ଭୁବନେଶ୍ୱର: ସରକାରୀ କାର୍ଯ୍ୟାଳୟରେ ଏଣିକି ବ୍ୟାଟେରୀ ଚାଳିତ ଗାଡ଼ି ବ୍ୟବହାର ହେବ । ଏନେଇ ବିଭିନ୍ନ ପ୍ରସ୍ତାବ ଉପରେ ବିଚାର ବିମର୍ଶ ଚାଲିଛି । ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ପରିବହନ କମିଶନରଙ୍କୁ ଏନେଇ ଚିଠି ଲେଖାଯାଇଛି । କଟକ ଓ ଭୁବନେଶ୍ୱରରେ ଯାନବାହାନ ଚଳାଚଳର ଅଧିକ ବ୍ୟବହାର ହେଉଛି । ତେଣୁ ସରକାରୀ ଅଫିସରେ କିଛି ପରିମାଣରେ ଇଲେକ୍ଟ୍ରିକ ଗାଡ଼ି ବ୍ୟବହାର କରିବାକୁ ଚିନ୍ତା କରାଯାଉଛି । ପ୍ରତି ଅଫିସରେ କିଛି ପେଟ୍ରୋଲ ଓ ଡିଜେଲ ଗାଡି ଭଡ଼ାରେ ଅଣାଯାଇଛି । କିଛି ଇଲେକଟ୍ରିକ୍ ବସ୍ ବି ଚାଲିଲାଣି । ଏକ ଉଚ୍ଚସ୍ତରୀୟ ବୈଠକରେ ସରକରୀ କାର୍ଯ୍ୟାଳୟରେ ଇଲେକଟ୍ରିକ୍ ଗାଡ଼ି ବ୍ୟବହାର ନେଇ ଚିନ୍ତା କରାଯିବ ।
କୋଶଳ ରାଜ୍ୟ ଦାବିରେ କୋଶଳ ସେନା ଓ କୋଶଳ ରାଜ୍ୟ ମୁକ୍ତିମୋର୍ଚ୍ଚା ପକ୍ଷରୁ ମହାବନ୍ଦ ଡାକରା
ବଲାଙ୍ଗୀର: ସ୍ୱତନ୍ତ୍ର କୋଶଳ ପ୍ରଦେଶ ଦାବିରେ କୋଶଲ ସେନା, କୋଶଲ ମୁକ୍ତିମୋର୍ଚ୍ଚା ଡାକରାରେ ୧୨ ଘଣ୍ଟିଆ କୋଶଳ ମହାବନ୍ଦ ଡାକରା ଦିଆଯାଇଛି I ବନ୍ଦକୁ ସମର୍ଥନ ଜଣାଇ ବିଭିନ୍ନ ସଂଗଠନର ୧୨ ଘଣ୍ଟିଆ ମହାବନ୍ଦରେ ଡାକରା ସାମିଲ ହୋଇଛନ୍ତି I ସକାଳୁ ସକାଳୁ ବିଭିନ୍ନ ସ୍ଥାନରେ ବନ୍ଦର ପ୍ରଭାବ ଦେଖାଯାଇଛି I ବଲାଙ୍ଗୀର ଜିଲ୍ଲାରେ ସବୁ ଦୋକାନ ବଜାର, ସ୍କୁଲ କଲେଜ, ସରକାରୀ କାର୍ଯ୍ୟାଳୟ ବନ୍ଦ ରହିଛି I ଗାଡି ମୋଟର ଚଳାଚଳ ମଧ୍ୟ ବନ୍ଦ ରହିଛି I
