ଭୁବନେଶ୍ୱର: ଚନ୍ଦ୍ରଶେଖରପୁର ଥାନା ପୋଲିସକୁ ସଫଳତା । ଲୁଟର ୧୨ ଘଣ୍ଟା ମଧ୍ୟରେ ଲୁଟେରାଙ୍କୁ ଧରିଲା ପୋଲିସ । ଗତକାଲି ଆପୋଲୋ ବିହାର ପ୍ଲଟ ନମ୍ବର ୭ରେ କେନ୍ଦ୍ରୀୟ ବିଦ୍ୟାଳୟ ପ୍ରଧାନ ଶିକ୍ଷକ ବିକ୍ରମ ବର୍ମାଙ୍କ ଘର ଝରକା ତାଡ଼ି ସୁନା ଓ ଟଙ୍କା ଲୁଟିଥିଲେ ଲୁଟେରା । ସିସିଟିଭି ଫୁଟେଜ ଆଧାରରେ ୩ ଜଣଙ୍କୁ ଗିରଫ କରିବା ସହ ଲୁଟ୍ ହୋଇଥିବା ସୁନା ଓ ଟଙ୍କା ଜବତ କରିଛି ପୋଲିସ ।
ପୁଣି ଥରେ ଉପରମୁହାଁ କରୋନା ଗ୍ରାଫ୍, ୨୪ ଘଣ୍ଟାରେ ଦେଶରେ ୫ ହଜାର ୩୫୭ ନୂଆ କେସ୍
ନୂଆଦିଲ୍ଲୀ: ପୁଣି ଥରେ ଉପରମୁହାଁ ହୋଇଛି କରୋନା ଗ୍ରାଫ୍ । ଗତ ୨୪ ଘଣ୍ଟାରେ ଦେଶରେ ୫ ହଜାର ୩୫୭ ନୂଆ କେସ୍ ଚିହ୍ନଟ ହୋଇଛି । ଅଧିକାଂଶ ରାଜ୍ୟରେ କେସ୍ ବଢ଼ୁଥିବା ବେଳେ କିଛି ରାଜ୍ୟରେ ମାସ୍କ ବାଧ୍ୟତାମୂଳକ କରାଯାଇଛି । ସତର୍କ ରହିବା ସହ କୋଭିଡ୍ ପ୍ରୋଟୋକଲ ପାଳନ କରିବା ପାଇଁ ଜନସାଧାରଣଙ୍କୁ ଅପିଲ କରାଯାଇଥିବା ବେଳେ ସରକାରୀ ଓ ବେସରକାରୀ ହସ୍ପିଟାଲରେ ମକଡ୍ରିଲ ପାଇଁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପରାମର୍ଶ ଦେଇଛି ।
ଆସନ୍ତା ସୋମବାର ଓ ମଙ୍ଗଳବାର ସାରା ଦେଶରେ ମକଡ୍ରିଲ କରାଯିବ । ଓମିକ୍ରମ ସବଭାରିଆଣ୍ଟ XBB1କୁ ନେଇ ସତର୍କ ରହିବାକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପରାମର୍ଶ ଦେଇଥିବା ବେଳେ ଏହି ଭୂତାଣୁ ଅଧିକ କ୍ଷତିକାରକ ନୁହେଁ ବୋଲି ବିଶେଷଜ୍ଞ କହିଛନ୍ତି । ସେପଟେ ହରିୟାଣା, କେରଳ ଓ ପୁଡୁଚେରୀରେ ମାସ୍କ ବାଧ୍ୟତାମୂଳକ କରାଯାଇଛି । ଦିଲ୍ଲୀର ସମସ୍ତ ହସ୍ପିଟାଲ, କ୍ଲିନିକକୁ କରୋନା ଟେଷ୍ଟିଂକୁ ଗୁରୁତ୍ବ ଦେବାକୁ ନିର୍ଦ୍ଦେଶ ଜାରି କରାଯାଇଛି ।
