ଭୁବନେଶ୍ୱର: ସମ୍ବାଦ ଋଣ ଘୋଟାଲା ମାମଲା ଇଓଡବ୍ଲୁର ତନାଘନା । EOWରେ ହାଜର ହେଲେ ସମ୍ବାଦ ଏଚଆର ମୁଖ୍ୟ ବୈଜୟନ୍ତୀ କର । କର୍ମଚାରୀଙ୍କ ନାଁରେ ବେଆଇନ ଋଣ ଉଠାଣ ମାମଲାରେ ହାଜର ହୋଇଛନ୍ତି । ତେବେ ସାମ୍ବାଦିକଙ୍କ ପ୍ରଶ୍ନ ବେଳେ କର୍ମଚାରୀଙ୍କ ପାଁରେ ଋଣ ନେଇଥିବା କଥାକୁ ମାନିଛନ୍ତି ବୈଜୟନ୍ତୀ । ଗତକାଲି ସମ୍ବାଦ ଭବନରେ ମାରାଥନ ୭ ଘଣ୍ଟା ଜେରା କରିଥିଲା EOW । ଆଜି EOWରେ ହାଜର ପରେ ଗୁଡେଇ ତୁଡେଇ ଜେରା କରାଯାଉଛି ।
ଗଶେଶ ଚତୁର୍ଥୀରେ ନୂଆ ସଂସଦ ଭବନରେ ସ୍ବତନ୍ତ୍ର ଅଧିବେଶନ
ନୂଆଦିଲ୍ଲୀ: ଅତୀତର ତିକ୍ତତାକୁ ଭୁଲି ଏବେ ଆଗକୁ ବଢିବାର ବେଳ । ନୂଆ ସଂସଦ ଭବନରେ ସ୍ବତନ୍ତ୍ର ଅଧିବେଶନକୁ ସମ୍ବୋଧିତ କରି ଏହି ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗଶେଶ ଚତୁର୍ଥୀରେ ଆଜି ନୂଆ ସଂସଦ ଭବନର ଶ୍ରୀଗଶେଶ କରି ମୋଦି ଦେଶବାସୀଙ୍କୁ ଉଦବୋଧନ ଦେଇଛନ୍ତି । ନୂଆ ସଂସଦ ଭବନ ୧୪୦ କୋଟି ଭାରତୀୟଙ୍କର ଆଶାର ପ୍ରତୀକ ।
ଏହାସହ ନୂଆ ସଂସଦରେ ମହିଳା ସଂରକ୍ଷଣ ବିଲ ଆଣିବାକୁ ସେ ଶପଥ ନେଇଥିବା ଘୋଷଣା କରିଛନ୍ତି । ଯାହାକୁ ନାରୀ ଶକ୍ତି ବନ୍ଦନ ଅଧିନିୟମ ନାମକରଣ କରାଯାଇଛି । ଏଥିରେ ବିଧାନସଭା ଓ ଲୋକସଭା ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ କରିବାକୁ ବ୍ୟବସ୍ଥା ଅଣାଯାଇଛି । ଯାହା ପୂର୍ବରୁ ରାଜ୍ୟସଭାରେ ପାରିତ ହୋଇଯାଇଛି । ଗତକାଲିଠାରୁ ସଂସଦର ସ୍ବତନ୍ତ୍ର ଅଧିବେଶନ ଆରମ୍ଭ ହୋଇଥିବାବେଳେ ଆଜି ନୂଆ ସଂସଦ ଭବନରେ ଏହାର ଶୁଭାରମ୍ଭ ହୋଇଛି । ଏହି ସ୍ବତନ୍ତ୍ର ଅଧିବେଶନ ୫ଦିନ ଧରି ଚାଲିବ ।
ସୃଷ୍ଟିହେଲା ଲଘୁଚାପ କ୍ଷେତ୍ର, ୧୮ ଜିଲ୍ଲାକୁୁ ୟେଲୋ ଆଲର୍ଟ ଜାରି
ଭୁବନେଶ୍ୱର: ସୃଷ୍ଟି ହେଲା ଲଘୁଚାପ । ଗତକାଲିର ଘୂର୍ଣ୍ଣିବଳୟ ପ୍ରଭାବରେ ଉତ୍ତରପଶ୍ଚିମ ବଙ୍ଗୋପସାଗର ପାର୍ଶ୍ବବର୍ତ୍ତୀ ପଶ୍ଚିମବଙ୍ଗ-ଓଡ଼ିଶା ଉପକୂଳର ସମୁଦ୍ରରେ ଆଜି ଏକ ଲଘୁଚାପ କ୍ଷେତ୍ର ସୃଷ୍ଟି ହୋଇଛି । ଆଗାମୀ ୨ଦିନ ଯାଏ ଉତ୍ତର ଓଡ଼ିଶା-ଦକ୍ଷିଣ ଝାଡ଼ଖଣ୍ଡ ମଧ୍ୟ ଦେଇ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତିକରିବା ସମ୍ଭାବନା ରହିଛି । ଲଘୁଚାପର ସର୍ବାଧିକ ପ୍ରଭାବ ଉପକୂଳ, ଉତ୍ତର ଓ ଦକ୍ଷିଣ ଓଡ଼ିଶାର ପଡ଼ିବ । ପ୍ରଭାବରେ ଆଜି ପାଇଁ ୧୮ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । ମୟୂରଭଞ୍ଜ, କେନ୍ଦୁଝର, ବାଲେଶ୍ବର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ପୁରୀକୁ ଅରେଞ୍ଜ ଆଲର୍ଟ ଜାରି ହୋଇଛି ।
