ନୂଆଦିଲ୍ଲୀ: କେନ୍ଦ୍ରୀୟ ଏଜେନ୍ସିର ଅପବ୍ୟବହାରକୁ ନେଇ ସୁପ୍ରିମକୋର୍ଟରେ ପିଟିସନ। ଇଡି, ସିବିଆଇର ଦୂରୁପଯୋଗକୁ ନେଇ ସୁପ୍ରିମକୋର୍ଟରେ ବିରୋଧୀଙ୍କ ପିଟିସନ । ବିରୋଧୀଙ୍କ ବିରୋଧରେ କେନ୍ଦ୍ର ସରକାର ଇଡି, ସିବିଆଇକୁ ଅସ୍ତ୍ର ଭଳି ବ୍ୟବହାର କରୁଛନ୍ତି । ବିରୋଧୀଙ୍କୁ ଚୁପ୍ କରିବା ପାଇଁ ନେତାମାନଙ୍କୁ ବିଭିନ୍ନ ମାମଲାରେ ଗିରଫ କରାଯାଉଥିବା ଅଭିଯୋଗ ଆଣି ପିଟିସନ ଦାଏର କରିଛନ୍ତି ବିରୋଧୀ । କଂଗ୍ରେସ ସମେତ ୧୪ ବିରୋଧୀ ଦଳ ପକ୍ଷରୁ ପିଟିସନ ଦାଏର ହୋଇଛି । କେନ୍ଦ୍ରୀୟ ଏଜେନ୍ସିର ବ୍ୟବହାରକୁ ନେଇ ସୁପ୍ରିମକୋର୍ଟ ସ୍ବତନ୍ତ୍ର ଗାଇଡଲାଇନ ଆଣିବାକୁ ପିଟିସନରେ ଅପିଲ କରିଛନ୍ତି ବିରୋଧୀ ।
ମାଲକାନଗିରି: ମାଓ ଦମନ ଅପରେସନ ବେଳେ ମାଲକାନଗିରି BSFକୁ ବଡ଼ ସଫଳତା । ସ୍ୱାଭିମାନ ଅଞ୍ଚଳର ତାଇମାଲ ଜଙ୍ଗଲରେ ମାଓବାଦୀଙ୍କ ଏକ ଗୁପ୍ତଖାନା ଜବତ କରିଛି BSFର ୮୮ ବାଟାଲିୟନ ଯବାନ । ଏଥିରେ ବିପୁଳ ପରିମାଣର ମାଓ ବିସ୍ଫୋରକ ସାମଗ୍ରୀ ଜବତ କରିଛନ୍ତି BSF ଯବାନ । ପୋଲିସକୁ ଟାର୍ଗେଟ କରି ମାଓବାଦୀ ମାଟି ତଳେ ଗାତ କରି ବିପୁଳ ପରିମାଣର ମାଓ ବିସ୍ପୋରକ ସାମଗ୍ରୀ ଗଚ୍ଛିତ କରି ରଖିଥିଲେ । ସେଗୁଡ଼ିକ ମଧ୍ୟରେ ରହିଛି ଗୋଟିଏ ବନ୍ଧୁକ, ଷ୍ଟିଲ LED ଦୁଇଟି, ୧୧ଟି ହ୍ୟାଣ୍ଡ ଗ୍ରେନେଡ, ୨୮ଟି ଡେଟୋନେଟର, ଇନସାସ ମାଗାଜିନ୍, ୱାକିଟକି ଏବଂ ମାଓ ବ୍ୟବହୃତ ସାମଗ୍ରୀ ଜବତ କରିଛି BSF ଯବାନ।
