ଜୟପୁର: ଜୟପୁର ଉପଖଣ୍ଡରେ ଲାଗିଲା ୧୪୪ ଧାରା । ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେବାକୁ ଆଶଙ୍କା କରି ଜୟପୁରରେ ଲାଗୁ ହୋଇଛି ୧୪୪ ଧାରା । ଆଜିଠୁ ଆସନ୍ତା ୨୦ ତାରିଖ ପର୍ଯ୍ୟନ୍ତ ୭ ଦିନ ପର୍ଯ୍ୟନ୍ତ କଟକଣା ଜାରି ରହିବ । ପ୍ରତିଦିନ ଅପରାହ୍ନ ୩ଟାରୁ ପରଦିନ ସକାଳ ୯ଟା ଯାଏ ୧୪୪ ଧାରା ବଳବତ୍ତର ରହିବ । କୌଣସି ସ୍ଥାନରେ ଦୁଇରୁ ଅଧିକ ଲୋକ ଏକତ୍ରିତ ହୋଇପାରିବେ ନାହିଁ ।
ସ୍ପର୍ଶକାତର ପ୍ରସଙ୍ଗରେ ରାଜନୀତି ନ କରନ୍ତୁ କେନ୍ଦ୍ରମନ୍ତ୍ରୀ: ବିଜେଡି
ଭୁବନେଶ୍ୱର: ସମ୍ବଲପୁରରେ ଅଶାନ୍ତି ପ୍ରସଙ୍ଗ । ଶାନ୍ତି ଓ ସୌହାର୍ଦ୍ଦ୍ୟ ବଦଳରେ ଏହାକୁ ନଷ୍ଟ ଲାଗି କେନ୍ଦ୍ରମନ୍ତ୍ରୀ କରୁଛନ୍ତି ହୀନ ଉଦ୍ୟମ । ଶାନ୍ତି ସୌହାର୍ଦ୍ଦ୍ୟ ରକ୍ଷା କରିବା ସମସ୍ତଙ୍କ ଦାୟିତ୍ୱ । ସ୍ପର୍ଶକାତର ପ୍ରସଙ୍ଗରେ କେନ୍ଦ୍ରମନ୍ତ୍ରୀ ରାଜନୀତି ନକରନ୍ତୁ ବୋଲି କହିଛି ବିଜେଡି । ବିଜେଡି ମୁଖପାତ୍ର ଶ୍ରୀମୟୀ ମିଶ୍ର କହିଛନ୍ତି- କର୍ଣ୍ଣାଟକ, ଉତ୍ତରପ୍ରଦେଶ ଆଦି ବିଜେପି ଶାସିତ ରାଜ୍ୟରେ ଆଇନଶୃଙ୍ଖଳା ସ୍ଥିତି ଚିନ୍ତାଜନକ । ହେଲେ ବିଜେପିର ମନ୍ତ୍ରୀ ଓଡ଼ିଶା ପରି ଶାନ୍ତିପ୍ରିୟ ରାଜ୍ୟକୁ ନେଇ ନାନା ଦାୟିତ୍ୱହୀନ ଟିପ୍ପଣୀ ଦେଉଛନ୍ତି । ରାଜ୍ୟବାସୀଙ୍କୁ କେନ୍ଦ୍ରମନ୍ତ୍ରୀ ଆଇନହୀନ ବ୍ୟକ୍ତି କହିବା ଦୁର୍ଭାଗ୍ୟଜନକ । ସାମ୍ବିଧାନିକ ପଦବୀରେ ଥାଇ ଏଭଳି ବିବାଦୀୟ ମନ୍ତବ୍ୟ ଦୁର୍ଭାଗ୍ୟଜନକ । ସ୍ବାଭାବିକ ସ୍ଥିତି ଫେରାଇ ଆଣିବା ଲାଗି ଉଦ୍ୟମ କରାଯାଉଛି ବୋଲି କହିଛନ୍ତି ଶ୍ରୀମୟୀ ମିଶ୍ର ।
ଝାରସୁଗୁଡ଼ା ଉପନିର୍ବାଚନରେ ଲକ୍ଷେ ଭୋଟ ବ୍ୟବଧାନରେ ଜିତିବ ବିଜେଡି: ପ୍ରମିଳା ମଲ୍ଳିକ
