ନନ୍ଦିଘୋଷ ବ୍ୟୁରୋ : ବନ୍ଧୁକ ଛାଡ଼ି ଶାନ୍ତିର ବାଟ ଆପଣେଇଲେ ଟପ୍ ମାଓନେତା ବେଣୁଗୋପାଳ ରାଓ ଆଲିଏସ୍ ସୋନୁ। ସେ ନକ୍ସଲଙ୍କ ପଲିଟବ୍ୟୁରୋ ସଦସ୍ୟ ଥିଲେ। ମହାରାଷ୍ଟ୍ରର ଗଡ଼ଚିରୋଲିରେ ୬୦ ନକ୍ସଲଙ୍କ ସହିତ ଆତ୍ମସମର୍ପଣ କରିଛନ୍ତି ବେଣୁଗୋପାଳ। ଏହା ଦ୍ଵାରା ଲାଲବାହିନୀକୁ ବଡ଼ ଧରଣର ଝଟକା ଲାଗିଛି। ଗତ ସେପ୍ଟେମ୍ଵରରେ ମଧ୍ୟ ଏକ ପ୍ରେସରିଲିଜ ଜାରି କରି ଆତ୍ମସମର୍ପଣ ପାଇଁ ଇଚ୍ଛା ପ୍ରକାଶ କରିଥିଲେ ବେଣୁଗୋପାଳ। ଛତିଶଗଡ଼ ଓ ମହାରାଷ୍ଟ୍ରରେ ଲାଲବାହିନୀ ମଧ୍ଯରେ ବେଣୁଗୋପାଳଙ୍କ ବହୁତ ପ୍ରଭାବ ରହିଛି। ସମସ୍ତେ ତାଙ୍କୁ ନେତା ଭାବେ ମାନନ୍ତି। ସେପଟେ ଛତିଶଗଡ଼ ବିଜାପୁରରେ ନକ୍ସଲଙ୍କ ବିପୁଳ ଅସ୍ତ୍ରଶସ୍ତ୍ର ଜବତ ହୋଇଛି। KGH ପର୍ବତର ପାଦଦେଶରେ ଏହି ଅସ୍ତ୍ରଶସ୍ତ୍ର ଲୁଚାଇ ରଖାଯାଇଥିଲା। ସୁରକ୍ଷାକର୍ମୀଙ୍କୁ ଟାର୍ଗେଟ କରି ୫ଟି IED ମଧ୍ୟ ଜଙ୍ଗଲରେ ଖଞ୍ଜା ଯାଇଥିଲା। ତାକୁ ସୁରକ୍ଷାକର୍ମୀମାନେ ନିଷ୍କ୍ରିୟ କରିଦେଇଛନ୍ତି।
ପଶ୍ଟିମବଙ୍ଗରେ ଗଣଦୁଷ୍କର୍ମ ଘଟଣା : ୫ ଅଭିଯୁକ୍ତଙ୍କୁ ନେଇ ପୋଲିସର ସିନ ରିକ୍ରିଏସନ କରୁଛି ପୋଲିସ
ନନ୍ଦିଘୋଷ ବ୍ୟୁରୋ : ପଶ୍ଟିମବଙ୍ଗରେ ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣାରେ ପୋଲିସ ଆଜି ସିନ୍ ରିକ୍ରିଏସନ କରିଛି। ଘଟଣାସ୍ଥଳକୁ ଅଭିଯୁକ୍ତମାନଙ୍କୁ ନେଇ ସିନ୍ ରିକ୍ରିକିଏସନ କରାଯାଇଛି। ଘଟଣା ଦିନ କଣ ହୋଇଥିଲା, କିଏ କିଏ ଥିଲେ, କେମିତି କଣ କରିଥିଲେ ଅଭିଯୁକ୍ତମାନେ, ତାହା ଗୋଟି ଗୋଟି କରି ସେମାନେ ଦେଖାଇଛନ୍ତି। ଏହା ଆଗରୁ ୨ ଅଭିଯୁକ୍ତଙ୍କୁ ମୁହାଁମୁହିଁ ଜେରା କରିଥିଲା ପୋଲିସ ।
