ସାର ସଂକଟକୁ ନେଇ ବିଧାନସଭା ହୁଲସ୍ତୁଲ । ସାରା ରାଜ୍ୟରେ ସାର ଅଭାବ ନେଇ ଚାଷୀ ହନ୍ତସନ୍ତ । ହେଲେ ସାର ସମସ୍ୟା ନେଇ ଗୃହରେ ସ୍ବତନ୍ତ୍ର ଆଲୋଚନାକୁ ଡରୁଛନ୍ତି ସରକାର । ଗତକାଲିଠୁ କଂଗ୍ରେସ ସାର ସଂକଟ ନେଇ ଗୃହରେ ମୁଲତବୀ ଆଲୋଚନା ଦାବିକୁ ଗ୍ରହଣ କରିଛନ୍ତି ବାଚସ୍ପତି। କିନ୍ତୁ ମୁଖ୍ୟ ବିରୋଧୀ ଦଳ ବିଜେଡି ସାର ସଂକଟ ନେଇ ଗୃହର ସବୁ କାର୍ଯ୍ୟ ବାତିଲ କରି ସାର ଉପରେ ସ୍ବତନ୍ତ୍ର ଆଲୋଚନା ପାଇ ଦାବି କରିଆସୁଛି। ଯାହାକୁ ନେଇ ଆଜି ପ୍ରଶ୍ନକାଳ ଆରମ୍ଭ ହେବାମାତ୍ରେ ବିଜେଡି ବିଧାୟକ ମାନେ ଗୃହରେ ନାରାବାଜି କରିବା ସହିତ ମଧ୍ୟଭାଗକୁ ଆସି ହୋହଲ୍ଲା କରିଥିଲେ । ଏହାକୁ ନେଇ ଗୃହ ବାରମ୍ବାର ମୁଲତବୀ ହୋଇଥିଲା । ଅପରାହ୍ନ ଅଧିବେଶନ ଆରମ୍ଭ ହେବାମାତ୍ରେ ସମାନ ପ୍ରସଙ୍ଗରେ ବିରୋଧୀ ସଦସ୍ୟମାନେ ଆଲୋଚନା ଦାବି କରି ହଟ୍ଟଗୋଳ କରିଥିଲେ । ହେଲେ ବାଚସ୍ପତି ଗୃହକୁ ସୋମବାର ଯାଏ ମୁଲତବୀ ରଖିଛନ୍ତି । ଗୃହ ମୁଲତବୀ ପରେ ସନ୍ଧ୍ୟା ୫ଟାରେ ବିଜେଡି ବିଧାୟକ ଦଳ ରାଜ୍ୟପାଳଙ୍କୁ ଭେଟି ରାଜ୍ୟରେ ସାର ସଂକଟ ନେଇ ସରକାର ଆଲୋଚନାକୁ ପଛଘୁଞ୍ଚା ଦେଉଥିବା ନେଇ ସ୍ମାରକପତ୍ର ପ୍ରଦାନ କରିଛି । ଗତକାଲି ମଧ୍ୟ ଏହି ପ୍ରସଙ୍ଗରେ ମୁଖ୍ୟ ବିରୋଧୀ ଦଳର ଦାବି ଗ୍ରହଣ ନହେବାରୁ ଗୃହକାର୍ଯ୍ୟ ଅଚଳ ହୋଇଥିଲା ।
ଆୟୁଷ୍ମାନ କାର୍ଡ ପରେ ମଧ୍ୟ ନର୍ସିଂ ହୋମ୍ ମୋଟା ଅଙ୍କର ଅର୍ଥ ଦାବି କରୁଥିବା ଅଭିଯୋଗ
ଆୟୁଷ୍ମାନ କାର୍ଡ ପରେ ମଧ୍ୟ ପ୍ରସବ ପାଇଁ ନର୍ସିଙ୍ଗ ହୋମ ମୋଟା ଅଙ୍କର ଅର୍ଥ ଦାବି କରୁଥିବା ଅଭିଯୋଗ ହୋଇଛି। ଟଙ୍କା ନଦେଲେ ମେଡ଼ିସିନ ବନ୍ଦ କରିଦେବାକୁ ଧମକ ଦିଆଯାଉଛି। କେନ୍ଦୁଝର ଆନନ୍ଦପୁର ଅଞ୍ଚଳରେ ଥିବା ଏକ ଘରୋଇ ନର୍ସିଂହୋମରୁ ଆସିଛି ଏଭଳି ସଂଗୀନ ଅଭିଯୋଗ। ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଡାକ୍ତର ନଥିବାରୁ ଘସିପୁରା ଥାନା ସରେଇଁ ଗାଁର ବିଜୟ କୁମାର ସାହୁ ପତ୍ନୀଙ୍କର ପ୍ରସବ ନିମନ୍ତେ ଶୈଲଙ୍ଗ ନିକଟସ୍ଥ ଘରୋଇ ହେଲଥ କେୟାରକୁ ନେଇଥିଲେ। ଆୟୁଷ୍ମାନ କାର୍ଡ ଦେଲା ପରେ ମଧ୍ୟ ଜୋରଜବରଦସ୍ତ ୧୫ ହଜାର ଟଙ୍କା ଦାବି କରିଥିଲେ ନର୍ସିଙ୍ଗ ହୋମ ର ମୁଖ୍ୟ ପରିଚାଳକ।
