ସୁବର୍ଣ୍ଣପୁର: ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ରେଳ ଫାଟକରେ ଟ୍ରେନ ଧକ୍କାରେ ଯୁବକଙ୍କ ମୃତ୍ୟୁ । ମୃତ ବ୍ୟକ୍ତି ହେଲେ ପୂର୍ବତନ ବଲାଙ୍ଗିର ସାଂସଦ ବାଳଗୋପାଳ ମିଶ୍ରଙ୍କ ସାନ ପୁଅ ଅବିନାଶ ମିଶ୍ର ବୋଲି ଜଣାପଡିଛି। ମର୍ଣ୍ଣିଂ ଓ୍ବାକରେ ଗଲା ବେଳେ ଡୁଙ୍ଗୁରିପାଲି ଫାଟକରେ ତାଙ୍କୁ ଟ୍ରେନ ଧକ୍କା ଦେଇଥିଲା । ଡୁଙ୍ଗୁରିପାଲି – ରାମପୁର ରୋଡ୍ ରେଳ ଫାଟକ ଭୋର ୫ଟାରେ ପୁରୀ – ଦୁର୍ଗ ଇଣ୍ଟେରସିଟି ଏକ୍ସପ୍ରେସ ଅବିନାଶଙ୍କୁ ଧକ୍କା ଦେଇଥିଲା । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ଶବକୁ ଜବତ କରି ତଦନ୍ତ ଜାରି ରଖିଛି ।
ଇସ୍ରାଏଲରେ ଗୁଳିକାଣ୍ଡ, ୮ ମୃତ
ଜେରୁଜେଲମ: ଇସ୍ରାଏଲ ଜେରୁଜେଲମ ସାଇନାଗେଗ୍ୟୁ ସହରରେ ଗୁଳିକାଣ୍ଡ । ଆତତାୟୀଙ୍କ ଆଖିବୁଜା ଗୁଳିମାଡରେ ୮ ଜଣ ନାଗରିକଙ୍କ ମୃତ୍ୟୁ ହୋଇଛି । ଗୁଳିମାଡରେ ୧୦ ଗୁରୁତର ହୋଇଛନ୍ତି । ସମସ୍ତ ଆହତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ଅନ୍ୟପଟେ ସୁରକ୍ଷାକର୍ମୀଙ୍କ ପାଲଟା ଫାୟାରିଂରେ ଆତତାୟୀ ନିହତ ହୋଇଛି । ଘଟଣାକୁ ଇସ୍ରାଏଲ ପ୍ରାଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ନିନ୍ଦା କରିଛନ୍ତି । ତେବେ ଆକ୍ରମଣ ନେଇ କୌଣସି ସଙ୍ଗଠନ ନିଜକୁ ଦାୟୀ କରିନାହାନ୍ତି ।
ସୂଚନା ଅନୁଯାୟୀ, ନେଭ ୟାକୋଭ ନିକଟସ୍ଥ ସଚ୍ଚିବାଳୟ ଉପରେ ଆତତାୟୀଙ୍କ ଆକ୍ରମଣ ହୋଇଛି। ଗତ କିଛି ବର୍ଷ ମଧ୍ୟରେ ଏଭଳି ଆକ୍ରମଣ ଦେଖିବାକୁ ମିଳୁଛି । ଏହି ଘଟଣାଟି ଗତକାଲି ରାତି ୮ଟାରେ ଘଟିଛି । ଏଥିରେ ୧୦ ଜଣ ଆହାତ ହୋଇଥିବା ବେଳେ ୮ ଜଣଙ୍କର ମୃତ୍ୟୁ ହୋଇଛି ।
