ନୂଆଦିଲ୍ଲୀ: କଂଗ୍ରେସ କାର୍ଯ୍ୟକାରୀ କମିଟି ବା ସିଡବ୍ଲୁସିରେ ସ୍ଥାନ ପାଇଲେ ରାଜସ୍ଥାନ କଂଗ୍ରେସ ନେତା ସଚିନ ପାଇଲଟ । ଆସନ୍ତା ଲୋକସଭା ନିର୍ବାଚନ ପୂର୍ବରୁ କଂଗ୍ରେସର ସର୍ବୋଚ୍ଚ ନୀତି ନିର୍ଦ୍ଧାରକ କମିଟି ଗଠିତ ହୋଇଛି । ୩୯ ଜଣିଆ କମିଟିରେ ବରିଷ୍ଠ କଂଗ୍ରେସ ନେତା ଶଶୀ ଥରୁର, ଦୀପାଦାସ ମୁନସୀ, ସୟିଦ ନାସେର ହୁସେନ ସ୍ଥାନ ପାଇଛନ୍ତି । ସଚିନଙ୍କୁ କୌଣସି ଏକ ପ୍ରମୁଖ ରାଜ୍ୟର ଦାୟିତ୍ବ ଦିଆଯିବା ସମ୍ଭାବନା ରହିଛି । କମିଟିରେ ମଲ୍ଲିକାର୍ଜୁନ ଖଡଗେ, ସୋନିଆ ଗାନ୍ଧୀ, ମନମୋହନ ସିଂ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା, ଜୟରାମ ରମେଶ, ଅଧୀର ରଞ୍ଜନ ଚୌଧୁରୀ, ଏ.କେ. ଆଣ୍ଟୋନି, ଅମ୍ବିକା ସୋନି, ରଣଦୀପ ସୂର୍ଯେଓ୍ବାଲା, ଗୋରବ ଗୋଗୋଇ ପ୍ରମୁଖ ସ୍ଥାନ ପାଇଛନ୍ତି । ସ୍ଥାୟୀ ପ୍ରତିନିଧି ଭାବେ ସାମିଲ ୩୨ ନେତା ।
ଚନ୍ଦ୍ରରେ ଅବତରଣ ପୂର୍ବରୁ କ୍ରାସ୍ ହେଲା ରୁଷର ଲୁନା-୨୫ ସ୍ପେଶକ୍ରାଫ୍ଟ
ନନ୍ଦିଘୋଷ ବ୍ୟୁରୋ: ରୁଷର ମୁନ ମିଶନକୁ ଜୋରଦାର ଝଟକା । ଚନ୍ଦ୍ରରେ ଅବତରଣ ପୂର୍ବରୁ କ୍ରାସ ହେଲା ରୁଷର ଲୁନା-୨୫ ସ୍ପେଶକ୍ରାପ୍ଟ । ରୁଷର ସ୍ପେଶ ଏଜେନ୍ସି ରସ୍କସମସ କହିଛି ଯେ ଶନିବାର ସନ୍ଧ୍ୟା ୫ଟା ୨୭ ମିନିଟରେ ସ୍ପେଶକ୍ରାଫ୍ଟ ସହ ସମ୍ପର୍କ ଛିନ୍ନ ହୋଇଯାଇଥିଲା । ଶନିବାର ଏଥିରେ ପ୍ରି-ଲ୍ୟାଣ୍ଡିଂ ଅରବିଟ ପରିବର୍ତ୍ତନ ସମୟରେ ଯାନ୍ତ୍ରିକ ତୃଟି ଦେଖାଦେଇଥିଲା । ଲୁନା-୨୫ ଆସନ୍ତାକାଲି ଚନ୍ଦ୍ରର ସାଉଥ ପୋଲରେ ଲ୍ୟାଣ୍ଡ କରିବାର ଥିଲା । ରସ୍କସମସ କହିଛି ଯେ ଲୁନା-୨୫ର ଫ୍ଲାଇଟ ପ୍ରୋଗ୍ରାମ ଅନୁସାରେ ସ୍ପେଶକ୍ରାଫ୍ଟକୁ ପ୍ରି-ଲ୍ୟାଣ୍ଡିଂ କକ୍ଷରେ ପ୍ରବେଶ କରାଇବା ପାଇଁ କମାଣ୍ଡ ଦିଆଯାଇଥିଲା । ଏହି କମାଣ୍ଡ ଭାରତୀୟ ସମୟାନୁସାରେ ଶନିବାର ଅପରାହ୍ନ ୪ଟା ୩୦ ମିନିଟରେ ଦିଆଯାଇଥିଲା ।