ଆଜିର ମହାବନ୍ଦକୁ ଓକିଲ ସଂଘ ସହ ବିଭିନ୍ନ ଛାମୁଆ ସଂଗଠନ ସମର୍ଥନ କରି ବନ୍ଦରେ ସାମିଲ ହୋଇଛନ୍ତି I କୋଶଳ ପ୍ରଦେଶ ଦାବିରେ କୋଶଲ ସେନା, କୋଶଲ ମୁକ୍ତିମୋର୍ଚ୍ଚାର ପକ୍ଷରୁ ପିକେଟିଂ ଆରମ୍ଭ କରାଯାଇଛି I ପ୍ରଥମେ ବଲାଙ୍ଗୀର ମୁଖ୍ୟ ଡାକଘର ସାମ୍ନାରେ ନାରାବାଜି କରିବା ପରେ ସହର ସାରା ବୁଲି ବୁଲି ବନ୍ଦ କରାଯାଇଛି I
ଲୁଟ୍ ବେଳେ ଡକାୟତ ଓ ପୋଲିସ ମୁହାଁମୁହିଁ, ଏନକାଉଣ୍ଟରରେ ଜଣେ ମୃତ
ରାଞ୍ଚି: ଝାଡ଼ଖଣ୍ଡରେ ପୋଲିସର ଲାଇଭ ଏନକାଉଣ୍ଟର । ଫିଲ୍ମ ଷ୍ଟାଇଲରେ ଡକାୟତଙ୍କୁ ଏନକାଉଣ୍ଟର କଲା ପୋଲିସ । ଏକ ଘରୋଇ ଫାଇନାନ୍ସ ସଂସ୍ଥାର ଅଫିସରୁ ଲୁଟ ଉଦ୍ୟମ ବେଳେ ଜଣେ ଏମବିଏ ଛାତ୍ରଙ୍କୁ ପୋଲିସ ଏନକାଉଣ୍ଟର କରିଛି । ଧାନବାଦରେ ଥିବା ମୁଥୁଟ ଫିନକ୍ରପ ଗୋଲ୍ଡ ଲୋନ୍ ସଂସ୍ଥା ଅଫିସରେ ପଶି ୫ ଜଣ ଦୁର୍ବୃତ୍ତ ଡକାୟତି ଉଦ୍ୟମ କରିଥିଲେ । ବ୍ୟାଙ୍କ କର୍ମଚାରୀଙ୍କୁ ଭୟଭୀତ କରି ସୁନା ଓ ଟଙ୍କା ଲୁଟ କରୁଥିବା ବେଳେ ପୋଲିସକୁ ଦେଖି ଚମ୍ପଟ ମାରିଥିଲେ । ଡକାୟତମାନଙ୍କୁ ପିଛା କରିବା ସହ ପୂରା ଫିଲ୍ମ ଷ୍ଟାଇଲରେ ରାଜରାସ୍ତାରେ ଫାୟାରିଂ କରିଥିଲା ପୋଲିସ । ଗୁଳି ଶବ୍ଦ ଶୁଣି ଲୋକମାନେ ରୁଣ୍ଡ ହୋଇଯାଇଥିଲେ ।
ପୋଲିସ ଗୁଳିରେ ଜଣଙ୍କର ମୃତ୍ୟୁ ହୋଇଥିବା ବେଳେ ଦୁଇ ଜଣ ଆହତ ହୋଇଛନ୍ତି । ସେମାନଙ୍କଠାରୁ ପୋଲିସ ୩ଟି ବନ୍ଧୁକ ଜବତ କରିଛି । ମୃତକ ଜଣଙ୍କ ଜଣେ ଏମବିଏ ଛାତ୍ର ବୋଲି ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । କଲେଜ ଯିବା ନାଁରେ ଘରୁ ଆସି ଛାତ୍ର ଜଣଙ୍କ ଡକାୟତି କରୁଥିଲେ ।
ବ୍ରିଟେନର ନୂଆ ଗୃହ ମନ୍ତ୍ରୀ ହେଲେ ଭାରତୀୟ ବଂଶୋଦ୍ଭବ ସୁଏଲା ବ୍ରେଭରମ୍ୟାନ
