ରାୟଗଡ଼ା: କାଶୀପୁର ପରେ ମୁନିଗୁଡ଼ାରେ ବେଆଇନ କ୍ଲିନିକ ସିଲ୍ କରିଛି ପ୍ରଶାସନ। ରାୟଗଡା ଜିଲ୍ଲା ମୁନିଗୁଡା ପୁରୁଣା ବସଷ୍ଟାଣ୍ଡ ନିକଟରେ ବେଆଇନ ଭାବେ ଚାଲିଥିବା ଏକ ଘରୋଇ କ୍ଲିନିକକୁ ସିଲ କରିଛି ପ୍ରଶାସନ। ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ମୁନିଗୁଡା ତହସିଲଦାର, ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ର ଅଧିକାରୀ ଓ ଥାନା ଅଧିକାରୀ ମିଳିତ ଭାବେ କ୍ଲିନିକ ଉପରେ ଚଢ଼ାଉ କରିଥିଲେ। ଚଢ଼ାଉ ବେଳେ ଡିଗ୍ରୀ ନଥାଇ ବେଆଇନ ଭାବେ କ୍ଲିନିକରେ ଡାକ୍ତର ଏସ. ବିଶ୍ୱାସ ଚିକିତ୍ସା କରୁଥିବା ଜଣାପଡ଼ିଥିଲା । କ୍ଲିନିକକୁ ସିଲ କରିବା ସହ ନକଲି ଡାକ୍ତର ସୁବ୍ରତ ବିଶ୍ୱାସକୁ ଥାନାରେ ଅଟକ ରଖାଯାଇଛି।
ଲଜରେ ଚାଲିଥିଲା ଜୁଆ ଖେଳ, ମାଡ଼ିବସିଲା ପୋଲିସ୍: ୭ ଗିରଫ ୬୦ ଲକ୍ଷ ଟଙ୍କା ଜବତ
ବଲାଙ୍ଗୀର: କଣ୍ଟାବାଞ୍ଜିର ଏକ ଲଜ୍ରେ ରାତି ଅଧିଆ ଚଢ଼ାଉ କରିଛି ପୋଲିସ । ରେଡ୍ ବେଳେ ଜବତ ହୋଇଛି ପ୍ରାୟ ୬୦ ଲକ୍ଷ ଟଙ୍କା । ଘଟଣାରେ ୭ ଜଣଙ୍କୁ ଗିରଫ କରିଛି ପୋଲିସ । ବିଳମ୍ବିତ ରାତିରେ ଏକ ଲଜରେ ବାହାର ରାଜ୍ୟର କିଛି ଲୋକ ଜୁଆ ଖେଳୁଥିବା ଖବର ପାଇଥିଲା ପୋଲିସ । ସଙ୍ଗେସଙ୍ଗେ ଚଢ଼ାଉ କରି ୫୮ ଲକ୍ଷରୁ ଅଧିକ ଟଙ୍କା ଜବତ କରିଛି। ଗିରଫ ୭ ଜଣଙ୍କୁ ପଚରାଉଚରା ଚାଲିଛି। କେବଳ ଜୁଆ ଖେଳ ଚାଲିଥିଲା, ନା ଆଉ କେଉଁ ଉଦ୍ଦେଶ୍ୟରେ ରାଜ୍ୟ ବାହାରର ଯୁବକ ଆସିଥିଲେ, ସେନେଇ ତଦନ୍ତ କରୁଛି ପୋଲିସ । ତଦନ୍ତ ପରେ କାର୍ଯ୍ୟାନୁଷ୍ଠାନ ହେବ ବୋଲି ଏସଡିପିଓ ହୃଷୀକେଶ ମେହେର ସୂଚନା ଦେଇଛନ୍ତି।