ଝାରସୁଗୁଡ଼ା: ଝାରସୁଗୁଡ଼ା ଉପନିର୍ବାଚନରେ ଲକ୍ଷେ ଭୋଟ ବ୍ୟବଧାନରେ ଜିତିବ ବିଜେଡି । ଲୋକଙ୍କ ପାଇଁ କାମ କରିଛି ବିଜେଡି, ସେମାନଙ୍କ ସହ ରହିଛି । ପ୍ରମୁଖ ବିରୋଧୀ ୧୦ ବର୍ଷ ହେବ କେନ୍ଦ୍ରରେ ଶାସନ କରୁଛନ୍ତି । ସେମାନେ ଲୋକଙ୍କ ପାଇଁ କ’ଣ କରିଛନ୍ତି ବୋଲି ପଚାରିଛନ୍ତି ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକ। କେନ୍ଦ୍ର ସରକାରଙ୍କ ପାଇଁ ବରିଷ୍ଠ ନାଗରିକ କାନ୍ଦୁଛନ୍ତି, ପେନସନ୍ ଠିକ୍ ଭାବେ ମିଳୁନି । ବ୍ୟାଙ୍କ ଯାଇ ଟିପ ଚିହ୍ନ ଦେଇ ହଇରାଣ ହେଉଥିବା ପ୍ରମିଳା କହିଛନ୍ତି ।
ସେପଟେ ବଡ଼ ବ୍ୟବଧାନରେ ବିଜେଡିକୁ ବିଜୟୀ କରିବାକୁ ମନସ୍ଥ କରି ସାରିଛନ୍ତି ଭୋଟର। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିକାଶ ମୂଳକ କାର୍ଯ୍ୟକ୍ରମ ଦଳକୁ ଜିତାଇବ ବୋଲି ବିଜେଡି ବିଧାୟକ ଭୂପିନ୍ଦର ସିଂହ କହିଛନ୍ତି । ସ୍ୱର୍ଗତ ନବ ଦାସ ଝାରସୁଗୁଡ଼ା ପାଇଁ ବହୁତ କାମ କରିଥିଲେ । ଉପନିର୍ବାଚନରେ ବିଜେପି ଓ କଂଗ୍ରେସ ମଧ୍ୟରେ ଦ୍ୱିତୀୟ ସ୍ଥାନ ପାଇଁ ଲଢେଇ ହେବ ବୋଲି କହିଛନ୍ତି ଭୂପିନ୍ଦର ସିଂ ।
ସାରା ରାଜ୍ୟରେ ପ୍ରବଳ ଖରା, ଦିନ ସାଢେ ୨ଟା ସୁଦ୍ଧା ୪୦ ଡିଗ୍ରୀ ଉପରେ ୫ ସହର
ଭୁବନେଶ୍ୱର: ସାରା ରାଜ୍ୟରେ ଜାରି ରହିଛି ପ୍ରଖର ଗ୍ରୀଷ୍ମ ପ୍ରବାହ । ଦିନ ସାଢ଼େ ଦୁଇଟା ସୁଦ୍ଧା ଝାରସୁଗୁଡ଼ା ହୋଇଛି ରାଜ୍ୟର ସବୁଠୁ ଉତ୍ତପ୍ତ ସହର । ଝାରସୁଗୁଡ଼ାରେ ୪୧.୪ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ସେହିପରି ସମ୍ବଲପୁରରେ ୪୧.୨, ଭୁବନେଶ୍ବରରେ ୪୦.୪ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି । ଚାନ୍ଦବାଲି, ହୀରାକୁଦରେ ୪୦ ଡିଗ୍ରୀ ଲେଖାଏ ପାରଦ ରେକର୍ଡ ହୋଇଥିବାବେଳେ କେନ୍ଦୁଝରରେ ୩୯.୨, ବାଲେଶ୍ବରରେ ୩୮.୪, ଗୋପାଳପୁରରେ ୩୪.୬, ପୁରୀରେ ୩୪.୨ ଓ ପାରାଦୀପରେ ୩୨. ୮ ଡିଗ୍ରୀ ତାତି ରେକର୍ଡ ହୋଇଛି । ଆସନ୍ତା ୧୫ ତାରିଖ ପର୍ଯ୍ୟନ୍ତ ରାଜ୍ୟରେ ଏପରି ଖରା ଜାରି ରହିବ ।
