ଭୁବନେଶ୍ବର: ନିଜାମ ସହର ହାଇଦ୍ରାବାଦରେ ନିବେଶକଙ୍କ ସହ ଆଲୋଚନା କରୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପୁଞ୍ଜିପତିଙ୍କୁ ରାଜ୍ୟରେ ନିବେଶ ପାଇଁ ନିମନ୍ତ୍ରଣ କରିବା ସହ ଓ୍ବାନ ଟୁ ଓ୍ବାନ ଆଲୋଚନା କରିଛନ୍ତି ନବୀନ।
ପୁଞ୍ଜିନିବେଶ ପାଇଁ ଆକୃଷ୍ଟ କରୁଛନ୍ତି ନବୀନ ଆଣ୍ଡ ଟିମ୍ ଓଡ଼ିଶା ।
ନିବେଶକଙ୍କୁ ନବୀନଙ୍କ ନିମନ୍ତ୍ରଣ ।
ଓଡ଼ିଶା ଆସି ନିବେଶ କରିବାକୁ ଶିଳ୍ପପତିଙ୍କୁ ନିମନ୍ତ୍ରଣ ।
ଇନଭେଷ୍ଟର୍ସ ମିଟ ପୂର୍ବରୁ ଦିନ ତମାମ ନିମନ୍ତ୍ରଣ ପର୍ବ ।
ନନଷ୍ଟପ ନବୀନ, ମାରାଥନ ମିଟିଂ ।
ପୁଞ୍ଜି ନିବେଶର ମିଳିଛି ପୁଳା ପୁଳା ପ୍ରତିଶ୍ରୁତି ।
ଫୋକସରେ ଆଇଟି, ହେଲଥ, ଫାର୍ମା ଓ ମେଟାଲ ସେକ୍ଟର ।
ଭୁବନେଶ୍ବର: ଦକ୍ଷିଣ ଆଣ୍ଡାମାନ୍ ସାଗରରେ ସୃଷ୍ଟି ହୋଇଛି ଘୂର୍ଣ୍ଣିବଳୟ । ଆସନ୍ତା ୨୦ ତାରିଖରେ ଏହା ଲଘୁଚାପର ରୂପ ନେବ ବୋଲି ଅନୁମାନ କରାଯାଉଛି । ଦକ୍ଷିଣ ଚାଇନା ସାଗରରେ ଆଉ ଏକ ସିଷ୍ଟମ ରହିଛି ଯେଉଁଥିପାଇଁ ଏହା ବର୍ତ୍ତମାନ ଘନୀଭୂତ ହୋଇପାରୁନାହିଁ । ୨୧ ତାରିଖରେ ଘୂର୍ଣ୍ଣିବଳୟ ଘନୀଭୂତ ହେବା ଆରମ୍ଭ ହେବ । ଫଳରେ ୨୩ ରୁ ୨୬ ମଧ୍ୟରେ ଓଡିଶାରେ ବର୍ଷା ହେବ । ଉପକୂଳ ସମେତ ଦକ୍ଷିଣ ଏବଂ ଆଭ୍ୟନ୍ତରୀଣ ଓଡିଶାରେ ପ୍ରବଳ ବର୍ଷା ସମ୍ଭାବନା ନେଇ ଆକଳନ କରିଛି ପାଣିପାଗ ବିଭାଗ ।
ଲଘୁଚାପ ପରେ ଅଧିକ ଘନୀଭୂତ ପାଇଁ ପାଗ ଅନୁକୂଳ ରହିଛି । ବାତ୍ୟା କିମ୍ବା ମହାବାତ୍ୟାର ରୂପ ନେଇପାରେ ଘୁର୍ଣ୍ଣିବଳୟ । ୨୧ ତାରିଖ ପର ଠାରୁ ଫନିର ଗତିପଥରେ ଗତି କରିବ ବାତ୍ୟା । ଆଣ୍ଡାମାନରୁ ବାହାରି ଦକ୍ଷିଣ ପଶ୍ଚିମ ବଙ୍ଗୋପସାଗରକୁ ଆସିବ ଘୁର୍ଣ୍ଣିବଳୟ । ତାମିଲନାଡୁ ଗତି ପରିବର୍ତ୍ତନ କରି ଫନିର ଗତିପଥରେ ଆସି ପଶ୍ଚିମ କେନ୍ଦ୍ରୀୟ ବଙ୍ଗୋପସାଗର ଓ ପରେ ଉତ୍ତର ପଶ୍ଚିମ ବଙ୍ଗୋପସାଗର ହୋଇ ପୂର୍ବ ଉପକୂଳ ମୁହାଁଇବ ସମ୍ଭାବନା ରହିଛି ।
