ଟାଙ୍ଗୀ: ଟାଙ୍ଗୀ ଅବକାରୀ ପୋଲିସ୍ ପକ୍ଷରୁ ଛଣଗୀରି ଗାଁରେ ଚଢ଼ାଉ। ଜଣେ ଧଳା ଜହର ବେପାରୀକୁ ଗିରଫ କରିଛି ଅବକାରୀ ପୋଲିସ୍। ତା ନିକଟରୁ ୩୦ ଗ୍ରାମ ଧଳାଜହର ଜବତ କରିଛି। ଜବତ ଧଳାଜହରର ମୂଲ୍ୟ ୩ଲକ୍ଷରୁ ଅଧିକ ହେବ ବୋଲି ଜଣାପଡିଛି।
ଗିରଫ ଅଭିଯୁକ୍ତ ୩୫ ବର୍ଷୀୟ ସଂଜୟ ମହାପାତ୍ର। ଗିରଫ ଅଭିଯୁକ୍ତ ପ୍ରଥମେ ଯୁବକ ମାନଙ୍କୁ ମାଗଣାରେ ଧଳା ଜହର ଯୋଗାଉଥିଲା ପରେ ସେମାନେ ନିଶା କବଳରେ ପଡିଗଲେ ସେମାନେ ବାଧ୍ୟ୍ୟ ହୋଇ ଧଳାଜହର କିଣି ସେବନ କରୁଥିଲେ । ଏଥିରେ ନେତ୍ରୁତ୍ୱ ନେଇଥିଲେ ଅବକାରୀ ଇନସପେକ୍ଟର ଆଲୋକ ପ୍ରଧାନ।
ଆରଡି: ଆରଡିପୀଠ ବାବା ଆଖଣ୍ଡଳମଣିଙ୍କ ଶିବବିବାହ ପାଇଁ ଉତ୍ସବ ମୁଖର ପୀଠ। ସକାଳ ୧୦ଟାରେ ବରଧରା ଗମନ, ସଂଧ୍ଯା ୭ଟାରେ ବରାନୁଗମନ ଶୋଭାଯାତ୍ରା ହେବ। ଅପରାହ୍ଣ ୪ଟାରେ ଶ୍ରୀଜିଉଙ୍କ ରାଜରାଜେଶ୍ବର ବେଶ ହେବା ସହ ସଂଧ୍ଯା ୫ଟାରେ ଦିଅଁ ମଙ୍ଗୁଳା ନୀତି ହେବ। ଏଥିପାଇଁ ବରପିତା ଓ କନ୍ଯାପିତାଙ୍କ ଘରେ ବନ୍ଧୁପରିଜନଙ୍କର ଭିଡ ଲାଗିଛି।
ବାବା ଓ ମା ପାର୍ବତୀଙ୍କ ମାନବୀୟ ଲିଳା ଦେଖିବାକୁ ସମସ୍ତେ ଉତ୍ସାହିତ । ଭୋର ୪ଟାରେ ପହଡ ଖୋଲିବା ପରେ ମଙ୍ଗଳ ଆଳତୀ ସମ୍ପନ୍ନ ହେବା ପରେ ମହାସ୍ନାନ, ଘର୍ଷଣଲାଗି, ଜଳଲାଗି କରାଯାଇ ଦିଗମ୍ବର ବେଶରେ ସଜ୍ଜିତ କରାଯାଇ ପହିଲି ବାଲ୍ଯଭୋଗ ଲାଗି କରାଯିବ । ସକାଳ ୯ଟାରେ ପହଡଖିଆ ଅନ୍ନନୀତି ଲାଗି ହେବା ପରେ ୧୦ଟାରେ ବାବାଙ୍କୁ ବରଣ କରିବା ପାଇଁ ପାର୍ବତୀଙ୍କ ଭାଇ ସାଜିଥିବା ପବନପୁତ୍ର ହନୁମାନ ବରଧରା ବେଶରେ ଗମନ କରିବେ।
ଏହି ଶୋଭାଯାତ୍ରାରେ ରାଜ୍ଯରୁ ବିଭିନ୍ନ ପ୍ରାନ୍ତରରୁ ଆସିଥିବା ଘଣ୍ଟବାଦ୍ଯ ଓ ସଂକିର୍ତ୍ତନ ମଣ୍ଡଳୀଙ୍କ ନୃତ୍ଯରେ ମୁଖରିତ ହେବ ଶୋଭାଯାତ୍ରା। ସଂଧ୍ଯାରେ ବରାନୁଗମନ ଶୋଭାଯାତ୍ରାରେ କଳାହାଣ୍ଡିର କଟାପା ସହ ଢେଙ୍କାନାଳର ଦୁଲଦୁଲି ବାଦ୍ଯ କଲିକତାର ମୟୁରଚୂଳିଆ ବାଦ୍ଯ, କେନ୍ଦୁଝରର କଳସ ନୃତ୍ଯଙ୍କ ସହ ପ୍ରାୟ ୩୫ପ୍ରକାର ପାରମ୍ପରିକ ବାଦ୍ଯ ସହ ନୃତ୍ଯଶିଳ୍ପି ଯୋଗେ ଦେବେ।