ଅନ୍ୟପକ୍ଷରେ ଆସନ୍ତାକାଲି ୮ଟି ଜିଲ୍ଲା ଏବଂ ୧୫ ତାରିଖରେ ୯ ଜିଲ୍ଲାକୁ ପ୍ରବଳ ଗ୍ରୀଷ୍ମ ପ୍ରବାହ ନେଇ ସତର୍କତା ଜାରି କରାଯାଇଛି । ପଶ୍ଚିମ ଓଡ଼ିଶାର ଅଧିକାଂଶ ଜିଲ୍ଲାରେ ୪୦ ରୁ ୪୫ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ରେକର୍ଡ ହୋଇପାରେ । ସେହିଭଳି ଉପକୂଳ ଓଡ଼ିଶାର ଖୋର୍ଦ୍ଧା, ପୁରୀ, ନୟାଗଡ଼, ଜଗତସିଂହପୁର, ଯାଜପୁର, ଭଦ୍ରକ, ଅନୁଗୁଳ, ଢେଙ୍କାନାଳ ଜିଲ୍ଲାରେ ମଧ୍ୟ ତାତି ୪୦ ଡିଗ୍ରୀ ଅତିକ୍ରମ କରିବ । ଦିନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ପିକ୍ ଆଓ୍ବାର ଘୋଷଣା କରିଛି ପାଣିପାଗ କେନ୍ଦ୍ର । ଜରୁରୀ କାମ ନ ଥିଲେ ଘରୁ ନ ବାହାରିବାକୁ ପରାମର୍ଶ ଦିଆଯାଇଛି । ସେପଟେ ଫସଲ ପରିଚାଳନା ପାଇଁ ଓୟୁଏଟି ଦେଇଛି ପରାମର୍ଶ । ୨୦ ତାରିଖ ପର୍ଯ୍ୟନ୍ତ ହେଲ୍ପଲାଇନ ନମ୍ବର ଜାରି କଲା ଓୟୁଏଟି । ଏନେଇ ସୂଚନା ଦେଇଛନ୍ତି ଓୟୁଏଟି କୁଳପତି ପ୍ରଭାତ କୁମାର ରାଉଳ ।
ହୁଗୁଳି ନଦୀ ତଳେ ଚାଲିଲା ଦେଶର ପ୍ରଥମ ମେଟ୍ରୋ
କୋଲକାତା: ପ୍ରଥମ ଥର ପାଣି ତଳେ ଯାତ୍ରା କରି ରେକର୍ଡ କଲା କୋଲକତା ମେଟ୍ରୋ ଟ୍ରେନ । ଏସପ୍ଲାନେଡ ଠୁ ହାୱଡା ମଇଦାନ ଷ୍ଟେସନ ପର୍ଯ୍ୟନ୍ତ ଏହାର ଟ୍ରାଏଲ ଆରମ୍ଭ ହୋଇଛି । ପାଣି ତଳେ ରେକ୍ ନମ୍ବର ଏମ ଆର ୬୧୨ର ପରୀକ୍ଷାମୂଳକ ସେବା ଆରମ୍ଭ କରାଯାଇଛି । ପ୍ରଥମ ପର୍ଯ୍ୟାୟରେ ଦୁଇଟି ମେଟ୍ରୋକୁ ପରୀକ୍ଷାମୂଳକ ବ୍ୟବହାର କରାଯାଇଛି । ଏଥିରେ ମେଟ୍ରୋର ବରିଷ୍ଠ ଅଧିକାରୀ ମାନେ ଯାତ୍ରା କରିଛନ୍ତି । ପ୍ରଥମେ ସାତ ମାସ ପର୍ଯ୍ୟନ୍ତ ଏସପ୍ଲାନେଡରୁ ହାୱଡା ମଇଦାନ ପର୍ଯ୍ୟନ୍ତ ପରୀକ୍ଷା ମୂଳକ ଭାବେ ଏହି ଅଣ୍ଡରଗ୍ରାଉଣ୍ଡ ସେବା ଆରମ୍ଭ କରାଯିବ ।