୨୪ ରୁ ୨୬ ମଧ୍ୟରେ ଉପକୂଳ ଅତିକ୍ରମ କରିବା ନେଇ ସଙ୍କେତ ରହୁଛି । ଆନ୍ଧ୍ର ଓଡିଶା ନଚେତ ଓଡିଶା ପଶ୍ଚିମବଙ୍ଗ ଉପକୂଳ ଦେଇ ଯିବ ବୋଲି
ବିଭିନ୍ନ ମଡେଲ ଭିନ୍ନଭିନ୍ନ ଆକଳନ କରୁଛନ୍ତି । ୨୨ ତାରିଖ ସୁଦ୍ଧା ବାତ୍ୟାର ଗତିପଥ ଏବଂ ତୀବ୍ରତା ନେଇ ସ୍ପଷ୍ଟ ଚିତ୍ର ଆସିବ । NAVGM ମଡେଲ କହୁଛି ଓଡ଼ିଶାର ପୁରୀ କୋଷ୍ଟରେ ହୋଇପାରେ ଲ୍ୟାଣ୍ଡଫଲ । ସେହିପରି ଜିଏଫଏସର ଆକଳନ ପୁରୀ ଉପକୂଳରେ ଲ୍ୟାଣ୍ଡଫଲ କହୁଥିବାବେଳେ ୟୁକେ ମେଟର ଆକଳନ ଓଡିଶା ଉପକୂଳ କହିଛି ।
୨୬ ସକାଳେ ବାଲେଶ୍ବର-ପଶ୍ଚିମବଙ୍ଗ ଉପକୂଳ ଅତିକ୍ରମ କରିପାରେ ବାତ୍ୟା । ଏହି ସମୟରେ ପବନର ବେଗ ୧୦୦ ରୁ ୧୨୦ କିମି ବେଗ
ଥିବାବେଳେ ଭୁବନେଶ୍ୱରରେ ୬୦ ରୁ ୭୦ କିମି କହିବ ବୋଲି ସୂଚନା ଦେଇଛନ୍ତି ପାଣିପାଗ ବିଶେଷଜ୍ଞ ଶରତ ସାହୁ ।
ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନ୍ମଦିନରେ ନୂଆ ରେକର୍ଡ । ଗୋଟିଏ ଦିନରେ ସଂଗ୍ରହ ହୋଇଛି ୧୮ ହଜାର ୫୧୪ ୟୁନିଟ ରକ୍ତ । ଯାହା ଓଡ଼ିଶାର ରକ୍ତ ସଂଗ୍ରହ କ୍ଷେତ୍ରରେ ଅଲ ଟାଇମ ରେକର୍ଡ ବୋଲି ଜଣାପଡ଼ିଛି । ଗତକାଲି ମୁଖ୍ୟମନ୍ତ୍ରୀଙ୍କ ଜନ୍ମଦିନକୁ ବିଜେଡି ସେବା ଦିବସ ଭାବରେ ପାଳନ କରିଥିଲା । ଏଥିପାଇଁ ବିଜେଡି ଓ ଓଡ଼ିଶା ମୋ ପରିବାର ପକ୍ଷରୁ ରାଜ୍ୟରେ ୧୧୨ଟି ରକ୍ତଦାନ ଶିବିର ଆୟୋଜନ କରାଯାଇଥିଲା ।
ଯେଉଁଥିରେ ଗୋଟିଏ ଦିନରେ ୧୮ ହଜାର ୫୧୪ ୟୁନିଟ ରକ୍ତ ସଂଗ୍ରହ କରାଯାଇଛି । ଏହି ରେକର୍ଡକୁ କେନ୍ଦ୍ର ସରକାରଙ୍କୁ ଅବଗତ କରିଛି ସ୍ବାସ୍ଥ୍ୟ ବିଭାଗ । ଓଡ଼ିଶା ମୋ ପରିବାର ବ୍ୟତୀତ ଅନ୍ୟ କୌଣସି ସଂସ୍ଥା ଗୋଟିଏ ଦିନରେ ଏପରି ରେକର୍ଡ ସଂଖ୍ୟାରେ ରକ୍ତ ସଂଗ୍ରହ କରିନଥିବା ସ୍ପଷ୍ଟ କରିଛି ସ୍ବାସ୍ଥ୍ୟ ବିଭାଗ । କଟକ ଜିଲ୍ଲାରୁ ସର୍ବାଧିକ ୨ ହଜାର ୮୨୫ ୟୁନିଟ ରକ୍ତ ସଂଗ୍ରହ ହୋଇଥିବା ବେଳେ ଯାଜପୁର ଜିଲ୍ଲାରୁ ୧୬ଶହ ଓ ବାଲେଶ୍ବର ଜିଲ୍ଲାରୁ ୧ ହଜାର ୭୯ ୟୁନିଟ୍ ରକ୍ତ ସଂଗ୍ରହ ହୋଇଛି ।.
