ଭଦ୍ରକ: ଭଦ୍ରକ ତିହିଡ଼ି ବ୍ଲକ ଗେଙ୍ଗୁଟି ନଦୀରେ କୁମ୍ଭୀର ଆତଙ୍କ । ନଦୀରେ କୁମ୍ଭୀର ବୁଲୁଥିବାରୁ ଲୋକେ ଆତଙ୍କିତ ଅବସ୍ଥାରେ ଅଛନ୍ତି । ଶ୍ୟାମସୁନ୍ଦରପୁର ପଞ୍ଚାୟତର ୫ଟି ଗାଁର ଲୋକେ ନଦୀରେ ମାଛ ଧରି ଜୀବିକା ନିର୍ଭର କରିଥାନ୍ତି । ନଦୀରେ କୁମ୍ଭୀର ଭାସୁଥିବା ଦେଖି ଲୋକମାନେ ନଦୀକୁ ଯାଇ ପାରୁନାହାନ୍ତି । କିଛିଦିନ ପୂର୍ବରୁ ଗେଙ୍ଗୁଟି ନଦୀରେ କୁମ୍ଭୀର ଆକ୍ରମଣରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିଲା । ସେହିପରି ଗାଈ ଗୋରୁ ମଧ୍ୟ କୁମ୍ଭୀର ଆକ୍ରମଣ ଶିକାର ହେଉଛନ୍ତି । ତେଣୁ ନଦୀ ପାର୍ଶ୍ୱରେ ତାରବାଡ଼ ବ୍ୟବସ୍ଥା କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି ।
ଆସନ୍ତା ୧୮ ତାରିଖ ସକାଳ ୧୦ଟାରେ ପ୍ରକାଶ ପାଇବ ମାଟ୍ରିକ୍ ରେଜଲ୍ଟ
କଟକ: ଆସନ୍ତା ୧୮ ତାରିଖରେ ପ୍ରକାଶ ପାଇବ ମାଟ୍ରିକ୍ ରେଜଲ୍ଟ । ୧୮ ତାରିଖ ସକାଳ ୧୦ଟାରେ ପରୀକ୍ଷା ଫଳ ପ୍ରକାଶ ପାଇବ । ସକାଳ ୧୦ଟାରେ ରେଜଲ୍ଟ ବାହାରିବା ପରେ ଦିନ ୧୨ଟାରେ ଓ୍ୱେବସାଇଟ ମାଧ୍ୟମରେ ନିଜ ରେଜଲ୍ଟ ଦେଖିପାରିବେ ଛାତ୍ରଛାତ୍ରୀ । bseodisha.ac.in ରେ ଉପଲବ୍ଧ ହେବ ରେଜଲ୍ଟ । SMS ମାଧ୍ୟମରେ ମଧ୍ୟ ନିଜ ରେଜଲ୍ଟ ଜାଣିପାରିବେ ଛାତ୍ରଛାତ୍ରୀ । OR ସ୍ପେସ୍ ରୋଲ ନଂ ଲେଖି ୫୬୭୬୭୫୦କୁ SMS କରି ରେଜଲ୍ଟ ଜାଣିପାରିବେ । ରେଜଲ୍ଟ ଜନିତ କୌଣସି ଅସୁବିଧା ଥିଲେ କଣ୍ଟ୍ରୋଲ ରୁମକୁ କଲ୍ କରି ଅଭିଯୋଗ କରିପାରିବେ । ଏନେଇ ଆଜି ପ୍ରେସମିଟ୍ କରିବ ସୂଚନା ଦେଇଛନ୍ତି ବୋର୍ଡ କର୍ତ୍ତୁପକ୍ଷ । ଷ୍ଟେଟ୍ ଓପନ୍ ସ୍କୁଲ ଓ ମଧ୍ୟମା ପରୀକ୍ଷାଫଳ ମଧ୍ୟ ଆସନ୍ତା ୧୮ ତାରିଖରେ ପ୍ରକାଶ ପାଇବ । ଚଳିତ ବର୍ଷ ୫ ଲକ୍ଷ ୩୨ ହଜାର ଛାତ୍ରଛାତ୍ରୀ ମାଟ୍ରିକ୍ ପରୀକ୍ଷା ଦେଇଥିଲେ ।
