ଭୁବନେଶ୍ୱର: ହକି ଟିକେଟ କଳାବଜାରୀ ଅଭିଯୋଗ । ଟିକେଟ କଳାବଜାରୀ ଘଟଣାରେ ୫ ଜଣଙ୍କୁ ଗିରଫ କରିଛି ପୋଲିସ । ସେମାନଙ୍କ ଠାରୁ ୩୫ଟି ହକି ଟିକେଟ୍, ୧୦ ହଜାର ଟଙ୍କା ଜବତ କରାଯାଇଛି । ସେମାନେ ଛାତ୍ର ଓ ସ୍ଥାନୀୟ ଲୋକ ବୋଲି ଜଣାପଡ଼ିଛି । ସାଧା ପୋଷାକରେ ପୋଲିସ ମୁତୟନ ହୋଇଥିଲେ । ଗରାଖ ଭାବେ ପୋଲିସ ସେଠାକୁ ଯାଇ ଟିକେଟ୍ କଳାବଜାରୀଙ୍କୁ ଗିରଫ କରିଛି । ଗିରଫ ହୋଇଥିବା ୫ ଜଣଙ୍କୁ କୋର୍ଟ ଚାଲାଣ କରାଯିବ ।
ପ୍ରତାରିତ ପ୍ରେମୀଙ୍କ ପ୍ରଥମ ପସନ୍ଦ ବେବଫା ଚା’ବାଲା, ଲାଗୁଛି ଲମ୍ବା ଲାଇନ
ଲକ୍ଷ୍ନୌ: ଭାରତରେ ଚା’ଖଟି ଏକ ନିତିଦିନିଆ କାହାଣୀ । ବହୁ ସମୟରେ ଏହି ଚା ଖଟିରୁ କେତେ ଯେ କାହାଣୀ ଖବରର ଶିରୋନାମା ପାଲଟିଯାଏ। କିନ୍ତୁ ଉତ୍ତର ପ୍ରଦେଶର ଜଣେ ଏଭଳି ଚା ବ୍ୟବସାୟୀଙ୍କ ଚର୍ଚ୍ଚା ଏବେ ସବୁଠି । କାରଣ ଏହି ଦୋକାନର ନାମ ବେବଫା ଚା’ବାଲା । ଏଭଳି ଅଜବ ନାଁ ଶୁଣି ଆପଣଙ୍କ ମନକୁ ଅନେକ ପ୍ରଶ୍ନ ଆସୁଥାଇପାରେ । ହେଲେ ଦୋକାନୀଙ୍କ ମୁହଁରୁ ଏହାର ଉତ୍ତର ଶୁଣିଲେ ଆପଣ ବି ଆଶ୍ଚର୍ଯ୍ୟ ହୋଇଯିବେ ।
ହାପୁଡ ଜନପଦର ଧୌଲଲାନାରେ ଖୋଲିଛି ଏହି ଭିନ୍ନ ଚା’ ଦୋକାନ । ପ୍ରେମରେ ପ୍ରତାରଣା ପାଇଥିବା ବ୍ୟକ୍ତିଙ୍କ ପାଇଁ କିନ୍ତୁ ବ୍ୟବସାୟୀଙ୍କ ଅଜବ ଦରଦ । ପ୍ରେମରେ ଧୋକା ଖାଇଥିବା ଯୁବକ ଯୁବତୀଙ୍କୁ ବ୍ୟବସାୟୀ ଦେଉଛନ୍ତି ସ୍ପେଶାଲ ଅଫର୍ । ଆଜ୍ଞା ହଁ ଯଦି ଆପଣ ପ୍ରେମରେ ଧୋକା ଖାଇଛନ୍ତି ତେବେ କେବଳ ୧୦ ଟଙ୍କା ଦେଇ ଆପଣ ଚା’ ପିଇପାରିବେ । କିନ୍ତୁ ଯଦି ଆପଣ ପ୍ରେମିକ ବା ପ୍ରେମିକାଙ୍କ ସହ ଏଠାକୁ ଚା ପିଇବାକୁ ଆସନ୍ତି ଏଥିପାଇଁ ୧୫ ଟଙ୍କା ଦେବାକୁ ପଡିଥାଏ