ରାହୁଲ ଗାନ୍ଧିଙ୍କ ସୁରକ୍ଷା ବ୍ୟବସ୍ଥାରେ ତ୍ରୁଟି, ଧଷେଇ ପସିଲା ଭିଡ଼
ଜମ୍ମୁ: ଜମ୍ମୁ କାଶ୍ମୀରରେ କଂଗ୍ରେସ ନେତା ରାହୁଲ ଗାନ୍ଧିଙ୍କ ଭାରତ ଯୋଡ଼ୋ ଯାତ୍ରା କାଳରେ ସୁରକ୍ଷା ବ୍ୟବସ୍ଥାରେ ବଡ଼ଧରଣର ତ୍ରୁଟି ପରିଲକ୍ଷିତ ହୋଇଛି। ଶୁକ୍ରବାର ଦିନ ଭିଡ଼ ରାହୁଲଙ୍କ ସୁରକ୍ଷା ଘେରକୁ ଭାଙ୍ଗି ତାଙ୍କ ପାଖକୁ ଚାଲି ଆସିଥିଲେ । ଯାହାକୁ ନେଇ ଶୁକ୍ରବାର ଦିନ ଯାତ୍ରାକୁ ଅଧାରେ ସ୍ଥଗିତ କରିବାକୁ ପଡ଼ିଥିଲା । ଯାତ୍ରା ସ୍ଥଗିତ ରଖାଯିବା ପରେ ରାହୁଲ ସାମ୍ବାଦିକ ସମ୍ମିଳନୀ କରି ପୋଲିସ ବିରୋଧରେ ଦାୟିତ୍ୱହିନତାର ଅଭିଯୋଗ ଆଣିଥିଲେ। ସେ କହିଥିଲେ ଯେ, ପୋଲିସର ସୁରକ୍ଷା ବ୍ୟବସ୍ଥା ଭାଙ୍ଗି ଯାଇଥିଲା । ଯେଉଁ ପୋଲିସ ଭିଡ଼କୁ କଣ୍ଟ୍ରୋଲ କରିବାକୁ ଆସିଥିଲେ ସେମାନେ ଘଟଣା ଘଟିବା ବେଳେ ପାଖରେ ନଥିଲେ କିମ୍ବା ସେଠାରୁ ଚାଲିଯାଇଥିଲେ ।
ରାହୁଲ କହିଥିଲେ ଯେ, ତାଙ୍କ ସହିତ ଥିବା ସୁରକ୍ଷାକର୍ମୀ ଆଉ ଅଧିକ ବାଟ ଚାଲି ପାରିବେ ନାହିଁ ବୋଲି କହିଥିଲେ । ଅନ୍ୟପକ୍ଷରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ କହିଛନ୍ତି ଯେ, ରାହୁଲଙ୍କ ସୁରକ୍ଷା ବ୍ୟବସ୍ଥା ଭାଙ୍ଗିବା ଚିନ୍ତାଜନକ । ଦେଶ ଆଗରୁ ଦୁଇ ଜଣ ପ୍ରଧାନମନ୍ତ୍ରୀଙ୍କୁ ସୁରକ୍ଷା ବ୍ୟବସ୍ଥାରେ ତ୍ରୁଟି ପାଇଁ ହରାଇଛି । ଆମେ କଡ଼ା ସୁରକ୍ଷା ବ୍ୟବସ୍ଥା ଚାହୁଁଛୁ ।
ସୂଚନାଯୋଗ୍ୟ ଯେ, ଯାତ୍ରା ଆଜି ଶ୍ରୀନଗରଠାରୁ ୩୩ କିଲୋମିଟର ଦୂରରେ ଥିବା ଅବନ୍ତିପୁରାରେ ପହଞ୍ଚିବ ।
ମୁଖ୍ୟମନ୍ତ୍ରୀଙ୍କ ଅକ୍ଷଧ୍ୟତାରେ ବସିବ ବିଜେଡି ସଂସଦୀୟ ଦଳ ବୈଠକ