ଆସନ୍ତାକାଲି ଆଭ୍ୟନ୍ତରୀଣ ଓଡ଼ିଶାର ୯ଜିଲ୍ଲାକୁ ଅରେଞ୍ଜ ଆଲର୍ଟ ଜାରି ହୋଇଛି । ଝାରସୁଗୁଡ଼ା, ସମ୍ବଲପୁର, ବରଗଡ଼, ସୋନପୁର, ବଲାଙ୍ଗୀର, ବୌଦ୍ଧ, କଳାହାଣ୍ଡି, କନ୍ଧମାଳ , ଅନୁଗୁଳରେ ବର୍ଷା ହେବ । ୧୨୦ରୁ ୨୦୦ ମିଲିମିଟର ବର୍ଷା ସମ୍ଭାବନା ରହିଛି । ୨୧ତାରିଖରେ ମଧ୍ୟ ପ୍ରବଳରୁ ଅତି ପ୍ରବଳ ବର୍ଷା ନେଇ ୮ଜିଲ୍ଲାକୁ ଅରେଞ୍ଜ, ୮ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି। କଚ୍ଚା ରାସ୍ତା ଓ ଘର ପ୍ରଭାବିତ ହୋଇପାରେ । ଜଳବନ୍ଦୀ ସ୍ଥିତି ଉପୁଜିପାରେ । ଗତ ୨୪ ଘଣ୍ଟାରେ କେନ୍ଦୁଝର ଝୁମ୍ପୁରାରେ ସର୍ବାଧିକ ୬୭.୨ ମିଲିମିଟର ବର୍ଷା ରେକର୍ଡ ହୋଇଛି ।
ଗଣମାଧ୍ୟମ ଓ ନିଜ ପ୍ରତିପତିକୁ ଢା଼ଲ କରି ସୌମ୍ୟ ଚଳାଇଥିବା ସ୍କାମ୍ ଏବେ ପଦାରେ ପଡ଼ିଛି
ଭୁବନେଶ୍ୱର: ଆଇନ ସମସ୍ତଙ୍କ ପାଇଁ ସମାନ। ହେଲେ ଇଷ୍ଟର୍ଣ୍ଣ ମିଡିଆ ପରି ଗଣମାଧ୍ୟମ ଓ ଏହାର ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ସମ୍ଭବତଃ ଭାବିଥିଲେ ଗଣମାଧ୍ୟମ ପାଇଁ ସାତ୍ଖୁନ୍ ମାଫ୍ ବୋଲି। କିନ୍ତୁ ସବୁବେଳେ ସତ୍ୟର ବିଜୟ ହୋଇଛି। ଆଇନର ବିଜୟ ହୋଇଛି। ଗଣମାଧ୍ୟମ ଓ ନିଜ ପ୍ରତିପତିକୁ ଢା଼ଲ କରି ସୌମ୍ୟରଞ୍ଜନ ଯେଉଁ ସ୍କାମ୍ ଚଳାଇଥିଲେ ତାହା ଏବେ ପଦାରେ ପଡ଼ିବା ପରେ ସେ ଭୟଭୀତ ହୋଇ ବିଭିନ୍ନ ବର୍ଗର ପ୍ରତିକ୍ରିୟା ନେଇ ଲୋକଙ୍କୁ ଭ୍ରମିତ କରିବାକୁ ଚେଷ୍ଟା କରୁଛନ୍ତି। ଗଣମାଧ୍ୟମର କଣ୍ଠରୋଧ କରିବା ଗଣତନ୍ତ୍ର ପାଇଁ ବିପଦ ଏହା ନିଃସନ୍ଦେହ।
କିନ୍ତୁ ଗଣମାଧ୍ୟମକୁ ଢ଼ାଲ କରି କିଛି ସଂଗଠିତ ଅପରାଧ ଚାଲିଥାଏ, ତାହା କଣ ଗଣମାଧ୍ୟମର ସମ୍ମାନ ଓ ଅଧିକାର ଦାବି କରିପାରିବ କି ? ସମ୍ବାଦ ଓ କନକ ନ୍ୟୁଜ୍କୁ ଯେଉଁମାନେ ପ୍ରତିକ୍ରିୟା ଦେଇଛନ୍ତି, ସେମାନେ ସମସ୍ତେ ଗଣମାଧ୍ୟମର ସ୍ବାଧୀନତା ନେଇ ଉଦବେଗ ପ୍ରକାଶ କରୁଛନ୍ତି। ଏହା ସ୍ବାଗତଯୋଗ୍ୟ ପଦକ୍ଷେପ। କିନ୍ତୁ ସେମାନେ ହୁଏତ ଜାଣିନାହାନ୍ତି ଯେ, ସମ୍ବାଦ, କନକନ୍ୟୁଜ୍ ଏବଂ ରେଡିଓ ଚକୋଲେଟ୍ରେ କାମ କରୁଥିବା କର୍ମଚାରୀ କେଉଁଭଳି ଠକାମିର ଶିକାର ହୋଇଛନ୍ତି। ଆଉ ଏହି ଠକେଇ ଅନ୍ୟ କେହି ନୁହେଁ ଖୋଦ୍ ମାଲିକ ତଥା ମୁଖ୍ୟ ସମ୍ପାଦକଙ୍କ ନିର୍ଦ୍ଦେଶରେ ଆଉ ମାନବ ସମ୍ବଳ ବିଭାଗ ଅଧିକାରୀଙ୍କ ମାର୍ଫତରେ ଦୀର୍ଘ ବର୍ଷ ହେଲା ଚାଲିଆସିଛି।
