ଜୋଶିମଠ: ଉତ୍ତରାଖଣ୍ଡର ଜୋଶିମଠରେ ଭୟଙ୍କର ସଡ଼କ ଦୁର୍ଘଟଣା । ଏହି ଦୁର୍ଘଟଣାରେ ୧୨ ଜଣଙ୍କ ମୃତ୍ୟୁ ହୋଇଥିବା ବେଳେ ୩ଜଣ ଆହତ ସୂଚନା । ଅନେକ ଫସିରହିଛନ୍ତି । ଉଦ୍ଧାରକାରୀ ଦଳ ଉଦ୍ଧାର କାର୍ଯ୍ୟରେ ଲାଗିଛି । ସୂଚନାନୁସାରେ, ଜୋଶିମଠ ବ୍ଲକର ଉର୍ଗମ-ପଲ୍ଲା ଜଖୋଲା ମୋଟର ମାର୍ଗରେ ଗାଡ଼ି ଟି ଭାରସାମ୍ୟ ହରାଇ ଖାଇକୁ ଖସିପଡ଼ିଥିଲା ।
ଜୋଶିମଠରୁ କିମାଣା ଅଭିମୁଖେ ଯାଉଥିବା ବେଳେ ଏହି ଦୁର୍ଘଟଣା ଘଟିଛି । ମୃତକଙ୍କ ମଧ୍ୟରେ ୨ ଜଣ ମହିଳା ଓ ୧୦ ପୁରୁଷ ସାମିଲ ଅଛନ୍ତି । ଏସଡିଆରଫ, ଏନଡିଆରଏଫ, ପୋଲିସ ପ୍ରଶାସନ ଉଦ୍ଧାର କାର୍ଯ୍ୟରେ ଲାଗିଛନ୍ତି । ଉଦ୍ଧାର ୩ ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।
ଭୁବନେଶ୍ୱର: କଟକ ବାରବାଟୀ ଷ୍ଟାଡିୟମ ସମେତ ପାଞ୍ଚଟି ମ୍ୟୁନିସିପାଲ କର୍ପୋରେସନରେ ହକି ବିଶ୍ବକପ୍ ଉତ୍ସବ ପାଳନ କରାଯିବ । ଶହେଟି ନୂଆ ବସ୍ ସହିତ ରାଉରକେଲାରେ ଆରମ୍ଭ କରାଯିବ ମୋ ବସ୍ ସେବା । ନିୟମିତ ବିମାନ ସେବା ସହ ରାଉରକେଲା ବିମାନ ବନ୍ଦରକୁ କାର୍ଯ୍ୟକ୍ଷମ କରାଯିବ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ ମନ୍ତ୍ରୀ ପରିଷଦ ବୈଠକରେ ପୁରୁଷ ହକି ବିଶ୍ବ କପ୍ ପ୍ରତିଯୋଗିତା ପ୍ରସ୍ତୁତି ସମ୍ପର୍କରେ ସମୀକ୍ଷା କରାଯାଇଛି । FIH ପୁରୁଷ ବିଶ୍ବ କପ୍ ହକି-୨୦୨୩, ଭୁବନେଶ୍ବର ଓ ରାଉରକେଲାଠାରେ ୧୩ ଜାନୁଆରୀରୁ ୨୯ ଜାନୁଆରୀ ୨୦୨୩ ପର୍ଯ୍ୟନ୍ତ ଅନୁଷ୍ଠିତ ହେବ ।
ଏଥିରେ ବିଶ୍ବର ୧୬ଟି ଦଳ ଅଂଶଗ୍ରହଣ କରିବେ । ଭୁବନେଶ୍ବରରେ ୨୪ଟି ମ୍ୟାଚ ଓ ରାଉରକେଲାରେ ୨୦ଟି ମ୍ୟାଚ ଖେଳାଯିବ । ବୈଠକରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ମନ୍ତ୍ରୀ ପରିଷଦର ସଦସ୍ୟ ମାନଙ୍କୁ ବିଶ୍ବକପ୍ ଆୟୋଜନର ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଅବଗତ କରାଇଥିଲେ । ପ୍ରତିଯୋଗିତା ପାଇଁ ଭୁବନେଶ୍ବରର କଳିଙ୍ଗ ହକି ଷ୍ଟାଡିଅମ ସଂପୂର୍ଣ୍ଣ ପ୍ରସ୍ତୁତ ଥିବାବେଳେ ରାଉରକେଲା ବିର୍ସାମୁଣ୍ଡା ହକି ଷ୍ଟାଡିଅମ ନଭେମ୍ବର ଶେଷ ସୁଦ୍ଧା ସଂପୂର୍ଣ୍ଣ ହେବ ବୋଲି ସେ ସୂଚନା ଦେଇଥିଲେ ।