ଅଭିଯୁକ୍ତ ଶେଖ ରିଆଜୁଦ୍ଦିନ ଏବଂ ଶେଖ ନାସିରୁଦ୍ଦିନଙ୍କୁ ଜେରା କରାଯାଇଛି। ତଦନ୍ତ ପାଇଁ ଉଭୟଙ୍କୁ ବିଜରା ଗାଁକୁ ନିଆଯାଇଥିଲା। ଏକାଧିକ ଗ୍ରାମବାସୀଙ୍କୁ ମଧ୍ୟ ପରଚାଉଚରା କରାଯାଇଛି। ଘଟଣାସ୍ଥଳରୁ କିଛି ପ୍ରମାଣ ମିଳିଥିବା ଜଣାପଡ଼ିଛି। ଘଟଣା ସହିତ ଆଉ କାହାର ସମ୍ପର୍କ ଅଛି ନା ନାହିଁ ସେ ନେଇ ଛାନବିନ ଜାରି ରହିଛି। ବିଜରା ଅଂଚଳରେ ଆଉ କିଛି ଅଭିଯୁକ୍ତ ଲୁଚି ଥାଇପାରନ୍ତି। ସେଥି ଲାଗି ଦୁର୍ଗାପୁରର ନ୍ୟୁ ଟାଉନସିପ୍ ପୋଲିସ ଥାନା ଏବଂ ଦୁର୍ଗାପୁର ପୋଲିସ ଥାନାର ଏକ ମିଳିତ ଟିମ ଛାନବିନ କରୁଛି।
ଗତ ଶୁକ୍ରବାର ଘଟିଥିଲା ଏ ଲୋମହର୍ଷକ ଘଟଣା। ଛାତ୍ରୀ ଜଣକ ପୁରୁଷ ବନ୍ଧୁ ସହ ଖାଇବାକୁ ଯାଇଥିବାବେଳେ ଦୁର୍ବୃତ୍ତ ଉଠାଇ ନେଇ ଗଣଦୁଷ୍କର୍ମ କରିଥିବା ଅଭିଯୋଗ ହୋଇଥିଲା। ମାମଲାରେ ବର୍ତ୍ତମାନ ସୁଦ୍ଧା ୫ ଜଣଙ୍କୁ ଗିରଫ କରିଛି ପୋଲିସ। ୩ ଅଭିଯୁକ୍ତଙ୍କୁ ୧୦ ଦିନିଆ ରିମାଣ୍ଡରେ ନେଇଛି। ସେପଟେ ଦୁର୍ଗାପୁର ମେଡିକାଲ କଲେଜରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ବ୍ୟାରିକେଡ୍ ସହିତ ତାର ଲଗାଯାଇଛି ଏବଂ ଅଧିକ ସଂଖ୍ୟକ ସୁରକ୍ଷାକର୍ମୀ ମୁତୟନ ହୋଇଛନ୍ତି।
ଏଗୁଡ଼ିକ କଫ ସିରପ୍ ନୁହେଁ, ଏଗୁଡ଼ିକ ବିଷ : ତିନୋଟି କମ୍ପାନୀ ବିରୁଦ୍ଧରେ WHOର କଠୋର କାର୍ଯ୍ୟାନୁଷ୍ଠାନ
ନନ୍ଦିଘୋଷ ବ୍ୟୁରୋ : ଭାରତରେ ବିଷାକ୍ତ କଫ ସିରପ ଯୋଗୁଁ ୨୦ ରୁ ଅଧିକ ଶିଶୁଙ୍କ ମୃତ୍ୟୁ ହୋଇଛି। ବିଶ୍ୱ ସ୍ୱାସ୍ଥ୍ୟ ସଂଗଠନ ( WHO) ଏହି ବିଷୟକୁ ଗୁରୁତର ସହ ନେବା ସହ ତିନୋଟି ଔଷଧ କମ୍ପାନୀକୁ ସେମାନଙ୍କର କଫ ସିରପ ସମ୍ପର୍କରେ ଚେତାବନୀ ଜାରି କରିଛି। ଏଥିରେ କୋଲଡ୍ରିଫ୍ ମଧ୍ୟ ଅନ୍ତର୍ଭୁକ୍ତ, ଯାହା ମଧ୍ୟପ୍ରଦେଶରେ ଅନେକ ଶିଶୁଙ୍କ ମୃତ୍ୟୁର କାରଣ ହୋଇଛି। ଯଦି କୌଣସି ସ୍ଥାନରେ ଏହି କଫ ସିରପ ଦେଖାଯାଏ ତେବେ ତୁରନ୍ତ ରିପୋର୍ଟ କରିବାକୁ WHO ଲୋକଙ୍କୁ ଅନୁରୋଧ କରିଛି।
ରଏଟର୍ସ ଅନୁଯାୟୀ, ବିଶ୍ୱ ସ୍ୱାସ୍ଥ୍ୟ ସଂସ୍ଥା ଶ୍ରୀସାନ ଫାର୍ମାର କୋଲଡ୍ରିଫ୍, ରେଡନେକ୍ସ ଫାର୍ମାର ରେସ୍ପିଫ୍ରେସ୍ ଟିଆର ଏବଂ ସେପ୍ ଫାର୍ମାର ରିଲାଇଫ୍ ସିରପ୍କୁ ଅପମିଶ୍ରିତ ଭାବରେ ଚିହ୍ନଟ କରିଛି। WHO ଅନୁଯାୟୀ ଏହି ସିରପ୍ ସ୍ୱାସ୍ଥ୍ୟ ପାଇଁ ବିପଦ ସୃଷ୍ଟି କରେ ଏବଂ ମାରାତ୍ମକ ରୋଗ ସୃଷ୍ଟି କରିପାରେ।