ଆପଣ ଭାବୁଥିବେ ବ୍ୟବସାୟୀଙ୍କ ଏଭଳି ନିଷ୍ପତ୍ତି କାହିଁକି ? ସେ ଖୋଦ୍ ପ୍ରେମରେ ଧୋକା ଖାଇଛନ୍ତି କି ? ନା ସେ ପ୍ରେମରେ ଧୋକା ଖାଇ ନାହାନ୍ତି । ହେଲେ ନିଜ ବନ୍ଧୁ ମାନଙ୍କୁ ଦେଖି ଦୋକାନର ଏକ ୟୁନିକ୍ ନାଁ ସେ ରଖିଛନ୍ତି । ଦୋକାନୀଙ୍କ କହିବା କଥା ଯେ, ଅଧିକାଂଶ ସମୟରେ ତାଙ୍କ ସାଙ୍ଗ ମାନେ ପ୍ରେମରେ ପ୍ରତାରଣା ପାଇ ବନ୍ଧୁଙ୍କ ପରାମର୍ଶ ଚାହୁଁଥିଲେ । ଏଭଳି ଅନେକ ବନ୍ଧୁଙ୍କ ହୃଦୟ ଭାଙ୍ଗିଥିବା ସେ ଜାଣିବାକୁ ପାଇଥିଲେ । ଆଉ ସେହି ସାଙ୍ଗମାନଙ୍କ ଠୁ ପ୍ରେରଣା ପାଇ ଚା’ ଦୋକାନ କରିବାକୁ ନିଷ୍ପତ୍ତି ନେଇଥିଲେ ବ୍ୟବସାୟୀ । ସେବେଠାରୁ ବେବଫା ଚା ବ୍ୟବସାୟୀଙ୍କ ଦୋକାନରେ ପ୍ରେମିକଙ୍କ ଭିଡ ଜମୁଛି । ଅଧିକାଂଶ ଯୁବପୀଢୀଙ୍କ ପ୍ରଥମ ପସନ୍ଦ ପାଲଟିଛି ବେବଫା ଚା ଦୋକାନୀ ।
ସୈନିକ ସ୍କୁଲରେ ଛାତ୍ରଙ୍କୁ ନିର୍ଦ୍ଧୁମ ମାଡ଼, ୪ ଛାତ୍ରଙ୍କୁ ପାଇପରେ ପିଟିଲେ ଓ୍ବାର୍ଡେନ
ସମ୍ବଲପୁର: ସମ୍ବଲପୁର ସୈନିକ ସ୍କୁଲରେ ଛାତ୍ରଙ୍କୁ ନିର୍ଦ୍ଧୁମ ମାଡ଼ । ସ୍କୁଲର ୪ ଜଣ ଛାତ୍ରଙ୍କୁ ଓ୍ୱାର୍ଡେନ୍ ଦେବଶ୍ରୀ ପ୍ରଧାନ ନିସ୍ତୁକ ମାଡ଼ ମାରିଥିବା ଅଭିଯୋଗ ହୋଇଛି । ତେବେ କେଉଁ କାରଣ ପାଇଁ ମାଡ଼ି ମରାଗଲା ତା’ର କାରଣ ଅସ୍ପଷ୍ଟ ରହିଛି । ଏନେଇ ଆହତ ଛାତ୍ରଙ୍କ ଅଭିଭାବକ ବୁର୍ଲା ଥାନାରେ ଏତଲା ଦେଇଛନ୍ତି । ମୋଟ ୪ ଜଣ ଛାତ୍ରଙ୍କୁ ଓ୍ବାର୍ଡେନ୍ ପ୍ଲାଷ୍ଟିକ ପାଇପରେ ନିସ୍ତୁକ ମାଡ଼ ମାରି ଲହୁ ଲୁହାଣ କରିଥିଲେ । ଏପରିକି ମେଜର ରାଠି ମଧ୍ୟ ଛାତ୍ରଙ୍କୁ ମାଡ଼ ମାରିଛନ୍ତି ବୋଲି ଓ୍ୱାର୍ଡେନ କହିଛନ୍ତି । ବିଶୃଙ୍ଖଳା କଲେ ଏଭଳି ମାଡ଼ ମରାଯାଏ ବୋଲି ସଂପୃକ୍ତ ୱାର୍ଡେନ କହୁଥିବା ବେଳେ, ପରିବାର ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।
ସୈନିକ ସ୍କୁଲରେ ଛାତ୍ରମାନେ ବିଶୃଙ୍ଖଳା କଲେ ସେମାନଙ୍କୁ ଗାଇଡଲାଇନ ଅନୁସାରେ ଦଣ୍ଡବିଧାନ ନିୟମ ରହିଛି । କିନ୍ତୁ, ଅମାନୁଷିକ ଭାବରେ ଛାତ୍ରଙ୍କୁ ପାଇପରେ ମାଡ଼ ମାରିବା କେତେଦୂର ଯଥାର୍ଥ ବୋଲି ଅଭିଭାବକମାନେ ପ୍ରଶ୍ନ କରିଛନ୍ତି । ଲଗାତାର ଭାବରେ ପ୍ରତିଦିନ ରାତିରେ ଛାତ୍ରଙ୍କୁ ଏଭଳି ଅମାନୁଷିକ ଭାବରେ ମାଡ଼ ମରାଯାଉଥିବା ଆହତ ଛାତ୍ରମାନେ କହିଛନ୍ତି ।
ନବୀନ ନିବାସରେ ଚାଲିଛି ସ୍ବତନ୍ତ୍ର ଉନ୍ନୟନ ପରିଷଦର ବୈଠକ
ଭୁବନେଶ୍ବର: ନବୀନ ନିବାସରେ ଚାଲିଛି ସ୍ବତନ୍ତ୍ର ଉନ୍ନୟନ ପରିଷଦର ବୈଠକ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଚାଲିଛି ବୈଠକ । ସ୍ବତନ୍ତ୍ର ଉନ୍ନୟନ ପରିଷଦର ଉପଦେଷ୍ଟା ପ୍ରଦୀପ ମାଝିଙ୍କ ନେତୃତ୍ବରେ ୯ଟି ଜିଲ୍ଲାର ଉନ୍ନୟନ ପରିଷଦର ଅଧ୍ୟକ୍ଷ ଓ ଉପାଧ୍ୟକ୍ଷ ଏହି ବୈଠକରେ ସାମିଲ ହୋଇଛନ୍ତି । ଆଦିବାସୀଙ୍କ ଉନ୍ନତି ଉପରେ ବୈଠକରେ ଆଲୋଚନା କରାଯିବ ।
ଏହାସହ ଆଦିବାସୀଙ୍କ କଳା ସଂସ୍କୃତିକୁ ଉନ୍ନତ କରିବାକୁ ଲକ୍ଷ୍ୟ ରଖିଛି ପରିଷଦ । ସେମାନଙ୍କର ଜୀବନ ଜୀବିକା ସହ ଅଞ୍ଚଳର ବିକାଶକୁ ତ୍ବରାନ୍ବିତ କରିବା ଉପରେ ଆଲୋଚନା ହେବ ।
ଆଜିଠୁ ନ୍ୟୁଜିଲାଣ୍ଡ ବିପକ୍ଷରେ ଭାରତର ଦିନିକିଆ ସିରିଜ୍, ଶ୍ରେୟସ ଆୟାର ବାଦ୍
ହାଇଦ୍ରାବାଦ: ଆଜିଠୁ ଆରମ୍ଭ ହେଉଛି ନ୍ୟୁଜିଲାଣ୍ଡ ବିପକ୍ଷରେ ଭାରତର ଦିନିକିଆ ସିରିଜ୍ । ଭାରତ-ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ଦିନିକିଆ ଆଜି ହାଇଦ୍ରାବାଦରେ ଖେଳାଯିବ । ଦ୍ବିତୀୟ ଦିନିକିଆ ଜାନୁଆରୀ ୨୧ ରାୟପୁରରେ ଏବଂ ତୃତୀୟ ମ୍ୟାଚ୍ ଇନ୍ଦୋରରେ ଜାନୁଆରୀ ୨୪ରେ ଖେଳାଯିବ । ଏହାପୂର୍ବରୁ ଭାରତୀୟ କ୍ରିକେଟ ଦଳକୁ ବଡ଼ ଝଟକା ଲାଗିଛି ।