ବଢୁଛି କର୍ଣ୍ଣାଟକ ସସପେନ୍ସ, ମୁଖ୍ୟମନ୍ତ୍ରୀ ଚୟନ ନେଇ ଦୋଛକିରେ ହାଇକମାଣ୍ଡ
ବେଙ୍ଗାଲୁରୁ: କର୍ଣ୍ଣାଟକ ସିଏମ ସସପେନ୍ସ ଜାରି । ହାଇକମାଣ୍ଡଙ୍କ ଡାକରାରେ ଦିଲ୍ଲୀ ପହଞ୍ଚୁଛନ୍ତି କର୍ଣ୍ଣାଟକ ପିସିସି ସଭାପତି ଡି କେ ଶିବକୁମାର । ସିଏମ ରେସରେ ସିଦ୍ଧରମୈୟା ଆଗରେ ରହିଥିବା ବେଳ ଆଜି ଦିଲ୍ଲୀରେ ପହଞ୍ଚି ଦଳର ସଭାପତିଙ୍କୁ ଭେଟିବେ ଡି କେ ଶିବକୁମାର । ଦିଲ୍ଲୀ ଯିବା ପୂର୍ବରୁ ଦଳ ପାଇଁ ସବୁବେଳେ ନିଷ୍ଠାର ସହ କାର୍ଯ୍ୟ କରିଛି ଓ ଆଗକୁ ମଧ୍ୟ କରିବି ବୋଲି କହିଛନ୍ତି ଶିବକୁମାର । ସେ ଆହୁରି କହିଛନ୍ତି, ରାହୁଲ ଗାନ୍ଧୀଙ୍କ ପଦଯାତ୍ରା ପାଇଁ କର୍ଣ୍ଣାଟକରେ କଂଗ୍ରେସକୁ ବଳ ମିଳିଲା । ମୁଁ ଯାହା କରିବାକୁ ପ୍ରତିଶ୍ରୁତି ଦେଇଥିଲି ତାହା ପୂରଣ କରିଛି । ଏବେ ସଭାପତି ଯାହା ନିଷ୍ପତ୍ତି ନେବେ ତାହା ମୋ ପାଇଁ ସ୍ବୀକାର୍ଯ୍ୟ । ଦଳ ହେଉଛି ମା’ ଭଳି । ଦଳକୁ ଧୋକା ଦେବିନି କି ବିଦ୍ରୋହ କରିବି ନାହିଁ ।
ଆଗାମୀ ଲୋକସଭା ନିର୍ବାଚନରେ ଦଳ ୨୦ ଆସନ କିପରି ବିଜୟୀ ହେବ, ତାହା ଆମ ପାଇଁ ବଡ଼ ଚ୍ୟାଲେଞ୍ଜ ବୋଲି କହିଛନ୍ତି ଶିବକୁମାର । ସେପଟେ ସିଦ୍ଧରମୈୟାଙ୍କ ସପୋର୍ଟରେ ଅଧିକ ବିଧାୟକ ରହିଥିବାରୁ ତାଙ୍କୁ ମୁଖ୍ୟମନ୍ତ୍ରୀ ଓ ଶିବକୁମାରଙ୍କୁ ଉପ ମୁଖ୍ୟମନ୍ତ୍ରୀ କରାଯାଇପାରେ ବୋଲି ଶୁଣାଯାଉଛି । ଏହାସହ ଡି କେ ଶିବକୁମାର ରାଜ୍ୟ କଂଗ୍ରେସ ସଭାପତି ପଦରେ ମଧ୍ୟ ରହିବେ ।
ପତଞ୍ଜଳି ଷ୍ଟୋରରେ କଳାକନା ବୁଲାଇଲେ ଦୁର୍ବୃତ୍ତ