ମାଲକାନଗିରି ଓଟିଇଟି ପରୀକ୍ଷା ରଦ୍ଦ; ପ୍ରଶ୍ନ ପତ୍ର ହୋଇଥିଲା ଲିକ୍
ମାଲକାନଗିରି: ରଦ୍ଦ ହେଲା ମାଲକାନଗିରି ଜିଲ୍ଲାର ଓଟିଇଟି ପରୀକ୍ଷା । ଗତ ୨୯ ତାରିଖରେ ହୋଇଥିବା ଓଟିଇଟି ପରୀକ୍ଷାର ପ୍ରଶ୍ନ ପତ୍ର ଲିକ୍ ହୋଇଥିଲା। ଏହି ଖବର ଗଣମାଧ୍ୟମରେ ପ୍ରସାରଣ ହେବାପରେ ମାଲକାନଗିରି ଜିଲ୍ଲା ପ୍ରଶାସନ ଏନେଇ ଖୋଳତାଡ଼ ଆରମ୍ଭ କରିଥିଲେ। ପରେ ତଦନ୍ତ ରିପୋର୍ଟ ରାଜ୍ୟ ଶିକ୍ଷା ବିଭାଗ ନିକଟରେ ଦାଖଲ କରିଥିଲେ । ରାଜ୍ୟ ଶିକ୍ଷା ବିଭାଗ ନିର୍ଦ୍ଦେଶକ୍ରମେ ବୋର୍ଡ କର୍ତ୍ତୃପକ୍ଷ ମାଲକାନଗିରି ଜିଲ୍ଲାର ତିନୋଟି ପରୀକ୍ଷା କେନ୍ଦ୍ରରେ ହୋଇଥିବା ଓଟିଇଟି ପରୀକ୍ଷାକୁ ବାତିଲ କରିଛନ୍ତି।
ପୂଜା ମାହୋଲରେ ଅପରାଧ ଉପରେ ଲାଗିବ ରୋକ୍, ସ୍ମାର୍ଟସିଟିକୁ ଜଗିବ ସିସିଟିଭି
ଭୁବନେଶ୍ୱର: ଆରମ୍ଭ ହେଲାଣି ପାର୍ବଣ ଋତୁ । ଦଶହରା ପୂର୍ବରୁ ବ୍ୟାପକ ବ୍ୟବସ୍ଥା କରୁଛି କମିଶନରେଟ୍ ପୋଲିସ। ସିଲଭରସିଟି ପରେ ଏବେ ରାଜଧାନୀରେ ପୂଜା ମାହୋଲରେ ଅପରାଧିକ କାର୍ଯ୍ୟକଳାପରେ ରୋକ୍ ଲଗାଇବାକୁ ସ୍ୱତନ୍ତ୍ର ବ୍ୟବସ୍ଥା କରାଯାଉଛି । ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ ଓ କମିଶନରେଟ୍ ପୋଲିସ ପକ୍ଷରୁ ରାଜଧାନୀରେ ଲାଗିବ ଆଉ ୩୫୦ କ୍ୟାମେରା । ସହରର ୮୯ଟି ସ୍ଥାନକୁ ଚିହ୍ନଟ କରାଯାଇଛି। ଅପରାଧୀ, ଅପରାଧିକ କାର୍ଯ୍ୟକଳାପ ଓ ଟ୍ରାଫିକ ନିୟନ୍ତ୍ରଣ ଲାଗି ଆହୁରି ଅଧିକ କ୍ୟାମେରା ଲଗାଯିବ। ଯାହାର ସମୀକ୍ଷା କରିଛନ୍ତି BSCL ଏମଡି ସଞ୍ଜୟ ସିଂ।
ଆଜି ନାମିବ୍ୟାରୁ ଚାର୍ଟାର୍ଡ ଫ୍ଲାଇଟରେ ଭାରତ ଆସିବେ ଚିତା
