ବାଲେଶ୍ୱର: ମଦ୍ୟପ ସ୍ବାମୀର ଉନ୍ମତ୍ତ କାଣ୍ଡ । ମଦଖାଇ ସ୍ତ୍ରୀକୁ ପିଟି ପିଟି ମାରିଦେଲା ସ୍ବାମୀ । ଜଳେଶ୍ବର ରାଇବଣିଆ ଥାନା ଅନ୍ତର୍ଗତ ଗହିରା ବନ୍ଧ ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା । ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଘରୋଇ କଳହକୁ ନେଇ ସ୍ବାମୀ ସ୍ତ୍ରୀଙ୍କ ମଧ୍ଯରେ କଳହ ଚାଲିଥିଲା ।
ଫଳରେ ସ୍ତ୍ରୀ ମଞ୍ଜୁଲତାକୁ ମଦ୍ୟପ ସ୍ବାମୀ ଦୁର୍ଗା ମୁର୍ମୁ ଠେଙ୍ଗାରେ ପିଟି ପିଟି ମାରି ଦେଇଥିବା ଅଭିଯୋଗ ହେଇଛି । ଘଟଣାସ୍ଥଳରେ ସ୍ଥାନିୟ ଲୋକେ ପହଞ୍ଚି ମଦ୍ୟପ ସ୍ବାମୀକୁ ରଶିରେ ବାନ୍ଧି ଦେଇଥିଲେ । ରାଇବଣିଆ ପୋଲିସ ପହଞ୍ଚି ସ୍ବାମୀ ଦୁର୍ଗା ମୁର୍ମୁକୁ ଗିରଫ କରି ତଦନ୍ତ ଚଳାଇଛି ।
ଭୁବନେଶ୍ୱର: ଆଜି ଓଡ଼ିଶା କ୍ରୀଡ଼ା ଇତିହାସରେ ଯୋଡି ହେବ ଆଉ ଏକ ସ୍ବର୍ଣ୍ଣିମ ଅଧ୍ୟାୟ । ଓଡ଼ିଶା ହେବ ଭାରତର ଟେନିସ ଭିତ୍ତିଭୂମିର ସର୍ବଶ୍ରେଷ୍ଠ ରାଜ୍ୟ । କଳିଙ୍ଗ ଷ୍ଟାଡିୟମ ପରିସରରେ ଉଦଘାଟିତ ଅତ୍ୟାଧୁନିକ ଟେନିସ କୋର୍ଟ । ସନ୍ଧ୍ୟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ ଉଦଘାଟନ କରିବେ । ନୂତନ ଷ୍ଟାଡିୟମରେ ଏକାସଙ୍ଗେ ୧୫ଶହ ଦର୍ଶକ ବସି ମ୍ୟାଚ୍ ଦେଖିପାରିବେ ।
ଷ୍ଟାଡିୟମ ପରିସରରେ ବିଶ୍ବସ୍ତରୀୟ କନଫରେନ୍ସ ରୁମ, ଲାଉଂଜ, ମେଡିକାଲ ରୁମ, ଟୁର୍ଣ୍ଣାମେଣ୍ଟ ଡାଇରେକ୍ଟର ରୁମ, ବ୍ରଡକାଷ୍ଟ ରୁମ, ମିଡିଆ ସେଣ୍ଟର, ଡ୍ରେସିଂ ରୁମ ବି ଅଛି । ନୂଆ ଷ୍ଟାଡିୟମ ସହ ଅନ୍ୟ ୧୦ଟି ଟେନିସ କୋର୍ଟ ମଧ୍ୟ କଳିଙ୍ଗ ଷ୍ଟାଡିୟମ ପରିସରରେ ପୂର୍ବରୁ ରହିଛି । ଯେଉଁଠି ୬ଟି ସିନ୍ଥେଟିକ କୋର୍ଟ ଓ ୪ଟି କ୍ଲେ କୋର୍ଟ ମଧ୍ୟ ରହିଛି।
