ପାର୍ଲାମେଣ୍ଟରେ ପୁଣି ଉଠିଲା ପ୍ରଦୂଷଣ ପ୍ରସଙ୍ଗ। ଲୋକସଭାରେ ରାଜଧାନୀ ଦିଲ୍ଲୀରେ ପ୍ରଦୂଷଣ ବୃଦ୍ଧି ପ୍ରସଙ୍ଗ ଉଠାଇଲେ ବିରୋଧୀ ଦଳ ନେତା ରାହୁଲ ଗାନ୍ଧି। ଲଗାତାର ଅନେକ ଦିନ ହେଲାଣି ଦିଲ୍ଲୀରେ ପ୍ରଦୂଷଣ ନିୟନ୍ତ୍ରଣକୁ ଆସୁନାହିଁ। ଏହାକୁ ନିୟନ୍ତ୍ରଣ କରିବାକୁ ସରକାର କଣ ପଦକ୍ଷେପ ଗ୍ରହଣ କରିଛନ୍ତି ବୋଲି ପଚାରିଛନ୍ତି ରାହୁଲ। ଆଗାମୀ ୪ରୁ ୫ ବର୍ଷ ମଧ୍ୟରେ ସରକାରଙ୍କ କଣ ଯୋଜନା ରହିଛି। ଏ ପ୍ରସଙ୍ଗରେ ସଂସଦରେ ଏକ ଜରୁରୀ ଏବଂ ସଂଗଠିତ ବିତର୍କ ହେବା ଜରୁରୀ ବୋଲି କହିଛନ୍ତି ରାହୁଲ।ବାୟୁ ପ୍ରଦୂଷଣ ଏକ ଗୁରୁତର ସମସ୍ୟା। ଏହାକୁ ନେଇ ଗୃହରେ ଆରୋପ ପ୍ରତ୍ୟାରୋପ ହେବା ଅନୁଚିତ। ପ୍ରଦୂଷଣ ନିୟନ୍ତ୍ରଣ ଲାଗି ଦେଶର ସମସ୍ତ ସହରରେ ନିୟମ ହେବା ଦରକାର। କାହାକୁ ଦୋଷ ନଦେଇ ଏକାଠି କାମ କରିବା ବୋଲି କହିଛନ୍ତି ରାହୁଲ। ଏହାକୁ ଏକ ସାର୍ବଜନୀନ ସ୍ୱାସ୍ଥ୍ୟ ଜରୁରୀକାଳୀନ ପରିସ୍ଥିତି ଭାବେ ଦର୍ଶାଯାଇଛି। ସେପଟେ ଏହି ପ୍ରସଙ୍ଗ ନେଇ ସରକାର ଆଲୋଚନା କରିବାକୁ ରାଜି ବୋଲି ସଙ୍କେତ ଦେଇଛନ୍ତି କେନ୍ଦ୍ରମନ୍ତ୍ରୀ କିରଣ ରିଜିଜୁ।
ରାଜଧାନୀରେ ଲଜ୍ଜା: ନାବାଳିକାଙ୍କୁ ଘର ମାଲିକ ଦୁଷ୍କର୍ମ କରିଥିବା ଅଭିଯୋଗ
ରାଜଧାନୀରେ ଲଜ୍ଜା। ନାବାଳିକାଙ୍କୁ ଦୁଷ୍କର୍ମ ଅଭିଯୋଗ। ଘର ମାଲିକ ଦୁଷ୍କର୍ମ କରିଥିବା ନେଇ ଅଭିଯୋଗ। ମହିଳା ଥାନାରେ ଏତଲା ପରେ ତଦନ୍ତ ଆରମ୍ଭ କରିଛି ପୋଲିସ। ଗୁରୁତର ଅବସ୍ଥାରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଛନ୍ତି ପୀଡିତା। ସଖୀ ସେଣ୍ଟରରେ ଚିକିତ୍ସା ପରେ କ୍ୟାପିଟାଲ ହସ୍ପିଟାଲରେ ଚାଲିଛି ଚିକିତ୍ସା। ଦୁଷ୍କର୍ମ ଅଭିଯୋଗରେ ଘର ମାଲିକକୁ ଗିରଫ କରାଯାଇଛି। ଗତ ୪ ତାରିଖରେ ଘଟିଥିଲା ଏହି ଘଟଣା। ବାପା ମା’ ଘରେ ନଥିବା ବେଳେ ଘର ମାଲିକ ଦୁଷ୍କର୍ମ କରିଥିବା ନେଇ ମହିଳା ଥାନାରେ ଅଭିଯୋଗ ହୋଇଥିଲା। ଅଭିଯୋଗ ପରେ ମହିଳା କମିଶନ ସଦସ୍ୟା କ୍ୟାପିଟାଲ ହସ୍ପିଟାଲ ଯାଇ ପୀଡିତାଙ୍କ ପରିବାରକୁ ଭେଟିଛନ୍ତି। ପୀଡିତାଙ୍କ ସ୍ୱାସ୍ଥାବସ୍ଥା ସମ୍ପର୍କରେ ଡାକ୍ତରଙ୍କ ସହ ଆଲୋଚନା କରିଛନ୍ତି।ଏହାପରେ ମାମଲା ନେଇ ମହିଳା ଥାନାରେ ପଚାରି ବୁଝିଛନ୍ତି। କେସରେ ତ୍ୱରିତ ପଦକ୍ଷେପ ସହ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେଇ ପୋଲିସ ସହ ଆଲୋଚନା ହୋଇଥିବା କହିଛନ୍ତି ମହିଳା କମିଶନ ସଦସ୍ୟା।.
ବିଜେପି ଶାସନରେ ବଢ଼ୁଛି ନାରୀ ନିର୍ଯାତନା: ମହିଳାଙ୍କ ସୁରକ୍ଷା ନେଇ ରାଜ୍ୟପାଳଙ୍କୁ ଭେଟିଲେ ବିଜେଡି ଟିମ୍
ରାଜ୍ୟରେ ବଢୁଛି ନାରୀ ନିର୍ଯାତନା। ବିଜେପି ଶାସନ କ୍ଷମତା ଆସିବା ପରଠାରୁ ବଢ଼ିଛି ନିର୍ଯାତନାର ଗ୍ରାଫ। ପ୍ରତିଦିନ ଘଟିଚାଲିଛି ଅମାନବୀୟ ଘଟଣା। ହେଲେ ସରକାର ନୀରବଦ୍ରଷ୍ଟା ସାଜିଛନ୍ତି । ଆଜି ଏହି ପ୍ରସଙ୍ଗରେ ରାଜ୍ୟପାଳଙ୍କୁ ଭେଟିଛି ବିଜେଡି ଟିମ। ରାଜ୍ୟରେ ମହିଳାଙ୍କ ସୁରକ୍ଷା ବିପନ୍ନ ହୋଇଛି। ମହିଳାଙ୍କ ଉପରେ ବଢୁଥିବା ଅତ୍ୟାଚାର ସମ୍ପର୍କରେ ରାଜ୍ୟପାଳଙ୍କୁ ଦଳ ଅବଗତ କରାଇଛି । ନୀଳଗିରି ବିଧାୟକ ସନ୍ତୋଷ ଖଟୁଆ ବିଜେଡି ନେତ୍ରୀ ଲେଖାଶ୍ରୀ ସାମନ୍ତସିଂହାରଙ୍କ ବିରୋଧରେ ଅଶୋଭନୀୟ ମନ୍ତବ୍ୟ ଦେଇଥିଲେ । ତାର ପ୍ରତିବାଦରେ ଡିଜିପି, ମହିଳା କମିଶନ, କେନ୍ଦ୍ର ମହିଳା କମିଶନଙ୍କୁ ବିଜେଡି ପକ୍ଷରୁ ଅବଗତ କରାଯାଇଥିଲେ ବି ଫଳ ଶୂନ। ମାଲକାନଗିରିରେ ସୃଷ୍ଟି ହୋଇଥିବା ଘଟଣାର ସମାଧାନ କରିବାରେ ସରକାର ଅକ୍ଷମ ବୋଲି କହିଛି ବିଜେଡି।
