ନୂଆଦିଲ୍ଲୀ: ପ୍ରଥମେ କେନ୍ଦ୍ରମନ୍ତ୍ରୀ କିରେଣ ରିଜ୍ଜୁ ଆଉ ଏବେ ସତ୍ୟପାଲ ସିଂ ବାଘେଲ । ଦୁଇ ମନ୍ତ୍ରୀଙ୍କୁ ଆଇନ ମନ୍ତ୍ରାଳୟରୁ ହଟାଇଲେ ମୋଦି ସରକାର । କେନ୍ଦ୍ର ମନ୍ତ୍ରିମଣ୍ଡଳରେ ଆଜି ପୁଣି ଥରେ ଅଦଳବଦଳ ଘଟିଛି । ମୋଦି ସରକାରରେ ରାଷ୍ଟ୍ରମନ୍ତ୍ରୀ ସତ୍ୟପାଲ ସିଂ ବାଘେଲଙ୍କ ବିଭାଗ ବଦଳାଇ ଦିଆଯାଇଛି । ବାଘେଲ ଏବେ ସ୍ବାସ୍ଥ୍ୟ ମନ୍ତ୍ରାଳୟର ଦାୟିତ୍ବ ନେବେ । ପୂର୍ବରୁ ସେ ଆଇନ ମନ୍ତ୍ରାଳୟର ରାଷ୍ଟ୍ରମନ୍ତ୍ରୀ ଥିଲେ ।
କିଛି ଦିନ ପୂର୍ବରୁ ମୁସଲିମଙ୍କ ବିରୋଧରେ ବିବାଦୀୟ ଟିପ୍ପଣୀ ଦେଇ ଚର୍ଚ୍ଚାରେ ଥିଲେ ବିଜେପି ସାଂସଦ ତଥା ମନ୍ତ୍ରୀ ଏସପି ସିଂ ବାଘେଲ । ସେ କହିଥିଲେ ଯେଉଁ ମୁସଲମାନ ନିଜକୁ ଦୟାଳୁ ଦେଖାଉଛନ୍ତି ସେ କେବଳ ଅଭିନୟ କରୁଛନ୍ତି । ଏଭଳି ମୁସଲମାନ ଉପରାଷ୍ଟ୍ରପତି ବା ରାଜ୍ୟପାଳ ଭଳି ପଦ ପାଇବା ପାଇଁ ଉଦାରବାଦୀ ହେବାର ନାଟକ କରୁଛନ୍ତି । ଶୁଣିବାକୁ ମିଳୁଛି ଯେ ଏକଥା ସରକାରଙ୍କୁ ପସନ୍ଦ ଆସି ନଥିଲା ।
ପୂର୍ବୋତ୍ତର ରାଜ୍ୟ ଅରୁଣାଚଳ ପ୍ରଦେଶରୁ ବିଜେପି ସାଂସଦ ଥିବା ବାଘେଲ ଜୁଲାଇ ୨୦୨୧ ମନ୍ତ୍ରିମଣ୍ଡଳ ଅଦଳବଦଳରେ ରବିଶଙ୍କର ପ୍ରସାଦଙ୍କ ସ୍ଥାନରେ ଆଇନ ରାଷ୍ଟ୍ରମନ୍ତ୍ରୀ ଦାୟିତ୍ବ ନେଇଥିଲେ । ସେପଟେ କଲେଜିୟମ ବ୍ୟବସ୍ଥାକୁ ନେଇ ରିଜଜୁଙ୍କ ସର୍ବୋଚ୍ଚ ନ୍ୟାୟାଳୟ ସହ ବିବାଦ ଲାଗି ରହିଥିଲା । ଯାହାଫଳରେ ରିଜଜୁଙ୍କୁ ଆଇନରୁ ହଟାଇ ପୃଥିବୀ ବିଜ୍ଞାନ ମନ୍ତ୍ରୀ ଦାୟିତ୍ବ ଦିଆଯାଇଥିଲା ।