ସମ୍ବଲପୁର: ଆଜି ପ୍ରସିଦ୍ଧ ଶୀତଳଷଷ୍ଠୀ ଯାତ୍ରା। ଦେବଦେବ ମହାଦେବଙ୍କ ହାତ ଧରିବେ ମାଆ ପାର୍ବତୀ।ଶୀତଳଷଷ୍ଠୀ ଯାତ୍ରା ପାଇଁ ଚଳଚଞ୍ଚଳ ସମ୍ବଲପୁର ସହର।
ଆରମ୍ଭ ହୋଇଛି ଗଣ୍ଠାଳଫିଟା କାଯ୍ୟକ୍ରମ । ଗତବର୍ଷ ହୋଇଥିବା ମା ପାର୍ବତୀଙ୍କ କନ୍ୟାପିତାମାତା ଗଣ୍ଠାଳ ଫିଟାଇ ମା ପାର୍ବତୀଙ୍କୁ ପୁଣି ମନ୍ଦିରକୁ ଆଣିବାର ପରମ୍ପରା ରହିଛି ଓ ନୂତନ ଭାବେ ଚୟନ କରାଯାଇଥିବା କନ୍ୟା ପିତାମାତା, ମା ପର୍ବତୀଙ୍କୁ ଘରକୁ ନେଇଥାନ୍ତି । ଏହା ହେଉଛି ଗଣ୍ଠାଳଫିଟା ନୀତି । ପରେ ବିଭିନ୍ନ ମନ୍ଦିର ଓ କନ୍ୟାପିତାମାତା ମାନଙ୍କ ଘରେ ଆୟୋଜିତ ହେବ ତେଲ ହଳଦୀ କାଯ୍ୟକ୍ରମ । ପ୍ରଥମ ପଯ୍ୟାୟରେ ନନ୍ଦ ପଡାରେ ଆରମ୍ଭ ହୋଇଛି କାଯ୍ୟକ୍ରମ ।
ସେପଟେ ଆରଡିର ବାବା ଆଖଣ୍ଡଳମଣିଙ୍କ ପୀଠରେ ଭୋର ୪ଟାରେ ପହଡ ଖୋଲିବା ପରେ ମଙ୍ଗଳ ଆଳତୀ, ମହାସ୍ନାନ, ଘର୍ଷଣଲାଗି, ଜଳଲାଗି କରାଯାଇ ଦିଗମ୍ବର ବେଶରେ ବାବାଙ୍କୁ ସଜ୍ଜିତ କରାଯାଇ ପହିଲି ବାଲ୍ଯଭୋଗ ଲାଗି କରାଯାଉଛି। ସକାଳ ୯ଟାରେ ପହଡଖିଆ ଅନ୍ନନୀତି ଲାଗି ହେବା ପରେ ୧୦ଟାରେ ବାବାଙ୍କୁ ବରଣ କରିବା ପାଇଁ ପାର୍ବତୀ ଭାଇ ସାଜିଥିବା ପବନପୁତ୍ର ହନୁମାନ ବରଧରା ବେଶରେ ଗମନ କରିବେ। ସଂଧ୍ଯାରେ ବରାନୁଗମନ ଶୋଭାଯାତ୍ରା ଅନୁଷ୍ଠିତ ହେବ। ଅପରାହ୍ନ ୪ଟାରେ ବାବାଙ୍କର ରାଜରାଜେଶ୍ବର ବେଶ ସହ ୫ଟାର ଦିଅଁ ମଙ୍ଗୁଳା ନୀତି ହେବ।