ମୁଖ୍ୟମନ୍ତ୍ରୀଙ୍କ ଜନ୍ମଦିନରେ ରକ୍ତଦାନର ରେକର୍ଡ ନବୀନ ପଟ୍ଟନାୟକଙ୍କ ଉପରେ ଲୋକଙ୍କ ବିଶ୍ବାସକୁ ଆହୁରି ପ୍ରତିପାଦିତ କରିଥିବା କହିଛି ବିଜେଡି ।
ନୂଆଦିଲ୍ଲୀ: ଅବକାରୀ ଦୁର୍ନିତୀ ମାମଲାରେ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ଜେରା କରୁଛି ସିବିଆଇ । ଦିନ ସାଢ଼େ ୧୧ଟାରୁ ଦିଲ୍ଲୀ ମଦ ନୀତିରେ ଦୁର୍ନୀତି ନେଇ ସିବିଆଇ ଟିମ୍ ତାଙ୍କୁ ପଚରାଉଚରା କରୁଛି । ସିବିଆଇ କାର୍ଯ୍ୟାଳୟରେ ହାଜର ହେବା ପୂର୍ବରୁ ସିସୋଦିଆ ରାଜଘାଟରେ ପହଞ୍ଚି ଗାନ୍ଧିଜୀଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ । ଆଜି ପଚରାଉଚରା ପରେ ସିସୋଦିଆଙ୍କୁ ସିବିଆଇ ଗିରଫ କରିପାରେ ବୋଲି ଆମ ଆଦମୀ ପାର୍ଟି ଆଶଙ୍କା କରିଛି ।
ସେପଟେ ସିସୋଦିଆଙ୍କୁ ଜେରା ନେଇ ଟ୍ବିଟ କରି ବିଜେପିକୁ ଟାର୍ଗେଟ କରିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ । ସେ ଟ୍ବିଟ କରିଛନ୍ତି ଯେ ଜେଲ୍ କେ ତାଲା ଟୁଟେଙ୍ଗେ, ମନୀଷ ସିସୋଦିଆ ଛୁଟେଙ୍ଗ (ଜେଲର ତାଲା ଭାଙ୍ଗିବ, ମନୀଷ ସିସୋଦିଆ ଖଲାସ ହେବେ ) । ସିବିଆଇ କାର୍ଯ୍ୟାଳୟକୁ ଯିବା ପୂର୍ବରୁ ସିସୋଦିଆ ସାଧାରଣ ଜନତାଙ୍କୁ ସମ୍ବୋଧିତ କରୁଥିବାର ଏକ ଭିଡିଓ ଟ୍ବିଟ କରିଛନ୍ତି କେଜ୍ରିୱାଲ । ହେଲେ ମନୀଷ ସିସୋଦିଆ ଗିରଫ ନେଇ ଅଧିକାରିକ ଭାବେ କୌଣସି ସ୍ପଷ୍ଟ ସୂଚନା ମିଳିନାହିଁ ।
ଗୁଜୁରାଟରେ ଦିଲ୍ଲୀ ସ୍କୁଲ ଭଳି ସ୍କୁଲ ନିର୍ମାଣ ପାଇଁ ସିସୋଦିଆ ପ୍ରତିଶ୍ରୁତି ଦେଇଥିଲେ । ତେଣୁ ଆଜି ତାଙ୍କୁ ଗିରଫ କରିବା ପାଇଁ ସିବିଆଇ ପ୍ରସ୍ତୁତି ଚଳାଇଛି । ୮ ଡିସେମ୍ବରରେ ଗୁଜୁରାଟ ବିଧାନସଭା ନିର୍ବାଚନ ଫଳାଫଳ ଆସିବା ପରେ ଜେଲର ତାଲା ଭାଙ୍ଗିବ ଓ ସିସୋଦିଆ ବାହାରକୁ ବାହରିବେ ବୋଲି ଟ୍ବିଟ କରିଛନ୍ତି କେଜରିଓ୍ବାଲ ।
