ଡାଆଣୀ ସନ୍ଦେହରେ ମାଆକୁ ମାରିଲା ପୁଅ। ମୟୂରଭଞ୍ଜ ଜିଲ୍ଲା ବେତନଟୀ ଥାନା ଅନ୍ତର୍ଗତ କଲରାଫୁଲିଆ ଗାଁରେ ହତ୍ୟାକାଣ୍ଡ। ମୃତକ ହେଲେ ରାଇମଣି ସିଂ। ଖବରପାଇ ଘଟଣାସ୍ଥଳରେ ପୋଲିସ ପହଞ୍ଚି ଅଭିଯୁକ୍ତ ପୁଅ ତପନ ସିଂଙ୍କୁ ଅଟକ ରଖି ତଦନ୍ତ ଜାରି ରଖିଛି। । ଗତ କିଛି ମାସ ପୂର୍ବରୁ ତପନ ର ସ୍ତ୍ରୀ ଘର ଛାଡ଼ି ପଳାଇ ଯାଇଥିଲା। ପୁଣି କିଛି ଦିନ ପୂର୍ବରୁ ତପନ ର ପୁଅ ରୋଗରେ ଆକ୍ରାନ୍ତ ହୋଇ ମୃତ୍ୟୁ ବରଣ କରିଥିବା ଯୋଗୁଁ ତପନ ମାନସିକ ଚାପ ରେ ରହୁଥିବା ବେଳେ ଏ ପ୍ରକାର ଅଘଟଣ ପାଇଁ ସେ ତାର ମାଆ କୁ ସନ୍ଦେହ କରି ହତ୍ୟା କରିଥାଇପାରେ ବୋଲି ପୋଲିସ ସନ୍ଦେହ କରୁଛି। ତେବେ ପ୍ରାଥମିକ ତଦନ୍ତ ପରେ ଘଟଣାର ସତ୍ୟାସତ୍ୟ ସ୍ପଷ୍ଟ ହୋଇଯିବ ବୋଲି ବେତନଟୀ ଏସଡିପିଓ ମିନତୀ ବିଶ୍ୱାଳ କହିଛନ୍ତି।
ୟୁଜିସି ବିଜ୍ଞପ୍ତି ଉପରେ ରୋକ୍ ଲଗାଇଲେ ସୁପ୍ରିମକୋର୍ଟ
ଉଚ୍ଚଶିକ୍ଷା ପ୍ରତିଷ୍ଠାନ ନିୟାମକରେ ସମାନତା ନେଇ ୟୁଜିସି ବିଜ୍ଞପ୍ତି ଉପରେ ରୋକ। ୟୁଜିସି ବିଜ୍ଞପ୍ତି ଉପରେ ରୋକ ଲଗାଇଲେ ସୁପ୍ରିମକୋର୍ଟ। ଏହା ସହ କେନ୍ଦ୍ର ସରକାରଙ୍କୁ ସୁପ୍ରିମକୋର୍ଟ ଦେଇଛନ୍ତି ନୋଟିସ। ୨୦୧୨ ନିୟମକୁ କାଏମ ରଖିବାରୁ କୋର୍ଟ ଦେଇଛନ୍ତି ନିର୍ଦ୍ଦେଶ। ୟୁଜିସି ନୂଆ ନିୟମର ବୈଧତା ଯାଞ୍ଚ କରିବାକୁ ବି କୋର୍ଟ ଦେଇଛନ୍ତି ନିର୍ଦ୍ଦେଶ। କ୍ୟାମ୍ପସରେ ଜାତିଭିତ୍ତିକ ପାତର ଅନ୍ତର ନୀତିକୁ ଦୂରେଇବା ଲାଗି ଏହି ନିୟାମକ ଆସିଥିବାବେଳେ ଏହାକୁ ବିଭିନ୍ନ ମହଲରୁ କରାଯାଇଥିଲା ବିରୋଧ।
