ଭୁବନେଶ୍ୱର: ଆଜି ବସିବ ରାଜ୍ୟ କ୍ୟାବିନେଟ ବୈଠକ । ଗୁରୁତ୍ବପୂର୍ଣ୍ଣ ପ୍ରସ୍ତାବକୁ ମିଳିବ ମଞ୍ଜୁରୀ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ସନ୍ଧ୍ୟା ୫ଟାରେ ବୈଠକ ବସିବ । ଏଥିରେ ୧୦ରୁ ଅଧିକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଉପରେ ବାଜିପାରେ ମୋହର । ବିଶେଷକରି ରାଜସ୍ବ,ପାନୀୟ ଜଳ ଯୋଗାଣ, କୃଷି, ସାଧାରଣ ପ୍ରଶାସନ, ପରିବହନ, ପୂର୍ତ୍ତ ଓ କ୍ରୀଡ଼ା ବିଭାଗର ବିଭିନ୍ନ ପ୍ରସ୍ତାବ ଉପରେ କ୍ୟାବିନେଟ ମୋହର ବାଜିପାରେ ।
ଐତିହାସିକ ବାଲିଯାତ୍ରା ପାଇଁ ଉଚ୍ଚସ୍ତରୀୟ ବୈଠକ, ଏକାସଙ୍ଗେ ଭାସିବ ୧୦ ହଜାର କାଗଜଡଙ୍ଗା
କଟକ: କଟକର ଐତିହାସିକ ବାଲିଯାତ୍ରା ପାଇଁ ଉଚ୍ଚସ୍ତରୀୟ ବୈଠକ । ସିଏମସି କାର୍ଯ୍ୟାଳୟରେ ଅନୁଷ୍ଠିତ ବୈଠକରେ ମେୟର, ଡେପୁଟି ମେୟର, ଚୌଦ୍ବାର-କଟକ ବିଧାୟକ, ବାରବାଟୀ-କଟକ ବିଧାୟକ, ଜିଲ୍ଲାପାଳ, ସିଏମସି କମିଶନର, ବିଭିନ୍ନ ବିଭାଗୀୟ ଅଧିକାରୀ ତଥା ବିଭିନ୍ନ ଓ୍ବାର୍ଡର କର୍ପୋରେଟର ସାମିଲ ହୋଇଥିଲେ। ଚଳିତବର୍ଷ ବାଲିଯାତ୍ରାକୁ ଆକର୍ଷଣୀୟ କରିବା ପାଇଁ ବିଭିନ୍ନ ଦିଗକୁ ନେଇ ହୋଇଥିଲା ଆଲୋଚନା। ବିଶେଷକରି ବାଲିଯାତ୍ରାକୁ ପ୍ଲାଷ୍ଟିକ ମୁକ୍ତ ଓ ଆବର୍ଜନା ମୁକ୍ତ କରିବାକୁ ଯୋଜନା ପ୍ରସ୍ତୁତ କରାଯିବ।
ଏହାଛଡା ମହାନଦୀରେ ଏକସଂଗେ ୧୦ ହଜାର କାଗଜଡଙ୍ଗା ଭସାଇବାକୁ ଯୋଜନା କରାଯାଇଛି। ସହରର ବିଭିନ୍ନ ପ୍ରବେଶ ପଥରେ ଅସ୍ଥାୟୀ ଗେଟ ନିର୍ମାଣ ସହ ବାଲିଯାତ୍ରାକୁ ଜାତୀୟ ମାନ୍ୟତା ପ୍ରଦାନ ପାଇଁ ବୈଠକରେ ଆଲୋଚନା କରାଯାଇଥିଲା । ତେବେ ଜିଲ୍ଲା ପ୍ରଶାସନର ପ୍ଲଟ ପାଇଁ ବର୍ଦ୍ଧିତ ଦରକୁ ନେଇ ଅନେକ କର୍ପୋରେଟର ପ୍ରତିବାଦ କରିଥିଲେ। ବାଲିଯାତ୍ରାକୁ ବ୍ୟବସାୟିକରଣ ନକରି ପରମ୍ପରା ଅନୁଯାୟୀ ମେଳା ଆୟୋଜନ କରିବାକୁ ଦାବି କରିଥିଲେ।