ନୂଆ ଷ୍ଟାଡିୟମରେ ଖେଳାଯିବ ଏସିଆନ୍ ଟେନିସ ଚାମ୍ପିୟନସିପ। ଆସନ୍ତା ଏପ୍ରିଲ ୪ତାରିଖରୁ ୧୪ ତାରିଖ ପର୍ଯ୍ୟନ୍ତ ପ୍ରତିଯୋଗିତା ଚାଲିବ । ଜୁନିୟର ସ୍ତରରେ ହେଉଥିବା ପ୍ରତିଯୋଗିତାରେ ଏସିଆର ୧୫ଟି ଦେଶ ଅଶଂଗ୍ରହଣ କରିବେ । ଆସନ୍ତା ସେପ୍ଟେମ୍ବରରେ ଖେଳାଯିବାକୁ ଥିବା ଡେଭିସ କପ ଆୟୋଜନ ପାଇଁ ଓଡ଼ିଶା ବିଡ଼ିଂରେ ଭାଗନେବ ସୂଚନା ମିଳିଛି ।
ଭୁବନେଶ୍ୱର: ଆଜି ପବିତ୍ର ଅଶୋକାଷ୍ଟମୀ । ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥଯାତ୍ରା । ଅଶୋକାଷ୍ଟମୀ ତିଥିରେ ପ୍ରଭୁ ଶ୍ରୀଲିଙ୍ଗରାଜ ଭଉଣୀ ରୁକ୍ମିଣୀଙ୍କୁ ରଥରେ ନେଇ ରାମନବମୀ ଯାତ୍ରା ବୁଲିବାକୁ ଯିବେ। ଅଣଲେଉଟା ରୁକୁଣା ରଥରେ ନିଜେ ସୃଷ୍ଟିକର୍ତ୍ତା ବ୍ରହ୍ମା ସାରଥୀ । ନୀତି ଅନୁସାରେ ଦିନ12ଟାରେ ମଙ୍ଗଳ ଆଳତି, 2ଟା ରେ ଭୋଗ ଲାଗି ଓ ପହଣ୍ଡି ପରେ 3ଟା ସମୟରେ ହେବ ରଥଟଣା । ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ବ୍ୟାପକ ବ୍ୟବସ୍ଥା କରାଯାଇଛି ।
ପୋଲିସ, ବିଏମସି, ମନ୍ଦିର ପ୍ରଶାସନ ଓ ବିଭିନ୍ନ ସେବାୟତ ନିଯୋଗଙ୍କ ମଧ୍ୟରେ ସମନ୍ୱୟ ରକ୍ଷା କରାଯାଇଛି । ପ୍ରଚଣ୍ଡ ଖରା ଯୋଗୁଁ ପାନୀୟ ଜଳ ଯୋଗାଣ, ରାସ୍ତାଘାଟ, ବିଦ୍ୟୁତ, ପରିମଳ ଆଦି ଦାୟିତ୍ୱ ବିଏମସି ନେଇଛି । ସୁର୭ା ଦାୟିତ୍ବରେ 12 ପ୍ଲାଟୁନ ପୋଲିସ ଫୋର୍ସ ଓ ବରିଷ୍ଠ ଅଧିକାରୀ ନିୟୋଜିତ ହୋଇଛନ୍ତି । ଏହା ସହ ଟ୍ରାଫିକ ବ୍ୟବସ୍ଥାରେ ସାମାନ୍ୟ ପରିବର୍ତ୍ତନ କରାଯାଇଛି ।