ତେବେ ଦେଶରେ ଏହି ପାତରଅନ୍ତର ନୀତି ବିରୋଧରେ କଣ ଆଇନ, କୋର୍ଟ ନିର୍ଦ୍ଦେଶ, ପ୍ରତିଷ୍ଠାନଗତ ନିୟମ ନାହିଁ କି ବୋଲି ବିଭିନ୍ନ ମହଲ ଉଠାଇଥିଲେ ପ୍ରଶ୍ନ। ଜାତିଭିତ୍ତିକ ପାତର ଅନ୍ତର ବିରୋଧରେ ଦେଶରେ ଅନେକ ପ୍ରକାର ଆଇନଗତ ଫ୍ରେମୱର୍କ ରହିଛି। ସମ୍ବିଧାନର ଧାରା ୧୪, ୧୫ ଓ ୧୭ରେ ବି ଆଇନ ଆଗରେ ସମସ୍ତେ ସମାନ ବୋଲି ଗ୍ୟାରେଣ୍ଟି ରହିଛି। ସମସ୍ତ ପ୍ରତିଷ୍ଠାନ ଓ ବିଶ୍ବବିଦ୍ୟାଳୟ ଲାଗି ବି ଏହା ପ୍ରଯୁଜ୍ୟ ରହିଛି। ଏହା ବାଦ ଏସସି/ଏସଟି ନିର୍ଯାତନା ନିରାକରଣ ଆଇନ ବି ରହିଛି। ପାତର ଅନ୍ତର ବିରୋଧରେ ବି ସୁପ୍ରିମକୋର୍ଟ ବାରମ୍ବାର ଗୁରୁତ୍ବ ପ୍ରଦାନ କରିଛନ୍ତି। ଏପରିକି ଅନେକ କେନ୍ଦ୍ରୀୟ ବିଶ୍ବବିଦ୍ୟାଳୟରେ ସମାନ ସୁଯୋଗ ପ୍ରଦାନ ନିମନ୍ତେ ସେଲ୍ ରହିଛି।
ସେପଟେ ନୂଆ ୟୁଜିସି ନିର୍ଦ୍ଦେଶନାମା ପ୍ରତିଷ୍ଠାନଗୁଡିକୁ ସ୍ବୀକୃତି ଓ ପାଣ୍ଠି ପ୍ରଦାନ କ୍ଷେତ୍ରରେ ପ୍ରତିବନ୍ଧକ ସୃଷ୍ଟି କରିବ ବୋଲି ବିରୋଧୀ ଯୁକ୍ତି କରୁଛନ୍ତି। ନୂଆ ୟୁଜିସି ନୀତି ଦେଶର ସମସ୍ତ କେନ୍ଦ୍ରୀୟ, ରାଜ୍ୟ, ଘରୋଇ ଓ ଡିମଡ ବିଶ୍ବବିଦ୍ୟାଳୟ ପାଇଁ ଲାଗୁ ହେବ। ୟୁଜିସିର ଏହି ନୂଆ ନୀତିକୁ ସାରା ଦେଶରେ ବିରୋଧ କରାଯାଇଛି। ବିରୋଧୀଙ୍କ ଯୁକ୍ତି ହେଉଛି- ଏହି ନୀତି ଯୋଗୁ ଏସସି, ଏସଟି, ଓବିସି ବର୍ଗଙ୍କୁ ସୁରକ୍ଷା ଦେବାକୁ ଉଦ୍ଦିଷ୍ଟ। ଏଥିରୁ ସାଧାରଣ ଓ ଉଚ୍ଚଜାତି ବର୍ଗ ତଥା ପଛୁଆ ବର୍ଗର ଛାତ୍ରଛାତ୍ରୀଙ୍କୁ ବାଦ୍ ଦିଆଯିବ। ମିଥ୍ୟା ଅଭିଯୋଗ ଦାଖଲ କ୍ଷେତ୍ରରେ ଜରିମାନା ବ୍ୟବସ୍ଥା ନଥିବାରୁ ଏହାର ଅପବ୍ୟବହାର ହେବା ଆଶଙ୍କା ରହିଛି। ବିଭିନ୍ନ ନିର୍ଦ୍ଦିଷ୍ଟ ଗୋଷ୍ଠୀ ବିରୋଧରେ ଏହା ଉଦ୍ଦିଷ୍ଟ ବୋଲି ବିରୋଧୀ ଯୁକ୍ତି କରୁଛନ୍ତି। ସେହିପରି ଇକ୍ୟୁଟି କମିଟି, ଇକ୍ବାଲ ଅପୁର୍ଚିନିଟ ସେଣ୍ଟର ଓ ଇକ୍ୟୁଟି ଆମ୍ବାସାଡର ସୃଷ୍ଟି ବ୍ୟବସ୍ଥା ବି ପ୍ରତିଷ୍ଠାନରେ ଅଶାନ୍ତି ସୃଷ୍ଟି କରିବ।
ମଣ୍ଡିରୁ ଧାନ ଉଠୁନଥିବାରୁ ମିଲରଙ୍କ ଉପରେ ବର୍ଷିଲେ ବିଧାୟକ