ସମ୍ବଲପୁରରେ ପୁଣି ଚାଷୀ ଆନ୍ଦୋଳନ: ରାସ୍ତା ଅବରୋଧ କରି ରାଜରାସ୍ତାକୁ ଓହ୍ଲାଇଲେ ଅନ୍ନଦାତା
ସମ୍ବଲପୁରରେ ପୁଣି ଚାଷୀ ଆନ୍ଦୋଳନ। ସହରର ସିନ୍ଦୂରପଙ୍କ ଛକରେ ଚାଷୀଙ୍କ ଆନ୍ଦୋଳନ। ରାସ୍ତା ଅବରୋଧ କରି ରାଜରାସ୍ତାକୁ ଓହ୍ଲାଇଲେ ଅନ୍ନଦାତା। ଚାଷୀଙ୍କ ସମସ୍ୟାକୁ କେନ୍ଦ୍ର କରି ରାସ୍ତା ଅବରୋଧ କଲେ ଆନ୍ଦୋଳନକାରୀ। ଆନ୍ଦୋଳନ ଯୋଗୁ ଅଟକିଛି ଶହ ଶହ ଯାନବାହନ। କେବଳ ଅର୍ଥନୈତିକ ଅବରୋଧ କରାଯାଉଥିବା ଚାଷୀଙ୍କ ସୂଚନା। ସହରର ରେମେଡ ଛକ ଓ ସିନ୍ଦୂରପଙ୍କ ଛକରେ କରାଯାଇଛି ରାସ୍ତା ଅବରୋଧ।
ବରିଷ୍ଠ କଂଗ୍ରେସ ନେତା ଶିବରାଜ ପାଟିଲଙ୍କ ଦେହାନ୍ତ
ବରିଷ୍ଠ କଂଗ୍ରେସ ନେତା ଶିବରାଜ ପାଟିଲଙ୍କ ଦେହାନ୍ତ। ୯୦ ବର୍ଷ ବୟସରେ ଶିବରାଜ ପାଟିଲଙ୍କ ପରଲୋକ ଘଟିଛି। ମହାରାଷ୍ଟ୍ର ଲାତୁର ସ୍ଥିତ ବାସଭବନରେ ତାଙ୍କର ଦେହାନ୍ତ ଘଟିଛି। ଦୀର୍ଘ ଦିନ ଧରି ବୟସାଧିକ କାରଣରୁ ଅସୁସ୍ଥ ଥିଲେ। ପୂର୍ବତନ କେନ୍ଦ୍ର ଗୃହମନ୍ତ୍ରୀ ଓ ଲୋକସଭା ବାଚସ୍ପତି ଥିଲେ ଶିବରାଜ ପାଟିଲ। ଶିବରାଜଙ୍କ ଦେହାନ୍ତ ନେଇ ଶୋକ ପ୍ରକାଶ କରିଛନ୍ତି କଂଗ୍ରେସର ଅନେକ ପ୍ରମୁଖ ନେତା। କଂଗ୍ରେସ ସଂସଦୀୟ ଦଳ ନେତା ସୋନିଆ ଗାନ୍ଧି ଶିବରାଜଙ୍କ ଦେହାନ୍ତ ଘଟଣା ଅତି ଦୁଃଖଦ ବୋଲି କହିବା ସହ ଶୋକ ପ୍ରକାଶ କରିଛନ୍ତି। କଂଗ୍ରେସ ସାଂସଦ ଶିବରାଜ ପାଟିଲଙ୍କ ଦେହାନ୍ତରେ ଶୋକ ପ୍ରକାଶ କରିଛନ୍ତି। ସାଂସଦ ରାହୁଲ ଗାନ୍ଧିଙ୍କ ସମେତ ଅନ୍ୟ ବିଶିଷ୍ଟ ନେତା ଶୋକ ପ୍ରକାଶ କରିଛନ୍ତି। ଶିବରାଜଙ୍କ ପରିବାରରେ ପୁଅ ଶୈଳେଶ ପାଟିଲ, ବୋହୂ ଅର୍ଚ୍ଚନା ଓ ଦୁଇ ନାତୁଣୀ ଅଛନ୍ତି।
