ଭୁବନେଶ୍ବର: ନିଜ ଦଳ କଥା ବୁଝନ୍ତୁ କଂଗ୍ରେସ ବିଧାୟକ ନରସିଂହ ମିଶ୍ର । ବିଜେଡିର ଶୃଙ୍ଖଳା ପ୍ରସଙ୍ଗରେ ନରସିଂହ ମୁଣ୍ଡ ପୂରାଇବା ଦରକାର ନାହିଁ ବୋଲି କହିଛନ୍ତି କୃଷି ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେଡିର ସର୍ବୋଚ୍ଚ ନେତା । ନବୀନଙ୍କ ନିଷ୍ପତ୍ତି ଦଳର ସବୁ ନେତା ଓ କର୍ମୀଙ୍କ ପାଇଁ ଆଦେଶ । ସେଥିରେ କାହାରି କୌଣସି ଆପତ୍ତି ଅଭିଯୋଗ ନାହିଁ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଉପରେ ଯୁକ୍ତିତର୍କ ହେବାର ଆବଶ୍ୟକତା ନାହିଁ । ବିଜେଡି ଆଭ୍ୟନ୍ତରୀଣ କଥାରେ ନରସିଂହ ମିଶ୍ର ମୁଣ୍ଡ ନଖେଲାଇ ନିଜ ଦଳର ଶୃଙ୍ଖଳା କଥା ବୁଝନ୍ତୁ ବୋଲି ରଣେନ୍ଦ୍ର କହିଛନ୍ତି ।
ଭାରତ ଆସୁଛି C295 ବିମାନ, ଶତ୍ରୁଙ୍କ ଛାତିରେ ପଶିଲାଣି ଛାନିଆଁ
ନନ୍ଦିଘୋଷ ବ୍ୟୁରୋ: ବଢ଼ିବ ଭାରତୀୟ ବାୟୂ ସେନାର ବଳ । ସେପ୍ଟମ୍ବର ୨୫ ତାରିଖରେ ଆସିବ C295 ବିମାନ । ଉତ୍ତରପ୍ରଦେଶର ହିନ୍ଦନ ଏୟାରବସରେ ଅବତରଣ କରିବ । ଗତବର୍ଷ ସେପ୍ଟେମ୍ବର ମାସରେ ଭାରତୀୟ ବାୟୂ ସେନାରୁ ପୁରୁଣା ଏବରୋ-୭୪୮ ବିମାନକୁ ବଦଳାଇ ୫୬-ସି- ୨୯୫ କିଣିବା ପାଇଁ ଏୟାରବେସ ଡିଫେନ୍ସ ଏବଂ ସ୍ପେସ ସହ ୨୧,୦୦୦ କୋଟି ଟଙ୍କାର ଚୁକ୍ତି କରିଛି ।
ଏହି ଚକ୍ତିନାମା ଅନୁଯାୟୀ, ଏୟାରବସ ୪ ବର୍ଷ ମଧ୍ୟରେ ସ୍ପେନରୁ ଭାରତକୁ ଫ୍ଲଏାଏ ଓ୍ବେ ପ୍ରଥମ ୧୬ ବିମାନ ବିତରଣ କରିବ । ଯଦି C295 ବିମାନ ସମ୍ପର୍କରେ କହିବା ତାହେଲେ ଏହା ୨୬୦ କିଲୋମିଟର ବେଗରେ ଗତି କରିବା ସହ ୯ ଟନ ପେଲୋଡ ଏବଂ ୭୧ ଜଣ ସୌନିକଙ୍କୁ ନେଇ ଯିବାର ସକ୍ଷମ ରହିଛି । ହେଲିକପ୍ଟର ଏୟାର ଟୁ ଏୟାର ରିଫିଲିଙ୍ଗ ସକ୍ଷମ ରହିଛି । ବାୟୂ ସେନାର ଆବଶ୍ୟକତା ଅନୁଯାୟୀ ସ୍ବଳ୍ପ ରନଓ୍ବେରେ ମଧ୍ୟ ଏହା ଅବତରଣ ଏବଂ ଉଡ଼ାଣ କରିବ ପାରିବ । ଏହି ବିମାନ ବାୟୂସେନାରେ ସାମିଲ ହେଲେ ଶକ୍ତି ବଢ଼ିବ ।