ରଥଟଣା ବେଳେ ପରମ୍ପରା ଆଳରେ ଡାଉକ ଦ୍ୱାରା ବୋଲାଯାଉଥିବା ଅଶ୍ଳୀଳ ଭାଷାକୁ ବନ୍ଦ କରିବାକୁ ପୋଲିସ ପକ୍ଷରୁ ନିବେଦନ କରାଯାଇଛି । 5ଦିନ ଧରି ଆୟୋଜିତ ଯାତ୍ରାରେ ରଥ ଲିଙ୍ଗରାଜ ମନ୍ଦିର ନିକଟରୁ ବାହାରି ମାଉସୀ ମାଆ ଛକରେ ଥିବା ରାମେଶ୍ବର ମନ୍ଦିର ନିକଟକୁ ଯାଇଥାଏ । ଏହି 5ଦିନ ସନ୍ଧ୍ୟାରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେବ ।
କଟକ: ପୁଣି ଚିକିତ୍ସା ବିଜ୍ଞାନ ଜଗତରେ ଇତିହାସ ରଚିଲା ଏସସିବି ମେଡିକାଲ । ଏସସିବି ମେଡିକାଲରେ ମୃତ୍ୟୁ ବରଣ କରିଥିବା ଜଣେ ରୋଗୀଙ୍କ 2ଟି କିଡ଼ନୀ ଆତ୍ମୀୟ ଦାନ କରିବା ପରେ ଏହି କିଡ଼ନୀ ଦୁଇ ଜଣ ରୋଗୀଙ୍କ ଶରୀରରେ ପ୍ରତିରୋପଣ କରାଯାଇଛି । ଏହା ପୂର୍ବରୁ ଏସସିବି ୟୁରୋଲୋଜି ବିଭାଗରେ 4ଟି କାଡାଭରିକ ଟ୍ରାନ୍ସପ୍ଲାଣ୍ଟ ହୋଇଛି । ତେବେ ସମସ୍ତ ଘଟଣାରେ ଘରୋଇ ହସ୍ପିଟାଲରେ ମୃତ୍ୟୁ ବରଣ କରିଥିବା ରୋଗୀଙ୍କ କିଡନୀ ଏସସିବି ଅଣାଯାଇ ଏହି ବିରଳ ସର୍ଜରୀ କରାଯାଇଛି ।
ପ୍ରଥମ ଥର ପାଇଁ ଏସସିବିରେ ମୃତ୍ୟୁ ବରଣ କରିଥିବା ବ୍ୟକ୍ତିଙ୍କ କିଡନୀ ଦାନ ଯୋଗୁ ଏଠାରେ ଏହି ସର୍ଜରୀ ସଫଳ ହୋଇଛି । ସୂଚନା ମୁତାବକ, ସୋମବାର ଏସସିବିରେ ଭର୍ତ୍ତି ହୋଇଥିବା ଜଗତପୁର ଅଞ୍ଚଳର ତନୁଜା କରଙ୍କ ବ୍ରେନ ଡେଡ ହେବାରୁ ଗତକାଲି ତାଙ୍କର ପରଲୋକ ହୋଇଥିଲା । ଏସସିବି ଅଧିକ୍ଷକ ନ୍ୟୁରୋ ସର୍ଜନ ଡାକ୍ତର ସୁଧାଂଶୁ ଶେଖର ମିଶ୍ର, ନେଫରୋଲୋଜି ମୁଖ୍ୟ ଡାକ୍ତର ଅରୁଣା ଆଚାର୍ଯ୍ୟ, ୟୁରୋଲୋଜି ମୁଖ୍ୟ ଡାକ୍ତର ସମୀର ସ୍ବାଇଁ, ଡାକ୍ତର ସବ୍ୟସାଚୀ ପଣ୍ଡା, ଡାକ୍ତର ସଞ୍ଜୟ ଚୌଧୁରୀ ପ୍ରମୁଖ କିଡନୀ ଦାନ ପାଇଁ ଅନୁରୋଧ କରିଥିଲେ ।