ମାଲକାନଗିରିରେ ବଢ଼ିଲା ଇଣ୍ଟରନେଟ କଟକଣା
ମାଲକାନଗିରିରେ ବଢ଼ିଲା ଇଣ୍ଟରନେଟ କଟକଣା। ମାଲକାନଗିରି ଜିଲ୍ଲାରେ ଇଣ୍ଟରନେଟ କଟକଣାକୁ ବୃଦ୍ଧି କରାଯାଇଛି। ଆଜି ରାତି ୧୨ଟା ଯାଏ ବଢ଼ିଛି କଟକଣା । ଗ୍ରାଉଣ୍ଡକୁ ଯାଇ ସ୍ଥିତି ପରଖିଥିଲେ ଆରଡିସି ଓ ଜିଲ୍ଲାପାଳ। ଶାନ୍ତି ଫେରାଇ ଆଣିବାକୁ ଲୋକଙ୍କୁ ନିବେଦନ କରିଛନ୍ତି। ଅନ୍ୟପଟେ ଗାଁରେ ଥିରେ ଧିରେ ଶାନ୍ତି ଫେରୁଛି। ଗତକାଲି ଦୁଇ ଗୋଷ୍ଠୀର ନେତାଙ୍କ ସହ ଆଲୋଚନା କରିଥିଲେ ଉପ- ମୁଖ୍ୟମନ୍ତ୍ରୀ କେଭି ସିଂହଦେଓ ଓ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ । ଦୁଇ ପକ୍ଷର ବିଭିନ୍ନ ଅଭିଯୋଗ ଓ ଦାବି ଶୁଣି ଅଭିଯୋଗ ଓ ସମସ୍ୟାର ସମାଧାନ ପାଇଁ ପଦକ୍ଷେପ ନିଆଯିବ ବୋଲି କେଭି ସଂଦେଓ ଆଶ୍ଵାସନା ଦେଇଛନ୍ତି। ଘଟଣାର ଅନୁଧ୍ୟାନ ପାଇଁ ବିଜେଡିର ୭ ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ ମାଲକାନଗିରି ଯିବେ। ଏମାନଙ୍କ ମଧ୍ୟରେ ମାନସ ମାଡକାମି, ମନୋହର ରନ୍ଧାରୀ, ରମେଶ ମାଝୀ, ପ୍ରଦୀପ ମାଝୀ, ରବି ନନ୍ଦ, ଈଶ୍ବର ପାଣିଗ୍ରାହୀ ଓ ଲକ୍ଷ୍ମୀପ୍ରିୟା ନାୟକ ଘଟଣାସ୍ଥଳକୁ ଯାଇ ତଥ୍ୟ ଅନୁସନ୍ଧାନ କରିବେ। ଅପ୍ରୀତିକର ପରିସ୍ଥିତି ଲାଗି ରହିଥିବାରୁ ମାଲ୍ୟବନ୍ତ ମହୋତ୍ସବକୁ ସ୍ଥଗିତ ରଖାଯାଇଛି। ୧୪ରୁ ୧୮ ତାରିଖ ଯାଏ ହେବାର ଥିଲା ମାଲ୍ୟବନ୍ତ ମହୋତ୍ସବ। ଜାନୁଆରୀ ମାସରେ ହୋଇପାରେ ମାଲ୍ୟବନ୍ତ ମହୋତ୍ସବ।
ଆଜି ବସିବ ଛତିଶା ନିଯୋଗ ବୈଠକ: ଅଧ୍ୟକ୍ଷତା କରିବେ ଶ୍ରୀମନ୍ଦିର ମୁଖ୍ୟ ପ୍ରଶାସକ