ଉଭୟ ଷ୍ଟାଡିଅମରେ ଆଷ୍ଟ୍ରୋ ଟର୍ଫ ଓ ଫ୍ଲଡ ଲାଇଟ୍ କାମ ଶେଷ ହୋଇଯାଇଛି । ଅଂଶଗ୍ରହଣକାରୀ ଦଳ ଓ ମ୍ୟାଚ ଅଫିସିଆଲମାନଙ୍କ ରହଣି ପାଇଁ ୨୨୫ଟି ରୁମ୍ ତିଆରି କାମ ଚାଲିଛି ଏବଂ ଏହା ମଧ୍ୟ ନଭେମ୍ବର ସୁଦ୍ଧା ସଂପୂର୍ଣ୍ଣ ହେବ । ଓଡିଶାର ଅଧିକାଂଶ ଜିଲ୍ଲା ସହିତ ସାରା ଦେଶରେ ହକି ବିଶ୍ବକପ ଟ୍ରଫି ପ୍ରଦର୍ଶନ ଯାତ୍ରା କରାଯିବ । ଏହି ସମୟରେ ଜିଲ୍ଲାସ୍ତରରେ କ୍ରୀଡା ଓ ସାଂସ୍କୃତିକ କାର୍ଯ୍ୟକ୍ରମର ବିକାଶ ପାଇଁ ବିଭିନ୍ନ ପ୍ରକାର ଉତ୍ସବର ଆୟୋଜନ କରାଯିବ । ସ୍କୁଲ, କଲେଜର ପିଲାମାନଙ୍କୁ ଏହି କାର୍ଯ୍ୟକ୍ରମରେ ସାମିଲ କରାଯିବ ।
ରାଉରକେଲା ଓ ଭୁବନେଶ୍ବର ସହରର ସୌନ୍ଦର୍ଯ୍ୟକରଣ କରାଯିବ । ରାଉରକେଲା ବିମାନ ବନ୍ଦରରୁ ନିୟମିତ ବିମାନ ସେବା ଆରମ୍ଭ ହେବ । ଏହା ସହିତ ଖେଳାଳି ଓ ମ୍ୟାଚ ଅଫିସିଆଲ ମାନଙ୍କ ଯାତାୟତ ପାଇଁ ଚାର୍ଟର୍ଡ ଫ୍ଳାଇଟର ବ୍ୟାବସ୍ଥା କରାଯାଉଅଛି । ଏହି ଅବସରରେ ୧୦୦ଟି ନୂଆ ବସ୍ ସହିତ ରାଉରକେଲାରେ ମୋ ବସ୍ ସେବା ଆରମ୍ଭ ହେବ ।
ବିଶ୍ବକପ୍ ହକି ଆୟୋଜନରେ ସାମିଲ ହୋଇଥିବା ସବୁ ବିଭାଗ ଗୁଡିକର ପଦକ୍ଷେପକୁ ମୁଖ୍ୟମନ୍ତ୍ରୀ ପ୍ରଶଂସା କରିଥିଲେ ଏବଂ ସବୁ କାର୍ଯ୍ୟକୁ ନିର୍ଦ୍ଧାରିତ ସମୟ ସୀମା ମଧ୍ୟରେ ଶେଷ କରିବାକୁ ନିର୍ଦ୍ଦେଶ ଦେଇଥିଲେ । ହକି ବିଶ୍ବକପ୍ ଯେଭଳି ବିଭିନ୍ନ ଟିମ୍ ଓ ପ୍ରଶଂସକ ମାନଙ୍କ ନିମନ୍ତେ ଏକ ଭବ୍ୟ ଉତ୍ସବ ଭାବରେ ସ୍ମରଣୀୟ ହୋଇରହିବ, ସେଥିପାଇଁ ପରସ୍ପର ମଧ୍ୟରେ ଉତ୍ତମ ସମନ୍ବୟ ରଖି କାର୍ଯ୍ୟ କରିବାପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।
ଭୁବନେଶ୍ୱର: ରାଜ୍ୟ କ୍ୟାବିନେଟର ଗୁରୁତ୍ବପୂର୍ଣ୍ଣ ନିଷ୍ପତ୍ତି । କ୍ୟାବିନେଟରେ ୧୭ଟି ପ୍ରସ୍ତାବ ଉପରେ ମୋହର ମାରିଲେ ସରକାର । ଓଡ଼ିଶା ବନ୍ଦର ନୀତି-୨୦୨୨କୁ କ୍ୟାବିନେଟ ମଞ୍ଜୁରୀ ମିଳିଛି । ଅନ୍ତର୍ଦେଶୀୟ ଜଳପଥ ଏବଂ କ୍ଷୁଦ୍ର ବନ୍ଦରର ବିକାଶକୁ ଗୁରୁତ୍ବ ଦିଆଯାଉଛି । ଏଥିସହ ବନ୍ଦର କ୍ଷେତ୍ରରେ ଘରୋଇ ପୁଞ୍ଜିନିବେଶକୁ ପ୍ରୋତ୍ସାହନ ଦିଆଯିବ । ସାମୁଦ୍ରିକ ପର୍ଯ୍ୟଟନ ଓ ବହୁମୁଖୀ ଜେଟିକୁ ପ୍ରୋତ୍ସାହିତ କରାଯିବ ।