ବାଧ୍ୟ ହୋଇ ପରିଚାଳକ ଦେବାଶିଷ ଷଡ଼ଙ୍ଗୀଙ୍କ ଫୋନ ପେ କୁ ୧୦ହଜାର ଟଙ୍କା ପଠାଇଥିଲେ। ତାପରେ ଆରମ୍ଭ ହୋଇଥିଲା ଅପରେସନ। ଡାକ୍ତରଖାନାରେ ଡାକ୍ତର ନଥିବା ବେଳେ ଅନ୍ୟ ଡାକ୍ତରଖାନା ର ଡାକ୍ତର ସେଠାରେ ଯାଇ ଅପରେସନ କରିଥିଲେ। ସବୁଠାରୁ ବଡ଼ କଥା ନର୍ସିଙ୍ଗ ହୋମର ମୁଖ୍ୟ ପରିଚାଳକ କୌଣସି ଆନାସ୍ଥେସିଆ ଡାକ୍ତର ନଡାକି ସବୁ ସମୟରେ ନିଜେ ଆନାସ୍ଥେସିଆ ଦେଉଥିବା ଅଭିଯୋଗ ହେଉଛି। ଏନେଇ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ଫୋନ ଯୋଗେ ପଚାରିବାରୁ ଆୟୁଷ୍ମାନ କାର୍ଡ ଥିଲେ କୌଣସି ରୋଗୀଙ୍କ ଠାରୁ ଅର୍ଥ ଆଦାୟ ବେଆଇନୁ ବୋଲି କହିଛନ୍ତିତ। ତେବେ ଯଦି ଏଭଳି ଘଟଣା ଘଟିଛି ତେବେ ତଦନ୍ତ ପରେ କାର୍ଯ୍ୟାନୁଷ୍ଠାନ ପାଇଁ ସେ ପ୍ରତିଶୃତି ଦେଇଛନ୍ତି।
ପାରମ୍ପରିକ ବଳଦ ଯାତ୍ରା ପାଇଁ ଜୋରସୋରରେ ଚାଲିଛି ପ୍ରସ୍ତୁତି
ଭୁବନର ବଡ ପର୍ବ ଦଶହରା । ଏହା ପୂର୍ବରୁ ହୋଇଥାଏ ପାରମ୍ପରିକ ବଳଦ ଯାତ୍ରା। ଏଥିପାଇଁ ଜୋରସୋରରେ ଚାଲିଛି ପ୍ରସ୍ତୁତି । ୨ ମାସ ପୂର୍ବରୁ ବଳଦିଆ କମିଟି ତରଫରୁ ବଳଦିଆଙ୍କୁ ଗୁଆ ନଡ଼ିଆ ଦେଇ ବଳଦ ବରଣୀ କରାଯାଇଛି। ପରେ ଶୁଭ ଖୁଣ୍ଟି ସ୍ଥାପନ କରାଯାଇ ବଳଦକୁ ଗ୍ରାମରେ ଚଲାଇବା ଅଭ୍ୟାସ କରାଯାଉଛି । ବିଶ୍ବାସ ରହିଛି ଶୁଭ ଖୁଣ୍ଟିକୁ ରୀତିନୀତି ଅନୁଯାୟୀ ପୂଜାପାଠ ନକଲେ ଯାତ୍ରାରେ ବଳଦ ଚାଲି ନଥାଏ। ଏଥିସହିତ ଜଙ୍ଗଲରୁ ବଗ ପକ୍ଷୀ ସଂଗ୍ରହ କରି ବିଭିନ୍ନ ରଙ୍ଗରେ ଟାହିଆ ପ୍ରସ୍ତୁତି କରାଯାଏ । ଏହି ଟାହିଆ, ଶୃଙ୍ଗାର, ଘଣ୍ଟ, ପାଲଣ ଓ ଘୁଙ୍ଗୁର ଲଗାଇ ବଳଦକୁ ସଜ୍ଜିତ କରାଯାଇଥାଏ। ବଳଦକୁ ଦୁଇ ମାସ ପୂର୍ବରୁ ସଜାଇ ଅଭ୍ୟାସ କରାଯାଇଥାଏ। ଯେପରି ଯାତ୍ରା ସମୟରେ କୌଣସି ଅଘଟଣ ନଘଟେ । ଏହି ବଳଦଯାତ୍ରାରେ କିଛି ଶଣ୍ଢ ମଧ୍ୟ ସାମିଲ ହେବେ ।