ପରିବାର ଲୋକଙ୍କ ସମ୍ମତି ପରେ ତନୁଜାଙ୍କ ଶରୀରରୁ ଦୁଇଟି କିଡନୀ କଢ଼ାଯାଇ ଅନ୍ୟ ଦୁଇ କିଡନୀ ରୋଗୀଙ୍କ ଶରୀରରେ ପ୍ରତିରୋପଣ କରାଯାଇଥିଲା । ଏହି ଦୁଇ ଜଣ ବ୍ୟକ୍ତି ହେଲେ ଝାରସୁଗୁଡାର ଆଲୋକ ବୋଡାକ ଓ ସୂର୍ଯ୍ୟରଞ୍ଜନ ସାହୁ । ଆଲୋକଙ୍କର ଏହା ପ୍ରଥମ ଓ ସୂର୍ଯ୍ୟଙ୍କର ଏହା ଦ୍ୱିତୀୟ କିଡନୀ ପ୍ରତିରୋପଣ ବୋଲି ଜଣାପଡ଼ିଛି । ଅସ୍ତ୍ରୋପଚାର ସଫଳତାର ସହିତ ଶେଷ ହୋଇଥିବା ଡାକ୍ତର ସୂଚନା ଦେଇଛନ୍ତି । ଏହି ବିରଳ ଅସ୍ତ୍ରୋପଚାରରେ ଡାକ୍ତର ଅରୁଣାଙ୍କ ସହିତ ୧୭ ଜଣ ମେଡିକାଲ ଟିମ ସହଯୋଗ କରିଥିଲେ ।
ମାଲକାନଗିରି: ବଣ୍ଡାଘାଟିକୁ ବସ୍, ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ସୁଯୋଗ। ସ୍ବାଭିମାନ ଅଞ୍ଚଳର ଗ୍ରାଉଣ୍ଡ ଜିରୋରେ ବିକାଶ ସମୀକ୍ଷା କରି ଜନସାଧାରଣଙ୍କୁ ଏହି ପ୍ରତିଶ୍ରୁତି ଦେଇଛନ୍ତି ଫାଇଭ-ଟି ସଚିବ ବିକେ ପାଣ୍ଡିଆନ। ମାଲକାନଗିରି ସୀତାକୁଣ୍ଡରେ ସ୍ଥାନୀୟ ପରମ୍ପରା ଅନୁସାରେ ପୂଜାର୍ଚ୍ଚନା କରିବା ପରେ ପର୍ଯ୍ୟଟନସ୍ଥଳୀର ବିକାଶ ନେଇ ଅନୁଧ୍ୟାନ କରିଥିଲେ ଫାଇଭ-ଟି ସଚିବ। ରାସ୍ତା ନିର୍ମାଣ ସହିତ ଅନ୍ୟାନ୍ୟ ଅନୁଷଙ୍ଗିକ ବିକାଶ ନେଇ ଆଲୋଚନା କରିଥିଲେ। ପରେ ମୁଦୁଲିପଡାର ବଣ୍ଡା ଘାଟିରେ ପହଞ୍ଚି ଲୋକଙ୍କ ସମସ୍ୟା ସମ୍ପର୍କରେ ସିଧାସଳଖ ଆଲୋଚନା କରିଥିଲେ।
ଜନସାଧାରଣଙ୍କ ଦାବି ଅନୁସାରେ ଖୁବଶୀଘ୍ର ବଣ୍ଡା ଘାଟିକୁ ବସ ଗଡ଼ିବା ସହ ଖଇରପୁଟରେ ଯୁକ୍ତ ଦୁଇ କଲେଜ ପ୍ରତିଷ୍ଠା ପାଇଁ ପ୍ରତିଶ୍ରୁତି ଦେଇଛନ୍ତି ପାଣ୍ଡିଆନ। ଏହି ଅବସରରେ ବଣ୍ଡା ମ୍ୟୁଜିମର ଅଗ୍ରଗତି ସମ୍ପର୍କରେ ସେ ତଦାରଖ କରିଥିଲେ। ମ୍ୟୁଜିୟମରେ ବଣ୍ଡା ସଂପ୍ରଦାୟର ବିଭିନ୍ନ ସଂସ୍କୃତି ସଂରକ୍ଷଣ ହୋଇ ରହିବ। ଏହାସହ ମାଲକାନଗିରିରେ ବିଭିନ୍ନ ପ୍ରକଳ୍ପର ସମୀକ୍ଷା କରିଛନ୍ତି ପାଣ୍ଡିଆନ। ମାଥିଲିରେ ପହଞ୍ଚିବା ପରେ ସେଠାରୁ ଶିବସାଗର ଯାଇ ଏହାର ସୌନ୍ଦର୍ଯ୍ୟକରଣ ସମ୍ପର୍କରେ ଅନୁଧ୍ୟାନ କରିଥିଲେ ।