ମଣ୍ଡିରୁ ଧାନ ଉଠୁନଥିବାରୁ ମିଲରଙ୍କ ଉପରେ ବର୍ଷିଲେ ବିଧାୟକ। ବଡ଼ଚଣା ବ୍ଲକର ଭରତପୁର କୃଷି ସମବାୟ ସମିତିରୁ ଏଭଳି ଘଟଣା ଦେଖିବାକୁ ମିଳୁଛି। ମିଲର ଆଉ ସମବାୟ ସମିତି ଅଧିକାରୀଙ୍କ ମଧ୍ୟରେ ତାଳମେଳ ଅଭାବରୁ ସମସ୍ୟା ଭୋଗୁଛନ୍ତି ଚାଷୀ ମାନେ। ବିଭିନ୍ନ ଆଳ ଦେଖାଇ ଚାଷୀଙ୍କ ଧାନ ମିଲର ନେଉ ନଥିବାରୁ ମଣ୍ଡିରୁ ଧାନ ଉଠି ପାରୁନି। ଜରି ଅଖାରେ ଚାଷୀ ଧାନ ଆଣିଥିବାରୁ ମିଲର ଚାଷୀଙ୍କ ଧାନ ନେଉ ନାହାନ୍ତି। ଯାହାକୁ ନେଇ ସମବାୟ ସମିତିର ଅଧିକାରୀ ଓ ଚାଷୀ ମାନେ ବଡ଼ଚଣା ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ଏ ନେଇ ମିଲରଙ୍କ ସହ ବିଧାୟକ କଥା ହେବା ସହ ତାଗିଦ୍ ମଧ୍ୟ କରିଛନ୍ତି। ଯଥା ଶୀଘ୍ର ଚାଷୀଙ୍କ ଧାନ ମଣ୍ଡିରୁ ଉଠାଇବା ପାଇଁ କହିଛନ୍ତି। ଯେଉଁ ମାନେ ନିୟମ ଖିଲାପ କରିବେ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆ ଯିବ ବୋଲି ବଡ଼ଚଣା ବିଧାୟକ ଅମର କୁମାର ନାୟକ କହିଛନ୍ତି।
ବଜେଟ ପୂର୍ବରୁ ଭାରତୀୟ ମୁଦ୍ରାକୁ ଝଟକା: ଟଙ୍କାର ହୋଇଛି ସର୍ବକାଳୀନ ମୂଲ୍ୟହ୍ରାସ
ବଜେଟ ପୂର୍ବରୁ ଭାରତୀୟ ମୁଦ୍ରାକୁ ଝଟକା। ଟଙ୍କାର ହୋଇଛି ସର୍ବକାଳୀନ ମୂଲ୍ୟହ୍ରାସ। ଆମେରିକୀୟ ଡଲାର ତୁଳନାରେ ଭାରତୀୟ ମୁଦ୍ରାର ମୂଲ୍ୟ ହ୍ରାସ। ଦୁର୍ବଳ ବିଦେଶୀ ପୁଞ୍ଜି ପ୍ରବାହ କାରଣରୁ ଭାରତୀୟ ମୁଦ୍ରାରେ ଘାଟା ସୃଷ୍ଟି ହୋଇଛି। ଆଜି ଡଲାର ତୁଳନାରେ ଭାରତୀୟ ଟଙ୍କାର ମୂଲ୍ୟ ହୋଇଛି ୯୨ ଟଙ୍କା। କେବଳ ଚଳିତ ବର୍ଷ ଭାରତୀୟ ଟଙ୍କାର ମୂଲ୍ୟ ୨ ପ୍ରତିଶତ ହ୍ରାସ ପାଇଥିବାବେଳେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଦ୍ବିତୀୟ ପାଳି