ବିଜୟା ଦଶମୀ ଓ ଏକାଦଶୀ ୨ ଦିନ ଧରି ରାତ୍ର ସମୟରେ ଏହି ବଳଦ ଯାତ୍ରା ଅନୁଷ୍ଠିତ ହେବ। ଏକାଦଶୀ ଦିନ ରାବଣପୋଡ଼ି ସରିବା ପରେ ଭସାଣ ଯାତ୍ରା ଆରମ୍ଭ ହୋଇ ସକାଳ ୭ ପର୍ଯ୍ୟନ୍ତ ଚାଲିବ ବୋଲି ଶାନ୍ତି କମିଟିରେ ନିଷ୍ପତ୍ତି ହୋଇଛି। ସେହିପରି ବିଜ୍ଞାପିତ ଅଞ୍ଚଳ ପରିଷଦ ତରଫରୁ ପାନୀୟ ଜଳ, ପରିମଳ, ଆଲୋକୀକରଣ ଓ ସମସ୍ତ ପ୍ରକାର ସହଯୋଗ କରାଯିବ । ଡିଜେ ଭାଇବ୍ରେଟରକୁ ସମ୍ପୂର୍ଣ୍ଣ ବାରଣ କରାଯିବା ନେଇ ପ୍ରଶାସନ ନିଷ୍ପତ୍ତି ନେଇଛି।
ଅଧପନ୍ତରିଆ ଅବସ୍ଥାରେ ପଡ଼ିରହିଛି ଏକାଧିକ ଲକ୍ଷ୍ମୀ ବସଷ୍ଟାଣ୍ଡ
ଅଧପନ୍ତରିଆ ଲକ୍ଷ୍ମୀ ବସଷ୍ଟାଣ୍ଡ । କେଉଁଠି ଚାରିପଟେ ଗଛ ଉଠି ଜଙ୍ଗଲ ହୋଇଗଲାଣି ତ କେଉଁଠି ଅଧାଗଢ଼ା ହୋଇ ପଡିଛି । ଏ ହେଉଛି ନବରଙ୍ଗପୁର ଜିଲ୍ଲାର ଏକାଧିକ ଲକ୍ଷ୍ମୀ ବସଷ୍ଟାଣ୍ଡର ଭାଗ୍ୟ। ଦୁର୍ଗମ ଅଞ୍ଚଳରୁ ସହର ସହିତ ଯୋଡି ଗମନାଗମନରେ ଉନ୍ନତି ଆଣିବା ଲକ୍ଷ୍ୟରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆରମ୍ଭ କରିଥିଲେ ଲକ୍ଷ୍ମୀ ବସ ସେବା । ଏହାଦ୍ୱାରା ମିଶନ ଶକ୍ତି ମହିଳା, ଭିନ୍ନକ୍ଷମ, ଗର୍ଭବତୀ ଓ ଅନ୍ୟ ମହିଳାମାନେ ପଞ୍ଚାୟତରୁ ବ୍ଲକ କାର୍ଯ୍ୟାଳୟକୁ ସହଜରେ ଯାତାୟାତ କରିପାରୁଥିଲେ । ଜିଲ୍ଲାରେ ୪୫ଟି ବସ ଯୋଗାଇଦିଆଯାଇଛି । ତେବେ କେତେବେଳେ ଲକ୍ଷ୍ମୀ ବସଷ୍ଟାଣ୍ଡର ଖର୍ଚ୍ଚକୁ ନେଇ ତ ଆଉ କେତେବେଳେ ବସର ରଙ୍ଗ ପରିବର୍ତ୍ତନକୁ ନେଇ ବିବାଦରେ ଛନ୍ଦି ହୋଇପଡିଛି ଏହି ଯୋଜନା । ଏଠାର ସ୍ୱତନ୍ତ୍ର ଭାବେ ଲକ୍ଷ୍ମୀ ବସ ଷ୍ଟାଣ୍ଡ ନିର୍ମାଣ କରାଯିବା ପାଇଁ ବ୍ୟବସ୍ଥା ହୋଇଥିଲା । ପ୍ରାୟ ୩ ଲକ୍ଷ ଟଙ୍କା ବ୍ୟୟରେ ଆମ ଓଡ଼ିଶା ନବୀନ ଓଡିଶା ଯୋଜନା ମାଧ୍ୟମରେ ଲକ୍ଷ୍ମୀ ବସଷ୍ଟାଣ୍ଡ ନିର୍ମାଣ କାର୍ଯ୍ୟ ପାଇଁ ଧାର୍ଯ୍ୟ ହୋଇଥିଲା । ଅନେକ ସ୍ଥାନରେ ନିର୍ମାଣ କାମ ସରିଯାଇଥିବା ବେଳେ ଅନେକ ସ୍ଥାନରେ ନିର୍ମାଣ କାମ ଅଧପନ୍ତରିଆ ହୋଇପଡିଛି । ଯାହାକୁ ନେଇ ଅସନ୍ତୋଷ ବୃଦ୍ଧି ପାଇଛି ।