ଚେନ୍ନାଇ: ଆଇପିଏଲ-୨୦୨୩ ଫାଇନାଲରେ ଚେନ୍ନାଇ ସୁପର କିଙ୍ଗ୍ସ । କ୍ବାଲିଫାଇିଂ ମ୍ୟାଚରେ ଗୁଜରାଟକୁ ମାତ ଦେଲା ଚେନ୍ନାଇ । ୧୫ ରନରେ ଜିତିଲା ଧୋନୀ ବାହିନୀ । ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୧୭୨ ରନ କରିଥିଲା ଚେନ୍ନାଇ ସୁପର କିଙ୍ଗ୍ସ । ଜବାବରେ ୧୫୭ରନରେ ଅଲଆଉଟ ହୋଇଗଲା ଗୁଜରାଟ ଟାଇଟନ୍ସ । ଚେନ୍ନାଇ ତରଫରୁ ଓପନର ଋତୁରାଜ ଗାଏକ୍ବାଡ ୬୦ ରନ କରିଥିବାବେଳେ ଡେଭନ କନଓ୍ବେ ୪୦ରନ କରିଥିଲେ । ରବିନ୍ଦ୍ର ଜାଡେଜା ୨୨ରନ କରିବାକୁ ସକ୍ଷମ ହୋଇଥିଲେ । ଗୁଜରାଟ ତରଫରୁ ଶୁଭମନ ଗିଲ ୪୨ ରନ କରିଥିବାବେଳେ ରିଦ୍ଧିମାନ ଶାହା କରିଥିଲେ ୧୨ ରନ । ମାତ୍ର ୮ରନ କରି ପାଭିଲିୟନ ଫେରିଥିଲେ ଅଧିନାୟକ ହାର୍ଦ୍ଦିକ ପାଣ୍ଡିଆ । ଆସନ୍ତାକାଲି ଏଲଏସଜି ଏବଂ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଏଲିମିନେଟର ମ୍ୟାଚ ଅଛି । ଏମାନଙ୍କ ମଧ୍ୟରୁ ଯିଏ ଜିତିବ ଦ୍ୱିତୀୟ କ୍ୱାଲିଫାୟର ମ୍ୟାଚରେ ଗୁଜରାଟକୁ ଭେଟିବ ।
ପୁରୀ: ପୁରୀ ଗସ୍ତରେ 5T ସଚିବ ଭି କାର୍ତ୍ତିକେୟନ ପାଣ୍ଡିଆନ । ଆଜି ସେ ପୁରୀ ଆସିଥିବା ପ୍ରଥମେ ପରିକ୍ରମା ପ୍ରକଳ୍ପ କାର୍ଯ୍ୟର ଅନୁଧ୍ୟାନ କରିଛନ୍ତି । ପରେ ସେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରିଛନ୍ତି । ତେବେ ଶ୍ରୀମନ୍ଦିର ସମ୍ମୁଖରେ ଚାଲୁଥିବା ପରିକ୍ରମା ପ୍ରକଳ୍ପର ନିର୍ମାଣ କାର୍ଯ୍ୟ ଦେଖିବା ସହ ଅଧିକାରୀ ମାନଙ୍କ ସହ ଆଲୋଚନା କରିଥିଲେ । ଆଜି ନିକଟରେ ଥିବା ବଡ ଆଖଡା ମଠର କିଛି ଅଂଶ ଆଜି ଭଙ୍ଗା ଯାଇଥିବା ବେଳେ ତାହାକୁ ଅନୁଧ୍ୟାନ କରିବା ସହ ସନ୍ତୋଷ ବ୍ୟକ୍ତ କରିଥିଲେ । ଦିଆଯାଉଥିବା ଟାର୍ଗେଟ ଅନୁସାରେ କାର୍ଯ୍ୟ କରାଯାଉଥିବା ବେଳେ ଆଗକୁ ସ୍ନାନ ପୂର୍ଣ୍ଣିମାକୁ ନଜରରେ ରଖି ସିଂହ ଦ୍ବାର ସମ୍ମୁଖସ୍ତ କରାଯାଉଥିବା ନିର୍ମାଣ କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦେଇଥିଲେ ।
