କୋରାପୁଟ: କୋରାପୁଟ ବିଧାୟକ ରଘୁରାମ ପୋଡ଼ାଲଙ୍କୁ ହତ୍ୟା ଧମକ । ସୋସିଆଲ ମିଡିଆ ମାଧ୍ୟମରେ ହତ୍ୟା ଧମକ ମିଳିଥିବା ଅଭିଯୋଗ । ଏନେଇ ସେ କୋରାପୁଟ ଟାଉନ୍ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା ରୁଜୁ କରି ଜଣେ ଯୁବକକୁ ଅଟକ ରଖିଛି । ଫେସବୁକରେ ଜୟ ହୋ ନାମକ ଗ୍ରୁପରେ ଏକ ଖବରକାଗଜର ନିଉଜ୍ କଟିଂ ପୋଷ୍ଟ ହୋଇଛି । ଏଥିରେ ପବନ କୁମାର ନାମକ ଜଣେ ଯୁବକ କମେଣ୍ଟରେ ବେଶି ହେଲେ ସିଧା ସୁଟ୍ କରିଦେବି ତାକୁ ବୋଲି ଉଲ୍ଲେଖ କରିଛନ୍ତି । ବିଧାୟକ ସବୁବେଳେ ନିର୍ବାଚନ ମଣ୍ଡଳୀ ତଥା ଜିଲ୍ଲାର ବିଭିନ୍ନ ଅଞ୍ଚଳ ଗସ୍ତ କରୁଛନ୍ତି । ବିଭିନ୍ନ ଜରୁରୀ ସମୟରେ ସୁରକ୍ଷାକର୍ମୀଙ୍କୁ ନନେଇ ମଧ୍ୟ ଗସ୍ତ କରିଥାନ୍ତି । ତେଣୁ ତାଙ୍କ ସୁରକ୍ଷାକୁ ଦୃଷ୍ଟିରେ ରଖି ପୋଲିସ୍ କାର୍ଯ୍ୟାନୁଷ୍ଠାନ ଗ୍ରହଣ କରିଛି ।
ଏସିଆ କପ୍-୨୦୨୩: ୪୨ ଓଭରରେ ୨୫୨ ରନ୍ କରିଛି ପାକିସ୍ତାନ, ବିଜୟ ଲକ୍ଷ୍ୟକୁ ପିଛା କରି ଶ୍ରୀଲଙ୍କାର ବ୍ୟାଟିଂ ଜାରି
କଲମ୍ବୋ: ଏସିଆ କପର ସୁପର-୪ର ୫ମ ମୁକାବିଲା ଶ୍ରୀଲଙ୍କା ଏବଂ ପାକିସ୍ତାନ ମଧ୍ୟରେ ଚାଲିଛି । ପାକିସ୍ତାନ ପ୍ରଥମେ ବ୍ୟାଟିଂ କରି ୪୨ ଓଭରରେ ୭ ୱିକେଟ୍ ବିନିମୟରେ ୨୫୨ ରନ୍ କରିଛି । ବର୍ଷା କାରଣୁ ମ୍ୟାଚ୍ ପ୍ରଥମେ ୪୫-୪୫ ଓଭରର ଆରମ୍ଭ ହୋଇଥିଲା କିନ୍ତୁ ପରେ ପୁଣି ବର୍ଷା ଯୋଗୁଁ ଏହାକୁ ୪୨-୪୨ ଓଭର କରିଦିଆଯାଇଥିଲା । ପାକିସ୍ତାନ ପକ୍ଷରୁ ମହମ୍ମଦ ରିଜୱାନ ଅପରାଜିତ ୮୬ ରନ୍ କରିଥିଲେ । ସେହିପରି ଅବଦୁଲ୍ଲା ଶଫିକ ୫୨ ରନ୍ ଏବଂ ଇଫତିକାର ଅହମ୍ମଦ ୪୭ ରନ୍ କରିଥିଲେ ।
ଶ୍ରୀଲଙ୍କା ପକ୍ଷରୁ ମଥିସା ପଥିରାନା ତିନୋଟି ୱିକେଟ୍ ଅକ୍ତିଆର କରିଥିବା ବେଳେ ପ୍ରମୋଦ ମଦୁସାନ ଦୁଇଟି ୱିକେଟ୍ ଅକ୍ତିଆର କରିଥିଲେ । ୨୫୩ ରନର ବିଜୟ ଲକ୍ଷ୍ୟକୁ ପିଛା କରି ପଥୁମ ନିଶାଙ୍କ ଏବଂ କୁଶାଲ ପରେରା ଶ୍ରୀଲଙ୍କା ପକ୍ଷକୁ ପଡ଼ିଆକୁ ଓହ୍ଲାଇଛନ୍ତି । ଏବେ ନିର୍ଦ୍ଧାରିତ ୪୨ ଓଭରରେ ୨୫୩ ରନ୍ କରିପାରିଲେ ଶ୍ରୀଲଙ୍କା ଫାଇନାଲକୁ ପ୍ରବେଶ କରିବ । ସେହିପରି ଯଦି ୨୫୨ ରନ୍ ଭିତରେ ଶ୍ରୀଲଙ୍କାକୁ ପାକିସ୍ତାନ ରଖେ ତେବେ ସେ ଫାଇନାଲକୁ ଯିବ । ଆଜି ଯିଏ ବି ଜିତିବ ଫାଇନାଲରେ ଭାରତକୁ ବେଟିବ ।
ଖୋଲୁଛି ହନିଟ୍ରାପ୍ କୁଇନର ବ୍ଲାକମେଲ ଥିଓରି, ସୋସିଆଲ ମିଡିଆରେ ଯୋଡୁଥିଲା ସମ୍ପର୍କ, ଘରକୁ କରୁଥିଲା ନିମନ୍ତ୍ରଣ