ଆହତ ଯୋଗୁ ଭାରତୀୟ କ୍ରିକେଟ ଦଳର ବ୍ୟାଟ୍ସମ୍ୟାନ୍ ଶ୍ରେୟସ ଆୟାର ସିରିଜରୁ ବାହାରି ଯାଇଛନ୍ତି । ତାଙ୍କ ସ୍ଥାନରେ ରଜତ ପାଟିଦାରଙ୍କୁ ଦଳରେ ସାମିଲ କରାଯାଇଛି । ଶ୍ରେୟସଙ୍କ ପିଠିରେ ଗଭୀର ଆଘାତ ଲାଗିଥିବାରୁ ତାଙ୍କୁ ସିରିଜରୁ ବାଦ୍ ଦିଆଯାଇଛି । ଚିକିତ୍ସା ପାଇଁ ତାଙ୍କୁ ବେଙ୍ଗାଲୁରୁସ୍ଥିତ ନ୍ୟାସନାଲ କ୍ରିକେଟ ଏକାଡେମୀ ପଠାଇ ଦିଆଯାଇଛି । ସେଠାରେ ତାଙ୍କର ଚିକିତ୍ସା ଚାଲିବ ।
ଭାରତୀୟ ଦଳ ନ୍ୟୁଜିଲାଣ୍ଡ ବିପକ୍ଷରେ ୩ଟି ଦିନିକିଆ ଓ ୩ଟି ଟି-୨୦ ସିରିଜ ଖେଳିବ । ଶ୍ରୀଲଙ୍କା ବିପକ୍ଷରେ ବଡ଼ ବିଜୟ ପରେ ଏଥର ମଧ୍ୟ ଭଲ ପ୍ରଦର୍ଶନ କରିବ ବୋଲି ଆଶା କରାଯାଉଛି ।
ତିନି ରାଜ୍ୟର ବିଧାନସଭା ନିର୍ବାଚନ ପାଇଁ ଆଜି ବାଜିପାରେ ବିଗୁଲ
ନୂଆଦିଲ୍ଲୀ: ତିନି ରାଜ୍ୟରେ ବିଧାନସଭା ନିର୍ବାଚନ ପାଇଁ ବାଜିବ ବିଗୁଲ । ଆଜି ଅରାହ୍ନରେ ନିର୍ବାଚନ କମିସନରଙ୍କ ପ୍ରେସମିଟ । ତିନି ରାଜ୍ୟର ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା କରିପାରନ୍ତି ନିର୍ବାଚନ ଆୟୋଗ । ନାଗାଲାଣ୍ଡ, ତ୍ରିପୁରା ଓ ମେଘାଳୟରେ ନିର୍ବାଚନ ତାରିଖ ଘୋଷଣା ହୋଇପାରେ ।
ଅପରାହ୍ନ ସାଢ଼େ ୨ଟାରେ ପୋଲ ପ୍ୟାନେଲର ପ୍ରେସ କନଫରେନ୍ସରେ ନିର୍ବାଚନ ତାରିଖ ତାରିଖ ଘୋଷଣା ହେବା ସମ୍ଭାବନା ରହିଛି । ନିର୍ବାଚନ ହେବାକୁ ଥିବା ପୂର୍ବୋତ୍ତରର ଏହି ତିନି ରାଜ୍ୟକୁ ନିର୍ବାଚନ କମିଶନଙ୍କ ଟିମ୍ ୪ଦିନିଆ ଗସ୍ତ କରି ସ୍ଥିତି ସମୀକ୍ଷା କରିଥିଲେ । ଗସ୍ତ ପରେ ନିର୍ବାଚନ କମିଶନର ରାଜୀବ କୁମାରଙ୍କ ସହ ବୈଠକ କରିଥିଲା ଟିମ ।
