କଟକ: ଏସସିବିରେ ହେଲା ଜଟିଳ ପେରିପାର୍ଟମ ସର୍ଜରୀ । ସଙ୍କଟାପନ୍ନ ଅବସ୍ଥାରେ ଥିବା ଜଣେ ଗର୍ଭବତୀଙ୍କ ପ୍ରସବ ହୋଇଛି । ହାର୍ଟ ବନ୍ଦ ହୋଇଯାଇଥିବା ପ୍ରସୂତିଙ୍କ ହେଲା ସର୍ଜରୀ । ହାର୍ଟକୁ ପମ୍ପିଙ୍ଗ କରି ମହିଳାଙ୍କ ସର୍ଜରୀ କରାଯାଇ ଶିଶୁ ଜନ୍ମ ନେଇଛି ।
ସ୍ତ୍ରୀ ଓ ପ୍ରସୂତି ବିଭାଗ, ନିଶ୍ଚେତକ ବିଭାଗ ସହ ଶିଶୁ ବିଭାଗ ଡାକ୍ତରଙ୍କ ପ୍ରଚେଷ୍ଟାରେ ଏହି ସର୍ଜରୀ କରାଯାଇଛି । ବର୍ତମାନ ଉଭୟ ମା ଓ ଶିଶୁ ଭେଣ୍ଟିଲେଟରରେ ଅଛନ୍ତି । ମା ଓ ଶିଶୁକୁ ସୁରକ୍ଷିତ ରଖିବା ପାଇଁ ଏସସିବିର ଡାକ୍ତର ଓ ପାରାମେଡିକଲ ଷ୍ଟାଫ ନଜର ରଖିଛନ୍ତି । ଏନେଇ ସୂଚନା ଦେଇଛନ୍ତି ଏସସିବି ଅଧିକ୍ଷକ ସୁଧାଂଶୁ ଶେଖର ମିଶ୍ର ।
ନନ୍ଦିଘୋଷ ବ୍ୟୁରୋ: ଆଜି ଭଗବାନ ଶ୍ରୀକୃଷ୍ଣଙ୍କ ଜନ୍ମୋତ୍ସବ ବା ଜନ୍ମାଷ୍ଟମୀ । ଏଥିପାଇଁ ବିଭିନ୍ନ ମନ୍ଦିରରେ ପାଳିତ ହେଉଛି କୃଷ୍ଣ ଜନ୍ମୋତ୍ସବ । ଶ୍ରୀକୃଷ୍ଣଙ୍କ ଜନ୍ମସ୍ଥାନ ମଥୁରାନଗରୀ ଠାରୁ ଆରମ୍ଭ କରି ଜଗନ୍ନାଥ ଧାମ ପୁରୀ ପର୍ଯ୍ୟନ୍ତ ସବୁଠି ଉତ୍ସାହର ମାହୋଲ । ଶ୍ରୀମନ୍ଦିରରେ ବିଶେଷ ଭାବେ ଏହି ଜନ୍ମୋତ୍ସବ ପାଳିତ ହେଉଛି ।
କିମ୍ବଦନ୍ତୀ ଅନୁସାରେ ଭାଦ୍ରବ କୃଷ୍ଣ ପକ୍ଷ ଅଷ୍ଟମୀ ତିଥିରେ ବିଷ୍ଣୁଙ୍କ ଅଷ୍ଟମ ଅବତାର ଭାବେ ଶ୍ରୀକୃଷ୍ଣ ଜନ୍ମ ହୋଇଥିଲେ । ଦେବକୀ ଓ ବସୁଦେବଙ୍କ ପୁଅ ଭାବେ କଂଶର ବନ୍ଦୀଶାଳରେ ଜନ୍ମ ହୋଇଥିଲେ ଶ୍ରୀକୃଷ୍ଣ । ପରେ କଂଶର ଭୟରେ ବାପା ବସୁଦେବ ଶ୍ରୀକୃଷ୍ଣଙ୍କୁ ନେଇ ମଥୁରାରେ ଛାଡି ଆସିଥିଲେ । ସେଠାରେ ନନ୍ଦ ରାଜାଙ୍କ ପୁଅ ଭାବେ ସେ ପାଳିତ ହୋଇଥିଲେ ।
ହିନ୍ଦୁ ଧର୍ମରେ ଏହି ଦିନଟିକୁ ବେଶ୍ ଉତ୍ସାହର ସହିତ ପାଳନ କରାଯାଇଥାଏ । ବିଶ୍ବର ହିନ୍ଦୁ ସଂପ୍ରଦାୟ ପାଇଁ ଏହା ଏକ ପବିତ୍ର ଦିନ । ଗାଁଠୁ ସହର ସବୁଠି ଏହି ଦିନ ଉତ୍ସବମୂଖର ହୋଇଉଠେ । ଏଥିରେ ଲକ୍ଷ ଲକ୍ଷ ଶ୍ରଦ୍ଧାଳୁ ସାମିଲ ହୋଇଥାନ୍ତି ।
ଭୁବନେଶ୍ବର: ଲଘୁଚାପରେ ପରିଣତ ହେଲା ଉତ୍ତର ବଙ୍ଗୋପସାଗରେ ସୃଷ୍ଟ ଘୂର୍ଣ୍ଣିବଳୟ । ଉତ୍ତର-ପଶ୍ଚିମ ପାର୍ଶ୍ବବର୍ତ୍ତୀ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗର ତତସଂଲଗ୍ନ ଦକ୍ଷିଣ-ଓଡିଶା ଏବଂ ଉତ୍ତର ଆନ୍ଧ୍ରପ୍ରଦେଶ ଉପକୂଳ ସମୁଦ୍ର ମଧ୍ୟରେ ଲଘୁଚାପ କେନ୍ଦ୍ରୀଭୁତ ହୋଇଛି । ପ୍ରଭାବରେ ଆସନ୍ତା ୨ ଦିନ ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ଏହା ସହ ପ୍ରବଳ ବର୍ଷା ନେଇ ୧୫ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ଆଜି ପ୍ରବଳ ବର୍ଷା ନେଇ ମାଲକାନଗିରି, କୋରାପୁଟ, ନବରଙ୍ଗପୁର, ରାୟଗଡା, କଳହାଣ୍ଡି, ନୂଆପଡା, ବଲାଙ୍ଗିର, ବରଗଡ, ସମ୍ବଲପୁର, ସୋନପୁର, ବୌଦ୍ଧ, ସୁନ୍ଦରଗଡ, ଝାରସୁଗୁଡା, ଦେବଗଡ, କେନ୍ଦୁଝର ଏବଂ ମୟୁରଭଞ୍ଜ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।
୭ ତାରିଖରେ ୧୩ ଜିଲ୍ଲା, ଏବଂ ୮ ତାରିଖରେ ୭ଟି ଜିଲ୍ଲାକୁ ପ୍ରବଳ ବର୍ଷା ନେଇ ସତର୍କ କରାଇଛି ପାଣିପାଗ କେନ୍ଦ୍ର । ୯ ତାରିଖ ପରେ ରାଜ୍ୟରେ ପାଗ ବଦଳିଲେ ମଧ୍ୟ ଅଧିକାଂଶ ଜିଲ୍ଲାରେ ଆକାଶ ମେଘୁଆ ରହିବା ସହ ହାଲୁକାରୁ ମଧ୍ୟମ ଧରଣର ବର୍ଷା ହେବ । ତେବେ ୧୧ ରୁ ୧୩ ତାରିଖ ମଧ୍ୟରେ ବଙ୍ଗୋପସାଗରରେ ଆଉ ଏକ ଲଘୁଚାପ ସମ୍ଭାବନା ନେଇ ଆକଳନ କରାଯାଇଛି । ସେପଟେ ମୌସୁମୀ ସିଜିନ୍ ଜୁନ୍ ୧ ତାରିଖରୁ ଆଜି ପର୍ଯ୍ୟନ୍ତ ରାଜ୍ୟରେ ୧୪ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ ହୋଇଛି ।
ବେଙ୍ଗାଲୁରୁ: ଚନ୍ଦ୍ରର ରଙ୍ଗୀନ ମାଟି । ଦେଖିଲେ ଆଚମ୍ବିତ ହୋଇଯିବେ । ଇସ୍ରୋ ଜାରି କଲା ଚନ୍ଦ୍ରାୟନ-୩ର ଲ୍ୟାଣ୍ଡର ବିକ୍ରମ ପଠାଇଥିବା ଫଟୋ । ଏହାସହ ଇସ୍ରୋ ପକ୍ଷରୁ କୁହାଯାଇଛି, ଏହାକୁ ଦେଖିବାର ପ୍ରକୃତ ମଜା ଥ୍ରିଡି ଚଷମା ପିନ୍ଧି ଦେଖିବାରେ ଅଛି । ରୋଭର ପ୍ରଜ୍ଞାନ ଏହି ଫଟୋ କିଛିଦିନ ପୂର୍ବେ ଲ୍ୟାଣ୍ଡର ବିକ୍ରମଠାରୁ ୧୫ ମିଟର ଦୂରରୁ ଉଠାଇଥିଲା ।
ଇସ୍ରୋ ବିକ୍ରମ ଲ୍ୟାଣ୍ଡରର ଆଖପାଖକୁ ଡାୟମେନସନକୁ ଷ୍ଟେରିଓ ଓ ମଲ୍ଟି ବ୍ଲ୍ୟୁ ଇମେଜ୍ ଆକାରରେ ଜାରି କରିଛି । ଏହାକୁ ଇସ୍ରୋ ଏନଗଲିଫ ବୋଲି କହୁଛି । ଏହି ଫଟୋକୁ ରୋଭର ପ୍ରଜ୍ଞାନରେ ଲାଗିଥିବା ନେଭକେମ୍ କ୍ୟାମେରା ଉଠାଇଥିଲା । ଯାହାକୁ ପରେ ନେଭକେମ୍ ଷ୍ଟେରିଓ ବଦଳାଇ ଦେଇଥିଲା ।
ଏହା ୩ଟି ଚ୍ୟାନେଲର ଫଟୋ । ପ୍ରକୃତରେ ଏହା ଦୁଇଟି ଫଟୋର ମିଶ୍ରଣ । ଗୋଟିଏ ଫଟୋ ରେଡ ଚ୍ୟାନେଲରେ ଉଠାଯାଇଥିବା ବେଳେ ଅନ୍ୟଟି ବ୍ଲୁ୍ୟ ଓ ଗ୍ରୀନ ଚ୍ୟାନେଲରେ ଉଠାଯାଇଥିଲା । ଦୁଇ ଫଟୋକୁ ମିଶାଇବା ପରେ ଏମିତି ଫଟୋ ହୋଇପାରିଛି । ଏହି କାରଣରୁ ବିକ୍ରମ ଲ୍ୟାଣ୍ଡର ଥ୍ରିଡିରେ ଦିଶିବ । ଅର୍ଥାତ ଆପଣଙ୍କୁ ଲାଗିବ ଆପଣ ଚନ୍ଦ୍ର ଉପରେ ଛିଡ଼ା ହୋଇ ବିକ୍ରମକୁ ଦେଖୁଛନ୍ତି ।