ଭୁବନେଶ୍ୱର: ମାୟାବିନୀର ମଧୁଫାଶରେ ଯୌନପିପାଶୁ । କ୍ଷଣିକ ସୁଖ ଆଶାରେ ବଡ଼ବଡ଼ିଆ ହରାଉଥିଲେ ଲକ୍ଷ ଲକ୍ଷ । ବଣ୍ଟି ଅର ବବଲି ଷ୍ଟୋରୀରେ ବଢୁଛି ଟୁଇଷ୍ଟ । ସ୍ତ୍ରୀକୁ ପର ପୁରୁଷ ପାଖେ ଟେକିଦେଉଥିଲା ସ୍ବାମୀ । ନାଁ ଇରାନୀ ପାତ୍ର, ଘର ଯାଜପୁର । ଯାତ୍ରାପାର୍ଟିରେ ଆଙ୍କରିଂ କରିବାକୁ ଭୁବନେଶ୍ବର ଆସିଥିଲା। ହେଲେ ଆଙ୍କର ହେବା ବଦଳରେ ବନିଗଲା ମାୟାବିନୀ । ଷ୍ଟେଜ ଛାଡ଼ି ବେଡରେ ଆରମ୍ଭ କରିଦେଲା ମୁଲଚାଲ୍ । ପୁରୁଷ କଳାକାରଙ୍କୁ ଦେହସୁଖ ଲୋଭ ଦେଖାଇ ଫସାଉଥିଲା । ଜଣେ ଡାକ୍ତରଙ୍କୁ ବେଡ଼ରୁମକୁ ଡାକି ଫସାଇବା ପରେ ୨୫ ଲକ୍ଷ ଦାବି କରିବା ଅଭିଯୋଗରେ ଗିରଫ ହୋଇ ଏବେ ଜେଲରେ ଅଛି ବ୍ଲାକମେଲ କୁଇନ ।
ଏପଟେ ଇରାନୀ ବିରୋଧରେ ଲମ୍ବୁଛି ଅଭିଯୋଗର ଫର୍ଦ୍ଦ । ଜଣେ ମେଧାବୀ ଛାତ୍ର, ବ୍ୟବସାୟୀ, ବିଲ୍ଡର ଥାନାରେ ଅଭିଯୋଗ କରିବା ପରେ ଖୋଲୁଛି ଇରାନୀର ରଙ୍ଗିନ ଦୁନିଆର ଫର୍ଦ୍ଦ । ସୋସିଆଲ ମିଡିଆରେ ସମ୍ପର୍କ ବଢାଉଥିଲା ଇରାନୀ । ବିରିୟାନି, ଚିକେନ୍ ପକୋଡ଼ା ଓ ମଦ ସହିତ ଘରକୁ କରୁଥିଲା ନିମନ୍ତ୍ରଣ । ଆଉ ଦେହ ଭୋକରେ ଯିଏ ଗଲା, ଇରାନୀର ମାୟାଜାଲରେ ଫସିଲା । ଅନ୍ତରଙ୍ଗ ମୁହୂର୍ତ୍ତର ଭିଡିଓ ଭାଇରାଲ ଭୟରେ ଲକ୍ଷ ଲକ୍ଷ ଟଙ୍କା ଗଣିବାକୁ ବାଧ୍ୟ ହେଉଥିଲା । ଖାଲି ବଡ଼ବଡ଼ିଆ ନୁହେଁ, ରାସନ ଦୋକାନୀଙ୍କୁ ଛାଡ଼ିନଥିଲା ଇରାନୀ ।
ରାସନ କିଣିବା ବେଳେ ଫୁଙ୍ଗୁଳା ଦେହ ଦେଖାଇ ୨ ଲକ୍ଷ ଟଙ୍କାର ଚୁନା ଲଗାଇଥିଲା । ଆଶ୍ୟର୍ଯ୍ୟକର କତା ହେଉଛି ଏସବୁ ଚାଲିଥିଲା ଇରାନୀ ସ୍ବାମୀର ଜାଣତରେ । ଟଙ୍କା ରୋଜଗାର କରିବାକୁ ସ୍ତ୍ରୀକୁ ପରପୁରୁଷ ପାଖରେ ପରଶିଦେଉଥିଲା ସ୍ବାମୀ ନିଶିକାନ୍ତ ପାତ୍ର ଓରଫ ବାପି । ଟ୍ରାପର ଶିକାର ହେଉଥିବା ଲୋକ ଅନ୍ତରଙ୍ଗ ହେବା କ୍ଷଣି ଘର ଭିତରକୁ ଧସେଇ ପଶୁଥିଲେ ୪ ଯୁବକ। ତା ପରେ ଆରମ୍ଭ ହେଉଥିଲା ବ୍ଲାକମେଲ ଡ୍ରାମା । ବନ୍ଦ ଘରେ ସ୍ପାଏ କ୍ୟାମେରାରେ ରେକର୍ଡ ହୋଇଥିବା କିଛି ଭିଡିଓ ଥିବା ନେଇ ସନ୍ଦେହ କରାଯାଉଛି ।
ଖୁବଶୀଘ୍ର ଏହି ବଣ୍ଟି ଆଉ ବବଲି ଙ୍କୁ ରିମାଣ୍ଡରେ ଆଣିବା ପରେ ହେଟଷ୍ଟୋରୀ ଉପରୁ ଗୁମର ଖୋଲିବ ବୋଲି ପୋଲିସ କହିଛି। ସେପଟେ ଇଜି ମନି ପାଇବା ଆଶାରେ ଯୁବପିଢି ହନିଟ୍ରାପ ଭଳି ନୂଆ ଫଣ୍ଡା ଆପଣାଇଥିବା କହିଛନ୍ତି ମହିଳା ସମାଜସେବୀ। ଅନଲାଇନରେ ସେକ୍ସଟ୍ରସନର ଅନେକ ନଜିର ଥିଲା । କିନ୍ତୁ ସାଇବର ଠକଙ୍କଠାରୁ ପାଦେ ଆଗକୁ ଯାଇ ରାଜଧାନୀରେ ମହିଳା ଏଭଳି ଟ୍ରାପ କରିବା ଘଟଣା ପୋଲିସ ପାଇଁ ମଧ୍ୟ ଚ୍ୟାଲେଞ୍ଜି ସାବ୍ୟସ୍ତ ହୋଇଛି ।
ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ପୁଷ୍ଟି ଯୋଜନା ଓ ପଡା ପୁଷ୍ଟି କାର୍ଯ୍ୟକ୍ରମର ଶୁଭାରମ୍ଭ କଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ରାଜ୍ୟର ମା, କିଶୋରୀ ଝିଅ ଓ ଶିଶୁଙ୍କ ଉପଯୁକ୍ତ ପୁଷ୍ଟିସାଧନ ଉଦ୍ଦେଶ୍ୟରେ ରାଜ୍ୟରେ ‘ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ପୁଷ୍ଟି ଯୋଜନାର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହା ସହିତ ମୁଖ୍ୟମନ୍ତ୍ରୀ ‘ପଡା ପୁଷ୍ଟି କାର୍ଯ୍ୟକ୍ରମ ମଧ୍ୟ ଆରମ୍ଭ କରିଛନ୍ତି। ଏହି ଯୋଜନାରେ ସାରା ରାଜ୍ୟରେ ୧୫ରୁ ୧୯ବର୍ଷ ବୟସର ସମସ୍ତ କିଶୋରୀ ବାଳିକାଙ୍କୁ ପୁଷ୍ଟି ସହାୟତା ସହିତ ଗର୍ଭବତୀ ମହିଳା ଓ ପ୍ରସୂତୀ ମାଙ୍କ ପାଇଁ ଅଧିକ ଶୁଖିଲା ଖାଦ୍ୟର ବ୍ୟବସ୍ଥା, ଅତିଶୟ ପୁଷ୍ଟିହୀନ ପିଲାଙ୍କ ପାଇଁ ସମ୍ପୂର୍ଣ୍ଣ ଆହାର, ମଧ୍ୟମ ପୁଷ୍ଟିହୀନ ପିଲା ଏବଂ ଅତିଶୟ କମ୍ ଓଜନର ପିଲାଙ୍କ ପାଇଁ ଭିଟାମିନଯୁକ୍ତ ଛତୁଆ ଓ ଅଣ୍ଡା ପ୍ରଦାନର ବ୍ୟବସ୍ଥା ରହିଛି ।
ପଡା ପୁଷ୍ଟି ଯୋଜନାରେ ଦୁର୍ଗମ ତଥା ଆଦିବାସୀ ଅଞ୍ଚଳର ପିଲାଙ୍କୁ ସେମାନଙ୍କ ପଡା ତଥା ଗାଁରେ ଉତ୍ତମ ରନ୍ଧା ଖାଦ୍ୟ ଯୋଗାଇ ଦିଆଯିବ। ପୁଷ୍ଟି ସହିତ ସମୃଦ୍ଧିର ଗଭୀର ସମ୍ପର୍କ ରହିଛି। ତେଣୁ ପୁଷ୍ଟିର ଉନ୍ନତି ଜରିଆରେ ବିକାଶର ଲକ୍ଷ୍ୟ ପୂରଣ କରିପାରିବା ବୋଲି ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି। ପରିବାରକୁ ଉପଯୁକ୍ତ ପୁଷ୍ଟି କେବଳ ମା ହିଁ ଦେଇପାରିବ। ତେଣୁ ଏହି କାର୍ଯ୍ୟକ୍ରମର ସଫଳତା ମାଙ୍କ ଉପରେ ନିର୍ଭର କରେ। ଅଙ୍ଗନବାଡି କର୍ମୀ ଓ ମିଶନ ଶକ୍ତି ମାଙ୍କର ମଧ୍ୟ ଏହି କାର୍ଯ୍ୟକ୍ରମର ସଫଳତା ପାଇଁ ଗୁରୁଦାୟିତ୍ୱ ରହିଛି। ଓଡିଶା ଦେଶର ପ୍ରଥମ ରାଜ୍ୟ ଭାବେ ୨୦୨୦-୨୧ ବର୍ଷରୁ ପୁଷ୍ଟି ବଜେଟ ପରିକଳ୍ପନା କରିଛି ।
ମମତା ଯୋଜନାରେ ରାଜ୍ୟର ଗର୍ଭବତୀ ମହିଳା ଓ ନବଜାତ ଶିଶୁଙ୍କ ସ୍ୱାସ୍ଥ୍ୟର ଉପଯୁକ୍ତ ଯତ୍ନ ନିଆଯାଉଛି। ‘ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ପୁଷ୍ଟି ଯୋଜନା’ଏ କ୍ଷେତ୍ରକୁ ଅଧିକ ସୁଦୃଢ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏହାଦ୍ୱାରା ରାଜ୍ୟର ପ୍ରତ୍ୟେକ ମହିଳା ଓ ଶିଶୁ ସ୍ୱାସ୍ଥ୍ୟବାନ ହୋଇପାରିବେ । ଏହା ଦ୍ୱାରା ରାଜ୍ୟ ସମୃଦ୍ଧି ପଥରେ ଆଗେଇବ ବୋଲି ମୁଖ୍ୟମନ୍ତ୍ରୀ କହିଛନ୍ତି। 5Tର ପାଞ୍ଚଟି ଉପାଦାନର ପ୍ରୟୋଗରେ ମହିଳା ଓ ଶିଶୁ ବିକାଶ ବିଭାଗ ତୃଣମୂଳସ୍ତରରେ ଯୋଜନାର ସଫଳ କାର୍ଯ୍ୟକାରିତା ପାଇଁ କାର୍ଯ୍ୟ କରିବ ।