୧୯୮୪ ମସିହାରେ ସମ୍ବାଦ ପ୍ରତିଷ୍ଠା ହେବା ପରଠୁ ଏହି ଋଣ ଘୋଟାଲା ତାର କାୟା ବିସ୍ତାର କରିଆସିଛି। ବହୁ କର୍ମଚାରୀ ଏହି ଋଣ ଜାଲରେ ରୁନ୍ଧି ହୋଇ ତଳି ତଳାନ୍ତ ହୋଇଛନ୍ତି। ଋଣ ନେବାକୁ ମନା କରୁଥିବା କର୍ମଚାରୀଙ୍କୁ ନାନା ଭାବରେ ନିର୍ଯାତନାର ଶିକାର ହେବାକୁ ପଡ଼ିଛି। କିଛି ପୂର୍ବତନ କର୍ମଚାରୀ ମଧ୍ୟ ସମ୍ବାଦ ସପକ୍ଷରେ ଠିଆ ହେବାକୁ ଆଗଭର ହୋଇଛନ୍ତି। କିନ୍ତୁ ସେମାନେ ନିଜକୁ ନିଜେ ଥରେ ପଚାରନ୍ତୁ କେଉଁଭଳି ନିର୍ଯାତନାର ଶିକାର ହୋଇଥିଲେ। ଆଜି କେଉଁ ପ୍ରଲୋଭନରେ ସେ ନିର୍ଯାତନାକୁ ସେମାନେ ଭୁଲିଗଲେ? ବାହାରର ଯେଉଁମାନେ ତଦନ୍ତକୁ ବିରୋଧ କରୁଛନ୍ତି, ସେମାନେ ଯଦି ବାସ୍ତବରେ ଗଣମାଧ୍ୟମର ସ୍ବାଧୀନତା ପାଇଁ ଉଦବିଗ୍ନ ହୋଇଥାନ୍ତେ ତାହେଲେ ଗଣମାଧ୍ୟମକୁ ଢ଼ାଲ କରି ଯେଉଁ ସଂଗଠିତ ଅପରାଧ ଚାଲିଛି ତାଆଡ଼କୁ ଥରେ ଚାହିଁଥାନ୍ତେ।
ଧରିନିଆଯାଉ ଇଷ୍ଟର୍ଣ୍ଣ ମିଡିଆ ଏଭଳି କୌଣସି ଅପରାଧ କରିନାହିଁ, ଯଦି ଅପରାଧ କରିନାହିଁ, ତାହେଲେ ତଦନ୍ତକୁ ଭୟ କାହିଁକି? କିଛି ଭଡ଼ାଟିଆଙ୍କୁ ପ୍ଲାକାର୍ଡ ଧରି ଠିଆ କରାଇଛନ୍ତି କାହିଁକି? ଗଣମାଧ୍ୟମ ଅଫିସରେ ଯଦି ଅପରାଧ ସଂଗଠିତ ହୋଇଛି ସେଠିକୁ ତଦନ୍ତ ପାଇଁ ପୋଲିସ ଯିବା ଦ୍ବାରା ଗଣମାଧ୍ୟମର କିଭଳି କଣ୍ଠରୋଧ ହେଲା ତାହା ବୁଝାପଡୁନାହିଁ। ସୌମ୍ୟବାବୁ ଯଦି ଏତେ ସଚ୍ଚୋଟ ତାହେଲେ ଗୋଟିଏ ସତ କଥା କହିବେ କି? କର୍ମଚାରୀଙ୍କ ନାଁରେ ଋଣ କରି ସେ ଟଙ୍କା ହଡ଼ପ କରିଛନ୍ତି କି ନାହିଁ? ଗୋଟିଏ ପ୍ରଶ୍ନର ଯଦି ସେ ଉତ୍ତର ଦିଅନ୍ତେ ତାହେଲେ ସମସ୍ତେ ବୁଝିପାରନ୍ତେ ଭଦ୍ରମୁଖା ତଳେ କେମିତି ଗୋଟେ ଶୋଷକ ଲୁଚି ରହିଛି।
ଖାଲି ଋଣ କରି ଟଙ୍କା ହଡପ ନୁହେଁ, ବରଂ ଏହି ଋଣ କରିବା ଲାଗି କାଗଜପତ୍ର ଜାଲିଆତି ଏବଂ ବ୍ୟାଙ୍କ ଅଧିକାରୀଙ୍କୁ ଉତ୍କୋଚ୍ଚ ଦେବା ଭଳି ସଙ୍ଗୀନ ଅଭିଯୋଗ ମଧ୍ୟ ତାଙ୍କ ନାଁରେ ଆସିଛି। ଏହାର ସ୍ପଷ୍ଟୀକରଣ ଦେବେ କି ସୌମ୍ୟରଞ୍ଜନ ପଟ୍ଟନାୟକ? ଅନ୍ୟ କାହାକୁ ବଦନାମ କରିବା ଲାଗି ମିଛ ସତ ଲେଖିବାକୁ ସେ ଯେଉଁ ଆମ ଘର ହାଲଚାଲ ସ୍ତମ୍ଭର ସହାୟତା ନିଅନ୍ତି ଏବେ ସେଇ ଆମ ଘର ହାଲଚାଲରେ ଲେଖିବେ କି ଋଣ କାରଣରୁ କେତେ କର୍ମଚାରୀଙ୍କର ସେ ଜୀବନ ନେଇଛନ୍ତି?