ଏହି କାଶ ଔଷଧର ପରୀକ୍ଷା କରିବା ପରେ ଏଥିରେ ଡାଇଥିଲିନ୍ ଗ୍ଲାଇକଲ୍ ନାମକ ଏକ ବିଷାକ୍ତ ରାସାୟନିକ ପଦାର୍ଥ ଥବା ଜଣାପଡ଼ିଲା, ଯାହା ବହୁ ପରିମାଣରେ ବ୍ୟବହୃତ ହୋଇଥାଏ। ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ରାସାୟନିକ ପଦାର୍ଥ ରଙ୍ଗହୀନ ଏବଂ ଗନ୍ଧହୀନ, ଯାହା ପରୀକ୍ଷା ବିନା ଏହାକୁ ଚିହ୍ନଟ କରିବା କଷ୍ଟକର ହୋଇଥାଏ। ଏହାକୁ ସିରପକୁ ମିଠା କରିବା ପାଇଁ ବ୍ୟବହାର କରାଯାଏ। ଏହା ମଧ୍ୟ ଆଶ୍ଚର୍ଯ୍ୟଜନକ ଯେ ଡାଇଥିଲିନ୍ ଗ୍ଲାଇକର ବ୍ୟବହାର ମାନବ ସ୍ୱାସ୍ଥ୍ୟ ପାଇଁ ବିପଦପୂର୍ଣ୍ଣ।
ତାମିଲନାଡୁର ଶ୍ରୀସାନ ଔଷଧ କମ୍ପାନୀର ଲାଇସେନ୍ସକୁ ସମ୍ପୂର୍ଣ୍ଣ ରଦ୍ଦ କରାଯାଇଛି। ଏକ ଯାଞ୍ଚ ସମୟରେ, ରାଜ୍ୟ ଔଷଧ ନିୟନ୍ତ୍ରଣ ବିଭାଗର ଅଧିକାରୀମାନେ ଜାଣିବାକୁ ପାଇଲେ ଯେ କଫ ସିରପରେ ୪୮.୬ ପ୍ରତିଶତ ଡାଇଥାଇଲିନ୍ ଗ୍ଲାଇକଲ୍ (DEG) ରହିଛି। କମ୍ପାନୀର ମାଲିକ ଜି. ରଙ୍ଗନାଥନଙ୍କୁ ସମ୍ପ୍ରତି ଗିରଫ କରାଯାଇଥିଲା।
ଆଶାୟୀ ପ୍ରାର୍ଥୀମାନଙ୍କୁ ଟିକଟ ବାଣ୍ଟିବା ପରେ ଫେରାଇବାକୁ ନିର୍ଦ୍ଦେଶ
ନନ୍ଦିଘୋଷ ବ୍ୟୁରୋ : ବିଧାନସଭା ନିର୍ବାଚନକୁ ନେଇ ବିହାରରେ ଘଡ଼ିକେ ଘୋଡ଼ା ଛୁଟୁଛି। ଆଶାୟୀ ପ୍ରାର୍ଥୀମାନଙ୍କୁ ଟିକଟ ବାଣ୍ଟିବା ପରେ ଆରଜେଡି ସେହି ଟିକେଟ ସବୁ ଫେରାଇ ଦେବାକୁ କହିଛିି। ଏହାକୁ ନେଇ ଦଳରେ ଲାଗି ରହିଛି ଦ୍ଵନ୍ଦ୍ଵ। ଗତ ରାତିରେ ହିଁ ଟିକଟ ବଣ୍ଟା ଯାଇଥିଲା। କିଛି ପରେ ହିଁ ସମସ୍ତଙ୍କୁ ଫୋନ ଯାଇଥିଲା, ଟିକଟ ଫେରାଇ ଦିଅ। ଏହାର କାରଣ ସଂପର୍କରେ ଆରଜେଡି ନେତା ବି କିଛି ଜାଣି ପାରୁ ନାହାନ୍ତି। ସିଟ ଭାଗବଣ୍ଟା ପାଇଁ ଲାଲୁ ଓ ତେଜସ୍ଵୀ ଯାଦବ ଦିଲ୍ଲୀ ଯାଇଥିଲେ। ଗତକାଲି ସଂଧ୍ୟାରେ ଦିଲ୍ଲୀରୁ ଲାଲୁ ଯାଦବ ଫେରିବା ପରେ ଆଶାୟୀଙ୍କୁ ଡାକି ଟିକଟ ଦିଆଯାଇଥିଲା।