ଶିଶୁଙ୍କ ବିକାଶ ପାଇଁ `ପ୍ରାରମ୍ଭ’ ନୀତିକୁ ଅନୁମୋଦନ କଲେ ସରକାର । ଏଥିସହ ଟେକ୍ ହୋମ ରାସନ ନୀତିକୁ କ୍ୟାବିନେଟରେ ମଞ୍ଜୁରୀ ମିଳିଛି । ଓଡ଼ିଶା ମ୍ୟୁନିସିପାଲ ଆଇନ୍ ୧୯୫୦ର ସଂଶୋଧନ ପ୍ରସ୍ତାବ ଓ ଓଡ଼ିଶା ମ୍ୟୁନିସିପାଲ କର୍ପୋରେସନ ଆଇନ୍ ୨୦୦୩ର ସଂଶୋଧନ ପ୍ରସ୍ତାବ ଉପରେ ମୋହର ମାରିଛି କ୍ୟାବିନେଟ୍ । ଏଥିସହ ଓୟୁଟିଆର ରୂପାନ୍ତରଣ ପାଇଁ ଖର୍ଚ୍ଚ ହେବ ୧୫୦୦ କୋଟି ଟଙ୍କା ।
ଖଣ୍ଡଗିରି ସ୍ଥିତ ଜେଡି ସେଣ୍ଟର ଅଫ ଆର୍ଟ୍ସକୁ ରାଜ୍ୟ ସରକାର ଆର୍ଥିକ ସହାୟତା ଦେବା ନେଇ ପ୍ରସ୍ତାବକୁ ମୋହର ମରାଯାଇଛି । ଏଥିସହ ଗ୍ରୁପ ବି ଓ ଗ୍ରୁପ ସି ସ୍ପେଶାଲିଷ୍ଟ ପଦବୀ ଓ ସେବା ନିୟମାବଳୀ ୨୦୨୨ ସମନ୍ବିତ ପରୀକ୍ଷା ଅନୁଷ୍ଠିତ ହେବାକୁ ନେଇଥିବା ପ୍ରସ୍ତାବକୁ ଅନୁମୋଦନ କରାଯାଇଛି । ଏଥିସହ ରାଜସ୍ୱ ଓ ବିପର୍ଯ୍ୟୟ ପରିଚାଳନାର ଅଧିନିୟମରେ ହେବ ସଂଶୋଧନ । ଇଚ୍ଛାଧୀନ କୋଟାରେ ସିଙ୍ଗଲ ଆଲଟମେଣ୍ଟକୁ ଟାସ୍କଫୋର୍ସରୁ ବାଦ ପଡିବ । ଏଣିକି ବିଡିଏ, ସିଡିଏ ଓ OSHBର ସିଙ୍ଗଲ ଆଲଟମେଣ୍ଟ ଜମି ବୈଧ ହେବ ।
ଭୁବନେଶ୍ବର: ଓଡିଶା ସରକାରଙ୍କ ମ୍ୟାଲେରିଆ ନିରାକରଣ କାର୍ଯ୍ୟକ୍ରମ ଉପରେ ନିର୍ମିତ ଚଳଚ୍ଚିତ୍ର ‘ଦମନ’ ର ପ୍ରଦର୍ଶନକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମ୍ପୂର୍ଣ୍ଣ ଟିକସ ମୁକ୍ତ ଘୋଷଣା କରିଛନ୍ତି । ବାସ୍ତବ ଜୀବନରେ ମାଲକାନଗିରିର ଦୁର୍ଗମ ଅଞ୍ଚଳରେ ସ୍ୱାସ୍ଥ୍ୟ ସେବା ଯୋଗାଇବାରେ ଜଣେ ଯୁବ ଡାକ୍ତର ମାନବିକତାର ଯେଉଁ ନୂଆ ଉଦାହରଣ ସ୍ରୁଷ୍ଟି କରିଛନ୍ତି ତାହା ଏ ଚଳଚ୍ଚିତ୍ରର ବିଷୟ ବସ୍ତୁ ।
ସ୍ୱାସ୍ଥ୍ୟ ବିଭାଗ ସମେତ ସବୁ ସରକାରୀ କର୍ମଚାରୀ ମାନଙ୍କ ମଧ୍ୟରେ ସେବା ମନୋଭାବ କୁ ଆହୁରି ମଜବୁତ୍ କରିବା ଦିଗରେ ଏହା ପ୍ରଭାବିତ କରିବ ବୋଲି ମୁଖ୍ୟମନ୍ତ୍ରୀ ଆଶା ବ୍ୟକ୍ତ କରିଛନ୍ତି । Covid ମହାମାରୀ ସମୟରେ ଯେଭଳି ରାଜ୍ଯ ସରକାରଙ୍କ ବିଭିନ୍ନ ବିଭାଗ ସମନ୍ଵୟ ରଖି ସେବା । ଯୋଗାଇଲେ ସେଭଳି କାମକଲେ ଆମେ ଏକ ସୁସ୍ଥ ଓ ସଚେତନ ସାମାଜ ର ବିକାଶ କରି ପାରିବା ବୋଲି ମୁଖ୍ୟମନ୍ତ୍ରୀ ଦୃଢ଼ ବିଶ୍ବାସ ପ୍ରକଟ କରିଛନ୍ତି ।