ଆଜି ବସିବ ଛତିଶା ନିଯୋଗ ବୈଠକ । ସଂଧ୍ୟା ୫ଟାରେ ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ହେବାକୁ ଥିବା ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ଅଧ୍ୟକ୍ଷତାରେ କରିବେ । ଆସନ୍ତା ୧୬ ତାରିଖ ଠାରୁ ଜାନୁଆରୀ ୧୩ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ପହିଲି ଭୋଗ ନୀତି ନିର୍ଘଣ୍ଟକୁ ବୈଠକରେ ଅନୁମୋଦନ କରାଯିବ। ଜାନୁଆରୀ ୩ ତାରିଖରେ ଦେବାଭିଷେକ ପୂର୍ଣ୍ଣିମା ନୀତି ନିର୍ଘଣ୍ଟ ଓ ଜାନୁଆରୀ ୧୪ ତାରିଖରେ ମକର ସଂକ୍ରାନ୍ତି ନୀତି ନିର୍ଘଣ୍ଟ ନେଇ ବୈଠକରେ ଆଲୋଚନା ହେବ। ସେହିପରି ଇଂରାଜୀ ନୂଆବର୍ଷରେ ଭକ୍ତ ମାନଙ୍କ ଶୃଙ୍ଖଳିତ ଦର୍ଶନ ଉପରେ ଆଲୋଚନା କରାଯିବ । ସେହିପରି ଶ୍ରୀମନ୍ଦିରରେ ଦିବ୍ୟାଙ୍ଗ ଭକ୍ତଙ୍କ ସହଜ ଦର୍ଶନ ବ୍ୟବସ୍ଥା ନେଇ ଆଲୋଚନା ହେବ । ସଭାପତିଙ୍କ ଅନୁମୋଦନ କ୍ରମେ ବୈଠକରେ ଅନ୍ୟାନ୍ୟ ପ୍ରସଙ୍ଗରେ ଆଲୋଚନା ହୋଇପାରେ। ବୈଠକରେ ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା, ଏସପି ପ୍ରତୀକ ସିଂ, ଛତିଶା ନିଯୋଗର ସେବାୟତ ପ୍ରତିନିଧି ଉପସ୍ଥିତ ରହିବେ। ଅନ୍ୟାନ୍ୟ ବରିଷ୍ଠ ପ୍ରଶାସନିକ ଅଧିକାରୀ ମାନେ ମଧ୍ୟ ଉପସ୍ଥିତ ରହିବେ।
ଖୁବ୍ ଶୀଘ୍ର ଭେନେଜୁଏଲା ଉପରେ ସ୍ଥଳଭାଗରେ ହମଲା କରିବ ଆମେରିକା
ଖୁବ୍ ଶୀଘ୍ର ଭେନେଜୁଏଲା ଉପରେ ସ୍ଥଳଭାଗରେ ହମଲା କରିବ ଆମେରିକା। ଏନେଇ ଘୋଷଣା କରିଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ଏଥିଲାଗି ସମସ୍ତ କ୍ଷେତ୍ର ପ୍ରସ୍ତୁତ ହୋଇଥିବା ସୂଚନା ମିଳିଛି। ଡ୍ରଗ ଟ୍ରାଫିକିଂକୁ କେନ୍ଦ୍ର କରି ଆମେରିକା ଏହି ହମଲା କରିବାକୁ ଯାଉଥିବା