । ଏଠି ବ୍ୟବସାୟର ପ୍ରଚାରର ପାଇଁ ରଙ୍ଗୀନ କାନ୍ଥରେ ଲଗାଇଛି ପୋଷ୍ଟର  ।  ବିନା ଅନୁମତିରେ ବେଆଇନ ଭାବରେ ଟୁଲେଟ ଓ ବିଜ୍ଞାପନ ମାରି ୩ ଜଣଙ୍କ ଠାରୁ ଦେଢ ଲକ୍ଷ୍ୟ ଟଙ୍କା ଜରିମାନା ଆଦାୟ ସହ ସମ୍ପୃକ୍ତ ସଂସ୍ଥା ବିରୋଧରେ ଥାନାରେ ଏତଲା ଦେଇଛି ବିଏମସି ।

ଗଛ, କାନ୍ଥ ଓ ବିଦ୍ୟୁତ ଖୁଣ୍ଟରେ ପୋଷ୍ଟର ଲାଗିବା ଦ୍ବାରା ପରିବେଶ ନଷ୍ଟ ହେଉଛି । ଏ ସବୁ ସଫା କରିବା ପାଇଁ ସ୍ପ୍ରେ ମେସିନ ଓ କର୍ମଚାରୀ ନିୟୋଜିତ ହେଉଛନ୍ତି । ଏ ସବୁ ଦ୍ବାରା ବିଏମସିର ଅଯଥା ଟଙ୍କା ଖର୍ଚ୍ଚ ହେଉଛି । ଯିଏ ବି ସହରର ସୌନ୍ଦର୍ଯ୍ୟକରଣ ନଷ୍ଟ କରିବ ସେମନାଙ୍କ ବିରୋଧରେ ଦୃଢ କାର୍ଯ୍ୟନୁଷ୍ଠାନ ନିଆଯିବ ବୋଲି ବିଏମସି କମିଶନର ଚେତାବନୀ ଦେଇଛନ୍ତି ।

 

କିଏ ସେ ନିର୍ଦ୍ଦୟୀ? ଯିଏକି ଫିଙ୍ଗିଦେଲା ବୋରଓ୍ବେଲରେ..

ସମ୍ବଲପୁର: କିଏ ସେ ନିର୍ଦ୍ଦୟୀ, କିଏ ସେ ଅମାନୁଷିକ ? ନଜବାତକକୁ କିଏ ଫିଙ୍ଗିଦେଲା ବୋରଓ୍ବେଲରେ ? ଆଲୁଅକୁ ଦେଖୁ ଦେଖୁ ବୋରଓ୍ବେଲର ଅନ୍ଧାର ଗାତକୁ କିଏ ଠେଲିଦେଲା ନିଷ୍ପାପ ଶିଶୁକୁ ?  ଶିଶୁଟିକୁ ବୋରଓ୍ବେଲରେ କେହି ଫିଙ୍ଗିଦେଇଥିବା ସନ୍ଦେହ କରାଯାଉଛି । ଏଭଳି କାଣ୍ଡକୁ ଯେତେ ସମାଲୋଚନା, ନିନ୍ଦା କଲେ ବି କମ୍ ପଡ଼ିଯିବ । ଶିଶୁଟି କନ୍ୟା କି ପୁତ୍ର ସନ୍ତାନ ସ୍ପଷ୍ଟ ହୋଇନାହିଁ । ଶିଶୁଟିର ବାପାମାଆଙ୍କ ପରିଚୟ ମଧ୍ୟ ମିଳିପାରିନି  । କିନ୍ତୁ କିଏ ଏଭଳି ପଶୁ ଭଳି କାମ କରିଛି ତାହା ମଧ୍ୟ ଅସ୍ପଷ୍ଟ । ହେଲେ ଏଭଳି ପଶୁଭଳି କାମ ମଣିଷର ମାନବିକତା ଉପରେ ପ୍ରଶ୍ନ ଉଠାଇଛି ।