ନନ୍ଦିଘୋଷ ବ୍ୟୁରୋ: ସମୟ କ୍ରମେ ଧୀରେ ଧୀରେ ଆଧୁନିକ ଯୁଗ ସାଙ୍ଗକୁ ନୂଆ ନୂଆ ଜ୍ଞାନକୌଶଳ ସୃଷ୍ଟି ହେଉଛି। ପ୍ରତ୍ୟେକ କାର୍ଯ୍ୟକୁ ଆମେ ଏତେ ଜଲଦି କରିବାକୁ ଚେଷ୍ଟା କରୁଛେ ଯେ ଯାହା ପାଇଁ ଆମକୁ ସମୟକୁ ବି ଜଲଦି ଦେଖିବାକୁ ପଡୁଛି। ସେଥିପାଇଁ ସବୁବେଳେ ହାତରେ ଘଣ୍ଟା ବନ୍ଧା ହୋଇ ରହୁଛି । ଏମିତିରେ କିଛି ଜଣଙ୍କ କୌଣସି କାମ ନଥାଇ ବି ସେମାନେ ସଉକରେ ଘଣ୍ଟା ପିନ୍ଧିବାକୁ ପସନ୍ଦ କରୁଛନ୍ତି । ହେଲେ ଏବେ ଆଉ ସେହି ପୁରୁଣା କଣ୍ଟା ଥିବା ଘଣ୍ଟାକୁ ପିନ୍ଧିବାକୁ କେହି ପସନ୍ଦ କରୁନାହାନ୍ତି । ବର୍ତମାନ ନୂଆ ନୂଆ ଫିଚର ସହ ସମସ୍ତେ ସ୍ମାର୍ଟ ୱାଚ ପିନ୍ଧିବାକୁ ପସନ୍ଦ କରୁଛନ୍ତି ।
ମୋବାଇଲ ଭଳି ବର୍ତମାନ ସ୍ମାର୍ଟ ୱାଚରେ ସମସ୍ତ ପ୍ରକାରର ସୁବିଧା ଉପଲବ୍ଧ ରହୁଛି । ଘଣ୍ଟାରେ କେବଳ ସମୟ ଦେଖିବା ନୁହେ ବରଂ ଏଥିରେ ଅନେକ କାମ କରିହେଉଛି । ଫୋନ ଠାରୁ ଆରମ୍ଭ କରି ମନରଞ୍ଜନ ଯାଏଁ ସମସ୍ତ ସୁବିଧା ଏଥିରେ ମିଳିପାରୁଛି । ତେଣୁ ଏହି କାରଣରୁ ବର୍ତମାନ ସମସ୍ତେ ସ୍ମାର୍ଟ ୱାଚ ପିନ୍ଧିବାକୁ ପସନ୍ଦ କରୁଛନ୍ତି । କିନ୍ତୁ ଏହି ସ୍ମାର୍ଟ ୱାଚ ପିନ୍ଧିବା ଦ୍ୱାରା ଆପଣଙ୍କ ଠାରେ କେଉଁ ସମସ୍ୟା ଦେଖା ଦେଉଛି ଏହା ଉପରେ କେବେ ଧ୍ୟାନ ଦେଇଛନ୍ତି କି? ଏହି ସ୍ମାର୍ଟ ୱାଚକୁ ଘଣ୍ଟା ଘଣ୍ଟା ଧରି ପିନ୍ଧିବା ଦ୍ୱାରା ଆପଣଙ୍କ ପାଖରେ ଅନେକ ସମସ୍ୟା ଦେଖାଦେଇପାରେ । ତେବେ ଏହି ସମସ୍ୟାକୁ ଏଡ଼ାଇବା ପାଇଁ ସଚେତନ ରହିବା ଆବଶ୍ୟକ ।
ସ୍ମାର୍ଟ ୱାଚ୍ ବ୍ୟବହାର ଆପଣଙ୍କର ଶୋଇବା, ଧ୍ୟାନ, ଏବଂ ସ୍ମୃତି ଉପରେ ମଧ୍ୟ ପ୍ରତିକୂଳ ପ୍ରଭାବ ପକାଇପାରେ । ଦୀର୍ଘ ଅବଧିରେ, ତାହା ଆପଣଙ୍କ ସ୍ୱାସ୍ଥ୍ୟ ଉପରେ କ୍ଷତିକାରକ ପ୍ରଭାବ ପକାଇପାରେ । ଦୀର୍ଘ ସମୟ ଧରି ଏହି ଗ୍ୟାଜେଟଗୁଡ଼ିକର ବ୍ୟବହାର ସ୍ମୃତି ଶକ୍ତି ହ୍ରାସ ଏବଂ ଖରାପ ଧ୍ୟାନ ଆଣିଥାଏ । କିଛି ଲୋକ ଦୀର୍ଘ ସମୟ ଧରି ସ୍ମାର୍ଟ ୱାଚ୍ ପିନ୍ଧିବା ପରେ ପ୍ରବଳ ମୁଣ୍ଡବିନ୍ଧା ଏବଂ ବାନ୍ତି ହେବାର ନଜର ରହିଛି ।