ଭୁବନେଶ୍ୱର: ପଶ୍ଚିମ ଓଡ଼ିଶାରେ ନିଆଁ ବର୍ଷା । ୪୩.୩ ଡିଗ୍ରୀ ସହିତ ରାଜ୍ୟର ସବୁଠୁ ଉତ୍ତପ୍ତ ସହର ହୋଇଛି ବଲାଙ୍ଗୀର । ୪୦ ଡିଗ୍ରୀ ଉପରେ ରାଜ୍ୟର ୨୨ ସହରର ତାପମାତ୍ରା । ୮ଟି ସହରର ତାତି ୪୨ ଡିଗ୍ରୀ ବା ତା ଉପରେ ରହିଛି । ସମ୍ବଲପୁରରେ ଦ୍ବିତୀୟ ସର୍ବାଧିକ ୪୨.୯ ଡିଗ୍ରୀ ତାପମାତ୍ରା ରେକର୍ଡ ହୋଇଥିବାବେଳେ ଝାରସୁଗୁଡ଼ାରେ ୪୨.୮ ଡିଗ୍ରୀ ତାତି ରେକର୍ଡ ହୋଇଛି । ସେହିପରି ସୋନପୁରରେ ୪୨.୬ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଏପଟେ ଜଳୁଛି ଭୁବନେଶ୍ବର । ଆଜି ରାଜଧାନୀରେ ୪୨.୬ ଡିଗ୍ରୀ ତାପମାତ୍ରା ରେକର୍ଡ ହୋଇଛି ।
ସେହିପରି ବରଗଡ଼ରେ ୪୨.୪, ହୀରାକୁଦରେ ୪୨.୧, ବାରିପଦାରେ ୪୨ ଡିଗ୍ରୀ ତାତି ରେକର୍ଡ ହୋଇଛି । ସୁନ୍ଦରଗଡ଼ ଓ ତାଳଚେରରେ ୪୧.୮, ଅନୁଗୁଳ ୪୧.୭, ରାଉରକେଲା ୪୧.୬, ଖୋର୍ଦ୍ଧା ୪୧.୫, ଢେଙ୍କାନାଳରେ ୪୧.୪, ବୌଦ୍ଧ ଓ କଟକରେ ୪୧, ଚାନ୍ଦବାଲିରେ ୪୦.୭, କେନ୍ଦ୍ରାପଡ଼ାରେ ୪୦.୬, ଯାଜପୁରରେ ୪୦.୫, ଜଗତସିଂହପୁରରେ ୪୦.୪, ଟିଟିଲାଗଡ଼ ଓ ନୂଆପଡ଼ାରେ ୪୦ ଡିଗ୍ରୀ ତାତି ରେକର୍ଡ ହୋଇଛି । ଆସନ୍ତା ୪ଦିନ ପର୍ଯ୍ୟନ୍ତ ରାଜ୍ୟରେ ଏହିଭଳି ପାଗ ଜାରି ରହିବ ।
ପଶ୍ଚିମ ତଥା ଆଭ୍ୟନ୍ତରୀଣ ଓଡ଼ିଶାରେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିବ । ପଶ୍ଚିମ-ଉତ୍ତର ପଶ୍ଚିମ ଦିଗରୁ ଶୁଷ୍କ ଉତ୍ତପ୍ତ ବାୟୁ କ୍ରମାଗତ ଭାବେ ରାଜ୍ୟକୁ ପ୍ରବେଶ କରୁଛି। ବାୟୁମଣ୍ଡଳରେ ଜଳୀୟବାଷ୍ପର ମାତ୍ରା କମିବାରୁ କାଳବୈଶାଖୀ ବର୍ଷା କମିଛି। ସୂର୍ଯ୍ୟଙ୍କ ପ୍ରଖର କିରଣ ପାଇଁ ତାପମାତ୍ରା ବଢୁଛି। ଉତ୍ତର ପଶ୍ଚିମ ବାୟୁ ତାପମାତ୍ରାକୁ ଆହୁରି ବଢାଉଛି। ତେବେ ଗ୍ରୀଷ୍ମ ପ୍ରବାହ ପାଇଁ ଦିନ ୧୧ଟା ଠାରୁ ୩ଟା ଯାଏଁ ଆବଶ୍ୟକତା ନଥିଲେ ଘରୁ ନବାହାରିବାକୁ ପରାମର୍ଶ ଦିଆଯାଇଛି ।