ଶାସନ ଆରମ୍ଭରୁ ହ୍ରାସ ପାଇଲାଣି ୫ ପ୍ରତିଶତ। ସେପଟେ ଏନେଇ ଭାରତୀୟ ରିଜର୍ଭ ବ୍ୟାଙ୍କ ହସ୍ତକ୍ଷେପ କରିବା ସମ୍ଭାବନା ରହିଛି। ଆମେରିକାର ଉଚ୍ଚ ଟାରିଫ, ବିଦେଶୀ ନିବେଶକଙ୍କ ପୁଞ୍ଜି ପ୍ରତ୍ୟାହାର, ଉଚ୍ଚ ମୂଲ୍ୟରେ ସୁନା ଓ ରୁପା ଆମଦାନି, ଆଗକୁ ଭାରତୀୟ ମୁଦ୍ରା ଦୁର୍ବଳ ହେବା ଆଶଙ୍କା ଥିବାରୁ ଏହି ଅବସ୍ଥା ସୃଷ୍ଟି ହୋଇଛି।
ବନ୍ଦ ଘରେ ଯୁବତୀଙ୍କୁ ଅସଦାଚରଣ: ତାନ୍ତ୍ରିକ ଗିରଫ
ବନ୍ଦ ଘରେ ଯୁବତୀଙ୍କୁ ଅସଦାଚରଣ । ତାନ୍ତ୍ରିକ ଗିରଫ । ତନ୍ତ୍ର ପୂଜା କରି ଘର ଭିତରେ ରିଷ୍ଟ ଖଣ୍ଡନ ଆଳରେ ତାନ୍ତ୍ରିକ ଜଣେ ଯୁବତୀଙ୍କୁ ଘର ଭିତରେ ଅସଦାଚରଣ କରିଥିବା ଅଭିଯୋଗ ହୋଇଛି । ଏହି ମାମଲାରେ ପୁରୀଘାଟ ଥାନା ପୁଲିସ ଜଗତସିଂହପୁର ଜିଲ୍ଲା ବିରିଡ଼ି ଅଞ୍ଚଳର ଜଗନ୍ନାଥ ନାୟକକୁ ଗିରଫ କରିଛି । କଟକ ସାଆନ୍ତ ସାହିର ଜଣେ ଯୁବତୀଙ୍କ ଘରେ ଆର୍ଥିକ ସମସ୍ୟା, ପାରିବାରିକ ବିବାଦ ଲାଗି ରହିଥିଲା । ଜଣେ ସମ୍ପର୍କୀୟଙ୍କ ପରାମର୍ଶ ଅନୁଯାୟୀ ଯୁବତୀ ଜଣକ ତାନ୍ତ୍ରିକ ଜଗନ୍ନାଥକୁ ଯୋଗାଯୋଗ କରିଥିଲେ । ଏହାପରେ ତାନ୍ତ୍ରିକ ଜଗନ୍ନାଥ ଯୁବତୀଙ୍କ ଘର ଭିତରେ ତନ୍ତ୍ର ପୂଜା କରି ରିଷ୍ଟ ଖଣ୍ଡନ କରିବାକୁ ପାଖାପାଖି ୭୦ ହଜାର ଟଙ୍କା ଖର୍ଚ୍ଚ ହେବ ବୋଲି କହିଥିଲା । ଏଥିପାଇଁ ଜଗନ୍ନାଥ ପ୍ରଥମେ ୨୫ ହଜାର ଟଙ୍କା ନେଇଥିଲା । ଗତ ମଙ୍ଗଳବାର ସନ୍ଧ୍ୟାରେ ସେ ଯୁବତୀଙ୍କ ଘରେ ଆସି ପୂଜା କରିଥିଲା । ଠିକ୍ ଏହି ସମୟରେ ଯୁବତୀଙ୍କୁ ସେ ଘର ଭିତରେ ଅସଦାଚରଣ କରିଥିଲା । ଯୁବତୀ ଜଣକ ଚିତ୍କାର କରିବାରୁ ତାନ୍ତ୍ରିକ ଫେରାର ହୋଇଯାଇଥିଲା । ଏସଂକ୍ରାନ୍ତରେ ଯୁବତୀ ଜଣକ ପୁରୀଘାଟ ଥାନାରେ ଅଭିଯୋଗ କରିବା ପରେ ପୋଲିସ ଅଭିଯୁକ୍ତ ଜଗନ୍ନାଥକୁ ଗିରଫ କରିଛି ।
