ଗାନ୍ଧୀନଗର: ବିଜେପି ଚାପରେ ପ୍ରାର୍ଥିପତ୍ର ପ୍ରତ୍ୟାହାର କଲେ ଆପ୍ ପାର୍ଥୀ । ଗୁଜୁରାଟ ସୁରଟ(ପୂର୍ବ) ଆସନରୁ ଆମ ଆଦମୀ ପାର୍ଟି ପକ୍ଷରୁ ଲଢୁଥିବା ପ୍ରାର୍ଥୀ କାଞ୍ଚନ ଜରିଓ୍ବାଲା ନିଜର ପ୍ରାର୍ଥୀପତ୍ର ପ୍ରତ୍ୟାହାର କରିଥିବା ସୂଚନା ମିଳିଛି । ଗତକାଲି ଠାରୁ ସେ ଅପହୃତ ହୋଇଥିବା ନେଇ ଅଭିଯୋଗ କରିଥିଲେ ଦିଲ୍ଲୀ ଉପମୁଖ୍ୟମନ୍ତ୍ରୀ ତଥା ଆପ୍ ନେତା ମନୀଷ ସିସୋଦିଆ ।
ସିସୋଦିଆ କହିଛନ୍ତି ପରାଜୟ ଭୟରେ ଗୁଜୁରାଟରେ ବିଜେପି ଆତଙ୍କିତ ଅବସ୍ଥାରେ ରହିଛି । ଗତକାଲି ପ୍ରାର୍ଥୀପତ୍ର ଯାଞ୍ଚ ପ୍ରକ୍ରିୟା ସାରି ଫେରୁଥିବାବେଳେ ଜରିଓ୍ବାଲାଙ୍କୁ ବିଜେପିର କିଛି ଗୁଣ୍ଡା ଅପହରଣ କରିନେଇଛନ୍ତି ବୋଲି ସିସୋଦିଆ ଅଭିଯୋଗ କରିଥିଲେ । ଏହା ଏକ ବିପଜ୍ଜନକ ପଦକ୍ଷେପ ଏବଂ ଗଣତନ୍ତ୍ରକୁ ଅପହରଣ କରାଯାଇଛି ବୋଲି କହିଛନ୍ତି ସିସୋଦିଆ ।
ସୁରଟ ଇଷ୍ଟ ଆସନରୁ ବିଜେପିର ବର୍ତ୍ତମାନ ବିଧାୟକ ଅରବିନ୍ଦ ରାଣାଙ୍କୁ ଟିକେଟ ଦିଆଯାଇଛି । ସେହିପରି କଞ୍ଚନ ଜରିୱାଲାଙ୍କୁ ପ୍ରାର୍ଥୀ କରିଛି ଆପ୍ । ଯଦି କଞ୍ଚନଙ୍କୁ ୧୦ ରୁ ୧୫ ହଜାର ଭୋଟ୍ ମିଳେ ତେବେ ଭାଜପା ପାଇଁ ଏଠାରେ ବିଜୟ ସମସ୍ୟା ସୃଷ୍ଟି କରିବ । ଯେଉଁଥିପାଇଁ ପ୍ରାର୍ଥୀଙ୍କୁ ଅପହରଣ କରାଯାଇଥିବା ଅଭିଯୋଗ କରିଛି ଆପ୍ ।