ଭୁବନେଶ୍ୱର: ଆଉ ମିଳିବନି ୫ ଟଙ୍କିଆ ରସଗୋଲା । ଦୀର୍ଘ ୩ଦିନ ବନ୍ଦ ରହିବା ପରେ ଖୋଲିଲା ପାହାଳ ମିଠା ମାର୍କେଟ । ମାର୍କେଟ ଖୋଲିବା ସହ ବିଭିନ୍ନ ମିଠାର ଦରବୃଦ୍ଧି ଘଟିଛି । କ୍ଷୀରଦର ବୃଦ୍ଧି ଯୋଗୁଁ ବ୍ୟବସାୟୀ ସଙ୍ଘ ଏପରି ନିଷ୍ପତ୍ତି ନେଇଥିଲା । କେବଳ ରସଗୋଲା ନୁହେଁ ଛେନା ଗଜା , ପୋଡ଼ ଆଉ ଅନ୍ୟାନ୍ୟ ଛେନା ଜାତୀୟ ମିଠାର ମଧ୍ୟ ଦର ବଢ଼ିଛି । ଚଳିତ ମାସ ଆରମ୍ଭରୁ ଓମଫେଡ ଦର ଲିଟର ପିଛା ୪ ଟଙ୍କା ବଢ଼ିଥିବା ବେଳେ ସେହି ଅନୁପାତରେ ଛେନା ଦର ମଧ୍ୟ ୨୦ଟଙ୍କା ବୃଦ୍ଧି ହୋଇଥିଲା ।
ତେବେ ଏହାକୁ ନେଇ ପାହାଳ ମିଠା ବ୍ୟବସାୟୀ ସଙ୍ଘ ପକ୍ଷରୁ ମିଠା ଦର ବୃଦ୍ଧି କରିବା ପାଇଁ ନିଷ୍ପତ୍ତି ନିଆଯାଇଥିଲା । ୩ ଦିନ ଧରି ମାର୍କେଟ ବନ୍ଦ ରହିବା ପରେ ବର୍ଦ୍ଧିତ ଦର ସହ ଦୋକାନ ଖୋଲିଛି । ତେବେ କୌଣସି ବିରୋଧ ନୁହେଁ ବରଂ ସାଧାରଣ ଲୋକଙ୍କୁ ଦର ବୃଦ୍ଧି ସମ୍ପର୍କରେ ସୂଚନା ଦେବାକୁ ମାର୍କେଟ ବନ୍ଦ କରାଯାଇଥିବା ନେଇ ବ୍ୟବସାୟୀ ସଙ୍ଘର ସଭାପତି ସୂଚନା ଦେଇଥିଲେ । ପାହାଳ ମିଠାର ଚାହିଦା ଖୁବ ଅଧିକ ଥିବାରୁ ଏଠାରୁ ପ୍ରତ୍ୟେକ ଦିନ ପ୍ରାୟ ୪ଟନ୍ ମିଠା ରାଜ୍ୟର ବିଭିନ୍ନ ଜିଲ୍ଲାକୁ ପଠା ଯାଇଥାଏ । ଏହା ବ୍ୟତୀତ ଏହି ମିଠା ବଜାର ଦର ଠାରୁ ଅନେକ ଶସ୍ତା ହୋଇଥିବାରୁ ସାମାନ୍ୟ ଦର ବୃଦ୍ଧି ଗ୍ରାହକଙ୍କୁ ପ୍ରଭାବିତ କରିବ ନାହିଁ ବୋଲି ଉଭୟ ବ୍ୟବସାୟୀ ଓ ଗ୍ରାହକ ପ୍ରକାଶ କରିଥିଲେ ।
ଭୁବନେଶ୍ୱର: ୟୁପିଏସସି ସିଭିଲ ସର୍ଭିସ ପରୀକ୍ଷାରେ ୬୭ ରାଙ୍କ ହାସଲ କରିଛନ୍ତି ଓଡ଼ିଶାର କସ୍ତୁରୀ ପଣ୍ଡା । ସେ ଘରୁ ରହି ପ୍ରସ୍ତୁତି କରି ଏହି ସଫଳତା ପାଇଛନ୍ତି । ନନ୍ଦିଘୋଷ ଟିଭିକୁ ପ୍ରତିକ୍ରିୟା ଦେଇ ସେ କହିଛନ୍ତି, ମୁଁ ଯେବେ ଲିଷ୍ଟ ଦେଖିଲି