ଏହି ସମୟରେ ଲୁନାରେ ଏମର୍ଜେନ୍ସି ସ୍ଥିତି ଆସିଯାଇଥିଲା କାରଣ ସ୍ପେଶକ୍ରାଫ୍ଟ ନିର୍ଦ୍ଧାରିତ ପାରାମିଟର ଅନୁସାରେ ଥ୍ରଷ୍ଟର ଫାୟାର କରିପାରିନଥିଲା । ଲୁନା-୨୫ ସ୍ପେଶକ୍ରାଫ୍ଟକୁ ୧୧ ଅଗଷ୍ଟରେ ସୋୟୁଜ ୨.୧ ବି ରକେଟ ଜରିଆରେ ବୋସ୍ତୋନି କସ୍ମୋଡ୍ରୋମରୁ ଲଞ୍ଚ୍ କରାଯାଇଥିଲା । ୪୭ ବର୍ଷ ପରେ ଚନ୍ଦ୍ରକୁ ନିଜର ମିଶନ ପଠାଇଥିଲା ରୁଷ । ଏହା ପୂର୍ବରୁ ରୁଷ୍ ୧୯୭୬ରେ ଲୁନା-୨୪ ମିଶନ ପଠାଇଥିଲା । ଲୁନା-୨୪ ଚନ୍ଦ୍ରରୁ ୧୭୦ ଗ୍ରାମ ଧୂଳି ଆଣି ସୁରକ୍ଷିତ ଭାବେ ପୃଥିବୀ ପୃଷ୍ଠକୁ ଫେରିଥିଲା । ଏହା ତାର ପ୍ରଥମ ମିଶନ ଥିଲା ଯେବେ ଏହା ସାଉଥପୋଲରେ ଅବତରଣ କରିଥାନ୍ତା ।
ଋଷର ମିସାଇଲ ହମଲାରେ ୟୁକ୍ରେନର ଚେର୍ନିହିଭ ସହରରେ ୭ ଜଣଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: କିଛିଦିନର ବ୍ୟବଧାନ ପରେ ପୁଣି ରକ୍ତମୁଖା ଋଷ । ଋଷର ମିସାଇଲ ହମଲାରେ ୟୁକ୍ରେନର ଚେର୍ନିହିଭ ସହରରେ ୭ ଜଣଙ୍କ ମୃତ୍ୟୁ । ମୃତକଙ୍କ ମଧ୍ୟରେ ଅଛନ୍ଚି ଜଣେ ୬ ବର୍ଷର ବାଳିକା । ଏହି ଆଟାକରେ ଆହତ ହୋଇଛନ୍ତି ୧୫ ଶିଶୁଙ୍କ ସମେତ ୧୪୪ ଲୋକ । ଏକ ଚର୍ଚ୍ଚରେ ଲୋକମାନେ ସମବେତ ହୋଇ ଉତ୍ସବ ପାଳନ କରୁଥିବାବେଳେ ଋଷ କରିଥିଲା ହମଲା । ଆକ୍ରମଣରେ ଏକ ବିଶ୍ବବିଦ୍ୟାଳୟ କୋଠା ନଷ୍ଟ ହୋଇଛି । ଋଷର ଏହି ଆକ୍ରମଣକୁ ନିନ୍ଦା କରିଛି ଜାତିସଂଘ । ଏହା ସହ ଏହାକୁ ଏକ ଆତଙ୍କବାଦୀ ଆକ୍ରମଣ କହିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ବେଲାଋଷଠାରୁ ୫୦ କିଲୋମିଟର ଦୂର ନିକଟରେ ଚେର୍ନିହିବ ଅବସ୍ଥିତ । ଏହି ସହରକୁ ଋଷୀୟ ସୈନ୍ୟ ନିଜ କବଜାରେ ପ୍ରଥମେ କିଛି ଦିନ ରଖିଥିଲେ ।