ସ୍ମାର୍ଟ ଓ୍ବାଚ୍ ଦ୍ବରା ଜୀବାଣୁ ଜନିତ ସମସ୍ୟା । ଫ୍ଲୋରିଡା ଆଟଲାଂଟିକ ୟୁନିଭରସିଟି ଦ୍ୱାରା କରାଯାଇଥିବା ଏକ ଗବେଷଣାରେ ସ୍ପଷ୍ଟ ହୋଇଛି ଯେ, ଏହି ବ୍ରେସଲେଟଗୁଡିକରେ ଜୀବାଣୁ ସଂଖ୍ୟା ମାତ୍ରାଧିକ ରହୁଛି । ଏପରିକି ଏକ ପାଇଖାନା ପ୍ୟାନ ତୁଳନାରେ ଏଥିରେ ଅଧିକ ଜୀବାଣୁ ରହୁଛନ୍ତି । ପ୍ଲାଷ୍ଟିକ, ରବର, କନା, ଚମଡା, ସୁନା ଓ ରୂପା ସ୍ମାର୍ଟୱାଚ ଷ୍ଟ୍ରିପରେ ତଳେ ଝାଳ ଏବଂ ମଇଳା ଯୋଗୁ ଜୀବାଣୁ ସଂଖ୍ୟା ବୃଦ୍ଧି ପାଉଛି । ଏହା ଉପରକୁ ବିଶେଷ ନଜର ଦିଆ ଯାଉ ନ ଥିବାରୁ ସେଠାରେ ସେମାନେ ତାଙ୍କ ସଂଖ୍ୟା ସହଜରେ ବିସ୍ତାର କରିପାରୁଛନ୍ତି । ଫଳରେ ସେପସିସ ଓ ନିମୋନିଆ ପରି ରୋଗକୁ ଏହି ଜୀବାଣୁ ସହଜରେ ଶରୀର ମଧ୍ୟରେ ପ୍ରବେଶ କରାଇଥାନ୍ତି ।
ବ୍ଲୁ ଲାଇଟ ଇଫେକ୍ଟ । ଅଧ୍ୟୟନରୁ ଜଣାପଡିଛି ଯେ ଶୋଇବା ପୂର୍ବରୁ ମୋବାଇଲ ବ୍ୟବହାର କରିବା ଦ୍ୱାରା ନିଦ ଭାଙ୍ଗିଥାଏ । ଦିନସାରା ଏବଂ ରାତିରେ ମଧ୍ୟ ଏକ ସ୍ମାର୍ଟ ୱାଚ୍ ବ୍ୟବହାର କରିବା ଆପଣଙ୍କ ଶୋଇବାର କ୍ଷମତା ଉପରେ ପ୍ରଭାବ ପକାଇପାରେ କାରଣ ଆପଣ ଆଖିକୁ ଇନଫ୍ରାଡ୍ ଆଲୋକର ପ୍ରଭାବରୁ ରକ୍ଷା କରିପାରିବେ ନାହିଁ ।
ମାନସିକ ପ୍ରଭାବ । ସ୍ମାର୍ଟ ୱାଚର ଏକ ପ୍ରମୁଖ ପ୍ରଭାବ ହେଉଛି ଯେ ଦୀର୍ଘ ସମୟ ପର୍ଯ୍ୟନ୍ତ ରାଡିଏସନ ସଂସ୍ପର୍ଶରେ ଆସିବା ପରେ ଆପଣଙ୍କ ସ୍ନାୟୁ ଆଉ କ୍ଳାନ୍ତ ଅନୁଭବ କରେ ନାହିଁ । ଏହି କାରଣରୁ, ଆପଣଙ୍କ ମାନସିକ ଚାପ ଏବଂ ଅସନ୍ତୋଷ ଧୀରେ ଧୀରେ ବୃଦ୍ଧି ପାଏ । ତେଣୁ କ୍ରୋଧିତ ଆଚରଣ କରିବା ସ୍ୱାଭାବିକ ହୋଇଥାଏ ।
ଭୁବନେଶ୍ବର: ଗୁଣାତ୍ମକ ଶିକ୍ଷା ପାଇଁ ଓଡ଼ିଶା ସାଜିବ ରୋଲ ମଡେଲ । ଓଡ଼ିଶା ଆଦର୍ଶ ବିଦ୍ୟାଳୟ ପାଇଁ 542 ଜଣ ଶିକ୍ଷକ ଓ ଅଧ୍ୟକ୍ଷକଙ୍କୁ ନିଯୁକ୍ତି ପ୍ରଦାନ କରାଯାଇଛି । ସେହିଭଳି ଓଡ଼ିଶା ମାଇନିଂ ଆଦର୍ଶ ବିଦ୍ୟାୟ ପାଇଁ ୩୦ ଶିକ୍ଷକ ଓ ଅଧ୍ୟକ୍ଷ ମିଳିଛି ନିଯୁକ୍ତି । ଲୋକସେବା ଭବନରେ ଆୟୋଜିତ ନିଯୁକ୍ତି ପର୍ବ କାର୍ଯ୍ୟକ୍ରମରେ ସମସ୍ତଙ୍କୁ ନିଯୁକ୍ତିପତ୍ର ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ନୂତନ ହଷ୍ଟେଲ ଓ ଏକାଡେମିକ୍ ବିଲଡିଂର ଶୁଭ ଉଦଘାଟନ ମଧ୍ୟ କରାଯାଇଛି । ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ଓ୍ବେବ ପୋର୍ଟାଲ ମଧ୍ୟ ଉଦଘାଟିତ ହୋଇଛି । ଏହି କାର୍ଯ୍ୟକ୍ରମରେ ଛାତ୍ର ସାମର୍ଥ୍ୟକୁ ଉନ୍ମୁକ୍ତ କରିବାକୁ ଚେଷ୍ଟା କରିବାକୁ ଶିକ୍ଷକ ଓ ଅଧ୍ୟକ୍ଷ ମାନଙ୍କୁ ପରାମର୍ଶ ଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହି ନିଯୁକ୍ତି ଓଡ଼ିଶା ଆଦର୍ଶ ବିଦ୍ୟାଳୟ ଉନ୍ନତ୍ତିରେ ସାହାଯ୍ୟ କରିବ । ଶିକ୍ଷକ ଓ ଅଧ୍ୟାପକ ମାନେ