ପରେ ସପ୍ତଧାରା ଜଳସେଚନ ପ୍ରକଳ୍ପ, ପ୍ରସ୍ତାବିତ ରେଳ ଲାଇନର ସମୀକ୍ଷା କରିଥିଲେ। ହନ୍ତଳଗୁଡ଼ା ଭିୟୁ ପଏଣ୍ଟର ନିର୍ମାଣ ଅନୁଧ୍ୟାନ କରି ଲୋକଙ୍କ ସହ ଆଲୋଚନା କରିଥିଲେ ଫାଇଭ-ଟି ସଚିବ। ଏହାପରେ ବିଏସଏଫ କ୍ୟାମ୍ପରେ ଯବାନଙ୍କ ସହିତ ମାଓ ମୁକାବିଲା ସମ୍ପର୍କରେ ଆଲୋଚନା କରିବା ସହ ବଡ଼ପଦାରେ ସାଧାରଣ ଲୋକଙ୍କ ସମସ୍ୟା ବୁଝିଥିଲେ। ଆଜି ସ୍ବାଭିମାନ ଅଞ୍ଚଳରେ ଫାଇଭ-ଟି ସଚିବ ରାତ୍ର ରହଣି ପରେ ଆସନ୍ତାକାଲି ମଧ୍ୟ ଅନେକ ଉନ୍ନୟନ କାର୍ଯ୍ୟର ସମୀକ୍ଷା କରିବେ।
ଭୁବନେଶ୍ୱର: ସ୍ୱାସ୍ଥ୍ୟ ନିର୍ଦ୍ଦେଶିକା ଶୀଲିନୀ ପଣ୍ଡିତଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ବୈଠକ । ଅକ୍ଟୋବର ୨୦୨୩ ସୁଦ୍ଧା ତାଳଚେରରେ ୩୩୦ ଶଯ୍ୟା ବିଶିଷ୍ଟ ମେଡିକାଲ କଲେଜ କାର୍ଯ୍ୟକ୍ଷମ ହେବା ନେଇ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି ।
ରାଜ୍ୟର ସ୍ୱାସ୍ଥ୍ୟ ସେବାରେ ଯୋଡି ହେବାକୁ ଯାଉଛି ଆଉ ଏକ ନୂଆ ଅଧ୍ୟାୟ । କେବଳ ଚିକିତ୍ସା ନୁହେଁ ମେଡିକାଲ କଲେଜ ମଧ୍ୟ ହେବାକୁ ରାଜ୍ୟ ସରକାର ନେଇଛନ୍ତି ନିଷ୍ପତ୍ତି । ଏନେଇ ସୂଚନା ଦେଇଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶିକା ଶୀଲିନୀ ପଣ୍ଡିତ । ଏହା ସହିତ ମିଶିବ ନେହେରୁ ଶତାବ୍ଦୀ ହସ୍ପିଟାଲର 100 ବେଡ୍ । ମେ ମାସ ଶେଷ ସୁଦ୍ଧା ଡାକ୍ତର ନିଯୁକ୍ତି ହେବେ ।