ଭୁବନେଶ୍ବର: ଆଜି ବସିବ ବିଜେଡି ସଂସଦୀୟ ଦଳ ବୈଠକ । ନବୀନ ନିବାସରେ ଦିନ ୧୨ଟା ୩୦ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅକ୍ଷଧ୍ୟତାରେ ବସିବ ବୈଠକ। ସଂସଦ ଅଧିବେଶନ ପାଇଁ ପ୍ରସ୍ତୁତ ହେବ ରଣନୀତି। ଗୃହରେ କେଉଁ ପ୍ରସଙ୍ଗ ଉଠାଇବ ଦଳ, ସାଂସଦଙ୍କ ସହ ଆଲୋଚନା କରିବେ ବିଜେଡି ସୁପ୍ରିମୋ । ରାଜ୍ୟର ସ୍ବାର୍ଥ ସମ୍ବଳିତ ପ୍ରସଙ୍ଗ ଗୁଡିକୁ ସଂସଦର ଉଭୟ ଗୃହରେ ଉପସ୍ଥାପନ କରିବା ନେଇ ମୁଖ୍ୟମନ୍ତ୍ରୀ ସମସ୍ତଙ୍କ ସହ ଆଲୋଚନା କରିବେ । ଓଡ଼ିଶାକୁ ସ୍ବତନ୍ତ୍ର ରାଜ୍ୟ ମାନ୍ୟତା ଦାବି, ଆବାସ ଯୋଜନାରେ ରାଜ୍ୟର ବଳକା ହିତାଧିକାରୀଙ୍କୁ ଗୃହ ଯୋଗାଣ, ୧୬୯ ଜନଜାତିଙ୍କୁ ଆଦିବାସୀ ତାଲିକାଭୁକ୍ତ କରିବା, ପ୍ରାକୃତିକ ବିପର୍ଯ୍ୟୟର ସ୍ଥାୟୀ ମୁକାବିଲା ପାଇଁ ସ୍ବତନ୍ତ୍ର ସହାୟତା ଦାବି ଓ ଚାଷୀ ଓ ଚାଷ ସମ୍ପର୍କିତ ପ୍ରସଙ୍ଗକୁ ନେଇ ଓଡ଼ିଶାର ସାଂସଦମାନେ ବାରମ୍ବାର କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରି ଆସୁଛନ୍ତି ।
ଆଗାମୀ ବଜେଟ ଅଧିବେଶନରେ ମଧ୍ୟ ରାଜ୍ୟ ଓ ରାଜ୍ୟବାସୀଙ୍କ ସ୍ବାର୍ଥ ସହ ଜଡିତ ପ୍ରସଙ୍ଗ ଗୁଡିକୁ କିଭଳି ବଳିଷ୍ଠ ଭାବେ ଉପସ୍ଥାପନ କରାଯାଇପାରିବ । ସେନେଇ ମୁଖ୍ୟମନ୍ତ୍ରୀ ସବୁ ସାଂସଦଙ୍କୁ ଆବଶ୍ୟକ ଦିଗଦର୍ଶନ ଦେବେ ।
ଜଳବାୟୁରେ ପରିବର୍ତ୍ତନ, ଚଳିତ ବର୍ଷ ଭୁବନେଶ୍ବର ହେବ ଉତ୍ତପ୍ତ ସହର!
ଭୁବନେଶ୍ବର: ଜଳବାୟୁ ପରିବର୍ତ୍ତନର ବଡ ପ୍ରଭାବ । ବସନ୍ତରେ ଆଉ ବହୁନି ମଳୟ ପବନ। ଧିରେ ଧିରେ ଉତ୍ତପ୍ତ ହେଉଛି ପଶ୍ଚିମ ଓଡିଶା । ଉପକୂଳ ଓଡିଶାରେ ବି ସ୍ଥିତି ସଙ୍ଗୀନ ହେବାକୁ ଯାଉଛି। ସ୍ବାଭାବିକ ଠାରୁ ୬ ଡିଗ୍ରୀ ଉପରେ ରହୁଛି ତାପମାତ୍ରା । ଚଳିତ ବର୍ଷ ଭୁବନେଶ୍ବର ବିଶ୍ବର ସବୁଠାରୁ ଉତ୍ତପ୍ତ ସହର ହେବାର ଅଧିକ ସମ୍ଭାବନା ରହିଛି। ଗତ ୨୦୨୧ରେ ମଧ୍ୟ ଭୁବନେଶ୍ବର ବିଶ୍ବର ଉତ୍ତପ୍ତ ସହର ହୋଇଥିଲା । ଗତକାଲି ବୌଦ୍ଧ ଜିଲ୍ଲାରେ ତାପମାତ୍ରା ୩୫ ଡିଗ୍ରୀ ଥିବା ବେଳେ, ରାଜଧାନୀରେ ବି ଉପରମୁହାଁ ହୋଇଛି ପାରଦ । ଗତ ୨୪ ଘଣ୍ଟା ମଧ୍ୟରେ ୧୧ ସହରର ଦିନର ତାପମାତ୍ରା ୩୩ ଡିଗ୍ରୀ କିମ୍ବା ତାଠାରୁ ଅଧିକ ରେକର୍ଡ ହୋଇଛି। ଗତକାଲି ବୌଦ୍ଧରେ ୩୫ଡିଗ୍ରୀ, ତାଳଚେରରେ ୩୪ ଦଶମିକ ୪ ଡିଗ୍ରୀ, ଭୁବନେଶ୍ବରରେ ୩୪ ଡିଗ୍ରୀ, ଗୋପାଳପୁରରେ ୩୩ ଦଶମିକ ୮ ଡିଗ୍ରୀ, ଝାରସୁଗୁଡାରେ ୩୩ ଦଶମିକ ୬ ଡିଗ୍ରୀ, ଟିଟଲାଗଡରେ ୩୩ ଦଶମିକ ୫ ଡିଗ୍ରୀ, ସୁନ୍ଦରଗଡରେ ୩୩ ଦଶମିକ ୩ ଡିଗ୍ରୀ ରେକର୍ଡ ହୋଇଥିଲା । ସେହିପରି ଅନୁଗୁଳରେ ୩୩ ଦଶମିକ ୧ , ମାଲକାନଗିରି, ନବରଙ୍ଗପୁର ଓ ପୁରୀରେ ୩୩ ଡିଗ୍ରୀ ତାପମାତ୍ରା ରେକର୍ଡ ହୋଇଥିଲା ।
ପବିତ୍ର ମାଘ ସପ୍ତମୀରେ ଚନ୍ଦ୍ରଭାଗାରେ ବୁଡ଼ ପକାଇଲେ ଲକ୍ଷାଧିକ ଶ୍ରଦ୍ଧାଳୁ
ପୁରୀ: ଆଜି ମାଘ ସପ୍ତମୀ । ଚନ୍ଦ୍ରଭାଗାରେ ବୁଡ଼ ପକାଇଲେ ଲକ୍ଷାଧିକ ଶ୍ରଦ୍ଧାଳୁ । ପବିତ୍ର ମାଘ ମାସ ଶୁକ୍ଲପକ୍ଷ ସପ୍ତମୀ ତିଥ ସୂର୍ଯ୍ୟ ଭଗବାନଙ୍କ ଜନ୍ମଦିନରେ ଅର୍କକ୍ଷେତ୍ରରେ ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ଼ । କଡା ସୁରକ୍ଷା ମଧ୍ୟରେ ତିନି ଠାକୁର ମହାପ୍ରଭୁ ତ୍ରିବେଣୀଶ୍ଵର , ଐଶାନେଶ୍ବର , ଦକ୍ଷିଣେଶ୍ବର ପାରମ୍ପାରିକ ଶୋଭାଯାତ୍ରାରେ ଆସି ଚନ୍ଦ୍ରଭାଗା ତୀର୍ଥ ପୂଜା ମଣ୍ଡପରେ ପହଞ୍ଚିବା ପରେ ଭୋର ୪ଟା ୩୦ରେ ମହାପ୍ରଭୁଙ୍କ ନୀତିକାନ୍ତି ଓ ମହାସ୍ନାନ ଅନୁଷ୍ଠିତ ହୋଇଯାଇଛି। ଠାକୁରଙ୍କ ମହାସ୍ନାନ ପରେ ସାଧୁସନ୍ଥ ଓ ଶ୍ରଦ୍ଧାଳୁମାନେ ବୁଡ ପକାଇଛନ୍ତି । ଚଳିତ ବର୍ଷ ପ୍ରସିଦ୍ଧ ଚନ୍ଦ୍ରଭାଗା ବୁଡ ଶାନ୍ତିଶୃଙ୍ଖଳାର ସହ ସମାପନ ହୋଇଛି । ଏହି ଅବସରରେ ସାଧୁସନ୍ଥ ମାନଙ୍କ ଦ୍ଵାରା ଚନ୍ଦ୍ରଭାଗା ତ୍ରିଥ ପୁସ୍କରଣୀରେ ଆଳତୀ ପରିବେଶକୁ ଭାବମୟ କରିଥିଲା ।
