ନୂଆଦିଲ୍ଲୀ: ଭାରତୀୟ କ୍ରିକେଟ ଦଳର ପୂର୍ବତନ ଅଲରାଉଣ୍ଡର ଯୁବରାଜ ସିଂ ଭାରତକୁ ଦୁଇଥର ବିଶ୍ୱ ଚାମ୍ପିଅନ ବନାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ । ୨୦୦୭ରେ ହୋଇଥିବା ଟି୨୦ ବିଶ୍ୱକପ୍ ସମୟରେ ସେ ଇଂଲଣ୍ଡ ବିପକ୍ଷ କର ବା ମର ମ୍ୟାଚରେ ଅର୍ଦ୍ଧଶତକୀୟ ଇନିଂସ ଖେଳିଥିଲେ ଏବଂ ଅଷ୍ଟ୍ରେଲିଆ ବିପକ୍ଷ ସେମିଫାଇନାଲରେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ । ୨୦୧୧ ବିଶ୍ୱକପରେ ଲଗାତାର ଭଲ ପ୍ରଦର୍ଶନ କରି ପ୍ଲେୟାର ଅଫ୍ ଦ ଟୁର୍ଣ୍ଣାମେଣ୍ଟ ମଧ୍ୟ ବିବେଚିତ ହୋଇଥିଲେ ।
ଅବଶ୍ୟ ୨୦୧୧ ଦିନିକିଆ ବିଶ୍ୱକପ୍ ପରେ ଯୁବରାଜଙ୍କୁ ନିଜର କ୍ୟାନ୍ସର ରୋଗ ସମ୍ପର୍କରେ ଜଣାପଡ଼ିଥିଲା, ଯେଉଁକାରଣରୁ ତାଙ୍କୁ କ୍ରିକେଟରୁ ବ୍ରେକ ନେବାକୁ ପଡ଼ିଥିଲା ଏବଂ ଯେବେ ସେ ଏକ ବର୍ଷ ପରେ ପ୍ରତ୍ୟାବର୍ତ୍ତନ କରିଥିଲେ ତେବେ ତାଙ୍କୁ ଦଳରେ ସ୍ଥାନ ବନାଇ ରଖିବା ପାଇଁ ବହୁତ ସଂଘର୍ଷ କରିବାକୁ ପଡ଼ିଥିଲା । ଯୁବରାଜ ନିକଟରେ ହିଁ ନିଜ ପ୍ରତ୍ୟାବର୍ତ୍ତନକୁ ନେଇ ଅନେକ ବଡ଼ ଖୁଲାସା କରିଛନ୍ତି । ସେ କହିଛନ୍ତି ଯେ କୋହଲି ନଥିଲେ ସେ ଭାରତୀୟ ଦଳକୁ ପ୍ରତ୍ୟାବର୍ତ୍ତନ କରିପାରିନଥାନ୍ତେ । ଯୁବରାଜ ସିଂହ ଭାରତ ପାଇଁ ଶେଷ ଦିନିକିଆ ୨୦୧୭ରେ ୱେଷ୍ଟଇଣ୍ଡିଜ ବିପକ୍ଷରେ ଖେଳିଥିଲେ । ଏହି ବର୍ଷ ସେ ଇଂଲଣ୍ଡ ବିପକ୍ଷ ନିଜ ଦିନିକିଆ କ୍ୟାରିଅରର ସର୍ବୋଚ୍ଚ ସ୍କୋର କରିଥିଲେ ।
ଇଂଲଣ୍ଡ ବିପକ୍ଷରେ ସେ ୧୫୦ ରନ୍ କରିଥିଲେ । ଟି୨୦ ଅନ୍ତର୍ଜାତୀୟରେ ମଧ୍ୟ ତାଙ୍କୁ ଅନେକ ସୁଯୋଗ ମିଳିଥିଲା ହେଲେ ସେ ତାର ଫାଇଦା ଉଠାଇ ପାରିନଥିଲେ । ଏକ ଜାତୀୟ ଗଣମାଧ୍ୟମକୁ ସାକ୍ଷାତକାରରେ କହିଛନ୍ତି, ଯେବେ ମୁଁ ପ୍ରତ୍ୟାବର୍ତ୍ତନ କରିଥିଲି, ବିରାଟ କୋହଲି ମୋତେ ସପୋର୍ଟ କରିଥିଲେ । ଯଦି ସେ ମୋର ସମର୍ଥନ କରିନଥାନ୍ତେ ତେବେ ମୁଁ ପତ୍ୟାବର୍ତ୍ତନ କରିପାରିନଥାନ୍ତି । ପ୍ରାକ୍ଟିସ ମ୍ୟାଚ୍ ହେଉ ବା ବ୍ୟକ୍ତିଗତ ଜୀବନ ସେ ଅନେକ ସହାୟତା କରିଛନ୍ତି । କିନ୍ତୁ ସେବେ ଧୋନୀ ଥିଲେ ଯିଏକି ମୋତେ ୨୦୧୯କୁ ନେଇ ସଠିକ ଚିତ୍ର ଦେଖାଇଥିଲେ । ସେ କହିଥିଲେ ଯେ ଚୟନକର୍ତ୍ତା ତାଙ୍କ ସମ୍ପର୍କରେ ଚିନ୍ତା କରୁନାହାନ୍ତି । ଏହାପରେ ମୁଁ କ୍ୟାରିଅରକୁ ନେଇ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଥିଲି ବୋଲି ଯୁବରାଜ କହିଛନ୍ତି ।