କେବଳ ଲକ୍ଷ୍ମୀ ବସର ରଙ୍ଗ ପରିବର୍ତ୍ତନ କରି ସରକାର ଶ୍ରେୟ ନେବାକୁ ଚେଷ୍ଟା କରୁଥିବା ଅଭିଯୋଗ ହୋଇଛି । ଏହି ବସଷ୍ଟାଣ୍ଡ ନିର୍ମାଣ କାର୍ଯ୍ୟକୁ ସମ୍ପୂର୍ଣ୍ଣ କରିବା ଓ ଠିକାଦାରଙ୍କୁ ସେମାନଙ୍କ ପ୍ରାପ୍ୟ ପ୍ରଦାନ କରିବା ପାଇଁ ଦାବି କରିଛି ଜିଲ୍ଲା ବିଜେଡି । ଏହାସହ ଖୁବଶୀଘ୍ର ଏହି ବସ ଷ୍ଟାଣ୍ଡ ନିର୍ମାଣ କାମ ସାରିବାକୁ ଦାବି କରିଛି ଦଳ । ନଚେତ ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଆପଣାଇବାକୁ ଚେତାବନୀ ଦିଆଯାଇଛି । ଅନ୍ୟ ପଟେ ଜିଲ୍ଲାସ୍ତରୀୟ ଅଧିକାରୀ ଏହାକୁ ନେଇ ପ୍ରତିକ୍ରିୟା ଦେବାକୁ ମନା କରିଛନ୍ତି।
କାଗଜ କଲମରେ ଚାଲିଛି ଫାଣ୍ଡି: ବସି ବସି ଦରମା ନେଉଛନ୍ତି କର୍ମଚାରୀ
ଫାଣ୍ଡି ଗାଏବ। କାଗଜ କଲମରେ ଚାଲିଛି ଫାଣ୍ଡି। ବସି ବସି ଦରମା ନେଉଛନ୍ତି କର୍ମଚାରୀ । କେନ୍ଦ୍ରାପଡା ଜିଲ୍ଲା ରାଜନଗର ଥାନା ଗୁପ୍ତି ଫାଣ୍ଡିର ମିଳୁନି ଖୋଜ ଖବର । ତାଳଚୁଆ ଠାରେ ସାମୁଦ୍ରିକ ଥାନା ପ୍ରତିଷ୍ଠା ହେବାପରେ ତାଳଚୁଆରୁ ଫାଣ୍ଡିଙ୍କୁ ଗୁପ୍ତିକୁ ସ୍ଥାନାନ୍ତର ପାଇଁ ଚିଠି ହୋଇଥିଲା । କେନ୍ଦ୍ରାପଡ଼ା ଏସପି ଉଚ୍ଚ ପଦସ୍ଥ ଅଧିକାରୀଙ୍କୁ ଚିଠି ଲେଖି ଅବଗତ କରିଥିଲେ । ଏହା ପରେ ଗୁପ୍ତିଠାରେ ଫାଣ୍ଡି ଖୋଲାଯିବା ପାଇଁ ସରକାରୀସ୍ତରରେ ମଂଜୁରୀ ପ୍ରଦାନ କରାଯାଇଥିଲା। ଗୁପ୍ତି ପଂଚାୟତ ଅଫିସରେ କିଛି ପୋଲିସ କର୍ମଚାରୀଙ୍କୁ ନିଯୁକ୍ତି ଦିଆଯାଇ ଫାଣ୍ଡି କାର୍ଯ୍ୟକ୍ଷମ ହୋଇଥିଲା । ବର୍ତ୍ତମାନ ଏହି ଫାଣ୍ଡିରେ ୨ଜଣ କନଷ୍ଟେବଳ, ଜଣେ ସୁଇପର ଓ ୨ ଜଣ ହାବିଲଦାର ଡ୍ୟୁଟି କରୁଥିବା ଦର୍ଶାଇ ଦରମା ନେଉଛନ୍ତି । ମାତ୍ର ଫାଣ୍ଡି କେବଳ କାଗଜ କଲମରେ ହିଁ ଚାଲିଛି । ଦିନକୁ ଦିନ ରାଜନଗର ଅଞ୍ଚଳରେ ଆଇନ ଶୃଙ୍ଖଳା ବୃଦ୍ଧି ପାଉଥିବା ବେଳେ ଫାଣ୍ଡି ଗାଏବ ହୋଇଯିବା ସ୍ଥାନୀୟ ଲୋକଙ୍କୁ ଚିନ୍ତାରେ ପକାଇଛି ।
ରାଜନଗର ଥାନା ଗୁପ୍ତି ଅଞ୍ଚଳକୁ ପ୍ରତ୍ୟେକ ଦିନ ଶହଶହ ବୋଟ ବାଂଲାଦେଶ ସମେତ ପଶିମବଙ୍ଗକୁ ଅବାଧରେ ଯାଆସ କରୁଛି । ଏମାନଙ୍କୁ ଚେକିଂ ପାଇଁ କୌଣସି ବ୍ୟବସ୍ଥା ନାହିଁ । ଫଳରେ ଏହି ଅଞ୍ଚଳରେ ଅନୁପ୍ରବେଶକାରୀଙ୍କ ସଂଖ୍ୟା ଦିନକୁଦିନ ବୃଦ୍ଧି ପାଇବାରେ ଲାଗିଛି । ଏହା ସହ ଭିତରକନିକାକୁ ଆସୁଥିବା ଦେଶ ବିଦେଶର ପର୍ଯ୍ୟଟକ ଗୁପ୍ତି ଜଳପଥ ଦେଇ ଭିତରକନିକା ଯାଇଥାନ୍ତି । ପର୍ଯ୍ୟଟକଙ୍କ ସୁରକ୍ଷା ଓ ସାତଭାୟା, ଗୁପ୍ତି