ବିଶ୍ୱାସ ହେଲାନି । ଏହା ମୋର ଦ୍ୱିତୀୟ ପ୍ରୟାସ ଥିଲା । ଗତଥର ଇଣ୍ଟରଭ୍ୟୁ ପର୍ଯ୍ୟନ୍ତ ଯାଇଥିଲି । ମାତ୍ର ୧୦, ୧୨ ମାର୍କ ପାଇଁ କଟିଯାଇଥିଲି । ବାପା ମାଆଙ୍କୁ ସିଲେକ୍ସନ ନେଇ ଯେବେ କହିଲି ସେମାନେ ଖୁସିରେ ଆତ୍ମହରା ହୋଇଯାଇଥିଲେ । ମା ବାପାଙ୍କ ଖୁସି ଆଜି ଦିନର ସବୁଠୁ ବଡ଼ ଗିଫ୍ଟ ମୋ ପାଇଁ ।
ବାପା ମାଆଙ୍କ ଆଶୀର୍ବାଦ ପାଇଁ ଏ ସଫଳତା ମୁଁ ପାଇଛି । ବାପାଙ୍କୁ ଦେଖି ଦେଖି ଲୋକଙ୍କ ସେବା କରିବି ବୋଲି ମନ ବଳାଇଥିଲି । ସେବେଠୁ ନିଷ୍ପତ୍ତି ନେଇଥିଲି ଆଇଏଏସ୍ ଅଧିକାରୀ ହୋଇ ଲୋକଙ୍କ ସେବା କରିବି । ମହିଳା ଏବଂ ଶିଶୁଙ୍କ ଶିକ୍ଷା ବିକାଶ ଦିଗରେ କାମ କରିବାକୁ ଚାହୁଁଛି । ଭଦ୍ରକରୁ ସ୍କୁଲି ଶେଷ କରିଥିଲି । ଯୁକ୍ତ ଦୁଇ ଡିଏଭି ଚନ୍ଦ୍ରଶେଖରପୁରରୁ ଶେଷ କରିଛି । ୟୁପିଏସସି ପ୍ରସ୍ତୁତି ଘରେ ରହି କରିଥିଲି । ମୁଁ ଓଡ଼ିଶା ଭିତରେ ରହି ଘରେ ପ୍ରସ୍ତୁତି କରି ଏହି ସଫଳତା ପାଇଛି ବୋଲି କହିଛନ୍ତି କସ୍ତୁରୀ ପଣ୍ଡା ।
ଭୁବନେଶ୍ୱର: ଝାରସୁଗୁଡ଼ାବାସୀଙ୍କୁ ମୁଖ୍ୟମନ୍ତ୍ରୀଙ୍କ ବଡ଼ ଉପହାର । ସମନ୍ବିତ ଆଦିବାସୀ ଉନ୍ନୟନ ସଂସ୍ଥାରେ ସାମିଲ ହେଲା ଝାରସୁଗୁଡ଼ା ଜିଲ୍ଲାର ଦୁଇଟି ବ୍ଲକ । ଲଇକେରା ଓ କିର୍ମିରା ବ୍ଲକକୁ ଆଇଟିଡିଏରେ ସାମିଲ କରିଛନ୍ତି ରାଜ୍ୟ ସରକାର । ଏହା ଓଡ଼ିଶାର ୨୩ତମ ସମନ୍ବିତ ଆଦିବାସୀ ଉନ୍ନୟନ ସଂସ୍ଥା । ଏହାକୁ ଝାରସୁଗୁଡ଼ା ସମନ୍ବିତ ଉନ୍ନୟନ ସଂସ୍ଥା ଭାବେ ନାମିତ କରାଯାଇଛି । ଲାଇକେର ଓ କିରିର୍ମିରା ବ୍ଲକର ସମସ୍ତ ଗାଁ ନୂତନ ITDA ଅଧୀନରେ ରହିବ। ଏହାଦ୍ବାରା ଏହି ଦୁଇଟି ବ୍ଲକରେ ଜନଜାତି ବିକାଶ ଓ କଲ୍ୟାଣ କାର୍ଯ୍ୟକ୍ରମ ତ୍ବରାନ୍ବିତ ହେବ ବୋଲି ମୁଖ୍ୟମନ୍ତ୍ରୀ ଆଶା ପ୍ରକାଶ କରିଛନ୍ତି ।