ଅନ୍ୟପଟେ ଜେରା ପୂର୍ବରୁ ଦିଲ୍ଲୀ ମଦ ନୀତିରେ ଗୋଟିଏ ଟଙ୍କାକର ବି ଦୁର୍ନୀତି ହୋଇ ନଥିବା ସିସୋଦିଆ କହିଥିଲେ । ପୂର୍ବରୁ ସିସୋଦିଆଙ୍କ ଘର ଓ ବ୍ୟାଙ୍କ ଲକର ଯାଞ୍ଚ ପରେ ବି ସିବିଆଇକୁ ଦୁର୍ନୀତି ନେଇ କିଛି ତଥ୍ୟ ପ୍ରମାଣ ହସ୍ତଗତ ହୋଇ ନଥିଲା । ସିସୋଦିଆଙ୍କୁ ଜେରାକୁ ବିରୋଧ କରି ଆଜି ଦିଲ୍ଲୀରେ ବିକ୍ଷୋଭ ପ୍ରଦର୍ଶନ କରିଛି ଆମ ଆଦମୀ ପାର୍ଟି । ସିବିଆଇ କାର୍ଯ୍ୟାଳୟ ଆଗରେ ଆପ୍ ପକ୍ଷରୁ ବିକ୍ଷୋଭ ଜାରି ରହିଥିବା ବେଳେ ଅନେକ ନେତାଙ୍କୁ ପୋଲିସ ଉଠାଇ ନେଇଛି ।
ଭୁବନେଶ୍ବର: ନବମ ଓ ଦଶମ ଶ୍ରେଣୀ ପିଲାଙ୍କ ମପାଯିବ ଦକ୍ଷତା । ଲାଗୁ ହେବ ନୂଆ କରିକ୍ୟୁଲମ । ନବମ ଓ ଦଶମ ଶ୍ରେଣୀ ପିଲାଙ୍କ ପାଇଁ ଆସ୍ପିରେସନାଲ କମ୍ପୋନେଣ୍ଟ କୋର୍ସର ବ୍ୟବସ୍ଥା କରାଯାଇଛି । ଏହା ଚଳିତ ବର୍ଷ ନବମ ଶ୍ରେଣୀ ପିଲାଙ୍କ ପାଇଁ ଲାଗୁ ହେଉଥିବା ବେଳେ ଆସନ୍ତା ବର୍ଷରୁ ଦଶମ ଶ୍ରେଣୀ ପିଲାଙ୍କ ପାଇଁ ଲାଗୁ ହେବ ।
୪ଟି ବିଭାଗ ଉପରେ ଛାତ୍ରଛାତ୍ରୀଙ୍କ ଦକ୍ଷତା ମପାଯିବ । ପୁସ୍ତକ ସମୀକ୍ଷା, ପ୍ରୋଜେକ୍ଟ ଓ୍ବାର୍କ, କୋ-କରିକ୍ୟୁଲାର ଆକ୍ଟିଭିଟି ଓ ବେସିକ ଆଇଟି ସ୍କିଲ ଉପରେ ପରୀକ୍ଷା କରାଯିବ । ବର୍ଷକୁ ୪ ଥର ଛାତ୍ରଛାତ୍ରୀଙ୍କ ଦକ୍ଷତା ମାପିବେ ଶିକ୍ଷକ । ପ୍ରତି କମ୍ପୋନେଣ୍ଟରେ ୨୫ନମ୍ବର ଥିବା ବେଳେ ମୋଟ୍ ୪ଟି ବିଭାଗରେ ୧୦୦ନମ୍ବର ରହିଛି । HSCସାର୍ଟିଫିକେଟରେ ଏହି ଗ୍ରେଡ୍ ଉଲ୍ଲେଖ ରହିବ ବୋଲି ସୂଚନା ଦେଇଛି ମାଧ୍ୟମିକ ଶିକ୍ଷା ପରିଷଦ ।
ନୂଆଦିଲ୍ଲୀ: ଏମିତି ବି ଆସେ ମୃତ୍ୟୁ । କିଛି ସମୟର ମଜା ଯେ କେତେବେଳ ଜୀବନ ନେଇଯିବ ତାହା ସ୍ବପ୍ନରେ ବି କଳ୍ପନା କରି ନଥିବେ ୪ ସାଙ୍ଗ । ଘଣ୍ଟାକୁ ୨୩୦କିଲୋମିଟର ବେଗରେ ଚାଲିଥିବା ଦାମୀ ବିଏମ୍ଡବ୍ଲୁ କିଛି ସେକେଣ୍ଡରେ ହୋଇଗଲା ଚୁରମାର୍ । ଦୁର୍ଘଟଣାରେ ଡାକ୍ତର, ଇଂଜିନିୟରଙ୍କ ସମେତ ୪ ଜଣଙ୍କ ମୃତ୍ୟୁ ହୋଇଛି। ପୂର୍ବାଞ୍ଚଳ ଏକ୍ସପ୍ରେସ୍ ଓ୍ବେରେ ଘଟିଛି ଏଭଳି ଭୟଙ୍କର ଦୁର୍ଘଟଣା ।
