ଢେଙ୍କାନାଳ: ଢେଙ୍କାନାଳ ଯାଇଗ୍ରାଉଣ୍ଡ ଜିରୋରେ ସମୃଦ୍ଧି ପାଇଁ ସମୀକ୍ଷା କଲେ 5T ସଚିବ ଭି.କେ. ପାଣ୍ଡିଆନ । ରୂପାନ୍ତରିତ ହେବ ସିଦ୍ଧ ବଳରାମଜୀଉଙ୍କ ମନ୍ଦିର । ସଦେଇବେରେଣୀ ବୁଣାକାର ଓ ଶିଳ୍ପୀଙ୍କୁ ମିଳିବ ସବୁ ସୁବିଧା । ପ୍ରମୁଖ ପର୍ଯ୍ୟଟନରେ ପରିଣତ ହେବ ସାପୁଆ ଡ୍ୟାମ । ସେପଟେ ଚାକିରି ପାଇଁ ନୁହେଁ ବରଂ ମେଡାଲ ଆଣିବାକୁ ଖେଳିବାକୁ ଖେଳାଳିଙ୍କୁ ପରାମର୍ଶ ଦେଇଲେ 5T ସଚିବ ସଚିବ ।
ଢେଙ୍କାନାଳରେ କ’ଣ ହୋଇଛି, କେତେ ବାକି ଅଛି ? ଐତିହାସିକ ରୂପାନ୍ତରଣ ଅଧ୍ୟାୟରେ ଢେଙ୍କାନାଳକୁ ଯୋଡ଼ିବାକୁ ଟିକିନିକି ସମୀକ୍ଷା କରିଛନ୍ତି 5T ସଚିବ ଭି.କେ. ପାଣ୍ଡିଆନ । ଲୋକ ପ୍ରଶାସନ ପାଖରେ ନୁହେଁ, ପ୍ରଶାସନ ପହଞ୍ଚିଛି ଲୋକଙ୍କ ପାଖରେ । ଦୀର୍ଘ ୬୦ ବର୍ଷ ଧରି ଯାହା ହୋଇ ନଥିଲା 5T ସଚିବଙ୍କ ଗସ୍ତ ପରେ ୬ ଦଶନ୍ଧିର ଆଶା ଉଜ୍ବଳ ହୋଇଛି ।
ଖୁବଶୀଘ୍ର ରୂପାନ୍ତରିତ ହେବ ଢେଙ୍କାନାଳ ସହରର ସିଦ୍ଧ ବଳରାମଜୀଉଙ୍କ ମନ୍ଦିର । ମନ୍ଦିରକୁ ଯାଇ ପୂଜାର୍ଚ୍ଚନା କରିବା ସହ ପାରିପାର୍ଶ୍ବିକ ଉନ୍ନତି ପାଇଁ ଅନୁଧ୍ୟାନ କରିଥିଲେ 5T ସଚିବ । ଯାଉନଳିପୋଖରୀ ମଠର ବିକାଶ ପାଇଁ ମହନ୍ତଙ୍କ ସହିତ ଆଲୋଚନା କରିଥିଲେ । ସେପଟେ ପରଜଙ୍ଗ ବ୍ଲକର ଅଷ୍ଟଶମ୍ଭୁ ଶୈବପୀଠର ରୂପାନ୍ତରଣ ପାଇଁ ମଧ୍ୟ ପ୍ରତିଶ୍ରୁତି ଦେଇଛନ୍ତି ।
ସେପଟେ ଚାକିରି ଲକ୍ଷ୍ୟ ରଖି ଖେଳ ନାହିଁ, ଅଲିମ୍ପିକରେ ମେଡାଲ ଜିତିବାର ଝୁଙ୍କ ନେଇ ଭଲ କ୍ରୀଡାବିତ ହେବା ଆବଶ୍ୟକ ବୋଲି ଢେଙ୍କାନାଳ ଷ୍ଟାଡିୟମରେ କ୍ରୀଡାବିତଙ୍କୁ ପରାମର୍ଶ ଦେଇଛନ୍ତି ଫାଇଭ-ଟି ସଚିବ । ଖେଳିବା ପାଇଁ ମୁଖ୍ୟମନ୍ତ୍ରୀ ସବୁ ସହାୟତା ଯୋଗାଇଦେବେ ବୋଲି କହିଛନ୍ତି ।
ସଦେଇବେରେଣୀ ବୁଣାକାର ଓ ଶିଳ୍ପୀଙ୍କ ଗାଁକୁ ଯାଇ ବୁଣାକାର, କଳାକାର ଓ ଶିଳ୍ପୀଙ୍କ ସହ ଆଲୋଚନା କରିଥିଲେ 5T ସଚିବ । ଆଗକୁ ଆବଶ୍ୟକତା ଅନୁସାରେ ସବୁ ସହାୟତା ଯୋଗାଇଦିଆଯିବ ବୋଲି ଦେଇଥିଲେ ପ୍ରତିଶ୍ରୁତି । ସାପୁଆ ଡ୍ୟାମ ଏକ ଉନ୍ନତ ପର୍ଯ୍ୟଟନସ୍ଥଳୀରେ ପରିଣତ ହେବ । ଗ୍ରାଉଣ୍ଡରେ ତଦାରଖ କରିବା ସହ ଉନ୍ନତିକରଣ ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି 5T ସଚିବ ।
ଜିଲ୍ଲାର ବିଭିନ୍ନ ସ୍ଥାନରେ ସାଧାରଣ ଲୋକଙ୍କୁ ଅଭିଯୋଗପତ୍ର ଗ୍ରହଣ କରିଥିଲେ 5T ସଚିବ । କାମାକ୍ଷାନଗର ସାରଙ୍ଗଧର ଷ୍ଟାଡିୟମ, ପରଜଙ୍ଗ ଓ ହିନ୍ଦୋଳ ଖଜୁରିଆକଟାରେ ଲୋକଙ୍କୁ ଭେଟି ଦାବିପତ୍ର ଗ୍ରହଣ କରିଥିଲେ । ସପ୍ତାହେ ଭିତରେ ସମସ୍ୟାର ସମାଧାନ ପାଇଁ ନିର୍ଭର ପ୍ରତିଶ୍ରୁତି ଦେଇଥିଲେ 5T ସଚିବ । ମିଶନ ଶକ୍ତି ମିଲେଟ କ୍ୟାଫେ ପରିଦର୍ଶନ କରି ମାଆମାନଙ୍କ ସହିତ ଆଲୋଚନା କରିଥିଲେ । ଜିଲ୍ଲା ମୁଖ୍ୟ ଚିକିତ୍ସାଳୟରେ ଭିତ୍ତିଭୂମିର ଅନୁଧ୍ୟାନ କରିବା ସହ ସପ୍ତଶଯ୍ୟା ଯାଇ ପିଲାମାନଙ୍କ ସହ କରିଥିଲେ ଆଲୋଚନା ।