ବହୁ ଘାତ ପ୍ରତିଘାତ ପରେ ହୁଗୁଳି ନଦୀକୁ ଚିରି ମେଟ୍ରୋ ସେବା ଆରମ୍ଭ ହେବାକୁ ଯାଉଛି । ଏହା ରାଜ୍ୟ ପରିବହନ କ୍ଷେତ୍ରରେ ଏକ ମାଇଲଷ୍ଟୋନ ଭାବେ ଉଭା ହେବ ବୋଲି ବରିଷ୍ଠ ଅଧିକାରୀ କହିଛନ୍ତି । ପଶ୍ଚିମବଙ୍ଗ ବାସୀଙ୍କ ପାଇଁ ଭାରତୀୟ ରେଳର ଏହା ନୂଆବର୍ଷ ଉପହାର ହେବାକୁ ଯାଉଥିବା ଅଧିକାରୀ କହିଛନ୍ତି ।
ପରୀକ୍ଷଣ ସଫଳ ହେଲେ ଖିୁବଶୀଘ୍ର ପାଣିତଳେ ବ୍ୟବସାୟିକ ସେବା ଆରମ୍ଭ ହେବ । ପ୍ରତିଦିନ ୪.୮ କିଲୋମିଟର ଚାଲିବ ଏହି ଅଣ୍ଡରଗ୍ରାଉଣ୍ଡ ମେଟ୍ରୋ । ମାତ୍ର ୪୫ ସେକେଣ୍ଡରେ ହୁଗୁଳି ନଦୀ ଭିତରେ ୫୨୦ ମିଟର ରାସ୍ତା ଅତିକ୍ରମ କରିବ ମେଟ୍ରୋ । ନଦୀ ଶଯ୍ୟାରୁ ୩୨ ମିଟର ତଳେ ଏହି ଟନେଲ ନିର୍ମାଣ କରାଯାଇଛି । ଏଭଳି ହେଲେ ହାୱଡା ଦେଶର ଗଭୀରତମ ମେଟ୍ରୋ ଷ୍ଟେସନ ପାଲଟିବ । .
ଏନସିଇଆରଟିର ଏକାଦଶ ଶ୍ରେଣୀ ବହିରୁ ବାଦ ପଡିଲେ ପ୍ରଥମ ଶିକ୍ଷାମନ୍ତ୍ରୀ
ନୂଆଦିଲ୍ଲୀ: ଏନସିଇଆରଟି ଏକାଦଶ ଶ୍ରେଣୀ ରାଜନୀତି ବିଜ୍ଞାନ ବିଷୟରୁ ହଟିଲା ସ୍ବାଧୀନ ଭାରତର ପ୍ରଥମ ଶିକ୍ଷାମନ୍ତ୍ରୀଙ୍କ ନାମ । ସ୍ବାଧୀନତା ସଂଗ୍ରାମ ତଥା ଶିକ୍ଷା ସଂସ୍କାର କ୍ଷେତ୍ରରେ ଜଡିତ ମୌଲାନା ଆବୁଲ କଲାମ ଆଜାଦଙ୍କ ନାମ ପାଠ୍ୟପୁସ୍ତକରୁ ବାଦ୍ ପଡିବାକୁ ନେଇ ସୃଷ୍ଟି ହୋଇଛି ବିତର୍କ ।
ପୂର୍ବରୁ ମହାତ୍ମା ଗାନ୍ଧୀଙ୍କୁ ହତ୍ୟା ଓ ସ୍ବାଧୀନୋତ୍ତର ଭାରତ ଲାଗି ତାଙ୍କର ଅବଦାନ ବିଷୟ ପାଠ୍ୟପୁସ୍ତକରୁ ବାଦ୍ ପଡିଥିଲା । ଏବେ ନ୍ୟାସନାଲ କାଉନସିଲ ଅଫ ଏଜୁକେସନାଲ ରିସର୍ଚ୍ଚ ଆଣ୍ଟ ଟ୍ରେନିଂ ବା ଏନସିଇଆରଟିର ଏକାଦଶ ଶ୍ରେଣୀ ରାଜନୀତି ବିଜ୍ଞାନ ପୁସ୍ତକରୁ ବାଦ ପଡିଛନ୍ତି ଆଜାଦ । ରାଜନୀତି ବିଜ୍ଞାନ ପୁସ୍ତକର ପ୍ରଥମ ବିଭାଗରେ ଥିବା ’ସମ୍ବିଧାନ- କାହିଁକି ଓ କିପରି’ ବିଷୟର ଏକ ଧାଡିକୁ ବାଦ୍ ଦେଇଛନ୍ତି କମିଟି ।