ଶୈଖିକ ବାତାବରଣ ସୃଷ୍ଟି କରିବା ପାଇଁ ପ୍ରୟାଶ କରିବେ ବୋଲି ଆଶା ରଖିଛନ୍ତି ମୁଖ୍ୟମନ୍ତ୍ରୀ । 5T କାର୍ଯ୍ୟଧାରା ଛାତ୍ରଛାତ୍ରୀ ମାନଙ୍କୁ ଅନୁସରଣ କରାଇବାକୁ ପରାମର୍ଶ ଦେଇଥିଲେ ମୁଖ୍ୟମନ୍ତ୍ରୀ । ସମସ୍ତ ନବ ନିଯୁକ୍ତ ଶିକ୍ଷକ ଓ ଅଧ୍ୟାପକ ଛାତ୍ରଛାତ୍ରୀ ମାନଙ୍କ ପାଇଁ ହିରୋ ବୋଲି କହିଛନ୍ତି 5T ସଚିବ ଭିକେ ପାଣ୍ଡିଆନ୍ ।
ନନ୍ଦିଘୋଷ ବ୍ୟୁରୋ: ଚଳିତ ବର୍ଷ ଶାହରୁଖ ଖାନଙ୍କ ଯବାନ ଫିଲ୍ମ ମୋଷ୍ଟ ଆୱେଟେଡ୍ ଫିଲ୍ମରୁ ଅନ୍ୟତମ । ଫିଲ୍ମର ପ୍ରିଭ୍ୟୁ ଏବଂ ଟ୍ରେଲର ରିଲିଜ ପରେ ଯବାନ ଫିଲ୍ମ ଦେଖିବାକୁ ଲୋକେ ଉତ୍ସାହର ସହ ଚାହିଁ ବସିଛନ୍ତି । ଏହାରି ମଧ୍ୟରେ ଯବାନର ଆଡଭାନ୍ସ ଟିକେଟ ବୁକିଂ ମଧ୍ୟ ଖୁବ ଜୋରରେ ଚାଲିଛି ।
ଶାହାରୁଖ ଖାନଙ୍କ ‘ଯବାନ’ର କ୍ରେଜ ରିଲିଜ ହେବା ପୂର୍ବରୁ ମଧ୍ୟ ଦର୍ଶକଙ୍କ ମଧ୍ୟରେ ଦେଖିବାକୁ ମିଳିଛି । ଫିଲ୍ମର ଟିକେଟ ଖୁବ ଜୋରରେ ବୁକିଂ ହେବାରେ ଲାଗିଛି। ବିଶେଷକରି ଦିଲ୍ଲୀ ଏବଂ ମୁମ୍ବାଇରେ ଫିଲ୍ମର ଟିକେଟ୍ ସର୍ବାଧିକ ବିକ୍ରି ହେଉଛି । ଦିଲ୍ଲୀରେ ‘ଯବାନ’ ପାଇଁ ରୋଜଗାର ହାର ୨୨ ପ୍ରତିଶତ ଥିବାବେଳେ ମୁମ୍ବାଇରେ ଏହା ୧୮ ପ୍ରତିଶତ ସ୍ଥାନ ପାଇଛି । ଦିଲ୍ଲୀରେ ପ୍ରି-ସେଲିଂରେ ୨.୫ କୋଟି ଟଙ୍କା ଆୟ କରିଥିବାବେଳେ ମୁମ୍ବାଇରେ ୧.୫ କୋଟି ଟଙ୍କା ଆୟ କରିଛି। ଅନ୍ୟାନ୍ୟ ସ୍ଥାନରେ ମଧ୍ୟ ଫିଲ୍ମର ଅଗ୍ରୀମ ବୁଟିଙ୍ଗ୍ ଚାଲିଛି।
ଯବାନ 2D ହିନ୍ଦୀ ସଂସ୍କରଣ ପାଇଁ ୫ ଲକ୍ଷ ୨୯ ହଜାରରୁ ଅଧିକ ଟିକେଟ୍ ଏବଂ ହିନ୍ଦୀ IMAX ପାଇଁ ୧୧ ହଜାରରୁ ଅଧିକ ଟିକେଟ୍ ବିକ୍ରି କରିଛି । ତାମିଲ ସଂସ୍କରଣ ପାଇଁ ୧୯ ହଜାର ଟିକେଟ୍ ଏବଂ ତେଲୁଗୁ ସଂସ୍କରଣ ପାଇଁ ୧୬ ହଜାର ଟିକେଟ୍ ବିକ୍ରି ହୋଇଛି । ଆଶା କରାଯାଉଛି କି ପୂରା ୱିକେଣ୍ଡ ପାଇଁ ପାଖାପାଖି ୨୦ ଲକ୍ଷ ଟିକେଟ୍ ବୁକ୍ ହୋଇଯିବ। ଯଦି ଗଦର-୨ର ଆଡଭାନ୍ସ ବୁକିଂ ସହ ତୁଳନା କରାଯାଏ ତ ରିପୋର୍ଟ ମୁତାବିକ ଗଦର-୨ ର ପ୍ରଥମ ଦିନ ପାଇଁ ୭ ଲକ୍ଷରୁ ଅଧିକ ଟିକେଟ୍ ବୁକ୍ ହୋଇଥିଲା ।