ନୂଆଦିଲ୍ଲୀ: ଆଫ୍ରିକାରୁ ଭାରତ ଆସିବେ ଚିତା । ଆଜି ନାମିବ୍ୟା ରାଜଧାନୀ ୱିଣ୍ଡହୋକରୁ ଏକ ଚାର୍ଟାର୍ଡ ଫ୍ଲାଇଟରେ ବାହାରିବେ ବାଘ । ପ୍ରଥମ ପର୍ଯ୍ୟାୟରେ ୫ଟି ମାଈ ଓ ୩ଟି ଅଣ୍ଡିରା ଚିତାବାଘ ଅଣାଯିବ। ବାଘ ଆଣିବା ଲାଗି B747 ସ୍ୱତନ୍ତ୍ର ଜୁମ୍ବୋ ଜେଟର ବ୍ୟବସ୍ଥା କରାଯାଇଛି। ଏହି ବିମାନର ସମ୍ମୁଖ ଭାଗକୁ ବାଘ ଚିତ୍ରରେ ଚିତ୍ରଣ କରାଯାଇଛି । ବିମାନଟି ଅଧିକ ଲମ୍ବା ହୋଇଥିବା ବେଳେ କ୍ରମାଗତ ୧୬ ଘଣ୍ଟା ଉଡିବାର କ୍ଷମତା ହାସଲ କରିଛି । ଫଳରେ ବିମାନଟି ସିଧାସଳଖ ନାମିବ୍ୟାରୁ ଜୟପୁରରେ ପହଞ୍ଚିବ ।
ବିମାନରେ ଥିବା ବେଳେ ବାଘଙ୍କୁ କିଛି ଖାଇବାକୁ ଦିଆଯିବ ନାହିଁ । ଖାଦ୍ୟ ଖାଇଥିବା ବାଘମାନେ ଦୀର୍ଘଯାତ୍ରା କାଳରେ ଦୁର୍ବଳ ଅନୁଭବ କରୁଥିବାରୁ ସେମାନଙ୍କୁ ଖାଲି ପେଟରେ ରଖାଯିବ । ୱିଣ୍ଡହୋକରୁ ବାଘ ନେଇ ଆସୁଥିବା ବିମାନ ଜୟପୁରରେ ଲ୍ୟାଣ୍ଡ କରିବ । ସେଠାରୁ ହେଲିକପ୍ଟରରେ ବାଘମାନଙ୍କୁ ଜବଲପୁର ନିଆଯିବ । ଜବଲପୁରରେ ଏଥିଲାଗି ହେଲିପ୍ୟାଡ ତିଆରି ହୋଇଛି । ପରେ ସେଓପୁର ଜିଲ୍ଲାସ୍ଥିତ କୁନୋ ଜାତୀୟ ଉଦ୍ୟାନରେ ଚିତାଙ୍କୁ ରଖାଯିବ।
ଆସନ୍ତାକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟପ୍ରଦେଶ ଗସ୍ତରେ ଯିବେ । ପୂର୍ବାହ୍ନ ୧୦ଟା ୪୫ରେ କୁନୋ ଜାତୀୟ ଉଦ୍ୟାନରେ ସେ ବାଘଙ୍କୁ ଛାଡ଼ିବେ । ୧୯୫୨ରେ ଚିତା ଭାରତରୁ ବିଲୁପ୍ତ ବୋଲି ଘୋଷଣା ହୋଇଥିଲା । ତେଣୁ ସେମାନଙ୍କ ବଂଶବୃଦ୍ଧି ପାଇଁ ପୁଣି ପ୍ରୟାସ ଆରମ୍ଭ ହୋଇଛି । ଚିତା ପ୍ରକଳ୍ପ ଅନୁସାରେ ଭାରତରେ ଚିତାଙ୍କୁ ଛଡ଼ାଯାଉଛି। ଏହା ବିଶ୍ୱର ପ୍ରଥମ ଆନ୍ତଃମହାଦେଶୀୟ ହିଂସ୍ର ମାଂସାସୀ ପ୍ରାଣୀ ସ୍ଥାନାନ୍ତରଣ ପ୍ରକଳ୍ପ । ଭାରତର ଶେଷ ଚିତାବାଘଟି ୧୯୪୮ରେ ଛତିଶଗଡ଼ର କୋରିୟା ଜିଲ୍ଲା ଅନ୍ତର୍ଗତ ଶାଲ ଜଙ୍ଗଲରେ ପ୍ରାଣତ୍ୟାଗ କଥିଲା ।