ଝାରସୁଗୁଡ଼ା ଉପନିର୍ବାଚନ ପାଇଁ ପ୍ରାର୍ଥୀ ପାଉନାହାନ୍ତି ବିରୋଧୀ, ଦ୍ବନ୍ଦରେ ବିଜେପି ଓ କଂଗ୍ରେସ
ଝାରସୁଗୁଡ଼ା: ଝାରସୁଗୁଡ଼ା ଉପନିର୍ବାଚନ ପାଇଁ ପ୍ରାର୍ଥୀ ପାଉନାହାନ୍ତି ବିରୋଧୀ । କାହାକୁ ପ୍ରାର୍ଥୀ କରିବେ ସେନେଇ ଦ୍ବନ୍ଦରେ ପଡ଼ିଛନ୍ତି । ଶାସକ ଦଳଠୁ ଏକଦମ୍ ପଛରେ ପଡ଼ିଯାଇଛନ୍ତି କଂଗ୍ରେସ ଓ ବିଜେପି । ବିଜେଡି ବିରୋଧରେ କାହାକୁ ପ୍ରାର୍ଥୀ କରିବେ ସେନେଇ ଜାରି ରଖିଛନ୍ତି କସରତ । ବିଜେପି କାହା ଉପରେ ଭରସା କରିପାରୁନଥିବାବେଳେ କଂଗ୍ରେସ ମଧ୍ୟ ନିଷ୍ପତ୍ତି ନେଇପାରୁନି । ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଁ ମଝିରେ ଆଉ ତିନିଦିନ ରହିଛି । ଏଭଳି ସ୍ଥଳେ ପ୍ରାର୍ଥୀ ଦେବା ନେଇ ଉଭୟ ବିରୋଧୀ ଦଳଙ୍କ ଟେନସନ ବଢ଼ିଛି ।
ଅନ୍ୟପଟେ ବହୁ ଆଗୁଆ ପ୍ରାର୍ଥୀ ଦେଇ ବିଜେଡି ପ୍ରଚାର ମଇଦାନକୁ ଓହ୍ଲାଇ ସାରିଲାଣି । ଗ୍ରାଉଣ୍ଡରେ ଲୋକଙ୍କ ପାଖକୁ ଯାଇ ରାଜ୍ୟ ସରକାରଙ୍କ ବିକାଶ ସହିତ ସ୍ବର୍ଗତ ନବ କିଶୋର ଦାସ କରିଥିବା ଉନ୍ନତିମୂଳକ କାର୍ଯ୍ୟକୁ ଆଧାର କରି ପ୍ରଚାର ଆରମ୍ଭ କରିଛନ୍ତି ଦୀପାଳି ଦାସ । ବଡ଼ ବ୍ୟବଧାନରେ ବିଜୟୀ ହେବାକୁ ଦଳ ରଣନୀତି କରିଛି । ୧୨ ଜଣ ନେତାଙ୍କୁ ପର୍ଯ୍ୟବେକ୍ଷକ ଦାୟିତ୍ବ ଦେଇ ପାଇଁ ରୋଡମ୍ୟାପ୍ ପ୍ରସ୍ତୁତ ହୋଇଛି । ପଦମପୁର ପରି ଝାରସୁଗୁଡ଼ାର ଗ୍ରାଉଣ୍ଡରେ ଲୋକଙ୍କ ପାଖରେ ପହଞ୍ଚି ବୃହତ ବ୍ୟବଧାନରେ ବିଜୟ ପାଇଁ ପଥ ପ୍ରସ୍ତତ ହୋଇଛି । ଉପନିର୍ବାଚନ ଫଳାଫଳ ଏକପାଖିଆ ହେବ ବୋଲି ବିଜେଡି ଦାବି କରିଛି ।
ଆଜି ବସିବ ରାଜ୍ୟ କ୍ୟାବିନେଟ ବୈଠକ, ୧୦ଟି ପ୍ରସ୍ତାବ ଉପରେ ବାଜିପାରେ ମୋହର
ଭୁବନେଶ୍ୱର: ଆଜି ବସିବ ରାଜ୍ୟ କ୍ୟାବିନେଟ ବୈଠକ । ଅପରାହ୍ନ ୧ଟା ୩୦ରେ ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ବସିବ । ଏଥିରେ ପ୍ରାୟ ୧୦ଟି ପ୍ରସ୍ତାବ ଉପରେ ମୋହର ବାଜିପାରେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜାପାନ ଗସ୍ତରେ ଥିବାରୁ ସେଠାରୁ ଭର୍ଚ୍ଚୁଆଲ ମୋଡରେ ଯୋଗଦେଇ ବୈଠକରେ ଅଧ୍ୟକ୍ଷତା କରିବେ । ଏହି ବୈଠକରେ ରାଜ୍ୟରେ ପୁଞ୍ଜିନିବେଶ ନେଇ କିଛି କମ୍ପାନୀର ଆବେଦନକୁ ମଞ୍ଜୁରୀ, କିଛି ନୀତିଗତ ନିଷ୍ପତ୍ତି ଉପରେ ବାଜିପାରେ କ୍ୟାବିନେଟ୍ ମୋହର । ତେବେ ବୈଠକର ଏଜେଣ୍ଡା ସମ୍ପର୍କରେ କିଛି ବିଧିବଦ୍ଧ ସୂଚନା ମିଳିନାହିଁ।
ଢେଙ୍କାନାଳ ଷ୍ଟେସନ ବଜାରରେ ସେକ୍ସ ରାକେଟ୍ ଠାବ
ଢେଙ୍କାନାଳ: ଢେଙ୍କାନାଳ ଟାଉନ ଥାନା ଷ୍ଟେସନ ବଜାରରେ ଥିବା ଏକ ଘରେ ସେକ୍ସ ସ୍କାଣ୍ଡାଲ ଚାଲୁଥିବା ଖବର ପାଇ ଚଢ଼ାଉ କରିଛି ପୋଲିସ । ୨ ଜଣ ଦେହଜୀବୀଙ୍କୁ ଧରିଛି ପୋଲିସ । ଦେହଜୀବୀଙ୍କୁ ଆଣିଥିବା ଦଲାଲ ତଥା ଘର ମାଲିକ ଶିବାଜି ମହାନ୍ତିକୁ ଗିରଫ କରିଛି ପୋଲିସ । ପୂର୍ବରୁ ଶିବାଜି ଓ ତାଙ୍କ ସ୍ତ୍ରୀ ଦେହଜୀବୀ ବେପାରରେ ଗିରଫ ହୋଇ ଜେଲ ଯାଇଥିଲେ। ଜେଲରୁ ମୁକୁଳିବାର କିଛି ଦିନ ପରେ ପୁଣି ବେପାର ଆରମ୍ଭ କରିଦେଇଥିଲେ।
ବୌଦ୍ଧ ଉପକାରାଗାରରେ ଝୁଲିପଡ଼ିଲେ କଏଦୀ