ନିର୍ମାଣଧୀନ ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମର ଅନୁଧ୍ୟାନ କଲେ ହକି ଇଣ୍ଡିଆ ସଭାପତି ଦିଲ୍ଲୀପ ତିର୍କୀ
ରାଉରକେଲା: ହକି ଇଣ୍ଡିଆର ସଭାପତି ପଦ୍ମଶ୍ରୀ ଡକ୍ଟର ଦିଲ୍ଲୀପ ତିର୍କୀଙ୍କ ସହିତ ହକି ଇଣ୍ଡିଆର ଉଚ୍ଚ ପ୍ରତିନିଧି ଦଳ ଆଜି ରାଉରକେଲାରେ ଚାଲିଥିବା ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମର ନିର୍ମାଣ କାର୍ଯ୍ୟ ଅନୁଧ୍ୟାନ କରିଛନ୍ତି । ଏହି ଟିମ୍ ମୁଖ୍ୟ ଷ୍ଟାଡିୟମ ସହିତ ଦର୍ଶକ ଗ୍ୟାଲେରି, ଅଭ୍ୟାସ ପଡ଼ିଆ, ଖେଳାଳିମାନଙ୍କ ରହଣିସ୍ଥଳ ଏବଂ ଚେଞ୍ଜିଙ୍ଗ ରୁମ ଆଦି ଦେଖିଥିଲେ ।
ଏହି ପ୍ରତିନିଧି ଦଳରେ ହକି ଇଣ୍ଡିଆର ସଭାପତି ପଦ୍ମଶ୍ରୀ ଡକ୍ଟର ଦିଲ୍ଲୀପ ତିର୍କୀ, ସାଧାରଣ ସମ୍ପାଦକ ଭୋଳାନାଥ ସିଂହ ଏବଂ କାର୍ଯ୍ୟନିର୍ବାହୀ ନିର୍ଦ୍ଦେଶକ କମାଣ୍ଡର ଆର. କେ. ଶ୍ରୀବାସ୍ତବ ଥିଲେ । ହକି ବିଶ୍ବକପକୁ ସ୍ମରଣୀୟ କରିବା ଲାଗି ଓଡ଼ିଶା ସରକାର ନେଉଥିବା ବିଭିନ୍ନ ପଦକ୍ଷେପକୁ ସେମାନେ ପ୍ରଶଂସା କରିଥିଲେ ।
କେନ୍ଦ୍ରାପଡ଼ାରେ ନୂଆ ଜିଲ୍ଲା ମୁଖ୍ୟ ଚିକିତ୍ସାଳୟ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ
କେନ୍ଦ୍ରାପଡ଼ା: କେନ୍ଦ୍ରାପଡ଼ାରେ ଆହୁରି ସୁବ୍ୟବସ୍ଥିତ ହେବ ସ୍ବାସ୍ଥ୍ୟ ସେବା। ଜିଲ୍ଲାର ସ୍ବାସ୍ଥ୍ୟସେବା କ୍ଷେତ୍ରରେ ଆସିବ ରୂପାନ୍ତରଣ। କେନ୍ଦ୍ରାପଡାର ଇଚ୍ଛାପୁର ସ୍ଥିତ ଶ୍ୟାମଗୁଡିଆରେ ନୂଆ ଜିଲ୍ଲା ମୁଖ୍ୟ ଚିକିତ୍ସାଳୟ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନୀବନ ପଟ୍ଟନାୟକ। ଚିକତ୍ସାଳୟରେ ୨୦୦ ଶଯ୍ୟା ସହ ରହିଛି ଟ୍ରମା କେୟାର, ୩୪ଟି ଶଯ୍ୟା ବିଶିଷ୍ଟ ଆଇ.ସି.ୟୁ, ଉନ୍ନତ ଧରଣର ଓଟି କମ୍ପ୍ଲେକ୍ସ, ୧୫ ଶଯ୍ୟା ବିଶିଷ୍ଟ SNCU ସହ କଙ୍ଗାରୁ ମାତୃସେବା ସୁବିଧା।