ଭୁବନେଶ୍ୱର: ଆଇଏନଏସ ଚିଲିକାରେ ଅଗ୍ନିବୀର ମାନଙ୍କ ପାସିଙ୍ଗ ଆଉଟ୍ ପରେଡ । ଭାରତୀୟ ନୌସେନାରେ ଯୋଗ ଦେଇଥିବା ଅଗ୍ନିବୀରଙ୍କ ପ୍ରଥମ ବ୍ୟାଚର ପାସିଂଆଉଟ୍ ପ୍ୟାରେଡ ଅନୁଷ୍ଠିତ ହୋଇଛି । ପ୍ରଥମ ବ୍ୟାଚରେ ୨୫ ଶହ ୮୫ ଜଣ ରହିଛନ୍ତି । ଏଥିରେ ୨୭୩ ଜଣ ମହିଳା ଅଗ୍ନିବୀର ରହିଛନ୍ତି । ଦକ୍ଷ ସୈନିକ ହେବା ପାଇଁ ସମସ୍ତେ ନେଇଛନ୍ତି ପ୍ରଶିକ୍ଷଣ ।
ସୈନିକ ହୋଇ ଦେଶ ପାଇଁ କିଛି କରିବାର ଇଚ୍ଛା ପ୍ରତିରକ୍ଷା ବାହିନୀକୁ ଏଠାକୁ ଟାଣି ଆଣିଛି । 4 ମାସର ଟ୍ରେନିଂ ପରେ ଆଜି ଅଗ୍ନିବୀରଙ୍କ ପାସିଂ ଆଉଟ୍ ପରେଡ୍ ଅନୁଷ୍ଠିତ ହୋଇଛି । କାର୍ଯ୍ୟକ୍ରମରେ ଚିଫ୍ ଅଫ୍ ନାଭାଲ ଷ୍ଟାପ୍ ଯୋଗଦେଇଥିଲେ । ତେବେ ଅଗ୍ନିବୀରଙ୍କ ପାଇଁ ଏହା କେବଳ ଏକ ଟ୍ରେନିଂ ନଥିଲା ବରଂ ନୌସେନାରେ ନୂଆ ଜୀବନ ଆରମ୍ଭ କରିବାର ଗର୍ବ ଓ ଗୌରବର ଦିନ ଥିଲା ।
ସମ୍ମିଳିତ ପରେଡରେ ଅଭିବାଦନ ଗ୍ରହଣ କରି ନୌସେନା ମୁଖ୍ୟ ଆଡମିରାଲ ଆର. ହରିକୁମାର ଅଗ୍ନିବୀରଙ୍କୁ ଭାରତୀୟ ନୌସେନାର ମୂଲ୍ୟବୋଧ ଓ ଗରିମାକୁ ପାଥେୟ କରି ଦେଶ ଗଠନରେ ଗୁରୁତ୍ବପୂର୍ଣ୍ଣ ଭୁମିକା ନେବାକୁ ଆହ୍ବାନ ଦେଇଥିଲେ । ଏହି ଅବସରେ ଶ୍ରେଷ୍ଟ ଅଗ୍ନିବୀରଙ୍କୁ ସମ୍ମାନିତ କରିଥିଲେ ଚିଫ୍ ଅଫ୍ ନାଭାଲ ଷ୍ଟାଫ । ଏକମାତ୍ର ଆର୍ମଡ ଫୋର୍ସ ଭାବେ ନୌସେନା ହିଁ ଆଇଏନଏସ ଚିଲିକାରେ ମହିଳାଙ୍କୁ ଅଗ୍ନିବୀର ଭାବେ ତାଲିମ ଦେବା ଶେଷ କରିଛି ।