ଏହି ଧାଡିରେ ମୌଲାନା ଆଜାଦଙ୍କ ନାମ ସ୍ଥାନିତ ଥିଲା । ସେହି ଧାଡ଼ିରେ ଅନ୍ୟ ଯେଉଁମାନେ ସ୍ଥାନିତ ହୋଇଛନ୍ତି ସେମାନେ ହେଲ ଜବାହାରଲାଲ ନେହରୁ, ରାଜେନ୍ଦ୍ର ପ୍ରସାଦ, ସର୍ଦ୍ଦାର ପଟେଲ ଓ ବିଆର ଆମ୍ବେଦକର । ଦେଶର ନୂଆ ସାମ୍ବିଧାନିକ ସଭା ଲାଗି ହୋଇଥିବା ୧୯୪୬ ନିର୍ବାଚନରେ ପ୍ରମୁଖ ଭୂମିକା ନେଇଥିଲେ ଆଜାଦ । ଏହା ସହ ଭାରତ ସହ ଜମ୍ମୁ ଓ କାଶ୍ମୀରର ସର୍ତ୍ତମୂଳକ ମିଶ୍ରଣ ବିଷୟକୁ ମଧ୍ୟ ପାଠ୍ୟପୁସ୍ତକରୁ ବାଦ୍ ଦିଆଯାଇଛି ।
ବିରୋଧୀଙ୍କୁ ଏକାଠି କରୁଛନ୍ତି ବିହାର ମୁଖ୍ୟମନ୍ତ୍ରୀ, ୨୪ ପାଇଁ ଚାଲିଛି ମେଳି
ନୂଆଦିଲ୍ଲୀ: ୨୪ ପୂର୍ବରୁ ଦିଲ୍ଲୀରେ ବିରୋଧୀଙ୍କ ମେଳି । ରାଜଧାନୀରେ ବିଜେପି ବିରୋଧରେ ବ୍ଲୁପ୍ରିଣ୍ଟ ପ୍ରସ୍ତୁତ କରୁଛନ୍ତି ବିହାର ମୁଖ୍ୟମନ୍ତ୍ରୀ ନୀତୀଶ କୁମାର । ବିରୋଧୀ ଦଳଙ୍କୁ ଏକାଠି କରି ମହାମେଣ୍ଟ ଗଠନ ପାଇଁ ରଣନୀତି ଚଳାଇଛନ୍ତି ନୀତିଶ। ଗତକାଲି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ବାସଭବନରେ ବୈଠକ ପରେ ଆଜି ଲେଫ୍ଟ ପାର୍ଟି ସହ ମିଟିଂ କରିବେ ନୀତୀଶ କୁମାର ।
ସିପିଆଇ ନେତା ଡି ରାଜା, ସିପିଆଇଏମ ନେତା ସୀତାରାମ ୟେଚୁରୀଙ୍କ ସହ ବୈଠକ କରିବାର କାର୍ଯ୍ୟକ୍ରମ ରହିଛି । ନୀତୀଶଙ୍କ ବାସଭବନରେ ବୈଠକ ବସିବ । ୨୦୨୪ ସାଧାରଣ ନିର୍ବାଚନ ପୂର୍ବରୁ ସମସ୍ତ ଧର୍ମନିରପେକ୍ଷ ପାର୍ଟି ଗୁଡ଼ିକ ଏକାଠି ହୋଇ ବିଜେପି ବିରୋଧରେ ଲଢ଼େଇ କରିବା ସହ ଦେଶର ଗଣତନ୍ତ୍ରକୁ ରକ୍ଷା କରିବାକୁ ଆହ୍ବାନ ଦେଇଛନ୍ତି ସିପିଆଇ ସାଧାରଣ ସମ୍ପାଦକ ଡି ରାଜା ।