ଭୁବନେଶ୍ୱର: ପୁଞ୍ଜିନିବେଶରେ ଜାତୀୟ ହାରଠାରୁ ଓଡ଼ିଶା ଅଧିକ । ଜାତୀୟ ହାର ୨୨ ପ୍ରତିଶତ ଥିବାବେଳେ ଓଡ଼ିଶାରେ ୪୫-୪୭% ପୁଞ୍ଜିନିବେଶ ରହିଛି । ରାଜ୍ୟରେ ନୂଆ ଶିଳ୍ପନୀତି ୨୦୨୨ ଡିସେମ୍ବରରୁ ପ୍ରଣୟନ ହୋଇଛି । ମେକ୍ ଇନ୍ ଓଡ଼ିଶା ୨୦୨୨ ଜରିଆରେ ୭୪୧ ଶିଳ୍ପ ପାଇଁ ପ୍ରସ୍ତାବ ଆସିଛି । ଏହା କାର୍ଯ୍ୟକ୍ଷମ ହେଲେ, ୧୦ଲକ୍ଷ ୪୮ ହଜାର ୮୦୭ କୋଟି ପୁଞ୍ଜି ନିବେଶ ଆସିବ ବୋଲି ବିଧାନସଭାରେ ଉତ୍ତର ରଖିଛନ୍ତି ଶିଳ୍ପ ମନ୍ତ୍ରୀ ପ୍ରତାପ କେଶରୀ ଦେବ । ସେ କହିଛନ୍ତି- ଏଥିରେ ୧୦ ଲକ୍ଷ ୩୭ ହଜାର ୮୦୧ ନିଯୁକ୍ତି ସୁଯୋଗ ସୃଷ୍ଟି ହେବ । ଏ ଯାଏ ୧୫୬ ବୃହତ୍ ଶିଳ୍ପ ଆଂଶିକ ଓ ପୂର୍ଣ୍ଣ କାର୍ଯ୍ୟକ୍ଷମ ହୋଇଛି । ୭ଟି ବୃହତ ଶିଳ୍ପ ଡାଉନଷ୍ଟ୍ରିମ ଆଲୁମିନିୟମ କ୍ଷେତ୍ରରେ କାର୍ଯ୍ୟକାରୀ ହେଉଛି । ପ୍ଲାଣ୍ଟ ଲେବେଲ advisory କମିଟି ଓ ପ୍ଲାଣ୍ଟ ଲେବେଲ କନସଲେଟିଭ କମିଟି ଜରିଆରେ ଜିଲ୍ଲା ସ୍ତରରେ ଅନୁମୋଦନ ମିଳୁଛି ।
ମେକ ଇନ୍ ଓଡ଼ିଶା ୨୦୧୬ରେ ୮୪ ଶିଳ୍ପ ପ୍ରସ୍ତାବ ଆସିଥିଲା । ଯାହା ୨ ଲକ୍ଷ ୩୨ ହଜାର ୩୫ କୋଟିର ପୁଞ୍ଜିନିବେଶ ଲକ୍ଷ୍ୟ ଥିଲା । ୫୮ ଶିଳ୍ପକୁ ଅନୁମୋଦନ ମିଳିଥିଲା । ୨୭ ଶିଳ୍ପ କାମ ଚଳାଇଛନ୍ତି । ୪ ଶିଳ୍ପ ଉତ୍ପାଦନ ଆରମ୍ଭ କରିଥିବାବେଳେ ୮ଟି ଖୁବ ଶୀଘ୍ର ଉତ୍ପାଦନ କରିବେ । ସେହିପରି ମେକ ଇନ୍ ଓଡ଼ିଶା ୨୦୧୮ରେ ୨୦୨ ଶିଳ୍ପ ପ୍ରସ୍ତାବ ଆସିଥିଲା । ଏଥିରେ ଲକ୍ଷେ ୨୩ ହଜାର ୧୧୫ କୋଟିର ନିବେଶ ଲକ୍ଷ୍ୟ ଥିଲା । ୧୦ ଶିଳ୍ପକୁ ଅନୁମୋଦନ ମିଳିଛି । ୭୧ ଶିଳ୍ପର କାମ ଚାଲିଛି । ୧୧ ଶିଳ୍ପ ଉତ୍ପାଦନ ଆରମ୍ଭ କରିଛନ୍ତି । ତେବେ କ୍ୟାପିଟାଲ ଇଣ୍ଡଷ୍ଟ୍ରିରେ ନିଯୁକ୍ତି କମିବାର କାରଣ ହେଉଛି ବଡ଼ ବଡ଼ ଶିଳ୍ପ ସଂସ୍ଥା ଟେକନୋଲୋଜି ବ୍ୟବହାରକୁ ଗୁରୁତ୍ୱ ଦେଉଛନ୍ତି, ମାନବ ସମ୍ବଳକୁ ନୁହେଁ । କାରଣ ସେମାନେ କୋଟି କୋଟି ଟଙ୍କା ନିବେଶ କରିଛନ୍ତି । ଏପରି ସ୍ଥିତିରେ ଡାଉନଷ୍ଟ୍ରିମ ଇଣ୍ଡଷ୍ଟ୍ରି ଆବଶ୍ୟକ । ଏଥିପାଇଁ ୩୬ ଶିଳ୍ପ ସଂସ୍ଥା ସହ ଚୁକ୍ତି ହୋଇଛି । ଯେଉଁଥିରେ ଅଧିକାଂଶ TATA କମ୍ପାନୀର । ସେମାନଙ୍କୁ କଳିଙ୍ଗନଗରରେ ଜାଗା ଦିଆଯାଇଛି ଓ ସେମାନେ କାମ ଆରମ୍ଭ କରିଥିବା ବିଧାନସଭାରେ ଉତ୍ତର ରଖିଛନ୍ତି ଶିଳ୍ପମନ୍ତ୍ରୀ ପ୍ରତାପ କେଶରୀ ଦେବ । ସେହିପରି ପାରାଦୀପକୁ ପେଟ୍ରୋକେମିକାଲ ହବ୍ କରାଯିବ ବୋଲି ସେ କହିଛନ୍ତି ।
ନୂଆପଡ଼ା: ନୂଆପଡ଼ା ଜିଲ୍ଲାରେ ବାଘ ଭୟ । ଡୋକ୍ରା ଗାଁ ନିକଟରେ କଲରାପତରିଆ ବାଘର ପାଦ ଚିହ୍ନ ଠାବ କରିଛି ବନ ବିଭାଗ । ଅଞ୍ଚଳରେ ଡେରା ପକାଇଛି ବନ ବିଭାଗ । ଏହି ଅଞ୍ଚଳରେ ବନ୍ୟପ୍ରାଣୀ ବିଭାଗ ଟ୍ରାକ୍ କ୍ୟାମେରା ଲଗାଇ ବାଘ ଓ ଶିକାରୀ ଉପରେ ନଜର ରଖିଛି । ଅଞ୍ଚଳଟି ସୁନାବେଡ଼ା ଅଭୟାରଣ୍ୟକୁ ଲାଗି ରହିଛି । ଏହି ଅଞ୍ଚଳରେ ବାଘ ଘୁରି ବୁଲୁଛି। ଅଭୟାରଣ୍ୟରେ ଅଧିକ ବାଘ ଥିବା ଅନୁମାନ କରୁଛି ବନ ବିଭାଗ ।
ଅଭୟାରଣ୍ୟଟି ବାଘର ଘର ସେ ରହିବ ତେଣୁ ବାଘକୁ ଅନ୍ୟତ୍ର ସ୍ଥାନାନ୍ତର ସମ୍ଭବ ନୁହଁ ବୋଲି ବନଖଣ୍ଡ ଅଧିକାରୀ କହିଛନ୍ତି । ତେଣୁ ଭୟଭୀତ ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି ଡିଏଫଓ । ସଦର ରେଞ୍ଜ ମୁସୁରଙ୍ଗି ପ୍ରସ୍ତାବିତ ସଂରକ୍ଷିତ ଜଙ୍ଗଲ ଅଞ୍ଚଳରେ ଥିବା ଗାଁ ଗୁଡିକରେ ବାଘ ଗାଇ ବାଛୁରୀ ମାରି ଖାଉଥିବା ବେଳେ ସୁନାବେଡ଼ା ଅଭୟାରଣ୍ୟରେ ଥିବା ଜଲମଡେଇ ଗାଁରେ ବୃଦ୍ଧାଙ୍କୁ ମାରିଥିବା ଅଭିଯୋଗ କରିଛନ୍ତି ଗାଁ ଲୋକ ।