କେନ୍ଦ୍ରାପଡ଼ା ଜିଲ୍ଲାରେ ସ୍ବାସ୍ଥ୍ୟସେବା କ୍ଷେତ୍ରରେ ରୂପାନ୍ତର ଆଣିବାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିବ ଏହି ଚିକିତ୍ସାଳୟ। ଜିଲ୍ଲାର ରୋଗୀମାନଙ୍କୁ ଆଉ ଚିକିତ୍ସା ପାଇଁ ଆଉ କଟକ, ଭୁବନେଶ୍ବର ଯିବା ଆବଶ୍ୟକ ପଡିବ ନାହିଁ। ନିଜ ଜିଲ୍ଲାରେ ହିଁ ସେମାନେ ଉତ୍ତମ ସ୍ବାସ୍ଥ୍ୟସେବା ପାଇପାରିବେ। ମୋ ପାଇଁ ‘ପ୍ରତି ଜୀବନ ମୂଲ୍ୟବାନ’। ଏହି ଆଦର୍ଶ ନେଇ ଆମେ କାମ କରୁଛୁ ବୋଲି ଉଦଘାଟନ ଅବସରରେ କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନିଷ୍ଠାର ସହ ରୋଗୀର ସେବା କରନ୍ତୁ। ରୋଗୀଙ୍କ ମୁହଁରେ ହସ ଓ ମନରେ ବିଶ୍ବାସ ହିଁ ଆପଣମାନଙ୍କ ପାଇଁ ଏବଂ ଆମ ସମସ୍ତଙ୍କ ପାଇଁ ବଡ ପୁରସ୍କାର ହେବ ବୋଲି ଡାକ୍ତର ଓ ଚିକିତ୍ସାଳୟ କର୍ମଚାରୀଙ୍କୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ। ଲୋକାର୍ପଣ ସମୟରେ ଉପସ୍ଥିତ ରହିଥିଲେ ଫାଇଭ-ଟି ସଚିବ ଭି.କେ. ପାଣ୍ଡିଆନ।
ଚାଷୀଙ୍କ ଆୟ ଦ୍ବିଗୁଣିତ କରିବା ଓଡ଼ିଶା ସରକାରଙ୍କ ଲକ୍ଷ୍ୟ
ଭୁବନେଶ୍ୱର: ଚାଷୀଙ୍କ ଆୟ ଦ୍ବିଗୁଣିତ କରିବା ପାଇଁ ସରକାରଙ୍କ ଲକ୍ଷ୍ୟ । ଓଡ଼ିଶାରେ ପ୍ରତି ବର୍ଷ ବାତ୍ୟା, ବନ୍ୟା, ମରୁଡ଼ି ଓ ପୋକ କାରଣରୁ ୭୦ ପ୍ରତିଶତରୁ ଅଧିକ ଚାଷୀ କ୍ଷତି ସହୁଛନ୍ତି । ରାଜ୍ୟ କୃଷି ବିଭାଗ ଓ ଅନ୍ତଃରାଷ୍ଟ୍ରୀୟ ଖାଦ୍ୟନୀତି ଗବେଷଣା ସଂସ୍ଥାର ମିଳିତ ସହଯୋଗରେ ଭୁବନେଶ୍ବରଠାରେ ନୀତିନର୍ଦ୍ଧାରଣ ରାଉଣ୍ଡ ଟେବୁଲ ବୈଠକ ଅନୁଷ୍ଠିତ ହୋଇଛି । ପ୍ରାକୃତିକ ବିପର୍ଯ୍ୟୟ ଯୋଗୁ ଚାଷୀର ଆୟ ବଢି ପାରୁ ନଥିବା ପ୍ରାଥମିକ ଭାବେ ଆକଳନ କରାଯାଇଛି ।