ଭୁବନେଶ୍ୱର: ପତଞ୍ଜଳି ଷ୍ଟୋରରେ କଳାକନା ବୁଲାଇଲେ ଦୁର୍ବୃତ୍ତ । ହାତରେ ଶାବଳ ଧରି ରାଜଧାନୀରୁ ଲୁଟିଲେ ମୁଖା ପିନ୍ଧା ଲୁଟେରା । ତମାଣ୍ଡୋ ଥାନା କଳିଙ୍ଗ ବିହାର K4ରେ ଥିବା ପତାଞ୍ଜଳି ଷ୍ଟୋରରୁ ଲୁଟ୍ ଲକ୍ଷାଧିକ ଟଙ୍କାର ମେଡିସିନ ସହ ୫୦ ହଜାରରୁ ଊର୍ଦ୍ଧ୍ବ ନଗଦ ଟଙ୍କା ଲୁଟ୍ ହୋଇଛି । ଲୁଟ୍ ସମୟର ଦୃଶ୍ୟ ସିସିଟିଭିରେ କଏଦ ହୋଇଥିବା ବେଳେ ନନ୍ଦିଘୋଷ ଟିଭି ହାତରେ ଏକ୍ସକ୍ଲୁସିଭ ଫୁଟେଜ ଲାଗିଛି । ଘଟଣାସ୍ଥଳରେ ତମାଣ୍ଡୋ ଥାନା ପୋଲିସ ପହଞ୍ଚି ଛାନବିନ୍ ଚଳାଇଥିବା ବେଳେ ଆବଶ୍ୟକ ହେଲେ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚିବ ।
ମୟୂରଭଞ୍ଜ ବହଳଦାରେ ଗୁଳିକାଣ୍ଡ, ବାଇପାସ୍ ନିକଟରେ ୩ ଦୁର୍ବୃତ୍ତଙ୍କ ଗୁଳିରେ ୨ ଜଣ ଗୁରୁତର ଆହତ
ମୟୂରଭଞ୍ଜ: ମୟୂରଭଞ୍ଜ ବହଳଦାରେ ଗୁଳିକାଣ୍ଡ । ୩ ଦୁର୍ବୃତ୍ତଙ୍କ ଗୁଳିରେ ୨ ଜଣ ଗୁରୁତର ହୋଇଛନ୍ତି । ଗତକାଲି ବିଳମ୍ବିତ ରାତିରେ ଏଭଳି ଘଟଣା ଘଟିଛି । ତିନି ଜଣ ଦୁର୍ବୃତ୍ତ ବାଇକରେ ଆସି ଜଣକ ଘରେ ଡକାୟତି ପାଇଁ ଉଦ୍ୟମ କରୁଥିଲେ । ଦୁର୍ବୃତ୍ତଙ୍କ ଗତିବିଧି ଦେଖିବା ପରେ ପରିବାର ଲୋକ ସେମାନଙ୍କୁ ଘଉଡ଼ାଇ ଦେଇଥିଲେ । ପରେ ଦୁର୍ବୃତ୍ତମାନେ ଗୁଳିମାଡ଼ କରିଥିଲେ । ଗୁଳିମାଡ଼ରେ ଗୌରବ ଦାସ ଓ ଅନ୍ୟ ଜଣେ ଯୁବକ କାର୍ତ୍ତିକ ସ୍ବାଇଁ ଆହତ ହୋଇଥିଲେ ।
ଗୁଳିକାଣ୍ଡ ପରେ ଘଟଣାସ୍ଥଳରୁ ଖସି ପଳାଇବା ବେଳେ ଜଣଙ୍କୁ କାବୁ କରି ଲୋକେ ନିସ୍ତୁକ ମାଡ଼ ମାରିଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଗୁରୁତର ଥିବା ଯୁବକଙ୍କୁ ରାଇରଙ୍ଗପୁର ଡାକ୍ତରଖାନାରେ ଭର୍ତ୍ତି କରିଥିଲା । ପରେ ସେମାନଙ୍କୁ ଜାମସେଦପୁରକୁ ସ୍ଥାନାନ୍ତର କରାଯାଇଛି । ଅନ୍ୟପଟେ ଘଟଣାସ୍ଥଳରୁ ଏକ ମାଉଜର ଜବତ କରିଛି ପୋଲିସ ।
ଆଜି ଘୋଷଣା ହେବ ମାଟ୍ରିକ ରେଜଲ୍ଟ ପ୍ରକାଶ ତାରିଖ