ଏଥିପାଇଁ ୯ ଟି ନୂଆ ପଦବୀ ସୃଷ୍ଟି କରିଛନ୍ତି ରାଜ୍ୟ ସରକାର । ନୂତନ ପଦବୀ ଗୁଡିକ ହେଲା ଜଣେ ଲେଖାଏ ପ୍ରକଳ୍ପ ପ୍ରଶାସକ, ସ୍ବତନ୍ତ୍ର ଅଧିକାରୀ, ଆସିଷ୍ଟାଣ୍ଟ ଏକଜିକ୍ୟୁଟିଭ ଇଞ୍ଜିନିୟର , ଆସିଷ୍ଟାଣ୍ଟ ଇଞ୍ଜିନିୟର , ଆକାଉଣ୍ଟାଣ୍ଟ, ହେଡ କ୍ଲର୍କ, କନିଷ୍ଠ ଷ୍ଟେନୋ ଗ୍ରାଫର, ବରିଷ୍ଠ କ୍ଲର୍କ ଓ ଜଣେ କନିଷ୍ଠ କ୍ଲର୍କ। ଲାଇକରା ଓ କିରିର୍ମିରା ବ୍ଲକରେ ମୁଖ୍ୟତଃ ଗଣ୍ଡ, ଭୁଇଆଁ, ଓ କିସାନ୍ ବର୍ଗର ଆଦିବାସୀ ବାସକରୁଥିବାବେଳେ ମୁଣ୍ଡା, କୋହ୍ଲ, ଓରାଓଁ, ଶବର, ଖରିଆ ଓ ସାରା ବର୍ଗର ଆଦିବାସୀ ମଧ୍ୟ ରହିଛନ୍ତି ।ଲାଇକେରାରେ ଆଦିବାସୀଙ୍କ ସଂଖ୍ୟା ୫୧.୭୮ ପ୍ରତିଶତ ହୋଇଥିବା ବେଳେ କିରିର୍ମିରାରେ ଏହା ୧୮.୪୬ ପ୍ରତିଶତ।
ନୂଆଦିଲ୍ଲୀ: ୟୁପିଏସସି ସିଭିଲ ସର୍ଭିସ-୨୦୨୨ ପରୀକ୍ଷାରେ ଇଶିତା କିଶୋର ସାରା ଦେଶରେ ଟପ୍ କରିଛନ୍ତି । ପଲିଟିକାଲ ସାଇନ୍ସ ଏବଂ ଇଣ୍ଟରନ୍ୟାସନାଲ ରିଲେସନ ତାଙ୍କର ଅପସନାଲ ସବଜେକ୍ଟ ଥିଲା । ଶ୍ରୀ ରାମ କଲେଜ ଅଫ୍ କମର୍ସ, ଦିଲ୍ଲୀ ବିଶ୍ୱ ବିଦ୍ୟାଳୟରୁ ଇକୋନୋମିକ୍ସରେ ଗ୍ରାଜୁଏସନ କରିଥିଲେ । ୟୁପିଏସସି ସିଏସି ୨୦୨୨ ପରୀକ୍ଷାରେ ଶୀର୍ଷ ସ୍ଥାନ ଅଧିକାର କରିଥିବା ଇଶିତା କିଶୋର କ୍ୟାରିୟରରେ ଟପ୍ପର ରହି ଆସିଛନ୍ତି । ଏୟାର ଫୋର୍ସ ବାଲ ଭାରତୀ ସ୍କୁଲ ଏବଂ ଶ୍ରୀରାମ କଲେଜ ଅଫ୍ କମର୍ସ ଦିଲ୍ଲୀରୁ ଅଧ୍ୟୟନ ପୂରା କରିଥିବା ଇଶିତା ଛୋଟବେଳୁ ହିଁ ମନସ୍ଥ କରିନେଇଥିଲେ ଯେ ସେ ଆଇଏଏସ୍ ଅଧିକାରୀ ହେବେ ବୋଲି ।
ଇଶିତା ଗଣମାଧ୍ୟମକୁ ପ୍ରତିକ୍ରୟା ଦେଇ ତାଙ୍କର ସଫଳତାର ଯାତ୍ରା ସମ୍ପର୍କରେ କହିଛନ୍ତି । ଇଶିତା କିଶୋରଙ୍କ ବାପା ଭାରତୀୟ ବାୟୁସେନାରେ ଜଣେ ଅଧିକାରୀ ଭାବେ କାର୍ଯ୍ୟରତ ଏବଂ ସମ୍ପୂର୍ଣ୍ଣ ପରିବାର ଗ୍ରେଟର ନଏଡାରେ ରହୁଛି । ଇଶିତା ୨୦୧୪ରେ ବାଲ ଭାରତୀରୁ ଦ୍ୱାଦଶ ପାଠ ପୂରା କରିବା