ଅନ୍ତଃରାଷ୍ଟ୍ରୀୟ ଖାଦ୍ୟନୀତି ଗବେଷଣା ସଂସ୍ଥାର ରିପୋର୍ଟକୁ ନେଇ ଚିନ୍ତା ପ୍ରକଟ । ଚାଷୀ ପିଛା ମାତ୍ର ୦ ଦଶମିକ ୯୫ ହେକ୍ଟର ଫାର୍ମ ହୋଲଡିଂ ରହିବାରୁ ସେମାନଙ୍କ ଆୟ ପ୍ରଭାବିତ ହେଉଛି । ଚାଷୀଙ୍କୁ ସଠିକ୍ ମୂଲଚାଲ କ୍ଷମତା ମିଳୁନ ଥିବାବେଳେ ଉତ୍ପାଦିତ ଶସ୍ୟର ସର୍ବନିମ୍ନ ସହାୟକ ମୂଲ୍ୟ ଠିକ୍ ଭାବେ ବଢୁନି। ଆୟ ବୃଦ୍ଧି ଲାଗି ଚାଷୀଙ୍କ ଋଣ ନେବା କ୍ଷମତା ବୃଦ୍ଧି ନେଇ ବ୍ୟାଙ୍କମାନଙ୍କ ସହ ଆଲୋଚନା ହୋଇଛି । ବିମୁଦ୍ରୀକରଣ ସମୟରେ ତ୍ରୁଟିପୂର୍ଣ୍ଣ ଅର୍ଥନୀତି ହିଁ ଚାଷୀଙ୍କ ଦୁର୍ଗତିର କାରଣ ବୋଲି ଅଭିଯୋଗ କରିଛନ୍ତି କୃଷିମନ୍ତ୍ରୀ । ତେବେ ନୀତିନର୍ଦ୍ଧାରଣ ରାଉଣ୍ଡ ଟେବୁଲ ବୈଠକର ମତାମତକୁ ନେଇ ଚାଷୀଙ୍କ ଆୟ ଦ୍ବିଗୁଣିତ କରିବା ଦିଗରେ କାମ ଆରମ୍ଭ କରାଯିବ ।
ଆଗକୁ ବଢ଼ିବେ ମହିଳା ଉଦ୍ୟୋଗୀ, ସଶକ୍ତ କରିବା ଲାଗି ପାଇଁ ରାଜ୍ୟ ସରକାର ଆଣିବେ ନୂଆ ପଲିସି ।
ଭୁବନେଶ୍ୱର: ଆଗକୁ ବଢ଼ିବେ ମହିଳା ଉଦ୍ୟୋଗୀ। ସଶକ୍ତ କରିବା ଲାଗି ପାଇଁ ରାଜ୍ୟ ସରକାର ଆଣିବେ ନୂଆ ପଲିସି । ମେକ ଇନ ଓଡ଼ିଶା ଥ୍ରୀ ସଂସ୍କରଣରେ ଏଥିଲାଗି ଆସିବ ଅନେକ ସୁଯୋଗ। ଶିଳ୍ପାୟନରେ ମହିଳାଙ୍କୁ ଅଧିକ ସୁବିଧା ସୁଯୋଗ ଯୋଗାଇ ଦିଆଯିବ ବୋଲି କହିଛନ୍ତି ଶିଳ୍ପମନ୍ତ୍ରୀ ପ୍ରତାପ ଦେବ। ସରକାରଙ୍କ ପ୍ରୋତ୍ସାହନ ଉଦ୍ୟମକୁ ମିଳିଛି ପ୍ରଶଂସା ।
ବିଭିନ୍ନ ଶିଳ୍ପାଞ୍ଚଳରେ ମହିଳା ଉଦ୍ୟୋଗୀଙ୍କ ଲାଗି ସୃଷ୍ଟିହେବ ବ୍ୟାପକ ସୁବିଧା । ୨୫ ପ୍ରତିଶତ ପ୍ଲଟ ଓ ଇଣ୍ଡଷ୍ଟ୍ରିଆଲ ସେଡ଼ ସଂରକ୍ଷଣ ସହ ଭଡ଼ା କ୍ଷେତ୍ରରେ ମିଳିବ ରିହାତି । ଏଥିପାଇଁ ବିଭିନ୍ନ ସେକ୍ଟରରେ ଅଣାଯିବ ନୂଆ ନୀତି । ମହିଳା ଉଦ୍ୟୋଗୀଙ୍କୁ ମଧ୍ୟ ମିଳିବ ପୁଞ୍ଜି ବିନିଯୋଗ ସୁବିଧା ।
ମାତ୍ର ୪୫ ଦିନରେ ଇସ୍ତଫା ଦେଲେ ବ୍ରିଟେନ ପ୍ରଧାନମନ୍ତ୍ରୀ ଲିଜ ଟ୍ରସ୍