RTI କର୍ମୀ କହି ବ୍ଲାକମେଲ୍ ମାମଲା; ମାଷ୍ଟରମାଇଣ୍ଡ କାହ୍ନୁଚରଣଙ୍କୁ ଗିରଫ କଲା STF
ଭୁବନେଶ୍ୱର: ସୂଚନା ଅଧିକାର କର୍ମୀ କହି ବ୍ଲାକମେଲ ମାମଲା । ମାଷ୍ଟରମାଇଣ୍ଡ କାହ୍ନୁଚରଣ ପ୍ରଧାନକୁ ଗିରଫ କଲା STF । ଘଟଣାରେ ବ୍ରହ୍ମପୁରର କିଶୋର ମିଶ୍ରଙ୍କୁ ଶୁକ୍ରବାର ଗିରଫ କରାଯାଇଥିଲା । କାହ୍ନୁଚରଣ ଆକାଉଣ୍ଟରେ କୋଟି କୋଟି ଟଙ୍କା ଟ୍ରାଞ୍ଜକ୍ସନ ହୋଇଛି । ଅଭିଯୁକ୍ତ ନିକଟରୁ କିଛି ବ୍ୟାଙ୍କ ପାସବୁକ ଓ ଏଟିଏମ କାର୍ଡ ଜବତ ହୋଇଛି । ସରକାରୀ କର୍ମଚାରୀଙ୍କୁ ବ୍ଲାକମେଲ କରୁଥିଲେ ନକଲି ଆର୍ଟିଆଇ କର୍ମୀ । ଲୋକଙ୍କୁ ଡରାଇ ଧମକାଇ କୋଟି କୋଟି ଟଙ୍କା ରୋଜଗାର କରୁଥିଲେ । କୋରାପୁଟ ବସଷ୍ଟାଣ୍ଡରେ ନକଲି ଆଇକାର୍ଡ଼ ପକାଇ ବୁଲୁଥିଲେ କିଶୋର । ପୋଲିସର ସନ୍ଦେହ ହେବାରୁ ଅଭିଯୁକ୍ତକୁ ହେପାଜତକୁ ନିଆଯାଇଥିଲା । ତାଙ୍କଠାରୁ ଆଇ ଆଣ୍ଡ ପିଆରର ନକଲି ଆଇକାର୍ଡ଼ ପାଇଥିଲା ପୋଲିସ । କୋରାପୁଟ ଟାଉନ ଥାନା ପୋଲିସ ଚିଠି ଲେଖି STF କୁ ଏ ସମ୍ପର୍କରେ ଅବଗତ କରାଇଥିଲା । ଅଭିଯୁକ୍ତଙ୍କ ଆକାଉଣ୍ଟ ତଥ୍ୟ ପାଇଁ RBI କୁ ଚିଠି ଲେଖିଲା STF ।
ଚନ୍ଦ୍ରର ପ୍ରି-ଲ୍ୟାଣ୍ଡିଂ ଅରବିଟରେ ପ୍ରବେଶ କରିବାରେ ବିଫଳ ହୋଇଛି ଲୁନା-୨୫ ଲ୍ୟାଣ୍ଡର
ମସ୍କୋ: ଫେଲ ହୋଇପାରେ ଋଷର ମୁନ ମିଶନ । ଚନ୍ଦ୍ରର ପ୍ରି-ଲ୍ୟାଣ୍ଡିଂ ଅରବିଟରେ ପ୍ରବେଶ କରିବାରେ ବିଫଳ ହୋଇଛି ଲୁନା-୨୫ ଲ୍ୟାଣ୍ଡର । ଦୀର୍ଘ ୫୦ ବର୍ଷ ପରେ ଚନ୍ଦ୍ର ଅଭିଯାନ ଆରମ୍ଭ କରିଥିବା ଋଷ ଲାଗି ଏହା ଏକ ଧକ୍କା ସାବ୍ୟସ୍ତ ହୋଇଛି । ଋଷୀୟ ସ୍ପେସ କର୍ପୋରେସନ ରୋସକସମସ ପକ୍ଷରୁ କୁହାଯାଇଛି- ପରିସ୍ଥିତି ପ୍ରତି ସଜାଗ ନଜର ରଖାଯାଇଛି । ତେବେ ମିଶନ ସମ୍ପର୍କରେ ସବିଶେଷ ସ୍ପଷ୍ଟୀକରଣ ଦିଆଯାଇନାହିଁ ।