ଗଞ୍ଜାମ: 5T ରୂପାନ୍ତରଣ କାର୍ଯ୍ୟକ୍ରମରେ ଆଦିଶକ୍ତିପୀଠ ତାରାତାରିଣୀର ବଦଳିଛି ରୂପରେଖ । ଗଞ୍ଜାମ ଜିଲ୍ଲା ଋଷିକୂଲ୍ୟା ନଦୀତଟ ରତ୍ନଗିରି ପାହାଡ଼ ଶୀର୍ଷରେ ରହିଛି ମା’ଙ୍କ ଆସ୍ଥାନ । ମୋଟ୍ ୫୨ ଶକ୍ତିପୀଠରୁ ମା’ ତାରାତାରିଣୀଙ୍କ ପୀଠ ଅନନ୍ୟ । ଆଦିଶକ୍ତି ଭାବେ ମାଆ ତାରାତାରିଣୀ ପୂଜା ପାଉଛନ୍ତି । ମନ୍ଦିରକୁ ଯିବାକୁ ରୋଡ୍ ଓ ରୋପ୍ ୱେର ବ୍ୟବସ୍ଥା ରହିଛି । ଗତବର୍ଷ ମନ୍ଦିରର ନବୀକରଣ କରାଯାଇଛି । ମାଆଙ୍କୁ ଦର୍ଶନ କରିବାକୁ ଭକ୍ତ ଏବେ ନୂଆ ଅନୁଭୂତି ପାଉଛନ୍ତି । ଶାନ୍ତ ସୁନ୍ଦର ପରିବେଶରେ ମାଆଙ୍କ ଦର୍ଶନ କରୁଛନ୍ତି ଭକ୍ତ ।
ଚୈତ୍ର ପର୍ବ ଚାଲିଥିବାରୁ, ଏବେ ସୁବ୍ୟବସ୍ଥିତ ଭାବେ ଚାଲିଛି ମାଆଙ୍କ ପୂଜାର୍ଚ୍ଚନା । ଗତବର୍ଷ ମେ’ ୧୮ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶୁଭ ଉଦଘାଟନ କରିଥିଲେ । 5T ରୂପାନ୍ତରଣରେ ମନ୍ଦିର ଚାରିପାଖ ନବୀକରଣ ସହ ସୌନ୍ଦର୍ଯ୍ୟକରଣ କରାଯାଇଛି । ଏହାସହ ପ୍ରସାଦସେବନ ହଲ୍, ପର୍ଯ୍ୟଟକଙ୍କ ସୁବିଧା ପାଇଁ ଭାଷାନ୍ତର କେନ୍ଦ୍ର, ଧ୍ୟାନ ଓ ବିଶ୍ରାମ ନେବା ପାଇଁ ସ୍ବତନ୍ତ୍ର ହଲ୍ ନିର୍ମାଣ ହୋଇଛି । ଏହି ପଦକ୍ଷେପ ପର୍ଯ୍ୟଟକଙ୍କୁ ଏକ ଦିବ୍ୟ ଅନୁଭୂତି ଦେଉଛି । ଓଡ଼ିଶାର କଳା ଓ ସ୍ଥାପତ୍ୟର କଥା ବଖାଣୁଛି ମନ୍ଦିରର ସିଂହଦ୍ବାର ।
ନୂଆଦିଲ୍ଲୀ: ୨୦୧୯ର ‘ମୋଦି ସରନେମ’ ମାମଲାରେ ସୁରଟ କୋର୍ଟଙ୍କ ରାୟକୁ ନେଇ ସାରାଦେଶରେ ରାଜନୈତିକ କମ୍ପନ । ବିଭିନ୍ନ ସ୍ଥାନରେ କେନ୍ଦ୍ର ସରକାରଙ୍କ ବିରୋଧରେ ଗର୍ଜନ କରିଛି କଂଗ୍ରେସ । ଏହି ପ୍ରସଙ୍ଗରେ ଆଜି ବିରୋଧୀ ଦଳଙ୍କ ବୈଠକ ଡାକିଛି କଂଗ୍ରେସ । ଏହା ଏକ ଆଇନଗତ ପ୍ରସଙ୍ଗ ନୁହେଁ ବରଂ ଏକ ରାଜନୈତିକ ପ୍ରସଙ୍ଗ ବୋଲି କହିଛି ଦଳ । ରାହୁଲଙ୍କ ବିରୋଧରେ ବଡ଼ ଷଡ଼ଯନ୍ତ୍ର ହୋଇଥିବା ଅଭିଯୋଗ ହୋଇଛି । କେନ୍ଦ୍ରର ରାଜନୈତିକ ଆକ୍ରୋଶ ବିରୋଧରେ ଆଜି ଓଡ଼ିଶାରେ ବିକ୍ଷୋଭ କରିବ କଂଗ୍ରେସ । ସବୁ ଜିଲ୍ଲା ମୁଖ୍ୟାଳୟରେ ବିରୋଧ ପ୍ରଦର୍ଶନ କରିବେ କଂଗ୍ରେସ କର୍ମୀ ।