ଲଣ୍ଡନ: ବ୍ରିଟେନ ପ୍ରଧାନମନ୍ତ୍ରୀ ଲିଜ ଟ୍ରସଙ୍କ ଆକସ୍ମିକ ଇସ୍ତଫା । ଦେଶରେ ଘନ ଅର୍ଥନୈତିକ ସଙ୍କଟ ଜାରି ରହିଥିବାବେଳେ ସମସ୍ୟାରେ ଛନ୍ଦି ହୋଇଥିବା ଟ୍ରସ୍ ଶେଷରେ ଇସ୍ତଫା ଦେଇଛନ୍ତି । ବ୍ରିଟେନ ଇତିହାସରେ ସବୁଠାରୁ କମ୍ ସମୟ ଲାଗି ପ୍ରଧାନମନ୍ତ୍ରୀ ଦାୟିତ୍ବ ନେଇଥିଲେ ଟ୍ରସ୍ । ବିଭିନ୍ନ କାରଣରୁ ନିନ୍ଦିତ ବୋରିସ ଜନସନଙ୍କ ପରେ ଦାୟିତ୍ବ ନେଇଥିବା ଟ୍ରସ ମାତ୍ର ୪୫ ଦିନରେ ଇସ୍ତଫା ଦେଇଛନ୍ତି। ଶୁଳ୍କ ହ୍ରାସ ନିଷ୍ପତ୍ତି କାରଣରୁ ତାଙ୍କୁ ନିଜ ଦଳ କଞ୍ଜରଭେଟିଭ ପାର୍ଟିରୁ ଜୋରଦାର ସମାଲୋଚନା ମିଳିଥିଲା।
ସେ କହିଛନ୍ତି- ସାମ୍ପ୍ରତିକ ସ୍ଥିତିକୁ ମୁକାବିଲା କରିବା କ୍ଷେତ୍ରରେ ସେ ଅକ୍ଷମ ପାଲଟିଛନ୍ତି। ଯେଉଁ ସମସ୍ୟାର ସୁଧାରିବା ଲାଗି ତାଙ୍କୁ ନିର୍ବାଚିତ କରାଯାଇଥିଲା ତାହା ପୂରଣ କରିବାରେ ସେ ବିଫଳ ହୋଇଛନ୍ତି । ପରବର୍ତ୍ତୀ ପ୍ରଧାନମନ୍ତ୍ରୀ ନିଯୁକ୍ତି ହେବା ଯାଏ ସେ ଦାୟିତ୍ବରେ ରହିବେ । ସରକାରୀ ଦଳର ପ୍ରାୟ ଶହେ ସାଂସଦ ପ୍ରଧାନମନ୍ତ୍ରୀଙ୍କ ବିରୋଧରେ ନୋ କନଫିଡେନ୍ସ ଲେଟର ଦାଖଲ କରିବା ସମ୍ଭାବନା ବି ଥିଲା । ଟ୍ରସକୁ ନିଜ ଦଳରେ ହିଁ ବିରୋଧ କରାଯାଉଥିବା ବେଳେ ଋଷି ସୁନକ ପ୍ରଧାନମନ୍ତ୍ରୀ ହୋଇପାରନ୍ତି ବୋଲି କୁହାଯାଉଛି । ପୂର୍ବରୁ ଡ୍ୟାମେଜ କଣ୍ଟ୍ରୋଲ ପାଇଁ ନିଜ ଘନିଷ୍ଠ ବନ୍ଧୁ ତଥା ଅର୍ଥ ମନ୍ତ୍ରୀ କ୍ବାସି କ୍ବାରତେଙ୍ଗଙ୍କୁ ମନ୍ତ୍ରୀ ପଦରୁ ବହିଷ୍କାର କରିଥିଲେ ଲିଜ୍ । ଗତକାଲି ଗୃହମନ୍ତ୍ରୀ ସୁଏଲା ବ୍ରେଭରମ୍ୟାନ ଇସ୍ତଫା ଦେଇଥିଲେ। ଧନୀ ଲୋକ ସମେତ ଅନ୍ୟାନ୍ୟ କ୍ଷେତ୍ରରୁ ପ୍ରାୟ ୪୫ ବିଲିୟନ ପାଉଣ୍ଡ ବା ୫୦ ବିଲିୟନ ଡଲାର ଆୟକର ହ୍ରାସ ପରେ ଦେଶରେ ଅର୍ଥନୈତିକ ସମସ୍ୟା ଘନୀଭୂତ ହୋଇଛି।
ଓଡ଼ିଶାରେ ପୁଞ୍ଜି ନିବେଶ ପାଇଁ ଏସିଆନ ଦେଶ ଆଗ୍ରହୀ, ଓଡ଼ିଶା ଆସିବେ ୧୦ଟି ଦେଶର ରାଷ୍ଟ୍ରଦୂତ