ପୌରାଣିକ ମତାନୁସାରେ ଏହି ପବିତ୍ର ଦିନରେ ସୂର୍ଯ୍ୟ ଭଗବାନ ବା ମିତ୍ରାଦିତ୍ୟଙ୍କ ଜନ୍ମ ଦିନ । ଏହି ଦିନରେ କୃଷ୍ଣଙ୍କ ପୁତ୍ର ଶାମ୍ବ ଚନ୍ଦ୍ରଭାଗା ନଦୀ ତଟରେ ତପସ୍ୟା କରି ଶ୍ରାପ ଜନିତ ରୋଗରୁ ମୁକ୍ତି ହୋଇଥିଲେ । ଏହି ଦିନରେ ଲାଙ୍ଗୁଳା ନରସିଂହଦେବ ସୂର୍ଯ୍ୟ ମନ୍ଦିର ପ୍ରତିଷ୍ଠା କରିଥିଲେ। ତେଣୁ ନିଜ ପରିବାରକୁ ରୋଗ ଶୋକ ଭୟରୁ ମୁକ୍ତ ରଖିବା ପାଇଁ ହିନ୍ଦୁ ଧର୍ମାଲମ୍ବୀ ମାନେ ଏହି ପବିତ୍ର ଦିନରେ ଏହି ତୀର୍ଥରେ ବୁଡ ପକାଇ ସୂର୍ଯ୍ୟଦୋୟ ଦର୍ଶନ କରିଥାନ୍ତି । ଚଳିତ ବର୍ଷ ଚନ୍ଦ୍ରଭାଗା ବୁଡକୁ ଶୃଙ୍ଖଳିତ କରିବା ପାଇଁ ପୁରୀ ଏସପିଙ୍କ ସହିତ ୩୦ ପ୍ଲାଟୁନ ଫୋର୍ସ, ୨ଜଣ ଆଡିସିନାଲ ଏସପି , ୩୦ଜଣ ସିନିଆର ପୋଲିସ ଅଫିସର, ୧୦୦ ଜଣ ଓ ଆଇସିଏ ଏସଆଇ, ଟ୍ରାଫିକ ପୋଲିସ, ଲାଇଫ ଗ୍ରାଡ଼, ସାଧା ପୋଷାକଧାରୀ ପୋଲିସ ସହ ମେଳା ପଡିଆରେ ଦୁଇଟି ୱାଚ ଟାୱାର ନିର୍ମାଣ କରାଯାଇଛି । ପ୍ରଶାସନିକ ଅଧିକାରୀ ଓ ପୁରୀ ଜିଲ୍ଲାପାଳ ଉପସ୍ଥିତ ରହି ତିନି ଠାକୁରଙ୍କ ଶୋଭାଯାତ୍ରା , ନୀତିକାନ୍ତି ଓ ବୁଡ ପରିଚାଳନା କରିଥିଲେ ।
ବିମାନବନ୍ଦରରେ ୫୫ ଯାତ୍ରୀଙ୍କୁ ଛାଡି ଏୟାରଲାଇନ୍ସକୁ ଉଡାଣ ଭରିବା ପଡିଲା ମହଙ୍ଗା
ବେଙ୍ଗାଳୁରୁ: ଗୋ ଫାଷ୍ଟ ଏୟାରଲାଇନ୍ସ ଉପରେ ଲାଗିଲା ୧୦ ଲକ୍ଷ ଟଙ୍କାର ଜୋରିମାନା । ଯାତ୍ରୀଙ୍କୁ ବିମାନବନ୍ଦରରେ ଛାଡି ଉଡାଣ ଭରିବା ଗୋ ଫାଷ୍ଟ ଏୟାରଲାଇନ୍ସକୁ ମହଙ୍ଗା ପଡିଛି । ଚଳିତ ମାସ ୯ ତାରିଖରେ ଗୋ ଫାଷ୍ଟ ଏୟାରଲାଇନ୍ସ ୫୫ ଜଣ ଯାତ୍ରୀଙ୍କୁ ବିମାନବନ୍ଦରରେ ଛାଡି ଉଡାଣ ଭରିଥିଲା । ବେଙ୍ଗାଳୁରୁରୁ ଦିଲ୍ଲୀକୁ ଉଡାଣ ଭରିଥିବା ଏହି ବିମାନ ଉପରେ ଜୋରିମାନା ଲଗାଇଛି ଡିଜିସିଏ । ଯାତ୍ରୀଙ୍କୁ ଛାଡିଯିବା ଘଟଣାରେ ଏୟାରଲାଇନ୍ସ କ୍ଷମା ମାଗିବା ସହ ଏକ ଘୋଷଣା ମଧ୍ୟ କରିଥିଲା । ଅସୁବିଧାର ସମ୍ମୁଖୀନ ହୋଇଥିବା ଯାତ୍ରୀ ଆଗାମୀ ୧୨ ମାସ ମଧ୍ୟରେ ଦେଶର ଯେକୌଣସି ସ୍ଥାନକୁ ଯିବାକୁ ମାଗଣା ଟିକେଟ ଦିଆଯିବ। ଏହାସତ୍ତ୍ୱେ ଏୟାରଲାଇନ୍ସ ଉପରେ କଡା କାର୍ଯ୍ୟାନୁଷ୍ଠାନ ନେଇଛି ଡିଜିସିଏ ।
ଏହି ଘଟଣାକୁ ନେଇ ଯାତ୍ରୀମାନେ କହିଛନ୍ତି ଯେ, ରନୱେରେ ଯାତ୍ରୀଙ୍କୁ ଛାଡି ବିମାନଟି ତାଙ୍କର ସାମଗ୍ରୀ ନେଇଯାଇଥିଲା । ଏ ବାବଦରେ ଯାତ୍ରୀଙ୍କୁ ଜଣାନଥିଲା । ଦୀର୍ଘ ସମୟ ଧରି ଯାତ୍ରୀମାନେ ସାମଗ୍ରୀ ପାଇଁ ଅପେକ୍ଷା କରିଥିଲେ । ଏନେଇ ନାହିଁ ନଥିବା ଅସୁବିଧାର ସମ୍ମୁଖିନ ହୋଇଛନ୍ତି ଯାତ୍ରୀ । ତେବେ ଅନ୍ୟ ବିମାନ ଯୋଗେ ଯାତ୍ରୀଙ୍କୁ ଗନ୍ତବ୍ୟସ୍ଥଳକୁ ପଠାଯାଇଥିଲା । ଏନେଇ ଗୋ ଫାଷ୍ଟ ଏୟାରଲାଇନ୍ସ ଉପରେ କଡା କାର୍ଯ୍ୟାନୁଷ୍ଠାନ ନିଆଯାଇଛି ।
ଆଜିଠୁ ଖଣ୍ଡଗିରି ମାଘ ମେଳା, ଜମିଲାଣି ବାବାଙ୍କ ମେଳି
ଭୁବନେଶ୍ବର: ଆଜିଠୁ ଖଣ୍ଡଗିରି ମାଘ ମେଳା । ଜମିଲାଣି ବାବାଙ୍କ ମେଳି । ସକାଳୁ ମା ବାରଭୂଜାଙ୍କ ପୂଜାର୍ଚ୍ଚନା ପରେ ଦେଶର ବିଭିନ୍ନ ପ୍ରାନ୍ତରୁ ଆସିଥିବା ସାଧୁସନ୍ଥମାନେ ଯଜ୍ଞ ଆରମ୍ଭ କରିବେ । କରୋନା କଟକଣା ନଥିବାରୁ ଏଥର ଅଧିକ ଶ୍ରଦ୍ଧାଳୁଙ୍କ ସମାଗମ ହେବ । ଫେବୃୟାରୀ ୧୦ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ମେଳାରେ ୩୦ ତାରିଖରୁ ଯାତ୍ରାପାର୍ଟି ପାଇଁ ଅନୁମତି ମିଳିଛି । ଯାତ୍ରାଜଗତର ସମସ୍ତ ନାମୀ ଦାମୀ ଅପେରା ପାର୍ଟିମାନଙ୍କର ପ୍ରତିଯୋଗିତା ଏହି ମେଳାରେ ଦେଖିବାକୁ ମିଳିବ । ଚଳିତ ବର୍ଷ ଯାତ୍ରା ପେଣ୍ଡାଲରେ ଅଧିକ ଦର୍ଶକ ଯାତ୍ରା ଉପଭୋଗ କରିବେ ବୋଲି ଆଶା କରାଯାଉଛି । କୌଣସି ଯାତ୍ରାପାର୍ଟି ଅଶ୍ଳିଳ ନୃତ୍ୟ ପରିବେଷଣ କରିପାରିବେ ନାହିଁ । ଏହା ଉପରେ କଟକଣା ଲାଗାଇଛି ବିଏମସି।