ବିକାଶ ପଥରେ ଯାତ୍ରା କରୁଛି ଦେଶ, ଭାରତ-ଇୟୁ ଚୁକ୍ତି ଯୋଗୁ ଭାରତର ଅର୍ଥନୈତିକ ବିକାଶ ଘଟିବ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
ବିକାଶ ପଥରେ ଯାତ୍ରା କରୁଛି ଭାରତ। ଭାରତ-ଇୟୁ ଚୁକ୍ତି ଯୋଗୁ ଭାରତର ଅର୍ଥନୈତିକ ବିକାଶ ଘଟିବ। ଇୟୁ ସହ ଐତିହାସିକ ଚୁକ୍ତି ଭାରତର ଆତ୍ମନିର୍ଭରତାର ପ୍ରତୀକ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ବଜେଟ ପୂର୍ବରୁ ସଂସଦ ଭବନ ବାହାରେ ଉଦବୋଧନ ଦେଇ ସେ କହିଛନ୍ତି- ଭାରତରେ ବଡ଼ ବଜାର ସ଼ଷ୍ଟି ହେବ। ପ୍ରଯୁକ୍ତି କ୍ଷେତ୍ରରେ ଭାରତ ବଳୀୟାନ ହେବାରେ ଲାଗିଛି। ମାନବକୈନ୍ଦ୍ରିକ ବ୍ୟବସ୍ଥା ଯୋଗୁ ଦେଶବାସୀ ଉପକୃତ ହେଉଛନ୍ତି। ଭାରତର ଗଣତନ୍ତ୍ର ବିଶ୍ବ ଲାଗି ଉଦାହରଣ ସୃଷ୍ଟି କରିଛି। ଭାରତ-ଇୟୁ ମଧ୍ୟରେ ମଦର ଅଫ ଡିଲସ୍ ହୋଇଛି ବୋଲି ସେ କହିଛନ୍ତି।
କିଛି ଦିନ ସ୍ଥିର ରହିବା ପରେ ପୁଣି ବଢ଼ିଛି ସୁନା ଦର
କିଛି ଦିନ ସ୍ଥିର ରହିବା ପରେ ପୁଣି ବଢ଼ିଛି ସୁନା ଦର । ଏଥରକ ସବୁ ରେକର୍ଡ଼ ଭାଙ୍ଗିଛି ଦର । ଗୋଟିଏ ଦିନରେ ୧୧ ହଜାର ଟଙ୍କା ବଢିଲା ସୁନା ଦର। ୨୪ କାରେଟ ସୁନା ଦର ହେଲା ୧ ଲକ୍ଷ ୭୮ ହଜାର ୯୫୦ ଟଙ୍କା।ସେହିପରି ୨୨ କ୍ୟାରେଟ ସୁନା ୧୦ ଗ୍ରାମ ପିଛା ବଢ଼ି ହୋଇଛି ୧ ଲକ୍ଷ ୬୩ ହଜାର ୯୫୦ ଟଙ୍କା। ସେହିପରି ରୁପା କେଜି ପ୍ରତି ଦର ୪ ଲକ୍ଷ ୨୫ ହଜାର ଟଙ୍କାକୁ ବୃଦ୍ଧି ହୋଇଛି। ବର୍ଦ୍ଧିତ ଦର ସହିତ ଗଢ଼ା ମୂଲ୍ୟ ଏବଂ ଜିଏସ୍ଟିକୁ ମିଶାଇଲେ ଗହଣା ପାଇଁ ଗ୍ରାହକଙ୍କୁ ସୁନା କିଣିବା ବହୁ ମହଙ୍ଗା ହୋଇଯାଇଛି ।
ବରଗଡ଼ ଧନୁଯାତ୍ରାର କଳାକାରଙ୍କ ପରଲୋକ