ଅତିକର ପୁଅ ଅସଦର ଏନକାଉଣ୍ଟର, ଉମେଶ ପାଲ ହତ୍ୟାକାଣ୍ଡର ଥିଲେ ୱାଣ୍ଟେଡ
ଲକ୍ଷ୍ନୌ: ଉମେଶ ପାଲ ହତ୍ୟାକାଣ୍ଡରେ ୟୁପି ପୋଲିସକୁ ବଡ ସଫଳତା । ଗ୍ୟାଙ୍ଗଷ୍ଟାର ଅତିକ ଅହମ୍ମଦର ପୁଅ ଅସଦର ଏନକାଉଣ୍ଟର । ଉମେଶ ପାଲ ହତ୍ୟାକାଣ୍ଡରେ ସାମିଲ ଅସଦକୁ ଏନକାଉଣ୍ଟର କରିଛି ୟୁପି ପୋଲିସ । ଏହା ସହ ମଦମ୍ମଦ ଗୁଲାମର ବି ହୋଇଛି ଏନକାଉଣ୍ଟର । ଝାନ୍ସୀରେ ଆଜି ସକାଳୁ ୟୁପି ଏସଟିଏଫ ଦୁହିଁଙ୍କୁ ଏନକାଉଣ୍ଟର କରିଛି । ଡେପୁଟି ଏସପି ନଭେନ୍ଦୁ ଓ ଡେପୁଟି ଏସପି ବିମଲଙ୍କ ତତ୍ତ୍ବାବଧାନରେ ଅପରେସନ କରିଥିଲା ୟୁପି ପୋଲିସ । ଦୁହିଁଙ୍କ ପାଇଁ ୫ ଲକ୍ଷ ଟଙ୍କାର ପୁରସ୍କାର ରାଶି ବି ଘୋଷଣା କରାଯାଇଥିଲା ।
ଏନକାଉଣ୍ଟର ପରେ ପୋଲିସ ସେମାନଙ୍କ ଠାରୁ ହତିଆର ଜବତ କରିଛି । ଗୋଟିଏ ପଟେ ଉମେଶ ପାଲ ହତ୍ୟାକାଣ୍ଡରେ ଅତିଫ ଅହମ୍ମଦ ଓ ଅସରଫକୁ ଆଜି କୋର୍ଟରେ ହାଜର କରାଯାଇଛି । ଅନ୍ୟପଟେ ପୁଅ ଓ ତା ସହଯୋଗୀକୁ ଏନକାଉଣ୍ଟର କରାଯାଇଛି । ଦିନ ଦ୍ବିପ୍ରହରରେ ଉମେଶ ପାଲଙ୍କୁ ହତ୍ୟା କରିଥିବା ମହମ୍ମଦ ଗୁଲାମଙ୍କୁ ବି ଆଜାଦ୍ କରିଛି ୟୁପି ପୋଲିସ ।
ଗତ ଫେବୃଆରୀ ୨୪ରେ ପ୍ରୟାଗରାଜରେ ରାଜୁପାଲ ହତ୍ୟାକାଣ୍ଡର ସାକ୍ଷୀ ଉମେଶ ପାଲ୍ଙ୍କୁ ବିଚ୍ ବଜାରରେ ଗୋଡାଇ ଗୋଡାଇ ଗୁଳି କରି ହତ୍ୟା କରାଯାଇଥିଲା । ଉମେଶ ପାଲ ସମେତ ତାଙ୍କର ଦୁଇ ସରକାରୀ ଅଙ୍ଗରକ୍ଷୀ ବି ପ୍ରାଣ ହରାଇଥିଲେ ।
ପାକିସ୍ତାନର ବିଚିତ୍ର ପଦକ୍ଷେପ, ୟୁକ୍ରେନକୁ ଯୋଗାଇବ ୨୩୦ଟି ସାମରିକ ସାମଗ୍ରୀ କଣ୍ଟେନର