କିଛି ସମୟ ପରେ ଦିଲ୍ଲୀରୁ ଫେରି ପାଟନା ବାସଭବନରେ ପହଞ୍ଚିଥିଲେ ତେଜସ୍ଵୀ ଯାଦବ। ଏହା ପରେ ପରେ ଯେଉଁମାନଙ୍କୁ ଟିକଟ ଦିଆଯାଇଥିଲା, ସମସ୍ତଙ୍କୁ ଫୋନ ଯାଇଥିଲା ଓ ଟିକଟ ଫେରାଇ ଦେବାକୁ କୁହାଯାଇଥିଲା। ମହାଗଠବନ୍ଧନର ଏଯାଏ ସିଟ୍ ବଣ୍ଟନ ହୋଇନାହିଁ। ଏହାକୁ ନେଇ ସମସ୍ଯା ଥିବା କୁହାଯାଉଛି। ମହାଗଠନବନ୍ଧନରେ ଅଛନ୍ତି ଆରଜେଡି, କଂଗ୍ରେସ, ବାମମେଣ୍ଟ, ବିକାଶଶୀଳ ଇନସାନ ପାର୍ଟି, ଜେଏମଏମ୍ ଓ RLJP । ସେପଟେ ଏନଡିଏ ମେଣ୍ଟର ଭାଗବଣ୍ଟା ସରିଛି ଏବଂ ସେମାନେ ନିର୍ବାଚନରେ ମାତିଲେଣି। ୨୪୩ ଆସନ ବିଶିଷ୍ଟ ବିହାର ବିଧାନସଭା ନିର୍ବାଚନ ୨ଟି ପର୍ଯ୍ୟାୟରେ ହେବ। ନଭେମ୍ବର ୬ ଓ ନଭେମ୍ବର ୧୧ରେ। ୧୪ ତାରିଖରେ ବାହାରିବ ରେଜଲ୍ଟ।
ଜେଲରୁ କଏଦୀ ଫେରାର ହେବା ପରେ ତତ୍ପରତା; ଏଥର ହେବ ସରପ୍ରାଇଜ ଭିଜିଟ
ନନ୍ଦିଘୋଷ ବ୍ୟୁରୋ : ଏଥର ହେବ ସରପ୍ରାଇଜ ଭିଜିଟ । ରାଜ୍ୟରେ ଥିବା ସମସ୍ତ ଜେଲକୁ ସରପ୍ରାଇଜ ଭିଜିଟ କରିବା ପାଇଁ ସମସ୍ତ ଜିଲ୍ଲାପାଳ ଓ ଏସପି ମାନଙ୍କୁ ନିର୍ଦ୍ଦେଶ । ଜେଲ ଡିଜି ସୁଶାନ୍ତ ନାଥ ସମସ୍ତ ଜିଲ୍ଲାପାଳ ଓ ଏସପି ମାନଙ୍କୁ କରିଛନ୍ତି ସ୍ୱତନ୍ତ୍ର ଚିଠି । ଚୌଦ୍ୱାର ଜେଲରୁ କଏଦୀ ଫେରାର ହେବା ପରେ ତତ୍ପରତା ପ୍ରକାଶ କରିଛି ଜେଲ ବିଭାଗ ।। ଜେଲ ଭିତରେ ଅନେକ ଅନୈତିକ କରବାର ହେଉଥିବା ନେଇ ଅନେକ ଅଭିଯୋଗ ମଧ୍ୟ ପୂର୍ବରୁ ଆସିଛି ।ବିଭିନ୍ନ ସମୟରେ ଜେଲ କଏଦୀଙ୍କ ନିକଟରୁ ନିଶା ଦ୍ରବ୍ୟ, ମାଦକ ଦ୍ରବ୍ୟ, ମୋବାଇଲ ଫୋନ ଓ ମରଣାସ୍ତ୍ର ମଧ୍ୟ ଜବତ ହୋଇଥାଏ ।