ନୟାଗଡ଼: ନୟାଗଡରେ ବିଜେପି ବନାମ ବିଜେପି l ସମ୍ବିତ ପାତ୍ରଙ୍କୁ କଳାପତାକା ପ୍ରଦର୍ଶନ ସହ ଅଣ୍ଡାମାଡ଼ କରିଛନ୍ତି ନିଜ ଦଳର କର୍ମୀ । ଆଜି ନୟାଗଡରେ ପୂର୍ବତନ ସାଂସଦ ହେମେନ୍ଦ୍ର କୁମାର ସିଂଙ୍କ ନବମ ଶ୍ରାଦ୍ଧ ବାର୍ଷିକ ଥିଲା । ଏହି ଅବସରରେ ନୟାଗଡ ରାଜବାଟିରୁ ଏକ ରାଲି ବାହାରି ହେମନ୍ଦ୍ର ସିଂଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ପାଇଁ ଆସିଥିଲେ । ଏହି ସମୟରେ ସମ୍ବିତ ପାତ୍ରଙ୍କୁ ଦେଖି ବିଜେପିର କିଛି କର୍ମୀ କଳାପତାକା ପଦର୍ଶନ କରିବା ସହ ଅଣ୍ଡା ମାଡ଼ କରିଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ପରିସ୍ଥିତିକୁ ଆୟତ୍ତ କରିଥିଲା ।
ନୟାଗଡରେ ବିଜେପିର କଳି ଦାଣ୍ଡରେ ପଡ଼ି ହାଟରେ ଗଡ଼ିଲାଣି । ସମ୍ବିତ ପାତ୍ର ଏବେ ଯେଉଁଠିକି ଯାଉଛନ୍ତି ନିଜ ଦଳର କର୍ମୀ ଓ ନେତା ତାଙ୍କୁ ବିରୋଧ କରିବାର ଦେଖିବାକୁ ମିଳୁଛି । ତେବେ ଆଜି ପ୍ରତ୍ୟୁଷା ବନାମ ଇରାନିଙ୍କ କଳିରେ ସମ୍ବିତ ପାତ୍ରଙ୍କୁ ହଟହଟ୍ଟା ହେବାକୁ ପଡ଼ିଛି । ନୟାଗଡ଼ ଜିଲ୍ଲା ବିଜେପିରେ ପ୍ରତ୍ୟୁଷା ଓ ଇରାନିଙ୍କ ଦୁଇଟି ସମାନ୍ତରାଳ ସଙ୍ଗଠନ ରହିଛି । ଆଜି ଇରାନିଙ୍କ ରାୟଙ୍କ ବାସଭବନରେ ବିଜେପି କର୍ମୀ ମାନେ ସମ୍ବିତ ପାତ୍ରଙ୍କୁ ବିରୋଧ କରିଥିଲେ ।
ନନ୍ଦିଘୋଷ ବ୍ୟୁରୋ: କାହିଁକି ବଦଳିବ ଇଣ୍ଡିଆର ନାଁ । ନାଁ ବଦଳିଲେ ବଦଳିବ କି ବିଶ୍ବରେ ଦେଶର ପରିଚୟ । ବଦଳିବ କି ଆର୍ଥିକ ସ୍ଥିତି । ବଦଳିବ କି ଦେଶରେ ଥିବା କୁସଂସ୍କାର । ନା କେବଳ ଆତ୍ମସନ୍ତୋଷ ପାଇଁ ଦେଶର ନାଁ ବଦଳାଇବାକୁ ଚାଲିଛି ଯୋଜନା । ଇଣ୍ଡିଆର ନା ବଦଳାଇ ଭାରତ ରଖିବାକୁ ଚାଲିଛି କସରତ୍ । ଆସନ୍ତା ସ୍ବତନ୍ତ୍ର ଅଧିବେଶନରେ କେନ୍ଦ୍ର ସରକାର ଆଣିପାରନ୍ତି ପ୍ରସ୍ତାବ । ପ୍ରେସିଡେଣ୍ଟ ଅଫ ଇଣ୍ଡିଆ ଲେଖାଯିବା ବଦଳରେ ପ୍ରେସିଡେଣ୍ଟ ଅଫ ଭାରତ ଲେଖାଯିବାରୁ ବିବାଦ ସୃଷ୍ଟି ହୋଇଛି ।
ଇଣ୍ଡିଆକୁ ନେଇ ମହା`ଭାରତ` । ଦୁଇଟି ନାଁ, ଗୋଟିଏ ଦେଶ । ନାଁ ବଦଳାଇବାକୁ ନେଇ ଭାଗ ଭାଗ ପୂରାଦେଶ । ଇଣ୍ଡିଆ ବନାମ ଭାରତ । ଦେଶର ନାଁ ବଦଳାଇବାକୁ କେନ୍ଦ୍ର ସରକାରଙ୍କ ଯୋଜନା । ଆସନ୍ତା ସ୍ବତନ୍ତ୍ର ଅଧିବେଶନରେ କେନ୍ଦ୍ର ସରକାର ଆଣିପାରନ୍ତି ପ୍ରସ୍ତାବ । ନାଁ ବଦଳାଇବାକୁ ନେଇ ସାରା ଦେଶରେ ଚର୍ଚ୍ଚା । କାହିଁକି ଦେଶର ନାଁ ଇଣ୍ଡିଆ ଲାଗୁଛି