ବୌଦ୍ଧ: ବୌଦ୍ଧ ଉପକାରାଗାରରେ ଝୁଲିପଡ଼ିଲେ କଏଦୀ । ଗାଧୁଆ ଘରେ ବେକରେ ଗାମୁଛା ଲଗାଇ ଆତ୍ମହତ୍ୟା କରିଥିବା ସୂଚନା ମିଳିଛି । ବୌଦ୍ଧ ଉପକାରାଗାରରେ ଆଜୀବନ ସଜା କଟୁଥିଲେ କଏଦୀ । ମୃତକ ହେଲେ ବାଉଁଶୁଣି ଥାନା ଜମଘାଟିର ରବୀନ୍ଦ୍ର ମେହେର । ୨୦୧୫ରେ ଏକ ହତ୍ୟାକାଣ୍ଡରେ ରବୀନ୍ଦ୍ରଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା । ୨୦୧୭ରେ ଅଦାଲତ ରବୀନ୍ଦ୍ରଙ୍କୁ ଆଜୀବନ ସଜା ଶୁଣାଇଥିଲେ । ଆଜି ଜଣେ ମାଜିଷ୍ଟ୍ରେଟଙ୍କ ଉପସ୍ଥିତିରେ ଜେଲରୁ ଶବ ବ୍ୟବଚ୍ଛେଦ ପାଇଁ ନିଆଯିବ ।
ଏଥର କଲବଲ କରିବ ଖରା, ୨ରୁ ୩ ଡିଗ୍ରୀ ବଢ଼ିବ ତାପମାତ୍ରା
ଭୁବନେଶ୍ୱର: ଏଣିକି ବର୍ଷା ନୁହେଁ । ଡହ ଡହ ଖରାରେ କଲବଲ ହେବ ଓଡ଼ିଶା । ଆସନ୍ତା ୩ ଦିନ ଯାଏ ରାଜ୍ୟରେ ଲଗାତାର ବଢ଼ିବ ତାପମାତ୍ରା । ଅଧିକାଂଶ ସ୍ଥାନରେ ସ୍ବାଭାବିକଠାରୁ ୨ରୁ ୩ ଡିଗ୍ରୀ ଯାଏ ବୃଦ୍ଧି ପାଇବ ପାରା । କିଛି ସ୍ଥାନରେ ୪୦ ଡିଗ୍ରୀ ଉପରେ ତାପମାତ୍ରା ରେକର୍ଡ ହୋଇପାରେ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ତେବେ ଖରା ସହିତ ଅପରାହ୍ମରେ କାଳବୈଶାଖୀ ବର୍ଷା ହେବ । ଏଥିପାଇଁ ଆଜି ଉତ୍ତର ଓ ଦକ୍ଷିଣ ଓଡ଼ିଶାର ୧୪ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବର୍ଷା ସମୟରେ ଘଣ୍ଟାପ୍ରତି ୩୦ ରୁ ୪୦ କିମି ବେଗରେ ପବନ ବହିବ ।
ଅନ୍ୟପକ୍ଷରେ ୧୧ ତାରିଖରୁ ପାଗରେ ଆସିବ ପରିବର୍ତ୍ତନ । କାଳବୈଶାଖୀ ପ୍ରଭାବ କମିବା ସହିତ ପଶ୍ଚିମରୁ ଶୁଷ୍କ ଓ ଉତ୍ତପ୍ତ ବାୟୁ ପ୍ରଭାବିତ ହେବ । ଫଳରେ ତାପମାତ୍ରାରେ ଅହେତୁକ ବୃଦ୍ଧି ହେବ । ସ୍ବାଭାବିକଠାରୁ ୩ରୁ ୫ ଡିଗ୍ରୀ ବଢ଼ିବ ପାରା । କିଛି ସ୍ଥାନରେ ପାରଦ ୪୦ ଡିଗ୍ରୀ ଛୁଇଁବା ସମ୍ଭାବନା ରହିଛି ।