ନୂଆଦିଲ୍ଲୀ: ରାହୁଲ ଗାନ୍ଧୀଙ୍କ ସଦସ୍ୟତା ପଦ ରଦ୍ଦ ପରେ ଲୋକସଭା ବାଚସ୍ପତି ଓମ ବିର୍ଲାଙ୍କ ବିରୋଧରେ ଅନାସ୍ତା ପ୍ରସ୍ତାବ ଆଣିବେ ବିରୋଧୀ । ଆସନ୍ତା ସୋମବାର ବିରୋଧୀ ଦଳ ଏକାଠି ହୋଇ ଅନାସ୍ତା ପ୍ରସ୍ତାବ ଆଣିବେ । ରାହୁଲଙ୍କ ସଦସ୍ୟତା ରଦ୍ଦ କରି ଲୋକସଭା ବାଚସ୍ପତି ଓମ ବିର୍ଲା ଗଣତନ୍ତ୍ରକୁ ହତ୍ୟା କରିଛନ୍ତି । କଂଗ୍ରେସ ପକ୍ଷରୁ ଏଭଳି ଅଭିଯୋଗ କରାଯାଇଛି ।
କଂଗ୍ରେସ ଅନ୍ୟ ବିରୋଧୀ ଦଳଙ୍କ ସହ ଆଲୋଚନା କରୁଛି । ଅନାସ୍ତା ପ୍ରସ୍ତାବ ପାଇଁ ୫୦ ଜଣ ସଦସ୍ୟଙ୍କ ସମର୍ଥନ ରହିବା ନିହାତି ଆବଶ୍ୟକ । ସଂସଦରେ ଏବେ ହଟ୍ଟଗୋଳ ସ୍ଥିତି ଜାରି ରହିଥିବା ବେଳେ ଅନାସ୍ତା ପ୍ରସ୍ତାବ ଆଣିବା ଉପରେ ପ୍ରଶ୍ନ ଉଠାଇଛି ବିଜେପି ।
କେନ୍ଦୁଝର: ଜିଲ୍ଲାସାରା ମହାବଳ ବାଘ ଆତଙ୍କ । ଘଟଗାଁ ରେଞ୍ଜ ଅଟେଇ ସଂରକ୍ଷିତ ଜଙ୍ଗଲରେ ଟ୍ରାପ୍ କ୍ୟାମେରା ରେ ପ୍ରଥମେ ମହାବଳ ବାଘ ଠାବ ହେବା ଓ ପରେ ଗତ ଶୁକ୍ରବାର ବଡ଼ଜାମପଶିରେ ମହାବଳ ବାଘ ୪ଟି ମଇଁଷି ମାରି ଖାଇବା ପରେ ସ୍ଥାନୀୟ ଲୋକଙ୍କ ମନରେ କୋକୁଆ ଭୟ ସୃଷ୍ଟି ହୋଇଛି । ଗତକାଲି ରାତିରେ ଟିକିରା ଗାଁର ନାରାୟଣ ରାଉତ ବଳଦ ଖୋଜି ଯାଉଥିବା ବେଳେ ଗାଁ ନିକଟରେ ଏକ ବାଘ ଦେଖିଥିଲେ । କେବଳ ସେ ନୁହେଁ, ଗାଁର ଅନ୍ୟ ୨ ଜଣ ଲୋକ ମଧ୍ୟ ବାଘ ଦେଖିଥିଲେ ।
ପରେ ଅନ୍ୟ ଲୋକମାନେ ବାଘର ପାଦ ଚିହ୍ନ ଦେଖିଥିଲେ । ଏହା ପ୍ରଚାର ହେବା ପରେ ଘଟଗାଁ ରେଞ୍ଜର ଆଜି ଘଟଣାସ୍ଥଳ ପରିଦର୍ଶନ କରି ନାରାୟଣ ଓ ଗାଁର ଅନ୍ୟମାନଙ୍କ ସହିତ ବାଘ ସମ୍ପର୍କରେ ଆଲୋଚନା କରିଥିଲେ । ଏହାପରେ ସେ ଏହା ବାଘ ନୁହେଁ, ବରଂ ହେଟାବାଘ ବୋଲି କହିଥିଲେ । ଅଟେଇ ଜଙ୍ଗଲରେ ମହାବଳ ବାଘଥିବା କଥା ପ୍ରଚାର ହେବା ପରେ ଲୋକେ ଭୟଭୀତ ହୋଇ ପଡ଼ିଛନ୍ତି । ହେଲେ, ମହାବଳ ବାଘ ଜଙ୍ଗଲ ଛାଡ଼ି ବାହାରକୁ ଆସିବାର ସମ୍ଭାବନା ନଥିବା ବେଳେ, ଲୋକଙ୍କର ଭୟଭୀତ ହେବାର କୋୖଣସି କାରଣ ନଥିବା ସେ କହିଛନ୍ତି ।