ସେପଟେ ସାରା ଦେଶରେ ରାୟ ବିରୋଧରେ କଂଗ୍ରେସ କରୁଛି ହଲ୍ଲାବୋଲ । ଲୋକତନ୍ତ୍ରକୁ ହତ୍ୟା କରି ବିରୋଧୀଙ୍କ ସ୍ବର ଚପାଇ ଦେବାକୁ ପ୍ରୟାସ ଚାଲିଛି ବୋଲି କଂଗ୍ରେସ କହିଛି । ମକଦ୍ଦମା ଚଳାଇ ଅଣବିଜେପି ନେତା ଓ ଦଳକୁ ନିଶ୍ଚିହ୍ନ କରିବାକୁ ପ୍ରକ୍ରିୟା ଚାଲିଥିବା ଅଭିଯୋଗ ହୋଇଛି । ୨୦୧୯ ମୋଦି ସାଙ୍ଗିଆକୁ ନେଇ ଦେଇଥିବା ବିବାଦୀୟ ବିବୃତି ମାମଲାରେ ଗତକାଲି କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ୧୫ ହଜାର ଟଙ୍କା ଜରିମାନା ସହ ଦୁଇ ବର୍ଷ ଜେଲ ଦଣ୍ଡ ଶୁଣାଇଥିଲେ ସୁରଟ ସେସନ୍ସ କୋର୍ଟ । ପରେ ରାହୁଲଙ୍କ ବେଲ୍ ମଞ୍ଜୁର ହୋଇଥିଲା ।
ମୁମ୍ବାଇ: ବଲିଉଡର ପ୍ରତିଷ୍ଠିତ ଫିଲ୍ମ ନିର୍ମାତା ପ୍ରଦୀପ ସରକାରଙ୍କ ପରଲୋକ । ମୃତ୍ୟୁବେଳକୁ ତାଙ୍କୁ ୬୮ ବର୍ଷ ବୟସ ହୋଇଥିଲା । ଦୀର୍ଘଦିନ ଧରି ସେ କିଡନୀ ରୋଗରେ ପୀଡ଼ିତ ହୋଇ ଚିକିତ୍ସିତ ହେଉଥିଲେ । ଡାଏଲିସିସ ଚାଲିଥିବା ବେଳେ ଗତକାଲି ରାତିରେ ହଠାତ ପ୍ରଦୀପଙ୍କ ଶରୀରରେ ପୋଟାସିଅମ ଲେବଲ କମିଯାଇଥିଲା । ଏଥିଯୋଗୁ ତାଙ୍କର ମୃତ୍ୟୁ ହୋଇଥିବା ଅଭିନେତ୍ରୀ ନିତୁ ଚିନ୍ଦ୍ରା ଟୁଇଟ କରି ସୂଚନା ଦେଇଛନ୍ତି ।
ପରିଣିତା, ଲଗା ଚୁନରି ମେଁ ଦାଗ, ମର୍ଦ୍ଦାନି, ହେଲିକପ୍ଟର ଇଲା ଆଦି ଫିଲ୍ମ ନିର୍ମାଣ କରି ସେ ପ୍ରସିଦ୍ଧି ଲାଭ କରିଥିଲେ । ପ୍ରଦୀପଙ୍କ ମୃତ୍ୟୁରେ ଅଭିନେତା ଅଜୟ ଦେବଗନ, ମନୋଜ ବାଜପାୟୀଙ୍କ ସମେତ ବହୁ ବ୍ୟକ୍ତି ଶୋକବ୍ୟକ୍ତ କରିଛନ୍ତି ।
ନୂଆଦିଲ୍ଲୀ: ପୁଣି ରାଜନୈତିକ ଆକ୍ରୋଶର ଶିକାର ହେଲେ କି ରାହୁଲ? ସରନେମ୍ ପାଇଁ ଦଣ୍ଡ ନା ବଡ଼ ଷଡ଼ଯନ୍ତ୍ର ! ସୁରଟରୁ ଦଣ୍ଡାଦେଶ ଦେଶରେ ହଲଚଲ୍। ୨୦୧୯ର ‘ମୋଦି ସରନେମ୍’ ମାମଲାରେ ରାହୁଲଙ୍କୁ ଦୁଇ ବର୍ଷ ଜେଲ ଦଣ୍ଡାଦେଶ ଦେଲେ ସୁରଟ ଜିଲ୍ଲା କୋର୍ଟ। ଆଗକୁ ଲୋକସଭା ନିର୍ବାଚନ ଥିବାରୁ ଏହି ରାୟ କଂଗ୍ରେସର ଚିନ୍ତା ବଢ଼ାଇ ଦେଇଛି । ସୁରଟ ଜିଲ୍ଲା କୋର୍ଟଙ୍କ ଏହି ରାୟ ପରେ ସଂସଦରୁ ସଦସ୍ୟତା ପଦ ହରାଇ ପାରନ୍ତି ରାହୁଲ ଗାନ୍ଧୀ । ଲୋକସଭାରୁ ରାହୁଲ ଅଯୋଗ୍ୟ ଘୋଷଣା ହୋଇପାରନ୍ତି । ଜନ ପ୍ରତିନିଧି ଆଇନ ଅନୁସାରେ ଯଦି କୌଣସି ସଦସ୍ୟ ୨ କିମ୍ବା ୨ରୁ ଅଧିକ ସମୟ ପାଇଁ ଜେଲ ଦଣ୍ଡାଦେଶ ପାଆନ୍ତି ତେବେ ତାଙ୍କୁ ଦଣ୍ଡାଦେଶ ପର୍ଯ୍ୟନ୍ତ କିମ୍ବା ପରେ ୬ ବର୍ଷ ପାଇଁ ଅଯୋଗ୍ୟ ଘୋଷଣା କରାଯିବ । କିନ୍ତୁ ଏହି ଆଇନରେ ସଂସଦର ବର୍ତ୍ତମାନର ସଦସ୍ୟଙ୍କ ପାଇଁ ଅନ୍ୟ ଏକ ବ୍ୟବସ୍ଥା ରହିଛି । ସମ୍ପୃକ୍ତ ସାଂସଦଙ୍କ ଆବେଦନ ଉପରେ ନିଷ୍ପତ୍ତି ନହେବା ପର୍ଯ୍ୟନ୍ତ ସଦସ୍ୟଙ୍କୁ ଅଯୋଗ୍ୟ ଘୋଷଣା କରାଯାଇପାରିବନି। ସୁରଟ ଜିଲ୍ଲା କୋର୍ଟଙ୍କ ରାୟ ବିରୋଧରେ ହାଇକୋର୍ଟରେ ଆବେଦନ କରାଯିବ ବୋଲି କଂଗ୍ରେସ ପକ୍ଷରୁ କୁହାଯାଇଛି ।
ତେବେ ଏହି ସବୁ ମଧ୍ୟରେ ସୁପ୍ରିମକୋର୍ଟ ଆଇନଜୀବୀ ବିନୀତ ଜିନ୍ଦଲ ଲୋକସଭା ବାଚସ୍ପତିଙ୍କ ନିକଟରେ ଅଭିଯୋଗ ଦାଏର କରି ରାହୁଲଙ୍କ ସଦସ୍ୟତା ରଦ୍ଦ କରିବାକୁ ଦାବି କରିଛନ୍ତି । ସେହିପରି ପୂର୍ବତନ ଆଇନ ମନ୍ତ୍ରୀ କପିଲ ସିବଲ କହିଛନ୍ତି କି ରାହୁଲ ଏହି ଦଣ୍ଡାଦେଶ ସହ ସାଂସଦ ଭାବେ ଅଯୋଗ୍ୟ ହୋଇସାରିଛନ୍ତି । ଏଥିରେ ରୋକ୍ ଲାଗିଲେ ହିଁ ରାହୁଲ ତାଙ୍କ ସଦସ୍ୟତା ପଦ ରକ୍ଷା ପାଇ ପାରିବେ ।
କ’ଣ ରହିଛି ରାହୁଲଙ୍କ ପାଖରେ ବିକଳ୍ପ ?