ଅବତରଣ ବେଳେ ରନୱେରୁ ଖସି ଦୁଇଖଣ୍ଡ ହୋଇଗଲା ଚାର୍ଟର ବିମାନ
ମୁମ୍ବାଇ: ମୁମ୍ବାଇ ବିମାନ ବନ୍ଦରରେ ଚାର୍ଟର ବିମାନ ଦୁର୍ଘଟଣାଗ୍ରସ୍ତ । ଅବତରଣ ସମୟରେ ରନୱେରୁ ଖସିପଡ଼ିଲା ପ୍ରାଇଭେଟ ଚାର୍ଟର ବିମାନ । ବିମାନରେ ୬ ଯାତ୍ରୀ ଏବଂ ଦୁଇଜଣ କ୍ରୁ ସଦସ୍ୟ ଥିଲେ । ଏହି ଦୁର୍ଘଟଣାରେ ମୋଟ ଆଠ ଜଣ ଆହତ ହୋଇଛନ୍ତି । ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଡିଜିସିଏ କହିଛି ଯେ ବିଶାଖାପଟ୍ଟନମରୁ ମୁମ୍ବାଇ ଅଭିମୁଖେ ଉଡାଣ ଭରିଥିବା ଭିଏସଆର୍ ବେଞ୍ଚର୍ସ ଲିୟରଜେଟ ୪୫ ବିମାନ ଭିଟି-ଡିବିଏଲ୍ ମୁମ୍ବାଇ ବିମାନ ବନ୍ଦରର ରନୱେ-୨୭ରେ ଲ୍ୟାଣ୍ଡିଂ ସମୟରେ ବାହାରକୁ ଚାଲିଯାଇଥିଲା ।
ବିମାନରେ ୬ ଯାତ୍ରୀ ଏବଂ ୨ ଜଣ କ୍ରୁ ସଦସ୍ୟ ଥିଲେ । ଯେଉଁ ସମୟରେ ଏହି ଦୁର୍ଘଟଣା ହୋଇଥିଲା ସେ ସମୟରେ ପ୍ରବଳ ବର୍ଷା ହେଉଥିଲା । ରନୱେ ଠିକସେ ନଦେଖା ଯିବା କାରଣରୁ ଏହି ଦୁର୍ଘଟଣା ହୋଇଥିବା କୁହାଯାଉଛି । ଦୁର୍ଘଟଣା ପରେ ବିମାନଟି ଦୁଇଖଣ୍ଡ ହୋଇଯାଇଛି । ଦୁର୍ଘଟଣା ହେବା କ୍ଷଣି ଉଦ୍ଧାର କାର୍ଯ୍ୟ ଜୋରଦାର କରାଯିବା ସହ ବିମାନରେ ଲାଗିଥିବା ନିଆଁ ଲିଭାଯାଇଥିଲା । ସନ୍ଧ୍ୟା ପ୍ରାୟ ୫ଟା ସମୟରେ ଏହି ଦୁର୍ଘଟଣା ଘଟିଛି ।
ବରଗଡରେ ସ୍କ୍ରବ ଟାଇଫସରେ ପ୍ରାଣ ହରାଇଲେଣି ୫, ସୁନ୍ଦରଗଡରୁ ଜଣେ
ବରଗଡ: ଓଡିଶାରେ ମାଡି ଚାଲିଛି ସ୍କ୍ରବ ଟାଇଫସ । ବରଗଡ ଜିଲ୍ଲାରେ ସ୍କ୍ରବ ଟାଇଫସରେ ଆକ୍ରାନ୍ତ ହୋଇ ୫ ଜଣ ପ୍ରାଣ ହରାଇଲେଣି । ଆହୁରି ୪ ଜଣ ସ୍କ୍ରବ ଟାଇଫସରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି । ମୃତକଙ୍କ ମଧ୍ୟରେ ଦୁଇ ଜଣ ସୋହେଲା ବ୍ଲକର ହୋଇଥିବାବେଳେ ଜଣେ ଲେଖାଏଁ ଅତାବିରା, ଭେଡେନ ଓ ବରପାଲି ବ୍ଲକର ଅଛନ୍ତି ।
ଗତ ଅଗଷ୍ଟରେ ବରଗଡ ଜିଲ୍ଲାରେ ୧୬୮ଟି ନମୁନା ପରୀକ୍ଷା ହୋଇଥିବାବେଳେ ଜଣଙ୍କ ଠାରେ ସଂକ୍ରମଣ ଚିହ୍ନଟ ହୋଇଥିଲା । ସେହିପରି ସେପ୍ଟେମ୍ବରରେ ୧୪୨ ଟି ନମୁନାରୁ ତିନୋଟିରେ ସ୍କ୍ରବ ଟାଇଫସ ଥିବା ଜଣାପଡିଛି ।