ଲଣ୍ଡନ: ବ୍ରିଟେନର ନୂଆ ଗୃହ ମନ୍ତ୍ରୀ ହେଲେ ଭାରତୀୟ ବଂଶୋଦ୍ଭବ ବାରିଷ୍ଟର ସୁଏଲା ବ୍ରେଭରମ୍ୟାନ । ଗୃହମନ୍ତ୍ରୀ ଭାବେ ସୁଏଲାଙ୍କ ନାମ ଘୋଷଣା କରିଛନ୍ତି ନବନିଯୁକ୍ତ ପ୍ରଧାନମନ୍ତ୍ରୀ ଲିଜ୍ ଟ୍ରସ୍ । ପୂର୍ବରୁ ଏହି ପଦବୀରେ ଥିଲେ ଅନ୍ୟତମ ଭାରତୀୟ ବଂଶୋଦ୍ଭବ ପ୍ରୀତି ପଟେଲ । ଦକ୍ଷିଣ-ପୂର୍ବ ବ୍ରିଟେନର ଫେୟାରହାମରୁ କଞ୍ଜରଭେଟିଭ ଦଳର ପ୍ରତିନିଧିତ୍ୱ କରୁଛନ୍ତି ୪୨ ବର୍ଷ ବୟସ୍କା ସୁଏଲା । ବୋରିସ ଜନସନ୍ ସରକାରରେ ସୁଏଲା ଥିଲେ ଆଟର୍ଣ୍ଣି ଜେନେରାଲ ।
ସୁଏଲାଙ୍କ ମାତା ଉମା ତାମିଲନାଡୁର ହୋଇଥିବାବେଳେ ପିତା କ୍ରିଷ୍ଟି ଫର୍ଣ୍ଣାଣ୍ଡିଜ ଗୋଆର । ସୁଏଲା ଜଣେ ବୌଦ୍ଧ ଧର୍ମାବଲମ୍ବୀ । ୧୯୬୦ ଦଶକରେ ଉମା ମରିସସରୁ ବ୍ରିଟେନ ଯାଇଥିବାବେଳେ ପିତା କେନିଆରୁ ବ୍ରିଟେନ ଯାଇଥିଲେ । ଗୃହ ମନ୍ତ୍ରୀ ଭାବେ ଦାୟିତ୍ୱ ନେବା ପରେ ଶୁଳ୍କ ହ୍ରାସ, ମାନବାଧିକାର, ଶରଣାର୍ଥୀ ଓ ଅନ୍ୟାନ୍ୟ ସମସ୍ୟାର ସମାଧାନ ଦିଗରେ ପଦକ୍ଷେପ ନେବେ ବୋଲି କହିଛନ୍ତି ସୁଏଲା । ଦେଶ କଠିନ ସମୟ ଦେଇ ଗତି କରୁଥିବାବେଳେ ପ୍ରଧାନମନ୍ତ୍ରୀ ଲିଜ୍ ଟ୍ରସ୍ ଉପଯୁକ୍ତ ନେତୃତ୍ୱ ନେଇପାରିବେ ବୋଲି ସୁଏଲା କହିଛନ୍ତି ।
ରାଜଧାନୀରେ ମହିଳାଙ୍କୁ ଦୁଷ୍କର୍ମ ଅଭିଯୋଗ, ବନ୍ଧା ହେଲେ ବିଡିଏ ଫିଲଡ ଇନ୍ସପେକ୍ଟର
ଭୁବନେଶ୍ୱର: ରାଜଧାନୀରେ ମହିଳାଙ୍କୁ ଦୁଷ୍କର୍ମ ଅଭିଯୋଗ । ବନ୍ଧା ହେଲେ ବିଡିଏ ଫିଲଡ ଇନ୍ସପେକ୍ଟର ମନୋରଞ୍ଜନ ଦାସ । ଘରର ପ୍ଲାନ କରାଇବା ଆଳରେ ମହିଳାଙ୍କୁ ଦୁଷ୍କର୍ମ କରିଥିବା ଅଭିଯୋଗ । ଗତ ଫେବୃୟାରୀ ୯ ତାରିଖରେ ଲକ୍ଷ୍ମୀସାଗର ଥାନାରେ ଜଣେ ମହିଳା ଅଭିଯୋଗ କରିଥିଲେ । ଉକ୍ତ ମହିଳାଙ୍କ ଅଭିଯୋଗ ଆଧାରରେ ଲକ୍ଷ୍ମୀସାଗର ଥାନା ପୋଲିସ ତଦନ୍ତ କରିଥିଲା । ଫିଲଡ ଇନ୍ସପେକ୍ଟରଙ୍କ ଘରେ ବାରମ୍ବାର ପୋଲିସ ଚଢ଼ାଉ କରିଥିଲା ।