ଆଜି ଭାରତ ଆସୁଛନ୍ତି ୟୁକ୍ରେନ ଅତିରିକ୍ତ ବିଦେଶ ମନ୍ତ୍ରୀ, ସମର୍ଥନ ପାଇଁ କରିପାରନ୍ତି ନିବେଦନ
ନୂଆଦିଲ୍ଲୀ: ଆଜିଠୁ ୪ ଦିନିଆ ଭାରତ ଗସ୍ତରେ ଆସୁଛନ୍ତି ୟୁକ୍ରେନର ଅତିରିକ୍ତ ବିଦେଶ ମନ୍ତ୍ରୀ ଏମିନି ଡିଜାପୋର୍ଭା । ଋଷ ଓ ୟୁକ୍ରେନ ଯୁଦ୍ଧ ଆରମ୍ଭ ହେବା ପରଠାରୁ ୟୁକ୍ରେନର କୌଣସି ମନ୍ତ୍ରୀ ପ୍ରଥମ ଥର ପାଇଁ ଭାରତ ଆସୁଛନ୍ତି । ଏମିନି ଏହି ଗସ୍ତ ସମୟରେ ଭାରତର ବୈଦେଶିକ ମନ୍ତ୍ରାଳୟ ସହ ବ୍ୟାପକ ଆଲୋଚନା କରିବେ ବୋଲି ସ୍ପଷ୍ଟ ହୋଇଛି । ଏଥିସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ୟୁକ୍ରେନ୍ ଯିବା ପାଇଁ ନିମନ୍ତ୍ରଣ କରିବେ ବୋଲି ଜଣାପଡ଼ିଛି । ଭାରତ ଓ ୟୁକ୍ରେନ ମଧ୍ୟରେ ଦ୍ବିପାକ୍ଷିକ ସମ୍ପର୍କ ଓ ବିଶ୍ବ ସମସ୍ୟା ନେଇ ଆଲୋଚନା ହେବ ।
ଋଷର ଆକ୍ରମଣ ଯୋଗୁଁ ୟୁକ୍ରେନର ହୋଇଥିବା କ୍ଷତି ସମ୍ପର୍କରେ ସବିଶେଷ ତଥ୍ୟ ଦେବେ ଏମିନି । ଗତବର୍ଷ ଭାରତ ସରକାର ୟୁକ୍ରେନ ରାଷ୍ଟ୍ରପତି ଜେଲେନସ୍କିଙ୍କ ସହ ଆଲୋଚନା କରିଥିଲେ । ଯୁଦ୍ଧ ସମୟରେ କୌଣସି ସହାୟତାର ଆବଶ୍ୟକ ପଡ଼ିଲେ ସହାୟତା ଦିଆଯିବ ବୋଲି ଭାରତ ସରକାର କହିଥିଲେ । ଭାରତ ଋଷ ଓ ୟୁକ୍ରେନରୁ ସମଦୂରତା ରକ୍ଷା କରୁଥିବା ବେଳେ ୟୁକ୍ରେନ ପ୍ରତି ଯଥେଷ୍ଟ ସମର୍ଥନ ପାଇଁ ଏମିନି ନିବେଦନ କରିପାରନ୍ତି । ବର୍ତ୍ତମାନ ପର୍ଯ୍ୟନ୍ତ ଋଷର ଆକ୍ରମଣକୁ ଭାରତ ନିନ୍ଦା କରିନଥିବା ବେଳେ ୟୁକ୍ରେନ କୂଟନୈତିକ ପ୍ରସ୍ତାବ ରଖିପାରେ ବୋଲି ବୈଦେଶିକ ବିଶେଷଜ୍ଞ ଅନୁମାନ କରିଛନ୍ତି ।
ନୂଆ ଓଡ଼ିଶାର ପରିକଳ୍ପନା: ସୋସିଆଲ ମିଡିଆ ହେବ ମୁଖ୍ୟ ମାଧ୍ୟମ