କିଏ ଏବଂ କାହିଁକି ଏଭଳି କାମ କରିଛି ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା । ସମ୍ବଲପୁର ଜିଲ୍ଲା ରେଙ୍ଗାଲୀ ବ୍ଲକର ଲରିପାଲି ଜଙ୍ଗଲ ଭିତରେ ଥିବା ଏକ ପରିତ୍ୟକ୍ତ ବୋରଓ୍ବେଲ ଭିତରେ ନବଜାତ ଶିଶୁ ପଡ଼ିରହିଛି । କଅଁଳ ଶିଶୁଟି କଇଁ କଇଁ କାନ୍ଦୁଥିବାବେଳେ ଶୁଣିଲା ବେଳକୁ ଛାତି ଫାଟି ପଡ଼ୁଛି । ଯେ କେହି ବି ଏ ଖବର ଶୁଣୁଛି ସେ ସେଠାକୁ ଧାଇଁ ଯାଉଛି । ମାତ୍ର କେଉଁ ରାକ୍ଷସୀ ମାଆ ଏଭଳି ,କ ନାରକୀୟ କାଣ୍ଡ ଭିଆଇଛି ତାହା ସମସ୍ତଙ୍କୁ ଚିନ୍ତାରେ ପକାଇଛି ।

ବୋରଓ୍ବେଲରେ ଥିବା ନବଜାତକର ଉଦ୍ଧାର ପାଇଁ ଯିବ ଭିକ୍ଟିମ ଲୋକେସନ କ୍ୟାମେରା

ଭୁବନେଶ୍ବର: ସମ୍ବଲପୁର ଜିଲ୍ଲା ରେଙ୍ଗାଲୀ ବ୍ଲକର ଲରିପାଲି ଜଙ୍ଗଲ ଭିତରେ ବୋରଓ୍ବେଲରେ ନବଜାତକର ଉଦ୍ଧାର ପାଇଁ ଯିବ ଭିକ୍ଟିମ ଲୋକେସନ କ୍ୟାମେରା । ଏହି କ୍ୟାମେରା ପଠାଇବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ଉଡ଼ାଜାହାଜରେ କ୍ୟାମେରା ପଠାଯିବ ।  ଭୁବନେଶ୍ବରରୁ ଏହି ଭିକ୍ଟିମ ଲୋକେସନ କ୍ୟାମେରା ପଠାଯିବ । ଏନେଇ ସୂଚନା ଦେଇଛନ୍ତି ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀ ।  ତେବେ ଭିକ୍ଟିମ କ୍ୟାମେରା ସାହାର୍ଯ୍ୟରେ ଶିଶୁଟି କେତେ ଦୂରରେ ଅଛି ଏବଂ ଶିଶୁର ଗତିବିଧି ଉପରେ ନଜର ରଖିବ ।

ସୂଚନା ଥାଉକି, ପରିତ୍ୟକ୍ତ ବୋରଓ୍ବେଲ ଭିତରେ ପଡ଼ିଛି ନବଜାତ ଶିଶୁ । ସମ୍ବଲପୁର ଜିଲ୍ଲା ରେଙ୍ଗାଲୀ ବ୍ଲକର ଲରିପାଲି ଜଙ୍ଗଲ ଭିତରେ ଥିବା ଏକ ପରିତ୍ୟକ୍ତ ବୋରଓ୍ବେଲ ଭିତରେ ନବଜାତ ଶିଶୁ ପଡ଼ିଥିବା ଜଣାପଡ଼ିଛି । ଜଙ୍ଗଲ ରାସ୍ତା ଦେଇ ଯାଉଥିବା କିଛି ଲୋକ ପ୍ରଥମେ କଅଁଳଶିଶୁର କାନ୍ଦିବା ଶୁଣି ବୋରଓ୍ବେଲ ପାଖକୁ ଯାଇଥିଲେ, ବୋରଓ୍ବେଲ ଭିତରୁ ନବଜାତ ଶିଶୁର କାନ୍ଦିବା ଶବ୍ଦ ଶୁଣି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପୋଲିସ ଦମକଳବାହିନୀ ଓ ବ୍ଲକ ପ୍ରଶାସନ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଛନ୍ତି । କେହି ଜାଣିଶୁଣି ନବଜାତ ଶିଶୁଟିକୁ ବୋରଓ୍ବେଲ ଭିତରେ ଫିଙ୍ଗି ଦେଇଥିବା ଅନୁମାନ କରାଯାଉଛି । ତେବେ କିଏ ଏବଂ କାହିଁକି ଫୋପାଡ଼ିଛି ତାହା ଏବେ ଚର୍ଚ୍ଚାର ବିଷୟ ପାଲଟିଛି ।