ରାହୁଲ ୨ ବର୍ଷ ଜେଲଦଣ୍ଡାଦେଶ ହୋଇଥିବାରୁ ସେ ସଭ୍ୟ ପଦ ହରାଇପାରନ୍ତି ବୋଲି କୁହାଯାଉଛି । ତେବେ ରାହୁଲଙ୍କୁ କୋର୍ଟଙ୍କ ପକ୍ଷରୁ ତତ୍କାଳ ୩୦ ଦିନର ଜାମିନ ପ୍ରଦାନ କରି ଆଶ୍ୱସ୍ତ କରିଛନ୍ତି । ତେବେ ଏବେ ବି ରାହୁଲଙ୍କ ପାଖରେ ସଭ୍ୟ ପଦ ରଦ୍ଦ ନହେବା ପାଇଁ ଅନେକ ଆଇନଗତ ବିକଳ୍ପ ମଧ୍ୟ ରହିଛି ।
ସିଆରପିସି ଧାରା ୩୭୪ରେ ଥିବା ବ୍ୟବସ୍ଥା ଅନୁଯାୟୁ ରାହୁଲ ଗାନ୍ଧୀ ଏହି ଦଣ୍ଡାଦେଶକୁ ଉପର କୋର୍ଟରେ ଚ୍ୟାଲେଞ୍ଜ କରିପାରିବେ । ଯଦି ସେସନ୍ସ କୋର୍ଟରୁ କୌଣସି ଆଶ୍ୱସ୍ତି ମିଳିଲାନି ତେବେ ସେସନ୍ସ କୋର୍ଟ ରାୟକୁ ହାଇକୋର୍ଟରେ ଚ୍ୟାଲେଞ୍ଜ କରିହେବ । ସେହିପରି ସିଆରପିସିର ଧାରା ୩୮୯ ଅନୁଯାୟୀ ଆବେଦନକାରୀ ଦଣ୍ଡାଦେଶକୁ ସ୍ଥଗିତ ରଖିବାପାଇଁ ମଧ୍ୟ ଆବେଦନ କରିପାରିବେ । ସମ୍ବିଧାନର ଧାରା ୧୩୬ ଅଧୀନରେ ରାହୁଲ ଗାନ୍ଧୀ ସୁପ୍ରିମକୋର୍ଟର ମଧ୍ୟ ଦ୍ୱାରସ୍ଥ ହୋଇପାରିବେ ।
ଭୁବନେଶ୍ୱର: ଗନ୍ଧମାର୍ଦ୍ଦନ ପର୍ବତକୁ ମିଳିଲା BHS ମାନ୍ୟତା । ବାୟୋଡାଇଭର୍ସିଟି ହେରିଟେଜ୍ ସାଇଟ୍ ବା ଜୈବ ବିବିଧ ଐତିହ୍ୟ ସ୍ଥଳର ମାନ୍ୟତା ପାଇଲା ବଲାଙ୍ଗୀର ଓ ବରଗଡ଼ ଫରେଷ୍ଟ ଡିଭିଜିନର ଗନ୍ଧମାର୍ଦ୍ଦନ ପର୍ବତ । ରାଜ୍ୟର ତୃତୀୟ BHS ମାନ୍ୟତା ପାଇଛି ଗନ୍ଧମାର୍ଦ୍ଦନ । ଆଗରୁ କନ୍ଧମାଳ ଜିଲ୍ଲାର ମଣ୍ଡାସୁରୁ ଜର୍ଜ ଏବଂ ଗଜପତି ଜିଲ୍ଲାର ମହେନ୍ଦ୍ର ତନୟାକୁ ମିଳିଛି BHS ମାନ୍ୟତା । ଗନ୍ଧମାର୍ଦ୍ଦନରେ ୧ ହଜାର ୫୫ ପ୍ରକାର ବୃକ୍ଷ ପ୍ରଜାତି ରହିଥିବାବେଳେ ୮୪୯ ପ୍ରଜାତିର ଆଞ୍ଜିଓସ୍ପର୍ମ, ୫୬ ପ୍ରକାର ଟେରିଡୋଫାଇଟ, ୪୦ ପ୍ରକାର ବ୍ରାୟୋଫାଇଟ, ୪୫ ପ୍ରକାର ଲାଇକେନ, ୨ ପ୍ରକାର ଜିମନୋସ୍ପର୍ମ ରହିଛି ।