ଗତ ସପ୍ତାହରେ ପ୍ରେରଣ କରାଯାଇଥିବା ଲୁନା-୨୫ ଆସନ୍ତା କାଲି ଚନ୍ଦ୍ରର ସାଉଥ ପୋଲରେ ଅବତରଣ କରିବାର କାର୍ଯ୍ୟକ୍ରମ ଥିଲା । ପ୍ରିଲ୍ୟାଣ୍ଡିଂ ଅରବିଟରେ ପ୍ରବେଶ କରିବା ପୂର୍ବରୁ ଏକ ବୈଷୟିକ ତ୍ରୁଟି ଦେଖାଯାଇଥିବାରୁ ମିଶନ ପ୍ରତି ଧକ୍କା ପହଞ୍ଚିଛି । ଏହି ସମସ୍ୟା ପରେ ବୈଜ୍ଞାନିକମାନେ ସ୍ଥିତି ସମୀକ୍ଷା କରୁଛନ୍ତି । ଗତ ଅଗଷ୍ଟ ୧୧ ତାରିଖରେ ଲୁନା ୨୫ର ଉତକ୍ଷେପଣ କରାଯାଇଥିବାବେଳେ ୧୨ ଓ ୧୪ ତାରିଖରେ ସଫଳତାର ସହ କରିଥିଲା ଟ୍ରାଜେକ୍ଟୋରୀ କରେକସନ ।
ଘର ଭିତରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର, ଆତ୍ମହତ୍ୟା କରିଥିବା ସନ୍ଦେହ
ଭୁବନେଶ୍ୱର: ଭୁବନେଶ୍ବର ପ୍ରାଚୀବିହାର ଅଞ୍ଚଳରେ ଘର ଭିତରୁ ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର । ମୃତଦେହକୁ ଉଦ୍ଧାର କରିଛି ମଞ୍ଚେଶ୍ୱର ଥାନା ପୋଲିସ । ଘର ଭିତର ପଟୁ ଯୁବକ କବାଟ ବନ୍ଦ କରି ବେକରେ ଗାମୁଛା ବାନ୍ଧି ଫ୍ୟାନରେ ଝୁଲି ପଡ଼ିଥିବା ଦେଖିବାକୁ ମିଳିଥିଲା । ପୋଲିସ କବାଟ ଭାଙ୍ଗି ଭିତରୁ ମୃତଦେହ ଉଦ୍ଧାର କରିଛି । ମୃତ ଯୁବକଙ୍କ ନାଁ ଦୀପକ ଦାସ । ବୟସ ପ୍ରାୟ ୨୬ ବର୍ଷ ହେବ ବୋଲି ଜଣାପଡ଼ିଛି । ଘର କେନ୍ଦ୍ରାପଡ଼ା ଜିଲ୍ଲା ରାଜକନିକା ଅଞ୍ଚଳରେ ବୋଲି ସୂଚନା ମିଳିଛି । ଦୀପକ ଏସବିଆଇ ଫାଇନାନ୍ସରେ କାମ କରୁଥିଲେ ଓ ପ୍ରାଚୀବିହାର ଅଞ୍ଚଳରେ ଘର ଭଡ଼ା ନେଇ ରହୁଥିଲେ । ପ୍ରେମ ବ୍ୟାପାରକୁ ନେଇ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । ଦୀର୍ଘ ସମୟ ଧରି ରୁମ୍ କବାଟ ନଖୋଲିବାରୁ ପୋଲିସକୁ ସୂଚନା ଦିଆଯାଇଥିଲା । ପୋଲିସ ପହଞ୍ଚି କବାଟ ଭାଙ୍ଗି ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି ।