ଓ ଇଶ୍ୱରପୁର ପଂଚାୟତର ୬୦ଟି ରାଜସ୍ୱ ଗ୍ରାମର ଆଇନଶୃଙ୍ଖଳା ଦାୟିତ୍ୱ ଗୁପ୍ତି ଫାଣ୍ଡିକୁ ଦିଆଯାଇଛି । ହେଲେ ଏମାନଙ୍କୁ ୨୫ରୁ ୩୦ କିମି ଦୂର ରାଜନଗର ଥାନାକୁ ଆସିବାକୁ ପଡୁଛି । ତେବେ ଏ ସମ୍ପର୍କରେ ରାଜନଗର ଥାନା ଅଧିକାରୀଙ୍କୁ ପଚାରିବାରୁ ସେ କ୍ୟାମେରା ଆଗରେ ମୁହଁ ଖୋଲିନାହାନ୍ତି ।
ତାମିଲନାଡୁରେ ପୁଣି ଅଭିନେତା ବିଜୟଙ୍କ ମେଗା ସୋ
ତାମିଲନାଡୁରେ ପୁଣି ଅଭିନେତା ବିଜୟଙ୍କ ମେଗା ସୋ। ରାଲିରେ ସାମିଲ ହୋଇଛନ୍ତି ହଜାର ହଜାର ଲୋକ। ଟିଭିକେ ସଭାପତି ଥିବା ବିଜୟ ତିରୁଚିରାପଲ୍ଲୀରେ କରିଛନ୍ତି ସମାବେଶ। ଗତ କିଛି ମାସ ଧରି ତାମିଲନାଡୁରେ ଅଭିନେତା ବିଜୟଙ୍କ ସୁପର ସୋ ସୃଷ୍ଟି କରିଛି ରାଜନୈତିକ ଝଡ଼। କିଛି ଦିନ ତଳେ ଏକ ମେଗାରାଲିରେ ସାମିଲ ହେବା ସହ ଲକ୍ଷାଧିକ ଜନତାଙ୍କୁ ଉଦବୋଧନ ଦେଇଥିଲେ ବିଜୟ। ସେ କଂଗ୍ରେସ, ବିଜେପି, ଡିଏମକେ କିମ୍ବା ଏଆଇଏଡିଏମକେ ସହ ମେଣ୍ଟ କରିବେ ନାହିଁ ବୋଲି କରିସାରିଛନ୍ତି ଘୋଷଣା। ଆସନ୍ତାବର୍ଷ ତାମିଲନାଡୁରେ ବିଧାନସଭା ନିର୍ବାଚନ ହେବାକୁ ଯାଉଥିବାବଳେ ବିଜୟଙ୍କ ରାଲି ଅନ୍ୟ ଦଳ ଲାଗି ହୋଇଛି ଚିନ୍ତାର କାରଣ।
ସାର ସମସ୍ୟା ନେଇ ଆଲୋଚନା ଦାବିରେ ଗୃହରେ ବିଜେଡିର ପ୍ରତିବାଦ
ବିଧାନସଭାରେ ସାର ତାତି। ସାର ସମସ୍ୟା ନେଇ ଆଲୋଚନା ଦାବିରେ ଗୃହରେ ବିଜେଡିର ପ୍ରତିବାଦ । ଗୃହର ମଧ୍ୟ ଭାଗରେ ବିଜେଡିର ପ୍ରତିବାଦ । ସୋମବାର ଯାଏଁ ଗୃହ ମୁଲତବି ।
ଭାରସାମ୍ୟ ହରାଇ ଓଲଟିଲା ଟ୍ୟାଙ୍କର: ପେଟ୍ରୋଲ ବୋହିନେଲେ ଲୋକ
ଭାରସାମ୍ୟ ହରାଇ ଓଲଟିଲା ପେଟ୍ରୋଲ ବୋଝେଇ ଟ୍ୟାଙ୍କର । ଡ୍ରାଇଭର ହେଲପର ଗୁରୁତର। ଘଟଣା ସ୍ଥଳରୁ ବାଲଟି ଯୋଗେ ପେଟ୍ରୋଲ ବୋହିନେଲେ ଲୋକ । କଟକରୁ ସମ୍ବଲପୁର ଅଭିମୁଖେ ଯାଉଥିବା ଟ୍ୟାଙ୍କରଟି ଯୁଯୁମୁରା ଥାନା କୟାକୁଦ ବ୍ରିଜପାଖରେ ଓଲଟି ପଡିଥିଲା । ଟ୍ରକର ଡ୍ରାଇଭର ଓ ହେଲପର ଆହତ ହୋଇଥିବା ବେଳେ ସେମାନଙ୍କୁ ସମ୍ବଲପୁର ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ଘଟଣା ସ୍ଥଳରେ ଦେଖିବାକୁ ମିଳିଥିଲା ଅଜବ ଦୃଶ୍ୟ । ଲୋକେ ଗାଡିରୁ ବାଲଟି ବାଲଟି ପେଟ୍ରୋଲ ବୋହି ନେଉଥିବା ଦେଖିବାକୁ ମିଳିଥିଲା । ପୋଲିସ ଓ ଦମକଳ ବାହିନୀ କର୍ମଚାରୀ ମଧ୍ୟ ପ୍ରେଟ୍ରୋଲ ବୋହୁଥିବା ଦେଖିବାକୁ ମିଳିଥିଲା ।