ସ୍କ୍ରବ ଟାଇଫସ ଓ ଲେପଟୋ ସ୍ପାଇରୋସିସରୁ ପ୍ରତିଷେଧକ ବ୍ୟବସ୍ଥା କରିବାକୁ ଜନସ୍ବାସ୍ଥ୍ୟ ନିର୍ଦ୍ଦେଶକଙ୍କ ପକ୍ଷରୁ ଚିଠି ଜରିଆରେ ମାର୍ଗଦର୍ଶିକା ଜାରି କରାଯାଇଛି। କେସ୍ ବଢୁଥିବାରୁ ସମସ୍ତ ଡିପିଏଚଏଲରେ ଟେଷ୍ଟ ଓ ପର୍ଯ୍ୟାପ୍ତ ଟେଷ୍ଟିଂ କିଟ୍ ମହାଜୁଦ ରଖିବାକୁ ସବୁ ସରକାରୀ ହସ୍ପିଟାଲକୁ ନିର୍ଦ୍ଦେଶ ଦିଆଯାଇଛି। ରୋଗ ନେଇ ପ୍ରଥମେ ଡାକ୍ତରଙ୍କୁ ସଚେତନ କରାଯିବ। ଏହାଦ୍ବାରା ସେମାନେ ରୋଗକୁ ଶୀଘ୍ର ଚିହ୍ନଟ କରିବା ସହ ଲୋକଙ୍କୁ ସଚେତନ କରିପାରିବେ। ରୋଗୀ ଚିହ୍ନଟ ପାଇଁ ସର୍ଭେଲାନ୍ସ ବି ବଢାଯିବ। ହସ୍ପିଟାଲରେ ପର୍ଯ୍ୟାପ୍ତ ଔଷଧ ଓ ଆଣ୍ଟିବାୟୋଟିକ୍ ମହଜୁଦ ରଖିବା ଉପରେ ଗୁରୁତ୍ବ ଦେଇଛନ୍ତି ରାଜ୍ୟ ସରକାର। ଏଥିସହ ମୃତ୍ୟୁର ସଠିକ ତଦନ୍ତ କରି ଷ୍ଟେଟ ସର୍ଭେଲାନସ ୟୁନିଟକୁ ରିପୋର୍ଟ ଦିଆଯିବା ବାଧ୍ୟତାମୂଳକ କରାଯାଇଛି ।
ବରଗଡ଼ ଭଳି ସୁନ୍ଦରଗଡ଼ ଜିଲ୍ଲାରେ ମଧ୍ୟ ବ୍ୟାପିଲଣି ସ୍କ୍ରବ ଟାଇଫସ୍ । ସୁନ୍ଦରଗଡ ଜିଲ୍ଲାରେ ଜାନୁ୍ୟାରୀ ମାସରୁ ଏଯାଏ ୧୩୨ ଜଣ ପଜିଟିଭ ଚିହ୍ନଟ ହୋଇଥିବା ବେଳେ ଜଣଙ୍କର ମୃତ୍ୟୁ ହୋଇଛି।
ଏଠି ସ୍କୁଲ ଫି ବାବଦକୁ ପିଲାଙ୍କୁ ଦେବାକୁ ପଡ଼େ ସପ୍ତାହକୁ ୨୫ ପ୍ଲାଷ୍ଟିକ ବୋତଲ
ଆସାମ: ଆଜିର ଦିନରେ ପିଲାଙ୍କୁ ପାଠ ପଢ଼ାଇବା କଷ୍ଟକର ହୋଇଗଲାଣି । ବିଶେଷ କରି ବେସରକାରୀ ସ୍କୁଲରେ । ସବୁ ବାପାମାଆ ଚାହାନ୍ତି ସେମାନଙ୍କ ପିଲା ଭଲ ସ୍କୁଲରେ ପାଠପଢ଼ି, ଭଲ ମଣିଷଟେ ହେଉ । ହେଲେ, ବର୍ତ୍ତମାନ ସମୟରେ ବେସରକାରୀ ସ୍କୁଲରେ ପାଠପଢ଼ା ଫି ଅଭିଭାବକଙ୍କ ଚିନ୍ତା ବଢ଼ାଇଛି । ଏଥିପାଇଁ ବହୁ ଲୋକ ପିଲାର ପାଠପଢ଼ା ପାଇଁ ଟଙ୍କା ସଞ୍ଚୟ କରିବାକୁ ନାନା ଫନ୍ଦି ଆପଣାଇଥାନ୍ତି ।
ତେବେ ସବୁ ବେସରକାରୀ ସ୍କୁଲ ପିଲାଙ୍କ ପାଠପଢ଼ା ପାଇଁ ମୋଟା ଅଙ୍କର ସ୍କୁଲ ଫି ନେଇ ନଥାନ୍ତି । ଏମିତି ବି କିଛି ସ୍କୁଲ ଅଛି, ଯେଉଁଠି ସ୍କୁଲ ଫି ପାଇଁ ଅଭିଭାବକଙ୍କୁ ଚିନ୍ତା କରିବାକୁ ପଡ଼ି ନଥାଏ । ଜାଣନ୍ତୁ, ଆସାମାରେ ଥିବା ଏମିତି ଏକ ସ୍କୁଲ ବିଷୟରେ ଯେଉଁଠି ପିଲାମାନେ ପାଠ ପଢ଼ିବା ଟଙ୍କା ବଦଳରେ ଦେଇଥାନ୍ତି ପ୍ଲାଷ୍ଟିକ ବୋତଲ ।
ଗୌହାଟୀରେ ଥିବା ଏହି ସ୍କୁଲ ନାଁରେ ରହିଛି ଅନେକ ରେକର୍ଡ । ଗ୍ରାମାଞ୍ଚଳର ଶହେରୁ ଅଧିକ ପିଲା ଏଠାରେ ପାଠ ପଢୁଛନ୍ତି । ଯାହା ଅନ୍ୟ ରାଜ୍ୟ ପାଇଁ ରୋଲ ମଡେଲ ପାଲଟିଛି । ଏଠାରେ ପିଲାଙ୍କ ପାଖରୁ ଫି ବାବଦକୁ ଟଙ୍କା ବଦଳରେ ପ୍ଲାଷ୍ଟିକ ବୋତଲ ନିଆଯାଇଥାଏ । ତାହା ପୁଣି ସପ୍ତାହକୁ ୨୫ଟି । କେବଳ ପାଠପଢ଼ା ନୁହେଁ, ପିଲାମାନେ ରୋଜଗାର ବି କରୁଛନ୍ତି ।