ଆଜିଠୁ ୫ ଦିନିଆ ତୀର୍ଥଯାତ୍ରାରେ ବରିଷ୍ଠ ନାଗରିକ, ସ୍ବତନ୍ତ୍ର ଟ୍ରେନର ଶୁଭାରମ୍ଭ କଲେ ନବୀନ
ସମ୍ବଲପୁର: ଆଧ୍ୟାତ୍ମିକ ଯାତ୍ରାର ଦିବ୍ୟ ଅନୁଭବ । ଆଜିଠୁ ଆରମ୍ଭ ହେଉଛି ବରିଷ୍ଠ ନାଗରିକ ତୀର୍ଥ ଯାତ୍ରା ଯୋଜନା । ସମ୍ବଲପୁର ରେଳ ଷ୍ଟେସନରୁ ଆଗ୍ରା-ମଥୁରା-ବୃନ୍ଦାବନ ଅଭିମୁଖେ ଯିବେ ବରିଷ୍ଠ ନାଗରିକ । ଏଥିପାଇଁ ବିଭିନ୍ନ ଜିଲ୍ଲାରୁ ସ୍ବତନ୍ତ୍ର ବସ୍ ଯୋଗେ ସମ୍ବଲପୁରରେ ପହଞ୍ଚିଛନ୍ତି ବରିଷ୍ଠ ନାଗରିକ । ଆଜି ଏହି ତୀର୍ଥଯାତ୍ରୀ ଟ୍ରେନର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । 2019-20 ବର୍ଷ ପାଇଁ ବରିଷ୍ଠ ନାଗରିକ ଆବେଦନ କରିଥିଲେ I ହେଲେ କରୋନା ପାଇଁ ଯାତ୍ରାକୁ ସ୍ଥଗିତ ରଖାଯାଇଥିଲା ।
ଗତକାଲି ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ବରିଷ୍ଠ ନାଗରିକଙ୍କୁ ସ୍ବତନ୍ତ୍ର ଭାବେ ସ୍ବାଗତ କରି ସ୍ବତନ୍ତ୍ର ବସ୍ରେ ସମ୍ବଲପୁରରୁ ପଠାଯାଇଛି । ଆଜି ସମ୍ବଲପୁରରୁ ବାହାରିବ ତୀର୍ଥଯାତ୍ରୀ ଟ୍ରେନ୍ । ଆଜିଠୁ ୨୨ ତାରିଖ ପର୍ଯ୍ୟନ୍ତ ୫ଦିନ ଧରି ବୃନ୍ଦାବନ, ମଥୁରା ଓ ଆଗ୍ରା ବୁଲି ଭଗବାନଙ୍କ ଦର୍ଶନ କରିବେ ବରିଷ୍ଠ ନାଗରିକ I ରାଜ୍ୟ ସରକାରଙ୍କ ଏହି ଯୋଜନାରେ ବରିଷ୍ଠ ନାଗରିକ ମାନେ ତୀର୍ଥ ବାହାରି ଖୁସି ପ୍ରକାଶ କରିବା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଆଶୀର୍ବାଦ ଦେଇଛନ୍ତି I
ସୁନ୍ଦରଗଡ ପାଇଁ ଖୁସି ଖବର, ୪ ଷ୍ଟାଡିୟମକୁ ମିଳିଲା ଏଫଆଇଏଚ ମାନ୍ୟତା
ଭୁବନେଶ୍ବର: ଓଡ଼ିଶାର ଆଉ ୪ ଷ୍ଟାଡିୟମକୁ ମିଳିଲା ଏଫଆଇଏଚ ମାନ୍ୟତା । ଓଡ଼ିଶା ହକି ଇନଫ୍ରାଷ୍ଟ୍ରକଚରକୁ ବିଗ୍ ବୁଷ୍ଟ । ସୁନ୍ଦରଗଡ଼ର ସୌନାମରା, ଗୁରୁଣ୍ଡିଆ, ସବଡେଗା ଓ ତିଳେଇବଣି ହକି ଷ୍ଟାଡିୟମକୁ ଏଫଆଇଏଚ କାଟାଗୋରୀ 3 ଫିଲ୍ଡ ସାର୍ଟିଫିକେଟ୍ ମିଳିଛି ।