ସୂଚନାଥାଉକି, ପ୍ରଥମଥର କୌଣସି ଓଡ଼ିଆ ସିନେମା ଜାତୀୟ ସ୍ତରରେ ପ୍ରଶଂସା ସାଉଣ୍ଟିଛି । ସତ୍ୟ ଘଟଣା ଉପରେ ଆଧାରିତ ଏହି ସିନେମାକୁ ଦେଖିବାକୁ ଲୋକଙ୍କ ଭିଡ଼ ମଧ୍ୟ ଜମୁଛି । ଧୀରେ ଧୀରେ ଅବନତୀ ଆଡ଼କୁ ଗତି କରୁଥିବା ଓଡ଼ିଆ ସିନେମା ଇଣ୍ଡଷ୍ଟ୍ରୀ ଦମନରୁ ସଞ୍ଜିବନୀ ପାଇଛି । ଆଉ ଏବେ ରାଜ୍ୟ ସରକାର ଏହାକୁ କରମୁକ୍ତ ଘୋଷଣା କରିବା ପରେ ଥିଏଟରରେ ଦମନ ଦେଖିବା ପାଇଁ ଆହୁରି ଲୋକଙ୍କ ଭିଡ଼ ବଢ଼ିବ ।
ନୂଆଦିଲ୍ଲୀ: ବୈଦେଶିକ ମନ୍ତ୍ରଣାଳୟରେ ଧରାପଡ଼ିଲା ପାକିସ୍ତାନୀ ଏଜେଣ୍ଟ । ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇ ପାଇଁ କାମ କରୁଥିଲା ଏଜେଣ୍ଟ । ବୈଦେଶିକ ମନ୍ତ୍ରାଳୟର ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପାକିସ୍ତାନକୁ ପଠାଇଥିବା ଜଣାପଡ଼ିଛି । ଆଇଏସଆଇ ଦ୍ୱାରା ହନିଟ୍ରାପର ଶିକାର ହୋଇଥିଲା ପାକିସ୍ତାନୀ ଏଜେଣ୍ଟ । ବୈଦେଶିକ ମନ୍ତ୍ରାଳୟରେ ସେ ଡ୍ରାଇଭର ଭାବେ କାମ କରୁଥିଲା । ଦିଲ୍ଲୀ ପୋଲିସ ଓ ତଦନ୍ତକାରୀ ସଂସ୍ଥା ଦ୍ୱାରା ତାଙ୍କୁ ଗିରଫ କରାଯାଇଛି । କେଉଁ କେଉଁ ଗୁରୁତ୍ୱପୂର୍ଣ୍ଣ ତଥ୍ୟ ସେ ଆଇଏସଆଇକୁ ପଠାଇଛି ତା ଉପରେ ଯାଞ୍ଚ କରାଯାଉଛି ।
ନୂଆଦିଲ୍ଲୀ: ଲିଭ-ଇନ ପାର୍ଟନର ଶ୍ରଦ୍ଧା ଓ୍ୱାକରଙ୍କ ଶରୀରର କଟା ଅଂଶ ପଡ଼ିଛି କେଉଁଠି? କେଉଁ କେଉଁ ଅଞ୍ଚଳରେ କଟା ଅଙ୍ଗ ଫୋପାଡିଛି ହତ୍ୟା ଅଭିଯୁକ୍ତ ଅଫତାବ ଅମିନ ପୁନାଓ୍ବାଲା? ଏନେଇ ଦିଲ୍ଲୀ ପୋଲିସ ଆରମ୍ଭ କରିଛି ସର୍ଚ୍ଚ ଅପରେସନ । ଏଥିରେ ସାମିଲ ହେବା ଲାଗି ପୋଲିସର ସମସ୍ତ ୟୁନିଟକୁ ନିର୍ଦ୍ଦେଶ ଦିଆଯାଇଛି । ଗତ ମେ ମାସରେ ଘଟିଥିବା ଲୋମହର୍ଷକ ହତ୍ୟାକାଣ୍ଡ ପରେ ଅଫତାବ ପ୍ରେମିକା ଶ୍ରଦ୍ଧାଙ୍କ ଶରୀରକୁ ୩୫ ଖଣ୍ଡ କରି ବିଭିନ୍ନ ସ୍ଥାନରେ ଫୋପାଡିଥିଲା । ସେହି ଅଂଶଗୁଡ଼ିକୁ ବର୍ତ୍ତମାନ ଠାବ କରିବା କଷ୍ଟକର ହୋଇଥିବାବେଳେ ପୋଲିସ ଏହି ଚାଲେଞ୍ଜକୁ ଗ୍ରହଣ କରିଛି । ପୋଲିସର ଏକ ସ୍ୱତନ୍ତ୍ର ଟିମ୍ ବି ଗୁରୁଗ୍ରାମ ଯାଇ ସେଠାରେ ସର୍ଚ୍ଚ ଅପରେସନ ଜାରି ରଖିଛି । ଏପରିକି ୧୫ ଜିଲ୍ଲାରେ ଅବସ୍ଥାପିତ ୧୭୮ ପୋଲିସ ଅଧିକାରୀଙ୍କୁ ଏହି କାର୍ଯ୍ୟରେ ନିୟୋଜିତ କରାଯାଇଛି ।