ଭୁବନେଶ୍ବର: ନୂଆ ଓଡ଼ିଶାର ପରିକଳ୍ପନା ପାଇଁ ସୋସିଆଲ ମିଡିଆ ହେବ ମୁଖ୍ୟ ମାଧ୍ୟମ । ନିର୍ବାଚନ ପାଇଁ ନୁହେଁ ବରଂ ଲୋକଙ୍କ ସମସ୍ୟା ଓ ଏହାର ସମାଧାନ ଲାଗି ସୋସିଆଲ ମିଡିଆକୁ ପ୍ରମୁଖ ଅସ୍ତ୍ର କରିବ ବିଜେଡି । ଏହାସହ ବିରୋଧୀଙ୍କ ଅପପ୍ରଚାରର ସିଧାସଳଖ ଜବାବ ସୋସିଆଲ ମିଡ଼ିଆ ଜରିଆରେ ଦେବାକୁ ଦିଆଯାଇଛି ପ୍ରଶିକ୍ଷଣ । ଫୋକସରେ ରହିବ ଫେସବୁକ , ଟୁଇଟର ଓ ଇନଷ୍ଟାଗ୍ରାମ ।
ସୋସିଆଲ ମିଡିଆ ସାଜିବ ସଶକ୍ତ ଓଡ଼ିଶାର ମୁଖ୍ୟ ଅସ୍ତ୍ର । ଫେସବୁକ୍, ଇନଷ୍ଟାଗ୍ରାମ, ଟ୍ବିଟର ଓ ହ୍ବାଟସଆପ୍ ପରି ସୋସିଆଲ ମିଡିଆ ପ୍ଲାଟଫର୍ମରେ ସକ୍ରିୟ ହେବେ ବିଜେଡି ନେତା ଓ କର୍ମୀ । ବିକାଶର ଚିତ୍ର ଓ ସରକାରଙ୍କ ବିଭିନ୍ନ ସଫଳ ଯୋଜନାକୁ ପ୍ରତ୍ୟେକ ବ୍ୟକ୍ତିଙ୍କ ପାଖରେ ପହଞ୍ଚାଇବ ଦଳ । ଜନସେବା ସହ ଲୋକଙ୍କ ସମସ୍ୟା ସୋସିଆଲ ମିଡ଼ିଆରେ ଶୁଣି ସମାଧାନର ବାଟ ଫିଟାଇବେ ନେତା । ଖାସ ଏଥିଲାଗି ବିଜେଡ଼ି ବିଧାୟକ, ସାଂସଦ, ନିର୍ବାଚିତ ପ୍ରତିନିଧିଙ୍କୁ ଦିଆଯାଇଛି ପ୍ରଶିକ୍ଷଣ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୃଢ ନେତୃତ୍ବରେ କ୍ରୀଡ଼ା, ଶିଳ୍ପ ଓ କୃଷି କ୍ଷେତ୍ରରେ ସମଗ୍ର ବିଶ୍ବରେ ସ୍ବତନ୍ତ୍ର ପରିଚୟ ସୃଷ୍ଟି କରିଛି ଓଡିଶା । ପ୍ରଶିକ୍ଷଣ ନେବା ପରେ ସୋସିଆଲ ମିଡ଼ିଆରେ ପୂରା ଆକ୍ଟିଭ ରହିବା ଲାଗି ବିଜେଡି ନେତାଙ୍କ ମନରେ ଜୋସ । ବିଶ୍ବରେ ଇନଷ୍ଟାଗ୍ରାମର ଅଧିକ ବ୍ୟବହାର ହେଉଥିବାରୁ ଏଥିରେ ସକ୍ରିୟ ହେବାକୁ ଦଳୀୟ ଶିବିରରେ ବଢିଛି ଉତ୍ସାହ ।