ଗିରଫ ଭୟରେ ମନୋରଞ୍ଜନ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଆଗୁଆ ଜାମିନ ଆବେଦନ କରିଥିଲେ । ମନୋରଞ୍ଜନଙ୍କ ଜାମିନ ଅଗ୍ରାହ୍ୟ ହେବା ସହ ତଳ କୋର୍ଟରେ ୪ ସପ୍ତାହ ମଧ୍ୟରେ ହାଜର ହେବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ । କିନ୍ତୁ ଏହାକୁ ଏଡାଇ ଚାଲିଥିଲେ ମନୋରଞ୍ଜନ । ଫଳରେ ମନୋରଞ୍ଜନଙ୍କୁ ତୁରନ୍ତ ଗିରଫ କରିବା ପାଇଁ କୋର୍ଟର ନିର୍ଦ୍ଦେଶ ଥିଲା । ମନୋରଞ୍ଜନ ବିଡିଏ କାର୍ଯ୍ୟାଳୟରେ ଥିବା ବେଳେ ପୋଲିସ ଗିରଫ କରିଛି ।
ଆଜି ସର୍ବବୃହତ ହକି ଷ୍ଟାଡିୟମର ନିର୍ମାଣ କାର୍ଯ୍ୟର ଅନୁଧ୍ୟାନ କରିବେ ବରିଷ୍ଠ ଅଧିକାରୀ
ରାଉରକେଲା: କେତେ ସରିଲାଣି ସର୍ବବୃହତ ହକି ଷ୍ଟାଡିୟମର ନିର୍ମାଣ କାମ । FIH ଓ ହକି ଇଣ୍ଡିଆ ଓ କ୍ରୀଡା ବିଭାଗର ବରିଷ୍ଠ ଅଧିକାରୀ ଆଜି ରାଉରକେଲା ଗସ୍ତରେ ଆସି ବିପିୟୁଟି ପରିସରରେ ନିର୍ମିତ ହେଉଥିବା ସର୍ବ ବୃହତ ହକି ଷ୍ଟାଡିୟମ୍ ନିର୍ମାଣ କାର୍ଯ୍ୟ ଅନୁଧ୍ୟାନ କରିବେ । FIHର ଆକ୍ଟିଙ୍ଗ ପ୍ରେସିଡେଣ୍ଟ, CEO, ସିନିଅର ସ୍ପୋର୍ଟସ ମ୍ୟାନେଜର, କମ୍ୟୁନିକେସନ ମ୍ୟାନେଜର ଆସିବେ । ହକି ଇଣ୍ଡିଆର ଏକଜ୍ୟୁକୁଟିଭ ଡାଇରେକ୍ଟର, ସିନିଅର ମ୍ୟାନେଜର କମ୍ପିଟିସନ ଓ ଡେଭଲପମେଣ୍ଟ, COA ଆସିବେ । ଇଡକୋ ମୁଖ୍ୟ ହେମନ୍ତ ଶର୍ମା ଓ କ୍ରୀଡ଼ା ସଚିବ ଆର ଭିନିଲ କ୍ରୀଷ୍ଣା ମଧ୍ୟ ଆସିବେ ।