ସେପଟେ ନବଜାତକର କାନ୍ଦ ଶୁଭିବା ପରେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିଲା । ସ୍ଥାନୀୟ ଲୋକେ ପୋଲିସ ଏବଂ ଅଗ୍ନିଶମ ବିଭାଗକୁ ଖବର ଦେଇଥିଲେ । ଲୋକଙ୍କ ଗହଳି ଘଟଣାସ୍ଥଳରେ ଲାଗିଥିବାବେଳେ ଉଦ୍ଧାର କାର୍ଯ୍ୟ ଜାରି ରହିଛି । ଛୁଆର କାନ୍ଦ ଜୋରରେ ଶୁଭୁଥିବାବେଳେ ଶୀଘ୍ର ଉଦ୍ଧାର ହେବେ ସେ ନେଇ ଚାଲିଛି କାର୍ଯ୍ୟ ।

ରାୟଗଡ଼ା ଜିଲ୍ଲାରେ ବାଘ ଆତଙ୍କ, ବାଛୁରୀକୁ ମାରି ଖାଇଲା

ରାୟଗଡ଼ା: ପୁଣି ମହାରାଷ୍ଟ୍ର ମହାବଳର ବାଛୁରି ଶିକାର । ଘଟଣାଟି ଘଟିଛି ରାୟଗଡା ଜିଲ୍ଲା ଗୁଡାରି ବନାଞ୍ଚଳ ତେମ୍ବାଗୁଡା ଅଞ୍ଚଳରେ । ମହାବଳ ବାଘଟି ତେମ୍ବାଗୁଡା ରାଜେଶ ରାଓଙ୍କ ଗୁହାଳୁରୁ ବାଛୁରିକୁ ଟାଣି ନେଇ ବାଛୁରୀକୁ ମାରିଦେଇଛି । ଘଟଣାସ୍ଥଳରୁ ବାଛୁରିର କିଛି ଗୋଡ଼ଅଂଶ ସହ ରକ୍ତଛିଟା ଓ ମହାବଳ ବାଘର ପାଦଚିହ୍ନ ଠାବ କରିଛି ଗୁଡ଼ାରି ବନ ବିଭାଗ। ଫଳରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି । ସରକାରୀ ନିୟମ ଅନୁଯାୟୀ ବାଛୁରୀ ମାଲିକଙ୍କୁ କ୍ଷତିପୂରଣ ଦିଆଯିବା ବୋଲି ରେଞ୍ଜର ଦିଲ୍ଲୀପ ପଟ୍ଟନାୟକ ସୂଚନା ଦେଇଛନ୍ତି । ବର୍ତ୍ତମାନ ବାଘର ଗତିବିଧି ଉପରେ ନଜର ରଖିଛି ବନ ବିଭାଗ । ଏଥି ସହିତ ପାଖ ଗାଁ ଗୁଡିକରେ ବନ ବିଭାଗ ପକ୍ଷରୁ ଲୋକଙ୍କୁ ସଚେତନ କରାଯାଇଛି ।