କାର କ୍ରାସ୍ ହେବା ପୂର୍ବର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେଉଛି। ଯାହା ଦେଖିଲେ ଯେ କେହି ବି ବିଚଳିତ ହୋଇଯିବେ । ୪ ବନ୍ଧୁ ଏକ ବିଏମଡବ୍ଲ୍ୟୁ କାରରେ ଯାଉଥିବା ବେଳେ ପରସ୍ପର ସହ କଥା ହେଉଥିବା ଶୁଣିବାକୁ ମିଳୁଛି । ଜଣେ ସାଙ୍ଗ ଗାଡ଼ିର ବେଗ ୩ଶହ କିଲୋମିଟର ପର୍ଯ୍ୟନ୍ତ ନେବାକୁ କହୁଛନ୍ତି। ଏହି ସମୟରେ ଆଉ ଜଣେ ୪ଜଣ ଯାକ ମରିବେ ବୋଲି କହୁଥିବା ଶୁଣିବାକୁ ମିଳିଛି। ଆଉ କିଛି ସମୟ ଭିତରେ ଏହା ସତ ବି ହେଉଛି।
ବିଏମ୍ଡବ୍ଲୁ ଗାଡ଼ିଟି ସୁଲତାନପୁରରୁ ଦିଲ୍ଲୀ ଯାଉଥିଲା। ଗାଡ଼ିର ସ୍ପିଡୋମିଟର ଦେଖାଇ ଫେସବୁକ୍ ଲାଇଭ୍ କରୁଥିବା ବେଳେ ଦୁର୍ଘଟଣା ଘଟିଛି। ବିପରୀତ ଦିଗରୁ ଆସୁଥିବା କଣ୍ଟେନର ଟ୍ରକ୍ ସହ ଧକ୍କା ହୋଇଥିଲା। ଦୁର୍ଘଟଣା ଏତେ ଭୟାନକ ଥିଲା ଯେ, କାରର ଇଞ୍ଜିନ୍ ସହ ୪ଯାତ୍ରୀଙ୍କ ମୃତଦେହ ଅନେକ ଦୂରରେ ଛିଟିକି ପଡିଥିଲା। ଡାକ୍ତର ଆନନ୍ଦ ପ୍ରକାଶ ଗାଡ଼ି ଚଳାଉଥିବା ବେଳେ ଅନ୍ୟ ୩ଜଣ ଗାଡ଼ିରେ ବସିଥିଲେ। ସମସ୍ତ ମୃତକ ବିହାରର ବୋଲି ଜଣାପଡିଛି ।
ଭଦ୍ରକ: ଧାମନଗର ଉପନିର୍ବାଚନ ପାଇଁ ମଇଦାନରେ ଅଛନ୍ତି ୫ ଜଣ ପ୍ରାର୍ଥୀ । ୬ ଜଣ ନାମାଙ୍କନ ଦାଖଲ କରିଥିବା ବେଳେ ୫ ଜଣଙ୍କ ନାମାଙ୍କନ କାଏମ ରହିଛି । ୧୦୭ଟି ସମ୍ବେଦନଶୀଳ ବୁଥ ଚିହ୍ନଟ ହୋଇଥିବା ସୂଚନା ଦେଇଛନ୍ତି ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ । ସକାଳ ୭ଟାରୁ ସନ୍ଧ୍ୟା ୬ଟା ଯାଏ ଭୋଟ ଗ୍ରହଣ କରାଯିବ । ବୟସ୍କ ଓ ଦିବ୍ୟାଙ୍ଗଙ୍କ ପାଇଁ ପୋଷ୍ଟାଲ ବାଲାଟର ବ୍ୟବସ୍ଥା କରାଯାଇଛି । ୨୦ଟି ଟିମ୍ ଘରକୁ ଯାଇ ପୋଷ୍ଟାଲ ବାଲାଟ ସଂଗ୍ରହ କରିବେ ।
୧୨୦୫ ଜଣ ପୋଷ୍ଟାଲ ବାଲାଟ ପାଇଁ ଆବେଦନ କରିଛନ୍ତି । ୧୩୪ ବୁଥର ନାମ ପରିବର୍ତ୍ତନ କରାଯାଇଥିବା କହିଛନ୍ତି ସୁଶୀଲ ଲୋହାନୀ । ଦୃଷ୍ଟିହୀନଙ୍କ ପାଇଁ ବ୍ରେଲ ବାଲାଟର ବ୍ୟବସ୍ଥା କରାଯାଇଛି । ଉପନିର୍ବାଚନ ସମୟରେ ଶାନ୍ତି ଶୃଙ୍ଖଳା ପାଇଁ ୧୭ ପ୍ଲାଟୁନ ପୋଲିସ ଫୋର୍ସ ନୁତୟନ ହେବେ ।