ଆଗକୁ ଏହା ହକିର ହାର୍ଟ ଲ୍ୟାଣ୍ଡ ହେବ । ତୃଣମୂଳ ସ୍ତରରୁ ପ୍ରତିଭା ପରିସ୍ଫୁଟିତ କରିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ହକି ଇଣ୍ଡିଆ ମଧ୍ୟ ଟୁଇଟ୍ କରି ଶୁଭେଚ୍ଛା ଜଣାଇଛି । ଗତବର୍ଷ ଡିସେମ୍ବରରେ ଏହି ୪ଟି ଷ୍ଟାଡିୟମ ପରିଦର୍ଶନ କରିଥିଲା ହକି ଇଣ୍ଡିଆ ।
୧୦ ପ୍ରତିଶତ କର୍ମଚାରୀ ବିଦା କରିବ ମାଇକ୍ରୋସଫ୍ଟ, ଆମାଜନରେ ବି ଆରମ୍ଭ ଛଟେଇ ପ୍ରକ୍ରିୟା
ନନ୍ଦିଘୋଷ ବ୍ୟୁରୋ: ମାଇକ୍ରୋସଫ୍ଟରେ ଆଜି ଠାରୁ ଆରମ୍ଭ ହୋଇପାରେ ମେଗା ଛଟେଇ । ବିଶ୍ବ କମ୍ପ୍ୟୁଟର ଶିଳ୍ପର ପ୍ରମୁଖ କମ୍ପାନୀରେ ଛଟେଇ ପ୍ରକ୍ରିୟା ପ୍ରାଥମିକ ଭାବେ ଇଞ୍ଜିନିୟରିଂ ଡିଭିଜନରେ ଆରମ୍ଭ ହେବ । ମାଇକ୍ରୋସଫ୍ଟରେ ୨ ଲକ୍ଷ ୨୦ ହଜାର କର୍ମଚାରୀ କାର୍ଯ୍ୟ କରୁଛନ୍ତି । ଗତବର୍ଷ ଦୁଇଥର କମ୍ପାନୀ ଛଟେଇ କରିଥିବା ବେଳେ ଚଳିତ ବର୍ଷ ଏହି ପ୍ରକ୍ରିୟା ପୁଣି ଆରମ୍ଭ ହେବା ସୂଚନା ମିଳିଛି । ମାଇକ୍ରୋସଫ୍ଟର ବିଭିନ୍ନ ସ୍ତରରେ ୫ରୁ ୧୦ ପ୍ରତିଶତ କର୍ମଚାରୀ ଛଟେଇ ହେବା ଆଶଙ୍କା କରାଯାଉଛି ।
ବିଶ୍ବ ଅର୍ଥନୈତିକ ମାନ୍ଦାବସ୍ଥା ଓ ବିଜ୍ଞାପନଦାତାଙ୍କ ବଜେଟ ହ୍ରାସ ପ୍ରଭାବରେ କେବଳ ମାଇକ୍ରୋସଫ୍ଟ ନୁହେଁ, ଅନ୍ୟାନ୍ୟ କମ୍ପାନୀ ବି କର୍ମଚାରୀ ଛଟେଇ ପ୍ରକ୍ରିୟା ଜାରି ରଖିଛନ୍ତି । ସେପଟେ ଆମାଜନରେ ବି ଆରମ୍ଭ ହୋଇଛି ଛଟେଇ ପ୍ରକ୍ରିୟା । ବିଶ୍ବରେ ମୋଟ ୧୮ ହଜାର କର୍ମଚାରୀଙ୍କୁ ଆମାଜନ ଛଟେଇ କରିବା ପ୍ରକ୍ରିୟା ଜାରି ରଖିଥିବାବେଳେ ଭାରତରେ 1 ପ୍ରତିଶତ କର୍ମଚାରୀଙ୍କୁ ଛଟେଇ କରିଛି । ଏହି ପ୍ରକ୍ରିୟାରେ ଆମାଜାନରୁ ବିଦା ହୋଇଛନ୍ତି 1 ହଜାର କର୍ମଚାରୀ । ଭାରତରେ ଆମାଜନର ପ୍ରାୟ 1 ଲକ୍ଷ କର୍ମଚାରୀ କାର୍ଯ୍ୟ କରୁଛନ୍ତି । ତେବେ ଛଟେଇ ହୋଇଥିବା କର୍ମଚାରୀଙ୍କୁ କମ୍ପାନୀ 5 ମାସର ଦରମା ଦେଇଛି ।