ଏସବୁକୁ ପ୍ରତିରୋଧ କରିବା ପାଇଁ ଜେଲ ବିଭାଗ ପକ୍ଷରୁ ସମସ୍ତ ଜିଲ୍ଲାର ଜିଲ୍ଲାପାଳ ଓ ଏସପି ମାନଙ୍କୁ ସ୍ୱତନ୍ତ୍ର ଚିଠି କରାଯାଇଛି । ଗତ ୩ ତାରିଖରେ ଚୌଦ୍ୱାର ଜେଲରୁ ଚମ୍ପଟ ମାରିଥିଲେ ମଧୁକାନ୍ତ ରଣା ଓ ରାଜା ସାହାଣୀ । ଆରି ସାହାଯ୍ୟରେ ସେଲକୁ କାଟି ଦୁହେଁ ଖସି ଚାଲିଯାଇଥିଲେ। ଘଟଣାର ବିଚାର ବିଭାଗୀୟ ତଦନ୍ତ ଚାଲିଥିବା ବେଳେ ଗତକାଲି ବଦଳିଥିଲେ ଚୌଦ୍ୱାର ଜେଲର ଜେଲର । ଚୌଦ୍ୱାର ଜେଲର ସନ୍ତୋସିନୀ ଦାସଙ୍କ ବଦଳି କରାଯାଇଥିଲା । କଣ୍ଟାବାଞ୍ଜି ସବ ଜେଲକୁ ସନ୍ତୋସିନୀଙ୍କ ବଦଳି ହୋଇଥିଲା । ସେପଟେ କଣ୍ଟାବାଞ୍ଜିରେ ଜେଲର ଥିବା ରଘୁରାଜ ମାଝୀଙ୍କୁ ମିଳିଥିଲା ଚୌଦ୍ୱାର ଦାୟିତ୍ୱ ।
ସିକ୍ରେଟ ଚ୍ୟାମ୍ବରରେ ଚାଲିଥିଲା ଦେଶୀ ମଦ ଭାଟି, ଚଢାଉ କରି ଧରିଲା ଅବକାରୀ ବିଭାଗ
ନନ୍ଦିଘୋଷ ବ୍ୟୁରୋ : ପୁଣି ସିକ୍ରେଟ ଚ୍ୟାମ୍ବରରେ ଦେଶୀ ମଦ ଭାଟିର ସନ୍ଧାନ ପାଇଛି ଭୁବନେଶ୍ବର ଅବକାରୀ ବିଭାଗ। ସିକ୍ରେଟ ଚାମ୍ବର ଭିତରେ ଦେଶୀ ମଦ କାରଖାନା ଠାବ କରିଛି। ସାଲିଆସାହି ବୀରବାସା ବସ୍ତିରେ ଚଢାଉ କରି ଏହି ଦେଶୀ ମଦ ଭାଟି ଠାବ କରିଛି ଅବକାରୀ ବିଭାଗ। ପୂର୍ବରୁ ସାଲିଆସାହି ବୀରବାସା ବସ୍ତିରେ ଏକ ବେଡ଼ରୁମ ଭିତରେ ଥିବା ଏକ ମହୁଲି ମଦ ଭାଟି ଠିକଣା ଉପରେ ଚଢାଉ କରିଥଲା। ଏହାକୁ କରିଥିବା BMCରେ କାର୍ଯ୍ୟରତ ଜଣେ ଡ୍ରାଇଭରକୁ ଗିରଫ କରିଥିଲା ଅବକାରୀ ବିଭାଗ।
ରିଆଣାର ଅତିରିକ୍ତ ପୋଲିସ ମହାନିର୍ଦ୍ଦେଶକ ଆତ୍ମହତ୍ୟା ଘଟଣା : ଦୁଇ ପୋଲିସ ଅଧିକାରୀଙ୍କ ନାଁରେ ଏତଲା
ନନ୍ଦିଘୋଷ ବ୍ୟୁରୋ : ହରିଆଣାର ଅତିରିକ୍ତ ପୋଲିସ ମହାନିର୍ଦ୍ଦେଶକ ୱାଇ. ପୂରନ କୁମାର ଆତ୍ମହତ୍ୟା ଘଟଣା। ହରିୟାଣା ଡିଜିପି ଶତ୍ରୁଜିତ କପୁରଙ୍କୁ ଛୁଟିରେ ପଠାଇଲେ ସରକାର। ଆପିଏସଙ୍କ IAS ପତ୍ନୀଙ୍କୁ ମଧ୍ୟ ପୋଲିସ ନୋଟିସ କରିଛି। ମାମଲାରେ ରୋହତକଙ୍କ ଏସପିଙ୍କୁ ଅନ୍ୟତ୍ର ବଦଳି କରାଯାଇଛି। ଆଜି କଂଗ୍ରେସ ସାଂସଦ ରାହୁଲ ଗାନ୍ଧିଙ୍କ ହରିୟାଣା ଗସ୍ତ ପୂର୍ବରୁ ଡିଜିପିଙ୍କୁ ଛୁଟିରେ ପଠାଯାଇଛି।