ଏମିତି ସ୍କୁଲ ଖୋଲିବାର ଚିନ୍ତା ପରମିତା ଶର୍ମା ଏବଂ ମାଜିନ୍ ମୁକ୍ତାରଙ୍କୁ ଆସିଥିଲା । ସେମାନେ ଅଞ୍ଚଳରେ ଅଳିଆ ଆବର୍ଜନା ଦେଖି ଦୁଃଖି ହୋଇଯାଇଥିଲେ । ଏପରିକି ଅଞ୍ଚଳର ଲୋକେ ଶୀତ ଦିନେ ପ୍ଲାଷ୍ଟିକକୁ ଜଳାଇ ଗରମ ସେକ ନେଉଥିବା ଦେଖିଥିଲେ । ସେମାନେ ଜାଣିବାକୁ ପାଇଥିଲେ, ଅଞ୍ଚଳର ଲୋକେ ପ୍ଲାଷ୍ଟିକର ଅପକାରୀତା ବିଷୟରେ କିଛି ଜାଣନ୍ତି ନାହିଁ । ଏମିତି ସ୍ଥିତିରେ ସେମାନେ ଅଞ୍ଚଳର ପିଲା ଓ ସମାଜ ପାଇଁ କିଛି କରିବାକୁ ଚାହୁଁଥିଲେ । ଯାହାର ଉଦାହରଣ ଏବେ ଏହି ସ୍କୁଲ ପାଲଟିଛି । ଏଠାରେ ପିଲାଙ୍କୁ ପାଠପଢ଼ା ସହ କାରପେଣ୍ଟିଂ, ଗାର୍ଡନିଂ ଓ ଅନ୍ୟ ବୈଷୟିକ ଶିକ୍ଷା ଦିଆଯାଉଛି । ଏହାସହ ପ୍ଲାଷ୍ଟିକ ବୋତଲକୁ କେମିତି ବ୍ୟବହାର କରି ହେବ ଓ ବିଭିନ୍ନ ପ୍ରକାରର କାରୁକାର୍ଯ୍ୟ ବନାଇ ହେବ ସେ ନେଇ ଶିକ୍ଷା ଦିଆଯାଉଛି ।
ଆସନ୍ତାକାଲି ଶ୍ରୀମନ୍ଦିରରେ ପାଳନ ହେବ ସପ୍ତପୁରୀ ଅମାବାସ୍ୟା
ପୁରୀ: ଆସନ୍ତାକାଲି ଶ୍ରୀମନ୍ଦିରରେ ସପ୍ତପୁରୀ ଅମାବାସ୍ୟା ପାଳନ ହେବ । ଭାଦ୍ରବ ମାସ ଅମାବାସ୍ୟାକୁ ସପ୍ତପୁରୀ ଅମାବାସ୍ୟା, କୁଶୋତ୍ପାଟିନୀ ବା କୁଶଗ୍ରହଣୀ ଅମାବାସ୍ୟା ଭାବରେ ପାଳନ କରାଯାଏ । ଶ୍ରୀକ୍ଷେତ୍ରରେ ବାର ମାସରେ ତେରପର୍ବ ସହିତ ଅନେକ ନୀତିକାନ୍ତି ସମ୍ପନ୍ନର ବିଧି ରହିଛି । ସପ୍ତପୁରୀ ଅମାବାସ୍ୟା ତିଥିରେ ମହାପ୍ରଭୁଙ୍କୁ ଲାଗି କରାଯାଏ ସପ୍ତପୁରୀ ଭୋଗ । ଏହିଦିନ ଶ୍ରୀଜିଉଙ୍କର ବିଶେଷ ପୂଜାନୀତି ସହ ସେବାୟତଙ୍କ ଦ୍ୱାରା ଏକ ବଡ଼ “ସପ୍ତପୁରୀ” ବା ସାତପୁରୀ ପ୍ରସ୍ତୁତ କରାଯାଇ ଶ୍ରୀଜିଉଙ୍କୁ ଲାଗି କରାଯାଏ । ଏହାକୁ “ସପ୍ତପୁରୀ ତାଡ଼” ମଧ୍ୟ କୁହାଯାଇଥାଏ ।
ଶ୍ରୀମନ୍ଦିରରେ ଦ୍ବିପ୍ରହର ଧୂପ ପରେ ଅଠରନଳା ନିକଟସ୍ଥ ଭଗବତୀ ମାଆ ଆଲାମଚଣ୍ଡୀଙ୍କ ମନ୍ଦିରରୁ ସପ୍ତପୁରୀ ଭୋଗ ପାଇଁ ଆବଶ୍ୟକ ତାଡ଼, ଘଣ୍ଟ, ଛତି, କାହାଳୀ ଆଦି ପଟୁଆରରେ ଶ୍ରୀମନ୍ଦିରକୁ ବିଜେ କରାଯିବାର ପରମ୍ପରା ରହିଛି । ପରେ ଚତୁଃପାର୍ଶ୍ୱ ଏକ ଘେରା ପରିକ୍ରମା କରି ତାଡ଼ଗୁଡିକ ରୋଷ ବେହରଣରେ ରଖାଯାଏ । ସନ୍ଧ୍ୟା ଧୂପ ପରେ ପୂଜାପଣ୍ଡା ସାମନ୍ତ ଶ୍ରୀଅଙ୍ଗରୁ ଆଜ୍ଞାମାଳ ନେଇ ପଟୁଆରରେ ଶ୍ରୀମନ୍ଦିର ବାହାରେ ଥିବା ଦକ୍ଷିଣକାଳୀ ମନ୍ଦିରକୁ ଯାଆନ୍ତି । ସେଠାରୁ ମଧ୍ୟ ଶ୍ରୀମନ୍ଦିରକୁ ଆଜ୍ଞାମାଳ ବିଜେ କରାଯାଏ । ବିଶ୍ୱାସ ରହିଛି, ମାଆ ଦକ୍ଷିଣକାଳୀ ଏହି ସପ୍ତପୁରୀ ତାଡ଼ ନିଜେ ପ୍ରସ୍ତୁତ କରିଥାନ୍ତି ।