ଆଜି ରାଜଧାନୀରେ ଚିତ୍ତାକର୍ଷକ ଏୟାର ସୂର୍ଯ୍ୟକିରଣ ଶୋ; ବଳ ଦେଖାଇବ ବାୟୁସେନା
ଭୁବନେଶ୍ୱର: ଆଜି ରାଜଧାନୀରେ ଦମ୍ ଦେଖାଇବ ସୂର୍ଯ୍ୟକିରଣ । ଆୟୋଜିତ ହେବ ଚିତ୍ତାକର୍ଷକ ଏୟାର ସୂର୍ଯ୍ୟକିରଣ ଶୋ । ବଳ ଦେଖାଇବ ବାୟୁସେନା । ସମରକଳା ପ୍ରଦର୍ଶନ କରିବେ ବାୟୁସେନା ଅଧିକାରୀ । କୁଆଖାଇ ନଦୀପଠାରେ ପୂର୍ବାହ୍ନ ୧୦ଟା ୧୫ରୁ ୧୧ଟା ୧୫ ମିନିଟ ଏକ ଘଣ୍ଟାର ଶୋ’ । ମାର୍କ-୧୨୩ ଲଢୁଆ ବିମାନ ଜରିଆରେ ପ୍ରଦର୍ଶିତ ହେବ କଳାକୌଶଳ । ୨ଟି ଟିମରେ ମୋଟ ୧୬ ଜଣ ବାୟୁସେନା ଅଧିକାରୀ ରହିବେ । ଏକା ସାଥିରେ ଉଡ଼ିବ ୯ଟି ବିମାନ । ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାର୍ଯ୍ୟକ୍ରମରେ ଯୋଗଦେବେ ।
ଏୟାର ଶୋ’ରେ ୫୦ ହଜାରରୁ ଏକ ଲକ୍ଷ ଲୋକଙ୍କ ସମାଗମ ହେବା ସମ୍ଭାବନା ରହିଛି । ଏଥିପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ଏୟାର ଶୋ ହେବାକୁ ଥିବା ଅଞ୍ଚଳରେ ପକ୍ଷୀ ଯେଭଳି ନଉଡିବେ ସେଥିପ୍ରତି ସ୍ବତନ୍ତ୍ର ଧ୍ୟାନ ଦିଆଯାଇଛି । ସୁରକ୍ଷା ଓ ଟ୍ରାଫିକ ନିୟନ୍ତ୍ରଣ ପାଇଁ ୧୫ପ୍ଲାଟୁନ ପୋଲିସ ଫୋର୍ସ ଓ ୧୦୦ଜଣ ଅଧିକାରୀଙ୍କ ସହ ନଦୀପଠାରେ ଓଡ୍ରାଫ ଟିମ୍ ମୁତୟନ ହୋଇଛନ୍ତି । ପ୍ରଥମ ଥର ପାଇଁ ଏଭଳି ଚିତ୍ତାକର୍ଷକ ଶୋ’ ହେଉଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଛି । ଆସନ୍ତା ୧୮ତାରିଖରେ ପୁରୀରେ ହବ ସୂର୍ଯ୍ୟକିରଣ ଶୋ
ଗୋଟିଏ ପୁଅକୁ ବିବାହ ପାଇଁ ୨ ଯୁବତୀଙ୍କ ଜିଦ୍