ଗତ ମେ ମାସରେ ହତ୍ୟାକାଣ୍ଡ ପରେ ଶ୍ରଦ୍ଧାଙ୍କ ଶରୀରର ବିଭିନ୍ନ ଅଂଶକୁ ଅଫତାବ ମେ, ଜୁନ, ଜୁଲାଇ ମଧ୍ୟରେ ବିଭିନ୍ନ ସ୍ଥାନରେ ଫିଙ୍ଗିଥିଲା । ଗତ ସପ୍ତାହରେ ମେହରୁଲି ଅଞ୍ଚଳରୁ ପ୍ରାୟ ୧୦ ବ୍ୟାଗ ଅଙ୍ଗପ୍ରତ୍ୟଙ୍ଗ ମିଳିଥିଲା । ସେପଟେ ଅଧିକ ଜେରା ଲାଗି ଅଫତାବକୁ ପୋଲିସ ଉତ୍ତରାଖଣ୍ଡ ଓ ହିମାଚଳ ପ୍ରଦେଶ ନେବ ବୋଲି ସୂଚନା ମିଳିଛି । ଗତ ଜୁନରେ ତ୍ରିଲୋକପୁରୀ ଅଞ୍ଚଳରେ ପୋଲିସ ଏକ କଟାମୁଣ୍ଡ ଓ କଟା ହାତ ଜବତ କରିଥିବା ଘଟଣା ସହ ଏହି ଘଟଣାର ସମ୍ପର୍କ ଥିବା ଆଶଙ୍କା କରୁଛି ପୋଲିସ ।
ସେପଟେ ପଦାକୁ ଆସିଲା ଶ୍ରଦ୍ଧାଙ୍କ ଆହତ ଅବସ୍ଥାର ଫଟୋ । ତାଙ୍କ ନାକରେ ଦାଗ ଥିବା ସହ ମୁହଁରେ କେତେକ ମାଡ ଚିହ୍ନ ଥିବା ଫଟୋରେ ସ୍ପଷ୍ଟ ହୋଇଛି । ତେଣେ ଗତ ମେ ୧୮ ତାରିଖରେ ମାରିଜୁଆନା ଖାଇ ଶ୍ରଦ୍ଧାଙ୍କ ବେକକୁ ଚିପି ଦେଇଥିଲା ବୋଲି ସ୍ୱୀକାର କରିଛି ଅଫତାବ । ମୁମ୍ବାଇରୁ ଦିଲ୍ଲୀକୁ ଆସିବା ପରେ ସେମାନେ ଆର୍ଥିକ ସଙ୍କଟର ସମ୍ମୁଖୀନ ହୋଇଥିଲେ ଏବଂ ଏହାକୁ ନେଇ ସେମାନଙ୍କ ମଧ୍ୟରେ ପାଟିତୁଣ୍ଡ ହୋଇଥିବା ପୋଲିସ ଜାଣିବାକୁ ପାଇଛି । ସେପଟେ ଘଟଣାର ଅଧିକ ତଦନ୍ତ ଲାଗି ମୁମ୍ବାଇର ଭାସାଇକୁ ଯାଇଛି ଦିଲ୍ଲୀ ପୋଲସର ଏକ ଟିମ୍ ।
କନ୍ଧମାଳ/ବଲାଙ୍ଗୀର: ଭିଜିଲାନ୍ସ ଜାଲରେ କନ୍ଧମାଳ ଜିଲ୍ଲା ଟିକାବାଲି ବିଦ୍ୟୁତ୍ ବିଭାଗର କର୍ମଚାରୀ । ଲାଇନ୍ ମ୍ୟାନ୍ ଭାବେ କାର୍ଯ୍ୟକରୁଥିବା କାଳୁଚରଣ ପଲେଇଙ୍କୁ ଧରିଲା ଭିଜିଲାନ୍ସ । ୫ ହାଜର ଟଙ୍କା ଲାଞ୍ଚ ନେଉଥିବା ବେଳେ ଫୁଲବାଣୀ ଭିଜିଲାନ୍ସ ହାତରେ ଧରାପଡିଛନ୍ତି କାଳୁଚରଣ । ଟିକାବାଲିର ରିଙ୍କୁ ଭୁକ୍ତା ଏକ ଦୋକାନ ଘରକୁ ବିଦ୍ୟୁତ୍ ସଂଯୋଗ ପାଇଁ ଆବେଦନ କରିଥିଲେ ।
ବିଦ୍ୟୁତ୍ ବିଭାଗରେ କାର୍ଯ୍ୟରତ ଥିବା କାଳୁଚରଣ ପଲେଇ ଶୀଘ୍ର ବିଦ୍ୟୁତ ସଂଯୋଗ ପାଇଁ ପାଞ୍ଚ ହଜାର ଟଙ୍କା ଲାଞ୍ଚ ମାଗିଥିଲେ । ଏନେଇ ଫୁଲବାଣୀ ଭିଜିଲାନ୍ସ ଟିମଙ୍କୁ ଜଣାଇଥିଲେ ରିଙ୍କୁ । ଛତିଝର ଗାଁ ଛକରେ ଟଙ୍କା ଓ କାଗଜ ପତ୍ର ନେଉଥିବା ବେଳେ ଧରିଛି ବ୍ରହ୍ମପୁର ଓ ଫୁଲବାଣୀ ଭିଜିଲାନ୍ସ ଟିମ୍ ।
ସେହିପରି, ବଲାଙ୍ଗୀର ଜିଲ୍ଲା ବେଲପଡ଼ା ତହସିଲର ସେକ୍ସନ୍ ଅଫିସର ଯୁଗଳ କିଶୋର ରାଉତ ଭିଜିଲାନ୍ସ ଜାଲରେ ପଡ଼ିଛନ୍ତି । ୧୫ ହଜାର ଟଙ୍କା ଲାଞ୍ଚ ନେବା ବେଳେ ମାଡ଼ିବସିଲା ଭିଜିଲାନ୍ସ । ଜମି ମ୍ୟୁଟେସନ ପାଇଁ ଲାଞ୍ଚ ନେଉଥିଲେ ଯୁଗଳ । ଲାଞ୍ଚ ଟଙ୍କା ଜବତ କରି ଯଗଶଙ୍କ ବେଲପଡ଼ା କାର୍ଯ୍ୟାଳୟ ଓ ପାଟଣାଗଡ଼ ବାସଭବନରେ ଭିଜିଲାନ୍ସ ଟିମର ଛାନବିନ ଜାରି ରହିଛି ।