ସକାଳ ସାଢେ ୧୦ ଟା ସମୟରେ ରାଉରକେଲା ବିମାନବନ୍ଦରଠାରେ ପହଞ୍ଚିବା ପରେ ବିପିୟୁଟି ପରିସରରେ ନିର୍ମିତ ହେଉଥିବା ସର୍ବ ବୃହତ ହକି ଷ୍ଟାଡିୟମ୍ ନିର୍ମାଣ କାର୍ଯ୍ୟ ଅନୁଧ୍ୟାନ କରିବେ । ଏହି ଗସ୍ତ ସମୟରେ ରାଉରକେଲା ବିମାନବନ୍ଦର, ହକି ପ୍ରାକଟିସ ଫିଲଡ ମଧ୍ୟ ଅନୁଧ୍ୟାନ କରିବେ । ଖେଳାଳିଙ୍କ ରହିଵା ସ୍ଥାନ, ପ୍ରାକ୍ଟିସ ସେଣ୍ଟର, ଷ୍ଟାଡିୟମ୍ ନିର୍ମାଣ କାର୍ଯ୍ୟ ଅନୁଧ୍ୟାନ କରିଵାର କାର୍ଯ୍ୟକ୍ରମ ରହିଛି । ବିପିୟୁଟି ପରିସରରେ ନିର୍ମିତ ହେଉଛି ଆନ୍ତର୍ଜାତୀୟସ୍ତରର ସର୍ବ ବୃହତ ହକି ଷ୍ଟାଡିୟମ୍ ।
ବାଲେଶ୍ୱରରେ ଦଶମ ଶ୍ରେଣୀ ଛାତ୍ରଙ୍କ ଆତ୍ମହତ୍ୟା ଘଟଣା, ଆଜି ସ୍କୁଲ ଛୁଟି ଘୋଷଣା କଲେ ସ୍କୁଲ କର୍ତ୍ତୁପକ୍ଷ
ବାଲେଶ୍ୱର: ବାଲେଶ୍ୱରରେ ଟ୍ରେନ ଆଗକୁ ଡେଇଁ ଦଶମ ଶ୍ରେଣୀ ଛାତ୍ରଙ୍କ ଆତ୍ମହତ୍ୟା ଘଟଣା । ଛାତ୍ର ମୃତ୍ୟୁକୁ ନେଇ ଆଜି ଛୁଟି ଘୋଷଣା କଲେ ସିଦ୍ଧି ବିନାୟକ ସ୍କୁଲ କର୍ତ୍ତୃପକ୍ଷ । ପୁଅର ମୃତଦେହ ନେଇ ରାଉରକେଲା ସ୍ଥିତ ଘରକୁ ଫେରିଲେ ମୃତ ଛାତ୍ର ସୁରଜ ଗୁପ୍ତାଙ୍କ ବାପା ସନ୍ତୋଷ ଗୁପ୍ତା । ସ୍କୁଲ କର୍ତ୍ତୃପକ୍ଷଙ୍କ ଧମକ ପରେ ଆତ୍ମହତ୍ୟା କରିଥିବା ଅଭିଯୋଗ ଆଣିଲେ ପରିବାର ଲୋକ ।
ସୂଚନା ଅନୁସାରେ ଅନ୍ୟ ଜଣେ ଛାତ୍ର ସୂରଜଙ୍କୁ ମାଡ଼ ମାରିଥିଲା । ହେଲେ ମାଡ ମାରିଥିବା ଛାତ୍ରଙ୍କ ନାଁରେ ଅଭିଯୋଗ କଲେ କ୍ୟାରିୟର ବରବାଦ କରିଦେବାର ଧମକ ଦେଇଥିଲେ ସ୍କୁଲ କର୍ତ୍ତୃପକ୍ଷ । ଏନେଇ ପୁଅ ଅବସାଦରେ ରହି ଚରମ ନିଷ୍ପତ୍ତି ନେଇଥିବା ଥାନାରେ ଅଭିଯୋଗ କରିଛନ୍ତି ମୃତ ଛାତ୍ରଙ୍କ ବାପା । ଏହାସହ ମୃତଦେହ ରଖି ଧାରଣାରେ ବସିଥିଲେ ବାପା । ଘଟଣାପରେ ସ୍କୁଲରେ ଉତ୍ତେଜନା ସୃଷ୍ଟି ହୋଇଛି । ଛାତ୍ରଛାତ୍ରୀଙ୍କ ଅଭିଭାବକମାନେ ସ୍କୁଲରେ ପଶି ଭଙ୍ଗାରୁଜା କରିଥିଲେ ।