ଭୁବନେଶ୍ୱର: ରାଜଧାନୀ ରାସ୍ତାରେ ହାଇଡ୍ରାମା । ଗୋଟିଏ ପୁଅକୁ ବିବାହ ପାଇଁ ଜିଦ ଧରିଲେ ୨ ଯୁବତୀ । ବିବାହ କରିବା ପାଇଁ ୧୫ଦିନ ହେବ ଜଣେ ଯୁବତୀ ଅପହରଣ କରିଥିଲେ । ଆଜି ଯୁବକକୁ କିଛି ଲୋକ ଉଦ୍ଧାର କରିଥିବାବେଳେ ଦୁଇଜଣ ଯୁବତୀ ତାଙ୍କୁ ବିବାହ କରିବାକୁ ଜିଦ୍ ଧରିଥିଲେ ।
ଯୁବକ ଜଣକ ଇଶାନେଶ୍ବର ବସ୍ତି ବାସିନ୍ଦା । ୨ ଜଣଙ୍କ ମଧ୍ୟରୁ ଜଣେ ଯୁବତୀ କିଛି କିନ୍ନରଙ୍କୁ ଆଣି ମାରପିଟ କରିବା ସହ ଜୋରଜବରଦସ୍ତି ନିଜ ସହ ନେବାକୁ ଚେଷ୍ଟା କରିବାରୁ ସ୍ଥାନୀୟ ଲୋକେ ପୋଲିସ କଣ୍ଟ୍ରୋଲ ରୁମ୍ କୁ ଖବର ଦେଇଥିଲେ । ଘଟଣା ସ୍ଥଳରେ ଚନ୍ଦ୍ରଶେଖରପୁର ଥାନା ପୋଲିସ ପହଞ୍ଚି ଉଭୟଙ୍କୁ ଉଦ୍ଧାର କରିଛି ।
ଗୋଟିଏ ଘରେ ପଡ଼ିଛି ଶାଶୂ- ବୋହୂଙ୍କ ମୃତଦେହ
ଝାରସୁଗୁଡ଼ା: ଝାରସୁଗୁଡାରେରେ ଚାଞ୍ଚଲ୍ୟ । ରେଙ୍ଗାଲି ଥାନା ଅନ୍ତର୍ଗତ ମିସ୍ତ୍ରୀ ପଡ଼ାରେ ଥିବା ଏକ ଘରୁ ଶାଶୂ-ବୋହୂଙ୍କ ମୃତଦେହ ଉଦ୍ଧାର । ମୃତକ ହେଲେ ଝିମ ଖଡ଼ିଆ ଓ ତାଙ୍କ ବୋହୂ ସାଏବାଣୀ ଖଡ଼ିଆ । ଉଭୟଙ୍କୁ ପଥରରେ ପିଟି ହତ୍ୟା କରା ଯାଇଥିବା ପୋଲିସ ଅନୁମାନ କରୁଛି ।
ଏଭଳି ଏକ ଖବର ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇଛି । ପୋଲିସ ଝିମ ଖଡିଆଙ୍କ ପୁଅ କୁଲଥୁ ଖଡିଆକୁ ଅଟକ ରଖି ପଚରାଉଚୁରା କରୁଥିବା ରେଙ୍ଗାଲି ଥାନା ଅଧିକାରୀ ସୂଚନା ଦେଇଛନ୍ତି ।
ପ୍ରତାରଣା ସନ୍ଦେହରେ ପ୍ରେମିକାକୁ ହତ୍ୟାକରି ନିଜେ ବିଷ ପିଇଲା ପ୍ରେମିକ