ତେବେ ଯଦି ଏହି ବିମାନର ଗତି ସମ୍ପର୍କରେ କହିବା ତାହେଲେ ଏହା ଘଣ୍ଟା ପ୍ରତି ୪୮୦ କିଲୋମିଟର ବେଗରେ ୧୧ ଘଣ୍ଟା ପ୍ରତି ନିରନ୍ତରରେ ଉଡ଼ିପାରେ । ବିମାନ ଉଡ଼ାଣ ପାଇଁ ୬୭୦ ମିଟର ରନଓ୍ବେ ଏବଂ ଅବତରଣ ପାଇଁ ମାତ୍ର ୩୨୦ ମିଟର ଆବଶ୍ୟକ ।
ମାୟାବିନୀ ମହିଳାଙ୍କ ବିରୋଧରେ ବଢ଼ୁଛି ଅଭିଯୋଗ
ଭୁବନେଶ୍ବର: ରାଜଧାନୀରେ ଚିକିତ୍ସା ବାହାନାରେ ହନିଟ୍ରାପ ଘଟଣା । ମାୟାବିନୀ ମହିଳାଙ୍କ ବିରୋଧରେ ବଢୁଛି ଅଭିଯୋଗ । ତମାଣ୍ଡୋ ପୋଲିସକୁ ଫୋନ କରି କଲେ ଅଭିଯୋଗ । କେନ୍ଦୁଝର ଓ ବଲାଙ୍ଗୀର ଯୁବକ ଟ୍ରାପ ହୋଇଥିବା ନେଇ ଅଭିଯୋଗ ହୋଇଛି । କଳିଙ୍ଗ ବିହାରର ଜଣେ ବ୍ୟବସାୟୀ ମଧ୍ୟ ହାନିଟ୍ରାପର ଶିକାର ହୋଇଥିବା ଜଣାପଡିଛି । ଗତକାଲି ଲେଡି ଡନ ଇରାନୀ, ସ୍ବାମୀ ନିଶିକାନ୍ତ ଓ ଅନ୍ୟ ୨ ସହଯୋଗୀ ଗିରଫ ହୋଇଥିଲେ । ଦୁଷ୍କର୍ମ ଉଦ୍ୟମ ଭୟ ଦେଖାଇ ୨୫ ଲକ୍ଷ ଟଙ୍କା ଦାବି କରିଥିଲେ । ଭୟରେ ୧୦ ଲକ୍ଷ ଦେବାକୁ ରାଜି ହୋଇଥିଲେ ଡାକ୍ତର ଜଣକ । ଡାକ୍ତର ଜଣଙ୍କ ୧ ଲକ୍ଷର ଅନଲାଇନ ପେମେଣ୍ଟ ଓ ୯ ଲକ୍ଷ ଟଙ୍କାର ଚେକ୍ ଦେଇଥିଲେ । ଏନେଇ ଡାକ୍ତର ଜଣଙ୍କ ଅଭିଯୋଗ କରିବା ପରେ ହାନିଟ୍ରାପ ଗୁମର ଖୋଲିବାରେ ଲାଗିଛି ।
ଲୁଟ ପାଇଁ ନୂଆ ତରିକା ଆପଣାଉଥିଲେ ଯୁବ ଦମ୍ପତି । ଚିକିତ୍ସା କରିବାକୁ ଡାକି ଡାକ୍ତରଙ୍କୁ ବ୍ଲାକ ମେଲିଙ୍ଗ କରି ଡିମାଣ୍ଡ କରିଥିଲେ ୨୫ ଲକ୍ଷ ଟଙ୍କା । ପ୍ରଥମେ ଏକ ଲକ୍ଷ୍ୟ ଫୋନ ପେରେ ଓ ନଅ ଲକ୍ଷ ଟଙ୍କା ନଗଦ ଦାବି କରିଥିଲେ ଠକ । ଭୁବନେଶ୍ବର ତମାଣ୍ଡୋ ପୋଲିସ ଘଟଣାର ତଦନ୍ତ କରି ଜଣେ ମହିଳା ସମେତ ୩ ଯୁବକଙ୍କୁ ଗିରଫ କରିଛି । ଗିରଫ ମହିଳା ଇରାନୀ ପାତ୍ର, ବାପି ପାତ୍ର, ଗିରିଜା ହରିଚନ୍ଦନ, ଗଣେଶ ପ୍ରଧାନ । ଲୁଟର ଶିକାର ହୋଇଥିବା ଡାକ୍ତର ଜଣକ ଚନ୍ଦ୍ରଶେଖରପୁର ଅଞ୍ଚଳର ବୋଲି ଜଣାପଡିଛି । ଡାକ୍ତରଙ୍କ ଅଭିଯୋଗ ପରେ ତମାଣ୍ଡୋ ପୋଲିସ ୪ଜଣଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି । ଗୋଟେ ମାରଶଣାସ୍ତ୍ର ସହ ନଗଦ ୩୦ହଜାର ଟଙ୍କା, ନଅ ଲକ୍ଷ ଟଙ୍କାର ଚେକ ଜବତ କରି ୯ଟି ସଙ୍ଗୀନ ଦଫା ଲଗାଇଛି ।
ନିପା ଭାଇରସରେ ବ୍ୟାପିବା ପରେ କେରଳରେ ଆଲର୍ଟ
ନନ୍ଦିଘୋଷ ବ୍ୟୁରୋ: କେରଳରେ ନିପା ଭାଇରସରେ ବ୍ୟାପିବା ପରେ ଆଲର୍ଟ । କୋଝିକୋଡର ୭ଟି ସ୍ଥାନରେ ଜାରି ହୋଇଛି କଟକଣା । ଏହି ସବୁ ଅଞ୍ଚଳକୁ କଣ୍ଟାମିନେସନ ଜୋନ ଘୋଷଣା କରାଯାଇଛି । ପ୍ରଶାସନ ପକ୍ଷରୁ ନିରାକରଣ ଲାଗି ବ୍ୟାପକ ପଦକ୍ଷେପ ଗ୍ରହଣ କରାଯାଇଛି । କୋଝିକୋଡ ଜିଲ୍ଲାରେ କିଲର ଭାଇରସ ଦୁଇ ଜଣଙ୍କ ଜୀବନ ନେଇଥିବାବେଲେ ସଂକ୍ରମିତ ହୋଇଛନ୍ତି ୨ ଜଣ । ଏନେଇ ସୂଚନା ଦେଇଛନ୍ତି କେରଳ ସରକାର । ନିପା ଭାଇରସ ବ୍ଯାପୁଥିବା ସୂଚନା ମିଳିବା ପରେ କେରଳର ସମସ୍ତ ଜିଲ୍ଲାରେ ହେଲଥ ଆଲର୍ଟ ଜାରି ହୋଇଛି ।
ଏକ ଘରୋଇ ହସ୍ପିଟାଲରେ ୨ ଜଣଙ୍କ ମୃତ୍ଯୁ ହେବା ପରେ ସମସ୍ତ ହସ୍ପିଟାଲରେ ସତର୍କତା ବ୍ଯବସ୍ଥା ଜାରି ହୋଇଛି । ଭାଇରସର ମୁକାବିଲା ଲାଗି କେରଳକୁ ଏକ କେନ୍ଦ୍ରୀୟ ଟିମ ପଠାଯାଇଥିବା କହିଛନ୍ତି କେନ୍ଦ୍ର ସ୍ବାସ୍ଥ୍ଯମନ୍ତ୍ରୀ ମନସୁଖ ମାଣ୍ଡବୀୟ । ନିପା ଭାଇରସଜନିତ ମୃତ୍ୟୁ ନେଇ ବି ସ୍ପଷ୍ଟ କରିଛନ୍ତି ମୁଖ୍ୟମନ୍ତ୍ରୀ ପିନରୟି ବିଜୟନ । କୋଝିକୋଡରେ ଏକ କଣ୍ଟ୍ରୋଲ ରୁମ୍ ଖୋଲାଯାଇଥିବାବେଳେ ମାସ୍କ ପିନ୍ଧିବା ଲାଗି ପରାମର୍ଶ ଦିଆଯାଇଛି । ୨୦୧୮ରେ କେରଳର କୋଝିକୋଡ ଓ ମାଲାପୁରମ ଜିଲ୍ଲାରେ ବି ନିପା ଭାଇରସ ଆତଙ୍କ ଖେଳାଇଥିଲା ।