ହନିଟ୍ରାପ୍ ଓ ଠକେଇ ମାମଲା, ୨ଦିନିଆ ରିମାଣ୍ଡରେ ଗଲା ଇରାନୀ ପାତ୍ରର ସ୍ବାମୀ ନିଶିକାନ୍ତ
ଭୁବନେଶ୍ୱର: ଖୋଲିବ ଇରାନୀ ଗ୍ୟାଙ୍ଗର ହନିଟ୍ରାପ୍ ଓ ଠକେଇ ଗୁମର । ରିମାଣ୍ଡରେ ଗଲା ଇରାନୀ ପାତ୍ରର ସ୍ବାମୀ ବାପି ଓରଫ ନିଶିକାନ୍ତ ପାତ୍ର । ନିଶିକାନ୍ତକୁ ୨ ଦିନିଆ ରିମାଣ୍ଡରେ ନେଇଛି ପୋଲିସ । ନିଶିକାନ୍ତକୁ ଦୁଇଦିନ ରିମାଣ୍ଡରେ ନେବାକୁ ଅନୁମତି ଦେଇଛନ୍ତି ଭୁବନେଶ୍ବର ଜେଏମଏଫସି-୧ କୋର୍ଟ । ଘଟଣାରେ ୪ଟି ମାମଲା ରୁଜୁ ହୋଇଥିବା ବେଳେ ୫ ଜଣ ଗିରଫ ହୋଇଛନ୍ତି । ଆଗକୁ ରିମାଣ୍ଡରେ ଆସିବ ଇରାନୀ ପାତ୍ର ।
ସୁନ୍ଦରଗଡ଼ରେ କାୟା ମେଲାଉଛି ସ୍କ୍ରବ ଟାଇଫସ, ୨୪ ଘଣ୍ଟାରେ ୧୦ ନୂଆ ଆକ୍ରାନ୍ତ ଚିହ୍ନଟ
ସୁନ୍ଦରଗଡ଼: ସୁନ୍ଦରଗଡ଼ରେ କାୟା ମେଲାଉଛି ସ୍କ୍ରବ ଟାଇଫସ । ୨୪ ଘଣ୍ଟା ମଧ୍ୟରେ ଚିହ୍ନଟ ହେଲେ ଆଉ ୧୦ ଆକ୍ରାନ୍ତ । ଏହି ନୂଆ ଆକ୍ରାନ୍ତଙ୍କୁ ମିଶାଇ ସୁନ୍ଦରଗଡରେ ଆକ୍ରାନ୍ତଙ୍କ ସଂଖ୍ୟା ୧୯୩ରେ ପହଞ୍ଚିଛି । ପୂର୍ବରୁ ସ୍କ୍ରବ ଟାଇଫସରେ ଜଣଙ୍କର ମୃତ୍ୟୁ ହୋଇଥିଲା । ତେବେ ଚିକିତ୍ସା ପାଇଁ ଯଥେଷ୍ଟ ଔଷଧ ମହଜୁଦ ଥିବା ସୂଚନା ଦେଇଛନ୍ତି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ । ଏହାସହ ଲୋକଙ୍କୁ ସଚେତନ କରାଯିବା ସହ ଟେଷ୍ଟିଂ ବୃଦ୍ଧି କରିବାକୁ ନିର୍ଦ୍ଦେଶ ଦିଆଯାଇଛି ।
ଗଣେଶ ମୂର୍ତ୍ତି ନେବା ସମୟରେ ବିଦ୍ୟୁତ ସଂସ୍ପର୍ଶରେ ଆସି ଜଣେ ଛାତ୍ର ମୃତ
କଟକ: ଗଣେଶ ପୂଜାରେ ଅଘଟଣ । କଟକ ନରାଜ ପାଖ ଏକ ଘରୋଇ ବିଶ୍ବବିଦ୍ୟାଳୟରେ ଅଘଟଣ । ଗଣେଶ ପୂଜା ପାଇଁ ଗଣେଶ ମୂର୍ତ୍ତି ନେବା ସମୟରେ ବିଦ୍ୟୁତ ସଂସ୍ପର୍ଶରେ ଆସିଲେ ୩ ଜଣ ଛାତ୍ର । ଜଣଙ୍କର ମୃତ୍ୟୁ ହେଇଥିବା ବେଳେ, ଅନ୍ୟ ୨ ଜଣ ଆହତ ହୋଇଛି । ୨ ଜଣଙ୍କ ଆହତଙ୍କୁ କଟକର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ମୁଣ୍ଡରେ ଆଘାତ ଲାଗିଥିବାରୁ ଦୁଇ ଜଣ ଛାତ୍ରଙ୍କ ଅବସ୍ଥା ଗୁରୁତର ରହିଛି ।
୨୪ ଘଣ୍ଟା ଭିତରେ କାନାଡା କୂଟନୀତିଜ୍ଞଙ୍କୁ ବହିଷ୍କାର କରି ଜବାବ ଦେଲା ଭାରତ