ବୋରଓ୍ବଲରେ ଥିବା ନବଜାତ ଶିଶୁକୁ ଉଦ୍ଧାର ପାଇଁ ଜାରି ରହିଛି ନନଷ୍ଟପ ଅପରେସନ

ସମ୍ବଲପୁର: ପରିତ୍ୟକ୍ତ ବୋରଓ୍ବେଲରୁ ଜୀବନ ମାଗୁଛି ନବଜାତକ । ସମ୍ବଲପୁର ରେଙ୍ଗାଲୀ ବ୍ଲକର ଲରିପାଲି ଜଙ୍ଗଲ ଭିତରେ ବୋରଓ୍ବେଲରେ ପଡ଼ିଛି ଶିଶୁ । ଶିଶୁଟିକୁ ଉଦ୍ଧାର କରିବାକୁ ଚାଲିଛି ନନଷ୍ଟପ ଅପରେସନ । ଗତ ୬ଘଣ୍ଟାରୁ ଅଧିକ ସମୟ ଧରି ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ କରାଯାଉଛି । ପରିତ୍ୟକ୍ତ ବୋରଓ୍ବେଲର ନବଜାତକଟି ୨୦ରୁ ୨୫ ଫୁଟ ତଳେ ଶିଶୁଟି ଫସିରହିଥିବାବେଳେ ଉଦ୍ଧାରକାରୀ ଟିମ୍ ତାର ନିକଟତର ହେଉଛି । ଏବେ ହାତରେ ମାଟିଖୋଳା କାମ ଚାଲିଛି । ଅଗ୍ନିଶମ ବାହିନୀ, ଓଡ୍ରାଫ ସତର୍କତାର ସହ ମାଟି ଖୋଳା କାମ କରୁଥିବାବେଳେ ଏନଡିଆରଏଫ ଟିମ୍ ଘଟଣାସ୍ଥଳକୁ ଯାଉଛି ।

ସମାନ୍ତରାଳ ଗାତ ଖୋଳି ନଜବାତକଟିକୁ ଉଦ୍ଧାର କରିବାକୁ ଉଦ୍ୟମ କରାଯାଉଛି । ୩ଟି ଜେସିବି ସହାୟତାରେ ଗାତ ଖୋଳାଯାଉଛି । ଘଟଣାସ୍ଥଳରେ ୨ ଜଣ ଡାକ୍ତର ଉପସ୍ଥିତ ଅଛନ୍ତି । ଘଟଣାସ୍ଥଳରେ ଏଡିଏମ ଉପସ୍ଥିତ ରହି ଉଦ୍ଦାର କାର୍ଯ୍ୟର ଅନୁଧ୍ୟାନ କରୁଛନ୍ତି  । ଶିଶୁଟିର ନିକଟକୁ ଅକ୍ସିଜେନ ପାଇପ ପଠାଯାଇଛି । ଶିଶୁଟିକୁ କେହି ବୋରଓ୍ବେଲରେ ଫାପାଡ଼ି ଦେଇଥିବା ସନ୍ଦେହ କରାଯାଉଛି । ଜଙ୍ଗଲ ରାସ୍ତା ଦେଇ ଯାଉଥିବା କିଛି ଲୋକ ପ୍ରଥମେ କଅଁଳଶିଶୁର କାନ୍ଦିବା ଶୁଣି ବୋରଓ୍ବେଲ ପାଖକୁ ଯାଇଥିଲେ, ବୋରଓ୍ବେଲ ଭିତରୁ ନବଜାତ ଶିଶୁର କାନ୍ଦିବା ଶବ୍ଦ ଶୁଣି ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ପୋଲିସ, ଦମକଳବାହିନୀ ଓ ବ୍ଲକ ପ୍ରଶାସନ ଉଦ୍ଧାର କାର୍ଯ୍ୟରେ ଲାଗିଛନ୍ତି । ବୋରଓ୍ବେଲଟି ୫୦ ବର୍ଷ ତଳେ ଖୋଲାଯାଇଥିବା ସ୍ଥାନୀୟ ଲୋକ ସୂଚନା ଦେଇଛନ୍ତି ।