ସୁନ୍ଦରଗଡ଼: ପ୍ରେମରେ ପ୍ରତାରଣା ସନ୍ଦେହରେ ପ୍ରେମିକାକୁ ହତ୍ୟାକରି ନିଜେ ବିଷ ପିଇଲା ପ୍ରେମିକ । ସୁନ୍ଦରଗଡ଼ ଜିଲ୍ଲା ଚାନ୍ଦିପୋଷ ଥାନା ଅନ୍ତର୍ଗତ ଭୁଲତା ଗାଁରେ ଘଟିଛି ଏହି ଚାଞ୍ଚଲ୍ୟକର ଘଟଣା । ପ୍ରେମିକାକୁ ହତ୍ୟା କରିବା ପରେ ବିଷ ପିଇ ଗୁରୁତର ଅବସ୍ଥାରେ ରାଉରକେଲା ସରକାରୀ ଡାକ୍ତରଖାନାରେ ଚିକିତ୍ସିତ ହେଉଛି ପ୍ରେମିକ । ଭୂଲତା ଗାଁର ଶାନ୍ତି ଲାକ୍ରା, ଓ ଶୁକୃ ଓରାମଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା ।
ପ୍ରେମିକାର ଚରିତ୍ରକୁ ସନ୍ଦେହ କରି ପ୍ରେମିକ ଆଜି ଏଭଳି କାଣ୍ଡ ଭିଆଇଛି । ଏକ ଧାରୁଆ ଅସ୍ତ୍ରରେ ବେକ କାଟି ପ୍ରମୀକାଙ୍କୁ ହତ୍ୟା କରିବା ପରେ ନିଜେ ବିଷ ପିଇ ଦେଇଥିଵା ଅଭିଯୋଗ ହୋଇଛି । ଗ୍ରାମବାସୀ ଘଟଣା ସମ୍ପର୍କରେ ଚାନ୍ଦିପୋଷ ଥାନାକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ହତ୍ୟାକାରୀ ଶୁକୃ ଏବେ ଡାକ୍ତରଖାନାରେ ପୋଲିସ ହେପାଜତରେ ଚିକିତ୍ସାଧୀନ ଅଛି ।
ନଦୀ ମଝିରେ ଚିତ୍କାର କଲେ ୨୫ ଯାତ୍ରୀ, ବଞ୍ଚାଇଲେ ୧୦୮ ଆମ୍ବୁଲାନ୍ସ କର୍ମଚାରୀ
କଳାହାଣ୍ଡି: ନଇ ମଝିରେ ଫସିଲା ଡଙ୍ଗା । ଦେବଦୂତ ସାଜିଲେ ୧୦୮ ବୋଟ୍ ଆମ୍ବୁଲାନ୍ସ କର୍ମଚାରୀ । ସମସ୍ତ ଯାତ୍ରୀଙ୍କୁ କଲେ ଉଦ୍ଧାର । କଳାହାଣ୍ଡି ଇଦ୍ରାବତୀ ଜଳଭଣ୍ଡାରରେ ଘଟିଛି ଏହି ଘଟଣା । ଗୁଞ୍ଜମାଳି ଗାଁର ପ୍ରାୟ ୨୫ ଜଣ ଗ୍ରାମବାସୀ ଏକ ଦେଶୀ ଡଙ୍ଗାରେ ଇଦ୍ରାବତୀ ଜଳଭଣ୍ଡାର ପାର ହୋଇ ବାରିଆହାଟକୁ ହାଟ କରିବା ପାଇଁ ଯାଇଥିଲେ ।
ହେଲେ ଯାନ୍ତ୍ରିକ ତ୍ରୁଟି ଯୋଗୁଁ ଡଙ୍ଗାଟି ନଇ ମଝିରେ ଅଟକି ଯାଇଥିଲା । ଫଳରେ ଲୋକେ ଆତଙ୍କିତ ହୋଇ ଚିତ୍କାର କରିବାକୁ ଲାଗିଥିଲେ । ଏହି ସମୟରେ ବାରିଆହାଟ ଘାଟି ଠାରେ ନିୟୋଜିତ ଥିବା ୧୦୮ ବୋଟ୍ ଆମ୍ବୁଲାନ୍ସ ଦେଶୀ ଡଙ୍ଗା ନିକଟରେ ପହଞ୍ଚି ଲୋକଙ୍କୁ ଉଦ୍ଧାର କରିଥିଲେ ।