ଭୁବନେଶ୍ୱର: ଆସନ୍ତା ୨୦ ତାରିଖ ପର୍ଯ୍ୟନ୍ତ ରାଜ୍ୟରେ ଜାରି ରହିବ ଶୁଖିଲା ପାଗ । ୨୧ ତାରିଖରୁ ବଦଳିବ ପାଗ । ଆକାଶ ମେଘାଛନ୍ନ ରହିବା ସହ କିଛି ଜିଲ୍ଲାରେ ବର୍ଷା ହେବ । ଆଭ୍ୟନ୍ତରୀଣ ଓଡ଼ିଶାରେ ବଢିବ ଶୀତ । ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଆସନ୍ତା ୨୪ ଘଣ୍ଟା ମଧ୍ୟରେ ଅବପାତର ପରିଣତ ହେବ ।
ପ୍ରଭାବରେ ୨୧ ତାରିଖ ବେଳକୁ ଦକ୍ଷିଣ ଓଡ଼ିଶାରେ କିଛି ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି । ୨୧ ତାରିଖ ସକାଳ ସାଢେ ଆଠଟାରୁ ୨୨ ତାରିଖ ସକାଳ ସାଢେ ଆଠଟା ପର୍ଯ୍ୟନ୍ତ ଗଞ୍ଜାମ, ଗଜପତି, ରାୟଗଡା, କନ୍ଧମାଳ, ମାଲକାନଗିରି ଏବଂ କୋରାପୁଟରେ ଘଡିଘଡି ବିଜୁଳି ସହ ବର୍ଷା ନେଇ ସତର୍କତା ଜାରି କରାଯାଇଛି ।
ବର୍ଷା ପରେ ଶୀତ କମିବା ସହ ରାତ୍ରିର ତାପମାତ୍ରା ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ହେବ । ଗତ ୨୪ ଘଣ୍ଟା ମଧ୍ୟରେ ରାଜ୍ୟର ୬ଟି ସ୍ଥାନରେ ତାପମାତ୍ରା ୧୨ ଡିଗ୍ରୀ ତଳେ ରହିଥିଲା । କୋରାପୁଟର ଶିମିଳିଗୁଡାରେ ସର୍ବନିମ୍ନ ୭.୯ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା ବେଳେ କନ୍ଧମାଳର ଜି.ଉଦୟଗିରିରେ ୮.୬ ଡିଗ୍ରୀ, କୋରାପୁଟରେ ୧୦.୫ଡିଗ୍ରୀ, ଫୁଲବାଣୀରେ ୧୦.୫ ଡିଗ୍ରୀ, ଦାରିଙ୍ଗବାଡିରେ ୧୧.୫ ଡିଗ୍ରୀ, ଭବାନୀପାଟଣାରେ ୧୧.୮ଡିଗ୍ରୀ ତାପମାତ୍ରା ରେକର୍ଡ କରାଯାଇଛି
ଇନ୍ଦୋର: ଭାରତ ଯୋଡ଼ ଯାତ୍ରା ମଝିରେ ରାହୁଲଙ୍କୁ ହତ୍ୟା ଧମକ । ଇନ୍ଦୋରର ଭାରତ ଯୋଡ଼ ଯାତ୍ରା ବେଳେ ରାହୁଲଙ୍କୁ ବୋମା ବିସ୍ଫୋରଣରେ ଉଡ଼ାଇ ଦିଆଯିବ ବୋଲି ଧମକ ଦିଆଯାଇଛି । ଜୁନି ଇନ୍ଦୋର ଥାନା ଅଞ୍ଚଳରେ ଥିବା ଏକ ମିଠା ଦୋକାନରୁ ଏହି ଧମକପୂର୍ଣ୍ଣ ଚିଠି ମିଳିବା ପରେ ପୋଲିସ ତଦନ୍ତ ଆରମ୍ଭ କରିଛି । ଆଖପାଖରେ ଲାଗିଥିବା ସିସିଟିଭି ଫୁଟେଜ ମଧ୍ୟ ଯାଞ୍ଚ କରାଯାଉଛି । ୨୪ ନଭେମ୍ବର ସୁଦ୍ଧା ରାହୁଲଙ୍କ ଭାରତ ଯୋଡ଼ ପଦଯାତ୍ରା ଇନ୍ଦୋରରେ ପହଞ୍ଚିବ । ସେଠାରେ ଖାଲସା ଷ୍ଟାଡିୟମରେ ରାହୁଲ ରାତ୍ରୀ ବିଶ୍ରାମ କରିବା କାର୍ଯ୍ୟକ୍ରମ ରହିଛି । ସେହି ସମୟରେ କିଛି ଅଘଟଣ କରିବା ଯୋଜନା କରାଯାଇଛି ବୋଲି ପୋଲିସ ସନ୍ଦେହ କରୁଛି ।