କଳାହାଣ୍ଡିରେ ସିକଲ ସେଲ୍ ଏବଂ ଥାଲାସେମିଆ ରୋଗର ପ୍ରାରମ୍ଭିକ ଚିହ୍ନଟକୁ ଆଗକୁ ବଢ଼ାଇବା ପାଇଁ ବେଦାନ୍ତ ଆଲୁମିନିୟମ ଜିଲ୍ଲା ସ୍ୱାସ୍ଥ୍ୟ ବିଭାଗ ସହିତ ସହଭାଗୀ ହୋଇଛି
ଭୁବନେଶ୍ୱର: ଭାରତର ସର୍ବବୃହତ ଆଲୁମିନିୟମ୍ ଉତ୍ପାଦକ ବେଦାନ୍ତ ଆଲୁମିନିୟମ୍, କଳାହାଣ୍ଡି ଜିଲ୍ଲାରେ ସିକଲ ସେଲ୍ ରୋଗ (SCD) ଏବଂ ଥାଲାସେମିଆ ସ୍କ୍ରିନିଂର ପ୍ରାରମ୍ଭିକ ଚିହ୍ନଟକୁ ସୁଦୃଢ଼ କରିବା ପାଇଁ ଜାତୀୟ ସିକଲ ସେଲ୍ ଆନିମିଆ ନିରାକରଣ ମିଶନ ଅଧୀନରେ ଓଡ଼ିଶା ସରକାରଙ୍କ ଜିଲ୍ଲା ସ୍ୱାସ୍ଥ୍ୟ ବିଭାଗ ସହିତ ସହଭାଗୀ ହୋଇଛି। ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଜୁଲାଇ ୨୦୨୩ରେ ଆରମ୍ଭ ହୋଇଥିବା ଏହି ମିଶନର ଲକ୍ଷ୍ୟ ହେଉଛି ପ୍ରାରମ୍ଭିକ ସ୍କ୍ରିନିଂ, ଜେନେଟିକ ପରାମର୍ଶ ଏବଂ ଚିକିତ୍ସା ମାଧ୍ୟମରେ ୨୦୪୭ ସୁଦ୍ଧା ଏହି ରୋଗକୁ ଏକ ଜନସ୍ୱାସ୍ଥ୍ୟ ଚିନ୍ତା ଭାବରେ ଦୂର କରିବା।
ଏହି ପଦକ୍ଷେପର ଏକ ଅଂଶ ଭାବରେ, ବେଦାନ୍ତ ଆଲୁମିନିୟମ କଳାହାଣ୍ଡିର ସର୍ବାଧିକ SCD-ପ୍ରବଣ ଅଞ୍ଚଳ ମଧ୍ୟରୁ ରାମପୁର ବ୍ଲକର ନାକରୁଣ୍ଡି, ତଲମପଦର ଏବଂ ଗୁଣପୁର ଗ୍ରାମପଞ୍ଚାୟତରେ ସ୍କ୍ରିନିଂ ଅଭିଯାନ ପରିଚାଳନା କରିବା ପାଇଁ ଏହାର ମୋବାଇଲ ହେଲଥ ୟୁନିଟ୍ (MHU) ନିୟୋଜିତ କରିଛି। ଜିଲ୍ଲା ସ୍ୱାସ୍ଥ୍ୟ ବିଭାଗ ଦ୍ୱାରା ପ୍ରଦାନ କରାଯାଇଥିବା ଡାଏଗ୍ନୋଷ୍ଟିକ କିଟ୍ ବ୍ୟବହାର କରି ୦-୪୦ ବର୍ଷ ବୟସର ବ୍ୟକ୍ତିମାନଙ୍କୁ ସ୍କ୍ରିନିଂ କରାଯାଏ।
ବେଦାନ୍ତ ଆଲୁମିନିୟମ ଏହାର ପ୍ରମୁଖ MHU ସେବା ମାଧ୍ୟମରେ ଗୁଣାତ୍ମକ ସ୍ୱାସ୍ଥ୍ୟସେବା ବିସ୍ତାର କରି ଆସୁଛି, ଗତ ଦୁଇବର୍ଷ ମଧ୍ୟରେ ରାୟଗଡା ଏବଂ କଳାହାଣ୍ଡି ଜିଲ୍ଲାରେ ୧୦୦୦+ ମାଗଣା ସ୍ୱାସ୍ଥ୍ୟ ଶିବିର ଆୟୋଜନ କରିଛି। ପ୍ରତ୍ୟେକ MHU ସମ୍ପୂର୍ଣ୍ଣ ଭାବରେ ଡାଏଗ୍ନୋଷ୍ଟିକ କିଟ୍, ଅତ୍ୟାବଶ୍ୟକ ଔଷଧ ସହିତ ସଜ୍ଜିତ ଏବଂ ଯୋଗ୍ୟ ଡାକ୍ତର, ନର୍ସ ଏବଂ ଟେକ୍ନିସିଆନ କର୍ମଚାରୀ ଭାବରେ ନିଯୁକ୍ତି ପାଇଛି। ଏହି ୟୁନିଟଗୁଡ଼ିକ ତୁରନ୍ତ ଚିକିତ୍ସା ସେବା ପ୍ରଦାନ କରିବା ସହିତ ଅନୁନ୍ନତ ଅଞ୍ଚଳରେ ପ୍ରତିରୋଧକ ସ୍ୱାସ୍ଥ୍ୟସେବା ଉପରେ ସଚେତନତା ସୃଷ୍ଟି କରୁଛି।