ଆଇପିଏସ୍ ଅଧିକାରୀ ୱାଇ.ପୁରନଙ୍କ ଆତ୍ମହତ୍ୟା ମାମଲାରେ ପ୍ରତିଦିନ ସାମ୍ନାକୁ ଆସୁଛି ନୂଆ ଖୁଲାସା। ରୋହତକ ଏସ୍ପି ନରେନ୍ଦ୍ର ବିଜାର୍ନିଆଙ୍କୁ ପୂର୍ବରୁ ବଦଳି କରାଯାଇଥିଲା। ଆଜି ବିରୋଧୀ ଦଳ ନେତା ରାହୁଲ ଗାନ୍ଧୀ ଏବଂ କେନ୍ଦ୍ରମନ୍ତ୍ରୀ ଚିରାଗ ପାସୱାନ ଚଣ୍ଡିଗଡ଼ ଗସ୍ତରେ ଯାଉଛନ୍ତି। ଉଭୟ ନେତା ଆଇପିଏସ୍ ଅଧିକାରୀ ୱାଇ ପୁରନଙ୍କ ପରିବାର ସହିତ ସାକ୍ଷାତ କରିବେ। ଏହା ପୂର୍ବରୁ ହରିୟାଣା ଡିଜିପିଙ୍କୁ ଛୁଟିରେ ପଠାଯାଇଛି।ଗତକାଲି ବିଳମ୍ବିତ ରାତିରେ ହରିୟାଣା ଡିଜିପିଙ୍କୁ ଛୁଟିରେ ପଠାଇବାର ନିଷ୍ପତ୍ତି ନିଆଯାଇଛି। ଆଇପିଏସ୍ ଆତ୍ମହତ୍ୟା ମାମଲା ପରେ ନାୟବ ସିଂହ ସାଇନି ସରକାରଙ୍କ ଉପରେ ହରିୟାଣା ଡିଜିପିଙ୍କୁ ହଟାଇବା ପାଇଁ ଚାପ ବଢ଼ୁଥିଲା।
ଆଇପିଏସ୍ ଅଧିକାରୀ ୱାଇ.ପୁରନ ଏବଂ ତାଙ୍କ ପରିବାର ପାଇଁ ନ୍ୟାୟ ଦାବି କରି ଅନେକ ଦଳିତ ସଂଗଠନ ଏକତ୍ରିତ ହୋଇ ଏକ ମହାପଞ୍ଚାୟତ ଡକାଇଥିଲେ। ସେମାନେ ସରକାରଙ୍କୁ ୪୮ ଘଣ୍ଟା ମଧ୍ୟରେ ଗୁରୁତ୍ୱପୂର୍ଣ୍ଣ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରିଥିଲେ। ଏହି ୪୮ ଘଣ୍ଟା ଆଜି ଶେଷ ହେଉଛି। ଗତ ୭ ତାରିଖରେ ଚଣ୍ଡିଗଡସ୍ଥିତ ସେକ୍ଟର ୧୧ ବାସଭବନରେ ନିଜ ସର୍ଭିସ ରିଭଲଭରରୁ ମୁଣ୍ଡକୁ ଗୁଳି କରି ଆତ୍ମହତ୍ୟା କରିଥିଲେ ଅତିରିକ୍ତ ପୋଲିସ ମହାନିର୍ଦ୍ଦେଶକ ୱାଇ. ପୂରନ କୁମାର। ମୃତ୍ୟୁ ପୂର୍ବରୁ ସେ ଏକ ଉଇଲ ଓ ୯ ପୃଷ୍ଠାର ସୁଇସାଇଡ ନୋଟ ଛାଡି ଯାଇଥିଲେ। ସେଥିରେ ଚାକିରିଜନିତ ସମସ୍ୟାକୁ ସେ ଉଲ୍ଲେଖ କରିଥିଲେ। ତାଙ୍କ ମୃତ୍ୟୁକୁ ନେଇ ଆଇନର ଆଶ୍ରୟ ନେଇଛନ୍ତି ୨୦୦୧ ବ୍ୟାଚ ଆଇଏଏସ ଅଧିକାରୀ ତଥା ପତ୍ନୀ ଅନମିତ। ସ୍ବାମୀଙ୍କୁ ଜାତିଭିତ୍ତିକ କଟାକ୍ଷ କରାଯିବା ଏବଂ ଚାକିରି କ୍ଷେତ୍ରରେ ନିର୍ଯାତନାର ସମ୍ମୁଖୀନହୋଇ ଆତ୍ମହତ୍ୟା କରିଥିଲେ ବୋଲି କହିଥିଲେ ଅନମିତ।
କେରଳ କନ୍ନୁରରେ ୨ ଓଡ଼ିଆ ମତ୍ସ୍ୟଜୀବୀ ମୃତ