ରାହୁଲଙ୍କ ମନ୍ତବ୍ୟକୁ ନେଇ ଏଭଳି ହତ୍ୟା ଧମକ ମିଳିଥିବା ଜଣାପଡ଼ିଛି । ଅନ୍ୟପଟେ ମୁମ୍ବାଇରେ ମଧ୍ୟ ଆଜି ରାହୁଲଙ୍କ ମନ୍ତବ୍ୟକୁ ବିରୋଧ କରି ବିକ୍ଷୋଭ ପ୍ରଦର୍ଶନ କରାଯାଉଛି । ସେପଟେ ମହାରାଷ୍ଟ୍ରର ବୁଲଧାନା ଜିଲ୍ଲାରେ ଆଜି ସକାଳୁ ଭାରତ ଯୋଡ଼ ଯାତ୍ରା ଆରମ୍ଭ ହୋଇଥିବା ବେଳେ ଏଥିରେ ମହାତ୍ମା ଗାନ୍ଧୀଙ୍କ ଅଣନାତି ତୁଷାର ଗାନ୍ଧୀ ସାମିଲ ହୋଇଥିଲେ । ଏହାସହ ବହୁ ଲେଖକ ଓ ସାମାଜିକ କର୍ମୀ ପଦଯାତ୍ରାରେ ଯୋଡ଼ି ହୋଇଥିଲେ । ସେପ୍ଟେମ୍ବର ୭ ତାରିଖରୁ କନ୍ୟାକୁମାରୀରୁ ଆରମ୍ଭ ହୋଇଥିବା ପଦଯାତ୍ରା ଆସନ୍ତା ୨୦ ତାରିଖରେ ମଧ୍ୟପ୍ରଦେଶରେ ପ୍ରବେଶ କରିବ। ଫେବୃଆରୀ ଶେଷ ସୁଦ୍ଧା ଏହି ପଦଯାତ୍ରା କାଶ୍ମୀରରେ ପହଞ୍ଚିବ ।
ନୂଆଦିଲ୍ଲୀ: ଦିଲ୍ଲୀ ଶ୍ରଦ୍ଧା ୱାକର ବିଭତ୍ସ ହତ୍ୟା ମାମଲା ଏବେ ସାରା ଦେଶରେ ଚର୍ଚ୍ଚାରେ ରହିଛି । ଲିଭ୍ ଇନ ସାଥୀ ତଥା ପ୍ରେମିକ ଅଫତାବ ଅମିନ ପୁନାୱାଲା ଶ୍ରଦ୍ଧାଙ୍କ ହତ୍ୟା ପରେ ଶରୀରକୁ ୩୫ ଖଣ୍ଡ କରି ଜଙ୍ଗଲରେ ଫୋପାଡ଼ି ଦେଇଥିଲା । ୬ମାସ ପରେ ଏହି ଘଟଣା ସାମ୍ନାକୁ ଆସିବା ପରେ ସାରା ଦେଶରେ ଆକ୍ରୋଶ ଦେଖା ଦେଇଛି । ସଇତାନ ପ୍ରେମିକ ଅଫତାବକୁ ଫାଶୀଦଣ୍ଡ ଦେବା ପାଇଁ ଦାବି କରାଯାଇଛି । ଦିଲ୍ଲୀ ପୋଲିସ ଘଟଣାର ତଦନ୍ତ ଜୋର ସୋରରେ ଚଳାଇଛି । ଅଫତାବକୁ ରିମାଣ୍ଡରେ ଆଣି ପ୍ରମାଣ ଜୁଟାଇବାରେ ଲାଗିଛି ପୋଲିସ ।
ଏହି ଘଟଣା ଏବେ ଲୋକଙ୍କ ମନରୁ ଲିଭି ନଥିବା ବେଳେ ଆଉ ଏକ ଅପତାବର ଜଘନ୍ୟ କାଣ୍ଡ ସାମ୍ନାକୁ ଆସିଛି । ତେବେ ଘଟଣାଟି ଭାରତର ପଡ଼ୋଶୀ ଦେଶ ବାଂଲାଦେଶରୁ ଆସିଛି । ସୂଚନାନୁସାରେ, ନିଜ ଲିଭ୍ ଇନ ପାର୍ଟନର ସହ ମିଶି ଅଭିଯୁକ୍ତ ହିନ୍ଦୁ ଯୁବତୀଙ୍କ ହତ୍ୟା କରିଛି ଏବଂ ମୃତଶରୀରକୁ ଖଣ୍ଡ ବିଖଣ୍ଡିତ କରିଦେଇଛି । ଅଭିଯୁକ୍ତକୁ ଗିରଫ କରାଯାଇଛି । ବାଂଲାଦେଶରେ ଘଟିଥିବା ଏହି ଜଘନ୍ୟ କାଣ୍ଡ ସମସ୍ତଙ୍କୁ ସ୍ତବ୍ଧ କରିଦେଇଛି । ବାଂଲାଦେଶର ରାପିଡ ଆକ୍ସନ ଆର୍ମି ଅବୁ ବକର ନାମକ ଏକ ବ୍ୟକ୍ତିକୁ ଗିରଫ କରି ତଦନ୍ତରେ ଲାଗିଛି ।