ଗତବର୍ଷ ନଭେମ୍ବରରେ ମେଟା ୧୧ ହଜାର କର୍ମଚାରୀ ଅର୍ଥାତ ମୋଟ କର୍ମଚାରୀ ସଂଖ୍ୟାର ୧୩ ପ୍ରତିଶତ କର୍ମଚାରୀଙ୍କୁ ଛଟେଇ ଲାଗି ଘୋଷଣା କରିଥିଲା । ଗତବର୍ଷ ଅଗଷ୍ଟରେ ସ୍ନାପଚାଟ ଏହାର ମୋଟ କର୍ମଚାରୀଙ୍କ ମଧ୍ୟରୁ ୨୦ ପ୍ରତିଶତ ଅର୍ଥାତ ୧୨ ଶହ କର୍ମଚାରୀଙ୍କୁ ଛଟେଇ କରିଥିଲା । ଚଳିତ ଜାନୁଆରୀରେ ଆଇଟି କମ୍ପାନି ସେଲ୍ସଫୋର୍ସ ୧୦ ପ୍ରତିଶତ ଅର୍ଥାତ ପ୍ରାୟ ୮ ହଜାର କର୍ମଚାରୀଙ୍କୁ ଛଟେଇ କରିଛି । ଗତବର୍ଷ ଅକ୍ଟୋବରରେ ଟୁଇଟର ପ୍ରାୟ ୭ ହଜାର ୫୦୦ କର୍ମଚାରୀଙ୍କୁ ବିଦା କରିଥିଲା ।
କାର ପାର୍କିଂକୁ ନେଇ ଦୁଇ ଗୋଷ୍ଠୀ ମୁହାଁମୁହିଁ, ବାପା ମୃତ ପୁଅ ଗୁରୁତର
ଗଜପତି: କାର ପାର୍କିଂକୁ ନେଇ ବଚସା । ବାପା ପୁଅଙ୍କୁ ସଂଘବଦ୍ଧ ଆକ୍ରମଣ । ଆକ୍ରମଣରେ ବାପା ଏସ ଶ୍ରୀନିବାସଙ୍କ ମୃତ୍ୟୁ ହୋଇଥିବା ବେଳେ ପୁଅ ଜଗଦିଶ ଆହତ ହୋଇଛନ୍ତି । ପାରଳାଖେମୁଣ୍ଡି ଗୋଲା ସାହିରେ ଘଟିଛି ଘଟଣା । ସୂଚନା ମୁତାବକ, ଗତକାଲି ସନ୍ଧ୍ୟାରେ କାର ପାର୍କିଂକୁ ନେଇ ବିବାଦ ଦେଖା ଦେଇଥିଲା । ପରବର୍ତ୍ତୀ ସମୟରେ ବଚସାକୁ ନେଇ ହାତାହାତି ହୋଇଥିଲେ ।
ଅଟୋରେ ଆସିଥିବା ଏକ ଗୋଷ୍ଠୀ ହଠାତ୍ ଗାଡି ଭଙ୍ଗାରୁଜା କରିବା ସହ ବାପ ପୁଅଙ୍କୁ ଆକ୍ରମଣ କରିଥିଲେ । ଆକ୍ରମଣକାରୀଙ୍କ ଠାରୁ ନିଜ ପୁଅକୁ ବଞ୍ଚାଇବାକୁ ଯାଇ ଆକ୍ରମଣର ଶିକାର ହୋଇଥିଲେ ବାପା ଶ୍ରୀନିବାସ । ଗୁରୁତର ଅବସ୍ଥାରେ ଶ୍ରୀନିବାସଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।