ନନ୍ଦିଘୋଷ ବ୍ୟୁରୋ : ଚିକିତ୍ସା ଅବହେଳାରୁ ଦୁଇ ଓଡିଆ ମସ୍ୟଜୀବୀଙ୍କ ମୃତ୍ୟୁ। କେରଳ କନୁର ଜିଲ୍ଲା ପାରିୟାରମ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ହୋଇଛି ମୃତ୍ୟୁ। ମୃତ ଦୁଇ ଓଡିଆ ମସ୍ୟଜୀବୀ ହେଲେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ବାଲିପାଟପୁର ଗ୍ରାମର ନିଗମ ବେହେରା ଓ ସୁବାସ ବେହେରା। ସୁବାସଙ୍କର ଗତକାଲି ମୃତ୍ୟୁ ହୋଇଥିବା ବେଳେ ଆଜି ଭୋର ସମୟରେ ନିଗମ ବେହେରାଙ୍କର ମୃତ୍ୟୁ ହୋଇଥିବା ଜଣା ପଡିଛି। ପରିବାର ଲୋକେ ରାଜ୍ୟ ସରକାରଙ୍କୁ ସହାୟତା ପାଇଁ ଅନୁରୋଧ କରିଛନ୍ତି। କେରଳ କନ୍ନୁର ଜିଲ୍ଲାରେ ମାଛଧରା କାର୍ଯ୍ୟରେ ନିୟୋଜିତ ହୋଇଛନ୍ତି ଓଡିଶାର ଅନେକ ମତ୍ସ୍ଯଜୀବୀ। ପ୍ରତିଦିନ ଗଭୀର ସମୁଦ୍ରକୁ ମାଛ ଧରିବାକୁ ଯାଉଥିଲେ। କ୍ୟାମ୍ପରେ ଶୋଇଥିବାବେଳେ ଗତ ୧୦ ତାରିଖ ଭୋର ସମୟରେ ଗ୍ୟାସ ସିଲିଣ୍ଡର ବିସ୍ଫୋରଣରେ ୪ ଓଡ଼ିଆ ମତ୍ସ୍ଯଜୀବୀ ଗୁରୁତର ହୋଇପଡିଥିଲେ। ସେମାନଙ୍କୁ କନୁର ଜିଲ୍ଲାର ପାରିୟାରମ ମେଡିକାଲ କଲେଜରେ ଚିକିତ୍ସା ଲାଗି ଭର୍ତ୍ତି କରାଯାଇଥିଲା। ଚିକିତ୍ସାରେ ଅବହେଳାରୁ ମୃତ୍ଯୁ ହୋଇଥିବା ଅଭିଯୋଗ କରିଛନ୍ତି ପରିବାର ଲୋକେ
ଓଡ଼ିଆ ଡାକ୍ତରୀ ଛାତ୍ରୀ ଗଣଦୁଷ୍କର୍ମ ଘଟଣା: ଗିରଫ ଅଭିଯୁକ୍ତଙ୍କୁ ମୁହାଁମୁହିଁ ଜେରା
ନନ୍ଦିଘୋଷ ବ୍ୟୁରୋ : ପଶ୍ଚିମବଂଗ ଦୁର୍ଗାପୁରରେ ଘରୋଇ ମେଡିକାଲ କଲେଜରେ ଓଡ଼ିଆ ଡାକ୍ତରୀ ଛାତ୍ରୀଙ୍କୁ ଗଣଦୁଷ୍କର୍ମ ଘଟଣା । ତଦନ୍ତକୁ ତ୍ୱରାନ୍ୱିତ କରିବା ପାଇଁ ପୋଲିସ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି । କିଛି ସମୟ ପୂର୍ବରୁ ଗିରଫ ଦୁଇ ଜଣ ଶେଖ ରିଆଜୁଦ୍ଦିନ ଏବଂ ଶେଖ ନାସିରୁଦ୍ଦିନଙ୍କୁ ତଦନ୍ତ ପାଇଁ ବିଜରା ଗାଁକୁ ନିଆଯାଇଥିଲା। ଉଭୟ ଅଭିଯୁକ୍ତଙ୍କୁ ମୁହାଁମୁହିଁ ଜେରା କରାଯାଇଥିବା ସୂଚନା।