ଭୁବନେଶ୍ୱର: ଇନଭେଷ୍ଟର୍ସ ମିଟ୍ ଆଣିଛି ବଡ଼ ସଫଳତା । ଓଡ଼ିଶା ଆସିବେ ଏସିଆନ ଆମ୍ୱାସାଡର । ଇନଭେଷ୍ଟର୍ସ ମିଟ୍ ପରେ ଓଡ଼ିଶାରେ ପୁଞ୍ଜି ନିବେଶ ପାଇଁ ଏସିଆନ ଦେଶମାନେ ବେଶ୍ ଆଗ୍ରହୀ ଅଛନ୍ତି । ସୂଚନା ମୁତାବକ ୧୦ଟି ଏସିଆନ ଦେଶର ଆମ୍ୱାସାଡର ଓଡ଼ିଶା ଆସିବେ । ଅକ୍ଟୋବର ୨୬, ୨୭ ଓ ୨୮ ତାରିଖରେ ଫିଲିଫାଇନ୍ସ, ଥାଇଲାଣ୍ଡ, ମାଲେସିଆ ସହ ସିଙ୍ଗାପୁର, ଭିଏତନାମର ଆମ୍ୱାସାଡାର ଭୁବନେଶ୍ୱର ଆସିବେ ବୋଲି ସୂଚନା ଦେଇଛନ୍ତି ଶିଳ୍ପ ସଚିବ ହେମନ୍ତ ଶର୍ମା।
ସାକାର ହେଲା ହେଲା ଦୀର୍ଘବର୍ଷର ସ୍ବପ୍ନ, ଏଣିକୁ ଜୟପୁରରୁ ଉଡ଼ିବ ବିମାନ
କୋରାପୁଟ: ସାକାର ହେଲା ହେଲା ଦୀର୍ଘବର୍ଷର ସ୍ବପ୍ନ । ଜୟପୁର ବିମାନବନ୍ଦରକୁ ମିଳିଛି ଏରୋଡ୍ରମ ଲାଇସେନ୍ସ । ଏଣିକୁ ଜୟପୁରରୁ ଉଡିବ ବିମାନ । ଉଡ଼ାଣ ଦିବସର ଗୋଟିଏ ଦିନ ପୂର୍ବରୁ ମିଳିଛି ଜୟପୁରକୁ ଅନୁମତି ମିଳିଛି। ଉଡାଣ ଯୋଜନାରେ ଲାଇସେନ୍ସ ପ୍ରଦାନ ନେଇ ସୂଚନା ଦେଇଛି ଡିଜିସିଏ । ବେସାମରିକ ବିମାନ ଚଳାଚଳ ମନ୍ତ୍ରାଳୟ ଯୁଗ୍ମ ସଚିବ ଉଷା ପାଢ଼ୀ ଏନେଇ ଟୁଇଟ କରି ସୂଚନା ଦେଇଛନ୍ତି।
ପୂର୍ବରୁ ରାଜ୍ୟସଭାରେ ଏହି ପ୍ରସଙ୍ଗ ଉଠାଇଥିଲେ ସାଂସଦ ମାନସ ମଙ୍ଗରାଜ। କାମ ବିଳମ୍ବ ହେଉଥିବାରୁ ଉଦବେଗ ପ୍ରକାଶ କରିଥିଲେ। ପୂର୍ବରୁ ବିମାନ ଉଡ଼ାଣ ନେଇ ଭିତ୍ତିଭୂମି ଓ ଟ୍ରାଏଲ ରନ୍ ସରିଥିଲା। ସମସ୍ତ ସହଯୋଗ ଯୋଗାଇ ଦେଇଥିଲେ ରାଜ୍ୟ ସରକାର। ତଥାପି ଅନୁମତି ଦେବାକୁ କୁନ୍ଥକୁନ୍ଥ ହେଉଥିଲା DGCA। ବାରମ୍ବାର ସମୀକ୍ଷା କରିବା ପରେ ବି ଅନୁମତି ମିଳୁନଥିଲା । ରାଜ୍ୟସଭାରେ ସାଂସଦ ମାନସ ମଙ୍ଗରାଜ ଏହି ପ୍ରସଙ୍ଗ ଉଠାଇଥିଲେ । ବିମାନ ସେବାରେ ବିଳମ୍ବ ହେଉଥିବା ନେଇ ରାଜ୍ୟସଭାରେ ପ୍ରକାଶ କରିଥିଲେ ଉଦବେଗ । ଏବେ ଅନୁମତି ମିଳିବା ପରେ ପୂରଣ ହୋଇଛି ଜୟପୁରବାସୀଙ୍କ ଆଶା । ଆଗକୁ ଜିଲ୍ଲାର ବିକାଶ ଓ ପର୍ଯ୍ୟଟନ କ୍ଷେତ୍ରରେ ଏହା ଗୁରୁତ୍ବପୂର୍ଣ୍ଣ ଦାୟିତ୍ବ ନିର୍ବାହ କରିବ।