କଟକ: ଆଜି ଘୋଷଣା ହେବ ମାଟ୍ରିକ ରେଜଲ୍ଟ ପ୍ରକାଶ ତାରିଖ । ଦିନ ସାଢ଼େ ୧୧ଟାରେ ବୋର୍ଡ କାର୍ଯ୍ୟାଳୟ ପକ୍ଷରୁ ପ୍ରେସମିଟରେ ତାରିଖ ଘୋଷଣା କରାଯିବ । କଟକ ବୋର୍ଡ ଉପସଭାପତି ନିହାର ରଞ୍ଜନ ମହାନ୍ତି ଏନେଇ ସୂଚନା ଦେଇଛନ୍ତି । ଗତ ମାର୍ଚ୍ଚ ୧୦ରୁ ୨୦ ଯାଏ ସମ୍ମେଟିଭ-୨ ପରୀକ୍ଷା ଅନୁଷ୍ଠିତ ହୋଇଥିଲା । ପ୍ରାୟ ୫ ଲକ୍ଷ ୪୧ ହଜାର ୨୪୭ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ । ୩୨୧୮ଟି ପରୀକ୍ଷା କେନ୍ଦ୍ରରେ ପରୀକ୍ଷା ଦେଇଥିଲେ ପରୀକ୍ଷାର୍ଥୀ । ଗତ ବର୍ଷ ମାଟ୍ରିକ ପରୀକ୍ଷାରେ ପାସ୍ ହାର ଥିଲା ୯୦.୫୫ ପ୍ରତିଶତ ।
ୟୁକ୍ରେନକୁ ଫ୍ରାନ୍ସ ଯୋଗାଇବ ହାଲୁକା ଲଢୁଆ ଟ୍ୟାଙ୍କ ଓ ସାଞ୍ଜୁଆ ଯାନ
କିଭ୍: ୟୁକ୍ରେନ ହେବ ବାହୁବଳୀ । ୟୁକ୍ରେନକୁ ହାଲୁକା ଲଢୁଆ ଟ୍ୟାଙ୍କ ଓ ସାଞ୍ଜୁଆ ଯାନ ଯୋଗାଇବା ଫ୍ରାନ୍ସ । ଏନେଇ ଘୋଷଣା କରିଛନ୍ତି ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନ । ସାମରିକ ସହଯୋଗିତା ନେଇ ଉଭୟ ମାକ୍ରନ ଓ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କ ମଧ୍ୟରେ ଘୋଷଣାନାମା ଜାରି ହୋଇଛି । ଏହି ଯୁଦ୍ଧାସ୍ତ୍ର ପାଇଲେ ଋଷ ବିରୋଧରେ ଜୋରଦାର ସଂଘର୍ଷ କରିପାରିବ ୟୁକ୍ରେନ । ଏହା ସହ ଆକାଶ ମାର୍ଗରେ ଋଷର ଆକ୍ରମଣକୁ ପ୍ରତିହତ କରିବା ଲାଗି ୟୁକ୍ରେନକୁ ଫ୍ରାନ୍ସ ଏୟାର ଡିଫେନ୍ସ ସିଷ୍ଟମ ଯୋଗାଇବ । ଋଷ ବାହିନୀକୁ ଦୁର୍ବଳ କରିବା ଲାଗି ୟୁକ୍ରେନକୁ ସମସ୍ତ ପ୍ରକାର ସହଯୋଗ କରିବାକୁ ପ୍ରତିଶ୍ରୁତି ଦେଇଛନ୍ତି ମାକ୍ରନ । ଗତ ରବିବାର ଫ୍ରାନ୍ସ ଗସ୍ତରେ ଜେଲେନସ୍କି ଯାଇଥିବା ଅବସରରେ ସାମରିକ ସମ୍ପର୍କ ନେଇ ଦୁଇ ନେତା ଆଲୋଚନା କରିଥିଲେ ।