ନୂଆଦିଲ୍ଲୀ: ଖାଲିସ୍ତାନୀ ଆତଙ୍କବାଦୀ ହରଦୀପ ସିଂ ହତ୍ୟାକାଣ୍ଡରେ ଭାରତର ସମ୍ପୃକ୍ତି ଥିବା ଆରୋପ ଲଗାଇ କାନାଡା ସରକାର ସୋମବାର ଭାରତର ଜଣେ ବରିଷ୍ଠ କୂଟନୀତିଜ୍ଞଙ୍କୁ ବହିଷ୍କାର କରିବା ନେଇ ଆଦେଶ ଦେଇଥିଲେ । ତେବେ ଏହାର ୨୪ ଘଣ୍ଟା ଭିତରେ ଭାରତ ଯେସାକୁ ତେସା ନୀତି ଆପଣାଇ ସମାନ ଡଙ୍ଗରେ ଜବାବ ଦେଇଛି । କାନାଡାର ଏହି କାର୍ଯ୍ୟାନୁଷ୍ଠାନର ଜବାବରେ ଭାରତ ମଧ୍ୟ କାନାଡାର ଜଣେ ବରିଷ୍ଠ କୂଟନୀତିଜ୍ଞଙ୍କୁ ବହିଷ୍କାର କରିଦେଇଛି । କେନ୍ଦ୍ର ସରକାର ଭାରତରେ କାନାଡାର ହାଇକମିଶନରଙ୍କୁ ତଲବ କରି ପାଞ୍ଚ ଦିନ ଭିତରେ ଭାରତ ଛାଡ଼ିବା ପାଇଁ କହିଛନ୍ତି ।
ସରକାର କହିଛନ୍ତି ଯେ, ଏହି କାର୍ଯ୍ୟାନୁଷ୍ଠାନ ଆମର ଅନ୍ତରୀଣ ମାମଲାରେ କାନାଡାର କୂଟନୀତିଜ୍ଞଙ୍କ ହସ୍ତକ୍ଷେପ ଏବଂ ଭାରତ ବିରୋଧୀ କାର୍ଯ୍ୟକଳାପରେ ତାଙ୍କର ସମ୍ପୃକ୍ତି ଉପରେ ଭାରତ ସରକାରଙ୍କ ବୃଦ୍ଧି ଚିନ୍ତାକୁ ଦର୍ଶାଉଛି । ଜୁନ ୨୦୨୩ରେ ହୋଇଥିବା ଖାଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜର ହତ୍ୟାକାଣ୍ଡରେ ଭାରତର ସମ୍ପୃକ୍ତି ଥିବାର ଆରୋପ ଲଗାଇ କାନାଡା ଭାରତର ଜଣେ ଶୀର୍ଷ କୂଟନୀତିଜ୍ଞଙ୍କୁ ବହିଷ୍କାର କରିଥିଲା । ଅବଶ୍ୟ କାନାଡାର ଏହି ଅଭିଯୋଗକୁ ଭାରତ ସରକାର ସମ୍ପୂର୍ଣ୍ଣ ଭାବେ ଖାରଜ କରି କହିଥିଲେ ଯେ କାନାଡାରେ ହିଂସାର କୌଣସି ବି କାର୍ଯ୍ୟରେ ଭାରତ ସରକାର ସାମଲ ଥିବା ଆରୋପ ଅବୈଧ ଏବଂ ମନଗଢ଼ା ଅଟେ । ଖାଲିସ୍ତାନୀ ଆତଙ୍କବାଦୀଙ୍କ ଉପରୁ ଧ୍ୟାନ ହଟାଇବା ପାଇଁ କାନାଡା ଏପରି ଆରୋପ ଲଗାଇଥିବା ଭାରତ ସରକାର କହିଛନ୍ତି ।
ଋଣ ଜାଲିଆତି ମାମଲାରେ ସୌମ୍ୟଙ୍କ ବିରୋଧରେ ବଢୁଛି ଅଭିଯୋଗର ଫର୍ଦ୍ଦ, EOWରେ ରୁଜୁ ହେଲା ଆଉ ୩ଟି ମାମଲା