ଏଥିସହିତ ଏକାଧିକ ଗ୍ରାମବାସୀଙ୍କୁ ମଧ୍ୟ ପରଚାଉଚରା କରାଯାଇଛି। ଘଟଣାସ୍ଥଳରୁ କିଛି ପ୍ରମାଣ ମିଳିଥିବା ଜଣାପଡ଼ିଛି। ଖୁବଶୀଘ୍ର ଅଭିଯୁକ୍ତଙ୍କୁ ନେଇ ସିନ ରିକ୍ରିଏସନ କରାଯିବ। ଘଟଣା ସହିତ ଆଉ କାହାର ସମ୍ପର୍କ ଅଛି ନା ନାହିଁ ସେ ନେଇ ଛାନବିନ ଜାରି ରହିଛି। ବିଜରା ଅଂଚଳରେ ଆଉ କିଛି ଅଭିଯୁକ୍ତ ଲୁଚି ଥାଇପାରନ୍ତି।ସେଥିଲାଗି ଦୁର୍ଗାପୁରର ନ୍ୟୁ ଟାଉନସିପ୍ ପୋଲିସ ଷ୍ଟେସନ ଏବଂ ଦୁର୍ଗାପୁର ପୋଲିସ ଷ୍ଟେସନର ଏକ ମିଳିତ ପୋଲିସ ଟିମ ଛାନବିନ କରୁଛି।
ଜମ୍ମୁ-କାଶ୍ମୀରରେ ସେନାକୁ ବଡ଼ ସଫଳତା, କୁପୱାଡ଼ାରେ ଦୁଇ ଆତଙ୍କବାଦୀ ସଫା
ନନ୍ଦିଘୋଷ ବ୍ୟୁରୋ : ଜମ୍ମୁ ଓ କାଶ୍ମୀରର କୁପୱାଡା ଜିଲ୍ଲାରେ LoC ନିକଟରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳିବିନିମୟ। ଏହି ଅପରେସନରେ ଦୁଇ ଆତଙ୍କବାଦୀ ନିପାତ । ଏହି ଅଞ୍ଚଳରେ ଆହୁରି ଆତଙ୍କବାଦୀ ଲୁଚି ରହିଥିବା ସନ୍ଦେହ କରାଯାଉଛି । ସେନାର ଅପରେସନ ଏବେ ବି ଜାରି ରହିଛି। ସୁରକ୍ଷା ବାହିନୀ ଅନୁପ୍ରବେଶ ଉଦ୍ୟମ ସମ୍ପର୍କରେ ସୂଚନା ପାଇବା ପରେ ଅପରେସନ ଆରମ୍ଭ ହୋଇଥିଲା। ଭାରତୀୟ ସେନା ସମଗ୍ର ଅଞ୍ଚଳକୁ ଘେରାବନ୍ଦୀ କରି ସର୍ଚ୍ଚ ଅପରେସନକୁ ଜୋରଦାର କରିଛି। ଗତ କିଛି ଦିନ ମଧ୍ୟରେ ସୀମା ପାରରୁ ଆତଙ୍କବାଦୀ କାର୍ଯ୍ୟକଳାପ ପୁଣି ଥରେ ବୃଦ୍ଧି ପାଇଛି।
ଆତଙ୍କବାଦୀଙ୍କ ଆଡ୍ଡାର ପର୍ଦ୍ଦାଫାସ
ସେନା ଏବଂ ପୋଲିସଙ୍କ ମିଳିତ ଅଭିଯାନରେ ୱାରସନ ଅଞ୍ଚଳର ବ୍ରିଜଥୋର ଜଙ୍ଗଲରେ ଏକ ଆତଙ୍କବାଦୀ ଆଡ୍ଡା ଠାବ କରିଥିଲେ। ସୁରକ୍ଷା ବାହିନୀ ଦୁଇଟି AK-ସିରିଜ ରାଇଫଲ, ଚାରୋଟି ରକେଟ ଲଞ୍ଚର, ଏକ ବଡ଼ ପରିମାଣର ଗୁଳିଗୋଳା ଏବଂ ଅନ୍ୟାନ୍ୟ ଯୁଦ୍ଧ ସାମଗ୍ରୀ ଜବତ କରିଥିଲେ। ଅଧିକାରୀଙ୍କ ଅନୁଯାୟୀ, ଶ୍ରୀନଗରରେ ଭାରତୀୟ ସେନାର ଚିନାର କୋରପସ ଦ୍ୱାରା ପ୍ରାପ୍ତ ଗୁପ୍ତ ସୂଚନା ଆଧାରରେ ଏହି ଅଭିଯାନ ଆରମ୍ଭ କରାଯାଇଥିଲା। ଅଞ୍ଚଳରେ ଲୁଚି ରହିଥିବା ଅନ୍ୟ ଆତଙ୍କବାଦୀଙ୍କୁ ଖୋଜିବା ପାଇଁ ସର୍ଚ୍ଚ ଅପରେସନ୍ ଜାରି ରହିଛି।