୨ଟି ଲେଖାଏଁ ସିଆରପିଏଫ ଓ ବିଏସଏଫ୍ ଟିମ୍ ନିୟୋଜିତ ହେବେ । ଉପନିର୍ବାଚନରେ ପ୍ରତି ପ୍ରାର୍ଥୀ ସର୍ବାଧିକ ୪୦ ଲକ୍ଷ ଖର୍ଚ୍ଚ କରିପାରିବେ ବୋଲି ସୂଚନା ଦେଇଛନ୍ତି ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ ।
ମୋଟ ୨ ଲକ୍ଷ ୩୮ ହଜାର ୪୧୭ ଭୋଟର ଧାମନଗରରେ ଉପନିର୍ବାଚନରେ ମତଦାନ କରିବେ । ଏଥିପାଇଁ ୨୫୨ ମତଦାନ କେନ୍ଦ୍ରରେ ଭୋଟ ଗ୍ରହଣ ହେବ । ମତଦାନ ଦିନ ୪୮ ଘଣ୍ଟା ପୂର୍ବରୁ ମଦ ବିକ୍ରି ବନ୍ଦ ରହିବା ନେଇ ସୂଚନା ଦେଇଛନ୍ତି ନିର୍ବାଚନ କମିଶନର । ସେହିପରି ଭୋଟ ଗଣତି ଦିନ ମଧ୍ୟ ମଦବିକ୍ରିରେ କଟକଣା ଲାଗୁ ହୋଇଛି । ସେହିପରି ଭୋଟରଙ୍କୁ ସବୈତନିକ ଛୁଟି ମିଳିବା ନେଇ ସୂଚନା ଦେଇଛନ୍ତି ରାଜ୍ୟ ନିର୍ବାଚନ କମିଶନ ।
ଆସନ୍ତା ନଭେମ୍ବର ୩ରେ ମତଦାନ ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ହେବ। ନିର୍ବାଚନ କମିଶନଙ୍କ ପ୍ରେସ ବିଜ୍ଞପ୍ତି ପ୍ରକାଶ ପାଇବା ଦିନ ଠାରୁ ଜିଲ୍ଲାରେ ନିର୍ବାଚନ ଆଚରଣ ବିଧି ଲାଗୁ ହୋଇଛି । ପୋଷ୍ଟର ଓ ବ୍ୟାନର ଲଗାଇବାରେ ନିର୍ବାଚନ ଆଚରଣ ବିଧି ଉଲଙ୍ଘନ ଅଭିଯୋଗରେ ୬୨୪ଟି ମାମଲା ରୁଜୁ ହୋଇ କାର୍ଯ୍ୟାନୁଷ୍ଠାନ ନିଆଯାଇଛି । ୧୮୭ଟି ମାରଣାସ୍ତ୍ର ଓ ବନ୍ଧୁକ ଡିପୋଜିଟ ନିଆଯାଇଛି। ୧୧୬୭ଜଣ ଦାଗୀଙ୍କୁ CRPC ଆଇନ ଅନୁଯାୟୀ ଅଟକ ରଖାଯାଇଛି ବୋଲି ସେ କହିଛନ୍ତି ।
ହୋବାର୍ଟ: ଗତକାଲି ଅର୍ଥାତ ୧୬ ତାରିଖରୁ ଟି-୨୦ ବିଶ୍ୱକପ୍ ଅଷ୍ଟ୍ରେଲିଆରେ ଅନୁଷ୍ଠିତ ହୋଇଯାଇଛି । ଟୁର୍ଣ୍ଣାମେଣ୍ଟ ପୂର୍ବରୁ ଯେଉଁ ସବୁ ଆକଳନ କରାଯାଉଥିଲା ତାର ବିପରୀତ ଘଟଣା ଦେଖିବାକୁ ମିଳିଛି । ଗତକାଲି ଏସିଆ କପ୍ ବିଜେତା ଶ୍ରୀଲଙ୍କାକୁ ନାମବିଆ ଶୋଚନୀୟ ଭାବେ ପରାଜିତ କରିଥିଲା । ସେହିପରି ଦ୍ୱିତୀୟ ମ୍ୟାଚରେ ନେଦରଲ୍ୟାଣ୍ଡ ୟୁଏଇକୁ ହରାଇଥିଲା ।
ଆଜି ୩ୟ ମ୍ୟାଚ୍ ୱେଷ୍ଟଇଣ୍ଡିଜ୍ ଓ ସ୍କଟଲ୍ୟାଣ୍ଡ ମଧ୍ୟରେ ଖେଳାଯାଇଥିଲା । ୨ଥର ଟି-୨୦ ବିଶ୍ୱକପ୍ ବିଜେତା ୱେଷ୍ଟଇଣ୍ଡିଜ୍ ଆଜିର ମ୍ୟାଚରେ ପରାଜିତ ହୋଇଛି । ସ୍କଟଲ୍ୟାଣ୍ଡ ୧୬୧ରନର ଲକ୍ଷ୍ୟ ଦେଇଥିଲା ୱେଷ୍ଟଇଣ୍ଡିଜକୁ । ହେଲେ ଇଣ୍ଡିଜ ମାତ୍ର ୧୧୮ରନରେ ଅଲଆଉଟ୍ ହୋଇଯାଇଥିଲା । ୭ଜଣ ବ୍ୟାଟ୍ସମ୍ୟାନ ଦୁଇ ଅଙ୍କ ସଂଖ୍ୟା ମଧ୍ୟ ଛୁଇଁପାରିନଥିଲେ ।