ଓଡିଶା ସରକାର ଆଦିବାସୀଙ୍କ ସ୍ବାସ୍ଥ୍ୟକ୍ଷେତ୍ର ଉପରେ ଧ୍ୟାନ ଦେଇ SCD ଏବଂ ଥାଲାସେମିଆ ଚିହ୍ନଟ ଏବଂ ପରିଚାଳନା ପାଇଁ ରାଜ୍ୟବ୍ୟାପୀ ଅଭିଯାନକୁ ତୀବ୍ର କରିଛନ୍ତି। ରୋଗୀମାନେ ସରକାରୀ ଡାକ୍ତରଖାନା ମାଧ୍ୟମରେ ମାଗଣା ଔଷଧ, ରକ୍ତ ସ୍ଥାନାନ୍ତର, ପରିବହନ ସହାୟତା ଏବଂ ଅସ୍ଥିମଜ୍ଜା ପ୍ରତିରୋପଣ ସହାୟତା ପାଉଛନ୍ତି। ଏହି ସହଯୋଗ ରକ୍ତହୀନତାମୁକ୍ତ ଭାରତର ଦୃଷ୍ଟିକୋଣକୁ ଆଗକୁ ବଢ଼ାଇ ଦୁର୍ବଳ ଜନସଂଖ୍ୟାକୁ ସମାନ, ଅନ୍ତର୍ଭୁକ୍ତ ଏବଂ ସୁଲଭ ସ୍ୱାସ୍ଥ୍ୟସେବା ପ୍ରଦାନ କରିବା ପାଇଁ ଓଡ଼ିଶା ସରକାର ଏବଂ ବେଦାନ୍ତ ଆଲୁମିନିୟମର ସମାନ ପ୍ରତିବଦ୍ଧତାକୁ ପ୍ରତିଫଳିତ କରେ।
ବେଦାନ୍ତ ଆଲୁମିନିୟମର ସିଇଓ ରାଜୀବ କୁମାର କହିଛନ୍ତି, “ବେଦାନ୍ତ ଆଲୁମିନିୟମରେ, ଆମେ ଆମର କାର୍ଯ୍ୟ ସମ୍ପ୍ରଦାୟର କଲ୍ୟାଣ ପାଇଁ ଗଭୀର ଭାବରେ ପ୍ରତିବଦ୍ଧ। ଏହାସହ ଭାଗିତା ମାଧ୍ୟମରେ, ଆମେ ଏହି ଅଞ୍ଚଳଗୁଡ଼ିକର ଦୁର୍ଗମ ଅଞ୍ଚଳଗୁଡ଼ିକୁ ଗୁରୁତ୍ୱପୂର୍ଣ୍ଣ ସ୍ୱାସ୍ଥ୍ୟସେବା ସ୍କ୍ରିନିଂ ସେବା ବିସ୍ତାର କରିବାକୁ ଲକ୍ଷ୍ୟ ରଖିଛୁ, ଏବଂ ଏହି ରୋଗଗୁଡ଼ିକୁ ଦୂର କରିବା ପାଇଁ ଜାତୀୟ ମିଶନକୁ ସମର୍ଥନ କରୁଛୁ।”
କଳାହାଣ୍ଡିର ମୁଖ୍ୟ ଜିଲ୍ଲା ଚିକିତ୍ସା ଅଧିକାରୀ (CDMO) ଡକ୍ଟର ନିହାରେନ୍ଦ୍ର ପାଣ୍ଡ କହିଛନ୍ତି, “ସିକଲ ସେଲ୍ ରୋଗ ଏବଂ ଥାଲାସେମିଆ ଗମ୍ଭୀର ଜନସ୍ୱାସ୍ଥ୍ୟ ଚ୍ୟାଲେଞ୍ଜ ସୃଷ୍ଟି କରିଚାଲିଛି, ବିଶେଷ କରି ଗ୍ରାମାଞ୍ଚଳ ସମ୍ପ୍ରଦାୟରେ। ବେଦାନ୍ତର ମୋବାଇଲ ସ୍ବାସ୍ଥ୍ୟ ୟୁନିଟ୍ଗୁଡ଼ିକର ସମର୍ଥନରେ, ଆମେ ବର୍ତ୍ତମାନ ଦୂରବର୍ତ୍ତୀ ଗ୍ରାମଗୁଡ଼ିକରେ ପହଞ୍ଚି ପାରୁଛୁ, ଯାହା ପ୍ରାରମ୍ଭିକ ଚିହ୍ନଟ ଏବଂ ସମୟୋଚିତ ଚିକିତ୍ସା ସେବାକୁ ସକ୍ଷମ କରିଥାଏ ଯାହା ଜୀବନ ବଞ୍ଚାଇବା ଏବଂ ଏହି ଅଞ୍ଚଳଗୁଡ଼ିକରେ ସ୍ୱାସ୍ଥ୍ୟ ଫଳାଫଳକୁ ଉନ୍ନତ କରିବା ପାଇଁ ଗୁରୁତ୍ୱପୂର୍ଣ୍ଣ।”