ପରେ ୨୦୨୧ରେ ବି କୋଝିକୋଡରେ ନିପା ଭାଇରସ ସଂକ୍ରମଣ ପରିଲକ୍ଷିତ ହୋଇଥିଲା । ବାଦୁଡି ଜରିଆରେ ନିପା ଭାଇରସର ପ୍ରସାର ହେଉଥିବାବେଳେ ଏହା ଉଭୟ ମଣିଷ ଓ ଜୀବଜନ୍ତୁଙ୍କ ଲାଗି ବିପଦ ସାଜିଥାଏ । ନିପା ସଂକ୍ରମିତ ବ୍ଯକ୍ତି ଜ୍ବର, ଢୁଳାଇବା, ମୁଣ୍ଡବ୍ୟଥା, ମାଂସପେଶୀ ଯନ୍ତ୍ରଣା, ବାନ୍ତି ଆଦିରେ ପୀଡିତ ହୋଇଥାନ୍ତି ।
ଚଳିତ ବର୍ଷ ହେବନି ଛାତ୍ର ସଂସଦ ନିର୍ବାଚନ
କଟକ: ଚଳିତ ବର୍ଷ ହେବ ନାହିଁ ଛାତ୍ର ସଂସଦ ନିର୍ବାଚନ । ଉଚ୍ଚଶିକ୍ଷା ବିଭାଗର ଏକାଡେମିକ ତାଲିକାରେ ନିର୍ବାଚନ ନଥିବାରୁ ହେବନାହିଁ ଚଳିତ ବର୍ଷର ନିର୍ବାଚନ । ୨୦୧୮ରୁ ବନ୍ଦ ରହିଛି ଛାତ୍ର ସଂସଦ ନିର୍ବାଚନ ।
ଶୈଖିକ ବାତାବରଣ ନଷ୍ଟ ହେବା ସହ ପାଠପଢ଼ାରେ ବାଧା ସୃଷ୍ଟି ହେଉଛି । ସେହିପରି ସଠିକ୍ ସମୟରେ ୟୁଜି ଓ ପିଜି ପିଲାଙ୍କ ରେଜଲ୍ଟ ପ୍ରକାଶ ପାଉନାହିଁ । ତେଣୁ ଉଚ୍ଚ ଶିକ୍ଷା ବିଭାଗ ଛାତ୍ର ସଂସଦ ନିର୍ବାଚନ ବନ୍ଦ କରିବା ପାଇଁ ନିଷ୍ପତ୍ତି ନେଇଛି । ହେଲେ କ୍ୟାମ୍ପସ କମିଟି ଏବେ ବି ଜାରି ରହିଛି । ଉଚ୍ଚ ଶିକ୍ଷା ବିଭାଗର ଏହି ନିଷ୍ପତ୍ତି ବିଜୁ ଛାତ୍ର ଜନତା ଦଳ ସ୍ବାଗତ କରୁଛି ବୋଲି କହିଛନ୍ତି ବିଜୁ ଛାତ୍ର ଜନତା ଦଳ ରାଜ୍ୟ ସଭାପତି ଦେବୀ ରଞ୍ଜନ ତ୍ରିପାଠୀ।
ଆଦିତ୍ୟ L1ର ହେବ ଚତୁର୍ଥ କକ୍ଷପଥ ପରିବର୍ତ୍ତନ
ନୂଆଦିଲ୍ଲୀ: ଆସନ୍ତା ୧୫ରେ ଆଦିତ୍ୟ ଏଲ୧ର ହେବ ଚତୁର୍ଥ କକ୍ଷପଥ ପରିବର୍ତ୍ତନ । ଏନେଇ ସୂଚନା ଦେଇଛି ଇସ୍ରୋ । ୧୫ ତାରିଖ ରାତି ୨ଟାରେ ହେବ ପରବର୍ତ୍ତୀ ପରିବର୍ତ୍ତନ । ଲାଗରେଞ୍ଜ ପଏଣ୍ଟରେ ଆଦିତ୍ୟ ଏଲ୧କୁ ଅବସ୍ଥାପିତ କ୍ଷେତ୍ରରେ ଏହି କକ୍ଷ ପରିବର୍ତ୍ତନ ଗୁରୁତ୍ବ ବୋଲି କହିଛି ଇସ୍ରୋ । ଆଦିତ୍ୟ ଏଳ୧ ମିଶନ ଜରିଆରେ ସୂର୍ଯ୍ୟ ସମ୍ପର୍କରେ ଅଧିକ ଗବେଷଣା ଲାଗି ଯୋଜନା କରିଛି ଇସ୍ରୋ । ପୃଥିବୀଠାରୁ ପ୍ରାୟ ୧୫ ଲକ୍ଷ କିଲୋମିଟର ଦୂରରେ ଅବସ୍ଥାପିତ ହେବ ଆଦିତ୍ୟ ଏଲ୧ । ପୃଥିବୀର ମାଧ୍ୟାକର୍ଷଣ ଶକ୍ତିକୁ ଆକଳନ କରି ଚତୁର୍ଥ କକ୍ଷପଥ ପରିବର୍ତ୍ତନ ଲାଗି ଆଶା ରଖିଛନ୍ତି ବୈଜ୍ଞାନିକ । ଗତ ୧୦ ତାରିଖରେ ଆଦିତ୍ୟ ଏଲ୧ କରିଥିଲା ତୃତୀୟ କକ୍ଷପଥ ପରିବର୍ତ୍ତନ ।
ବଢ଼ି ଚାଲିଛି ବାଘଙ୍କ ମୃତ୍ୟୁ ସଂଖ୍ୟା
ନନ୍ଦିଘୋଷ ବ୍ୟୁରୋ: ବାଘ ବଂଶ ପ୍ରତି ଆସୁଛି ବିପଦ । ବଢିଚାଲିଛି ମୃତ୍ଯୁ ସଂଖ୍ଯା । ଗତ ୭ ଦିନ ମଧ୍ଯରେ ଦେଶର ବିଭିନ୍ନ ସ୍ଥାନରେ ପ୍ରାଣ ହରାଇଛନ୍ତି ୭ବାଘ ଓ ବାଘୁଣୀ । ସେମାନଙ୍କ ମଧ୍ଯରେ ଅଛନ୍ତି ୫ ଛୁଆ । ବାଘ ମୃତ୍ଯୁ ଘଟଣାରେ ବିଭିନ୍ନ ରାଜ୍ୟ ପକ୍ଷରୁ ଆରମ୍ଭ ହୋଇଛି ତନାଘନା । ଉତ୍ତରପ୍ରଦେଶର କାନପୁର ଚିଡିଆଖାନାରେ ତ୍ରିଶା ନାମକ ଓ ବାଘୁଣୀର ମୃତ୍ଯୁ ଘଟିଛି । ଗତ ୨୦୨୦ରେ ଚିଡିଆଖାନାକୁ ଅଣାଯାଇଥିବା ତ୍ରିଷା ୧୪ଟି ଛୁଆ ଜନ୍ମ କରିଥିଲା । ଗତ ବର୍ଷ ଡିସେମ୍ବରରେ ସେ ଅସୁସ୍ଥ ହୋଇଥିଲା ଏବଂ ତାର ଚିକିତ୍ସା ଚାଲିଥିଲା । ସେହିପରି ମହାରାଷ୍ଟ୍ରର ଚନ୍ଦ୍ରପୁରରେ ବି ଏକ ବାଘୁଣୀର ମୃତ୍ଯୁ ଘଟିଛି । ତାର ବୟସ ଅଢେଇ ବର୍ଷ ହୋଇଥିଲା । ପୂର୍ବରୁ ବାଲାରପୁର ଅଞ୍ଚଳରେ ୩ଟି ବାଘ ଛୁଆଙ୍କ ମୃତ୍ଯୁ ଘଟିଥିଲା । ଗତ ସପ୍ତାହରେ ରାଜସ୍ଥାନର ରନ୍ଥାମ୍ବୋର ଜାତୀୟ ପାର୍କରେ ବି ଦୁଇଟି ବାଘଛୁଆଙ୍କ ମୃତ୍ଯୁ ଘଟିଥିଲା ।
୨୦୨୪ ଲୋକସଭା ନିର୍ବାଚନ ଲାଗି ପ୍ରସ୍ତୁତ ହେବ ବ୍ଲୁପ୍ରିଣ୍ଟ୍, ବିରୋଧୀ ଇଣ୍ଡିଆ ମେଣ୍ଟର ସମନ୍ବୟ କମିଟି ବୈଠକ