୨୪ ଘଣ୍ଟାରେ ସ୍ୱାଭାବିକଠାରୁ ୫୨୪ ପ୍ରତିଶତ ଅଧିକ ବର୍ଷା
ଭୁବନେଶ୍ୱର: ଓ୍ବେଲମାର୍କ ଲୋପ୍ରେସର ପ୍ରଭାବରେ ଗତ ୨୪ ଘଣ୍ଟାରେ ରାଜ୍ୟରେ ମୌସୁମୀ ଅତ୍ୟଧିକ ସକ୍ରିୟ ସହ ହାରାହାରି ବର୍ଷା ୪୭.୫ ମିମି ରେକର୍ଡ କରାଯାଇଛି ଯାହା ସ୍ୱାଭାବିକ ବର୍ଷା ୭.୬ ମିମି ତୁଳନାରେ ୫୨୪ ପ୍ରତିଶତ ଅଧିକ ରହିଛି । ରାୟଗଡା ଜିଲ୍ଲାରେ ହାରାହାରି ୭୨.୧ ମିମି ରେକର୍ଡ କରାଯାଇଛି ଯାହା ସ୍ୱାଭାବିକ ବର୍ଷା ୪.୩ ମିମି ତୁଳନାରେ ୧୫୭୬% ଅଧିକ ରହିଛି । ଫ୍ଳାସଫ୍ଳଡ ନେଇ ସତର୍କତା ଜାରି ହୋଇଛି । ସହରିଆ ଅଞ୍ଚଳରେ ଜଳମଗ୍ନ ସ୍ଥିତି ଉପୁଜିଵ । କମିବ ଦୃଶ୍ୟମାନ କ୍ଷମତା । ବର୍ତ୍ତମାନ ଏହା ପଶ୍ଚିମବଙ୍ଗ ଉତ୍ତର ଓଡିଶା ଉପକୂଳରେ କେନ୍ଦ୍ରୀଭୂତ ରହିଛି ।
ଦୁଇଦିନ ମଧ୍ୟରେ ଓଡିଶା ଛତିଶଗଡ଼ ଦେଇ ଗତି କରିବ । ଗତ ୨୪ ଘଣ୍ଟାରେ ବଲାଙ୍ଗୀରରେ ସର୍ବାଧିକ ୨୧୫ ମିମି ବର୍ଷା ରେକର୍ଡ । କଳାହାଣ୍ଡି ଏମ.ରାମପୁରରେ ୧୯୩ ମିମି ବର୍ଷା ହୋଇଥିବା ବେଳେ ଥୁଆମୁଳ ରାମପୁର, କଣ୍ଟାମାଳ ବୌଦ୍ଧରେ ୧୫୮ମିଲିମିଟର ବର୍ଷା ରେକର୍ଡ ହୋଇଛି । ଭୁବନେଶ୍ୱର ୫୫ ମିମି ବର୍ଷା ରେକର୍ଡ ହୋଇଛି । ଆଜି ସୋନପୁର, ବୌଦ୍ଧ, ସମ୍ବଲପୁର, ବରଗଡ଼, ବଲାଙ୍ଗୀର ଜିଲ୍ଲାକୁ ରେଡ ଆଲର୍ଟ ଜାରି ହୋଇଛି । କାଲି ଉପରମୁଣ୍ଡରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ରହିଛି । ଦକ୍ଷିଣ ଓଡ଼ିଶାର ଅଧିକାଂଶ ନଦୀରେ ଜଳସ୍ତର ବୃଦ୍ଧି ହେବ ।
ଦୁର୍ଗମ ପାହାଡିଆ ଅଞ୍ଚଳରେ ଭୂସ୍ଖଳନ ସମ୍ଭାବନା । ମାଟିଘର କାନ୍ଥ ଭୁସୁଡିବା ସମ୍ଭାବନା, କଚ୍ଚା ରାସ୍ତା ପ୍ରଭାବିତ ହେବ । ଧାନ ବିଲରୁ ଜଳ ନିଷ୍କାସନ ପାଇଁ ପରାମର୍ଶ ଦିଆଯାଇଛି । ସାର ଓ କୀଟନାଶକ ପ୍ରୟୋଗରୁ ନିବୃତ୍ତ ରହିବାକୁ ପରାମର୍ଶ । ଆଜି ଅପରାହ୍ନରୁ ଉପକୂଳ ଓଡିଶାର ଅଧିକାଂଶ ଜିଲ୍ଲାରେ ବର୍ଷା କମିବ । ୧୬ ତାରିଖରୁ ସାରା ଓଡ଼ିଶାରେ ବର୍ଷାର ପରିମାଣ କମିବ । ୧୯ ତାରିଖରୁ ପୁଣି ବଢିବ ବର୍ଷାର ପରିମାଣ ।
ପୁଅକୁ ଦେଶ ପାଇଁ ସମର୍ପିତ କରିଦେଇଥିଲି, ଆଜି ତା ମୃତ୍ୟୁରେ କାନ୍ଦିବି ନାହିଁ: ଶହୀଦ ଆଶିଷଙ୍କ ମାଆ
