କୋଲକତା: ଆସନସୋଲର ସ୍ୱତନ୍ତ୍ର ସିବିଆଇ ଅଦାଲତ ବିଚାରପତି ରାଜେଶ ଚକ୍ରବର୍ତ୍ତିଙ୍କୁ ମିଳିଛି ଧମକ । ଟିଏମସି ବିଧାୟକ ଅନୁବ୍ରତ ମଣ୍ଡଳଙ୍କୁ ନଛାଡ଼ିଲେ ବିଚାରପତିଙ୍କ ପରିବାରକୁ ମିଥ୍ୟା ଏନଡିପିଏସ୍ ମାମଲାରେ ଫସାଇ ଦିଆଯିବ ବୋଲି ଧମକ ମିଳିଛି । ପତ୍ର ମାଧ୍ୟମରେ ବିଚାରପତିଙ୍କୁ ଏହି ଧମକ ମିଳିଛି । ସୂଚନାଯୋଗ୍ୟ ଯେ, ଗୋରୁ ଚୋରାଚାଲଣ ଅଭିଯୋଗରେ ଅନୁବ୍ରତଙ୍କୁ ସିବିଆଇ ଅଗଷ୍ଟ ୧୧ ତାରିଖରେ ଗିରଫ କରିଥିଲା ।
ଧମକ କିଏ ଦେଇଛି ?
ବିଚାପତି ରାଜେଶ ଚକ୍ରବର୍ତ୍ତିଙ୍କ ପାଖକୁ ଆସିଥିବା ଚିଠିରେ ଅନୁବ୍ରତଙ୍କୁ ତୁରନ୍ତ ଜାମିନ ଦେବାକୁ କୁହାଯାଇଛି ।ଯଦି ଜାମିନ ନମିଳେ ତେବେ ବିଚାରପତିଙ୍କ ପରିବାରକୁ ଏନଡିପିଏସ୍ ମାମଲାରେ ଫସାଇ ଦିଆଯିବ ବୋଲି ପତ୍ରରେ ଲେଖା ଅଛି । ବର୍ଦ୍ଧମାନ ଅଦଲାତର କାର୍ଯ୍ୟକାରୀ ମାଜିଷ୍ଟ୍ରେଟ୍ ଓ ଟିଏମସି କର୍ମଚାରୀ ସଂଘ ସଚିବଙ୍କ ହେଡ୍ କ୍ଲର୍କ ବୋଲି ନିଜକୁ ଦାବି କରୁଥିବା ବପ୍ପା ଚାଚାର୍ଜୀ ଏହି ଚିଠି ପଠାଇଥିବା କୁହାଯାଉଛି ।
ଆସନସୋଲ ସ୍ପେଶାଲ କୋର୍ଟର ବିଚାରପତି ପଶ୍ଚିମ ବର୍ଧମାନର ଜିଲ୍ଲା ଜଜଙ୍କୁ ଏହି ଧମକପୂର୍ଣ୍ଣ ପତ୍ର ସମ୍ବନ୍ଧରେ ଚିଠି ଲେଖି ଜଣାଇଛନ୍ତି । କାରଣ ଧମକ ଦେଇଥିବା ବ୍ୟକ୍ତି ନିଜକୁ ବର୍ଧମାନ କୋର୍ଟର କ୍ଲର୍କ ବୋଲି ଦାବି କରିଛି । ସିବିଆଇର ଅଭିଯୋଗ ଯେ, ଫେରାର ତୃଣମୂଳ ନେତା ବିନୟ ମିଶ୍ରଙ୍କ ଭାଇ ବିକାଶ ମିଶ୍ର ଓ ମଣ୍ଡଳ ଗୋ’ ଚୋରାଚାଲଣକାରୀ ଇନାମୁଲ ହକକୁ ସଂରକ୍ଷଣ ଦେଉଥିଲେ । ସିବିଆଇ ଅନୁସାରେ ଇନାମୁଲ ହକ୍ ଇଲମ ବଜାରରେ ଗୋରୁ କିଣାବିକା କରୁଥିଲା । ସେଠାରୁ ସେ ବାଂଲାଦେଶକୁ ଗୋ ଚାଲଣ କରୁଥିଲା ।
ଅନୁବ୍ରତ ମଣ୍ଡଳର ବେନାମୀ ସଂପତି ଖୋଳତାଡ଼ କରିବାକୁ ବୋଲପୁର ପହଂଚିଲା ସିବିଆଇ ଟିମ୍ ଅନ୍ୟପକ୍ଷରେ ସିବିଆଇ ଟିମ୍ ବିରଭୂମ ଜିଲ୍ଲାର ତୃଣମୂଳ ଅଧ୍ୟକ୍ଷ ଅନୁବ୍ରତ ମଣ୍ଡଳର ବେନାମୀ ସଂପତି ଠାବ କରିବାକୁ ବୋଲାପୁରରେ ପହଂଚିଛନ୍ତି । ଏପର୍ଯ୍ୟନ୍ତ ଅନୁବ୍ରତ ମଣ୍ଡଳଙ୍କର ଦୁଇଟି ଚାଉଳ ମିଲ୍ ଭୋଲେବାବା ଓ ଶିବ ଶମ୍ଭୁ ରାଇସ ଉପରେ ସିବିଆଇ ଟିମ୍ ଚଢାଉ କରିଛି । ଏହି ଦୁଇଟି ଯାକ ମିଲ୍ ଅନୁବ୍ରତଙ୍କ ସଂପର୍କୀୟ ଓ ତାଙ୍କ ସମର୍ଥକଙ୍କ ନାମରେ ରହିଛି ।