ପୁରୀ ପରେ ଝାରସୁଗୁଡ଼ା ଜିଲ୍ଲାରେ 5T ସଚିବଙ୍କ ମାରାଥନ ସମୀକ୍ଷା
ଝାରସୁଗୁଡ଼ା: ପୁରୀ ପରେ ଝାରସୁଗୁଡ଼ାରେ ବିକାଶ ସମୀକ୍ଷା । ବ୍ରଜରାଜନଗରରେ 5T ସଚିବଙ୍କ ମାରାଥନ ସମୀକ୍ଷା । ମାଆ ରାମଚଣ୍ଡୀ ମନ୍ଦିରରେ ପୂଜାର୍ଚ୍ଚନା ସହ ମାଆଙ୍କ ଦର୍ଶନ କରିଛନ୍ତି 5-ଟି ସଚିବ ଭି କେ ପାଣ୍ଡିଆନ । ମନ୍ଦିର ଉନ୍ନତିକରଣ ଓ ଆବଶ୍ୟକତା ନେଇ ମନ୍ଦିର ପୂଜକ, କର୍ମକର୍ତ୍ତାଙ୍କ ସହ ସଚିବ ଆଲୋଚନା କରିଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ 5ଟି ସଚିବ ଝାରସୁଗୁଡ଼ା ଗସ୍ତ କରିଥିବା ବେଳେ ସ୍ଥାନୀୟ ଲୋକେ ତାଙ୍କୁ ସ୍ବାଗତ କରିଛନ୍ତି ।
ମାଆ କୋଳରେ ଶୋଇଥିବା ବେଳେ ସାପ କାମୁଡ଼ାରେ ଶିଶୁକନ୍ୟା ମୃତ
ଯାଜପୁର: ମାଆ କୋଳରେ ଛୁଆକୁ କାମୁଡ଼ିଲା ସାପ । ରାତିରେ ମାଆ କୋଳରେ ଶୋଇଥିବା ବେଳେ ୭ ମାସର ଶିଶୁକନ୍ୟାର ଓଠକୁ ଏକ ବିଷାକ୍ତ ସାପ କାମୁଡ଼ି ଦେବାରୁ ଶିଶୁଟିର ମୃତ୍ୟୁ ଘଟିଛି । ଯାଜପୁର ଜିଲ୍ଲା ଟମକା ଥାନା ଗୋପପୁର ଗାଁର ରଘୁନାଥ ଲୋହାରଙ୍କ ପତ୍ନୀ ଓ ୭ ମାସର ଝିଅ ଶୋଇଥିବା ବେଳେ ବିଳମ୍ବିତ ରାତିରେ ଝିଅର ଓଠକୁ ଏକ ବିଷାକ୍ତ ସାପ କାମୁଡ଼ି ଦେଇଥିଲା । ଝିଅଟି ଜୋରରେ କାନ୍ଦିବାରୁ ମାଆ ଉଠି ଦେଖିବା ବେଳକୁ ସାପଟି ଝିଅ ଓଠକୁ କାମୁଡି ଧରିଥିଲା । ମାଆ ଉଠି ପଡ଼ିବାରୁ ସାପଟି ପଳାଇ ଯାଇଥିଲା । ତୁରନ୍ତ କୁନିଝିଅଟିକୁ ପରିବାର ଲୋକ ଆନନ୍ଦପୁର ମେଡିକାଲ ନେଇଥିଲେ । ଶିଶୁଟିକୁ ଡାକ୍ତର ମୃତ ଘୋଷଣା କରିଛନ୍ତି ।
ଜଙ୍ଗଲକୁ କାଠ ଆଣିବାକୁ ଯାଇଥିବା ବେଳେ ବୃଦ୍ଧାଙ୍କୁ ଦଳି ମାରିଲା ଦନ୍ତା