ପାନିପଥ: ମୋ ପୁଅ ତ ଦେଶର ଥିଲା । ଆମେ ତାକୁ ଦେଶ ପାଇଁ ସମର୍ପିତ କରିଦେଇଥିଲୁ । ଦୁଃଖ ଆଉ କଷ୍ଟ ତ ବହୁତ ଲାଗୁଛି ହେଲେ କାନ୍ଦିବି ନାହିଁ । ଏମିତି କହିଛନ୍ତି ଅନନ୍ତନାଗରେ ଶହୀଦ ଜଣେ ଯବାନଙ୍କ ମାଆ । ଜମ୍ମୁ କାଶ୍ମୀରର ଅନନ୍ତନାଗରେ ଆତଙ୍କବାଦୀଙ୍କ ସହ ଗୁଳିବିନିମୟରେ ବୀରଗତି ପ୍ରାପ୍ତ କରିଥିବା ମେଜର ଆଶିଷ ଧୋନାକଙ୍କ ମାଆଙ୍କର ଏହି ଶବ୍ଦ ଅଟେ । ଲୁହଭରା ଆଖି ଓ କୋହଭରା କଣ୍ଠରେ ତାଙ୍କ ମାଆ କହିଛନ୍ତି ମୋ ପୁଅର କେବଳ ତିନିଜଣ ଭଉଣୀ ନଥିଲେ । ଦେଶର ସମସ୍ତ ଭଉଣୀ ତାର ଥିଲେ ଏବଂ ସମସ୍ତଙ୍କ ରକ୍ଷା ପାଇଁ ସେ ଶହୀଦ ହୋଇଯାଇଛି । ଅନନ୍ତନାଗରେ ଶହୀଦ ମେଜରଙ୍କ ଘରର ସ୍ଥିତି ବହୁତ ଭାବବିହ୍ୱଳ ଥିଲା ।
ପାନିପତ ବ୍ୟତୀତ ଆଖପାଖର ଲୋକମାନେ ମଧ୍ୟ ତାଙ୍କ ଘର ବାହାରେ ଛିଡା ରହିଥିଲେ ଏବଂ ଶବ ଆସିବାର ଅପେକ୍ଷା କରିଥିଲେ । ସମସ୍ତଙ୍କ ଆଖିରେ ଥିଲା ଲୁହ ଆଉ ଶହୀଦ ଆଶିଷ ଅମର ରହେ ନାରାରେ ଅଞ୍ଚଳ ଫାଟିପଡିଥିଲା । ହେଲେ ଏବେ ପ୍ରଶାସନ ପକ୍ଷରୁ କୁହାଯାଇଛି ଯେ ତାଙ୍କ ଶବ ଶୁକ୍ରବାର ଘରେ ପହଞ୍ଚିବ । ଶେଷ ଦର୍ଶନ କରିବା ପାଇଁ ହଜାର ହଜାର ଲୋକଙ୍କ ଭିଡ଼ ରହିଛି । ମେଜର ଆଶିଷ ଧୋନାକଙ୍କ ଦାଦା କହିଛନ୍ତି ଯେ ଶେଷଥର ଆଶିଷ ସହ ଫୋନରେ କଥା ହୋଇଥିଲୁ । ସେବେ ସେ କହିଥିଲେ ମୁଁ ଅକ୍ଟୋବରରେ ଘରକୁ ଯିବି ଏବଂ ତାପରେ ହିଁ ଘର ସ୍ଥାନାନ୍ତର କରାଯିବ । ପ୍ରକାଶଯୋଗ୍ୟ ପାନୀପଥର ହିଁ ଏକ ଅଞ୍ଚଳରେ ତାଙ୍କ ପରିବାର ଭଡ଼ାରେ ରହୁଥିଲେ । କିଛି ସମୟ ପୂର୍ବେ ହିଁ ପରିବାର ପାନୀପଥର ଟିଡିଆଇରେ ଫ୍ଲାଟ କିଣି ନୂଆ ଘର ବନାଇଥିଲେ ।
ଏଠାକୁ ସେମାନେ ସ୍ଥାନାନ୍ତର ହେବାର ଥିଲା କିନ୍ତୁ ଏବେ ଏହି କୋଠାକୁ ତାଙ୍କର ଶବ ହିଁ ଆସିବ । ପରିବାରର ଯୋଜନା ଥିଲା ଯେ ୨୩ ଅକ୍ଟୋବରରେ ଗୃହ ପ୍ରବେଶର ଆୟୋଜନ କରାଯିବ । ଏହାର କାରଣ ଥିଲା ଯେ ଏହି ଦିନ ମେଜର ଆଶିଷଙ୍କ ଜନ୍ମଦିନ ମଧ୍ୟ ରହିଥିଲା । ସେଥିପାଇଁ ସେ ଛୁଟିରେ ଆସିବାର ଥିଲା । କିନ୍ତୁ ଏବେ ଶେଷ ବିଦାୟ ପାଇଁ ଶବ ହିଁ ଆସିବ । ୩୪ ବର୍ଷୀୟ ଆଶିଷଙ୍କର ଏକ ୪ ବର୍ଷୀୟା ଝିଅ ଅଛି । ଆଶିଷ ମାଆ, ବାପା, ପତ୍ନୀ ଏବଂ ଝିଅକୁ ପଛରେ ଛାଡ଼ି ଚାଲିଯାଇଛନ୍ତି । ମୃତ୍ୟ ଖବର ପରେ ଆଶିଷଙ୍କ ପତ୍ନୀ କାନ୍ଦି କାନ୍ଦି ବେହୋସ ହୋଇଯାଉଛନ୍ତି । ମେଜରଙ୍କ ପରିବାର ଲୋକ କହିଛନ୍ତି ଯେ ତାଙ୍କ ଶବକୁ ଟିଡିଆଇ ସ୍ଥିତ ଘରକୁ ଅଣାଯିବ । ଏହାପରେ ତାଙ୍କ ପୈତୃକ ଗାଁ ବିଞ୍ଝୌଲରେ ଶେଷକୃତ୍ୟ କରାଯିବ ।