ସେପଟେ ଚଳିତ ବର୍ଷ ହିଁ ଋଷର ପରାଜୟ ଘଟିବ ବୋଲି ଦମ୍ଭୋକ୍ତି ବ୍ୟକ୍ତ କରିଛନ୍ତି ଜେଲେନସ୍କି । ଏହା ସହ ସାମରିକ ସହାୟତା କରୁଥିବାରୁ ସେ ପାଶ୍ଚାତ୍ୟ ରାଷ୍ଟ୍ର ଓ ଜର୍ମାନୀକୁ ଦେଇଛନ୍ତି ଧନ୍ୟବାଦ । ଆସନ୍ତା ଦିନରେ ଖୁବ ଶୀଘ୍ର ଋଷ ବିରୋଧରେ ଜୋରଦାର ହମଲା କରିବା ଲାଗି ଧମକ ଦେଇଛନ୍ତି ଜେଲେନସ୍କି । ସେପଟେ ୟୁକ୍ରେନକୁ ବ୍ରିଟେନ ଶତାଧିକ ଏୟାର ଡିଫେନ୍ସ ସିଷ୍ଟମ ଓ ଲଙ୍ଗରେଞ୍ଜ ଡ୍ରୋନ ଯୋଗାଇବ ବୋଲି ସୂଚନା ମିଳିଛି ।
ଆଜି ଯାତ୍ରା କରିବ ବାତିଲ ହୋଇଥିବା ଇଣ୍ଡିଗୋ ବିମାନ, ଦିନ ୧୧ଟା ୪୦ରେ ନିଜ ଗନ୍ତବ୍ୟସ୍ଥଳକୁ ଯାତ୍ରା କରିବେ ଯାତ୍ରୀ
ଭୁବନେଶ୍ୱର: ଆଜି ଯାତ୍ରା କରିବ ବାତିଲ ହୋଇଥିବା ଇଣ୍ଡିଗୋ ବିମାନ । ଦିନ ୧୧ଟା ୪୦ରେ ନିଜ ଗନ୍ତବ୍ୟସ୍ଥଳକୁ ଯାତ୍ରା କରିବେ ଯାତ୍ରୀ । ଗତକାଲି ଭୁବନେଶ୍ୱର ବିମାନ ବନ୍ଦରରେ ଭୁବନେଶ୍ୱର-ଅହମ୍ମଦାବାଦ ଭାୟା କୋଲକାତା ବିମାନ ବାତିଲ ହେବାରୁ ଯାତ୍ରୀମାନେ ହଟ୍ଟଗୋଳ କରିଥିଲେ । ବିମାନ ବାତିଲ ନେଇ ଇଣ୍ଡିଗୋ ପକ୍ଷରୁ କୌଣସି ସୂଚନା ଦିଆଯାଇନଥିଲା ।
ଗତକାଲି ରାତି ୯ଟା ୩୦ରେ ବିମାନ ଟେକଅପ୍ କରିବାର ଥିଲା । ଯାତ୍ରୀମାନେ ଦୁଇ ଘଣ୍ଟା ପୂର୍ବରୁ ବୋର୍ଡିଂ କରିଥିଲେ । ରାତି ୧୧.୩୦ରେ ବିମାନ ପହଞ୍ଚିଥାନ୍ତା । କିଛି ଯାତ୍ରୀ ଜରୁରୀ କାମରେ ଯାଉଥିବା ବେଳେ, କିଛି ଯାତ୍ରୀ ମେଡିକାଲ କାମରେ ଯାଉଥିଲେ । ହେଲେ ବିମାନ ବାତିଲ ନେଇ ଇଣ୍ଡିଗୋ ପକ୍ଷରୁ ଆଗୁଆ ସୂଚନା ଦିଆଯାଇନଥିଲା । ଯାହାକୁ ନେଇ ଯାତ୍ରୀମାନେ ହୋହଲ୍ଲା କରିଥିଲେ । ପରେ କମ୍ପାନୀ ପକ୍ଷରୁ ସମସ୍ତ ଯାତ୍ରୀଙ୍କୁ ହୋଟେଲରେ ରହିବାର ବ୍ୟବସ୍ଥା କରାଯାଇଥିଲା । ଆଜି ଯାତ୍ରୀମାନେ ଗନ୍ତବ୍ୟସ୍ଥଳକୁ ଯାତ୍ରା କରିବେ ।
ଥାଇଲାଣ୍ଡରେ ଦଶନ୍ଧି ବ୍ୟାପୀ ସାମରିକ ଶାସନର ଅବସାନ, ସାଧାରଣ ନିର୍ବାଚନରେ ଗଣତନ୍ତ୍ରପନ୍ଥୀଙ୍କ ବିଜୟ