ଅଡୁଆ ? ଦେଶର ନାଁ ବଦଳାଇଲେ ଦେଶର ଭବିଷ୍ୟତ ଉପରେ କଣ ପଡ଼ିବ ପ୍ରଭାବ ? ବିଶେଷ କରି ଗୋଟିଏ ସମୁଦାୟକୁ ଭାରତ ନାଁ ପସନ୍ଦ ଆସୁଥିବା ବେଳେ ଆଉ ଗୋଟିଏ ସମୁଦାୟ ଏହା ପଛର ଯୁକ୍ତି ଉପରେ ପ୍ରଶ୍ନ ଉଠାଇଛି । ଦେଶର ସମ୍ବିଧାନରେ ଇଣ୍ଡିଆର ନାଁ ଥିବା ବେଳେ ଧାରା ୧ରେ ଇଣ୍ଡିଆ ହିଁ ଭାରତ ବୋଲି କୁହାଯାଇଛି । ତାକୁ ମଧ୍ୟ ବଦଳାଯିବ କି ବୋଲି ପ୍ରଶ୍ନ ଉଠିଛି । ଯଦିଓ କେନ୍ଦ୍ର ସରକାର ଏନେଇ କୌଣସି ଆଭିମୁଖ୍ୟ ସ୍ପଷ୍ଟ କରିନାହାନ୍ତି । କିନ୍ତୁ ଅତୀତରେ ବିଜେପିର ବିଭିନ୍ନ ଯୁକ୍ତି ଭାରତ ନାଁ ପ୍ରତି ଥିବା ଦୁର୍ବଳତା ଥିବା ପରିପ୍ରକାଶ କରିଛି । ଆରଏସଏସ ମଧ୍ୟ ଇଣ୍ଡିଆକୁ ସବୁବେଳେ ଭାରତ ବୋଲି ସମ୍ବୋଧନ କରିଥାଏ । ଏହି ଚିନ୍ତାଧାରାର ବ୍ୟକ୍ତି ଏବେ କେନ୍ଦ୍ରରେ ଥିବାରୁ ଇଣ୍ଡିଆର ନାଁ ବଦଳିବ ବୋଲି ଯଥେଷ୍ଟ ସମ୍ଭାବନା ରହିଛି ।
ଇଣ୍ଡିଆର ନାଁ ଭାରତ ବିବାଦ କାହିଁକି ? G-20 ଶିଖର ସମ୍ମିଳନୀ ପୂର୍ବରୁ ଏହି ବିବାଦର ମୂଳଦୁଆ ପଡ଼ିଛି । ରାଷ୍ଟ୍ରପତି ଭବନରେ ହେବାକୁ ଥିବା ନୈଶ୍ୟ ଭୋଜିର ନିମନ୍ତ୍ରଣ ପତ୍ରକୁ ନେଇ ପ୍ରଶ୍ନ ଉଠାଇଛି କଂଗ୍ରେସ । ନିମନ୍ତ୍ରଣ ପତ୍ରରେ ପ୍ରେସିଡେଣ୍ଟ ଅଫ ଇଣ୍ଡିଆ ବଦଳରେ ପ୍ରେସିଡେଣ୍ଟ ଅଫ ଭାରତ ଉଲ୍ଲେଖ ରହିଛି । ଏ ନେଇ ଟୁଇଟର ହ୍ୟାଣ୍ଡେଲରେ ପ୍ରଶ୍ନ ଉଠାଇଛନ୍ତି କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ । ଆସନ୍ତା ୯ ତାରିଖରେ ରାଷ୍ଟ୍ରପତି ଭବନରେ ରାତ୍ରଭୋଜନ ପାଇଁ ଦିଆଯାଇଥିବା ନିମନ୍ତ୍ରଣ ପତ୍ରରେ ପ୍ରେସିଡେଣ୍ଟ ଅଫ ଭାରତ ଉଲ୍ଲେଖ କରାଯାଇଛି ବୋଲି ଜୟରାମ ରମେଶ କହିଛନ୍ତି । ବିରୋଧୀ ମହାମେଣ୍ଟର ନାଁ ଇଣ୍ଡିଆ ରଖାଯିବା ପରେ ଏହି ନାଁ ଚର୍ଚ୍ଚାରେ ରହିଛି । ବିଜେପି ନେତା ଲଗାତାର ମେଣ୍ଟ ନାଁକୁ ନେଇ ବିରୋଧୀଙ୍କୁ ଟାର୍ଗେଟ କରୁଥିବା ବେଳେ ସମ୍ବିଧାନରୁ ଇଣ୍ଡିଆ ଶବ୍ଦ ହଟାଇବାକୁ ପୂର୍ବରୁ ବିଜେପି ସାଂସଦ ଦାବି କରିଛନ୍ତି । ଇଣ୍ଡିଆ ନାଁକୁ ନେଇ ବିଜେପି ଭିତରେ ରହିଥିବା ଡର, ଭୟକୁ ସ୍ପଷ୍ଟ ଦର୍ଶାଉଛି । 2024ରେ ବିଜେପିର ପତନ ସୁନିଶ୍ଚିତ । ଇଣ୍ଟରନାଲ ସର୍ଭେରୁ ଏହି ରିପୋର୍ଟ ଜାଣିବା ରେ ବିଜେପି ଭୟଭୀତ ହୋଇପଡ଼ିଛି ବୋଲି କଂଗ୍ରେସ ଓ ଆରଜେଡି କହିଛି ।
ଦେଶର ନାଁ ବଦଳାଇଲେ ଏହା ସାର୍ବଜନୀନ କ୍ଷେତ୍ରରେ ମଧ୍ୟ ବଡ଼ ପରିବର୍ତ୍ତନ ଆଣିବ । ଦେଶ ସ୍ବାଧୀନତା ହେବା ପରଠାରୁ ସବୁ କ୍ଷେତ୍ରରେ ଇଣ୍ଡିଆର ନାଁ ବ୍ୟବହାର ହେଉଥିବା ବେଳେ ଏହାକୁ ମଧ୍ୟ ବଦଳାଇବାକୁ ପଡ଼ିବ । ଇଣ୍ଟରନେଟ ଡୋମେନଠୁ ଆରମ୍ଭ କରି ସରକାରୀ ଯୋଜନା, ଶିକ୍ଷାନୁଷ୍ଠାନ, ସରକାରୀ ସଂସ୍ଥାରେ ବ୍ୟବହାର ହେଉଥିବା ଇଣ୍ଡିଆ ଶବ୍ଦକୁ ବଦଳାଇବାକୁ ପଡ଼ିବ । ପାସପୋର୍ଟରେ ଥିବା ରିପବ୍ଲିକ ଅଫ ଇଣ୍ଡିର ନାମ ବଦଳାଇ ଭାରତ କରିବାକୁ ପଡିବ । ଇଣ୍ଡିଆର ସମ୍ବିଧାନକୁ ବଦଳାଇ ଭାରତର ସମ୍ବିଧାନ କରିବାକୁ ପଡ଼ିବ ।
ଭୁବନେଶ୍ବର: ପବିତ୍ର ଗୁରୁଦିବସ ଅବସରରେ ଓଡ଼ିଆ ବିଶ୍ବବିଦ୍ୟାଳୟର ପ୍ରଥମ ବର୍ଷ ସ୍ନାତକୋତ୍ତର ଓଡ଼ିଆ ପାଠ୍ୟକ୍ରମର ଶୁଭାରମ୍ଭ କରାଯାଇଛି । ଭିଡ଼ିଓ ବାର୍ତ୍ତା ମାଧ୍ୟମରେ ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଜିଠାରୁ ଅସ୍ଥାୟୀ ଭାବରେ ସତ୍ୟବାଦୀ ସ୍ଥିତ ପାନ୍ଥଶାଳାରେ ଆରମ୍ଭ ହୋଇଛି ପାଠପଢା ।
ଆଜି ଅପରାହ୍ଣରେ ପାନ୍ଥଶାଳାଠାରେ ଆୟୋଜିତ କାର୍ଯ୍ୟକ୍ରମରେ ଉଚ୍ଚଶିକ୍ଷା ମନ୍ତ୍ରୀ ଅତନୁ ସବ୍ୟସାଚୀ ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଓଡ଼ିଆ ବିଶ୍ବବିଦ୍ୟାଳୟକୁ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଏହାପରେ ଛାତ୍ରଛାତ୍ରୀଙ୍କ ପାଠ ପଢା ଆରମ୍ଭ ହୋଇଥିଲା । ଗୁରୁ ଦିବସ ଅବସରରେ ବିଶ୍ବବିଦ୍ୟାଳୟର ଛାତ୍ରଛାତ୍ରୀ ଅତିଥିଙ୍କୁ ସମ୍ବର୍ଦ୍ଧିତ କରିଥିବା ବେଳେ ଜଣେ ଛାତ୍ରୀ କୁଳପତିଙ୍କୁ ତାଙ୍କର ଫଟୋଚିତ୍ର ପ୍ରଦାନ କରିଥିଲେ ।
ଅନ୍ୟମାନଙ୍କ ମଧ୍ୟରେ ସମ୍ମାନିତ ଅତିଥି ଭାବେ ବିଶ୍ବବିଦ୍ୟାଳୟ କୁଳପତି ଡ. ସବିତା ପ୍ରଧାନ, ଉଚ୍ଚଶିକ୍ଷା ବିଭାଗ ଅତିରିକ୍ତ ସଚିବ ରମାକାନ୍ତ ନାୟକ, ସ୍ଥାନୀୟ ବିଧାୟକ ଉମାକାନ୍ତ ସାମନ୍ତରାୟ, ଉପଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ, ଏଡିଏମଙ୍କ ସହିତ ସ୍ଥାନୀୟ ବୁଦ୍ଧିଜୀବୀ ଓ ଛାତ୍ରଛାତ୍ରୀ ଉପସ୍ଥିତ ଥିଲେ ।
ଓଡ଼ିଆ ବିଶ୍ବବିଦ୍ୟାଳୟରେ ଚଳିତ ଶିକ୍ଷାବର୍ଷ ପାଇଁ ନାମଲେଖା ଶେଷ ହୋଇଛି । ୩ଟି ବିଭାଗରେ ୭୨ ଜଣ ଛାତ୍ରଛାତ୍ରୀ ନାମ ଲେଖାଇଛନ୍ତି । ସ୍ଥାୟୀ କ୍ୟାମ୍ପସ ନିର୍ମାଣ ଚାଲିଥିବବେଳେ ଆଜିଠାରୁ ଅସ୍ଥାୟୀ ଭାବେ ପାନ୍ଥଶାଳାରେ ଆରମ୍ଭ ହୋଇଛି ପାଠପଢା ।
