ପୁରୀ : ରଥଯାତ୍ରା ନୀତି ନିର୍ଘଣ୍ଟକୁ ପରିଚାଳନା କମିଟିର ମୋହର । ଶୃଙ୍ଖଳିତ ଘୋଷଯାତ୍ରାକୁ ଗୁରୁତ୍ବ । ଅଦିନିଆ ରଥଯାତ୍ରାକୁ ବିରୋଧ । ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଗଜପତି ମହାରାଜାଙ୍କ ଅଧ୍ୟକ୍ଷତାରେ ଶ୍ରୀମନ୍ଦିର ପରିଚାଳନା କମିଟି ବୈଠକରେ ନିଆଯାଇଛି ବହୁ ଗୁରୁତ୍ଵପୂର୍ଣ୍ଣ ନିଷ୍ପତ୍ତି । ଆଗାମୀ ଦେବସ୍ନାନ ପୂର୍ଣ୍ଣମୀ, ରଥଯାତ୍ରା ଓ ବାହୁଡା଼ ଯାତ୍ରା ନୀତି ନିର୍ଘଣ୍ଟ ଓ ବ୍ୟବସ୍ଥାବଳୀକୁ ପରିଚାଳନା କମିଟି ମୋହର ମାରିଛି । ନରେନ୍ଦ୍ର ପୁଷ୍କରିଣୀ ଠାରେ ଶ୍ରୀମନ୍ଦିର ପ୍ରଶାସନର ଏକ ସ୍ଥାୟୀ ସୂଚନା କେନ୍ଦ୍ର ଓ ଅଭ୍ୟର୍ଥନା ପ୍ରକୋଷ୍ଠ କରାଯିବାକୁ ନିଷ୍ପତ୍ତି ହୋଇଛି । ଇସ୍କନର ଅଦିନିଆ ରଥଯାତ୍ରାକୁ ନେଇ ବୈଠକରେ ଗଜପତି କ୍ଷୋଭ ପ୍ରକାଶ କରିଛନ୍ତି । ଏ ନେଇ ପରିଚାଳନା କମିଟି ରାଜ୍ୟ ସରକାରଙ୍କୁ ଜଣାଇବା ସହ ଏକ କମିଟି ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କୁ ଭେଟି ସମସ୍ୟାର ସମାଧାନ ପାଇଁ ନିବେଦନ କରିବ । ସେହିପରି ଶ୍ରୀମନ୍ଦିର ଆଇନର ସଂଶୋଧନ, ଆଦର୍ଶ ଗୁରୁକୁଳ ନିର୍ମାଣ କାର୍ଯ୍ୟ ଶୀଘ୍ର ସାରିବା ନେଇ ନିଷ୍ପତ୍ତି ନିଆଯାଇଛି । ସେବାୟତ ଆବାସ ଯୋଜନା ପାଇଁ ଅନ୍ୟତ୍ର ଜମି ଚିହ୍ନଟ ସହ ମଶାଣିଚଣ୍ଡୀ ଠାରେ ନୂଆ କଲୋନୀ କରାଯିବ । ସେହିପରି ଜମିଜମା ସମସ୍ୟା ନେଇ ରାଜ୍ୟ ସରକାରଙ୍କୁ ନିୟମ ପ୍ରଣୟନ ପାଇଁ ଅନୁରୋଧ କରିଥିବା ମୁଖ୍ୟ ପ୍ରଶାସକ ସୂଚନା ଦେଇଛନ୍ତି।

ରତ୍ନ ଭଣ୍ଡାର ଗଣତି କାର୍ଯ୍ୟ ଆଗାମୀ ନୀଳାଦ୍ରି ବିଜେ ପର୍ଯ୍ୟନ୍ତ ସ୍ଥଗିତ ରହିବା ନେଇ ନିଷ୍ପତ୍ତି ନିଆଯାଇଛି । ନିଳାଦ୍ରୀ ବିଜେ ପରେ ଏନେଇ ଦିନ ସ୍ଥିର କରାଯିବ । ବାହାର ରତ୍ନଭଣ୍ଡାରର ୩ଟି ତାଲା ଖରାପ ଥିବାରୁ ଏହାକୁ ପରିବର୍ତ୍ତନ କରିବା ପାଇଁ ନିଷ୍ପତ୍ତି ନିଆଯାଇଛି । ସେହିପରି ଭିତର ଭଣ୍ଡାର ଘରେ ଥିବା ବଡ଼ ବଡ଼ ମୂଲ୍ୟବାନ ରତ୍ନ ଅଳଙ୍କାର ଖଟ ଶେଜ ଘରକୁ ଆଣାଯାଇ ଗଣତି କରାଯିବ । ଫଟୋଗ୍ରାଫି, ଭିଡ଼ିଓଗ୍ରାଫି ଓ ଥ୍ରୀଡ଼ି ମ୍ୟାପିଙ୍ଗ ପରେ ଭିତର ରତ୍ନଭଣ୍ଡାରକୁ ସ୍ଥାନାନ୍ତର କରାଯିବ । ବୈଠକରେ ମୁଖ୍ୟ ଶାସନ ସଚିବ ଆଭାସୀ ମାଧ୍ୟମରେ ରହିଥିବା ବେଳେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ସମେତ ପୁରୀ ଜିଲ୍ଲାପାଳ, ଏସପି, ପରିଚାଳନା କମିଟିର ସମସ୍ତ ସଦସ୍ୟ ଉପସ୍ଥିତ ଥିଲେ ।