ରାଜଧାନୀରୁ ଏକ କୁଇଣ୍ଟାଲ ଗଞ୍ଜେଇ ଜବତ, ୫ ଗିରଫ
ଭୁବନେଶ୍ୱର: ରାଜଧାନୀରୁ ପୁଣି ଜବତ ହେଲା ଗଞ୍ଜେଇ । ଭୁବନେଶ୍ୱରର ଆଇଗିଣିଆ ଅଞ୍ଚଳରୁ ଏକ କୁଇଣ୍ଟାଲ ଗଞ୍ଜେଇ ଜବତ କରିଛି ଖଣ୍ଡଗିରି ଥାନା ପୋଲିସ । ଏକ କୁଇଣ୍ଟାଲ ଗଞ୍ଜେଇ ସହ ୫ ଜଣଙ୍କୁ ଗିରଫ କରିଛି ପୋଲିସ । ତେବେ ଜବତ ଗଞ୍ଜେଇର ଆନୁମାନିକ ମୂଲ୍ୟ ୭ ଲକ୍ଷ ଟଙ୍କା ହେବ ବୋଲି ପୋଲିସ ସୂଚନା ଦେଇଛି । ଫୁଲବାଣୀରୁ ଭୁବନେଶ୍ୱର ଗଞ୍ଜେଇ ଆସିଥିଲା । ଜଟଣୀରେ ବିକ୍ରି କରିବାକୁ ଯୋଜନା କରିଥିଲେ । ଗଂଜେଇ କାରବାର ନେଇ ଉକ୍ତ ୫ ଜଣଙ୍କୁ ପୋଲିସ ଅଧିକ ପଚରା ଉଚୁରା ଜାରି ରଖିଛି । ତେବେ ଗଞ୍ଜେଇ ଜବତ ବେଳେ ଗିରଫ ହୋଇଥିବା ୫ ଜଣଙ୍କୁ ଆଜି କୋର୍ଟ ଚାଲାଣ କରାଯିବ ।
ଜାତୀୟ ଟିଭି ରିଆଲିଟି ସୋ’ରେ ଶୁଭିଲା ଓଡ଼ିଶାର ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକଙ୍କ ନାଁ
ନୂଆଦିଲ୍ଲୀ: ଜାତୀୟ ଟିଭି ଚ୍ୟାନେଲର ରିଆଲିଟି ସୋ’ରେ ଶୁଭିଲା ଓଡ଼ିଶାର ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକଙ୍କ ନାଁ । ସୋନୀ ଟିଭିରେ ପ୍ରସାରିତ କୌନ୍ ବନେଗା କରୋଡପତିରେ ପଚରାଗଲା ପଦ୍ମଶ୍ରୀ ସୁଦର୍ଶନ ପଟ୍ଟନାୟକଙ୍କ କଳାକୃତି ନେଇ ପ୍ରଶ୍ନ । ହୋଷ୍ଟ ବିଗ୍ ବି ଅମିତାଭ ବଚ୍ଚନ ଆସିଥିବା ପ୍ରତିଯୋଗୀଙ୍କୁ ସୁଦର୍ଶନ ପଟ୍ଟନାୟକ କେଉଁ ସାମଗ୍ରୀରେ ତାଙ୍କ କଳାକୃତି ପ୍ରଦର୍ଶନ କରନ୍ତି ବୋଲି ପ୍ରଶ୍ନ କରିଥିଲେ । ଆଉ ପ୍ରତିଯୋଗୀ ସୁଦର୍ଶନ ପଟ୍ଟନାୟକ ବାଲିରେ ସୁନ୍ଦର କଳାକୃତି କରନ୍ତି ବୋଲି ଉତ୍ତର ଦେଇଥିଲେ ।
