ପୁରୀ: ହ୍ୟୁମାନ ସାଗର ଓ ଶ୍ରୀୟା ପାରିବାରିକ ବିବାଦ ମାମଲାକୁ ନେଇ ଶ୍ରୀୟାଙ୍କ ପ୍ରେସମିଟ୍ । ହ୍ୟୁମାନଙ୍କ ଉପରେ ବର୍ଷିଲେ ପତ୍ନୀ ଶ୍ରୀୟା ମିଶ୍ର । ସ୍ବାମୀ ହ୍ୟୁମାନ ସାଗରଙ୍କ ବିରୋଧରେ ଆଣିଲେ ସଙ୍ଗୀନ ଅଭିଯୋଗ । କହିଲେ- ଅତ୍ୟଧିକ ମଦ ପିଇ ଗାଳିଗୁଲଜ ସହ ମାରପିଟ କରୁଥିଲେ ହ୍ୟୁମାନ ।

ଆଗୁ ସେ କହିଛନ୍ତି, ‘ମଦ ପିଇ ସ୍ବାସ୍ଥ୍ୟ ଖରାପ ହେଲା, କ୍ୟାରିୟର ବି । ତେଣୁ ମଦ ପିଇବାକୁ ବାରଣ କରିବାରୁ ଅତ୍ୟାଚାର ବଢ଼ିଥିଲା । ଝିଅ ଜନ୍ମ ପରଠାରୁ ନିର୍ଯାତନାର ମାତ୍ରା ବଢ଼ିଥିଲା ।  ଯେହେତୁ ସ୍ୱାମୀ ସେଲିବ୍ରିଟି, ସେଥିପାଇଁ ସବୁ ନିର୍ଯାତନା ସହିଯାଉଥିଲି । ନିର୍ଯାତନା ଅସହ୍ୟ ହେବାରୁ ଥାନାର ଦ୍ୱାରସ୍ଥ ହୋଇଛି ।’

ସେ କହିଛନ୍ତି, ‘ଶରୀରର ବିଭିନ୍ନ ଅଂଶକୁ ପିଟିଛନ୍ତି ହ୍ୟୁମାନ । ଶରୀରରେ ଦାଗ ରହିଛି । ଏହାକୁ ଲୁଚାଇବାକୁ ଟାଟୁ ବନାଇଛି ।’

ଶାଶୂଙ୍କୁ ନେଇ ଶ୍ରୀୟା କହିଛନ୍ତି, ‘ଧର୍ମକୁ ନେଇ କୌଣସି ନିର୍ଯାତନା ଦେଉନଥିଲେ ଶାଶୂ-ଶ୍ୱଶୁର’ । ଶାଶୂ ଧର୍ମ ବଦଳାଇବା କଥାରେ ପିଟାପିଟି କରିନାହାନ୍ତି ।  ମୁଁ ବ୍ରାହ୍ମଣ ଘରର ଝିଅ, ଅଲଗା ଧର୍ମରେ ବିବାହ କରିଥିବାରୁ ସିନ୍ଦୁର ଲଗାଇବାକୁ ବାରଣ କରୁଥିଲେ ।’

ଝିଅକୁ ନେଇ ଶ୍ରୀୟା କହିଛନ୍ତି, ‘ଝିଅ ସହିତ ହ୍ୟୁମାନଙ୍କ ଅଧିକ ଆଟାଚମେଣ୍ଟ ନାହିଁ । ସେ ଝିଅର କୌଣସି ଦାୟିତ୍ୱ ନିଅନ୍ତିନି ।’

ଥାର୍ଡ ପର୍ସନର ଅନୁପ୍ରବେଶରୁ ଅଶାନ୍ତି ହୋଇଥିବା କହିଛନ୍ତି ଶ୍ରୀୟା । ବହୁବାର କମ୍ପ୍ରମାଇଜ୍ ହୋଇଛି । ହ୍ୟୁମାନଙ୍କ ଗୋଡ଼ହାତ ଧରି ମୋ ପରିବାର ବୁଝାଇଛନ୍ତି । ଗତବର୍ଷ ସେପଟେମ୍ବର ୨୭ରେ ଏମିତି ଏକ କଥାରେ ମାରପିଟ୍ କରିଥିଲେ ଓ ଜୀବନରୁ ମାରିଦେବାକୁ ଧମକ ଦେଇଥିଲେ ହ୍ୟୁମାନ । ଏମିତିକି କମ୍ପ୍ରମାଇଜ ପାଇଁ ମୋ ବାପାମାଆ ଯାଇଥିବା ବେଳେ ତାଙ୍କୁ ଅସମ୍ମାନ କରିବା ସହ ମୋତେ ଘରୁ ବାହାର କରିଦେଇଥିଲେ । ସେହିଦିନଠାରୁ ବାପାଙ୍କ ଘରେ ରହୁଛି ବୋଲି ଶ୍ରୀୟା କହିଛନ୍ତି ।

ଏବେ ବି ମୋ ପରିବାର ବୁଝାପଣା ପାଇଁ ପ୍ରସ୍ତୁତ ଅଛନ୍ତି । ହେଲେ ହ୍ୟୁମାନ କି ତାଙ୍କ ମାଆଙ୍କର କୌଣସି ଫୋନ କଲ୍ କି ମେସେଜ୍ ଆସି ନଥିବା କହିଛନ୍ତି ଶ୍ରୀୟା । ପୂର୍ବପରି ଭଲ ପାଇବା ଓ ସମ୍ମାନ ଦେଲେ ପୁଣି ସ୍ବାମୀଙ୍କ ପାଖକୁ ଫେରିବି ବୋଲି ଶ୍ରୀୟା କହିଛନ୍ତି ।

୩୦ ତାରିଖ ଯାଏଁ ସମୟ ଦିଆଯାଇଛି । ସମାଧାନର ବାଟ ନମିଳିଲେ, ବିକଳ୍ପ ଚିନ୍ତା କରିବି ବୋଲି କହିଛନ୍ତି ଶ୍ରୀୟା ।