ନୂଆଦିଲ୍ଲୀ: ଦୀର୍ଘ ୧୮ ବର୍ଷର ସଂଗ୍ରାମ ପରେ ଡ୍ରାଇଭିଂ ଲାଇସେନ୍ସ ପାଇଲେ ୬୯ ବର୍ଷୀୟ ମହିଳା। ଦକ୍ଷିଣା କୋରିଆର ଜିୟୋଞ୍ଜୁ ସହରର ବାସିନ୍ଦା ହେଉଛନ୍ତି ଚା ସା-ସୁନ୍। ସେ ୯୬୦ ଥର ଡ୍ରାଇଭିଂ ଟେଷ୍ଟ ଦେଇଥିଲେ । ପ୍ରାୟ ୩ ବର୍ଷ ମଧ୍ୟରେ ସପ୍ତାହକୁ ୫ ଥର ଟେଷ୍ଟ ଦେଇଥିଲେ। ସେ ନିଜର ପ୍ରଥମ ଟେଷ୍ଟ ୨୦୦୫ ମସିହାରେ ଦେଇଥିଲେ ।
ରିପୋର୍ଟ ଅନୁସାରେ ପରବର୍ତ୍ତୀ ସମୟରେ ସେ ସପ୍ତାହକୁ ଦୁଇ ଥର ଲିଖିତ ଟେଷ୍ଟ ଦେବା ଆରମ୍ଭ କରିଥିଲେ। ଏଥିରେ ପାସ୍ ହେବାପରେ ସେ ପ୍ରାଟିକାଲ୍ ଟେଷ୍ଟ ଦେଇଥିଲେ। ପାଖାପାଖି ୧୦ ଥର ପ୍ରୟାସ କରିବା ପରେ ସେ ଡ୍ରାଇଭିଂ ଲାଇସେନ୍ସ ପାଇଥିଲେ । ଯାହାକୁ ମିଶାଇ ସେ ୯୬୦ ଥର ପରୀକ୍ଷା ଦେଇଥିଲେ ।
ରିପୋର୍ଟ ଅନୁସାରେ ସା-ସୁନ୍ ଏଥିପାଇଁ ପାଖାପାଖି ୧୧ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ସେ ପନିପରିବା ବିକି ପରିବାର ପ୍ରତିପୋଷଣ କରୁଥିବା ବେଳେ ଗାଡ଼ି ଚଳାଇବା ତାଙ୍କ ପାଇଁ ନିହାତି ଜରୁରୀ ଥିଲା। ଏଥିପାଇଁ ବାରମ୍ବାର ବିଫଳ ହେବା ସତ୍ୱେ ସେ କେବେ ହାର ମାନିନଥିଲେ ସେ। ଏନେଇ ତାଙ୍କ ଡ୍ରାଇଭିଂ ଇନଷ୍ଟ୍ରକ୍ଟର କହିଛନ୍ତି, ତାଙ୍କୁ ଲାଇସେନ୍ସ ମିଳିବା ପରେ ବହୁତ ଖୁସି ଲାଗୁଛି ।
ଏହି ଖବର ଭାଇରାଲ୍ ହେବା ପରେ ସେ ସେଲିବ୍ରିଟି ପାଲଟିଯାଇଛନ୍ତି । ଏମିତିକି କାର୍ କମ୍ପାନୀ ହୁଣ୍ଡାଇ ପକ୍ଷରୁ ତାଙ୍କୁ ୧୧ ଲକ୍ଷ ଟଙ୍କାର ଏକ କାର୍ ମଧ୍ୟ ଗିଫ୍ଟ କରାଯାଇଛି । ସେ ଦକ୍ଷିଣ କୋରିଆ କମ୍ପାନୀ ‘ହୁଣ୍ଡାଇ’ର ଏକ ବିଜ୍ଞାପନରେ ନଜର ଆସିଛନ୍ତି ।