ଜଣାଯାଇଛି। ଆମେରିକାର ଏହି ଘୋଷଣାକୁ ସମାଲୋଚନା କରିଛନ୍ତି ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋ। ସେପଟେ ଭେନେଜୁଏଲାକୁ ପୂର୍ଣ୍ଣ ସମର୍ଥନ ଜଣାଇଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ। ସେ ମାଦୁରୋଙ୍କ ସହ ଫୋନ ଜରିଆରେ କଥା ହୋଇ ସମସ୍ତ ପ୍ରକାର ସହଯୋଗ କରିବାକୁ ଘୋଷଣା କରିଛନ୍ତି। ଭେନେଜୁଏଲା ବିରୋଧରେ ଆମେରିକାର ପୁଣି କାର୍ଯ୍ୟାନୁଷ୍ଠାନ। ରାଷ୍ଟ୍ରପତି ମାଦୁରୋଙ୍କ ୩ ପୁତୁରା ଓ ତୈଳ ପରିବହନ କରୁଥିବା ୬ଟି ଜାହାଜ ବିରୋଧରେ ଆମେରିକା ଜାରି କରିଛି କଟକଣା। ମାଦୁରୋଙ୍କ ପୁତୁରା ଫ୍ରାଙ୍କୁଇ ଫ୍ଲୋରେସ, କାର୍ଲୋସ ଫ୍ଲୋରେସ ଓ ଏଫ୍ରେନ କାମ୍ପୋଙ୍କ ବିରୋଧରେ କଟକଣା ଜାରି ହୋଇଛି। ଏହି ପଦକ୍ଷେପ ଫଳରେ ଏହି ୩ ଜଣ ଆମେରିକାରେ ରଖିଥିବା କୌଣସି ପ୍ରକାର ସମ୍ପତ୍ତିକୁ ବ୍ୟବହାର କରିପାରିବେ ନାହିଁ। ଏହା ସହ ସେମାନଙ୍କ ସହିତ କୌଣସି ଆମେରିକୀୟ ନାଗରିକ ବା କମ୍ପାନୀ କାରବାର କରିପାରିବେ ନାହିଁ। ତେଣେ ବେଆଇନ ସାମଗ୍ରୀ ପରିବହନ କାରଣ ଦର୍ଶାଇ ଭେନେଜୁଏଲାର ୬ଟି ମାଲବାହୀ ଜାହାଜକୁ ଜବତ କରିଛି ଆମେରିକା।
ଭୁବନେଶ୍ବର ସତ୍ୟବିହାରରେ ଭୟଙ୍କର ଅଗ୍ନିକାଣ୍ଡ: ହୁ ହୁ ହୋଇ ଜଳିଗଲା ବାର୍
ଭୁବନେଶ୍ବର ସତ୍ୟବିହାରରେ ଭୟଙ୍କର ଅଗ୍ନିକାଣ୍ଡ । ଛକରେ ଥିବା ଏକ ବାରରେ ଭୟଙ୍କର ଅଗ୍ନିକାଣ୍ଡ। ହୁ ହୁ ହୋଇ ଜଳିଗଲା ବାର୍ । ଅଗ୍ନିଶମ ବାହିନୀର ଦୀର୍ଘ ଉଦ୍ୟମ ପରେ ନିଆଁକୁ କରାଯାଇଛି ଆୟତ୍ତ। ଚାରି ମହଲା ଉପରେ ଚାଲିଥିବା ହୁକା ବାର ସମ୍ପୂର୍ଣ୍ଣ ଜଳିଯାଇଥିବା ସୂଚନା ମିଳିଛି। ଘଟଣାରେ କେହି ମୃତାହତ ହୋଇ ନଥିବା