ବରଗଡ଼ ଧନୁଯାତ୍ରାର ଅମ୍ବାପାଲି ଅର୍ଥାତ ଗୋପପୁର ଗାଁର ନନ୍ଦ ରାଜା ଭୂମିକାରେ ଅଭିନୟ କରିଆସୁଥିବା,ସତ୍ୟ ନାରାୟଣ ପୋଡଙ୍କ ପରଲୋକ । ଆଜି ସକାଳୁ ତାଙ୍କର ଦେହାନ୍ତ ହୋଇଛି। ଦୀର୍ଘ ବର୍ଷ ଧରି ସେ ଧନୁଯାତ୍ରାର ନନ୍ଦ ରାଜା ଭୂମିକାରେ ଅଭିନୟ କରିଆସୁଥିଲେ
କେବେ ହେବ ଭାରତ-ଆମେରିକା ଡିଲ୍ ? Economic Surveyକୁ ନେଇ ଆସିଲା ବଡ଼ ସୂଚନା
ଟଙ୍କା କ୍ରମାଗତ ଭାବେ ଦୁର୍ବଳ ହେବାରେ ଲାଗିଛି । ଆର୍ଥିକ ସର୍ଭେ ଅନୁସାରେ, ଆମେରିକା ଟାରିଫରେ ଦୁର୍ବଳ ହୋଇପଡ଼ିଥିବା ଟଙ୍କା ଅର୍ଥନୀତି ପାଇଁ ବହୁତ କ୍ଷତି ନୁହେଁ । ରପ୍ତାନୀ ବୃଦ୍ଧି ପାଇଁ ସରକାର ଫୋକସ କରୁଛନ୍ତି । ଆମେରିକା ସହ ଟ୍ରେଡ ଡିଲରେ ଆର୍ଥିକ ସର୍ଭେକୁ ନେଇ ଚିନ୍ତାପ୍ରକଟ କରାଯାଇଛି । ଦୁଇ ଦେଶ ମଧ୍ୟରେ କ୍ରମାଗତ ଆଲୋଚନା ଚାଲିଛି, ମାତ୍ର ଆର୍ଥିକ ସର୍ଭେରେ ଏହି ଡିଲ ଉପରେ ୨୦୨୬ରେ ମୋହର ଲାଗିବାର ଅନୁମାନ କରାଯାଇଛି ।
ସବୁଠାରୁ ଖୁସି ଖବର ଅର୍ଥ ବ୍ୟବସ୍ଥାକୁ ନେଇ ଆସିଛି । ଆର୍ଥିକ ସର୍ଭେରେ କୁହାଯାଇଛି ଯେ, ଚଳିତ ଆର୍ଥିକ ବର୍ଷର ତିନି ମାସରେ ଆମେରିକା ଟାରିଫର ପ୍ରଭାବ ରପ୍ତାନୀ ଓ ଉତ୍ପାଦନ ଉପରେ ପଡ଼ିବା ପରେର ବି ଅଭିବୃଦ୍ଧି ଜାରି ରହିଛି । କାରଣ ସରକାରଙ୍କ ତରଫରୁ କ୍ରମାଗତ ଭାବେ ଟାରିଫର ପ୍ରଭାବକୁ କମ୍ କରିବାକୁ ପଦକ୍ଷେପ ଗ୍ରହଣ କରାଯାଇଛି । ଅର୍ଥାତ ଆମେରିକା ଟାରିଫ, ବିଶ୍ବର ଚାହିଦା ଦୁର୍ବଳ ଓ ଭୂ-ରାଜନୈତିକ ଚାପ ମଧ୍ୟରେ ଭାରତର ଆର୍ଥିକ ଗତି ଉପରେ ସାମାନ୍ୟ ପ୍ରଭାବ ପଡ଼ିଛି ।
ବିଶ୍ବ ସ୍ତରରେ ଡାଉନସାଇଡ ରିସ୍କ ରହିଥିବା ବେଳେ ଭାରତ ପାଇଁ ତତ୍କାଳ ମାଇକ୍ରୋ-ଇକୋନୋମିକ ସଙ୍କଟ ସୃଷ୍ଟି କରିନାହିଁ । ମଜବୁତ ବିଦେଶୀ ମୁଦ୍ରା ଭଣ୍ଡାର, ସ୍ଥିର ବ୍ୟାଙ୍କିଂ ସିଷ୍ଟମ ଓ ନୀତି ବିଶ୍ବସନୀୟତା ଭାରତ ପାଇଁ ସୁରକ୍ଷା କବଚ ହୋଇଛି । ମୁଦ୍ରାର ସ୍ଥିରତା ପାଇଁ ମାନୁଫାକଚରିଂ ଏକ୍ସପର୍ଟ ବଢ଼ାଇବା ଜରୁରୀ । ବିଶେଷ କରି ଭାଲ୍ୟୁ-ଏଡେଡ ଓ ଟେକ୍ନୋଲୋଜି ଆଧାରିତ ଆମଦାନୀ ଉପରେ ଜୋର ଦେବାକୁ ସୁପାରିଶ କରାଯାଇଛି । ଆଗାମୀ ଦିନରେ ସରକାର ନୂଆ ଟେକ୍ନାଲୋଜି ଉପରେ ପୂରା ଫୋକସ କରିବେ । ଏହାସହ ସୁନା-ରୁପାର ବର୍ଦ୍ଧିତ ମୂଲ୍ୟ ଉପରେ ମଧ୍ୟ ସରକାରଙ୍କ ନଜର ରହିଛି ।
୧୪ କୋଟିରୁ ଅଧିକ ଲୋକଙ୍କ ପାସଓ୍ବାର୍ଡ ଲିକ: ଆପଣଙ୍କ Gmail ବିପଦରେ ନାହିଁ ତ ?
ଡାଟା ଲିକକୁ ନେଇ ବର୍ତ୍ତମାନ ସମୟରେ ଅନେକ ଖବର ସାମ୍ନାକୁ ଆସୁଛି । ଏପରି ସ୍ଥିତିରେ ୟୁଜର୍ସଙ୍କୁ ନିଜର ଡାଟା ଲିକ ଚିନ୍ତା ଘାରିଛି । ତେବେ ନିଜର ଡାଟା ଲିକ ହୋଇଛି କି ନା, ତାହା କିପରି ଜାଣିବେ ? କିଛି ଦିନ ତଳେ ଟେକ ଦୁନିଆରେ ଘୂରି ବୁଲୁଥିବା ଖବର ମୁତାବକ, ପାଖାପାଖି ୧୪୯ ମିଲିୟନ ଇମେଲ ଓ ପାସଓ୍ବାର୍ଡସ ଇଣ୍ଟରନେଟଟରେ ଖୋଲାଖୋଲି ଭାବେ ଦେଖିବାକୁ ମିଳୁଛି । ପ୍ରଥମେ ତା ଏହା କୌଣସି ବଡ଼ ହ୍ୟାକ ପରି ଲାଗୁଥିଲା, ମାତ୍ର ଅସଲ କାହାଣୀ ସାମାନ୍ୟ ଅଲଗା । ରିପୋର୍ଟସ ମୁତାବକ, ଡାଟା କୌଣସି ଏକ କମ୍ପାନୀର ସଭର୍ରକୁ ଭାଙ୍ଗି ଚୋରି କରାଯାଇଛି । ବର୍ଷ ବର୍ଷ ଧରି ଅଲଗା ଓ୍ବେବସାଇଟ ଓ ଆପ୍ସରୁ ପୂର୍ବରୁ ଚୋରି ହୋଇଥିବା ଡାଟା ଲିକ୍ସକୁ ଯୋଡ଼ି ଏକ ବଡ଼ ଡାଟାବେସ ପ୍ରସ୍ତୁତ କରାଯାଇଛି । ସହଜ ଭାଷାରେ କହିବାକୁ ଗଲେ, ପୁରୁଣା ଚୋରିକୁ ଯୋଡ଼ି ଏକ ନୂଆ ଲିଷ୍ଟ ପ୍ରସ୍ତୁତ କରାଯାଇଛି ।
ଏହି କାରଣରୁ Gmail, Facebook, Instagram, Netflix, Paypal ପରି ପପୁଲାର ପ୍ଲାଟଫର୍ମର ୟୁଜର୍ସ ସେମାନଙ୍କ ଡାଟା ଚୋରିକୁ ନେଇ ଚିନ୍ତାରେ ରହିଛନ୍ତି ।
ପ୍ରକୃତ ବିପଦ କ’ଣ ?