ବଲାଙ୍ଗୀର: ବୃଦ୍ଧାଙ୍କୁ ଦଳିଦେଲା ଦନ୍ତା । ଜଙ୍ଗଲକୁ ଜାଲେଣି କାଠ ଆଣିବାକୁ ଯାଇଥିବା ବେଳେ ହାତୀ ଆକ୍ରମଣରେ ବୃଦ୍ଧାଙ୍କ ମୃତ୍ୟୁ ହୋଇଛି । ଘଟଣା ଘଟିଛି ବଲାଙ୍ଗିର ଜିଲ୍ଲା ସଦର ରେଞ୍ଜ ଅଧୀନ ଝାଙ୍କରକୋଟ ଜଙ୍ଗଲରେ । ମୃତକ ହେଲେ ଆଟଗାଁର ୬୫ ବର୍ଷୀୟା ମୁଗ ନନ୍ଦ । ଗତକାଲିଠୁ ଜଙ୍ଗଲକୁ ଯାଇ ଆଉ ଫେରି ନଥିବା ବେଳେ ଆଜି ସକାଳୁ ଘଞ୍ଚ ଜଙ୍ଗଲରୁ ତାଙ୍କ ମୃତଦେହ ଉଦ୍ଧାର କରାଯାଇଛି ।
ସୁଧୁରୁନି ହିମାଚଳ ପ୍ରଦେଶ ସ୍ଥିତି, ଉଦ୍ଧାର କାର୍ଯ୍ୟ ଜାରି ଭିତରେ ପ୍ରବଳ ବର୍ଷା ନେଇ ଆକଳନ
ସିମଲା: ସୁଧୁରୁନି ହିମାଚଳ ପ୍ରଦେଶ ସ୍ଥିତି । ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ପ୍ରବଳ ବର୍ଷା ନେଇ ପାଣିପାଗ ବିଭାଗର ଆକଳନ ଅଧିକ ଚିନ୍ତା ସୃଷ୍ଟି କରିଛି । ସମର ହିଲ୍ସ ଅଞ୍ଚଳରେ ପୁନର୍ବାର ଭୂସ୍ଖଳନ ହେବା ଯୋଗୁ ସେଠାରେ ଉଦ୍ଧାର କାର୍ଯ୍ୟ ଜାରି ରହିଛି । ଆଜି ଓ କାଲି ସାରା ରାଜ୍ୟରେ ବର୍ଷା ହେବ ବୋଲି ଆଶଙ୍କା କରାଯାଇଛି । ଏହା ସହ ୨୨ ଓ ୨୩ ତାରିଖରେ ବି ପ୍ରବଳ ବର୍ଷା ଆଶଙ୍କା ରହିଛି ବୋଲି ସୂଚନା ପରେ ବଢିଛି ଚିନ୍ତା । ଲ୍ୟାଣ୍ଡ ସ୍ଲାଇଡ, ଫ୍ଲାସ ଫ୍ଲଡ, ବିଭିନ୍ନ ନଦୀରେ ଜଳପତ୍ତନ ବୃଦ୍ଧି ଯୋଗୁ ଏବେ ବି ସାରା ରାଜ୍ୟରେ ହାହାକାର ଅବସ୍ଥା ଜାରି ରହିଛି । ରାଜ୍ୟର ବିପତ୍ତିକୁ ଜାତୀୟ ବିପର୍ଯ୍ୟୟ ଘୋଷଣା ଲାଗି ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ଦାବି କରିଥିବା ସତ୍ତ୍ବେ କେନ୍ଦ୍ର ପକ୍ଷରୁ କୌଣସି ପଦକ୍ଷେପ ନିଆଯାଇନାହିଁ । ରାଜ୍ୟରେ ବର୍ଷାଜନିତ କ୍ଷତି ୧୦ ହଜାର କୋଟି ଟଙ୍କାରୁ ଅଧିକ ହେବ ବୋଲି କହିଥିଲେ ସୁଖୁ ।