ମନମୋହୁଛି ଭୀମକୁଣ୍ଡ ଜଳପ୍ରପାତ, ଜମୁଛି ପର୍ଯ୍ୟଟକଙ୍କ ଭିଡ଼

ମୟୂରଭଞ୍ଜ: ସୌନ୍ଦର୍ଯ୍ୟରେ ଭରା ଭୀମକୁଣ୍ଡ ଜଳପ୍ରପାତ । ମୟୂରଭଞ୍ଜ ଠାକୁରମୁଣ୍ଡା ବ୍ଲକ ଭୀମକୁଣ୍ଡରେ ପର୍ଯ୍ୟଟକଙ୍କ ଭିଡ଼  । କିଏ ବଣ ଭୋଜି କରୁଛି ତ କିଏ ନାଚ ଗୀତରେ ବ୍ୟସ୍ତ । ପ୍ରକୃତିକଉ ମନୋଭରି ଉପଭୋଗ କରିବାରୁ ପହଞ୍ଚିଛନ୍ତି ଲୋକେ । ଅନନ୍ୟ ପ୍ରକୃତିର ଗନ୍ତାଘର ଭୀମକୁଣ୍ଡ। ଅପରୂପ ନୈସର୍ଗିକ ସୌନ୍ଦର୍ଯ୍ୟରେ ଭରା ଜଳପ୍ରପାତ। ସବୁଜ ବନାନୀରେ ଭରପୁର ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡାର ଭୀମକୁଣ୍ଡ। ମନୋରମ ପରିବେଶ ସାଙ୍ଗକୁ ବୈତରଣୀ ନଦୀର ସୁନୀଳ ଜଳପ୍ରପାତ ପର୍ଯ୍ୟଟକଙ୍କୁ କରେ ମନ୍ତ୍ରମୁଗ୍ଧ । ପ୍ରକୃତିକୁ ଆଉ ଟିକେ ନିକଟରୁ ଦେଖିବାକୁ ପହଞ୍ଚନ୍ତି ପର୍ଯ୍ୟଟକ । ପର୍ଯ୍ୟଟନ ଋତୁ ଆରମ୍ଭ ହୋଇଥିବାରୁ ଚଳିତ ବର୍ଷ ମଧ୍ୟ  ଭୀମକୁଣ୍ଡରେ ଜମିଛି ଗହଳି । ପିକନିକ ପାଇଁ ପହଞ୍ଚିଛନ୍ତି ସ୍କୁଲ ପିଲା ।

ବଣ ଭୋଜି ସାଙ୍ଗକୁ ଜମୁଛି ନାଚ ଗୀତର ଆସର। ରାଜ୍ୟ ସରକାରଙ୍କ ଉଦ୍ୟମରେ ଭୀମକୁଣ୍ଡକୁ ଗମନା ଗମନ, ସେଠାରେ ପାନୀୟ ଜଳ ସୁବିଧା ସହ ଆହୁରି ଅନେକ ଉନ୍ନୟମୂଳକ କାମ ହୋଇଛି। ପର୍ଯ୍ୟଟନ କ୍ଷେତ୍ରର ଅଧିକ ବିକାଶ ପାଇଁ ଅର୍ଥ ଅନୁମୋଦନ କରିଛନ୍ତି ରାଜ୍ୟ ସରକାର । ଯେଉଁଥିରେ ପର୍ଯ୍ୟଟକ କ୍ଷେତ୍ରର ଆହୁରି ସୁନ୍ଦର ହୋଇପାରିବ ବୋଲି କହିଛନ୍ତି ଭୀମକୁଣ୍ଡ ଉନ୍ନୟନ କମିଟି ସଭାପତି।

 