ଭୁବନେଶ୍ୱର: ଋଣ ଜାଲିଆତି ମାମଲାରେ ସୌମ୍ୟଙ୍କ ବିରୋଧରେ ବଢୁଛି ଅଭିଯୋଗର ଫର୍ଦ୍ଦ । EOWରେ ରୁଜୁ ହେଲା ଆଉ ୩ଟି ମାମଲା । ଏନେଇ ସଙ୍ଗୀନ ଆରୋପ ଆଣିଛନ୍ତି ୩ ଜଣ ପୂର୍ବତନ କର୍ମଚାରୀ । ଆସିଥିବା ସମସ୍ତ ଅଭିଯୋଗର ସବୁ ଦିଗକୁ ନେଇ ଖୋଳତାଡ଼ କରୁଛି ତଦନ୍ତକାରୀ ଟିମ୍ । ଆଜି ବି ହୋଇପାରେ ଛାନବିନ୍ । ଋଣ ଜାଲିଆତି ଘଟଣାରେ ମିଳୁଛି ସାଂଘାତିକ ପ୍ରମାଣ । ସେହିପରି ଋଣ ଦେଇଥିବା ବ୍ୟାଙ୍କକୁ ମଧ୍ୟ ତଦନ୍ତ ପରିସର ଭୁକ୍ତ କରାଯାଇଛି । ଗତକାଲି ୭ ଘଣ୍ଟାର ଜେରା କରି ସମ୍ବାଦ ଭବନରୁ ଫେରିଥିଲା EOW । ଚଢ଼ାଉକୁ ନେଇ ପ୍ରେସ ରିଲିଜ୍ ଜାରି କରିଛି EOW ।
ସମ୍ବାଦ ବିରୋଧରେ ବଢୁଛି ଅଭିଯୋଗକାରୀଙ୍କ ସଂଖ୍ୟା । ସମ୍ବାଦର ଜଣେ ପୂର୍ବତନ କର୍ମଚାରୀଙ୍କ ଅଭିଯୋଗ ଆଧାରରେ ଏକ ମାମଲା ରୁଜୁ ହୋଇଛି । ଦଫା ୫୦୬, ୪୬୬, ୪୬୮, ୪୭୧, ୪୨୦, ୧୨୦-B IPC ଅନୁସାରେ ମାମଲା ରୁଜୁ ହୋଇଛି । ଯାଞ୍ଚ ବେଳେ ଅନେକ ସନ୍ଦେହଜନକ ଦସ୍ତାବିଜ ଜବତ କରିଛି EOW । ଋଣ ଜାଲିଆତି ସମ୍ପର୍କରେ ଅନେକଙ୍କ ବୟାନ ରେକର୍ଡ ହୋଇଛି । ଆହୁରି ୨୦ ଜଣ ପୂର୍ବତନ କର୍ମଚାରୀ ଋଣ ଜାଲିଆତି ଅଭିଯୋଗ ଆଣିଛନ୍ତି ।
ଅଭିଯୋଗକାରୀଙ୍କ ଅଭିଯୋଗ ଅନୁସାରେ ଏକାଧିକ ସମ୍ବାଦ କର୍ମଚାରୀଙ୍କୁ ବଳ ପୂର୍ବକ ବ୍ୟକ୍ତିଗତ ଋଣ ନେବା ପାଇଁ ବାଧ୍ୟ କରାଯାଇଛି । କୋଟି କୋଟି ଟଙ୍କାରେ କର୍ମଚାରୀଙ୍କ ନାମରେ ସଂସ୍ଥା ଋଣ ଉଠାଇଛି । ଯାହାକି ସଂପୂର୍ଣ୍ଣ ଭାବେ ବେଆଇନ ଓ କମ୍ପାନୀର କର୍ମଚାରୀଙ୍କ ଅଗୋଚରରେ ହୋଇଛି । ଏଭଳି ଅଭିଯୋଗ ଆଣିଛନ୍ତି ସମ୍ବାଦର ପୂର୍ବତନ କର୍ମଚାରୀ ଅସୀମ ମହାପାତ୍ର । ଏନେଇ ସମ୍ବାଦର ସଂପାଦକ ସୌମ୍ୟଂରଜନ ପଟ୍ଟନାୟକ ଓ ମାନବ ସମ୍ବଳ ଅଧିକାରୀ ବୈଜୟନ୍ତୀ କରଙ୍କ ବିରୋଧରେ ମାମଲା ରୁଜୁ ହୋଇଛି ।
ସମ୍ବାଦ ୩୦୦ରୁ ଅଧିକ କର୍ମଚାରୀଙ୍କୁ ଠକେଇ କରିଥିବା ଅଭିଯୋଗ ହୋଇଛି । ଏହି ଠକେଇ ପରିମାଣ ୫୦ କୋଟିରୁ ଅଧିକ ହେବ । ସେହିପରି ଯାଞ୍ଚ ନେଇ କନକ ନ୍ୟୁଜ ମିଛ ଖବର ପ୍ରସାରଣ କରୁଛି ବୋଲି କହିଛି EOW । ତଦନ୍ତକାରୀ ଅଧିକାରୀ କୌଣସି ଚାପର ବଶବର୍ତ୍ତୀ ନାହାନ୍ତି । ଋଣ ଜାଲିଆତି ଘଟଣାରେ ଅଧିକ ତଦନ୍ତ ଜାରି ରହିଛି ବୋଲି କହିଛି EOW ।
କାନାଡାର ଅଭିଯୋଗ-ସିଖ୍ ନେତାଙ୍କ ହତ୍ୟା ପଛରେ ଭାରତ, ଭାରତର ଜବାବ- ଖାଲିସ୍ତାନୀ ଆତଙ୍କୀଙ୍କ ଉପରୁ ଧ୍ୟାନ ହଟାଇବାକୁ ଉଦ୍ୟମ