କଳାହାଣ୍ଡି : ଆନ୍ଦୋଳନ ପୂର୍ବରୁ ମିଲ୍ ଆଗରେ ବସ୍ତା ବସ୍ତା ଧାନ ଗାଡ଼ି। ଗୋଟିଏ ପଟେ ଦାବି ପୂରଣ ପାଇଁ ସରକାରଙ୍କୁ ଅଲ୍ଟିମେଟମ୍। ଆଉ ଅନ୍ୟପଟେ ମିଲ୍ ସାମ୍ନାରେ ଧାନ ଗାଡ଼ିର ଲମ୍ବା ଲାଇନ୍। କଳାହାଣ୍ଡି ଜିଲ୍ଲାର ଅଧିକାଂଶ ମିଲ୍ ଆଗରେ ସମାନ ଚିତ୍ର । ମିଲର୍ସ ଆସୋସିଏସନ୍ ପକ୍ଷରୁ ଆଗାମୀ ଦିନରେ ଆନ୍ଦୋଳନ ପାଇଁ ରଣହୁଙ୍କାର ଦିଆଯାଇଛି। ସରକାର ଦାବି ନଶୁଣିଲେ ମିଲିଂ ପ୍ରକ୍ରିୟା ବାଧାପ୍ରାପ୍ତ ହେବ ବୋଲି ଚେତାବନୀ ମିଳିଛି। କିନ୍ତୁ ଆନ୍ଦୋଳନ ପୂର୍ବରୁ ରାଇସ୍ ମିଲ୍ ଗୁଡ଼ିକର କାରବାର ଏବେ ସନ୍ଦେହ ଘେରରେ। ମିଲର୍ସଙ୍କ ଆନ୍ଦୋଳନ ପଛରେ ଲାଭ କାହାର ? ଆନ୍ଦୋଳନ ବାହାନାରେ ଚାଷୀଙ୍କ ଠାରୁ କମ୍ ଦରରେ ଧାନ ହଡ଼ପ ହେଉଛି କି ? ମିଲ୍ ମାଲିକ ମାଲେମାଲ୍ ହେବାର ଯୋଜନା କରୁନାହାନ୍ତି ତ?

ତେବେ ଏଠି ପ୍ରଶ୍ନ ଉଠୁଛି, ଆନ୍ଦୋଳନ ପୂର୍ବରୁ ଏତେ ପରିମାଣର ଧାନ ମିଲ୍ ଭିତରକୁ କାହିଁକି ନିଆଯାଉଛି? ମିଲ୍ଗୁଡ଼ିକ ନିଜର ଷ୍ଟକ୍ ସୀମା ପୂରଣ କରିବାକୁ ଚାହୁଁଛନ୍ତି କି? ସରକାର ଏହି ଚେତାବନୀକୁ ନେଇ କି ପଦକ୍ଷେପ ନେଉଛନ୍ତି ? ମିଲ୍ ଆଗରେ ଲମ୍ବା ଲାଇନ୍ ପଛର ରହସ୍ୟ କ’ଣ? ତେବେ ସେ ଯାହା ହେଉନା କାହିଁକି ଏସବୁ ଭିତରେ ବଳି ପଡୁଛି ଗରିବ ଚାଷୀ। ଅନ୍ୟପଟେ ମିଲର୍ସ ଆସୋସିଏସନ୍ ରାଜ୍ୟ ସଭାପତିଙ୍କ ସହ ଯୋଗାଯୋଗ ହୋଇପାରିନାହିଁ । ସେପଟେ ମିଲର୍ସଙ୍କ ସହ ଆଲୋଚନା କରାଯିବା ନେଇ କହିଛନ୍ତି ଜିଲ୍ଲା ଯୋଗାଣ ଅଧିକାରୀ । ବାସ୍ତବରେ ମିଲର୍ସଙ୍କ ଏହି ଆନ୍ଦୋଳନ ଡାକରା ଚାଷୀ ଓ ସରକାରଙ୍କ ଉପରେ ଚାପ ପକାଇବା ପାଇଁ ଏକ ରଣନୀତି, ନା ଏହା ଆଢୁଆଳରେ ପକେଟ୍ ଗରମ କରିବାର ଏକ ବଡ଼ ଚକ୍ରାନ୍ତ?