ନୂଆଦିଲ୍ଲୀ: ବିରୋଧୀ ଇଣ୍ଡିଆ ମେଣ୍ଟର ସମନ୍ବୟ କମିଟି ବୈଠକ । ୨୦୨୪ ଲୋକସଭା ନିର୍ବାଚନ ଲାଗି ପ୍ରସ୍ତୁତ ହେବ ବ୍ଲୁପ୍ରିଣ୍ଟ । ନୂଆଦିଲ୍ଲୀରେ ବସୁଥିବା ଏହି ବୈଠକ ବିରୋଧୀ ମେଣ୍ଟ ଲାଗି ଗୁରୁତ୍ବ ବହନ କରୁଛି । ଏହା ସହ ଆସନ ବୁଝାମଣା ନେଇ ବୈଠକରେ ଚୂଡାନ୍ତ ନିଷ୍ପତ୍ତି ହୋଇପାରେ । ଏହା ସହ ଦେଶବ୍ଯାପୀ ପ୍ରଚାର ଅଭିଯାନ ସମ୍ପର୍କରେ ପ୍ରସ୍ତୁତ ହୋଇପାରେ ବ୍ଲୁପ୍ରିଣ୍ଟ । ମଙ୍ଗଳବାର ନୂଆଦିଲ୍ଲୀସ୍ଥିତ ଏନସିପି ନେତା ଶରଦ ପାଓ୍ବାରଙ୍କ ବାସଭବନରେ ୧୪ ସଦସ୍ଯବିଶିଷ୍ଟ ସମସ୍ତ ଗୁରୁତ୍ବପୂର୍ଣ୍ଣ ପ୍ଯାନେଲ ସଦସ୍ଯଙ୍କ ବୈଠକ ବସିଥିଲା ।
ବୈଠକରେ ବିରୋଧୀ ଦଳଗୁଡିକ ବିରୋଧରେ ତଦନ୍ତକାରୀ ସଂସ୍ଥାକୁ ବ୍ଯବହାର କରିବା ପ୍ରସଙ୍ଗରେ ଆଲୋଚନା ହୋଇଥିଲା । ପ୍ରବର୍ତ୍ତନ ନିର୍ଦ୍ଦେଶାଳୟରସମନ ଅନୁସାରେ ହାଜର ହେବାକୁ ଥିବାରୁ ଆଜିର ବୈଠକରେ ତୃଣମୂଳ କଂଗ୍ରେସ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ବୈଠକରେ ସାମିଲ ହେବେ ନାହିଁ । ଇଣ୍ଡିଆ ମେଣ୍ଟର କିଛି ନେତାଙ୍କ କହିବା ଅନୁସାରେ ମହାରାଷ୍ଟ୍ର, ତାମିଲନାଡୁ, ବିହାର ଲାଗି ରଣନୀତି ଚୂଡାନ୍ତ ହୋଇଛି । ଦିଲ୍ଲୀ, ପଞ୍ଜାବ, ପଶ୍ଚିମବଙ୍ଗ ଲାଗି ରଣନୀତି କାଠିକର ହେବ ।
୧୪ ଜଣିଆ ସମନ୍ବୟ ତଥା ନିର୍ବାଚନ ରଣକୌଶଳ ନିର୍ଦ୍ଧାରଣ କମିଟିରେ ରହିଛନ୍ତି କଂଗ୍ରେ୍ସର କେସି ଭେନୁଗୋପାଳ, ଡିଏମକେର ଟି ଆର ବାଲୁ, ଜେଏମଏମର ହେମନ୍ତ ସୋରେନ, ଶିବସେନାର ସଞ୍ଜୟ ରାଓ୍ବତ, ଆରଜେଡିର ତେଜସ୍ବୀ ଯାଦବ, ଆପର ରାଘବ ଚଢା, ସମାଜବାଦୀ ପାର୍ଟିର ଜାଭେଦ ଅଲ୍ଲୀ ଖାନ, ଜିଡିୟୁର ଲାଲନ ସିଂ, ସିପିଆଇର ଡି. ରାଜା, ନ୍ଯାସନାଲ କନଫରେନ୍ସର ଓମାର ଅବଦୁଲ୍ଲା, ପିଡିପିର ମେହବୁବା ମୁଫତି, ଟିଏମସିର ଅଭିଷେକ ବାନାର୍ଜୀ ଓ ସିପିଏମର ଜଣେ ସଦସ୍ଯ ।