ମାଟି ମୂର୍ତ୍ତି ଦେଉଛି ରୋଜଗାର

ଚାନ୍ଦବାଲି: ରାଜ୍ୟ ସରକାରଙ୍କ ମିଶନ ଶକ୍ତି କରିଛି ମହିଳାଙ୍କୁ ରୋଜଗାରକ୍ଷମ । ମାଟି ମୂର୍ତ୍ତି ତିଆରି କରି ମହିଳା ହୋଇଛନ୍ତି ସ୍ବାବଲମ୍ବୀ । ଚାନ୍ଦବାଲି ହଳଦିଆ ଗାଁର ମହିଳା ମାନେ ହେଉଛନ୍ତି ଆର୍ଥିକ ସ୍ଥରରେ ସୁଦୃଢ । ବିଭିନ୍ନ ମେଳାରେ ବିକ୍ରି ହେଉଛି ବିଶ୍ୱକର୍ମା ଉତ୍ପାଦକ ଗୋଷ୍ଠୀର ସାମଗ୍ରୀ । ଦିନକୁ ଦିନ କମୁଛି ମାଟି ତିଆରି ସାମଗ୍ରୀର ଚାହିଦା। ହେଲେ ରାଜ୍ୟ ସରକାରଙ୍କ ପ୍ରଚେଷ୍ଟାରେ ସଂଚାର ହୋଇଛି ନୂଆ ଆଶା। ଚାନ୍ଦବାଲି ହଳଦିଆ ଗାଁର ମହିଳା ମାନେ ରାଜ୍ୟ ସରକାରଙ୍କ ତରଫରୁ ଟେରାକୋଟା ପ୍ରଶିକ୍ଷଣ ନେବା ପରେ ସୁନ୍ଦର ସୁନ୍ଦର ମୂର୍ତ୍ତି ଏବଂ ଘରକରଣା ସାମଗ୍ରୀ ତିଆରି କରୁଛନ୍ତି। ଅବସର ସମୟରେ ସେ ମାଟି ମୂର୍ତ୍ତି ତିଆରି କରୁଛନ୍ତି ଯେଉଁଥିରୁ ହେଉଛି ଭଲ ରୋଜଗାର । ମାଟିରେ ତିଆରି ହେଉଛି ଘୋଡ, ଗଣେଶ ମୂର୍ତ୍ତି ଦୀପ ସହ ଅନ୍ୟାନ ସାମଗ୍ରୀ ।

ରାଜ୍ୟ ସରକାରଙ୍କ ମିଶନ ଶକ୍ତି ବିଭାଗର ସହାୟତାରେ ବିଶ୍ୱକର୍ମା ଉତ୍ପାଦକ ଗୋଷ୍ଠୀ ତିଆରି କରିପାରୁଛନ୍ତି ବିଭିନ୍ନ ଜିନିଷ। ଯାହାକୁ ବିଭିନ୍ନ ମେଳାରେ ବିକ୍ରି କରି ବେଶ ଦୁଇ ପଇସା ରୋଜଗାର ହୋଇପାରୁଛି। ପରିବାରର ଆର୍ଥିକ ମାନଦଣ୍ଡକୁ ସୁଦୃଢ କରିପାରିଛନ୍ତି ଗାଁର ମହିଳା । ରାଜ୍ୟ ସରକାର ଟେରାକୋଟା ପ୍ରଶିକ୍ଷଣ ସହ ମେସିନ ଯୋଗାଇ ଦେଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛନ୍ତି ମହିଳା ଗୋଷ୍ଠୀ।

 