ସ୍କଟଲ୍ୟାଣ୍ଡର ସ୍ଲୋ ଲେଫ୍ଟ ଆର୍ମ ବୋଲର ମାର୍କ ୱାଟ ୩ୱିକେଟ୍ ଅକ୍ତିଆର କରିଛନ୍ତି । ସ୍କଟଲ୍ୟାଣ୍ଡ ଟିମ୍ ପକ୍ଷରୁ ସବୁଠୁ ବଡ଼ ଇନିଂସ ଜର୍ଜ ମୁନସି ଖେଳିଥିଲେ । ସେ ୬୬ ରନ୍ କରିଥିଲେ । ମାଇକେଲ ଜୋନସ ୨୦ ରନ୍, ବରିଙ୍ଗଟନ୍ ୧୬ ରନ୍ ଏବଂ ମାକଲିଅଡ ୨୩ ରନ୍ କରିଥିଲେ । ୱେଷ୍ଟଇଣ୍ଡିଜ ପକ୍ଷରୁ ଜୋସେଫ ଓ ହୋଲ୍ଡର ଦୁଇଟି ଲେଖାଏଁ ୱିକେଟ୍ ନେଇଥିବା ବେଳେ ଓଡିନ ସ୍ମିଥ ଗୋଟିଏ ୱିକେଟ୍ ଅକ୍ତିଆର୍ କରିଛନ୍ତି ।
ସେହିପରି ୱେଷ୍ଟଇଣ୍ଡିଜର କେଲ୍ ମେୟର୍ସ ୨୦ ରନ୍, ଇଭିନ ଲୁଇସ୍ ୧୪ ରନ୍, ବ୍ରାଣ୍ଡନ କିଙ୍ଗ ୧୭ ଏବଂ ଜେସନ ହୋଲ୍ଡର ୩୮ ରନ୍ କରିଥିଲେ । ୧୮.୩ ଓଭରରେ ୧୧୮ ରନ୍ ରେ ଦଳ ତାର ସମସ୍ତ ୱିକେଟ୍ ହରାଇଥିଲା । ସ୍କଟଲ୍ୟାଣ୍ଡ ପକ୍ଷରୁ ମାର୍କ ୱାଟ୍ ୩ଟି ୱିକେଟ୍ ହାସଲ କରିଥିବା ବେଳେ ବ୍ରାଡ ହ୍ୱିଲ ଓ ମାଇକେଲ୍ ଲିସ୍କ ୨ ଟି ଲେଖାଏଁ ୱିକେଟ୍ ନେଇଥିଲେ ।
ନନ୍ଦିଘୋଷ ବ୍ୟୁରୋ: ଟିଭି ଆକଟ୍ରେସ ବୈଶାଳୀ ଠକ୍କର ସୁଇସାଇଡ ସସପେନ୍ସ । ସଫ୍ଟଓ୍ବେର ଇଞ୍ଜିନିୟର ସହ ସ୍ଥିର ହୋଇଥିଲା ବାହାଘର । ୨୦ ଅକ୍ଟୋବରରେ ପଡ଼ିଥାନ୍ତା ହାତଗଣ୍ଠି । ବାହାଘରର ୪ ଦିନ ପୂର୍ବରୁ କାହିଁକି ଆତ୍ମହତ୍ୟା କଲେ ଲୋକପ୍ରିୟ ଅଭିନେତ୍ରୀ ବୈଶାଳୀ ଠକ୍କର ? ସୁଇସାଇଡ ନୋଟରେ ମାଆ, ବାପା ଓ ଭାବି ସ୍ବାମୀଙ୍କୁ ମଧ୍ୟ କ୍ଷମା ମାଗିଛନ୍ତି ବୈଶାଳୀ ।
ସୁଇସାଇଡ ନୋଟରେ ପୂର୍ବତନ ବୟଫ୍ରେଣ୍ଡକୁ ନେଇ ସାଂଘାତିକ ଖୁଲାସା କରିଛି ପୋଲିସ । ୮ପେଜର ସୁଇସାଇଡ ନୋଟରୁ ପୋଲିସ ହାତରେ ଲାଗିଛି ଗୁରୁତ୍ବପୂର୍ଣ୍ଣ ସୁରାକ । ଡାଏରୀରେ ପଡ଼ୋଶୀ ତଥା ପୂର୍ବତନ ବୟଫ୍ରେଣ୍ଡ ସମ୍ପର୍କରେ ଉଲ୍ଲେଖ କରିଛନ୍ତି ବୈଶାଳୀ । ଶେଷରେ I QUIT ଲେଖିଛନ୍ତି । ପୂର୍ବତନ ପ୍ରେମିକ ରାହୁଲ, ବୈଶାଳୀଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ ।