ନୂଆଦିଲ୍ଲୀ: କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋଙ୍କ ଅଭିଯୋଗକୁ ଖଣ୍ଡନ କରିଛି ଭାରତ । ସରକାର ସ୍ପଷ୍ଟ କରିଛନ୍ତି ଯେ ଭାରତ ନା ପରୋକ୍ଷରେ ନା ପ୍ରତ୍ୟକ୍ଷ ଭାବେ କାନାଡାରେ ହିଂସାରେ ସାମିଲ ଅଛି । ଏଥିସହିତ କାନାଡା ପ୍ରଧାନମନ୍ତ୍ରୀଙ୍କୁ ଭାରତ ପ୍ରତି ଜବାବ ମଧ୍ୟ ଦେଇଛି । ଟୁଡ୍ରୋଙ୍କ ଅଭିଯୋଗକୁ ଅବୈଧ ଏବଂ ପ୍ରେରିତ ବୋଲି କହିଛି । କନାଡା ସରକାର ଆଶଙ୍କା ପ୍ରକାଶ କରିଥିଲେ ଯେ ଖାଲିସ୍ତାନୀ ସମର୍ଥକ ହରଦୀପ ସିଂହ ନିଜ୍ଜରର ହତ୍ୟାରେ ଭାରତର ହାତ ଥାଇପାରେ ଏବଂ କହିଛନ୍ତି ଯେ ଏହି ମାମଲାର ତଦନ୍ତ ଜାରି ରହିଛି । ବିଦେଶ ମନ୍ତ୍ରଣାଳୟ ମଙ୍ଗଳବାର ଏକ ବୟାନ ଜାରି କରି କହିଛି, କାନାଡାରେ ହୋଇଥିବା ହିଂସାରେ ଭାରତ ସରକାରଙ୍କ ସାମିଲ ହେବାର ଅଭିଯୋଗ ଅବୈଧ ଏବଂ ମନଗଢ଼ା ଅଟେ ।
କାନାଡାର ପ୍ରଧାନମନ୍ତ୍ରୀଙ୍କ ତରଫରୁ ଏପରି ହିଁ ଅଭିଯୋଗ ଜି-୨୦ ବୈଠକ ସମୟରେ ପ୍ରଧାନମନ୍ତ୍ରୀଙ୍କ ଆଗରେ କରାଯାଇଥିଲା ଏବଂ ତାକୁ ସମ୍ପୂର୍ଣ୍ଣ ଭାବେ ଖାରଜ କରାଯାଇଥିଲା । ଏଥିସହିତ ଭାରତ କାନାଡା ଉପରେ ଖାଲିସ୍ତାନୀ ଆତଙ୍କବାଦୀ ଏବଂ ଚରମପନ୍ଥିଙ୍କୁ ଆଶ୍ରୟ ଦେଉଥିବା ନେଇ ଆରୋପ ଲଗାଇଛି । ମନ୍ତ୍ରଣାଳୟ କହିଛି ଏପରି ନିରାଧାର ବୟାନ ଖାଲିସ୍ତାନୀ ଆତଙ୍କବାଦୀ ଏବଂ ଚରମପନ୍ଥିଙ୍କ ଉପରୁ ଧ୍ୟାନ ହଟାଇବା ପାଇଁ ଦିଆଯାଇଛି । ଯେଉଁମାନଙ୍କୁ କି କାନାଡାରେ ଆଶ୍ରୟ ଦିଆଯାଇଛି ଏବଂ ସେମାନେ ଲଗାତାର ଭାରତର ଅଖଣ୍ଡତା ପାଇଁ ବିପଦ ସାଜିଛନ୍ତି । ଏହି ମାମଲାରେ କାନାଡା ସରକାର କାର୍ଯ୍ୟାନୁଷ୍ଠାନ ନନେବା ଦୀର୍ଘ ସମୟ ହେବ ଚିନ୍ତାର ବିଷୟ ପାଲଟିଛି ।
ଭାରତ କହିଛି ଯେ କାନାଡାର ଅନେକ ନେତା ଖୋଲାଖୋଲି ଭାବେ ଏପରି ତତ୍ତ୍ୱଙ୍କ ପାଇଁ ସହାନଭୂତି ପ୍ରକାଶ କରିଆସିଛନ୍ତି । ସରକାର ଏହାକୁ ବଡ଼ ଚିନ୍ତାର ବିଷୟ କହିଛନ୍ତି । ବିଦେଶ ମନ୍ତ୍ରଣାଳୟ ପକ୍ଷରୁ ଜାରି ବୟାନ ଅନୁସାରେ, କାନାଡାରେ ହତ୍ୟା, ମାନବ ଚାଲଣ ଏବଂ ସଂଗଠିତ ଅପରାଧ ସମେତ ଅନେକ ବେଆଇନ କାର୍ଯ୍ୟକଳାପ ଘଟଣା ନୂଆ ନୁହେଁ । ଆମେ ଏପରି କୌଣସି ବି ଘଟଣାରେ ଭାରତ ସରକାରଙ୍କୁ ଯୋଡ଼ିବାର ପ୍ରୟାସକୁ ଖାରଜ କରୁଛୁ । କାନାଡା ସରକାରଙ୍କୁ ଭାରତ ବିରୋଧୀ କାର୍ଯ୍ୟକଳାପ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରାଯାଇଛି ।
ନିଜ୍ଜର ଖାଲିସ୍ତାନ ଟାଇଗର ଫୋର୍ସ ଅର୍ଥାତ କେଟିଏ ବ୍ୟତୀତ ସିଖ୍ସ ଫର ଜଷ୍ଟିସର ମଧ୍ୟ ବଡ଼ ଚେହେରା ଥିଲା । ନିଜ୍ଜରକୁ ୧୮ ଜୁନରେ କାନାଡାରେ ଗୁଳିମାରି ହତ୍ୟା କରାଯାଇଥିଲା । ସୋମବାର କାନାଡା ସଂସଦରେ ଟ୍ରୁଡୋ କହିଥିଲେ ଯେ, ଭାରତ ସରକାରଙ୍କ ଏଜେଣ୍ଟସ ଜୁନରେ କାନାଡାର ବ୍ରିଟିସ କଲୋମ୍ବିଆରେ ସିଖ ସମ୍ପ୍ରଦାୟର ନେତା ହରଦୀପ ସିଂ ନିଜ୍ଜରଙ୍କ ହତ୍ୟା କରିଥିଲେ । ଟ୍ରୁଡୋ ଏଥିସହିତ କହିଥିଲେ ଯେ, ୯-୧୦ ସେପ୍ଟେମ୍ବରରେ ଭାରତରେ ହୋଇଥିବା ଜି୨୦ ବୈଠକ ସମୟରେ ମଧ୍ୟ ସେ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମ୍ମୁଖରେ ଏହି ପ୍ରସଙ୍ଗକୁ ଉଠାଇଥିଲେ ।
କାନାଡା ସରକାରଙ୍କୁ ଯେଉଁ ଗୁଇନ୍ଦା ତଥ୍ୟ ମିଳିଥିଲା ତାର ଆଧାରରେ ସେ ଏପରି ଅଭିଯୋଗ ଲଗାଇଛନ୍ତି । ଏଥିସହ ଟ୍ରୁଡୋ କହିଛନ୍ତି, କାନାଡାର ସୁରକ୍ଷା ଏଜେନ୍ସି ନିଜ୍ଜର ହତ୍ୟାକାଣ୍ଡର ତଦନ୍ତ କରୁଛି । ସେ ସଂସଦରେ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦିଙ୍କୁ କୁହାଯାଇଛି ଯେ ଏହି ମାମଲାରେ ଯଦି ଭାରତ ସରକାର କୌଣସି ଭାବେ ସାମିଲ ଥାନ୍ତି ତେବେ ଏହା ବରଦାସ୍ତ କରାଯିବନି ଏବଂ ତଦନ୍ତରେ ସହଯୋଗ କରିବା ନେଇ ମଧ୍ୟ କୁହାଯାଇଛି । ଅପରପକ୍ଷରେ କାନାଡାର ବିଦେଶ ମନ୍ତ୍ରୀ ମେଲନୀ ଜଲି କହିଛନ୍ତି ଯେ, ସରକାର ଜଣେ ଭାରତୀୟ ଡିପ୍ଲୋମାଟଙ୍କୁ ଦେଶରୁ ବାହାର କରିଦେଇଛନ୍ତି । ତେବେ ସେ ଭାରତୀୟ ଇଣ୍ଟେଲିଜେନ୍ସର ପ୍ରମୁଖ ଥିଲେ । ଅବଶ୍ୟ, ଜଲି ଏହି ଡିପ୍ଲୋମାଟଙ୍କ ସମ୍ପର୍କରେ ଅଧିକ ସୂଚନା ଦେଇନାହାନ୍ତି । ଅପରପକ୍ଷରେ ଭାରତ ମଧ୍ୟ କାନାଡା ଉପରେ କାର୍ଯ୍ୟାନୁଷ୍ଠାନ କରିବା ଦିଗରେ ମଧ୍ୟ ଚିନ୍ତା କରୁଛି ।