ଗାଁ ଗାଁରେ ବିକାଶର ଛାପ, ଉପାନ୍ତ ଅଞ୍ଚଳରେ ସୁଦୃଢ ହେଉଛି ଗମନା ଗମନ

ଧର୍ମଗଡ଼: ଉପାନ୍ତ ଅଞ୍ଚଳରେ ସୁଦୃଢ ହେଉଛି ଗମନା ଗମନ । କଳାହାଣ୍ଡି ପାଇଁ ବିକାଶର ରୋଲ ମଡେଲ ସାଜିଛି ଲକ୍ଷ୍ମୀ ବସ୍ । ଧର୍ମଗଡର ୬ଟି ବ୍ଲକରେ ଗଡୁଛି ଭସ୍। କଲେଜ ପାଇଁ ହେଉ ବା ମେଡିକାଲ ଯିବାକୁ ଆଉ ହେଉନି ସମସ୍ୟା । ୫ ଟଙ୍କାରେ ବି ଗନ୍ତବ୍ୟସ୍ଥଳରେ ପହଞ୍ଚୁଛନ୍ତି ଯାତ୍ରୀ। ଗାଁ ଗାଁରେ ବିକାଶର ଛାପ । ଉପାନ୍ତ ଅଞ୍ଚଳରେ ସୁଦୃଢ ହେଉଛି ଗମନା ଗମନ । ଘର ଦୁଆର ମୁହଁ ଦେଇ ଗଡୁଛି ବସ୍ । ଗାଁରୁ ସହରରେ ପହଞ୍ଚିବାକୁ ଆଉ ଲୋକେ ହେଉନାହାନ୍ତି ହନ୍ତସନ୍ତ । ଏ ଦୃଶ୍ୟ କଳାହାଣ୍ଡି ଜିଲ୍ଲା ଧର୍ମଗଡର ।  ଏଠାକାର ୬ଟି ବ୍ଲକ ଓ ୧୩୦ରୁ ଉର୍ଦ୍ଧ୍ବ ଗ୍ରାମ ପଞ୍ଚାୟତରେ ଗଡୁଛି ବସ୍। ସୁବିଧାରେ ବିଭିନ୍ନ ସ୍ଥାନକୁ ଯାତ୍ରା କରିପାରୁଛନ୍ତି ଲୋକେ। ବସରେ ବସି କିଏ କଲେଜ ବାହାରୁଛି ତ କିଏ ହସପିଟାଲ। ଜରୁରୀ କାମରେ ଜଲଦି ଗନ୍ତବ୍ୟସ୍ଥଳରେ ପହଞ୍ଚାଇବାରେ ଲକ୍ଷ୍ମୀ ବସ୍ କରୁଛି ସାହାଯ୍ୟ ।

ଦିନ ଥିଲା ଧର୍ମଗଡ଼ ଉପଖଣ୍ଡର କେତେକ ଗାଁକୁ ଘରୋଇ ବସ ଚଳାଚଳ କରୁଥିଲା। ଅନେକ ଗାଁ ବସ ସେବାରୁ ବଞ୍ଚିତ ରହୁଥିଲେ। ରାଜ୍ୟ ସରକାରଙ୍କ ଦ୍ବାରା ଲକ୍ଷ୍ମୀ ବସ୍ ଚଳାଚଳ ପରେ ଏବେ ସବୁ ଗାଁ କୁ ମିଳିଲା ବସ୍ ସେବା l ଘରୋଇ ବସ୍ ତୁଳନା ରେ ଲକ୍ଷ୍ମୀ ବସରେ ଭଡା ମଧ୍ୟ କମ ରହିଛି । 5ଟଙ୍କା ବିନିମୟରେ ବି ଠିକଣା ଜାଗାରେ ପହଞ୍ଚୁଛନ୍ତି ଲୋକେ। ବ୍ୟାଙ୍କ ସେବା ହେଉ କି ବ୍ଲକ କାର୍ଯ୍ୟାଳୟ, ମେଡିକାଲ ହେଉ କି କୌଣସି ସରକାରୀ କାମ। ସହଜରେ ହେଉଛି ଯାତାୟତ। ଲକ୍ଷ୍ମୀ ବସ୍ ସେବା ପାଇ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ଲୋକ l