ଲିବ୍ୟାରେ ବନ୍ୟା ତାଣ୍ଡବ, ଗଲାଣି ୫ ହଜାରରୁ ଅଧିକ ଲୋକଙ୍କ ଜୀବନ
ନନ୍ଦିଘୋଷ ବ୍ୟୁରୋ: ପୃଥିବୀର ପିଛା ଛାଡୁନି ପ୍ରାକୃତିକ ଦୁର୍ବିପାକ । ମୋରକ୍କୋରେ ଭୟଙ୍କର ଭୂକମ୍ପ ପରେ ଏବେ ଲିବ୍ଯାରେ ବନ୍ୟା ରଚିଛି ତାଣ୍ଡବ । ୫ ହଜାରରୁ ଅଧିକ ଲୋକଙ୍କ ଯାଇଛି ଜୀବନ । ନିଖୋଜ ହୋଇଛନ୍ତି ୧୦ ହଜାରରୁ ଅଧିକ ଲୋକ । ତେବେ ମୃତ୍ୟୁସଂଖ୍ଯା ବହୁ ଅଧିକ ହେବ ବୋଲି ସୂଚନା ମିଳିଛି । ଭୂମଧ୍ଯସାଗରୀୟ ବାତ୍ୟା ପରେ କେତେକ ଡ୍ଯାମ ଭୁଶୁଡିପଡିବା ଯୋଗୁ ଲକ୍ଷ ଲକ୍ଷ ଲୋକ ପ୍ରଭାବିତ ହୋଇଛନ୍ତି । ଡେରନାର ପୂର୍ବାଞ୍ଚଳ ହୋଇଛି ସବୁଠାରୁ ଅଧିକ କ୍ଷତିଗ୍ରସ୍ତ । ଡେରନା ସହରରେ ୧ ଲକ୍ଷ ୨୫ ହଜାର ଲୋକ ବସବାସ କରୁଥିବାବେଳେ ଅଧିକାଂଶ ଲୋକ କ୍ଷତିଗ୍ରସ୍ତ ହୋଇଛନ୍ତି ।
ଶହ ଶହ କାର ଭାସିଯାଇଥିବା ସହ ଅନେକ ଘର ଧୂଳିସାତ୍ ହୋଇଛି । କେବଳ ଏହି ସହରରେ ମୃତ୍ଯୁ ସଂଖ୍ଯା 2 ହଜାର ହୋଇଥିବାବେଳେ ଅନ୍ଯାନ୍ୟ ଅଞ୍ଚଳରେ ଶହ ଶହ ଲୋକଙ୍କ ମୃତ୍ୟୁ ଘଟିଥିବା ଆଶଙ୍କା କରାଯାଉଛି । ଲିବ୍ଯାର ଦ୍ବିତୀୟ ବୃହତ୍ତମ ସହର ବେଙ୍ଘାଜିରେ ବି ତାଣ୍ଡବ ରଚିଛି ବନ୍ୟା । ଦେଶର ବିଭିନ୍ନ ସ୍ଥାନରେ ରେଡକ୍ରସପକ୍ଷରୁ ସହାୟତା କାର୍ଯ୍ୟ ଜାରି ରହିଛି । ତୁର୍କୀ ସମେତ ଅନ୍ଯାନ୍ୟ ରାଷ୍ଟ୍ର ଲିବ୍ୟାକୁ ସହାୟତାର ହାତ ବଢାଇଛନ୍ତି । ଲିବ୍ଯା ବର୍ତ୍ତମାନ ରାଜନୈତିକ ଭାବେ ପୂର୍ବ ଓ ପଶ୍ଚିମ ଲିବ୍ୟାରେ ବିଭକ୍ତ ହୋଇଥିବାବେଳେ ଭୟଙ୍କର ବନ୍ୟା ଯୋଗୁ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇଛି ।
ଋଷ ରାଷ୍ଟ୍ରପତିଙ୍କ ସହ ନର୍ଥକୋରିଆ ଶାସକଙ୍କ ଆଲୋଚନା