ଛେଣ୍ଡିପଦା : ନାହିଁ ନାହିଁର ଗାଁ । ମୌଳିକ ସୁବିଧାରୁ ବଞ୍ଚିତ । ଗାଁକୁ ନା ଅଛି ପକ୍କା ରାସ୍ତା ନା ପାନୀୟ ଜଳର ସୁବିଧା। ଅନୁଗୋଳ ଜିଲ୍ଲା ଛେଣ୍ଡିପଦା ବ୍ଲକ ଦେଉଳଖମଣ ଗାଁରେ ପହଞ୍ଚିନି ବିକାଶ। ଶିକ୍ଷା, ସ୍ୱାସ୍ଥ୍ୟ, ରାସ୍ତା, ପିଇବା ପାଣି, ବିଦ୍ୟୁତ, ଭତ୍ତା ଭଳି ମୌଳିକ ସୁବିଧା ପାଇଁ ନାହିଁ ନଥିବା ଅସୁବିଧା ଭୋଗୁଛନ୍ତି ଗ୍ରାମବାସୀ ।ଏଠାରେ ଦୀର୍ଘ ବର୍ଷ ଧରି ୬୦ରୁ ଅଧିକ ପରିବାର ବସବାସ କରୁଛନ୍ତି। ଗାଁକୁ ପକ୍କା ରାସ୍ତା ନଥିବାବେଳେ ମନରେଗା ଯୋଜନାରେ ନିର୍ମାଣ କରାଯାଇଛି ରାସ୍ତା l କିନ୍ତୁ ଅସରାଏ ବର୍ଷା ହେଲେ ଗାଁକୁ ପଶି ପାରୁନି ଆମ୍ବୁଲାନ୍ସ l ମେଗା ପାନୀୟ ଜଳ ଯୋଗାଣରେ ପ୍ରତ୍ୟେକ ଘରେ ଟ୍ୟାପ ଲାଗିଛି, କିନ୍ତୁ ଆସୁନି ପାଣି l ଭରସା ଏକମାତ୍ର ନଳକୂପ । ବିଦ୍ୟୁତ ସୁବିଧା ଥିଲେ ମଧ୍ୟ ଅଧିକାଂଶ ଘରକୁ ସଂଯୋଗ ହୋଇନି l ଅଙ୍ଗନବାଡ଼ି କଥା ନ କହିବା ଭଲ। ସ୍ୱାଧୀନତାର ୭୮ ବର୍ଷ ପରେ ବି ବିକାଶ ପହଞ୍ଚି ପାରିନି ଦେଉଳଖମଣରେ।

ଗାଁର ସମସ୍ତେ ଦିନ ମଜୁରି କରି ଗୁଜୁରାଣ ମେଣ୍ଟାଉଛନ୍ତି । ପୁରୁଷମାନେ ପେଟ ପାଇଁ ବାହାର ରାଜ୍ୟକୁ ଦାଦନ ଖଟିବାକୁ ଯାଉଥିବା ବେଳେ ମହିଳାମାନେ ବାଉଁଶରେ ଟୋକେଇ, ପାଛିଆ, କୁଲା ତିଆରି କରି ହାଟରେ ବିକ୍ରି କରି ପରିବାର ଚଳାନ୍ତି। ନିର୍ବାଚନ ବେଳେ ନେତା ମନ୍ତ୍ରୀଙ୍କ ସୁଅ ଛଟେ। ପ୍ରତିଶ୍ରୁତିର ବର୍ଷା ହୁଏ । ହେଲେ ଭୋଟ ସରିଲେ କଥା ସରିଲା। ସମସ୍ୟା ସମ୍ପର୍କରେ ବ୍ଲକ ଓ ପଞ୍ଚାୟତରେ ବାରମ୍ବାର ଗୁହାରି କଲେ ବି ଫଳ ଶୂନ।