ଲୋକଙ୍କ ସହ ଅଧିକ ଜଡ଼ିତ ହେବା କ୍ଷେତ୍ରରେ ସୋସିଆଲ ମିଡିଆ ସାଜିବ ପଜିଟିଭ ପ୍ଲାଟଫର୍ମ । ବିରୋଧୀଙ୍କ ବହୁ ଅପପ୍ରଚାରକୁ ମଧ୍ୟ ସୋସିଆଲ ମିଡ଼ିଆ ଜରିଆରେ ଜବାବ ଦେଇ ଲୋକଙ୍କ ଭରସା ଜିଣିଛି ଦଳ ।
ପ୍ରଥମ ଥର ପାଇଁ ଛଉ ନୃତ୍ୟରେ ନାଚିବେ ମହିଳା
ବାରିପଦା: ବିଶ୍ବ ପ୍ରସିଦ୍ଧ ଛଉ ନୃତ୍ୟରେ ପ୍ରଥମ ଥର ପାଇଁ ସାମିଲ ହେବେ ମହିଳା । ମୟୂରଭଞ୍ଜର ପ୍ରସିଦ୍ଧ ପୁରୁଷ ପ୍ରାଧାନ୍ୟ ଛଉ ନୃତ୍ୟକଳାରେ ପାରଙ୍ଗମ ଦେଖାଇବେ ସାଧାରଣ ଗୃହିଣୀ । ଗ୍ରାମାଞ୍ଚଳରେ ଥିବା ସ୍ବୟଂ ସହାୟକ ଗୋଷ୍ଠୀର ମହିଳାମାନେ ପ୍ରଥମ ଥର ପାଇଁ ପ୍ରଚାର ପ୍ରସାର ଦାୟିତ୍ବ ନେବା ସହ ନିଜେ ମଧ୍ୟ ନାଚିବେ । ଏଥିପାଇଁ ବିଧିବଦ୍ଧ ନୃତ୍ୟ ପ୍ରଶିକ୍ଷଣ ନେବା ଆରମ୍ଭ କରିଛନ୍ତି ଏସ୍ଏଚଜି ମହିଳା । ମୟୂରଭଞ୍ଜ ଜିଲ୍ଲା ମୋରଡ଼ା ବ୍ଲକର ଚିତ୍ରଡ଼ା ଗାଁରୁ ଦେଖିବାକୁ ମିଳିଛି ଏମିତି ଦୃଶ୍ୟ ।
ବିଶ୍ବ ପ୍ରସିଦ୍ଧ ଛଉ ନୃତ୍ୟକୁ ଆଉ ପାଦେ ଆଗେଇ ନେବେ ଏସଏଚଜି ମାଆ । ପୁରୁଷ ପ୍ରାଧାନ୍ୟ ଛଉ ନୃତ୍ୟରେ ପାଦରେ ପାଦ ମିଳାଇବେ ମହିଳା । ମହିଳା ସ୍ବୟଂ ସହାୟକ ଗୋଷ୍ଠୀ ଏବେ ଦେଶ ବିଦେଶରେ ପହଞ୍ଚିଲେଣି । ଏସଏଚଜିରୁ ଏସଏମ୍ଇ ହୋଇଥିବା ସାଧାରଣ ଗୃହିଣୀମାନେ ପ୍ୟାରିସ, ଲଣ୍ଡନ ଭଳି ସହରରେ ନିଜର ଉପସ୍ଥିତି ଜାହିର କଲେଣି । ଏବେ ଆଉ ଏକ ଭଲ ଖବର ପାଇଁ ଚର୍ଚ୍ଚାରେ ମହିଳା ସ୍ବୟଂ ସହାୟକ ଗୋଷ୍ଠୀ । ନିଜ ଅଞ୍ଚଳର ପରମ୍ପରା, ସଂସ୍କୃତିକୁ ବଜାୟ ରଖିବା ସହ ଏହାର ପ୍ରଚାର ପ୍ରସାର ଦାୟିତ୍ବ ନେଇଛନ୍ତି ଏସ୍ଏଚଜି ।