ନନ୍ଦିଘୋଷ ବ୍ୟୁରୋ: ଋଷକୁ ଅସ୍ତ୍ରଶସ୍ତ୍ର ଯୋଗାଇବ ନର୍ଥ କୋରିଆ । ରାଷ୍ଟ୍ରପତି ଭ୍ଲାଦିମିର ପୁଟିନ ଓ ନର୍ଥ କୋରିଆ ଶାସକ କିମ ଜଙ୍ଗ ଉନଙ୍କ ମଧ୍ୟରେ ହାଇପ୍ରୋଫାଇଲ ଭେଟଘାଟ । ଭସ୍ତୋଚନି କସମୋଡ୍ରୋମରେ ଦୁଇ ନେତା ପରସ୍ପର ସହ ମିଳାଇଛନ୍ତି ହାତ । ଆନ୍ତର୍ଜାତିକ ସ୍ତରରେ ଏକଘରିକିଆ ହୋଇପଡିଥିବା ନର୍ଥକୋରିଆ ଶାସକଙ୍କ ସହ ଋଷର ଅସ୍ତ୍ର ଯୋଗାଣ ସଂକ୍ରାନ୍ତ ବୁଝାମଣା ହୋଇଥିବା ଆଶା କରାଯାଉଛି । ନିଜର ବୁଲେଟ ପ୍ରୁଫ ଟ୍ରେନରେ କିମ୍ ମସ୍କୋ ଗସ୍ତ କରିଥିଲେ । ସେପଟେ କିମ୍ ଦେଶରେ ନଥିବା ସତ୍ତ୍ବେ ଦୁଇଟି ବାଲିଷ୍ଟିକ ମିସାଇଲ ପରୀକ୍ଷା କରିଛି ନର୍ଥକୋରିଆ ।
କୋଭିଡ ପରେ କିମଙ୍କ ଏହି ପ୍ରଥମ ଗସ୍ତ ମୂଳରେ ଋଷ ଓ ନର୍ଥକୋରିଆ ମଧ୍ୟରେ ଅନେକ କ୍ଷେତ୍ରରେ ବୁଝାମଣା ହୋଇଥିବା ସୂଚନା ମିଳିଛି । ଭ୍ଲାଦିଭୋସ୍ତକ ଠାରୁ ୧ ହଜାର କିଲୋମିଟର ଦୂର ଏକ ସ୍ପେସପୋର୍ଟରେ ଉଭୟ ନେତାଙ୍କ ମଧ୍ୟରେ ହୋଇଥିଲା ଭେଟଘାଟ । ଉପଗ୍ରହ କାର୍ଯ୍ୟକ୍ରମ କ୍ଷେତ୍ରରେ ନର୍ଥକୋରିଆକୁ ସହାୟତା କରିବା ଉଦ୍ଦେଶ୍ୟରେ ଏହି ଆଲୋଚନା ଉଦ୍ଦିଷ୍ଟ ବୋଲି କହିଛନ୍ତି ପୁଟିନ । ଋଷ ଗସ୍ତରେ ଯାଇଥିବା କିମଙ୍କ ସହ ଅଛନ୍ତି କେତେକ ତୁଙ୍ଗ ସାମରିକ ଅଧିକାରୀ ।
ଅରବିଟରେ ମିଲିଟାରୀ ସ୍ପାଏ ସାଟେଲାଇଟ ଅବସ୍ଥାପିତ କରିବାରେ ନର୍ଥ କୋରିଆ ବିଫଳ ହେବାକୁ ନେଇ ଏକ୍ଷେତ୍ରରେ ଋଷ ସହାୟତା କରିବା ସୂଚନା ମିଳିଛି । ସେପଟେ ନର୍ଥକୋରିଆଠାରୁ ବହୁ ଅସ୍ତ୍ରଶସ୍ତ୍ର ଲାଭ କରିବାକୁ ଋଷ ଆଶା ରଖିଛି । ଏହା ସହ ସୋଭିଏତ କାଳର ବହୁ ଅସ୍ତ୍ରଶସ୍ତ୍ରକୁ ଆଧୁନିକୀକରଣ କରିବା ଲାଗି ଋଷର ସହାୟତା ଚାହୁଁଛି ନର୍ଥକୋରିଆ । ଯଦି ଋଷକୁ ନର୍ଥକୋରିଆ ମଲ୍ଟିପଲ ରକେଟ ଲଞ୍ଚର ସମେତ ଅନ୍ୟାନ୍ୟ ଅସ୍ତ୍ରଶସ୍ତ୍ର ଯୋଗାଇବ ତେବେ ୟୁକ୍ରେନ ବିରୋଧରେ ଯୁଦ୍ଧରେ ଋଷ ଲାଭବାନ ହେବ ।