ଏହା ସହ ୫୦୦ ପ୍ରଜାତିର ପ୍ରାଣୀଙ୍କ ଅଭୟସ୍ଥଳୀ ହେଉଛି ଗନ୍ଧମାର୍ଦ୍ଦନ । ତନ୍ମଧ୍ୟରେ ଅଛନ୍ତି ୪୩ ପ୍ରକାର ସ୍ତନ୍ୟପାୟୀ, ୧୬୧ ପ୍ରକାର ପକ୍ଷୀ, ୪୪ ପ୍ରକାର ସରୀସୃପ, ୧୧୮ ପ୍ରକାର ଉଭୟଚର, ୨୭ ପ୍ରକାର ଡ୍ରାଗନଫ୍ଲାଏ ବାସ କରୁଛନ୍ତି । ସେହପିର ୮୩ ପ୍ରଜାତିର ସ୍ପାଇଡର ବି ଗନ୍ଧମାର୍ଦ୍ଦନରେ ରହିଛନ୍ତି ।
ଲଣ୍ଡନ: ବ୍ରିଟେନରେ ବ୍ୟାନ ହେଲା ଟିକଟକ୍ । ଚୀନ କମ୍ପାନି ମାଲିକାନାଧୀନ ଭିଡିଓ ସେୟାରିଂ ଆପକୁ ବ୍ୟାନ କଲା ବ୍ରିଟେନ ସଂସଦ । ଗୋପନୀୟତା ଓ ସାଇବର ସିକ୍ୟୁରିଟି କାରଣରୁ ଏହି ପଦକ୍ଷେପ ନେଇଛନ୍ତି ସରକାର । ଟିକଟକକୁ ବହୁ ବ୍ରିଟେନ ସାଂସଦ ବ୍ୟବହାର କରୁଥିବାବେଳେ ସେମାନଙ୍କୁ ବି ଏହି ଆପ୍ ବ୍ୟବହାର ବନ୍ଦ କରିବା ଲାଗି ନିର୍ଦ୍ଦେଶ ଦିଆଯାଇଛି । ନୂଆ ନିୟମ ଫଳରେ ସଂସଦ ଭବନକୁ ଆସୁଥିବା ସାଂସଦ ଓ ପରିଦର୍ଶକମାନେ ଅଫିସିଆଲ ଓ୍ବାଇ-ଫାଇ କନେକସନ ଜରିଆରେ ଟିକଟକକୁ ଆସେସ କରିବାକୁ ଅନୁମତି ଦିଆଯିବ ନାହିଁ ।
ଅଭିଯୋଗ ଅନୁସାରେ ଟିକଟକ୍ ଆପ୍ ଜରିଆରେ ୟୁଜରମାନଙ୍କ ପର୍ଯ୍ୟାପ୍ତ ତଥ୍ୟ ସଂଗ୍ରହ କରାଯାଉଛି । ସେମାନଙ୍କ ବୟସ, ଲୋକେସନ, ଡିଭାଇସ ଓ ଏପରିକି ସେମାନଙ୍କ ଟାଇପିଂ ପ୍ୟାଟର୍ଣ୍ଣ ତଥ୍ୟକୁ ମଧ୍ୟ ସଂଗ୍ରହ କରାଯାଉଥିବା ଅଭିଯୋଗ ହୋଇଛି ।