ଚଳିତ ବର୍ଷ ମେଳାରେ ପରିମଳ ଏବଂ ସାନିଟେସନକୁ ବେଶ ଗୁରୁତ୍ବ ଦେଇଛି ବିଏମସି । ମେଳାରେ ବ୍ୟବସାୟୀଙ୍କ ଭଳିକି ଭଳି ପସରା ସବୁ ମେଲିଛି । ଦୋକାନ, ବଜାରଠାରୁ ଆରମ୍ଭ କରି ମୀନାବଜାର ପର୍ଯ୍ୟନ୍ତ ସବୁ ଦୋକାନ ମେଳାରେ ଦେଖିବାକୁ ମିଳିଛି। ବିଭିନ୍ନ ଅଞ୍ଚଳର ଖାଦ୍ୟ, ଘର ସାଜସଜ୍ଜା ଉପକରଣ ଓ ଛୋଟ ପିଲାମାନଙ୍କ ପାଇଁ ଦୋଳି ଆଦି ଦୋକାନ ଖୋଲିଛି ।
ପ୍ରଧାନମନ୍ତ୍ରୀ ରାଷ୍ଟ୍ରୀୟ ବାଲ ପୁରସ୍କାର ବିଜେତା ସମ୍ଭବ ମିଶ୍ରଙ୍କୁ ସମ୍ବର୍ଦ୍ଧନା
କଟକ: ପ୍ରଧାନମନ୍ତ୍ରୀ ରାଷ୍ଟ୍ରୀୟ ବାଲ ପୁରସ୍କାର ବିଜେତା କଟକର ସମ୍ଭବ ମିଶ୍ରଙ୍କୁ ସମ୍ବର୍ଦ୍ଧନା । ଏହି ସଫଳତା ପାଇଁ ସେ ନିଜ ସ୍କୁଲ ଏଲଆରଡିଏଭିକୁ ଶ୍ରେୟ ଦେଇଛନ୍ତି । ଗତ 24 ତାରିଖ ଦିନ ନୂଆଦିଲ୍ଲୀରେ ରାଷ୍ଟ୍ରପତିଙ୍କ ଠାରୁ ସମ୍ମାନନଜନକ ରାଷ୍ଟ୍ରୀୟ ବାଲ ପୁରସ୍କାର ଗ୍ରହଣ କରିଥିଲେ ସମ୍ଭବ ମିଶ୍ର । ପୂର୍ବରୁ କେନ୍ଦ୍ର ସରକାରଙ୍କ 6 ଟି ବଡ଼ ଯୋଜନାକୁ ନେଇ ଏକ ବହି ଲେଖିଥିଲେ । ଯାହାର ନାମ ବିଜୟୀ ଭଵ ଭାରତ । ଏଥିପାଇଁ ତାଙ୍କୁ ଅନେକ ପ୍ରଶଂସା ଓ ଶୁଭେଚ୍ଛା ମିଳିଥିଲା । ଏହାଛଡ଼ା ସମ୍ଭବ ଫ୍ରାସ ଉପାଧି ମଧ୍ୟ ପାଇଛନ୍ତି । ଅନ୍ୟପଟେ ସେହି ସ୍କୁଲ ର 5 ଶ୍ରେଣୀ ପଢ଼ୁଥିବା ଦିବ୍ୟାନ୍ସି ଦାସଙ୍କୁ ମଧ୍ୟ ସମ୍ଭର୍ଦ୍ଧିତ କରାଯାଇଥିଲା ।