ବେଦାନ୍ତ ଆଲୁମିନିୟମ ଶିକ୍ଷା, ସ୍ୱାସ୍ଥ୍ୟସେବା, ସ୍ଥାୟୀ ଜୀବିକା, ଗ୍ରାମାଞ୍ଚଳ ଭିତ୍ତିଭୂମି ଏବଂ ତୃଣମୂଳ କ୍ରୀଡା ଏବଂ ସଂସ୍କୃତି ସମ୍ବନ୍ଧୀୟ ରଣନୀତିକ ପଦକ୍ଷେପ ମାଧ୍ୟମରେ ଓଡ଼ିଶାରେ ପରିବର୍ତ୍ତନ ଆଣିବା ପାଇଁ ପ୍ରତିବଦ୍ଧ। ସ୍ଥାନୀୟ କର୍ତ୍ତୃପକ୍ଷ ଏବଂ ସମ୍ପ୍ରଦାୟ ଅଂଶୀଦାରମାନଙ୍କ ସହିତ ଘନିଷ୍ଠ ଭାବରେ ସହଯୋଗ କରି, କମ୍ପାନୀ ନିଶ୍ଚିତ କରେ ଯେ ଏହାର ହସ୍ତକ୍ଷେପ ସାମାଜିକ-ଆର୍ଥିକ ପ୍ରଗତି ଆଡ଼କୁ ନେଇଯିବ।
ମହିଳା ଶ୍ରମିକଙ୍କ ଭାଗ୍ୟ ବଦଳିଲା: ପାଇଲେ ୮ଟି ହୀରା, ଦାମ୍ ଲକ୍ଷ ଲକ୍ଷ ଟଙ୍କା
ମଧ୍ୟପ୍ରଦେଶର ପନ୍ନା ଜିଲ୍ଲା ହୀରା ପାଇଁ ସାରା ବିଶ୍ବରେ ବେଶ୍ ଜଣାଶୁଣା । ମାତ୍ର ଯେତେବେଳେ ଏହି ଖଜାନା ସିଧାସଳଖ କୌଣସି ସାଧାରଣ ମଣିଷଙ୍କ ହାତରେ ଲାଗେ, ସେତେବେଳେ କାହାଣୀ ଆହୁରି ଖାସ୍ ହୋଇଯାଇଥାଏ । ଏହି ଜିଲ୍ଲାରେ ରହୁଥିବା ରଚନା ଗୋଲ୍ଡର ମଜଦୁରୀ କରିଥାନ୍ତି । ତାଙ୍କର ବୟସ ୫୦ ବର୍ଷ । ଘର ଚଳାଇବା ପାଇଁ ସେ ଦୈନିକ ପରିଶ୍ରମ କରିଥାନ୍ତି । ରଚନା ଗୋଟିଏ ଖଣିକୁ ନେଇ ଭାଗ୍ୟ ପରୀକ୍ଷା କରିଥିଲେ ଓ ତାହା ତାଙ୍କର ଭାଗ୍ୟକୁ ସେତେବେଳେ ଚମକାଇବାରେ ସଫଳ ହୋଇଥିଲା, ଯେତେବେଳେ ସେ ୮ଟି ହୀରା ପାଇଥିଲେ ।
ରିପୋର୍ଟ ମୁତାବକ, ରଚନା ହଜାରା ମୁଡ୍ଡା ଅଞ୍ଚଳରେ ଖନନ ପଟ୍ଟୀ ନେଇ ହୀରାର ସନ୍ଧାନରେ ଖୋଳିବା କାମ ଆରମ୍ଭ କରିଥିଲେ । ଏହି ଖନନ ମଧ୍ୟରେ ସେ କିଛି ଖଜାନା ପାଇଥିଲେ, ଯାହାକୁ ଦେଖି ଯେ କେହି ଚକିତ ହୋଇଯାଇଥିଲା । ୮ଟି ହୀରା ମଧ୍ୟରୁ ଛଅଟି ହାଇ କ୍ବାଲିଟିର ଥିଲା । ତାହାର ମୋଟ ଓଜନ ୨.୫୩ କ୍ୟାରେଟ ରହିଥିଲା । ହୀରା ବିଶେଷଜ୍ଞଙ୍କ ଅନୁସାରେ, ସବୁଠାରୁ ବଡ଼ ହୀରା ୦.୭୯ କ୍ୟାରେଟ । ଦୁଇଟି ହୀରାର ରଙ୍ଗ ସାମାନ୍ୟ ଅଫ-କଲର, ମାତ୍ର ଅନ୍ୟ ରତ୍ନ ଲକ୍ଷ ଲକ୍ଷ ଟଙ୍କାରେ ବିକ୍ରି ହୋଇପାରେ । ରଚନା ଏହି ହୀରାକୁ ଡାଇମଣ୍ଡ ଅଫିସରେ ଜମା କରିଛନ୍ତି । ଖୁବଶୀଘ୍ର ସେଠାରୁ ହୀରାକୁ ନିଲାମୀ ପାଇଁ ପଠାଯିବ ।