ମୟୂରଭଞ୍ଜ ଜିଲ୍ଲା ମୋରଡ଼ା ବ୍ଲକ ଚିତ୍ରଡ଼ା ଗାଁର। କେବଳ ପୁରୁଷଙ୍କ ଦ୍ବାରା ହେଉଥିବା ଛଉ ନୃତ୍ୟରେ ମହିଳାମାନେ ମାରିଛନ୍ତି ଏଣ୍ଟ୍ରି । ଆଗରୁ ଛଉ ନୃତ୍ୟ କେବଳ ପୁରୁଷଙ୍କ ଦ୍ବାରା ହେଉଥିଲା ଏବଂ ଏଥିରେ ପୁରୁଷମାନେ ହିଁ ନାରୀ ଭୂମିକାରେ ଅବତୀର୍ଣ୍ଣ ହେଉଥିଲେ । ହେଲେ ଏବେ ସମୟ ବଦଳିଛି । ଏଥର ଚଇତି ପର୍ବକୁ ଅଧିକ ଉତ୍ସବ ମୁଖରିତ କରିବାକୁ ଏସଏଚଜି ମହିଳାମାନେ କେବଳ ପ୍ରଚାର ପ୍ରସାର ଦାୟିତ୍ବ ନେଇନାହାନ୍ତି, ବରଂ ନୃତ୍ୟକଳାରେ ସାମିଲ ହେବାକୁ ନେଉଛନ୍ତି ପ୍ରଶିକ୍ଷଣ । ନୃତ୍ୟକଳାରେ ପୁରୁଷଙ୍କ ଭୂମିକା ନିଭାଇବେ ମହିଳାମାନେ ।
୯୦ ଦଶକର ଶେଷ ଆଡ଼କୁ ଯଦିଓ ମହିଳା କଳାକାରମାନେ ଏଥିରେ ସାମିଲ ହେଉଥିଲେ, ହେଲେ କେବଳ ମହିଳାଙ୍କୁ ନେଇ ସ୍ବତନ୍ତ୍ର ଗ୍ରୁପ ନଥିଲା । ପ୍ରଥମ ଥର ପାଇଁ ଚିତ୍ରଡ଼ାରେ ମହିଳାମାନେ ଛଉ ନୃତ୍ୟର ସମ୍ପୂର୍ଣ୍ଣ ଭାର ସମ୍ଭାଳିଛନ୍ତି । ୫୦ରୁ ଅଧିକ ମହିଳା ନିଜ ଘର କାମ ସାରିବା ପରେ ନୃତ୍ୟଶିକ୍ଷା ଗ୍ରହଣ କରୁଛନ୍ତି । ଦିନକୁ ୩ ଘଣ୍ଟା ନୃତ୍ୟଶିକ୍ଷା ପାଇଁ ନିଯୁକ୍ତ ହୋଇଛନ୍ତି ସ୍ବତନ୍ତ୍ର ଶିକ୍ଷକ । ପ୍ରସିଦ୍ଧ ଚିତ୍ରଡ଼ାର ଉଡ଼ା ପର୍ବରେ ଅନୁଷ୍ଠିତ ହେଉଥିବା ଛଉନୃତ୍ୟ ପ୍ରତିଯୋଗିତାରେ ସାମିଲ ହେବେ ଏସଏଚଜି ଗ୍ରୁପ । ଛଉନୃତ୍ୟ ଶିଖିବା ପ୍ରଥମେ କଷ୍ଟ ଲାଗୁଥିଲା, ହେଲେ ନିରନ୍ତର ଉଦ୍ୟମ ବଳରେ ଧିରେ ଧିରେ ଭୟ ଦୂରେଇଗଲାଣି ବୋଲି ସ୍ବୟଂ ସହାୟିକା ଗୋଷ୍ଠୀର ମହିଳା କହିଛନ୍ତି ।
ଛଉ ନୃତ୍ୟ ମୟୂରଭଞ୍ଜର ପରିଚୟ ହୋଇଥିବା ବେଳେ ଏଥିରେ କିଛି ଭିନ୍ନତା ଓ ସ୍ବତନ୍ତ୍ରତା ଆଣିବାକୁ ମହିଳା ସ୍ବୟଂ ସହାୟକ ଗୋଷ୍ଠୀର ମାଆମାନେ ପ୍ରତ୍ୟକ୍ଷ ଭାବେ ସାମିଲ ହେବା ଏକ ପ୍ରଶଂସନୀୟ ପଦକ୍ଷେପ ।