ଯଦି ଆପଣଙ୍କ ଇମେଲ ଓ ପାସଓ୍ବାର୍ଡ କୌଣସି ପୁରୁଣା ଡାଟା ଲିକରେ ପୂର୍ବରୁ ଲିକ ହୋଇସାରିଥିବ ଓ ଆପଣ ସେହି ପାସଓ୍ବାର୍ଡ ଅନେକ ଜାଗାରେ ବ୍ୟବହାର କରିଥିବେ, ତେବେ ହ୍ୟାକର୍ସ ତାହାକୁ ଅନ୍ୟ ଆକାଉଣ୍ଟସରେ ମଧ୍ୟ ଟ୍ରାଏ କରି ପାରନ୍ତି । ଏହାକୁ କ୍ରେଡେନ୍ସିଆଲ ଶିଫ୍ଟିଂ ଆଟାକ କୁହାଯାଇଥାଏ । ଅର୍ଥାତ ସମସ୍ୟା କେବଳ ଏକ ଓ୍ବେବସାଇଟ ନୁହେଁ, ବରଂ ଆପଣଙ୍କ ପାସଓ୍ବାର୍ଡ ହ୍ୟାବିଟର ଅଟେ ।
ଡାଟା ଲିକ ହୋଇଥିଲେ ଜାଣିବେ କିପରି ?
Have I Been Pwned ଓ୍ବେବସାଇଟ ଗ୍ଲୋବାଲ ସାଇବର ସିକ୍ୟୁରିଟି ଏକ୍ସପର୍ଟ Troy Hunt ପ୍ରସ୍ତୁତ କରିଛନ୍ତି । ଦୁନିଆର ବହୁ ବଡ଼ ବଡ଼ କମ୍ପାନୀ ମଧ୍ୟ ଏହା ଉପରେ ଭରସା କରୁଛନ୍ତି । ଏହା ପୂର୍ବରୁ ମଧ୍ୟ ଅନେକ ଥର ଡାଟା ଲିକ ସମୟରେ ଏହି ଓ୍ବେବସାଇଟ ବହୁତ ପପୁଲାର ହୋଇଛି । ଏହି ସାଇଟରେ ଆପଣଙ୍କ ନିଜର ଇମେଲ ଦେବାକୁ ପଡ଼ିଥାଏ । ଯଦି ଆପଣଙ୍କ ଇମେଲ କୌଣସି ବଡ଼ ଡାଟା ଲିକରେ ଥିବା ଜଣାପଡ଼ିବ, ତେବେ ଏହି ସାଇଟ ସଙ୍ଗେସଙ୍ଗେ କହିଦେଇଥାଏ । ଏହି ଓ୍ବେବସାଇଟ ବ୍ୟବହାର କରିବା ବହୁତ ସହଜ ଓ ଏହା ମାଗଣା ମଧ୍ୟ ହୋଇଥାଏ ।