ବିଭିନ୍ନ ସମୟରେ ଭିନ୍ନ ଭିନ୍ନ ଚର୍ଚ୍ଚିତ ଘଟଣା ହେଉ କି କୌଣସି ସ୍ୱତନ୍ତ୍ର ଦିବସ । ସବୁବେଳେ ପୁରୀ ବେଳାଭୂମିରେ ସୁନ୍ଦର ବାଲୁକା କଳା ପ୍ରଦର୍ଶନ କରି ଚର୍ଚ୍ଚା ସାଉଁଟିଛନ୍ତି ସୁଦର୍ଶନ ପଟ୍ଟନାୟକ । ୨୦୧୪ରେ ପଦ୍ମଶ୍ରୀ ପାଇଥିବା ସୁଦର୍ଶନଙ୍କ ବାଲୁକା କଳାର ପ୍ରଶଂସା କେବଳ ରାଜ୍ୟ କାହିଁକି ଦେଶରେ କୋଣ ଅନୁକୋଣରେ ବି ହୁଏ ।
ବର୍ଷା ଆଣିଲା ବିପତ୍ତି, ରାସ୍ତାରେ ଭାସୁଛି ମାଳ ମାଳ ଗାଡ଼ି
ବେଙ୍ଗାଲୁରୁ: ଲଗାଣ ବର୍ଷାରେ ବେହାଲ ବେଙ୍ଗାଲୁରୁ । ଜନଜୀବନ ଅସ୍ତବ୍ୟସ୍ତ ହୋଇଥିବା ବେଳେ ରାସ୍ତାରେ ଭାସୁଛି ମାଳ ମାଳ ଗାଡ଼ି । ୯୦ ବର୍ଷର ରେକର୍ଡ ଭାଙ୍ଗିଛି ବର୍ଷା । ଆଜି ପ୍ରବଳ ବର୍ଷା ନେଇ ସମସ୍ତ ସ୍କୁଲକୁ ବନ୍ଦ ଘୋଷଣା କରାଯାଇଛି । ଲଗାତାର ୪ ଦିନ ହେଲା ଜାରି ରହିଛି ବର୍ଷା । ଫଳରେ ରାସ୍ତାରେ ଡଙ୍ଗା ଚାଲୁଥିବା ବେଳେ ଟ୍ରାକ୍ଟର, ଜେସିବି ଯୋଗେ ଚାଲିଛି ରେସ୍କ୍ୟୁ ଅପରେସନ । ଶହ ଶହ କଲୋନୀ ଜଳମଗ୍ନ ହୋଇଛି । ଅନେକ ଅଞ୍ଚଳକୁ ଦୁଇ ଦିନ ହେଲା ବନ୍ଦ ରହିଛି ବିଦ୍ୟୁତ୍ ଓ ପାନୀୟ ଜଳ ଯୋଗାଣ ।
ପ୍ରଭାବିତ ଅଞ୍ଚଳରେ ଉଦ୍ଧାର କାର୍ଯ୍ୟ ପାଇଁ ଏନଡିଆରଏଫ୍ ଟିମ୍ ନିୟୋଜିତ କରାଯାଇଛି । ଡଙ୍ଗା ଓ ଟ୍ରାକ୍ଟର ଯୋଗେ ରେସ୍କ୍ୟୁ ଅପରେସନ ଜାରି ରଖିଛି ପ୍ରଶାସନ । କର୍ଣ୍ଣାଟକ ସରକାରଙ୍କ ଅବହେଳାକୁ ନେଇ ବର୍ଷିଛି ବିରୋଧୀ କଂଗ୍ରେସ । ସେପଟେ ପୂର୍ବ ସରକାରଙ୍କ ମୁଣ୍ଡକୁ ଦୋଷ ଠେଲିଛନ୍ତି ମୁଖ୍ୟମନ୍ତ୍ରୀ ବାସବରାଜ ବୋମ୍ମାଇ । ବେଙ୍ଗାଲୁରୁ ସହ ଅନ୍ୟ ଜିଲ୍ଲାର ବନ୍ୟା ମୁକାବିଲା ପାଇଁ ୬ ଶହ କୋଟି ମଞ୍ଜୁର କରିଛନ୍ତି ରାଜ୍ୟ ସରକାର ।