ବାଂଲାଦେଶ ମିଡିଆ ରିପୋର୍ଟ ଅନୁସାରେ, ୬ ନଭେମ୍ବରରେ ଅବୁ ବକର କାମକୁ ନଆସିବାରୁ ଏବଂ ଫୋନରେ ତାକୁ ଯେତବେଳେ ସମ୍ପର୍କ କରାଗଲା ତେବେ ସମ୍ପର୍କ ହୋଇପାରିଲା ନାହିଁ । ଏହାପରେ ଟ୍ରାନ୍ସପୋର୍ଟ କମ୍ପାନୀ ମାଲିକ ଅନ୍ୟ ଏକ କର୍ମଚାରୀଙ୍କୁ ସୂଚନା ପାଇଁ ବକର ରହୁଥିବା ଭଡ଼ା ଘରକୁ ପଠାଇଥିଲେ ।କର୍ମଚାରୀ ଜଣଙ୍କ ସେଠାକୁ ଯିବା ପରେ ଦେଖିଥିଲେ ଘରେ ତାଲା ଲାଗିଥିଲା । ଏହାପରେ ଜଣାପଡ଼ିଥିଲା ଯେ ସେ ନିଖୋଜ ଅଛି ।
ସୂଚନା ପାଇ ପୋଲିସ ଘର ତାଲା ଭାଙ୍ଗି ଘର ଭିତରେ ଯାହା ଦେଖିଥିଲା ତାହା ସମସ୍ତଙ୍କୁ ସ୍ତବ୍ଧ କରିଦେଇଥିଲା । ପୋଲିସ ଦେଖିବାକୁ ପାଇଥିଲା ଯେ ଏକ ଡ୍ରମରେ ଜଣେ ମହିଳାଙ୍କ ମୁଣ୍ଡବିହୀନ ଶରୀର ଥିଲା । ପଲିଥିନରେ ଗୁଡ଼ାଯାଇ କଟା ମୁଣ୍ଡ ଅଲଗା ରଖାଯାଇଥିଲା । ଶରୀରରୁ ହାତ କଟାଯାଇଥିଲା । ପୀଡିତାଙ୍କ ଚିହ୍ନଟ କବିତା ରାଣୀ ରୂପରେ ହୋଇଛି ।
୭ ନଭେମ୍ବରରେ ଅବୁ ବକରକୁ ତାର ଲିଭ ଇନ ପାର୍ଟନର ସପନା ସହ ଗିରଫ କରିଛି ପୋଲିସ । ବାଂଲାଦେଶର ରାପିଡ ଆକ୍ସନ ବାଟାଲିଅନ (ଆରଏବି)ର ଅଧିକାରୀ କହିଛନ୍ତି ଯେ, ଅବୁ ବକର ଏବଂ ସପନା ଗତ ଚାରି ବର୍ଷ ହେବ ଗୋବରଚାକା ସ୍କୋୟାର ଅଞ୍ଚଳରେ ଏକ ଭଡ଼ା ଘରେ ଲିଭ ଇନରେ ରହୁଥିଲେ । ନିକଟରେ ଅବୁ ବକର କବିତାଙ୍କ ସହ ମିଶିଥିଲା ଏବଂ ଧୀରେ ଧୀରେ ଉଭୟଙ୍କ ମଧ୍ୟରେ ସମ୍ପର୍କ ଘନୀଭୂତ ହୋଇଥିଲା । କୌଣସି କାରଣରୁ ବକର କବିତାଙ୍କୁ ହତ୍ୟା କରି ଶରୀରର ଅନେକ ଖଣ୍ଡ କରିଦେଇଥିଲା । ଅବୁ ବକର ୫ ନଭେମ୍ବରକୁ ନିଜର ଭଡ଼ା ଘରକୁ କବିତାଙ୍କୁ ଡକାଇଥିଲା ।
ସେ ସମୟରେ ସପନା କାମକୁ ଯାଇଥିଲା । କବିତା ଏବଂ ବକର ମଧ୍ୟରେ କୌଣସି କଥାକୁ ନେଇ ଯୁକ୍ତିତର୍କ ଆରମ୍ଭ ହୋଇଥିଲା । ବକର ରାଗିଯାଇ କବିତାର ଗଳା ଚିପି ହତ୍ୟା କରିଥିଲା । ଏହାପରେ ମୁଣ୍ଡକୁ ଶରୀରରୁ ଅଲଗା କରିଦେଇଥିଲା । ଏଥିସହିତ ହାତ କାଟିଦେଇଥିଲା ଏବଂ ତାକୁ ନେଇ ଏକ ନାଳରେ ଫୋପାଡି଼ ଦେଇଥିଲା । ଫେରାର ହେବା ପୂର୍ବରୁ କଟା ମୁଣ୍ଡକୁ ପଲିଥିନରେ ଗୁଡ଼ାଇ ରଖି ଦେଇଥିଲା ଏବଂ ବାକି ଶରୀରକୁ ଏକ ଡ୍ରମରେ ବନ୍ଦ କରିଦେଇଥିଲା । ଏହାପରେ ଲିଭଇନ ପାର୍ଟନର ସପନାକୁ ନେଇ ଫେରାର ହୋଇଯାଇଥିଲା । ପୋଲିସ ତଦନ୍ତ କରି ଉଭୟଙ୍କୁ ଗିରଫ କରିଛି ।