ସୂଚନା ମିଳିଛି। ବଡ଼କଥା ହେଉଛି ହୁକ୍କା ବାରରେ ଅଗ୍ନି ନିୟନ୍ତ୍ରଣ ଲାଗି କୌଣସି ଯନ୍ତ୍ରପାତି ନଥିଲା। ଅଗ୍ନିକାଣ୍ଡ ଘଟଣାରେ ସ୍ପଷ୍ଟୀକରଣ ରଖିଛି ଅବକାରୀ ବିଭାଗ। ନୋ ଲିମିଟ ଏୟାର ରେଷ୍ଟୁରାଣ୍ଟରେ ନଥିଲା ବାର ଲାଇସେନ୍ସ । କିନ୍ତୁ ସେହି ସ୍ଥାନରେ ମଦ ବାର ସାଙ୍ଗକୁ ହୁକ୍କା ବାର ଚାଲିଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି।
ସେପଟେ ଶତ୍ରୁତା କାରଣରୁ ବାରରେ ନିଆଁ ଲଗାଇଦିଆଯାଇଥିବା ଆଶଙ୍କା କରାଯାଉଛି। କିଛିଦିନ ତଳେ ବାରକୁ ନେଇ ଗଣ୍ଡଗୋଳ ହୋଇଥିବା ଜଣାପଡିଛି। ଚାରି ମହଲା ବିଶିଷ୍ଟ ବାରରେ କିପରି ଅଗ୍ନିକାଣ୍ଡ ଘଟିଲା ତାହାର ଚାଲିଛି ଛାନବିନ। ଅଗ୍ନିକାଣ୍ଡ ଯୋଗୁ ରସୁଲଗଡ଼ଠାରୁ ପଳାଶୁଣୀ ଯାଏ ରାସ୍ତା ହୋଇଯାଇଥିଲା ଜାମ। ଅଗ୍ନିକାଣ୍ଡ ଯୋଗୁ ବିପୁଳ କ୍ଷୟକ୍ଷତି ଘଟିଥିବା ଆଶଙ୍କା କରାଯାଉଛି। ଅଗ୍ନିକାଣ୍ଡ ଘଟଣା ପରେ ସେଠାରେ ଶହ ଶହ ଲୋକ ଜମା ହୋଇଥିବା ଦେଖିବାକୁ ମିଳିଛି।
ଗତ ଡିସେମ୍ବର ୬ରେ ଗୋଆର ଏକ ନାଇଟ କ୍ଲବରେ ଭୟାବହ ଅଗ୍ନିକାଣ୍ଡ ଘଟିବା ପରେ ଓଡ଼ିଶାରେ ମଧ୍ୟ ବାର ଓ ପବର ଅଗ୍ନି ନିରାପତ୍ତା ସାର୍ଟିଫିକେଟ ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଥିଲା। ନିଜେ ଏ ସମ୍ପର୍କରେ ଅଗ୍ନିଶମ ଡିଜି ସୂଚନା ଦେଇଥିଲେ । କିନ୍ତୁ ନିର୍ଦ୍ଦେଶ ପରେ ଆଜି ଏହି ଅଘଟଣ ଅଗ୍ନିଶମ ବିଭାଗ ପାଇଁ ଚ୍ୟଲେଞ୍ଜ ସୃଷ୍ଟି କରିଛି । ଗୋଆ ବିର୍ଚ୍ଚ ବାଇ ନାଇଟ କ୍ଲବରେ ଘଟିଥିବା ଅଘଟଣରେ ଯାଇଥିଲା ୨୫ଜଣଙ୍କ ଜୀବନ।
ଆସନ୍ତା ବର୍ଷ ଫେବ୍ରୁଆରୀ ୧୨ ତାରିଖରେ ହେବ ବାଂଲାଦେଶ ନିର୍ବାଚନ
