ନର୍ଥ କାରୋନିଲା: ହିନ୍ଦୁ ଧର୍ମରେ ନାରୀଙ୍କୁ ମାଆ ଲକ୍ଷ୍ମୀଙ୍କ ସ୍ବରୂପ ଭାବେ ବିବେଚନା କରାଯାଏ । ଝିଅମାନଙ୍କୁ ଦେବୀଙ୍କ ଭଳି ପୂଜା କରାଯାଏ । ବିଶ୍ବାସ ରହିଛି ଘରେ ଝିଅଟିଏ ଥିଲେ ମାଆ ଲକ୍ଷ୍ମୀଙ୍କ କୃପାଦୃଷ୍ଟି ସବୁବେଳେ ରହିଥାଏ । ଏହି ଯେମିତି ଆମେରିକାର ନର୍ଥ କାରୋନିଲାର ବ୍ରେଣ୍ଡାଙ୍କୁ ଦେଖନ୍ତୁ । ଧାରକରଜରେ ବୁଡ଼ି ଥିବା ବ୍ରେଣ୍ଡା ରାତାରାତି ଲକ୍ଷପତି ବନି ଯାଇଛନ୍ତି । କାଙ୍ଗାଳୁ ଲକ୍ଷପତି ହେବା ପାଇଁ ସେ ନିଜ ନବଜାତ ଶିଶୁକନ୍ୟାକୁ ଶ୍ରେୟ ଦେଇଛନ୍ତି । କାରଣ ଦୁଇଟି ପିଲାର ମାଆ ବ୍ରେଣ୍ଡା ଯେଉଁଦିନ ସକାଳେ ଏକ ଶିଶୁକନ୍ୟାଙ୍କୁ ଜନ୍ମ ଦେଇଥିଲେ, ସେହିଦିନ ସନ୍ଧ୍ୟାରେ ତାଙ୍କ ଘରକୁ ଆସିଥିଲା  ଆଉ ଏକ ଖୁସି ଖବର । ଚାହୁଁ ଚାହୁଁ ସେ ୫୩ ଲକ୍ଷ ଟଙ୍କାର ମାଲିକାନି ବନିଯାଇଥିଲେ ।

୨୮ ବର୍ଷିୟା ବ୍ରେଣ୍ଡା ନଭେମ୍ବର ୯ ତାରିଖ ସକାଳେ ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ । ସେହିଦିନ ସନ୍ଧ୍ୟାରେ ତାଙ୍କର ଏକ ଲଟେରୀ ଲାଗିଥିଲା । ଯେଉଁଥିରେ ସେ ଭାରତୀୟ ମୁଦ୍ରାରେ ପ୍ରାୟ ୮୦ ଲକ୍ଷ ଟଙ୍କା ଜିତିଥିଲେ । ଟ୍ୟାକ୍ସ କଟିବା ପରେ ତାଙ୍କ ହାତକୁ ୫୩ ଲକ୍ଷ ଟଙ୍କା ଆସିଛି । ନଭେମ୍ବର ୩୦ ତାରିଖରେ ଏହି ଟଙ୍କା ତାଙ୍କ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର କରିଦିଆଯାଇଛି । ଏହା ଜଣାପଡ଼ିବା ପରେ ସୋସିଆଲ ମିଡିଆରେ ବ୍ରେଣ୍ଡା ଏକ ଚର୍ଚ୍ଚିତ ଚେହେରା ପାଲଟି ଯାଇଛନ୍ତି । ଲଟେରୀ ଜିତିବା ପରେ ବ୍ରେଣ୍ଡା କହିଛନ୍ତି, ‘ମୋ ଝିଅ ମୋ ଭାଗ୍ୟ ବଦଳାଇ ଦେଲା । ସେ ମୋ ପାଇଁ ଲକି ଚାର୍ମ ।’

ବ୍ରେଣ୍ଡା କୁହନ୍ତି, ‘ୟୁଏସ ପାଓ୍ବାରବଲ୍ ଲଟେରୀ ଡ୍ର’ ଘୋଷଣା ହେବା ପରେ ମୋ ଖୁସିର ଠିକଣା ନଥିଲା । ମୁଁ ୮୦ ଲକ୍ଷ ଟଙ୍କା ଜିତିଥିବା ଲଟାରୀ ସଂସ୍ଥା ଅଧିକାରୀ ଜଣାଇଥିଲେ । ଏହା ଶୁଣି ମୁଁ କାନ୍ଦି ପକାଇଥିଲି । କଳାରେ ଝିଅ ଜନ୍ମ ହେଲା ଓ ସନ୍ଧ୍ୟାରେ ଲଟାରୀ ଜିତିଲି । ଦୁଇ ଦୁଇଟି ଭଲ ଖବର ପାଇ ଆମ ପରିବାରରେ ଖୁସି ଭରି ଦେଇଛି ।

ବ୍ରେଣ୍ଡା କହିଛନ୍ତି, ‘ଏହି ଟଙ୍କାରେ ପ୍ରଥମେ ମୁଁ ଋଣ ସୁଝିବି । ଏହାପରେ ଅନ୍ୟ କାମରେ ଖର୍ଚ୍ଚ କରିବି ।’ ସୂଚନାଯୋଗ୍ୟ, ପ୍ରତି ଜନ୍ମଦିନରେ ବ୍ରେଣ୍ଡା ଲଟେରୀ କରିଥାନ୍ତି । ହେଲେ କେବେ ତାଙ୍କ ଭାଗ୍ୟରେ ଲଟେରୀ ଲାଗିନଥାଏ ।