ନୂଆଦିଲ୍ଲୀ: ଥାଇଲାଣ୍ଡରେ ଦଶନ୍ଧି ବ୍ୟାପୀ ସାମରିକ ଶାସନର ଅବସାନ । ଅନୁଷ୍ଠିତ ସାଧାରଣ ନିର୍ବାଚନରେ ଗଣତନ୍ତ୍ରପନ୍ଥୀଙ୍କ ହୋଇଛି ବିଜୟ । ମୁଭ ଫରଓ୍ବାର୍ଡ ପାର୍ଟି ବା ଏମଏଫପି ସର୍ବାଧିକ ୧୫୧ ଆସନ ଲାଭ କରିଥିବାବେଳେ ସରକାର ଗଠନ ଲାଗି ପ୍ରସ୍ତୁତ ହୋଇଛି । ୫୦୦ ସଦସ୍ୟ ବିଶିଷ୍ଟ ସଂସଦ ଲାଗି ହୋଇଥିବା ନିର୍ବାଚନରେ ପିଟା ଲିମଜାରୋନେରାଟ ନେତୃତ୍ବାଧୀନ ଏମଏଫପିକୁ ୧୫୧ ଆସନ, ପାତେନୋତାର୍ନ ସିନାବାତ୍ରା ନେତୃତ୍ବାଧୀନ ଫିଉ ଥାଇକୁ ୧୪୧ ଆସନ ମିଳିଛି । ଅନୁତିନ ଚାର୍ମବୀରକୁଳ ନେତୃତ୍ବାଧୀନ ଭୁମଜାଇଥାଇ ଦଳକୁ ୭୦ ଆସନ ମିଳିଛି । ପ୍ରବୀତ ଉଙ୍ଗସୁଆନ ନେତୃତ୍ବାଧୀନ ପାଲାଙ୍ଗ ପ୍ରଚାରତ ଦଳକୁ ମିଳିଛି ୪୦ ଆସନ । ପ୍ରୟୁତ ଚାନ ଚାଚା ନେତୃତ୍ବାଧୀନ ୟୁନାଇଟେଡ ଥାଇ ନ୍ୟାସନାଲ ପାର୍ଟି ବା ୟୁଟିଏନକୁ ମିଳିଛି ୩୬ ଆସନ । ୟୁଟିଏନକୁ ସାମରିକ ଜୁଣ୍ଟା ସମର୍ଥନ କରୁଛି । ଏମଏଫପି ନେତା ପିଟା ସମ୍ଭବତଃ ପ୍ରଧାନମନ୍ତ୍ରୀ ହେବାର ଆଶା ଉଜ୍ଜ୍ବଳ ହୋଇଛି । ନିର୍ବାଚନରେ ଭାଗ ନେଇଥିଲେ ମୋଟ ୬୭ଟି ରାଜନୈତିକ ଦଳ ।
ତେବେ ଏହି ନିର୍ବାଚନରେ ସିନାବାତ୍ରାଙ୍କ ଦଳ କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି । ଫିଉ ଥାଇ ହେଉଛି ପୂର୍ବତନ ପ୍ରଧାନମନ୍ତ୍ରୀ ତଥା ବିଲୟନେୟାର ଥାକସିନ ସିନାବାତ୍ରାଙ୍କ ଦ୍ବାରା ପ୍ରତିଷ୍ଠିତ ଦଳ । ୨୦୦୧ ପରଠାରୁ ସିନାବାତ୍ରାଙ୍କ ଦଳ ଅନ୍ୟ ଦଳ ସହାୟତାରେ ସରକାର ଗଠନ କରିଆସୁଥିଲା । ଗତ ୨୦୧୪ରେ ସାମରିକ ବିଦ୍ରୋହ ଜରିଆରେ ପୂର୍ବତନ ସେନାମୁଖ୍ୟ ପ୍ରୟୁତ ଚାନ ଚାଚା କ୍ଷମତା ଦଖଲ କରିବା ପରଠାରୁ ଦେଶରେ ଅଶାନ୍ତ ପରିବେଶ ସୃଷ୍ଟି ହୋଇଆସୁଥିଲା । ଯଦିଓ ଏମଏଫପି ଓ ଫିଉ ଥାଇ ସଂଖ୍ୟାଗରିଷ୍ଠତା ଲାଭ କରିଛନ୍ତି ତଥାପି ୨୦୧୭ରେ କରାଯାଇଥିବା ସମ୍ବିଧାନ ସଂଶୋଧନ ଅନୁସାରେ ଉଭୟ ଦଳ ମିଳିତ ସରକାର ଗଠନ କରିବା କଷ୍ଟସାଧ୍ୟ ହେବ । ନିୟମ ଅନୁସାରେ ନୂଆ ପ୍ରଧାନମନ୍ତ୍ରୀଙ୍କୁ ୫୦୦ ନବନିର୍ବାଚିତ ସାଂସଦ ଓ ପ୍ରୟୁତଙ୍କ ଜୁଣ୍ଟା ପାର୍ଟି ଅର୍ଥାତ ୟୁଟିଏନ ଦ୍ବାରା ନିଯୁକ୍ତି ୨୫୦ ସିନେଟ ସଦସ୍ୟ ଚୟନ କରିବେ ।
ଆସନ୍ତା ଦୁଇଦିନ ଆହୁରି ବଢିବ ତାପମାତ୍ରା, କିଛି ସ୍ଥାନରେ ୪୫ ଡିଗ୍ରୀ ଛୁଇଁପାରେ ତାତି
ଭୁବନେଶ୍ୱର: ରାଜ୍ୟରେ ପୁଣି କଲବଲ କରୁଛି ତାତି । ଜଳୁଛି ପଶ୍ଚିମ ଓଡ଼ିଶା । ଆସନ୍ତା ଦୁଇଦିନ ପର୍ଯ୍ୟନ୍ତ ରାଜ୍ୟରେ ଆହୁରି ବଢ଼ିବ ତାପମାତ୍ରା । ପ୍ରବଳ ଗ୍ରୀଷ୍ମପ୍ରବାହ ସହ ଅସହ୍ୟ ଗୁଳୁଗୁଳିରେ ସନ୍ତୁଳି ହେବେ ରାଜ୍ୟବାସୀ । ବିଭିନ୍ନ ସ୍ଥାନରେ ସ୍ୱାଭାବିକଠାରୁ ୩ ରୁ ୫ ଡିଗ୍ରୀ ଏବଂ କିଛି ଜିଲ୍ଲାରେ ୭ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବା ସମ୍ଭାବନା ରହିଛି । କିଛି ସ୍ଥାନରେ ତାତି ୪୫ ଡିଗ୍ରୀ ଅତିକ୍ରମ କରିପାରେ । ପ୍ରବଳ ଗ୍ରୀଷ୍ମ ପ୍ରବାହ ପାଇଁ ଆଜି ୮ଟି ଜିଲ୍ଲାକୁ ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତାକାଲି ଆଭ୍ୟନ୍ତରୀଣ ଓଡ଼ିଶାର ୫ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।
ପ୍ରଚଣ୍ଡ ଗ୍ରୀଷ୍ମ ପ୍ରବାହ ପାଇଁ ଦିନ ୧୧ଟାରୁ ଅପରାହ୍ନ ୩ ଟା ପର୍ଯ୍ୟନ୍ତ ପିକ୍ ଆଓ୍ୱାର ଘୋଷଣା କରାଯାଇଛି । ଏହି ସମୟରେ ବୟସ୍କ ଏବଂ ଶିଶୁ ଘରୁ ନବାହାରିବାକୁ ପରାମର୍ଶ ଦିଆଯାଇଛି । ଗ୍ରୀଷ୍ମ ପ୍ରବାହକୁ ନଜରରେ ସବୁ ଜିଲ୍ଲାପାଳ ଆଲର୍ଟରେ ରହିବାକୁ ନିର୍ଦ୍ଦେଶ ଦେଇଛନ୍ତି ଏସଆରସି । ଗତକାଲି ରାଜ୍ୟର ୧୬ ସହରର ତାପମାତ୍ରା ୪୧ ଡିଗ୍ରୀ ଉପରେ ରେକର୍ଡ ହୋଇଥିଲା । ୪୪.୪ ଡିଗ୍ରୀ ସହ ବଲାଙ୍ଗୀର ସବୁଠାରୁ ଉତ୍ତପ୍ତ ସହର ପାଲଟିଥିଲା ।