ଆସନ୍ତା ବର୍ଷ ଫେବ୍ରୁଆରୀ ୧୨ ତାରିଖରେ ହେବ ବାଂଲାଦେଶ ନିର୍ବାଚନ । ତ୍ରୟୋଦଶ ଜାତୀୟ ସଂସଦ ପାଇଁ ଫେବ୍ରୁଆରି ୧୨ ତାରିଖରେ ହେବ ନିର୍ବାଚନ। ମୁଖ୍ୟ ନିର୍ବାଚନ କମିଶନର୍ ଏହି ଘୋଷଣା କରିଛନ୍ତି। ଦେଶରେ ମୁକ୍ତ ଓ ଗଣତାନ୍ତ୍ରିକ ଭୋଟିଂ ହେବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ବିଶ୍ଵକୁ ବାଂଲାଦେଶ ଦେଖାଇବ ଯେ, ବାଂଲାଦେଶ ଗଣତନ୍ତ୍ରରେ ବିଶ୍ଵାସ କରେ। ଫେକ୍ ନ୍ୟୁଜ୍ ଓ ଗୁଜବ ପ୍ରତି ସତର୍କ ରହିବାକୁ ଲୋକଙ୍କୁ ସେ ଆହ୍ଵାନ ଦେଇଛନ୍ତି। ଏହା ଏକ ଚ୍ୟାଲେଞ୍ଜ ବୋଲି ସେ କହିଛନ୍ତି। ୩୦୦ ଆସନ ବିଶିଷ୍ଟ ସଂସଦ ପାଇଁ ଫେବ୍ରୁଆରି ୧୨ ତାରିଖରେ ନିର୍ବାଚନ ହେବ। ଡିସେମ୍ଵର ୨୯ ହେଉଛି ନାମାଙ୍କନ ଦାଖଲର ଶେଷ ଦିନ। ଜାନୁଆରି ୪ ତାରିଖ ଯାଏ ଯାଞ୍ଚ କରାଯିବ ନାମାଙ୍କନ ପତ୍ର। ଜାନୁଆରି ୨୦ ଭିତରେ ନାମାଙ୍କନ ପ୍ରତ୍ୟାହାର କରାଯାଇପାରିବ। ତା ପରେ ଆସିବ ଚୂଡ଼ାନ୍ତ ପ୍ରାର୍ଥୀ ତାଲିକା। ଫେବ୍ରୁଆରି ୧୨ ତାରିଖରେ ହେବ ନିର୍ବାଚନ। ନିର୍ବାଚନ ତାରିଖ ଘୋଷଣା ସହିତ ନିର୍ବାଚନ ପ୍ରକ୍ରିୟା ଆରମ୍ଭ ହୋଇ ଯାଇଛି। ଗତ ବର୍ଷ ଶେଖ ହସିନା ସରକାରର ପତନ ପରେ ଏହି ନିର୍ବାଚନ ହେଉଛି। ଅରାଜକତା ହେବା ପରେ ଗତ ବର୍ଷ ଅଗଷ୍ଟ ୫ ତାରିଖରେ ହସିନା ସରକାରର ପତନ ହୋଇଥିଲା। ତା ପରେ ମଧ୍ୟ ବହୁ ଦିନ ଯାଏ ଚାଲିଥିଲା ହିଂସାକାଣ୍ଡ, ହତ୍ୟା ଓ ଅରାଜକତା। ଦେଶର ଭବିଷ୍ୟତ କଣ ହେବ, ଗଣତନ୍ତ୍ର ଫେରିବ କି ନାହିଁ, କେବେ ନିର୍ବାଚନ ହେବ, ମୁକ୍ତ ଓ ଅବାଧ ନିର୍ବାଚନ ହୋଇପାରିବ ତ, ସେ ନେଇ ସନ୍ଦେହ ହୋଇଥିଲା॥ ଏବେ ନିର୍ବାଚନ ତାରିଖ ଘୋଷଣା ହେବା ସହିତ ସେସବୁ ଚର୍ଚ୍ଚାର ଅବସାନ ହୋଇଛି।