2022 ର ବୀରଗାଥା ପ୍ରତିଯୋଗିତାରେ ଦେଶର 25 ଜଣଙ୍କ ମଧ୍ୟରେ ପାଇଥିଲେ ବିରଗାଥା ପୁରସ୍କାର । ଗଲବାନ ଘାଟିର ବୀର ବି ସନ୍ତୋଷ ବାବୁଙ୍କ ଚିତ୍ରପଟ ପ୍ରସ୍ତୁତ କରି ସେ ଏହି ସମ୍ମାନର ଅଧିକାରୀ ହୋଇଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁ 11 ଜଣ ପିଲାଙ୍କୁ ଚଳିତବର୍ଷର ପ୍ରଧାନମନ୍ତ୍ରୀ ରାଷ୍ଟ୍ରୀୟ ବାଲ ପୁରସ୍କାର ପ୍ରଦାନ କରିଛନ୍ତି । ନୂଆଦିଲ୍ଲୀର ବିଜ୍ଞାନ ଭବନରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ପୁରସ୍କାର ପ୍ରଦାନ କରାଯାଇଥିଲା । ସେବା, କ୍ରୀଡା, କଳା, ସଂସ୍କୃତି ଏବଂ ସାହାସିକତା ଭଳି 4ଟି ବର୍ଗରେ ଉଲ୍ଲେଖନୀୟ ପ୍ରଦର୍ଶନ କରିଥିବା 11 ଜଣଙ୍କୁ ମେଡାଲ, ମାନପତ୍ର ସହ 1 ଲକ୍ଷ ଟଙ୍କା ପୁରସ୍କାର ପ୍ରଦାନ କରିଥିଲେ ରାଷ୍ଟ୍ରପତି । ପୁରସ୍କାର ପାଇଥିବା ପିଲାଙ୍କ ମଧ୍ୟରେ 6 ଜଣ ପୁଅ ଓ 5 ଜଣ ଝିଅ ଥିଲେ ।
ଚଳନ୍ତି ବସରୁ ବାହାରିଗଲା ଚକ, ମେଡିକାଲରେ ଆହତ
ଭଦ୍ରକ: ଭାରସ୍ୟାମ ହରାଇ ଓଲଟିଲା ଯାତ୍ରୀବାହୀ ବସ । 12 ରୁ ଅଧିକ ଯାତ୍ରୀ ଆହତ । ସମସ୍ତ ଗୁରୁତର ମେଡିକାଲରେ ଭର୍ତ୍ତି । ଭଦ୍ରକ କୁଲଣା ନିକଟରେ ଘଟିଛି ଏହି ସଡ଼କ ଦୁର୍ଘଟଣା । ଅମ୍ରିତ ନାମକ ଯାତ୍ରୀବାହି ବସ ପ୍ରାୟ 35 ଜଣ ଯାତ୍ରୀଙ୍କୁ ନେଇ ମଞ୍ଜୁରୀରୋଡ଼ ଅଭିମୁଖେ ଯାଉଥିଲା । ହେଲେ କୁଲଣା ଛକ ନିକଟ ରେ ବସର ପତି ଭାଙ୍ଗିବା ସହ ଷ୍ଟିୟରିଂ ଫେଲ ହୋଇଥିଲା । ପରେ ଚକ ବାହାରି ଯାଇଥିବାରୁ ବସଟି ନିୟନ୍ତ୍ରଣ ହରାଇ ଦୁର୍ଘଟଣା ଘଟିଥିଲା ।
ମିଳିଥିବା ସୂଚନା ମୁତାବକ ସମସ୍ତ ଆହତ ଯାତ୍ରୀଙ୍କୁ ଆମ୍ବୁଲାନ୍ସ ସାହାଯ୍ୟରେ ଭଣ୍ଡାରିପୋଖରୀ ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି । ଅନ୍ଧାର ହୋଇଥିବା ସତ୍ତ୍ୱେ ସ୍ଥାନୀୟ ଲୋକେ ଗାଡିରୁ ଯାତ୍ରୀଙ୍କୁ ଉଦ୍ଧାର କରିଥିଲେ । ଭଣ୍ଡାରିପୋଖରୀ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।