ଇସଲାମାବାଦ: ଖାଦ୍ୟ ଓ ଆର୍ଥିକ ସଂକଟରେ ଛଟପଟ ହେଉଥିବା ପାକିସ୍ତାନର ବିଚିତ୍ର ପଦକ୍ଷେପ । ଯୁଦ୍ଧବିଧ୍ବସ୍ତ ୟୁକ୍ରେନକୁ ୨୩୦ଟି ସାମରିକ ସାମଗ୍ରୀ କଣ୍ଟେନର ଯୋଗାଇବାକୁ ଘୋଷଣା କରିଛି । ନିଜ ଦେଶର ବିଭିନ୍ନ ବିମାନ ଇଞ୍ଜିନର ଆଧୁନିକୀକରଣ ଲାଗି ଋଷ ନିକଟରେ ପାକିସ୍ତାନ ଅନୁରୋଧ କରିଆସୁଥିବାବେଳେ ୟୁକ୍ରେନକୁ ଏହି ଯୁଦ୍ଧାସ୍ତ୍ର ଯୋଗାଣ ନେଇ ଘୋଷଣା ପ୍ରଶ୍ନବାଚୀ ସୃଷ୍ଟି କରିଛି ।
ଚଳିତ ମାସରେ କରାଚୀ ବନ୍ଦରରୁ ଏହି ସରଞ୍ଜାମ ୟୁକ୍ରେନ ଉଦ୍ଦେଶ୍ୟରେ ପଠାଯିବ । ଏମଭି ବୋକ୍ରାମ ଓ ଏମଭି ଖେର୍ସନ ଜରିଆରେ ଏହି ଯୁଦ୍ଧାସ୍ତ୍ର ପଠାଯିବ ବୋଲି ସୂଚନା ମିଳିଛି । ଏହି ଦୁଇଟି ଜାହାଜରେ ଆମେରିକା ଓ ୟୁରୋପୀୟ ପତାକା ଲଗାଯିବ । ପୋଲାଣ୍ଡ ଓ ଜର୍ମାନୀର ବିଭିନ୍ନ ବନ୍ଦର ଦେଇ ଏହି ଯୁଦ୍ଧାସ୍ତ୍ର ୟୁକ୍ରେନ ପଠାଯିବ ।
ୟୁକ୍ରେନ ବୈଦେଶିକ ଉପମନ୍ତ୍ରୀ ଏମିନ ଜାପାରୋଭାଙ୍କ ଭାରତ ଗସ୍ତ ପରେ ପରେ କିଭକୁ ଅସ୍ତ୍ର ଯୋଗାଣ ନେଇ ଘୋଷଣା କରିଛି ପାକିସ୍ତାନ । ଗତ ଜାନୁଆରୀରେ ବି ୟୁକ୍ରେନକୁ ୧୫୫ ମିମି ଆର୍ଟିଲେରି ଶେଲ, M4A2 ପ୍ରପେଲିଂ ବ୍ୟାଗଚାର୍ଜ, M82 ପ୍ରାଇମର ଓ ପିଡିଏମ ଫ୍ୟୁଜ ପଠାଇଥିଲା ବୋଲି ସୂଚନା ମିଳିଛି ।
ନବକଳେବର ପୂର୍ବରୁ ଏମିତି ଥିଲା ରାଜଧାନୀ ଯେତେବେଳେ ଆସିଥିଲେ ନେହେରୁ
ଆଜି ରାଜ୍ୟ ରାଜଧାନୀ ଭୁବନେଶ୍ବରର ୭୫ତମ ପ୍ରତିଷ୍ଠା ଦିବସ । ଭୁବନେଶ୍ବର ପାଳୁଛି ପ୍ଲାଟିନମ ଜୁବଲି ।
ସମୟ ସହିତ ତାଳ ଦେଇ ଭୁବନେଶ୍ବରର ବୃଦ୍ଧି ପାଇଛି କଳେବର । ଆଜି ପ୍ରତିଷ୍ଠା ଦିବସ ପାଳୁଛି ରାଜଧାନୀ ଭୁବନେଶ୍ବର ।
ବିନ୍ଦୁସାଗରର ଏମିତି ଫଟୋ ଦେଖିନଥିବେ । ପ୍ରତିଷ୍ଠା ଦିବସରେ ଦେଖନ୍ତୁ ପୁରୁଣା ଭୁବନେଶ୍ବରର ଚିତ୍ର ।
ସମୟ ସହିତ ତାଳ ଦେଇ ଭୁବନେଶ୍ବରର ବୃଦ୍ଧି ପାଇଛି କଳେବର ।
ତତ୍କାଳୀନ ପ୍ରଧାନମନ୍ତ୍ରୀ ପଣ୍ଡିତ ଜବାହାରଲାଲ ନେହେରୁଙ୍କ ଦ୍ବାରା ରାଜଧାନୀର ଶୁଭ ଦିଆଯାଇଥିଲା ।