ପରେ ୨୦୧୭ରେ ଶ୍ରୀରାମ କଲେଜ ଅଫ୍ କମର୍ସରୁ ଇକୋନୋମିକ୍ସ (ଅନର୍ସ)ରେ ଗ୍ରାଜୁଏସନ ପୂରା କରିଥିଲେ । ୟୁପିଏସସି ପରୀକ୍ଷାରେ ଏହା ତାଙ୍କର ତୃତୀୟ ପ୍ରୟାସ ଥିଲା । ଏହା ପୂର୍ବରୁ ସେ ଦୁଇଥର ପ୍ରିଲିମ୍ସରେ ବିଫଳ ହୋଇଥିଲେ । ଇଶିତା କହିଛନ୍ତି ଯେ ମୁଁ ଭାବିନଥିଲି ଯେ ମୁଁ ପ୍ରଥମ ସ୍ଥାନ ଅଧିକାର କରିବି ବୋଲି । ପ୍ରଥମେ ଯେବେ ମୁଁ ମୋ ରାଙ୍କ ଦେଖିଲି ବହୁତ ଖୁସି ହୋଇଯାଇଥିଲି ।
ପ୍ରଥମ ସ୍ଥାନ ଅଧିକାର କରିବା ପରେ ସାରା ପରିବାରରେ ଖୁସିର ଲହର ଦେଖାଯାଇଥିଲା । ଇଶିତା କହିଛନ୍ତି ମୁଁ ମୋ ବାପାଙ୍କୁ ସବୁବେଳେ ଦେଶ ସେବାରେ ତତ୍ପର ଥିବା ଦେଖିଛି । ଏଥିପାଇଁ ଛୋଟବେଳେ ହିଁ ମୋତେ ବାପାଙ୍କୁ ଦେଖି ମନକୁ ଆସିଥିଲା ଯେ ମୁଁ ମଧ୍ୟ ବଡ଼ ହୋଇ ଦେଶ ହିତରେ ହିଁ ଏପରି କୌଣସି କାମ କରିବି ଯାହାଫଳରେ ବାପାଙ୍କ ଭଳି ମାତୃଭୂମିର ସେବା କରିପାରିବି । ଇଶିତା କହିଛନ୍ତି ଯେ ସେ ଘରୁ ହିଁ ୟୁପିଏସସି ପାଇଁ ପ୍ରସ୍ତୁତି କରିଥିଲେ । ତାଙ୍କର ଅପସନାଲ ସବଜେକ୍ଟ ପଲିଟିକାଲ ସାଇନ୍ସ ଏବଂ ଇଣ୍ଟରନ୍ୟାସନାଲ ରିଲେସନ ଥିଲା ।
ଦୁଇଥର ବିଫଳ ହେବା ପରେ ଏଥର ଆଶା ଥିଲା ଯେ ସଫଳତା ପାଇବି ହେବେ ଶୀର୍ଷ ସ୍ଥାନ ପାଇବି ବୋଲି ଭାବିନଥିଲି । ମୋର ଏହି ସଫଳତା ପାଇଁ ପରିବାର ଲୋକଙ୍କ ଅକୁଣ୍ଠ ସମର୍ଥନ ରହିଥିଲା । ସମସ୍ତେ ମୋ ଉପରେ ଭରସା ରଖିଥିଲେ ଯେ ମୁଁ ସଫଳତା ପାଇବି ବୋଲି । ଖାସ୍ କରି ବାପା ମାଆଙ୍କ ହାତ ଥିବାରୁ ଏହି ସଫଳତା ମୁଁ ପାଇବାରେ ସକ୍ଷମ ହୋଇପାରିଛି । ଆଗକୁ ଦେଶ ସେବା ନିଷ୍ଠାର ସହ କରିବି ବୋଲି କହିଛନ୍ତି ଇଶିତା । ଯଦି ଗୋଟିଏ ଲକ୍ଷ୍ୟ ମନରେ ରଖିଛନ୍ତି ତେବେ ତା ପାଇଁ ଆନ୍ତରିକତା ରହିବା ଆବଶ୍ୟକ ଏବଂ ନିରନ୍ତର ତା ପାଇଁ ଉଦ୍ୟମ କରିବା ଆବଶ୍ୟକ ବୋଲି ଇଶିତା କହିଛନ୍ତି ।