ବୟଫ୍ରେଣ୍ଡ ରାହୁଲ ଓ ଦିଶା ନାମକ ଜଣେ ଝିଅର ନାଁ ମଧ୍ୟ ଡାଏରୀରେ ରହିଛି । କିଛି ଦିନ ଧରି ବୈଶାଳୀଙ୍କୁ କାମ ମିଳୁ ନଥିବାରୁ ମଧ୍ୟ ସେ ଡିପ୍ରେସନରେ ଥିଲେ ବୋଲି ପୋଲିସ ସନ୍ଦେହ କରୁଛି । ୟେ ରିସ୍ତା କ୍ୟା କେହଲାତା ହେ ଶୋ’ରୁ ସେ କ୍ୟାରିଅର ଆରମ୍ଭ କରଥିଲେ । ସୁପର ସିଷ୍ଟର, ସସୁରାଲ ସିମର କା ଭଳି ଲୋକପ୍ରିୟ ଟିଭି ଶୋ’ରେ ଅଭିନୟ କରି ସେ ବେଶ୍ ଲୋକପ୍ରିୟତା ହାସଲ କରିଥିଲେ । ଗତକାଲି ଇନ୍ଦୋର ସ୍ଥିତ ଘରୁ ବୈଶାଳୀଙ୍କ ଝୁଲନ୍ତା ମୃତଦେହ ପୋଲିସ ଜବତ କରିଥିଲା ।
ନନ୍ଦିଘୋଷ ବ୍ୟୁରୋ: ଋଷ-ୟୁକ୍ରନ ଯୁଦ୍ଧରେ ସାଂଘାତିକ ପ୍ରଭାବିତ ହୋଇଛନ୍ତି ଶିଶୁ । ୟୁକ୍ରେନ ଉପରେ ଋଷର ଆକ୍ରମଣ ଯୋଗୁ ଘୋର ଅର୍ଥନୈତିକ ସଙ୍କଟ ସୃଷ୍ଟି ହୋଇଥିବା ବେଳେ ଏହାର ଗୁରୁତର ପ୍ରଭାବ ପିଲାମାନଙ୍କ ଉପରେ ପଡିଛି । ଯୁଦ୍ଧ ଆରମ୍ଭ ପରଠାରୁ ପୂର୍ବ ୟୁରୋପ ଓ ମଧ୍ୟ ଏସିଆର ୪୦ଲକ୍ଷରୁ ଊର୍ଦ୍ଧ୍ବ ଶିଶୁ ଦାରିଦ୍ର୍ୟ କଷାଘାତର ଶିକାର ହୋଇଛନ୍ତି ।
ଏ ନେଇ ରିପୋର୍ଟ ଦେଇଛି ୟୁନିସେଫ୍ । 2021 ପରଠାରୁ ଏହି ସଂଖ୍ୟର 19% ବୃଦ୍ଧି ହୋଇଛି ବୋଲି କୁହାଯାଇଛି । ପ୍ରଭାବିତ ଶିଶୁଙ୍କ ମଧ୍ୟରେ ଅଧିକ ଋଷ ଓ ୟୁକ୍ରେନର ପିଲାମାନେ ରହିଛନ୍ତି । ପ୍ରଭାବିତ ୪୦ଲକ୍ଷ ଶିଶୁଙ୍କ ମଧ୍ୟରୁ ୨୮ଲକ୍ଷ ପିଲା ଦାରିଦ୍ର୍ୟ ସୀମାରେଖା ତଳେ ରହିଥିବା ପରିବାରର । ପାଶ୍ଚାତ୍ୟ ଦେଶର ପ୍ରତିବନ୍ଧକ ଯୋଗୁ ଋଷ ଅର୍ଥନୀତିରେ ଏହାର ପ୍ରଭାବ ଦେଖିବାକୁ ମିଳିଛି ।
ଋଷର ସର୍ବାଧିକ ଶିଶୁ ଏହି ତାଲିକାରେ ଥିବା ବେଳେ ଦ୍ବିତୀୟରେ ରହିଛି ୟୁକ୍ରେନ । ସେହିପରି ତୃତୀୟରେ ରହିଛି ରୋମାନିଆ । ଦୁଇ ଦେଶ ମଧ୍ୟରେ ବିବାଦ ଯୋଗୁ ମୁଦ୍ରାସ୍ଫୀତି ସର୍ବୋଚ୍ଚସ୍ତରରେ ପହଞ୍ଚିଛି । ୨୨ଟି ରାଷ୍ଟ୍ରରେ କରାଯାଇଥିବା ସର୍ଭେରୁ ଏହି ରିପୋର୍ଟ ସାମ୍ନାକୁ ଆସିଛି ବୋଲି ୟୁରୋପ ଓ ସେଣ୍ଟ୍ରାଲ ଏସିଆର ୟୁନିସେଫ ରିଜିଓନାଲ ଡାଇରେକ୍ଟର ଅଫସାନ ଖାନ କହିଛନ୍ତି ।
